Read in తెలుగు / ಕನ್ನಡ / தமிழ் / देवनागरी / English (IAST)
[గమనిక: ఈ స్తోత్రము “నవగ్రహ స్తోత్రనిధి” పారాయణ గ్రంథములో కూడా ఉన్నది. Click here to buy.]
నీలాద్రిశోభాంచితదివ్యమూర్తిః
ఖడ్గీ త్రిదండీ శరచాపహస్తః |
శంభుర్మహాకాలశనిః పురారి-
-ర్జయత్యశేషాసురనాశకారీ || ౧ ||
మేరుపృష్ఠే సమాసీనం సామరస్యే స్థితం శివమ్ |
ప్రణమ్య శిరసా గౌరీ పృచ్ఛతి స్మ జగద్ధితమ్ || ౨ ||
పార్వత్యువాచ |
భగవన్ దేవదేవేశ భక్తానుగ్రహకారక |
అల్పమృత్యువినాశాయ యత్త్వయా పూర్వసూచితమ్ || ౩ ||
తదేవ త్వం మహాబాహో లోకానాం హితకారకమ్ |
తవ మూర్తిప్రభేదస్య మహాకాలస్య సాంప్రతమ్ || ౪ ||
శనేర్మృత్యుంజయస్తోత్రం బ్రూహి మే నేత్రజన్మనః |
అకాలమృత్యుహరణమపమృత్యునివారణమ్ || ౫ ||
శనిమంత్రప్రభేదా యే తైర్యుక్తం యత్ స్తవం శుభమ్ |
ప్రతినామ చతుర్థ్యంతం నమోంతం మనునా యుతమ్ || ౬ ||
శ్రీశంకర ఉవాచ |
నిత్యే ప్రియతమే గౌరి సర్వలోకహితే రతే |
గుహ్యాద్గుహ్యతమం దివ్యం సర్వలోకోపకారకమ్ || ౭ ||
శనిమృత్యుంజయస్తోత్రం ప్రవక్ష్యామి తవాధునా |
సర్వమంగళమాంగళ్యం సర్వశత్రువిమర్దనమ్ || ౮ ||
సర్వరోగప్రశమనం సర్వాపద్వినివారణమ్ |
శరీరారోగ్యకరణమాయుర్వృద్ధికరం నృణామ్ || ౯ ||
యది భక్తాసి మే గౌరి గోపనీయం ప్రయత్నతః |
గోపితం సర్వతంత్రేషు తచ్ఛృణుష్వ మహేశ్వరి || ౧౦ ||
అస్య శ్రీమహాకాలశనిమృత్యుంజయ స్తోత్రమంత్రస్య పిప్పలాద ఋషిరనుష్టుప్ ఛందో మహాకాలశనిర్దేవతా శం బీజమాయసీ శక్తిః కాలపురుషాయేతి కీలకం మమాకాలాపమృత్యునివారణార్థే పాఠే వినియోగః ||
ఋషిన్యాసం కరన్యాసం దేహన్యాసం సమాచరేత్ |
మహోగ్రం మూర్ధ్ని విన్యస్య ముఖే వైవస్వతం న్యసేత్ || ౧౧ ||
గలే తు విన్యసేన్మందం బాహ్వోర్మహాగ్రహం న్యసేత్ |
హృది న్యసేన్మహాకాలం గుహ్యే కృశతనుం న్యసేత్ || ౧౨ ||
జాన్వోస్తూడుచరం న్యస్య పాదయోస్తు శనైశ్చరమ్ |
ఏవం న్యాసవిధిం కృత్వా పశ్చాత్ కాలాత్మనః శనేః || ౧౩ ||
న్యాసం ధ్యానం ప్రవక్ష్యామి తనౌ ధ్యాత్వా పఠేన్నరః |
కల్పాదియుగభేదాంశ్చ కరాంగన్యాసరూపిణః || ౧౪ ||
కాలాత్మనో న్యసేద్గాత్రే మృత్యుంజయ నమోఽస్తు తే |
మన్వంతరాణి సర్వాణి మహాకాలస్వరూపిణః || ౧౫ ||
భావయేత్ప్రతి ప్రత్యంగే మహాకాలాయ తే నమః |
భావయేత్ ప్రభవాద్యబ్దాన్ శీర్షే కాలజితే నమః || ౧౬ ||
నమస్తే నిత్యసేవ్యాయ విన్యసేదయనే భ్రువోః |
సౌరయే చ నమస్తేస్తు గండయోర్విన్యసేదృతూన్ || ౧౭ ||
శ్రావణం భావయేదక్ష్ణోర్నమః కృష్ణనిభాయ చ |
మహోగ్రాథ నమో భాద్రం తథా శ్రవణయోర్న్యసేత్ || ౧౮ ||
నమో వై దుర్నిరీక్ష్యాయ చాశ్వినం విన్యసేన్ముఖే |
నమో నీలమయూఖాయ గ్రీవాయాం కార్తికం న్యసేత్ || ౧౯ ||
మార్గశీర్షం న్యసేద్బాహ్వోర్మహారౌద్రాయ తే నమః |
ఊర్ధ్వలోకనివాసాయ పౌషం తు హృదయే న్యసేత్ || ౨౦ ||
నమః కాలప్రబోధాయ మాఘం వై చోదరే న్యసేత్ |
మందగాయ నమో మేఢ్రే న్యసేద్వై ఫాల్గునం తథా || ౨౧ ||
ఊర్వోర్న్యసేచ్చైత్రమాసం నమః శివోద్భవాయ చ |
వైశాఖం విన్యసేజ్జాన్వోర్నమః సంవర్తకాయ చ || ౨౨ ||
జంఘయోర్భావయేజ్జ్యేష్ఠం భైరవాయ నమస్తథా |
ఆషాఢం పాదయోశ్చైవ శనయే చ నమస్తథా || ౨౩ ||
కృష్ణపక్షం చ క్రూరాయ నమ ఆపాదమస్తకే |
న్యసేదాశీర్షపాదాంతే శుక్లపక్షం గ్రహాయ చ || ౨౪ ||
న్యసేన్మూలం పాదయోశ్చ గ్రహాయ శనయే నమః |
నమః సర్వజితే చైవ తోయం సర్వాంగుళౌ న్యసేత్ || ౨౫ ||
న్యసేద్గుల్ఫద్వయే విశ్వం నమః శుష్కతరాయ చ |
విష్ణుభం భావయేజ్జంఘోభయే శిష్టతమాయ తే || ౨౬ ||
జానుద్వయే ధనిష్ఠాం చ న్యసేత్ కృష్ణరుచే నమః |
ఊరుద్వయే వారుణర్క్షం న్యసేత్కాలభృతే నమః || ౨౭ ||
పూర్వభాద్రం న్యసేన్మేఢ్రే జటాజూటధరాయ చ |
పృష్ఠ ఉత్తరభాద్రం చ కరాళాయ నమస్తథా || ౨౮ ||
రేవతీం చ న్యసేన్నాభౌ నమో మందచరాయ చ |
గర్భదేశే న్యసేద్దస్రం నమః శ్యామతరాయ చ || ౨౯ ||
నమో భోగిస్రజే నిత్యం యమం స్తనయుగే న్యసేత్ |
న్యసేత్కృత్తికాం హృదయే నమస్తైలప్రియాయ చ || ౩౦ ||
రోహిణీం భావయేద్ధస్తే నమస్తే ఖడ్గధారిణే |
మృగం న్యసేద్వామహస్తే త్రిదండోల్లసితాయ చ || ౩౧ ||
దక్షోర్ధ్వే భావయేద్రౌద్రం నమో వై బాణధారిణే |
పునర్వసుమూర్ధ్వవామే నమో వై చాపధారిణే || ౩౨ ||
తిష్యం న్యసేద్దక్షబాహౌ నమస్తే హరమన్యవే |
సార్పం న్యసేద్వామబాహౌ చోగ్రచాపాయ తే నమః || ౩౩ ||
మఘాం విభావయేత్కంఠే నమస్తే భస్మధారిణే |
ముఖే న్యసేద్భగర్క్షం చ నమః క్రూరగ్రహాయ చ || ౩౪ ||
భావయేద్దక్షనాసాయామర్యమాణశ్చ యోగినే |
భావయేద్వామనాసాయాం హస్తర్క్షం ధారిణే నమః || ౩౫ ||
త్వాష్ట్రం న్యసేద్దక్షకర్ణే కృసరాన్నప్రియాయ తే |
స్వాతీం న్యసేద్వామకర్ణే నమో బ్రహ్మమయాయ తే || ౩౬ ||
విశాఖాం చ దక్షనేత్రే నమస్తే జ్ఞానదృష్టయే |
మైత్రం న్యసేద్వామనేత్రే నమోఽంధలోచనాయ తే || ౩౭ ||
శాక్రం న్యసేచ్చ శిరసి నమః సంవర్తకాయ చ |
విష్కంభం భావయేచ్ఛీర్షసంధౌ కాలాయ తే నమః || ౩౮ ||
ప్రీతియోగం భ్రువోః సంధౌ మహామంద నమోఽస్తు తే |
నేత్రయోః సంధావాయుష్మద్యోగం భీష్మాయ తే నమః || ౩౯ ||
సౌభాగ్యం భావయేన్నాసాసంధౌ ఫలాశనాయ చ |
శోభనం భావయేత్కర్ణే సంధౌ పుణ్యాత్మనే నమః || ౪౦ ||
నమః కృష్ణాయాతిగండం హనుసంధౌ విభావయేత్ |
నమో నిర్మాంసదేహాయ సుకర్మాణం శిరోధరే || ౪౧ ||
ధృతిం న్యసేద్దక్షబాహౌ పృష్ఠే ఛాయాసుతాయ చ |
తన్మూలసంధౌ శూలం చ న్యసేదుగ్రాయ తే నమః || ౪౨ ||
తత్కూర్పరే న్యసేద్గండే నిత్యానందాయ తే నమః |
వృద్ధిం తన్మణిబంధే చ కాలజ్ఞాయ నమో న్యసేత్ || ౪౩ ||
ధ్రువం తదంగుళీమూలసంధౌ కృష్ణాయ తే నమః |
వ్యాఘాతం భావయేద్వామబాహుపృష్ఠే కృశాయ చ || ౪౪ ||
హర్షణం తన్మూలసంధౌ భుతసంతాపినే నమః |
తత్కూర్పరే న్యసేద్వజ్రం సానందాయ నమోఽస్తు తే || ౪౫ ||
సిద్ధిం తన్మణిబంధే చ న్యసేత్ కాలాగ్నయే నమః |
వ్యతీపాతం కరాగ్రేషు న్యసేత్కాలకృతే నమః || ౪౬ ||
వరీయాంసం దక్షపార్శ్వసంధౌ కాలాత్మనే నమః |
పరిఘం భావయేద్వామపార్శ్వసంధౌ నమోఽస్తు తే || ౪౭ ||
న్యసేద్దక్షోరుసంధౌ చ శివం వై కాలసాక్షిణే |
తజ్జానౌ భావయేత్ సిద్ధిం మహాదేహాయ తే నమః || ౪౮ ||
సాధ్యం న్యసేచ్చ తద్గుల్ఫసంధౌ ఘోరాయ తే నమః |
న్యసేత్తదంగుళీసంధౌ శుభం రౌద్రాయ తే నమః || ౪౯ ||
న్యసేద్వామోరుసంధౌ చ శుక్లం కాలవిదే నమః |
బ్రహ్మయోగం చ తజ్జానౌ న్యసేత్సద్యోగినే నమః || ౫౦ ||
ఐంద్రం తద్గుల్ఫసంధౌ చ యోగాధీశాయ తే నమః |
న్యసేత్తదంగుళీసంధౌ నమో భవ్యాయ వైధృతిమ్ || ౫౧ ||
చర్మణి బవకరణం భావయేద్యజ్వనే నమః |
బాలవం భావయేద్రక్తే సంహారక నమోఽస్తు తే || ౫౨ ||
కౌలవం భావయేదస్థ్ని నమస్తే సర్వభక్షిణే |
తైతిలం భావయేన్మాంసే ఆమమాంసప్రియాయ తే || ౫౩ ||
గరం న్యసేద్వపాయాం చ సర్వగ్రాసాయ తే నమః |
న్యసేద్వణిజం మజ్జాయాం సర్వాంతక నమోఽస్తు తే || ౫౪ ||
వీర్యే విభావయేద్విష్టిం నమో మన్యూగ్రతేజసే |
రుద్రమిత్రపితృవసువారీణ్యేతాంశ్చ పంచ చ || ౫౫ ||
ముహూర్తాంశ్చ దక్షపాదనఖేషు భావయేన్నమః |
ఖగేశాయ చ ఖస్థాయ ఖేచరాయ స్వరుపిణే || ౫౬ ||
పురుహూతశతమఖే విశ్వవేధోవిధూంస్తథా |
ముహూర్తాంశ్చ వామపాదనఖేషు భావయేన్నమః || ౫౭ ||
సత్యవ్రతాయ సత్యాయ నిత్యసత్యాయ తే నమః |
సిద్ధేశ్వర నమస్తుభ్యం యోగేశ్వర నమోఽస్తు తే || ౫౮ ||
వహ్నినక్తంచరాంశ్చైవ వరుణార్యమయోనికాన్ |
ముహూర్తాంశ్చ దక్షహస్తనఖేషు భావయేన్నమః || ౫౯ ||
లగ్నోదయాయ దీర్ఘాయ మార్గిణే దక్షదృష్టయే |
వక్రాయ చాతిక్రూరాయ నమస్తే వామదృష్టయే || ౬౦ ||
వామహస్తనఖేష్వంత్యవర్ణేశాయ నమోఽస్తు తే |
గిరిశాహిర్బుధ్న్యపూషాజపాద్దస్రాంశ్చ భావయేత్ || ౬౧ ||
రాశిభోక్త్రే రాశిగాయ రాశిభ్రమణకారిణే |
రాశినాథాయ రాశీనాం ఫలదాత్రే నమోఽస్తు తే || ౬౨ ||
యమాగ్నిచంద్రాదితికవిధాతౄంశ్చ విభావయేత్ |
ఊర్ధ్వహస్తదక్షనఖేష్వంత్యకాలాయ తే నమః || ౬౩ ||
తులోచ్చస్థాయ సౌమ్యాయ నక్రకుంభగృహాయ చ |
సమీరత్వష్టృజీవాంశ్చ విష్ణుతిగ్మద్యుతీన్న్యసేత్ || ౬౪ ||
ఊర్ధ్వవామహస్తనఖేష్వన్యగ్రహనివారిణే |
తుష్టాయ చ వరిష్ఠాయ నమో రాహుసఖాయ చ || ౬౫ ||
రవివారం లలాటే చ న్యసేద్భీమదృశే నమః |
సోమవారం న్యసేదాస్యే నమోఽమృతప్రియాయ చ || ౬౬ ||
భౌమవారం న్యసేత్ స్వాంతే నమో బ్రహ్మస్వరూపిణే |
మేఢ్రే న్యసేత్ సౌమ్యవారం నమో జీవస్వరూపిణే || ౬౭ ||
వృషణే గురువారం చ నమో మంత్రస్వరూపిణే |
భృగువారం మలద్వారే నమః ప్రళయకారిణే || ౬౮ ||
పాదయోః శనివారం చ నిర్మాంసాయ నమోఽస్తు తే |
ఘటికాం న్యసేత్కేశేషు నమస్తే సూక్ష్మరూపిణే || ౬౯ ||
కాలరూపిన్నమస్తేఽస్తు సర్వపాపప్రణాశక ||
త్రిపురస్య వధార్థాయ శంభుజాతాయ తే నమః || ౭౦ ||
నమః కాలశరీరాయ కాలనున్నాయ తే నమః |
కాలహేతో నమస్తుభ్యం కాలనందాయ వై నమః || ౭౧ ||
అఖండదండమానాయ త్వనాద్యంతాయ వై నమః |
కాలదేవాయ కాలాయ కాలకాలాయ తే నమః || ౭౨ ||
నిమేషాదిమహాకల్పకాలరుపం చ భైరవమ్ |
మృత్యుంజయం మహాకాలం నమస్యామి శనైశ్చరమ్ || ౭౩ ||
దాతారం సర్వభవ్యానాం భక్తానామభయంకరమ్ |
మృత్యుంజయం మహాకాలం నమస్యామి శనైశ్చరమ్ || ౭౪ ||
కర్తారం సర్వదుఃఖానాం దుష్టానాం భయవర్ధనమ్ |
మృత్యుంజయం మహాకాలం నమస్యామి శనైశ్చరమ్ || ౭౫ ||
హర్తారం గ్రహజాతానాం ఫలానామఘకారిణామ్ |
మృత్యుంజయం మహాకాలం నమస్యామి శనైశ్చరమ్ || ౭౬ ||
సర్వేషామేవ భూతానాం సుఖదం శాంతమవ్యయమ్ |
మృత్యుంజయం మహాకాలం నమస్యామి శనైశ్చరమ్ || ౭౭ ||
కారణం సుఖదుఃఖానాం భావాభావస్వరూపిణమ్ |
మృత్యుంజయం మహాకాలం నమస్యామి శనైశ్చరమ్ || ౭౮ ||
అకాలమృత్యుహరణమపమృత్యు నివారణమ్ |
మృత్యుంజయం మహాకాలం నమస్యామి శనైశ్చరమ్ || ౭౯ ||
కాలరూపేణ సంసారం భక్షయంతం మహాగ్రహమ్ |
మృత్యుంజయం మహాకాలం నమస్యామి శనైశ్చరమ్ || ౮౦ ||
దుర్నిరీక్ష్యం స్థూలరోమం భీషణం దీర్ఘలోచనమ్ |
మృత్యుంజయం మహాకాలం నమస్యామి శనైశ్చరమ్ || ౮౧ ||
గ్రహాణాం గ్రహభూతం చ సర్వగ్రహనివారణమ్ |
మృత్యుంజయం మహాకాలం నమస్యామి శనైశ్చరమ్ || ౮౨ ||
కాలస్య వశగాః సర్వే న కాలః కస్యచిద్వశః |
తస్మాత్త్వాం కాలపురుషం ప్రణతోఽస్మి శనైశ్చరమ్ || ౮౩ ||
కాలదేవ జగత్సర్వం కాల ఏవ విలీయతే |
కాలరూపః స్వయం శంభుః కాలాత్మా గ్రహదేవతా || ౮౪ ||
చండీశో రుద్రడాకిన్యాక్రాంతశ్చండీశ ఉచ్యతే |
విద్యుదాకలితో నద్యాం సమారూఢో రసాధిపః || ౮౫ ||
చండీశః శుకసంయుక్తో జిహ్వయా లలితః పునః |
క్షతజస్తామసీ శోభీ స్థిరాత్మా విద్యుతా యుతః || ౮౬ ||
నమోఽంతో మనురిత్యేష శనితుష్టికరః శివే |
ఆద్యంతేఽష్టోత్తరశతం మనుమేనం జపేన్నరః || ౮౭ ||
యః పఠేచ్ఛృణుయాద్వాపి ధ్యాత్వా సంపూజ్య భక్తితః |
తస్య మృత్యోర్భయం నైవ శతవర్షావధి ప్రియే || ౮౮ ||
జ్వరాః సర్వే వినశ్యంతి దద్రువిస్ఫోటకచ్ఛుకాః |
దివా సౌరిం స్మరేత్ రాత్రౌ మహాకాలం యజన్ పఠేత్ || ౮౯ ||
జన్మర్క్షే చ యదా సౌరిర్జపేదేతత్ సహస్రకమ్ |
వేధగే వామవేధే వా జపేదర్ధసహస్రకమ్ || ౯౦ ||
ద్వితీయే ద్వాదశే మందే తనౌ వా చాష్టమేఽపి వా |
తత్తద్రాశౌ భవేద్యావత్ పఠేత్తావద్దినావధి || ౯౧ ||
చతుర్థే దశమే వాఽపి సప్తమే నవపంచమే |
గోచరే జన్మలగ్నేశే దశాస్వంతర్దశాసు చ || ౯౨ ||
గురులాఘవజ్ఞానేన పఠేదావృత్తిసంఖ్యయా |
శతమేకం త్రయం వాథ శతయుగ్మం కదాచన || ౯౩ ||
ఆపదస్తస్య నశ్యంతి పాపాని చ జయం భవేత్ |
మహాకాలాలయే పీఠే హ్యథవా జలసన్నిధౌ || ౯౪ ||
పుణ్యక్షేత్రేఽశ్వత్థమూలే తైలకుంభాగ్రతో గృహే |
నియమేనైకభక్తేన బ్రహ్మచర్యేణ మౌనినా || ౯౫ ||
శ్రోతవ్యం పఠితవ్యం చ సాధకానాం సుఖావహమ్ |
పరం స్వస్త్యయనం పుణ్యం స్తోత్రం మృత్యుంజయాభిధమ్ || ౯౬ ||
కాలక్రమేణ కథితం న్యాసక్రమసమన్వితమ్ |
ప్రాతఃకాలే శుచిర్భూత్వా పూజాయాం చ నిశాముఖే || ౯౭ ||
పఠతాం నైవ దుష్టేభ్యో వ్యాఘ్రసర్పాదితో భయమ్ |
నాగ్నితో న జలాద్వాయోర్దేశే దేశాంతరేఽథవా || ౯౮ ||
నాఽకాలే మరణం తేషాం నాఽపమృత్యుభయం భవేత్ |
ఆయుర్వర్షశతం సాగ్రం భవంతి చిరజీవినః || ౯౯ ||
నాఽతః పరతరం స్తోత్రం శనితుష్టికరం మహత్ |
శాంతికం శీఘ్రఫలదం స్తోత్రమేతన్మయోదితమ్ || ౧౦౦ ||
తస్మాత్సర్వప్రయత్నేన యదీచ్ఛేదాత్మనో హితమ్ |
కథనీయం మహాదేవి నైవాభక్తస్య కస్యచిత్ || ౧౦౧ ||
ఇతి మార్తండభైరవతంత్రే మహాకాల శని మృత్యుంజయ స్తోత్రమ్ ||
గమనిక: పైన ఇవ్వబడిన స్తోత్రము, ఈ పుస్తకములో కూడా ఉన్నది.
నవగ్రహ స్తోత్రనిధి
(నిత్య పారాయణ గ్రంథము)
మరిన్ని నవగ్రహ స్తోత్రాలు చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
