Read in తెలుగు / ಕನ್ನಡ / தமிழ் / देवनागरी / English (IAST)
<< ಸಪ್ತಮ ದಶಕಮ್ (೭) ಶುಕೋತ್ಪತ್ತಿಃ
|| ಪರಮಜ್ಞಾನೋಪದೇಶಮ್ ||
ಅಥಾಹ ಕೃಷ್ಣಃ ಶೃಣು ಚಿಂತಯಾಽಲಂ
ಗೃಹಾಶ್ರಮಸ್ತೇ ನ ಚ ಬಂಧಕೃತ್ಸ್ಯಾತ್ |
ಬಂಧಸ್ಯ ಮುಕ್ತೇಶ್ಚ ಮನೋ ಹಿ ಹೇತು-
-ರ್ಮನೋಜಯಾರ್ಥಂ ಭಜ ವಿಶ್ವಧಾತ್ರೀಮ್ || ೮-೧ ||
ಯಸ್ಯಾಃ ಪ್ರಸಾದೇ ಸಫಲಂ ಸಮಸ್ತಂ
ಯದಪ್ರಸಾದೇ ವಿಫಲಂ ಸಮಸ್ತಮ್ |
ಮಾಹಾತ್ಮ್ಯಮಸ್ಯಾ ವಿದಿತಂ ಜಗತ್ಸು
ಮಯಾ ಕೃತಂ ಭಾಗವತಂ ಶೃಣು ತ್ವಮ್ || ೮-೨ ||
ವಿಷ್ಣುರ್ಜಗತ್ಯೇಕಸಮುದ್ರಲೀನೇ
ಬಾಲಃ ಶಯಾನೋ ವಟಪತ್ರ ಏಕಃ |
ಸ್ವಬಾಲತಾಹೇತುವಿಚಾರಮಗ್ನಃ
ಶುಶ್ರಾವ ಕಾಮಪ್ಯಶರೀರಿವಾಚಮ್ || ೮-೩ ||
ಸನಾತನಂ ಸತ್ಯಮಹಂ ಮದನ್ಯ-
-ತ್ಸತ್ಯಂ ನ ಚ ಸ್ಯಾದಹಮೇವ ಸರ್ವಮ್ |
ಶ್ರುತ್ವೇದಮುನ್ಮೀಲಿತದೃಷ್ಟಿರೇಷ
ಸ್ಮಿತಾನನಾಂ ತ್ವಾಂ ಜನನೀಂ ದದರ್ಶ || ೮-೪ ||
ಚತುರ್ಭುಜಾ ಶಂಖಗದಾರಿಪದ್ಮ-
-ಧರಾ ಕೃಪಾದ್ಯೈಃ ಸಹ ಶಕ್ತಿಜಾಲೈಃ |
ಸ್ಥಿತಾ ಜಲೋಪರ್ಯಮಲಾಂಬರಾ ತ್ವಂ
ಪ್ರಹೃಷ್ಟಚಿತ್ತಂ ಹರಿಮೇವಮಾತ್ಥ || ೮-೫ ||
ಕಿಂ ವಿಸ್ಮಯೇನಾಚ್ಯುತ ವಿಸ್ಮೃತಾಽಹಂ
ತ್ವಯಾ ಪರಾಶಕ್ತಿಮಹಾಪ್ರಭಾವಾತ್ |
ಸಾ ನಿರ್ಗುಣಾ ವಾಙ್ಮನಸೋರಗಮ್ಯಾ
ಮಾಂ ಸಾತ್ವಿಕೀಂ ಶಕ್ತಿಮವೇಹಿ ಲಕ್ಷ್ಮೀಮ್ || ೮-೬ ||
ಶ್ರುತಸ್ತ್ವಯಾ ಯಸ್ತ್ವಶರೀರಿಶಬ್ದೋ
ಹಿತಾಯ ತೇ ದೇವ ತಯಾ ಸ ಉಕ್ತಃ |
ಅಯಂ ಹಿ ಸರ್ವಶ್ರುತಿಶಾಸ್ತ್ರಸಾರೋ
ಮಾ ವಿಸ್ಮರೇಮಂ ಹೃದಿ ರಕ್ಷಣೀಯಮ್ || ೮-೭ ||
ನಾತಃ ಪರಂ ಜ್ಞೇಯಮವೇಹಿ ಕಿಂಚಿ-
-ತ್ಪ್ರಿಯೋಽಸಿ ದೇವ್ಯಾಃ ಶೃಣು ಮೇ ವಚಸ್ತ್ವಮ್ |
ತ್ವನ್ನಾಭಿಪದ್ಮಾದ್ದ್ರುಹಿಣೋ ಭವೇತ್ಸ
ಕರ್ತಾ ಜಗತ್ಪಾಲಯ ತತ್ಸಮಸ್ತಮ್ || ೮-೮ ||
ಭ್ರೂಮಧ್ಯತಃ ಪದ್ಮಭವಸ್ಯ ಕೋಪಾ-
-ದ್ರುದ್ರೋ ಭವಿಷ್ಯನ್ ಸಕಲಂ ಹರೇಚ್ಚ |
ದೇವೀಂ ಸದಾ ಸಂಸ್ಮರ ತೇಽಸ್ತು ಭದ್ರ-
-ಮೇವಂ ನಿಗದ್ಯಾಶು ತಿರೋದಧಾಥ || ೮-೯ ||
ಹರೇರಿದಂ ಜ್ಞಾನಮಜಸ್ಯ ಲಬ್ಧ-
-ಮಜಾತ್ಸುರರ್ಷೇಶ್ಚ ತತೋ ಮಮಾಪಿ |
ಮಯಾ ತ್ವಿದಂ ವಿಸ್ತರತಃ ಸುತೋಕ್ತಂ
ಯತ್ಸೂರಯೋ ಭಾಗವತಂ ವದಂತಿ || ೮-೧೦ ||
ದೇವ್ಯಾ ಮಹತ್ತ್ವಂ ಖಲು ವರ್ಣ್ಯತೇಽತ್ರ
ಯದ್ಭಕ್ತಿಮಾಪ್ತಸ್ಯ ಗೃಹೇ ನ ಬಂಧಃ |
ಯದ್ಭಕ್ತಿಹೀನಸ್ತ್ವಗೃಹೇಽಪಿ ಬದ್ಧೋ
ರಾಜಾಽಪಿ ಮುಕ್ತೋ ಜನಕೋ ಗೃಹಸ್ಥಃ || ೮-೧೧ ||
ವಿದೇಹರಾಜಂ ತಮವಾಪ್ಯ ಪೃಷ್ಟ್ವಾ
ಸ್ವಧರ್ಮಶಂಕಾಃ ಪರಿಹೃತ್ಯ ಧೀರಃ |
ಫಲೇಷ್ವಸಕ್ತಃ ಕುರು ಕರ್ಮ ತೇನ
ಕರ್ಮಕ್ಷಯಃ ಸ್ಯಾತ್ತವ ಭದ್ರಮಸ್ತು || ೮-೧೨ ||
ಶ್ರುತ್ವೇತಿ ಸದ್ಯಃ ಶುಕ ಆಶ್ರಮಾತ್ಸ
ಪ್ರಸ್ಥಾಯ ವೈದೇಹಪುರಂ ಸಮೇತ್ಯ |
ಪ್ರತ್ಯುದ್ಗತಃ ಸರ್ವಜನೈರ್ನೃಪಾಯ
ನ್ಯವೇದಯತ್ಸ್ವಾಗಮನಸ್ಯ ಹೇತುಮ್ || ೮-೧೩ ||
ಗೃಹಸ್ಥಧರ್ಮಸ್ಯ ಮಹತ್ತ್ವಮಸ್ಮಾ-
-ದ್ವಿಜ್ಞಾಯ ಧೀಮಾನ್ ಸ ಶುಕೋ ನಿವೃತ್ತಃ |
ಪಿತ್ರಾಶ್ರಮಂ ಪ್ರಾಪ್ಯ ಸುತಾಂ ಪಿತೃಣಾಂ
ವ್ಯಾಸೇಽತಿಹೃಷ್ಟೇ ಗೃಹಿಣೀಂ ಚಕಾರ || ೮-೧೪ ||
ಉತ್ಪಾದ್ಯ ಪುತ್ರಾಂಶ್ಚತುರಃ ಸುತಾಂ ಚ
ಗೃಹಸ್ಥಧರ್ಮಾನ್ ವಿಧಿನಾಽಽಚರನ್ ಸಃ |
ಪ್ರದಾಯ ಚೈನಾಂ ಮುನಯೇಽಣುಹಾಯ
ಬಭೂವ ಕಾಲೇ ಕೃತಸರ್ವಕೃತ್ಯಃ || ೮-೧೫ ||
ಹಿತ್ವಾಽಽಶ್ರಮಂ ತಾತಮಪೀಶಶೈಲ-
-ಶೃಂಗೇ ತಪಸ್ವೀ ಸಹಸೋತ್ಪತನ್ ಖೇ |
ಬಭೌ ಸ ಭಾಸ್ವಾನಿವ ತದ್ವಿಯೋಗ-
-ಖಿನ್ನಂ ಶಿವೋ ವ್ಯಾಸಮಸಾಂತ್ವಯಚ್ಚ || ೮-೧೬ ||
ಸರ್ವತ್ರ ಶಂಕಾಕುಲಮೇವ ಚಿತ್ತಂ
ಮಮೇಹ ವಿಕ್ಷಿಪ್ತಮಧೀರಮಾರ್ತಮ್ |
ಕರ್ತವ್ಯಮೂಢೋಽಸ್ಮಿ ಸದಾ ಶಿವೇ ಮಾಂ
ಧೀರಂ ಕುರು ತ್ವಂ ವರದೇ ನಮಸ್ತೇ || ೮-೧೭ ||
ನವಮ ದಶಕಮ್ (೯) – ಭುವನೇಶ್ವರೀದರ್ಶನಮ್ >>
ಸಂಪೂರ್ಣ ದೇವೀ ನಾರಾಯಣೀಯಂ ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
