Read in తెలుగు / ಕನ್ನಡ / தமிழ் / देवनागरी / English (IAST)
ಪೂರ್ವಾಙ್ಗಂ ಪಶ್ಯತು ॥
ಹರಿದ್ರಾ ಗಣಪತಿ ಪೂಜಾ ಪಶ್ಯತು ॥
ಪುನಃ ಸಙ್ಕಲ್ಪಮ್ –
ಪೂರ್ವೋಕ್ತ ಏವಂ ಗುಣ ವಿಶೇಷಣ ವಿಶಿಷ್ಟಾಯಾಂ ಶುಭ ತಿಥೌ ಶ್ರೀ ಮಹಾಲಕ್ಷ್ಮೀ ಅನುಗ್ರಹಪ್ರಸಾದ ಸಿದ್ಧ್ಯರ್ಥಂ ಶ್ರೀ ಮಹಾಲಕ್ಷ್ಮೀ ಪ್ರೀತ್ಯರ್ಥಂ ಶ್ರೀ ಸೂಕ್ತ ವಿಧಾನೇನ ಧ್ಯಾನ ಆವಾಹನಾದಿ ಷೋಡಶೋಪಚಾರ ಪೂಜಾಂ ಕರಿಷ್ಯೇ ॥
ಧ್ಯಾನಮ್ –
ಯಾ ಸಾ ಪದ್ಮಾ॑ಸನ॒ಸ್ಥಾ ವಿಪುಲಕಟಿತಟೀ ಪದ್ಮ॒ಪತ್ರಾ॑ಯತಾ॒ಕ್ಷೀ ।
ಗಮ್ಭೀರಾ ವ॑ರ್ತನಾ॒ಭಿಃ ಸ್ತನಭರ ನಮಿತಾ ಶುಭ್ರ ವಸ್ತ್ರೋ॑ತ್ತರೀ॒ಯಾ ।
ಲಕ್ಷ್ಮೀರ್ದಿ॒ವ್ಯೈರ್ಗಜೇನ್ದ್ರೈರ್ಮ॒ಣಿಗಣ ಖಚಿತೈಸ್ಸ್ನಾಪಿತಾ ಹೇ॑ಮಕು॒ಮ್ಭೈಃ ।
ನಿ॒ತ್ಯಂ ಸಾ ಪ॑ದ್ಮಹ॒ಸ್ತಾ ಮಮ ವಸ॑ತು ಗೃ॒ಹೇ ಸರ್ವ॒ಮಾಙ್ಗಲ್ಯ॑ಯುಕ್ತಾ ॥
ಲ॒ಕ್ಷ್ಮೀಂ ಕ್ಷೀರಸಮುದ್ರರಾಜತನಯಾಂ ಶ್ರೀ॒ರಙ್ಗಧಾಮೇ॑ಶ್ವರೀಮ್ ।
ದಾ॒ಸೀಭೂತಸಮಸ್ತ ದೇವ ವ॒ನಿತಾಂ ಲೋ॒ಕೈಕ॒ ದೀಪಾ॑ಙ್ಕುರಾಮ್ ।
ಶ್ರೀಮನ್ಮನ್ದಕಟಾಕ್ಷಲಬ್ಧ ವಿಭವ ಬ್ರ॒ಹ್ಮೇನ್ದ್ರಗಙ್ಗಾ॑ಧರಾಮ್ ।
ತ್ವಾಂ ತ್ರೈ॒ಲೋಕ್ಯ॒ ಕುಟು॑ಮ್ಬಿನೀಂ ಸ॒ರಸಿಜಾಂ ವ॒ನ್ದೇ ಮುಕು॑ನ್ದಪ್ರಿಯಾಮ್ ॥
ಸಹಸ್ರದಲಪದ್ಮಸ್ಯ ಕರ್ಣಿಕಾವಾಸಿನೀಂ ಪರಾಮ್ ।
ಶರತ್ಪಾರ್ವಣಕೋಟೀನ್ದುಪ್ರಭಾಜುಷ್ಟಕರಾಂ ವರಾಮ್ ॥
ಸ್ವತೇಜಸಾ ಪ್ರಜ್ವಲನ್ತೀಂ ಸುಖದೃಶ್ಯಾಂ ಮನೋಹರಾಮ್ ।
ಪ್ರತಪ್ತಕಾಞ್ಚನನಿಭಾಂ ಶೋಭಾಂ ಮೂರ್ತಿಮತೀಂ ಸತೀಮ್ ।
ರತ್ನಭೂಷಣಭೂಷಾಢ್ಯಾಂ ಶೋಭಿತಾಂ ಪೀತವಾಸಸಾ ।
ಈಷದ್ಧಾಸ್ಯಪ್ರಸನ್ನಾಸ್ಯಾಂ ರಮ್ಯಾಂ ಸುಸ್ಥಿರಯೌವನಾಮ್ ॥
ಸರ್ವಸಮ್ಪತ್ಪ್ರದಾತ್ರೀಂ ಚ ಮಹಾಲಕ್ಷ್ಮೀಂ ಭಜೇ ಶುಭಾಮ್ ।
ಧ್ಯಾನೇನಾನೇನ ತಾಂ ಧ್ಯಾತ್ವಾ ಚೋಪಚಾರೈಃ ಸುಸಮ್ಯುತಃ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಧ್ಯಾಯಾಮಿ ।
ಆವಾಹನಮ್ –
ಹಿರ॑ಣ್ಯವರ್ಣಾಂ॒ ಹರಿ॑ಣೀಂ ಸುವ॒ರ್ಣ ರ॑ಜತ॒ಸ್ರ॑ಜಾಮ್ ।
ಚ॒ನ್ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ಮಾವ॑ಹ ॥
ಸಹಸ್ರದಲಪದ್ಮಸ್ಥಾಂ ಸ್ವಸ್ಥಾಂ ಚ ಸುಮನೋಹರಾಮ್ ।
ಶಾನ್ತಾಂ ಚ ಶ್ರೀಹರೇಃ ಕಾನ್ತಾಂ ತಾಂ ಭಜೇ ಜಗತಾಂ ಪ್ರಸೂಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಆವಾಹಯಾಮಿ ।
ಆಸನಮ್ –
ತಾಂ ಮ॒ ಆ ವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀ᳚ಮ್ ।
ಯಸ್ಯಾಂ॒ ಹಿರ॑ಣ್ಯಂ ವಿ॒ನ್ದೇಯಂ॒ ಗಾಮಶ್ವಂ॒ ಪುರು॑ಷಾನ॒ಹಮ್ ॥
ಅಮೂಲ್ಯರತ್ನಖಚಿತಂ ನಿರ್ಮಿತಂ ವಿಶ್ವಕರ್ಮಣಾ ।
ಆಸನಂ ಚ ವಿಚಿತ್ರಂ ಚ ಮಹಾಲಕ್ಷ್ಮಿ ಪ್ರಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ನವರತ್ನಖಚಿತ ಸುವರ್ಣ ಸಿಂಹಾಸನಂ ಸಮರ್ಪಯಾಮಿ ।
ಪಾದ್ಯಮ್ –
ಅ॒ಶ್ವ॒ಪೂ॒ರ್ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ॑ದ ಪ್ರ॒ಬೋಧಿ॑ನೀಮ್ ।
ಶ್ರಿಯಂ॑ ದೇ॒ವೀಮುಪ॑ಹ್ವಯೇ॒ ಶ್ರೀರ್ಮಾ॑ ದೇ॒ವೀ ಜು॑ಷತಾಮ್ ॥
ಪುಷ್ಪಚನ್ದನದೂರ್ವಾದಿಸಮ್ಯುತಂ ಜಾಹ್ನವೀಜಲಮ್ ।
ಶಙ್ಖಗರ್ಭಸ್ಥಿತಂ ಶುದ್ಧಂ ಗೃಹ್ಯತಾಂ ಪದ್ಮವಾಸಿನಿ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಪಾದಯೋಃ ಪಾದ್ಯಂ ಸಮರ್ಪಯಾಮಿ ।
ಅರ್ಘ್ಯಮ್ –
ಕಾಂ॒ ಸೋ᳚ಸ್ಮಿ॒ತಾಂ ಹಿರ॑ಣ್ಯಪ್ರಾಕಾರಾಮಾ॒ರ್ದ್ರಾಂ ಜ್ವಲ॑ನ್ತೀಂ ತೃ॒ಪ್ತಾಂ ತ॒ರ್ಪಯ॑ನ್ತೀಮ್ ।
ಪ॒ದ್ಮೇ॒ಸ್ಥಿ॒ತಾಂ ಪ॒ದ್ಮವ॑ರ್ಣಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಶುದ್ಧಂ ಗಙ್ಗೋದಕಮಿದಂ ಸರ್ವವನ್ದಿತಮೀಪ್ಸಿತಮ್ ।
ಪಾಪೇಧ್ಮವಹ್ನಿರೂಪಂ ಚ ಗೃಹ್ಯತಾಂ ಕಮಲಾಲಯೇ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಹಸ್ತಯೋಃ ಅರ್ಘ್ಯಂ ಸಮರ್ಪಯಾಮಿ ।
ಆಚಮನೀಯಮ್ –
ಚ॒ನ್ದ್ರಾಂ ಪ್ರ॑ಭಾ॒ಸಾಂ ಯಶ॑ಸಾ॒ ಜ್ವಲ॑ನ್ತೀಂ॒ ಶ್ರಿಯಂ॑ ಲೋ॒ಕೇ ದೇ॒ವಜು॑ಷ್ಟಾಮುದಾ॒ರಾಮ್ ।
ತಾಂ ಪ॒ದ್ಮಿನೀ॑ಮೀಂ॒ ಶರ॑ಣಮ॒ಹಂ ಪ್ರಪ॑ದ್ಯೇಽಲ॒ಕ್ಷ್ಮೀರ್ಮೇ॑ ನಶ್ಯತಾಂ॒ ತ್ವಾಂ ವೃ॑ಣೇ ॥
ಪುಣ್ಯತೀರ್ಥೋದಕಂ ಚೈವ ವಿಶುದ್ಧಂ ಶುದ್ಧಿದಂ ಸದಾ ।
ಗೃಹ್ಯತಾಂ ಕೃಷ್ಣಕಾನ್ತೇ ತ್ವಂ ರಮ್ಯಮಾಚಮನೀಯಕಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಮುಖೇ ಆಚಮನೀಯಂ ಸಮರ್ಪಯಾಮಿ ।
ಮಧುಪರ್ಕಮ್ –
ಕಾಪಿಲಂ ದಧಿ ಕುನ್ದೇನ್ದುಧವಲಂ ಮಧುಸಮ್ಯುತಮ್ ।
ಸ್ವರ್ಣಪಾತ್ರಸ್ಥಿತಂ ದೇವಿ ಮಧುಪರ್ಕಂ ಗೃಹಾಣ ಭೋಃ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಮಧುಪರ್ಕಂ ಸಮರ್ಪಯಾಮಿ ।
ಪಞ್ಚಾಮೃತ ಸ್ನಾನಮ್ –
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಪಞ್ಚಾಮೃತ ಸ್ನಾನಂ ಸಮರ್ಪಯಾಮಿ ।
ಶುದ್ಧೋದಕ ಸ್ನಾನಮ್ –
ಆ॒ದಿ॒ತ್ಯವ॑ರ್ಣೇ॒ ತಪ॒ಸೋಽಧಿ॑ ಜಾ॒ತೋ ವನ॒ಸ್ಪತಿ॒ಸ್ತವ॑ ವೃ॒ಕ್ಷೋಽಥ॑ ಬಿ॒ಲ್ವಃ ।
ತಸ್ಯ॒ ಫಲಾ॑ನಿ॒ ತಪ॒ಸಾ ನು॑ದನ್ತು ಮಾ॒ ಯಾನ್ತ॑ರಾ॒ಯಾಶ್ಚ॑ ಬಾ॒ಹ್ಯಾ ಅ॑ಲ॒ಕ್ಷ್ಮೀಃ ॥
ಪಞ್ಚಾಮೃತ ಸಮಾಯುಕ್ತಂ ಜಾಹ್ನವೀಸಲಿಲಂ ಶುಭಮ್ ।
ಗೃಹಾಣ ವಿಶ್ವಜನನಿ ಸ್ನಾನಾರ್ಥಂ ಭಕ್ತವತ್ಸಲೇ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ ।
ಸ್ನಾನಾನನ್ತರಂ ಶುದ್ಧ ಆಚಮನೀಯಂ ಸಮರ್ಪಯಾಮಿ ।
ವಸ್ತ್ರಮ್ –
ಉಪೈ॑ತು॒ ಮಾಂ ದೇ॑ವಸ॒ಖಃ ಕೀ॒ರ್ತಿಶ್ಚ॒ ಮಣಿ॑ನಾ ಸ॒ಹ ।
ಪ್ರಾ॒ದು॒ರ್ಭೂ॒ತೋಽಸ್ಮಿ॑ ರಾಷ್ಟ್ರೇ॒ಽಸ್ಮಿ॒ನ್ ಕೀ॒ರ್ತಿಮೃದ್ಧಿಂ॑ ದ॒ದಾತು॑ ಮೇ ॥
ದೇಹಸೌನ್ದರ್ಯಬೀಜಂ ಚ ಸದಾ ಶೋಭಾವಿವರ್ಧನಮ್ ।
ಕಾರ್ಪಾಸಜಂ ಚ ಕೃಮಿಜಂ ವಸನಂ ದೇವಿ ಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ವಸ್ತ್ರಯುಗ್ಮಂ ಸಮರ್ಪಯಾಮಿ ।
ವ್ಯಜನಚಾಮರಮ್ –
ಕ್ಷು॒ತ್ಪಿ॒ಪಾ॒ಸಾಮ॑ಲಾಂ ಜ್ಯೇ॒ಷ್ಠಾಮ॒ಲ॒ಕ್ಷ್ಮೀರ್ನಾ॑ಶಯಾ॒ಮ್ಯಹಮ್ ।
ಅಭೂ॑ತಿ॒ಮಸ॑ಮೃದ್ಧಿಂ॒ ಚ॒ ಸ॒ರ್ವಾ॒ನ್ ನಿರ್ಣು॑ದ ಮೇ॒ ಗೃಹಾತ್ ॥
ಶೀತವಾಯುಪ್ರದಂ ಚೈವ ದಾಹೇ ಚ ಸುಖದಂ ಪರಮ್ ।
ಕಮಲೇ ಗೃಹ್ಯತಾಂ ಚೇದಂ ವ್ಯಜನಂ ಶ್ವೇತಚಾಮರಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ವ್ಯಜನಚಾಮರೈರ್ವೀಜಯಾಮಿ ।
ಗನ್ಧಾದಿ ಪರಿಮಲದ್ರವ್ಯಾಣಿ –
ಗ॒ನ್ಧ॒ದ್ವಾ॒ರಾಂ ದು॑ರಾಧ॒ರ್ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀ᳚ಮ್ ।
ಈ॒ಶ್ವರೀಗ್ಂ॑ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಶುದ್ಧಿದಂ ಶುದ್ಧಿರೂಪಂ ಚ ಸರ್ವಮಙ್ಗಲಮಙ್ಗಲಮ್ ।
ಗನ್ಧವಸ್ತೂದ್ಭವಂ ರಮ್ಯಂ ಗನ್ಧಂ ದೇವಿ ಪ್ರಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಶ್ರೀಗನ್ಧಂ ಸಮರ್ಪಯಾಮಿ ।
ಮಲಯಾಚಲಸಮ್ಭೂತಂ ವೃಕ್ಷಸಾರಂ ಮನೋಹರಮ್ ।
ಸುಗನ್ಧಿಯುಕ್ತಂ ಸುಖದಂ ಚನ್ದನಂ ದೇವಿ ಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ರಕ್ತಚನ್ದನಂ ಸಮರ್ಪಯಾಮಿ ।
ಸಿನ್ದೂರಂ ರಕ್ತವರ್ಣಂ ಚ ಸಿನ್ದೂರತಿಲಕಪ್ರಿಯೇ ।
ಭಕ್ತ್ಯಾ ದತ್ತಂ ಮಯಾ ದೇವಿ ಸಿನ್ದೂರಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಸಿನ್ದೂರಂ ಸಮರ್ಪಯಾಮಿ ।
ಕುಙ್ಕುಮಂ ಕಾಮದಂ ದಿವ್ಯಂ ಕುಙ್ಕುಮಂ ಕಾಮರೂಪಿಣಮ್ ।
ಅಖಣ್ಡಕಾಮಸೌಭಾಗ್ಯಂ ಕುಙ್ಕುಮಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಕುಙ್ಕುಮಂ ಸಮರ್ಪಯಾಮಿ ।
ಸುಗನ್ಧಿಯುಕ್ತಂ ತೈಲಂ ಚ ಸುಗನ್ಧಾಮಲಕೀಜಲಮ್ ।
ದೇಹಸೌನ್ದರ್ಯಬೀಜಂ ಚ ಗೃಹ್ಯತಾಂ ಶ್ರೀಹರಿಪ್ರಿಯೇ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಸುಗನ್ಧಿ ತೈಲಂ ಸಮರ್ಪಯಾಮಿ ।
ಆಭರಣಮ್ –
ಮನ॑ಸ॒: ಕಾಮ॒ಮಾಕೂ॑ತಿಂ ವಾ॒ಚಃ ಸ॒ತ್ಯಮ॑ಶೀಮಹಿ ।
ಪ॒ಶೂ॒ನಾಗ್ಂ ರೂ॒ಪಮನ್ನ॑ಸ್ಯ॒ ಮಯಿ॒ ಶ್ರೀಃ ಶ್ರ॑ಯತಾಂ॒ ಯಶ॑: ॥
ರತ್ನಸ್ವರ್ಣವಿಕಾರಂ ಚ ದೇಹಸೌಖ್ಯವಿವರ್ಧನಮ್ ।
ಶೋಭಾಧಾನಂ ಶ್ರೀಕರಂ ಚ ಭೂಷಣಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಆಭರಣಾನಿ ಸಮರ್ಪಯಾಮಿ ।
ಪುಷ್ಪಮಾಲಾ –
ಕ॒ರ್ದಮೇ॑ನ ಪ್ರ॑ಜಾಭೂ॒ತಾ ಮ॒ಯಿ॒ ಸಮ್ಭ॑ವ ಕ॒ರ್ದಮ ।
ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ ಮಾ॒ತರಂ॑ ಪದ್ಮ॒ಮಾಲಿ॑ನೀಮ್ ॥
ನಾನಾಕುಸುಮನಿರ್ಮಾಣಂ ಬಹುಶೋಭಾಪ್ರದಂ ಪರಮ್ ।
ಸುರಲೋಕಪ್ರಿಯಂ ಶುದ್ಧಂ ಮಾಲ್ಯಂ ದೇವಿ ಪ್ರಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಪುಷ್ಪಮಾಲಾಮ್ ಸಮರ್ಪಯಾಮಿ ।
ಪುಷ್ಪಾಣಿ –
ಮನ್ದಾರಪಾರಿಜಾತಾದೀನ್ಪಾಟಲೀಂ ಕೇತಕೀಂ ತಥಾ ।
ಮರುವಾಮೋಗರಂ ಚೈವ ಗೃಹಾಣಾಶು ನಮೋಽಸ್ತು ತೇ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಪುಷ್ಪಾಣಿ ಸಮರ್ಪಯಾಮಿ ।
ಅಥಾಙ್ಗ ಪೂಜಾ –
ಓಂ ಚಪಲಾಯೈ ನಮಃ – ಪಾದೌ ಪೂಜಯಾಮಿ ।
ಓಂ ಚಞ್ಚಲಾಯೈ ನಮಃ – ಜಾನುನೀ ಪೂಜಯಾಮಿ ।
ಓಂ ಕಮಲಾಯೈ ನಮಃ – ಕಟಿಂ ಪೂಜಯಾಮಿ ।
ಓಂ ಕಾತ್ಯಾಯನ್ಯೈ ನಮಃ – ನಾಭಿಂ ಪೂಜಯಾಮಿ ।
ಓಂ ಜಗನ್ಮಾತ್ರೇ ನಮಃ – ಜಠರಂ ಪೂಜಯಾಮಿ ।
ಓಂ ವಿಶ್ವವಲ್ಲಭಾಯೈ ನಮಃ – ವಕ್ಷಸ್ಸ್ಥಲಂ ಪೂಜಯಾಮಿ ।
ಓಂ ಕಮಲವಾಸಿನ್ಯೈ ನಮಃ – ನೇತ್ರತ್ರಯಂ ಪೂಜಯಾಮಿ ।
ಓಂ ಶ್ರಿಯೈ ನಮಃ – ಶಿರಃ ಪೂಜಯಾಮಿ ।
ಓಂ ಮಹಾಲಕ್ಷ್ಮೈ ನಮಃ – ಸರ್ವಾಣ್ಯಙ್ಗಾನಿ ಪೂಜಯಾಮಿ ।
ಅಥ ಪೂರ್ವಾದಿಕ್ರಮೇಣಾಷ್ಟದಿಕ್ಷ್ವಷ್ಟಸಿದ್ಧೀಃ ಪೂಜಯೇತ್ ।
ಓಂ ಅಣಿಮ್ನೇ ನಮಃ ।
ಓಂ ಮಹಿಮ್ನೇ ನಮಃ ।
ಓಂ ಗರಿಮ್ಣೇ ನಮಃ ।
ಓಂ ಲಘಿಮ್ನೇ ನಮಃ ।
ಓಂ ಪ್ರಾಪ್ತ್ಯೈ ನಮಃ ।
ಓಂ ಪ್ರಾಕಾಮ್ಯಾಯೈ ನಮಃ ।
ಓಂ ಈಶಿತಾಯೈ ನಮಃ ।
ಓಂ ವಶಿತಾಯೈ ನಮಃ ।
ಅಥ ಪೂರ್ವಾದಿಕ್ರಮೇಣಾಷ್ಟಲಕ್ಷ್ಮೀ ಪೂಜನಮ್ ।
ಓಂ ಆದ್ಯಲಕ್ಷ್ಮೈ ನಮಃ ।
ಓಂ ವಿದ್ಯಾಲಕ್ಷ್ಮೈ ನಮಃ ।
ಓಂ ಸೌಭಾಗ್ಯಲಕ್ಷ್ಮೈ ನಮಃ ।
ಓಂ ಅಮೃತಲಕ್ಷ್ಮೈ ನಮಃ ।
ಓಂ ಕಾಮಲಕ್ಷ್ಮೈ ನಮಃ ।
ಓಂ ಸತ್ಯಲಕ್ಷ್ಮೈ ನಮಃ ।
ಓಂ ಭೋಗಲಕ್ಷ್ಮೈ ನಮಃ ।
ಓಂ ಯೋಗಲಕ್ಷ್ಮೈ ನಮಃ ।
ಅಥ ಅಷ್ಟೋತ್ತರಶತನಾಮ ಪೂಜಾ –
ಶ್ರೀ ಲಕ್ಷ್ಮೀ ಅಷ್ಟೋತ್ತರಶತನಾಮಾವಲೀ ಪಶ್ಯತು ।
ಶ್ರೀ ಮಹಾಲಕ್ಷ್ಮೀ ಅಷ್ಟೋತ್ತರಶತನಾಮಾವಲೀ ಪಶ್ಯತು ।
ಧೂಪಮ್ –
ಆಪ॑: ಸೃ॒ಜನ್ತು॑ ಸ್ನಿಗ್ಧಾ॒ನಿ ಚಿ॒ಕ್ಲೀ॒ತ ವ॑ಸ ಮೇ॒ ಗೃಹೇ ।
ನಿ ಚ॑ ದೇ॒ವೀಂ ಮಾ॒ತರಂ॒ ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ ॥
ವೃಕ್ಷನಿರ್ಯಾಸರೂಪಂ ಚ ಗನ್ಧದ್ರವ್ಯಾದಿಸಮ್ಯುತಮ್ ।
ಕೃಷ್ಣಕಾನ್ತೇ ಪವಿತ್ರೋ ವೈ ಧೂಪೋಽಯಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಧೂಪಂ ಸಮರ್ಪಯಾಮಿ ।
ದೀಪಮ್ –
ಆ॒ರ್ದ್ರಾಂ ಪು॒ಷ್ಕರಿ॑ಣೀಂ ಪು॒ಷ್ಟಿಂ ಪಿ॒ಙ್ಗ॒ಲಾಂ ಪ॑ದ್ಮಮಾ॒ಲಿನೀಮ್ ।
ಚ॒ನ್ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ಮಾವ॑ಹ ॥
ಜಗಚ್ಚಕ್ಷುಃ ಸ್ವರೂಪಂ ಚ ಧ್ವಾನ್ತಪ್ರಧ್ವಂಸಕಾರಣಮ್ ।
ಪ್ರದೀಪಂ ಶುದ್ಧರೂಪಂ ಚ ಗೃಹ್ಯತಾಂ ಪರಮೇಶ್ವರಿ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ದೀಪಂ ಸಮರ್ಪಯಾಮಿ ।
ನೈವೇದ್ಯಮ್ –
ಆ॒ರ್ದ್ರಾಂ ಯ॒: ಕರಿ॑ಣೀಂ ಯ॒ಷ್ಟಿಂ ಸು॒ವರ್ಣಾಂ ಹೇ॑ಮಮಾ॒ಲಿನೀಮ್ ।
ಸೂ॒ರ್ಯಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ಮಾವ॑ಹ ॥
ನಾನೋಪಹಾರರೂಪಂ ಚ ನಾನಾರಸಸಮನ್ವಿತಮ್ ।
ನಾನಾಸ್ವಾದುಕರಂ ಚೈವ ನೈವೇದ್ಯಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ನೈವೇದ್ಯಂ ಸಮರ್ಪಯಾಮಿ ।
ಓಂ ಭೂರ್ಭುವ॒ಸ್ಸುವ॑: । ತತ್ಸ॑ವಿ॒ತುರ್ವರೇ᳚ಣ್ಯಂ॒ ಭರ್ಗೋ॑ ದೇ॒ವಸ್ಯ॑ ಧೀಮಹಿ ।
ಧಿಯೋ॒ ಯೋ ನ॑: ಪ್ರಚೋ॒ದಯಾ᳚ತ್ ॥
ಸತ್ಯಂ ತ್ವಾ ಋತೇನ ಪರಿಷಿಞ್ಚಾಮಿ ।
(ಸಾಯಙ್ಕಾಲೇ – ಋತಂ ತ್ವಾ ಸತ್ಯೇನ ಪರಿಷಿಞ್ಚಾಮಿ)
ಅಮೃತಮಸ್ತು । ಅ॒ಮೃ॒ತೋ॒ಪ॒ಸ್ತರ॑ಣಮಸಿ ।
ಓಂ ಪ್ರಾ॒ಣಾಯ॒ ಸ್ವಾಹಾ᳚ । ಓಂ ಅ॒ಪಾ॒ನಾಯ॒ ಸ್ವಾಹಾ᳚ ।
ಓಂ ವ್ಯಾ॒ನಾಯ॒ ಸ್ವಾಹಾ᳚ । ಓಂ ಉ॒ದಾ॒ನಾಯ॒ ಸ್ವಾಹಾ᳚ ।
ಓಂ ಸ॒ಮಾ॒ನಾಯ॒ ಸ್ವಾಹಾ᳚ ।
ಮಧ್ಯೇ ಮಧ್ಯೇ ಪಾನೀಯಂ ಸಮರ್ಪಯಾಮಿ ।
ಅ॒ಮೃ॒ತಾ॒ಪಿ॒ಧಾ॒ನಮ॑ಸಿ । ಉತ್ತರಾಪೋಶನಂ ಸಮರ್ಪಯಾಮಿ ।
ಹಸ್ತೌ ಪ್ರಕ್ಷಾಲಯಾಮಿ । ಪಾದೌ ಪ್ರಕ್ಷಾಲಯಾಮಿ ।
ಶುದ್ಧಾಚಮನೀಯಂ ಸಮರ್ಪಯಾಮಿ ।
ಆಚಮನಮ್ –
ಶೀತಲಂ ನಿರ್ಮಲಂ ತೋಯಂ ಕರ್ಪೂರೇಣ ಸುವಾಸಿತಮ್ ।
ಆಚಮ್ಯತಾಂ ಮಮ ಜಲಂ ಪ್ರಸೀದ ತ್ವಂ ಮಹೇಶ್ವರಿ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಆಚಮನೀಯಂ ಸಮರ್ಪಯಾಮಿ ।
ತಾಮ್ಬೂಲಮ್ –
ತಾಂ ಮ॒ ಆ ವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀ᳚ಮ್ ।
ಯಸ್ಯಾಂ॒ ಹಿರ॑ಣ್ಯಂ॒ ಪ್ರಭೂ॑ತಂ॒ ಗಾವೋ॑ ದಾ॒ಸ್ಯೋಽಶ್ವಾ᳚ನ್ವಿ॒ನ್ದೇಯಂ॒ ಪುರು॑ಷಾನ॒ಹಮ್ ॥
ತಾಮ್ಬೂಲಂ ಚ ವರಂ ರಮ್ಯಂ ಕರ್ಪೂರಾದಿಸುವಾಸಿತಮ್ ।
ಜಿಹ್ವಾಜಾಡ್ಯಚ್ಛೇದಕರಂ ತಾಮ್ಬೂಲಂ ದೇವಿ ಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ತಾಮ್ಬೂಲಂ ಸಮರ್ಪಯಾಮಿ ।
ಫಲಮ್ –
ನಾನಾವಿಧಾನಿ ರಮ್ಯಾಣಿ ಪಕ್ವಾನಿ ಚ ಫಲಾನಿ ತು ।
ಸ್ವಾದುರಸ್ಯಾನಿ ಕಮಲೇ ಗೃಹ್ಯತಾಂ ಫಲದಾನಿ ಚ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಫಲಾನಿ ಸಮರ್ಪಯಾಮಿ ।
ದಕ್ಷಿಣಾಮ್ –
ಹಿರಣ್ಯಗರ್ಭಗರ್ಭಸ್ಥಂ ಹೇಮಬೀಜಂ ವಿಭಾವಸೋಃ ।
ಅನನ್ತಪುಣ್ಯಫಲದಂ ಅತಃ ಶಾನ್ತಿಂ ಪ್ರಯಚ್ಛ ಮೇ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ದಕ್ಷಿಣಾಂ ಸಮರ್ಪಯಾಮಿ ।
ನೀರಾಜನಮ್ –
ಸ॒ಮ್ರಾಜಂ॑ ಚ ವಿ॒ರಾಜಂ॑ ಚಾಭಿ॒ಶ್ರೀರ್ಯಾ ಚ॑ ನೋ ಗೃ॒ಹೇ ।
ಲ॒ಕ್ಷ್ಮೀ ರಾ॒ಷ್ಟ್ರಸ್ಯ॒ ಯಾ ಮುಖೇ॒ ತಯಾ॑ ಮಾ॒ ಸಗ್ಂ ಸೃ॒ಜಾಮಸಿ ॥
ಚಕ್ಷುರ್ದಂ ಸರ್ವಲೋಕಾನಾಂ ತಿಮಿರಸ್ಯ ನಿವಾರಣಮ್ ।
ಆರ್ತಿಕ್ಯಂ ಕಲ್ಪಿತಂ ಭಕ್ತ್ಯಾ ಗೃಹಾಣ ಪರಮೇಶ್ವರಿ ।
ಸನ್ತತ ಶ್ರೀರಸ್ತು ಸಮಸ್ತ ಮಙ್ಗಲಾನಿ ಭವನ್ತು ।
ನಿತ್ಯ ಶ್ರೀರಸ್ತು ನಿತ್ಯಮಙ್ಗಲಾನಿ ಭವನ್ತು ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ನೀರಾಜನಂ ಸಮರ್ಪಯಾಮಿ ।
ನೀರಾಜನಾನನ್ತರಂ ಶುದ್ಧಾಚಮನೀಯಂ ಸಮರ್ಪಯಾಮಿ । ನಮಸ್ಕರೋಮಿ ।
ಮನ್ತ್ರಪುಷ್ಪಮ್ –
[ ಶ್ರೀಸೂಕ್ತಂ ಪಶ್ಯತು ॥ ]
ಓಂ ಮ॒ಹಾ॒ದೇ॒ವ್ಯೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನೀ ಚ॑ ಧೀಮಹಿ ।
ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್ ॥
ಸದ್ಭಾವಪುಷ್ಪಾಣ್ಯಾದಾಯ ಸಹಜಪ್ರೇಮರೂಪಿಣೇ ।
ಲೋಕಮಾತ್ರೇ ದದಾಮ್ಯದ್ಯ ಪ್ರೀತ್ಯಾ ಸಙ್ಗೃಹ್ಯತಾಂ ಸದಾ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಮನ್ತ್ರಪುಷ್ಪಾಞ್ಜಲಿಂ ಸಮರ್ಪಯಾಮಿ ।
ಆತ್ಮಪ್ರದಕ್ಷಿಣ ನಮಸ್ಕಾರಮ್ –
ಯಾನಿ ಕಾನಿ ಚ ಪಾಪಾನಿ ಜನ್ಮಾನ್ತರಕೃತಾನಿ ಚ ।
ತಾನಿ ತಾನಿ ಪ್ರಣಶ್ಯನ್ತಿ ಪ್ರದಕ್ಷಿಣ ಪದೇ ಪದೇ ।
ಪಾಪೋಽಹಂ ಪಾಪಕರ್ಮಾಽಹಂ ಪಾಪಾತ್ಮಾ ಪಾಪಸಮ್ಭವ ।
ತ್ರಾಹಿಮಾಂ ಕೃಪಯಾ ದೇವೀ ಶರಣಾಗತವತ್ಸಲೇ ।
ಅನ್ಯಥಾ ಶರಣಂ ನಾಸ್ತಿ ತ್ವಮೇವ ಶರಣಂ ಮಮ ।
ತಸ್ಮಾತ್ಕಾರುಣ್ಯ ಭಾವೇನ ರಕ್ಷ ಮಾಂ ಪರಮೇಶ್ವರಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಆತ್ಮಪ್ರದಕ್ಷಿಣ ನಮಸ್ಕಾರಾನ್ ಸಮರ್ಪಯಾಮಿ ।
ಸಾಷ್ಟಾಙ್ಗ ನಮಸ್ಕಾರಮ್ –
ಉರಸಾ ಶಿರಸಾ ದೃಷ್ಟ್ಯಾ ಮನಸಾ ವಚಸಾ ತಥಾ ।
ಪದ್ಭ್ಯಾಂ ಕರಾಭ್ಯಾಂ ಕರ್ಣಾಭ್ಯಾಂ ಪ್ರಣಾಮೋಽಷ್ಟಾಙ್ಗಮುಚ್ಯತೇ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಸಾಷ್ಟಾಙ್ಗ ನಮಸ್ಕಾರಾನ್ ಸಮರ್ಪಯಾಮಿ ।
ಸರ್ವೋಪಚಾರಾಃ –
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಛತ್ರಂ ಆಚ್ಛಾದಯಾಮಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಚಾಮರೈರ್ವೀಜಯಾಮಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ನೃತ್ಯಂ ದರ್ಶಯಾಮಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಗೀತಂ ಶ್ರಾವಯಾಮಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಆನ್ದೋಲಿಕಾನ್ನಾರೋಹಯಾಮಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಅಶ್ವಾನಾರೋಹಯಾಮಿ ।
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಗಜಾನಾರೋಹಯಾಮಿ ।
ಸಮಸ್ತ ರಾಜ್ಞೀಯೋಪಚಾರಾನ್ ದೇವ್ಯೋಪಚಾರಾನ್ ಸಮರ್ಪಯಾಮಿ ।
ಯದ್ಯದ್ದ್ರವ್ಯಮಪೂರ್ವಂ ಚ ಪೃಥಿವ್ಯಾಮತಿದುರ್ಲಭಮ್ ।
ದೇವಭೂಷಾಢ್ಯಭೋಗ್ಯಂ ಚ ತದ್ದ್ರವ್ಯಂ ದೇವಿ ಗೃಹ್ಯತಾಮ್ ॥
ಪ್ರಾರ್ಥನಾ –
ಸುರಾಸುರೇನ್ದ್ರಾದಿಕಿರೀಟಮೌಕ್ತಿಕೈ-
-ರ್ಯುಕ್ತಂ ಸದಾ ಯತ್ತವಪಾದ ಕಞ್ಜನಮ್ ।
ಪರಾವರಂ ಪಾತು ವರಂ ಸುಮಙ್ಗಲಂ
ನಮಾಮಿ ಭಕ್ತ್ಯಾ ತವ ಕಾಮಸಿದ್ಧಯೇ ॥
ಭವಾನಿ ತ್ವಂ ಮಹಾಲಕ್ಷ್ಮಿ ಸರ್ವಕಾಮಪ್ರದಾಯಿನೀ ।
ಸುಪೂಜಿತಾ ಪ್ರಸನ್ನಾ ಸ್ಯಾನ್ಮಹಾಲಕ್ಷ್ಮೈ ನಮೋಽಸ್ತು ತೇ ॥
ನಮಸ್ತೇ ಸರ್ವದೇವಾನಾಂ ವರದಾಸಿ ಹರಿಪ್ರಿಯೇ ।
ಯಾ ಗತಿಸ್ತ್ವತ್ಪ್ರಪನ್ನಾನಾಂ ಸಾ ಮೇ ಭೂಯಾತ್ತ್ವದರ್ಚನಾತ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಪ್ರಾರ್ಥನಾ ನಮಸ್ಕಾರಾನ್ ಸಮರ್ಪಯಾಮಿ ।
ದೀಪ ಪೂಜನಮ್ –
ಭೋ ದೀಪ ತ್ವಂ ಬ್ರಹ್ಮರೂಪ ಅನ್ಧಕಾರನಿವಾರಕ ।
ಇಮಾಂ ಮಯಾ ಕೃತಾಂ ಪೂಜಾಂ ಗೃಹ್ಣಂಸ್ತೇಜಃ ಪ್ರವರ್ಧಯ ॥
ಓಂ ದೀಪಾಯ ನಮಃ ಇತಿ ಗನ್ಧಕ್ಷತಪುಷ್ಪೈಃ ಸಮ್ಪೂಜ್ಯ ಶ್ರೀಮಹಾಲಕ್ಷ್ಮ್ಯೈ ನಿವೇದಯೇತ್ ।
ದೀಪಮಾಲಾ ಪೂಜನಮ್ –
ದೀಪಾವಲೀ ಮಯಾ ದತ್ತಂ ಗೃಹಾಣ ತ್ವಂ ಸುರೇಶ್ವರಿ ।
ಆರಾರ್ತಿಕಪ್ರದಾನೇನ ಜ್ಞಾನದೃಷ್ಟಿಪ್ರದಾ ಭವ ॥
ಅಗ್ನಿಜ್ಯೋತೀ ರವಿಜ್ಯೋತಿಶ್ಚನ್ದ್ರಜ್ಯೋತಿಸ್ತಥೈವ ಚ ।
ಉತ್ತಮಃ ಸರ್ವತೇಜಸ್ತು ದೀಪೋಽಯಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀ ಮಹಾಲಕ್ಷ್ಮೈ ನಮಃ ಆರಾರ್ತಿಕಂ ಸಮರ್ಪಯಾಮಿ ।
ದೀಪಾವಲಿ ರಾತ್ರಿ ಪ್ರಾರ್ಥನಾ –
ನಮಸ್ತೇ ಸರ್ವದೇವಾನಾಂ ವರದಾಽಸಿ ಹರಿಪ್ರಿಯೇ ।
ಯಾ ಗತಿಸ್ತ್ವತ್ಪ್ರಪನ್ನಾನಾಂ ಸಾ ಮೇ ಭೂಯಾತ್ತ್ವದರ್ಚನಾತ್ ॥ ೧ ॥
ವಿಶ್ವರೂಪಸ್ಯ ಭಾರ್ಯಾಽಸಿ ಪದ್ಮೇ ಪದ್ಮಾಲಯೇ ಶುಭೇ ।
ಮಹಾಲಕ್ಷ್ಮಿ ನಮಸ್ತುಭ್ಯಂ ಸುಖರಾತ್ರಿಂ ಕುರುಷ್ವ ಮೇ ॥ ೨ ॥
ವರ್ಷಾಕಾಲೇ ಮಹಾಘೋರೇ ಯನ್ಮಯಾ ದುಷ್ಕೃತಂ ಕೃತಮ್ ।
ಸುಖರಾತ್ರಿಃ ಪ್ರಭಾತೇಽದ್ಯ ತನ್ಮೇಽಲಕ್ಷ್ಮೀಂ ವ್ಯಪೋಹತು ॥ ೩ ॥
ಯಾ ರಾತ್ರಿಃ ಸರ್ವಭೂತಾನಾಂ ಯಾ ಚ ದೇವೇಷ್ವವಸ್ಥಿತಾ ।
ಸಂವತ್ಸರಪ್ರಿಯಾ ಯಾ ಚ ಸಾ ಮಮಾಸ್ತು ಸುಮಙ್ಗಲಮ್ ॥ ೪ ॥
ಮಾತಾ ತ್ವಂ ಸರ್ವಭೂತಾನಾಂ ದೇವಾನಾಂ ಸೃಷ್ಟಿಸಮ್ಭವಾಮ್ ।
ಆಖ್ಯಾತಾ ಭೂತಲೇ ದೇವಿ ಸುಖರಾತ್ರಿ ನಮೋಽಸ್ತು ತೇ ॥ ೫ ॥
ದಾಮೋದರಿ ನಮಸ್ತೇಽಸ್ತು ನಮಸ್ತ್ರೈಲೋಕ್ಯಮಾತೃಕೇ ।
ನಮಸ್ತೇಽಸ್ತು ಮಹಾಲಕ್ಷ್ಮಿ ತ್ರಾಹಿ ಮಾಂ ಪರಮೇಶ್ವರಿ ॥ ೬ ॥
ಶಙ್ಖಚಕ್ರಗದಾಹಸ್ತೇ ಶುಭ್ರವರ್ಣೇ ಶುಭಾನನೇ ।
ಮಹ್ಯಮಿಷ್ಟವರಂ ದೇಹಿ ಸರ್ವಿಸಿದ್ಧಿಪ್ರದಾಯಿನಿ ॥ ೭ ॥
ನಮಸ್ತೇಽಸ್ತು ಮಹಾಲಕ್ಷ್ಮಿ ಮಹಾಸೌಖ್ಯಪ್ರದಾಯಿನಿ ।
ಸರ್ವದಾ ದೇಹಿ ಮೇ ದ್ರವ್ಯಂ ದಾನಾಯ ಭುಕ್ತಿಹೇತವೇ ॥ ೮ ॥
ಧನಂ ಧಾನ್ಯಂ ಧರಾಂ ಹರ್ಷಂ ಕೀರ್ತಿಮಾಯುರ್ಯಶಃ ಶ್ರಿಯಃ ।
ತುರಗಾನ್ ದನ್ತಿನಃ ಪುತ್ರಾನ್ ಮಹಾಲಕ್ಷ್ಮಿ ಪ್ರಯಚ್ಛ ಮೇ ॥ ೯ ॥
ಯನ್ಮಯಾ ವಾಞ್ಛಿತಂ ದೇವಿ ತತ್ಸರ್ವಂ ಸಫಲಂ ಕುರು ।
ನ ಬಾಧನ್ತಾಂ ಕುಕರ್ಮಾಣಿ ಸಙ್ಕಟಾನ್ಮೇ ನಿವಾರಯ ॥ ೧೦ ॥
ನ್ಯೂನಂ ವಾಽಪ್ಯತುಲಂ ವಾಪಿ ಯನ್ಮಯಾ ಮೋಹಿತಂ ಕೃತಮ್ ।
ಸರ್ವಂ ತದಸ್ತು ಸಮ್ಪೂರ್ಣಂ ತ್ವತ್ಪ್ರಸಾದಾನ್ಮಹೇಶ್ವರಿ ॥ ೧೧ ॥
ಕ್ಷಮಾ ಪ್ರಾರ್ಥನ –
ಯಸ್ಯ ಸ್ಮೃತ್ಯಾಚ ನಾಮೋಕ್ತ್ಯಾ ತಪಃ ಪೂಜಾ ಕ್ರಿಯಾದಿಷು ।
ನ್ಯೂನಂ ಸಮ್ಪೂರ್ಣತಾಂ ಯಾತಿ ಸದ್ಯೋವನ್ದೇ ತಮಚ್ಯುತಮ್ ॥
ಮನ್ತ್ರಹೀನಂ ಕ್ರಿಯಾಹೀನಂ ಭಕ್ತಿಹೀನಂ ಮಹೇಶ್ವರೀ ।
ಯತ್ಪೂಜಿತಂ ಮಯಾದೇವೀ ಪರಿಪೂರ್ಣಂ ತದಸ್ತುತೇ ॥
ಅನಯಾ ಶ್ರೀಸೂಕ್ತ ವಿಧಾನ ಪೂರ್ವಕ ಧ್ಯಾನ ಆವಾಹನಾದಿ ಷೋಡಶೋಪಚಾರ ಪೂಜಯಾ ಭಗವತೀ ಸರ್ವಾತ್ಮಿಕಾ ಶ್ರೀ ಮಹಾಲಕ್ಷ್ಮೀ ದೇವತಾ ಸುಪ್ರೀತಾ ಸುಪ್ರಸನ್ನಾ ವರದಾ ಭವನ್ತು ॥
ತೀರ್ಥಪ್ರಸಾದ ಗ್ರಹಣಮ್ –
ಅಕಾಲಮೃತ್ಯಹರಣಂ ಸರ್ವವ್ಯಾಧಿನಿವಾರಣಮ್ ।
ಸಮಸ್ತಪಾಪಕ್ಷಯಕರಂ ಶ್ರೀ ಮಹಾಲಕ್ಷ್ಮೀ ಪಾದೋದಕಂ ಪಾವನಂ ಶುಭಮ್ ॥
ಶ್ರೀ ಮಹಾಲಕ್ಷ್ಮೈ ನಮಃ ಪ್ರಸಾದಂ ಶಿರಸಾ ಗೃಹ್ಣಾಮಿ ।
ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ।
ಇನ್ನಷ್ಟು ಶ್ರೀ ಲಕ್ಷ್ಮೀ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
