Read in తెలుగు / ಕನ್ನಡ / தமிழ் / देवनागरी / English (IAST)
ನೀಲಾದ್ರಿಶೋಭಾಂಚಿತದಿವ್ಯಮೂರ್ತಿಃ
ಖಡ್ಗೀ ತ್ರಿದಂಡೀ ಶರಚಾಪಹಸ್ತಃ |
ಶಂಭುರ್ಮಹಾಕಾಲಶನಿಃ ಪುರಾರಿ-
-ರ್ಜಯತ್ಯಶೇಷಾಸುರನಾಶಕಾರೀ || ೧ ||
ಮೇರುಪೃಷ್ಠೇ ಸಮಾಸೀನಂ ಸಾಮರಸ್ಯೇ ಸ್ಥಿತಂ ಶಿವಮ್ |
ಪ್ರಣಮ್ಯ ಶಿರಸಾ ಗೌರೀ ಪೃಚ್ಛತಿ ಸ್ಮ ಜಗದ್ಧಿತಮ್ || ೨ ||
ಪಾರ್ವತ್ಯುವಾಚ |
ಭಗವನ್ ದೇವದೇವೇಶ ಭಕ್ತಾನುಗ್ರಹಕಾರಕ |
ಅಲ್ಪಮೃತ್ಯುವಿನಾಶಾಯ ಯತ್ತ್ವಯಾ ಪೂರ್ವಸೂಚಿತಮ್ || ೩ ||
ತದೇವ ತ್ವಂ ಮಹಾಬಾಹೋ ಲೋಕಾನಾಂ ಹಿತಕಾರಕಮ್ |
ತವ ಮೂರ್ತಿಪ್ರಭೇದಸ್ಯ ಮಹಾಕಾಲಸ್ಯ ಸಾಂಪ್ರತಮ್ || ೪ ||
ಶನೇರ್ಮೃತ್ಯುಂಜಯಸ್ತೋತ್ರಂ ಬ್ರೂಹಿ ಮೇ ನೇತ್ರಜನ್ಮನಃ |
ಅಕಾಲಮೃತ್ಯುಹರಣಮಪಮೃತ್ಯುನಿವಾರಣಮ್ || ೫ ||
ಶನಿಮಂತ್ರಪ್ರಭೇದಾ ಯೇ ತೈರ್ಯುಕ್ತಂ ಯತ್ ಸ್ತವಂ ಶುಭಮ್ |
ಪ್ರತಿನಾಮ ಚತುರ್ಥ್ಯಂತಂ ನಮೋಂತಂ ಮನುನಾ ಯುತಮ್ || ೬ ||
ಶ್ರೀಶಂಕರ ಉವಾಚ |
ನಿತ್ಯೇ ಪ್ರಿಯತಮೇ ಗೌರಿ ಸರ್ವಲೋಕಹಿತೇ ರತೇ |
ಗುಹ್ಯಾದ್ಗುಹ್ಯತಮಂ ದಿವ್ಯಂ ಸರ್ವಲೋಕೋಪಕಾರಕಮ್ || ೭ ||
ಶನಿಮೃತ್ಯುಂಜಯಸ್ತೋತ್ರಂ ಪ್ರವಕ್ಷ್ಯಾಮಿ ತವಾಧುನಾ |
ಸರ್ವಮಂಗಳಮಾಂಗಳ್ಯಂ ಸರ್ವಶತ್ರುವಿಮರ್ದನಮ್ || ೮ ||
ಸರ್ವರೋಗಪ್ರಶಮನಂ ಸರ್ವಾಪದ್ವಿನಿವಾರಣಮ್ |
ಶರೀರಾರೋಗ್ಯಕರಣಮಾಯುರ್ವೃದ್ಧಿಕರಂ ನೃಣಾಮ್ || ೯ ||
ಯದಿ ಭಕ್ತಾಸಿ ಮೇ ಗೌರಿ ಗೋಪನೀಯಂ ಪ್ರಯತ್ನತಃ |
ಗೋಪಿತಂ ಸರ್ವತಂತ್ರೇಷು ತಚ್ಛೃಣುಷ್ವ ಮಹೇಶ್ವರಿ || ೧೦ ||
ಅಸ್ಯ ಶ್ರೀಮಹಾಕಾಲಶನಿಮೃತ್ಯುಂಜಯ ಸ್ತೋತ್ರಮಂತ್ರಸ್ಯ ಪಿಪ್ಪಲಾದ ಋಷಿರನುಷ್ಟುಪ್ ಛಂದೋ ಮಹಾಕಾಲಶನಿರ್ದೇವತಾ ಶಂ ಬೀಜಮಾಯಸೀ ಶಕ್ತಿಃ ಕಾಲಪುರುಷಾಯೇತಿ ಕೀಲಕಂ ಮಮಾಕಾಲಾಪಮೃತ್ಯುನಿವಾರಣಾರ್ಥೇ ಪಾಠೇ ವಿನಿಯೋಗಃ ||
ಋಷಿನ್ಯಾಸಂ ಕರನ್ಯಾಸಂ ದೇಹನ್ಯಾಸಂ ಸಮಾಚರೇತ್ |
ಮಹೋಗ್ರಂ ಮೂರ್ಧ್ನಿ ವಿನ್ಯಸ್ಯ ಮುಖೇ ವೈವಸ್ವತಂ ನ್ಯಸೇತ್ || ೧೧ ||
ಗಲೇ ತು ವಿನ್ಯಸೇನ್ಮಂದಂ ಬಾಹ್ವೋರ್ಮಹಾಗ್ರಹಂ ನ್ಯಸೇತ್ |
ಹೃದಿ ನ್ಯಸೇನ್ಮಹಾಕಾಲಂ ಗುಹ್ಯೇ ಕೃಶತನುಂ ನ್ಯಸೇತ್ || ೧೨ ||
ಜಾನ್ವೋಸ್ತೂಡುಚರಂ ನ್ಯಸ್ಯ ಪಾದಯೋಸ್ತು ಶನೈಶ್ಚರಮ್ |
ಏವಂ ನ್ಯಾಸವಿಧಿಂ ಕೃತ್ವಾ ಪಶ್ಚಾತ್ ಕಾಲಾತ್ಮನಃ ಶನೇಃ || ೧೩ ||
ನ್ಯಾಸಂ ಧ್ಯಾನಂ ಪ್ರವಕ್ಷ್ಯಾಮಿ ತನೌ ಧ್ಯಾತ್ವಾ ಪಠೇನ್ನರಃ |
ಕಲ್ಪಾದಿಯುಗಭೇದಾಂಶ್ಚ ಕರಾಂಗನ್ಯಾಸರೂಪಿಣಃ || ೧೪ ||
ಕಾಲಾತ್ಮನೋ ನ್ಯಸೇದ್ಗಾತ್ರೇ ಮೃತ್ಯುಂಜಯ ನಮೋಽಸ್ತು ತೇ |
ಮನ್ವಂತರಾಣಿ ಸರ್ವಾಣಿ ಮಹಾಕಾಲಸ್ವರೂಪಿಣಃ || ೧೫ ||
ಭಾವಯೇತ್ಪ್ರತಿ ಪ್ರತ್ಯಂಗೇ ಮಹಾಕಾಲಾಯ ತೇ ನಮಃ |
ಭಾವಯೇತ್ ಪ್ರಭವಾದ್ಯಬ್ದಾನ್ ಶೀರ್ಷೇ ಕಾಲಜಿತೇ ನಮಃ || ೧೬ ||
ನಮಸ್ತೇ ನಿತ್ಯಸೇವ್ಯಾಯ ವಿನ್ಯಸೇದಯನೇ ಭ್ರುವೋಃ |
ಸೌರಯೇ ಚ ನಮಸ್ತೇಸ್ತು ಗಂಡಯೋರ್ವಿನ್ಯಸೇದೃತೂನ್ || ೧೭ ||
ಶ್ರಾವಣಂ ಭಾವಯೇದಕ್ಷ್ಣೋರ್ನಮಃ ಕೃಷ್ಣನಿಭಾಯ ಚ |
ಮಹೋಗ್ರಾಥ ನಮೋ ಭಾದ್ರಂ ತಥಾ ಶ್ರವಣಯೋರ್ನ್ಯಸೇತ್ || ೧೮ ||
ನಮೋ ವೈ ದುರ್ನಿರೀಕ್ಷ್ಯಾಯ ಚಾಶ್ವಿನಂ ವಿನ್ಯಸೇನ್ಮುಖೇ |
ನಮೋ ನೀಲಮಯೂಖಾಯ ಗ್ರೀವಾಯಾಂ ಕಾರ್ತಿಕಂ ನ್ಯಸೇತ್ || ೧೯ ||
ಮಾರ್ಗಶೀರ್ಷಂ ನ್ಯಸೇದ್ಬಾಹ್ವೋರ್ಮಹಾರೌದ್ರಾಯ ತೇ ನಮಃ |
ಊರ್ಧ್ವಲೋಕನಿವಾಸಾಯ ಪೌಷಂ ತು ಹೃದಯೇ ನ್ಯಸೇತ್ || ೨೦ ||
ನಮಃ ಕಾಲಪ್ರಬೋಧಾಯ ಮಾಘಂ ವೈ ಚೋದರೇ ನ್ಯಸೇತ್ |
ಮಂದಗಾಯ ನಮೋ ಮೇಢ್ರೇ ನ್ಯಸೇದ್ವೈ ಫಾಲ್ಗುನಂ ತಥಾ || ೨೧ ||
ಊರ್ವೋರ್ನ್ಯಸೇಚ್ಚೈತ್ರಮಾಸಂ ನಮಃ ಶಿವೋದ್ಭವಾಯ ಚ |
ವೈಶಾಖಂ ವಿನ್ಯಸೇಜ್ಜಾನ್ವೋರ್ನಮಃ ಸಂವರ್ತಕಾಯ ಚ || ೨೨ ||
ಜಂಘಯೋರ್ಭಾವಯೇಜ್ಜ್ಯೇಷ್ಠಂ ಭೈರವಾಯ ನಮಸ್ತಥಾ |
ಆಷಾಢಂ ಪಾದಯೋಶ್ಚೈವ ಶನಯೇ ಚ ನಮಸ್ತಥಾ || ೨೩ ||
ಕೃಷ್ಣಪಕ್ಷಂ ಚ ಕ್ರೂರಾಯ ನಮ ಆಪಾದಮಸ್ತಕೇ |
ನ್ಯಸೇದಾಶೀರ್ಷಪಾದಾಂತೇ ಶುಕ್ಲಪಕ್ಷಂ ಗ್ರಹಾಯ ಚ || ೨೪ ||
ನ್ಯಸೇನ್ಮೂಲಂ ಪಾದಯೋಶ್ಚ ಗ್ರಹಾಯ ಶನಯೇ ನಮಃ |
ನಮಃ ಸರ್ವಜಿತೇ ಚೈವ ತೋಯಂ ಸರ್ವಾಂಗುಳೌ ನ್ಯಸೇತ್ || ೨೫ ||
ನ್ಯಸೇದ್ಗುಲ್ಫದ್ವಯೇ ವಿಶ್ವಂ ನಮಃ ಶುಷ್ಕತರಾಯ ಚ |
ವಿಷ್ಣುಭಂ ಭಾವಯೇಜ್ಜಂಘೋಭಯೇ ಶಿಷ್ಟತಮಾಯ ತೇ || ೨೬ ||
ಜಾನುದ್ವಯೇ ಧನಿಷ್ಠಾಂ ಚ ನ್ಯಸೇತ್ ಕೃಷ್ಣರುಚೇ ನಮಃ |
ಊರುದ್ವಯೇ ವಾರುಣರ್ಕ್ಷಂ ನ್ಯಸೇತ್ಕಾಲಭೃತೇ ನಮಃ || ೨೭ ||
ಪೂರ್ವಭಾದ್ರಂ ನ್ಯಸೇನ್ಮೇಢ್ರೇ ಜಟಾಜೂಟಧರಾಯ ಚ |
ಪೃಷ್ಠ ಉತ್ತರಭಾದ್ರಂ ಚ ಕರಾಳಾಯ ನಮಸ್ತಥಾ || ೨೮ ||
ರೇವತೀಂ ಚ ನ್ಯಸೇನ್ನಾಭೌ ನಮೋ ಮಂದಚರಾಯ ಚ |
ಗರ್ಭದೇಶೇ ನ್ಯಸೇದ್ದಸ್ರಂ ನಮಃ ಶ್ಯಾಮತರಾಯ ಚ || ೨೯ ||
ನಮೋ ಭೋಗಿಸ್ರಜೇ ನಿತ್ಯಂ ಯಮಂ ಸ್ತನಯುಗೇ ನ್ಯಸೇತ್ |
ನ್ಯಸೇತ್ಕೃತ್ತಿಕಾಂ ಹೃದಯೇ ನಮಸ್ತೈಲಪ್ರಿಯಾಯ ಚ || ೩೦ ||
ರೋಹಿಣೀಂ ಭಾವಯೇದ್ಧಸ್ತೇ ನಮಸ್ತೇ ಖಡ್ಗಧಾರಿಣೇ |
ಮೃಗಂ ನ್ಯಸೇದ್ವಾಮಹಸ್ತೇ ತ್ರಿದಂಡೋಲ್ಲಸಿತಾಯ ಚ || ೩೧ ||
ದಕ್ಷೋರ್ಧ್ವೇ ಭಾವಯೇದ್ರೌದ್ರಂ ನಮೋ ವೈ ಬಾಣಧಾರಿಣೇ |
ಪುನರ್ವಸುಮೂರ್ಧ್ವವಾಮೇ ನಮೋ ವೈ ಚಾಪಧಾರಿಣೇ || ೩೨ ||
ತಿಷ್ಯಂ ನ್ಯಸೇದ್ದಕ್ಷಬಾಹೌ ನಮಸ್ತೇ ಹರಮನ್ಯವೇ |
ಸಾರ್ಪಂ ನ್ಯಸೇದ್ವಾಮಬಾಹೌ ಚೋಗ್ರಚಾಪಾಯ ತೇ ನಮಃ || ೩೩ ||
ಮಘಾಂ ವಿಭಾವಯೇತ್ಕಂಠೇ ನಮಸ್ತೇ ಭಸ್ಮಧಾರಿಣೇ |
ಮುಖೇ ನ್ಯಸೇದ್ಭಗರ್ಕ್ಷಂ ಚ ನಮಃ ಕ್ರೂರಗ್ರಹಾಯ ಚ || ೩೪ ||
ಭಾವಯೇದ್ದಕ್ಷನಾಸಾಯಾಮರ್ಯಮಾಣಶ್ಚ ಯೋಗಿನೇ |
ಭಾವಯೇದ್ವಾಮನಾಸಾಯಾಂ ಹಸ್ತರ್ಕ್ಷಂ ಧಾರಿಣೇ ನಮಃ || ೩೫ ||
ತ್ವಾಷ್ಟ್ರಂ ನ್ಯಸೇದ್ದಕ್ಷಕರ್ಣೇ ಕೃಸರಾನ್ನಪ್ರಿಯಾಯ ತೇ |
ಸ್ವಾತೀಂ ನ್ಯಸೇದ್ವಾಮಕರ್ಣೇ ನಮೋ ಬ್ರಹ್ಮಮಯಾಯ ತೇ || ೩೬ ||
ವಿಶಾಖಾಂ ಚ ದಕ್ಷನೇತ್ರೇ ನಮಸ್ತೇ ಜ್ಞಾನದೃಷ್ಟಯೇ |
ಮೈತ್ರಂ ನ್ಯಸೇದ್ವಾಮನೇತ್ರೇ ನಮೋಽಂಧಲೋಚನಾಯ ತೇ || ೩೭ ||
ಶಾಕ್ರಂ ನ್ಯಸೇಚ್ಚ ಶಿರಸಿ ನಮಃ ಸಂವರ್ತಕಾಯ ಚ |
ವಿಷ್ಕಂಭಂ ಭಾವಯೇಚ್ಛೀರ್ಷಸಂಧೌ ಕಾಲಾಯ ತೇ ನಮಃ || ೩೮ ||
ಪ್ರೀತಿಯೋಗಂ ಭ್ರುವೋಃ ಸಂಧೌ ಮಹಾಮಂದ ನಮೋಽಸ್ತು ತೇ |
ನೇತ್ರಯೋಃ ಸಂಧಾವಾಯುಷ್ಮದ್ಯೋಗಂ ಭೀಷ್ಮಾಯ ತೇ ನಮಃ || ೩೯ ||
ಸೌಭಾಗ್ಯಂ ಭಾವಯೇನ್ನಾಸಾಸಂಧೌ ಫಲಾಶನಾಯ ಚ |
ಶೋಭನಂ ಭಾವಯೇತ್ಕರ್ಣೇ ಸಂಧೌ ಪುಣ್ಯಾತ್ಮನೇ ನಮಃ || ೪೦ ||
ನಮಃ ಕೃಷ್ಣಾಯಾತಿಗಂಡಂ ಹನುಸಂಧೌ ವಿಭಾವಯೇತ್ |
ನಮೋ ನಿರ್ಮಾಂಸದೇಹಾಯ ಸುಕರ್ಮಾಣಂ ಶಿರೋಧರೇ || ೪೧ ||
ಧೃತಿಂ ನ್ಯಸೇದ್ದಕ್ಷಬಾಹೌ ಪೃಷ್ಠೇ ಛಾಯಾಸುತಾಯ ಚ |
ತನ್ಮೂಲಸಂಧೌ ಶೂಲಂ ಚ ನ್ಯಸೇದುಗ್ರಾಯ ತೇ ನಮಃ || ೪೨ ||
ತತ್ಕೂರ್ಪರೇ ನ್ಯಸೇದ್ಗಂಡೇ ನಿತ್ಯಾನಂದಾಯ ತೇ ನಮಃ |
ವೃದ್ಧಿಂ ತನ್ಮಣಿಬಂಧೇ ಚ ಕಾಲಜ್ಞಾಯ ನಮೋ ನ್ಯಸೇತ್ || ೪೩ ||
ಧ್ರುವಂ ತದಂಗುಳೀಮೂಲಸಂಧೌ ಕೃಷ್ಣಾಯ ತೇ ನಮಃ |
ವ್ಯಾಘಾತಂ ಭಾವಯೇದ್ವಾಮಬಾಹುಪೃಷ್ಠೇ ಕೃಶಾಯ ಚ || ೪೪ ||
ಹರ್ಷಣಂ ತನ್ಮೂಲಸಂಧೌ ಭುತಸಂತಾಪಿನೇ ನಮಃ |
ತತ್ಕೂರ್ಪರೇ ನ್ಯಸೇದ್ವಜ್ರಂ ಸಾನಂದಾಯ ನಮೋಽಸ್ತು ತೇ || ೪೫ ||
ಸಿದ್ಧಿಂ ತನ್ಮಣಿಬಂಧೇ ಚ ನ್ಯಸೇತ್ ಕಾಲಾಗ್ನಯೇ ನಮಃ |
ವ್ಯತೀಪಾತಂ ಕರಾಗ್ರೇಷು ನ್ಯಸೇತ್ಕಾಲಕೃತೇ ನಮಃ || ೪೬ ||
ವರೀಯಾಂಸಂ ದಕ್ಷಪಾರ್ಶ್ವಸಂಧೌ ಕಾಲಾತ್ಮನೇ ನಮಃ |
ಪರಿಘಂ ಭಾವಯೇದ್ವಾಮಪಾರ್ಶ್ವಸಂಧೌ ನಮೋಽಸ್ತು ತೇ || ೪೭ ||
ನ್ಯಸೇದ್ದಕ್ಷೋರುಸಂಧೌ ಚ ಶಿವಂ ವೈ ಕಾಲಸಾಕ್ಷಿಣೇ |
ತಜ್ಜಾನೌ ಭಾವಯೇತ್ ಸಿದ್ಧಿಂ ಮಹಾದೇಹಾಯ ತೇ ನಮಃ || ೪೮ ||
ಸಾಧ್ಯಂ ನ್ಯಸೇಚ್ಚ ತದ್ಗುಲ್ಫಸಂಧೌ ಘೋರಾಯ ತೇ ನಮಃ |
ನ್ಯಸೇತ್ತದಂಗುಳೀಸಂಧೌ ಶುಭಂ ರೌದ್ರಾಯ ತೇ ನಮಃ || ೪೯ ||
ನ್ಯಸೇದ್ವಾಮೋರುಸಂಧೌ ಚ ಶುಕ್ಲಂ ಕಾಲವಿದೇ ನಮಃ |
ಬ್ರಹ್ಮಯೋಗಂ ಚ ತಜ್ಜಾನೌ ನ್ಯಸೇತ್ಸದ್ಯೋಗಿನೇ ನಮಃ || ೫೦ ||
ಐಂದ್ರಂ ತದ್ಗುಲ್ಫಸಂಧೌ ಚ ಯೋಗಾಧೀಶಾಯ ತೇ ನಮಃ |
ನ್ಯಸೇತ್ತದಂಗುಳೀಸಂಧೌ ನಮೋ ಭವ್ಯಾಯ ವೈಧೃತಿಮ್ || ೫೧ ||
ಚರ್ಮಣಿ ಬವಕರಣಂ ಭಾವಯೇದ್ಯಜ್ವನೇ ನಮಃ |
ಬಾಲವಂ ಭಾವಯೇದ್ರಕ್ತೇ ಸಂಹಾರಕ ನಮೋಽಸ್ತು ತೇ || ೫೨ ||
ಕೌಲವಂ ಭಾವಯೇದಸ್ಥ್ನಿ ನಮಸ್ತೇ ಸರ್ವಭಕ್ಷಿಣೇ |
ತೈತಿಲಂ ಭಾವಯೇನ್ಮಾಂಸೇ ಆಮಮಾಂಸಪ್ರಿಯಾಯ ತೇ || ೫೩ ||
ಗರಂ ನ್ಯಸೇದ್ವಪಾಯಾಂ ಚ ಸರ್ವಗ್ರಾಸಾಯ ತೇ ನಮಃ |
ನ್ಯಸೇದ್ವಣಿಜಂ ಮಜ್ಜಾಯಾಂ ಸರ್ವಾಂತಕ ನಮೋಽಸ್ತು ತೇ || ೫೪ ||
ವೀರ್ಯೇ ವಿಭಾವಯೇದ್ವಿಷ್ಟಿಂ ನಮೋ ಮನ್ಯೂಗ್ರತೇಜಸೇ |
ರುದ್ರಮಿತ್ರಪಿತೃವಸುವಾರೀಣ್ಯೇತಾಂಶ್ಚ ಪಂಚ ಚ || ೫೫ ||
ಮುಹೂರ್ತಾಂಶ್ಚ ದಕ್ಷಪಾದನಖೇಷು ಭಾವಯೇನ್ನಮಃ |
ಖಗೇಶಾಯ ಚ ಖಸ್ಥಾಯ ಖೇಚರಾಯ ಸ್ವರುಪಿಣೇ || ೫೬ ||
ಪುರುಹೂತಶತಮಖೇ ವಿಶ್ವವೇಧೋವಿಧೂಂಸ್ತಥಾ |
ಮುಹೂರ್ತಾಂಶ್ಚ ವಾಮಪಾದನಖೇಷು ಭಾವಯೇನ್ನಮಃ || ೫೭ ||
ಸತ್ಯವ್ರತಾಯ ಸತ್ಯಾಯ ನಿತ್ಯಸತ್ಯಾಯ ತೇ ನಮಃ |
ಸಿದ್ಧೇಶ್ವರ ನಮಸ್ತುಭ್ಯಂ ಯೋಗೇಶ್ವರ ನಮೋಽಸ್ತು ತೇ || ೫೮ ||
ವಹ್ನಿನಕ್ತಂಚರಾಂಶ್ಚೈವ ವರುಣಾರ್ಯಮಯೋನಿಕಾನ್ |
ಮುಹೂರ್ತಾಂಶ್ಚ ದಕ್ಷಹಸ್ತನಖೇಷು ಭಾವಯೇನ್ನಮಃ || ೫೯ ||
ಲಗ್ನೋದಯಾಯ ದೀರ್ಘಾಯ ಮಾರ್ಗಿಣೇ ದಕ್ಷದೃಷ್ಟಯೇ |
ವಕ್ರಾಯ ಚಾತಿಕ್ರೂರಾಯ ನಮಸ್ತೇ ವಾಮದೃಷ್ಟಯೇ || ೬೦ ||
ವಾಮಹಸ್ತನಖೇಷ್ವಂತ್ಯವರ್ಣೇಶಾಯ ನಮೋಽಸ್ತು ತೇ |
ಗಿರಿಶಾಹಿರ್ಬುಧ್ನ್ಯಪೂಷಾಜಪಾದ್ದಸ್ರಾಂಶ್ಚ ಭಾವಯೇತ್ || ೬೧ ||
ರಾಶಿಭೋಕ್ತ್ರೇ ರಾಶಿಗಾಯ ರಾಶಿಭ್ರಮಣಕಾರಿಣೇ |
ರಾಶಿನಾಥಾಯ ರಾಶೀನಾಂ ಫಲದಾತ್ರೇ ನಮೋಽಸ್ತು ತೇ || ೬೨ ||
ಯಮಾಗ್ನಿಚಂದ್ರಾದಿತಿಕವಿಧಾತೄಂಶ್ಚ ವಿಭಾವಯೇತ್ |
ಊರ್ಧ್ವಹಸ್ತದಕ್ಷನಖೇಷ್ವಂತ್ಯಕಾಲಾಯ ತೇ ನಮಃ || ೬೩ ||
ತುಲೋಚ್ಚಸ್ಥಾಯ ಸೌಮ್ಯಾಯ ನಕ್ರಕುಂಭಗೃಹಾಯ ಚ |
ಸಮೀರತ್ವಷ್ಟೃಜೀವಾಂಶ್ಚ ವಿಷ್ಣುತಿಗ್ಮದ್ಯುತೀನ್ನ್ಯಸೇತ್ || ೬೪ ||
ಊರ್ಧ್ವವಾಮಹಸ್ತನಖೇಷ್ವನ್ಯಗ್ರಹನಿವಾರಿಣೇ |
ತುಷ್ಟಾಯ ಚ ವರಿಷ್ಠಾಯ ನಮೋ ರಾಹುಸಖಾಯ ಚ || ೬೫ ||
ರವಿವಾರಂ ಲಲಾಟೇ ಚ ನ್ಯಸೇದ್ಭೀಮದೃಶೇ ನಮಃ |
ಸೋಮವಾರಂ ನ್ಯಸೇದಾಸ್ಯೇ ನಮೋಽಮೃತಪ್ರಿಯಾಯ ಚ || ೬೬ ||
ಭೌಮವಾರಂ ನ್ಯಸೇತ್ ಸ್ವಾಂತೇ ನಮೋ ಬ್ರಹ್ಮಸ್ವರೂಪಿಣೇ |
ಮೇಢ್ರೇ ನ್ಯಸೇತ್ ಸೌಮ್ಯವಾರಂ ನಮೋ ಜೀವಸ್ವರೂಪಿಣೇ || ೬೭ ||
ವೃಷಣೇ ಗುರುವಾರಂ ಚ ನಮೋ ಮಂತ್ರಸ್ವರೂಪಿಣೇ |
ಭೃಗುವಾರಂ ಮಲದ್ವಾರೇ ನಮಃ ಪ್ರಳಯಕಾರಿಣೇ || ೬೮ ||
ಪಾದಯೋಃ ಶನಿವಾರಂ ಚ ನಿರ್ಮಾಂಸಾಯ ನಮೋಽಸ್ತು ತೇ |
ಘಟಿಕಾಂ ನ್ಯಸೇತ್ಕೇಶೇಷು ನಮಸ್ತೇ ಸೂಕ್ಷ್ಮರೂಪಿಣೇ || ೬೯ ||
ಕಾಲರೂಪಿನ್ನಮಸ್ತೇಽಸ್ತು ಸರ್ವಪಾಪಪ್ರಣಾಶಕ ||
ತ್ರಿಪುರಸ್ಯ ವಧಾರ್ಥಾಯ ಶಂಭುಜಾತಾಯ ತೇ ನಮಃ || ೭೦ ||
ನಮಃ ಕಾಲಶರೀರಾಯ ಕಾಲನುನ್ನಾಯ ತೇ ನಮಃ |
ಕಾಲಹೇತೋ ನಮಸ್ತುಭ್ಯಂ ಕಾಲನಂದಾಯ ವೈ ನಮಃ || ೭೧ ||
ಅಖಂಡದಂಡಮಾನಾಯ ತ್ವನಾದ್ಯಂತಾಯ ವೈ ನಮಃ |
ಕಾಲದೇವಾಯ ಕಾಲಾಯ ಕಾಲಕಾಲಾಯ ತೇ ನಮಃ || ೭೨ ||
ನಿಮೇಷಾದಿಮಹಾಕಲ್ಪಕಾಲರುಪಂ ಚ ಭೈರವಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೩ ||
ದಾತಾರಂ ಸರ್ವಭವ್ಯಾನಾಂ ಭಕ್ತಾನಾಮಭಯಂಕರಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೪ ||
ಕರ್ತಾರಂ ಸರ್ವದುಃಖಾನಾಂ ದುಷ್ಟಾನಾಂ ಭಯವರ್ಧನಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೫ ||
ಹರ್ತಾರಂ ಗ್ರಹಜಾತಾನಾಂ ಫಲಾನಾಮಘಕಾರಿಣಾಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೬ ||
ಸರ್ವೇಷಾಮೇವ ಭೂತಾನಾಂ ಸುಖದಂ ಶಾಂತಮವ್ಯಯಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೭ ||
ಕಾರಣಂ ಸುಖದುಃಖಾನಾಂ ಭಾವಾಭಾವಸ್ವರೂಪಿಣಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೮ ||
ಅಕಾಲಮೃತ್ಯುಹರಣಮಪಮೃತ್ಯು ನಿವಾರಣಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೭೯ ||
ಕಾಲರೂಪೇಣ ಸಂಸಾರಂ ಭಕ್ಷಯಂತಂ ಮಹಾಗ್ರಹಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೮೦ ||
ದುರ್ನಿರೀಕ್ಷ್ಯಂ ಸ್ಥೂಲರೋಮಂ ಭೀಷಣಂ ದೀರ್ಘಲೋಚನಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೮೧ ||
ಗ್ರಹಾಣಾಂ ಗ್ರಹಭೂತಂ ಚ ಸರ್ವಗ್ರಹನಿವಾರಣಮ್ |
ಮೃತ್ಯುಂಜಯಂ ಮಹಾಕಾಲಂ ನಮಸ್ಯಾಮಿ ಶನೈಶ್ಚರಮ್ || ೮೨ ||
ಕಾಲಸ್ಯ ವಶಗಾಃ ಸರ್ವೇ ನ ಕಾಲಃ ಕಸ್ಯಚಿದ್ವಶಃ |
ತಸ್ಮಾತ್ತ್ವಾಂ ಕಾಲಪುರುಷಂ ಪ್ರಣತೋಽಸ್ಮಿ ಶನೈಶ್ಚರಮ್ || ೮೩ ||
ಕಾಲದೇವ ಜಗತ್ಸರ್ವಂ ಕಾಲ ಏವ ವಿಲೀಯತೇ |
ಕಾಲರೂಪಃ ಸ್ವಯಂ ಶಂಭುಃ ಕಾಲಾತ್ಮಾ ಗ್ರಹದೇವತಾ || ೮೪ ||
ಚಂಡೀಶೋ ರುದ್ರಡಾಕಿನ್ಯಾಕ್ರಾಂತಶ್ಚಂಡೀಶ ಉಚ್ಯತೇ |
ವಿದ್ಯುದಾಕಲಿತೋ ನದ್ಯಾಂ ಸಮಾರೂಢೋ ರಸಾಧಿಪಃ || ೮೫ ||
ಚಂಡೀಶಃ ಶುಕಸಂಯುಕ್ತೋ ಜಿಹ್ವಯಾ ಲಲಿತಃ ಪುನಃ |
ಕ್ಷತಜಸ್ತಾಮಸೀ ಶೋಭೀ ಸ್ಥಿರಾತ್ಮಾ ವಿದ್ಯುತಾ ಯುತಃ || ೮೬ ||
ನಮೋಽಂತೋ ಮನುರಿತ್ಯೇಷ ಶನಿತುಷ್ಟಿಕರಃ ಶಿವೇ |
ಆದ್ಯಂತೇಽಷ್ಟೋತ್ತರಶತಂ ಮನುಮೇನಂ ಜಪೇನ್ನರಃ || ೮೭ ||
ಯಃ ಪಠೇಚ್ಛೃಣುಯಾದ್ವಾಪಿ ಧ್ಯಾತ್ವಾ ಸಂಪೂಜ್ಯ ಭಕ್ತಿತಃ |
ತಸ್ಯ ಮೃತ್ಯೋರ್ಭಯಂ ನೈವ ಶತವರ್ಷಾವಧಿ ಪ್ರಿಯೇ || ೮೮ ||
ಜ್ವರಾಃ ಸರ್ವೇ ವಿನಶ್ಯಂತಿ ದದ್ರುವಿಸ್ಫೋಟಕಚ್ಛುಕಾಃ |
ದಿವಾ ಸೌರಿಂ ಸ್ಮರೇತ್ ರಾತ್ರೌ ಮಹಾಕಾಲಂ ಯಜನ್ ಪಠೇತ್ || ೮೯ ||
ಜನ್ಮರ್ಕ್ಷೇ ಚ ಯದಾ ಸೌರಿರ್ಜಪೇದೇತತ್ ಸಹಸ್ರಕಮ್ |
ವೇಧಗೇ ವಾಮವೇಧೇ ವಾ ಜಪೇದರ್ಧಸಹಸ್ರಕಮ್ || ೯೦ ||
ದ್ವಿತೀಯೇ ದ್ವಾದಶೇ ಮಂದೇ ತನೌ ವಾ ಚಾಷ್ಟಮೇಽಪಿ ವಾ |
ತತ್ತದ್ರಾಶೌ ಭವೇದ್ಯಾವತ್ ಪಠೇತ್ತಾವದ್ದಿನಾವಧಿ || ೯೧ ||
ಚತುರ್ಥೇ ದಶಮೇ ವಾಽಪಿ ಸಪ್ತಮೇ ನವಪಂಚಮೇ |
ಗೋಚರೇ ಜನ್ಮಲಗ್ನೇಶೇ ದಶಾಸ್ವಂತರ್ದಶಾಸು ಚ || ೯೨ ||
ಗುರುಲಾಘವಜ್ಞಾನೇನ ಪಠೇದಾವೃತ್ತಿಸಂಖ್ಯಯಾ |
ಶತಮೇಕಂ ತ್ರಯಂ ವಾಥ ಶತಯುಗ್ಮಂ ಕದಾಚನ || ೯೩ ||
ಆಪದಸ್ತಸ್ಯ ನಶ್ಯಂತಿ ಪಾಪಾನಿ ಚ ಜಯಂ ಭವೇತ್ |
ಮಹಾಕಾಲಾಲಯೇ ಪೀಠೇ ಹ್ಯಥವಾ ಜಲಸನ್ನಿಧೌ || ೯೪ ||
ಪುಣ್ಯಕ್ಷೇತ್ರೇಽಶ್ವತ್ಥಮೂಲೇ ತೈಲಕುಂಭಾಗ್ರತೋ ಗೃಹೇ |
ನಿಯಮೇನೈಕಭಕ್ತೇನ ಬ್ರಹ್ಮಚರ್ಯೇಣ ಮೌನಿನಾ || ೯೫ ||
ಶ್ರೋತವ್ಯಂ ಪಠಿತವ್ಯಂ ಚ ಸಾಧಕಾನಾಂ ಸುಖಾವಹಮ್ |
ಪರಂ ಸ್ವಸ್ತ್ಯಯನಂ ಪುಣ್ಯಂ ಸ್ತೋತ್ರಂ ಮೃತ್ಯುಂಜಯಾಭಿಧಮ್ || ೯೬ ||
ಕಾಲಕ್ರಮೇಣ ಕಥಿತಂ ನ್ಯಾಸಕ್ರಮಸಮನ್ವಿತಮ್ |
ಪ್ರಾತಃಕಾಲೇ ಶುಚಿರ್ಭೂತ್ವಾ ಪೂಜಾಯಾಂ ಚ ನಿಶಾಮುಖೇ || ೯೭ ||
ಪಠತಾಂ ನೈವ ದುಷ್ಟೇಭ್ಯೋ ವ್ಯಾಘ್ರಸರ್ಪಾದಿತೋ ಭಯಮ್ |
ನಾಗ್ನಿತೋ ನ ಜಲಾದ್ವಾಯೋರ್ದೇಶೇ ದೇಶಾಂತರೇಽಥವಾ || ೯೮ ||
ನಾಽಕಾಲೇ ಮರಣಂ ತೇಷಾಂ ನಾಽಪಮೃತ್ಯುಭಯಂ ಭವೇತ್ |
ಆಯುರ್ವರ್ಷಶತಂ ಸಾಗ್ರಂ ಭವಂತಿ ಚಿರಜೀವಿನಃ || ೯೯ ||
ನಾಽತಃ ಪರತರಂ ಸ್ತೋತ್ರಂ ಶನಿತುಷ್ಟಿಕರಂ ಮಹತ್ |
ಶಾಂತಿಕಂ ಶೀಘ್ರಫಲದಂ ಸ್ತೋತ್ರಮೇತನ್ಮಯೋದಿತಮ್ || ೧೦೦ ||
ತಸ್ಮಾತ್ಸರ್ವಪ್ರಯತ್ನೇನ ಯದೀಚ್ಛೇದಾತ್ಮನೋ ಹಿತಮ್ |
ಕಥನೀಯಂ ಮಹಾದೇವಿ ನೈವಾಭಕ್ತಸ್ಯ ಕಸ್ಯಚಿತ್ || ೧೦೧ ||
ಇತಿ ಮಾರ್ತಂಡಭೈರವತಂತ್ರೇ ಮಹಾಕಾಲ ಶನಿ ಮೃತ್ಯುಂಜಯ ಸ್ತೋತ್ರಮ್ ||
ಇನ್ನಷ್ಟು ನವಗ್ರಹ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
