Read in తెలుగు / ಕನ್ನಡ / தமிழ் / देवनागरी / English (IAST)
<< ಅಷ್ಟಮ ದಶಕಮ್ (೮) ಪರಮಜ್ಞಾನೋಪದೇಶಮ್
|| ಭುವನೇಶ್ವರೀದರ್ಶನಮ್ ||
ಏಕಾರ್ಣವೇಽಸ್ಮಿನ್ ಜಗತಿ ಪ್ರಲೀನೇ
ದೈತ್ಯೌ ಹರಿರ್ಬ್ರಹ್ಮವಧೋದ್ಯತೌ ತೌ |
ಜಘಾನ ದೇವಿ ತ್ವದನುಗ್ರಹೇಣ
ತ್ವದಿಚ್ಛಯೈವಾಗಮದತ್ರ ರುದ್ರಃ || ೯-೧ ||
ಏಕೋ ವಿಮಾನಸ್ತರಸಾಽಽಗತಃ ಖಾ-
-ತ್ತ್ರಿಮೂರ್ತ್ಯವಿಜ್ಞಾತಗತಿಸ್ತ್ವದೀಯಃ |
ತ್ವತ್ಪ್ರೇರಿತಾ ಆರುರುಹುಸ್ತಮೇತೇ
ಸ ಚೋತ್ಪತನ್ ವ್ಯೋಮ್ನಿ ಚಚಾರ ಶೀಘ್ರಮ್ || ೯-೨ ||
ವೈಮಾನಿಕಾಶ್ಚೋದ್ಗತಯಃ ಸಶಕ್ರಂ
ದಿವಂ ಸಪದ್ಮೋದ್ಭವಸತ್ಯಲೋಕಮ್ |
ಸರುದ್ರಕೈಲಾಸಮಮೀ ಸವಿಷ್ಣು-
-ವೈಕುಂಠಮಪ್ಯುತ್ಪುಳಕಾ ಅಪಶ್ಯನ್ || ೯-೩ ||
ಅದೃಷ್ಟಪೂರ್ವಾನಿತರಾಂಸ್ತ್ರಿಮೂರ್ತೀನ್
ಸ್ಥಾನಾನಿ ತೇಷಾಮಪಿ ದೃಷ್ಟವಂತಃ |
ತ್ರಿಮೂರ್ತಯಸ್ತೇ ಚ ವಿಮೋಹಮಾಪುಃ
ಪ್ರಾಪ್ತೋ ವಿಮಾನಶ್ಚ ಸುಧಾಸಮುದ್ರಮ್ || ೯-೪ ||
ತ್ವದ್ಭ್ರೂಲತಾಲೋಲತರಂಗಮಾಲಂ
ತ್ವದೀಯಮಂದಸ್ಮಿತಚಾರುಫೇನಮ್ |
ತ್ವನ್ಮಂಜುಮಂಜೀರಮೃದುಸ್ವನಾಢ್ಯಂ
ತ್ವತ್ಪಾದಯುಗ್ಮೋಪಮಸೌಖ್ಯದಂ ಚ || ೯-೫ ||
ತನ್ಮಧ್ಯತಸ್ತೇ ದದೃಶುರ್ವಿಚಿತ್ರ-
-ಪ್ರಾಕಾರನಾನಾದ್ರುಲತಾಪರೀತಮ್ |
ಸ್ಥಾನಂ ಮಣಿದ್ವೀಪಮದೃಷ್ಟಪೂರ್ವಂ
ಕ್ರಮಾಚ್ಛಿವೇ ತ್ವಾಂ ಚ ಸಖೀಸಮೇತಾಮ್ || ೯-೬ ||
ಜ್ಞಾತ್ವಾ ದ್ರುತಂ ತ್ವಾಂ ಹರಿರಾಹ ಧಾತ-
-ಸ್ತ್ರಿನೇತ್ರ ಧನ್ಯಾ ವಯಮದ್ಯ ನೂನಮ್ |
ಸುಧಾಸಮುದ್ರೋಽಯಮನಲ್ಪಪುಣ್ಯೈಃ
ಪ್ರಾಪ್ಯಾ ಜಗನ್ಮಾತೃನಿವಾಸಭೂಮಿಃ || ೯-೭ ||
ಸಾ ದೃಶ್ಯತೇ ರಾಗಿಜನೈರದೃಶ್ಯಾ
ಮಂಚೇ ನಿಷಣ್ಣಾ ಬಹುಶಕ್ತಿಯುಕ್ತಾ |
ಏಷೈವ ದೃಕ್ ಸರ್ವಮಿದಂ ಚ ದೃಶ್ಯ-
-ಮಹೇತುರೇಷಾ ಖಲು ಸರ್ವಹೇತುಃ || ೯-೮ ||
ಬಾಲಃ ಶಯಾನೋ ವಟಪತ್ರ ಏಕ
ಏಕಾರ್ಣವೇಽಪಶ್ಯಮಿಮಾಂ ಸ್ಮಿತಾಸ್ಯಾಮ್ |
ಯಯೈವ ಮಾತ್ರಾ ಪರಿಲಾಳಿತೋಽಹ-
-ಮೇನಾಂ ಸಮಸ್ತಾರ್ತಿಹರಾಂ ವ್ರಜೇಮ || ೯-೯ ||
ರುಧ್ಯಾಮಹೇ ದ್ವಾರಿ ಯದಿ ಸ್ತುವಾಮ-
-ಸ್ತತ್ರ ಸ್ಥಿತಾ ಏವ ವಯಂ ಮಹೇಶೀಮ್ |
ಇತ್ಯಚ್ಯುತೇನಾಭಿಹಿತೇ ವಿಮಾನ-
-ಸ್ತ್ವದ್ಗೋಪುರದ್ವಾರಮವಾಪ ದೇವಿ || ೯-೧೦ ||
ಆಯಾಮ್ಯಹಂ ಚಿತ್ತನಿರೋಧರೂಪ-
-ವಿಮಾನತಸ್ತೇ ಪದಮದ್ವಿತೀಯಮ್ |
ನ ಕೇನಚಿದ್ರುದ್ಧಗತೋ ಭವಾನಿ
ತ್ವಾಮೇವ ಮಾತಃ ಶರಣಂ ವ್ರಜಾಮಿ || ೯-೧೧ ||
ದಶಮ ದಶಕಮ್ (೧೦) – ಶಕ್ತಿಪ್ರದಾನಮ್ >>
ಸಂಪೂರ್ಣ ದೇವೀ ನಾರಾಯಣೀಯಂ ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
