Read in తెలుగు / ಕನ್ನಡ / தமிழ் / देवनागरी / English (IAST)
ಭಗವಂತಂ ದೇವದೇವಂ ಬ್ರಹ್ಮಾಣಂ ಪರಮೇಷ್ಠಿನಮ್ |
ವಿಧಾತಾರಂ ವಿಶ್ವಸೃಜಂ ಪದ್ಮಯೋನಿಂ ಪ್ರಜಾಪತಿಮ್ || ೧ ||
ಶುದ್ಧಸ್ಫಟಿಕಸಂಕಾಶಂ ಮಹೇಂದ್ರಶಿಖರೋಪಮಮ್ |
ಬದ್ಧಪಿಂಗಜಟಾಜೂಟಂ ತಡಿತ್ಕನಕಕುಂಡಲಮ್ || ೨ ||
ಶರಚ್ಚಂದ್ರಾಭವದನಂ ಸ್ಫುರದಿಂದೀವರೇಕ್ಷಣಮ್ |
ಹಿರಣ್ಮಯಂ ವಿಶ್ವರೂಪಮುಪವೀತಾಜಿನಾವೃತಮ್ || ೩ ||
ಮೌಕ್ತಿಕಾಭಾಕ್ಷವಲಯಸ್ತಂತ್ರೀಲಯಸಮನ್ವಿತಃ |
ಕರ್ಪೂರೋದ್ಧೂಳಿತತನುಂ ಸ್ರಷ್ಟಾರಂ ನೇತ್ರಗೋಚರಮ್ || ೪ ||
ವಿನಯೇನೋಪಸಂಗಮ್ಯ ಶಿರಸಾ ಪ್ರಣಿಪತ್ಯ ಚ |
ನಾರದಃ ಪರಿಪಪ್ರಚ್ಛ ದೇವರ್ಷಿಗಣಮಧ್ಯಗಃ || ೫ ||
ನಾರದ ಉವಾಚ |
ಭಗವನ್ ದೇವದೇವೇಶ ಸರ್ವಜ್ಞ ಕರುಣಾನಿಧೇ |
ಶ್ರೋತುಮಿಚ್ಛಾಮಿ ತತ್ತತ್ವಂ ಭೋಗಮೋಕ್ಷೈಕಸಾಧನಮ್ || ೬ ||
ಐಶ್ವರ್ಯಸ್ಯ ಸಮಗ್ರಸ್ಯ ಫಲದಂ ದ್ವಂದ್ವವರ್ಜಿತಮ್ |
ಬ್ರಹ್ಮಹತ್ಯಾದಿಪಾಪಘ್ನಂ ಪಾಪಾದ್ಯರಿಭಯಾಪಹಮ್ || ೭ ||
ಯದೇಕಂ ನಿಷ್ಕಳಂ ಸೂಕ್ಷ್ಮಂ ನಿರಂಜನಮನಾಮಯಮ್ |
ಯತ್ತೇ ಪ್ರಿಯತಮಂ ಲೋಕೇ ತನ್ಮೇ ಬ್ರೂಹಿ ಪಿತರ್ಮಮ || ೮ ||
ಬ್ರಹ್ಮೋವಾಚ |
ಶೃಣು ನಾರದ ವಕ್ಷ್ಯಾಮಿ ಬ್ರಹ್ಮಮೂಲಂ ಸನಾತನಮ್ |
ಸೃಷ್ಟ್ಯಾದೌ ಮನ್ಮುಖೇ ಕ್ಷಿಪ್ತಂ ದೇವದೇವೇನ ವಿಷ್ಣುನಾ || ೯ ||
ಪ್ರಪಂಚಬೀಜಮಿತ್ಯಾಹುರುತ್ಪತ್ತಿಸ್ಥಿತಿಹೇತುಕಮ್ |
ಪುರಾ ಮಯಾ ತು ಕಥಿತಂ ಕಶ್ಯಪಾಯ ಸುಧೀಮತೇ || ೧೦ ||
ಸಾವಿತ್ರೀಪಂಜರಂ ನಾಮ ರಹಸ್ಯಂ ನಿಗಮತ್ರಯೇ |
ಋಷ್ಯಾದಿಕಂ ಚ ದಿಗ್ವರ್ಣಂ ಸಾಂಗಾವರಣಕಂ ಕ್ರಮಾತ್ || ೧೧ ||
ವಾಹನಾಯುಧಮಂತ್ರಾಸ್ತ್ರಮೂರ್ತಿಧ್ಯಾನಸಮನ್ವಿತಮ್ |
ಸ್ತೋತ್ರಂ ಶೃಣು ಪ್ರವಕ್ಷ್ಯಾಮಿ ತವ ಸ್ನೇಹಾಚ್ಚ ನಾರದ || ೧೨ ||
ಬ್ರಹ್ಮನಿಷ್ಠಾಯ ದೇಯಂ ಸ್ಯಾದದೇಯಂ ಯಸ್ಯ ಕಸ್ಯಚಿತ್ |
ಆಚಮ್ಯ ನಿಯತಃ ಪಶ್ಚಾದಾತ್ಮಧ್ಯಾನಪುರಃಸರಮ್ || ೧೩ ||
ಓಮಿತ್ಯಾದೌ ವಿಚಿಂತ್ಯಾಥ ವ್ಯೋಮಹೇಮಾಬ್ಜಸಂಸ್ಥಿತಮ್ |
ಧರ್ಮಕಂದಗತಜ್ಞಾನಾದೈಶ್ವರ್ಯಾಷ್ಟದಳಾನ್ವಿತಮ್ || ೧೪ ||
ವೈರಾಗ್ಯಕರ್ಣಿಕಾಧೀನಾಂ ಪ್ರಣವಗ್ರಹಮಧ್ಯಗಾಮ್ |
ಬ್ರಹ್ಮವೇದಿಸಮಾಯುಕ್ತಾಂ ಚೈತನ್ಯಪುರಮಧ್ಯಗಾಮ್ || ೧೫ ||
ತತ್ತ್ವಹಂಸಸಮಾಕೀರ್ಣಾಂ ಶಬ್ದಪೀಠೇ ಸುಸಂಸ್ಥಿತಾಮ್ |
ನಾದಬಿಂದುಕಳಾತೀತಾಂ ಗೋಪುರೈರಪಿ ಸಂವೃತಾಮ್ || ೧೬ ||
ವಿದ್ಯಾಽವಿದ್ಯಾಽಮೃತತ್ವಾದಿ ಪ್ರಕಾರೈರಪಿಸಂವೃತಾಮ್ |
ನಿಗಮಾರ್ಗಳಸಂಛನ್ನಾಂ ನಿರ್ಗುಣದ್ವಾರವಾಟಿಕಾಮ್ || ೧೭ ||
ಚತುರ್ವರ್ಗಫಲೋಪೇತಾಂ ಮಹಾಕಲ್ಪವನೈರ್ವೃತಾಮ್ |
ಸಾಂದ್ರಾನಂದಸುಧಾಸಿಂಧುನಿಗಮದ್ವಾರವಾಟಿಕಾಮ್ || ೧೮ ||
ಧ್ಯಾನಧಾರಣಯೋಗಾದಿ ತೃಣಗುಲ್ಮಲತಾವೃತಾಮ್ |
ಸದಸಚ್ಚಿತ್ಸ್ವರೂಪಾಖ್ಯ ಮೃಗಪಕ್ಷಿಸಮಾಕುಲಾಮ್ || ೧೯ ||
ವಿದ್ಯಾಽವಿದ್ಯಾವಿಚಾರಾಖ್ಯಲೋಕಾಲೋಕಾಚಲಾವೃತಾಮ್ |
ಪಂಚೀಕರಣಪಂಚೋತ್ಥಭೂತತತ್ತ್ವನಿವೇದಿತಾಮ್ || ೨೦ ||
ಅವಿಕಾರಸಮಾಶ್ಲಿಷ್ಟನಿಜಧ್ಯಾನಗುಣಾವೃತಾಮ್ |
ವೇದೋಪನಿಷದರ್ಥಾಖ್ಯ ದೇವರ್ಷಿಗಣಸೇವಿತಾಮ್ || ೨೧ ||
ಇತಿಹಾಸಗ್ರಹಗಣೈಃ ಸದಾರೈರಭಿವಂದಿತಾಮ್ |
ಗಾಥಾಪ್ಸರೋಭಿರ್ಯಕ್ಷೈಶ್ಚ ಗಣಕಿನ್ನರಸೇವಿತಾಮ್ || ೨೨ ||
ನಾರಸಿಂಹಮುಖೈಶ್ಚಾಪಿ ಪುರುಷೈಃ ಕಲ್ಪಚಾರಣೈಃ |
ಕೃತಗಾನವಿನೋದಾದಿಕಥಾಲಾಪನತತ್ಪರಾಮ್ || ೨೩ ||
ತದಿತ್ಯವಾಙ್ಮನೋಗಮ್ಯತೇಜೋರೂಪಧರಾಂ ಪರಾಮ್ |
ಜಗತಃ ಪ್ರಸವಿತ್ರೀಂ ತಾಂ ಸವಿತುಃ ಸೃಷ್ಟಿಕಾರಿಣೀಮ್ || ೨೪ ||
ವರೇಣ್ಯಮಿತ್ಯನ್ನಮಯೀಂ ಪುರುಷಾರ್ಥಫಲಪ್ರದಾಮ್ |
ಅವಿದ್ಯಾವರ್ಣವರ್ಜ್ಯಾಂ ಚ ತೇಜೋವದ್ಭರ್ಗಸಂಜ್ಞಿಕಾಮ್ || ೨೫ ||
ದೇವಸ್ಯ ಸಚ್ಚಿದಾನಂದ ಪರಬ್ರಹ್ಮರಸಾತ್ಮಿಕಾಮ್ |
ಧೀಮಹ್ಯಹಂ ಸ ವೈ ತದ್ವದ್ಬ್ರಹ್ಮಾದ್ವೈತಸ್ವರೂಪಿಣೀಮ್ || ೨೬ ||
ಧಿಯೋ ಯೋ ನಸ್ತು ಸವಿತಾ ಪ್ರಚೋದಯಾದುಪಾಸಿತಾಮ್ |
ಪರೋಽಸೌ ಸವಿತಾ ಸಾಕ್ಷಾದ್ದೇವೋನಿರ್ಹರಣಾಯ ಚ || ೨೭ ||
ಪರೋರಜಸ ಇತ್ಯಾದಿ ಪರಬ್ರಹ್ಮಾತ್ಮಸಾವದೋಮ್ |
ಆಪೋ ಜ್ಯೋತಿರಿತಿ ದ್ವಾಭ್ಯಾಂ ಪಾಂಚಭೌತಿಕಸಂಜ್ಞಿಕಾಮ್ || ೨೮ ||
ರಸೋಽಮೃತಂ ಬ್ರಹ್ಮಪದೈಸ್ತಾಂ ನಿತ್ಯಾಂ ತಾಪಿನೀಂ ಪರಾಮ್ |
ಭೂರ್ಭುವಃಸುವರಿತ್ಯೇತೈರ್ನಿಗಮತ್ವಪ್ರಕಾಶಿಕಾಮ್ || ೨೯ ||
ಮಹರ್ಜನಸ್ತಪಃಸತ್ಯಲೋಕೋಪರಿಸುಸಂಸ್ಥಿತಾಮ್ |
ತಾದೃಗಸ್ಯಾ ವಿರಾಡ್ರೂಪಂ ರಹಸ್ಯಂ ಪ್ರವದಾಮ್ಯಹಮ್ || ೩೦ ||
ವ್ಯೋಮಕೇಶಾಕುಲಾಕಾಶ ದ್ಯೋಕಿರೀಟವಿರಾಜಿತಾಮ್ |
ತಟಿದ್ಭ್ರುಕುಟಿನಾಕ್ರಾಂತವಿಧಿವಿಷ್ಣುಶಿವಾರ್ಚಿತಾಮ್ || ೩೧ ||
ಗುರುಭಾರ್ಗವಕರ್ಣಾಂತಾಂ ಸೋಮಸೂರ್ಯಾಗ್ನಿಲೋಚನಾಮ್ |
ಇಡಾಪಿಂಗಳಸೌಷುಮ್ಣ ವಾಮನಾಸಾಪುಟಾನ್ವಿತಾಮ್ || ೩೨ ||
ಸಂಧ್ಯಾದ್ವಿರೋಷ್ಠಪುಟಿತಾಂ ಲಸದ್ವಾಗ್ಭವಜಿಹ್ವಿಕಾಮ್ |
ಸಂಧ್ಯಾಸೌ ದ್ಯುಮಣೇಃ ಕಂಠಲಸದ್ಬಾಹುಸಮನ್ವಿತಾಮ್ || ೩೩ ||
ಪರ್ಜನ್ಯಹೃದಯಾಸಕ್ತವಸುಸುಸ್ತನಮಂಡಲಾಮ್ |
ಆಕಾಶೋದರವಿತ್ರಸ್ತನಾಭ್ಯವಾಂತರದೇಶಿಕಾಮ್ || ೩೪ ||
ಪ್ರಾಜಾಪತ್ಯಾಖ್ಯಜಘನಾಮಿಂದ್ರಾಣೀಕಟಿಸಂಜ್ಞಿಕಾಮ್ |
ಊರೂ ಮಲಯಮೇರುಭ್ಯಾಂ ಶೋಭಮಾನಾಂ ಸುರದ್ವಿಷಮ್ || ೩೫ ||
ಜಾನುನೀ ಜಹ್ನುಕುಶಿಕೌ ವೈಶ್ವದೇವಲಸದ್ಭುಜಾಮ್ |
ಅಯನದ್ವಯಜಂಘಾದ್ಯಸುರಾದ್ಯಪಿತೃಸಂಜ್ಞಿಕಾಮ್ || ೩೬ ||
ಪದಾಂಘ್ರಿನಖರೋಮಾಳಿಭೂತಲದ್ರುಮಲಾಂಛಿತಾಮ್ |
ಗ್ರಹರಾಶ್ಯರ್ಕ್ಷದೇವರ್ಷಿಮೂರ್ತಿಂ ಚ ಪರಸಂಜ್ಞಿಕಾಮ್ || ೩೭ ||
ತಿಥಿಮಾಸರ್ತುವರ್ಷಾಖ್ಯಸುಕೇತುನಿಮಿಷಾತ್ಮಿಕಾಮ್ |
ಅಹೋರಾತ್ರಾರ್ಧಮಾಸಾಖ್ಯಾಮಾರ್ಯಾಂ ಚಂದ್ರಮಸಾತ್ಮಿಕಾಮ್ || ೩೮ ||
ಮಾಯಾಕಲ್ಪಿತವೈಚಿತ್ರ್ಯಸಂಧ್ಯಾಚ್ಛಾದನಸಂವೃತಾಮ್ |
ಜ್ವಲತ್ಕಾಲಾನಲಪ್ರಖ್ಯಾಂ ತಡಿತ್ಕೋಟಿಸಮಪ್ರಭಾಮ್ || ೩೯ ||
ಕೋಟಿಸೂರ್ಯಪ್ರತೀಕಾಶಾಂ ಚಂದ್ರಕೋಟಿಸುಶೀತಲಾಮ್ |
ಸುಧಾಮಂಡಲಮಧ್ಯಸ್ಥಾಂ ಸಾಂದ್ರಾನಂದಾಮೃತಾತ್ಮಿಕಾಮ್ || ೪೦ ||
ವಾಗತೀತಾಂ ಮನೋರಮ್ಯಾಂ ವರದಾಂ ವೇದಮಾತರಮ್ |
ಚರಾಚರಮಯೀಂ ನಿತ್ಯಾಂ ಬ್ರಹ್ಮಾಕ್ಷರಸಮನ್ವಿತಾಮ್ || ೪೧ ||
ಧ್ಯಾತ್ವಾ ಸ್ವಾತ್ಮನ್ಯಭೇದೇನ ಬ್ರಹ್ಮಪಂಜರಮಾರಭೇತ್ |
ಪಂಜರಸ್ಯ ಋಷಿಶ್ಚಾಹಂ ಛಂದೋ ವಿಕೃತಿರುಚ್ಯತೇ || ೪೨ ||
ದೇವತಾ ಚ ಪರೋ ಹಂಸಃ ಪರಬ್ರಹ್ಮಾಧಿದೇವತಾ |
ಪ್ರಣವೋ ಬೀಜಶಕ್ತಿಃ ಸ್ಯಾದೋಂ ಕೀಲಕಮುದಾಹೃತಮ್ || ೪೩ ||
ತತ್ತತ್ತ್ವಂ ಧೀಮಹಿ ಕ್ಷೇತ್ರಂ ಧಿಯೋಽಸ್ತ್ರಂ ಯಃ ಪರಂ ಪದಮ್ |
ಮಂತ್ರಮಾಪೋ ಜ್ಯೋತಿರಿತಿ ಯೋನಿರ್ಹಂಸಃ ಸವೇಧಕಮ್ || ೪೪ ||
ವಿನಿಯೋಗಸ್ತು ಸಿದ್ಧ್ಯರ್ಥಂ ಪುರುಷಾರ್ಥಚತುಷ್ಟಯೇ |
ತತಸ್ತೈರಂಗಷಟ್ಕಂ ಸ್ಯಾತ್ತೈರೇವ ವ್ಯಾಪಕತ್ರಯಮ್ || ೪೫ ||
ಪೂರ್ವೋಕ್ತದೇವತಾಂ ಧ್ಯಾಯೇತ್ಸಾಕಾರಗುಣಸಂಯುತಾಮ್ |
ಪಂಚವಕ್ತ್ರಾಂ ದಶಭುಜಾಂ ತ್ರಿಪಂಚನಯನೈರ್ಯುತಾಮ್ || ೪೬ ||
ಮುಕ್ತಾವಿದ್ರುಮಸೌವರ್ಣಾಮೋಷಧೀಶಸಮಾನನಾಮ್ |
ವಾಣೀಂ ಪರಾಂ ರಮಾಂ ಮಾಯಾಂ ಚಾಮರೈರ್ದರ್ಪಣೈರ್ಯುತಾಮ್ || ೪೭ ||
ಷಡಂಗದೇವತಾಮಂತ್ರೈ ರೂಪಾದ್ಯವಯವಾತ್ಮಿಕಾಮ್ |
ಮೃಗೇಂದ್ರವೃಷಪಕ್ಷೀಂದ್ರಮೃಗಹಂಸಾಸನಸ್ಥಿತಾಮ್ || ೪೮ ||
ಅರ್ಧೇಂದುಬದ್ಧಮುಕುಟಕಿರೀಟಮಣಿಕುಂಡಲಾಮ್ |
ರತ್ನತಾಟಂಕಮಾಂಗಳ್ಯಪರಗ್ರೈವೇಯನೂಪುರಾಮ್ || ೪೯ ||
ಅಂಗುಳೀಯಕಕೇಯೂರಕಂಕಣಾದ್ಯೈರಲಂಕೃತಾಮ್ |
ದಿವ್ಯಸ್ರಗ್ವಸ್ತ್ರಸಂಛನ್ನರವಿಮಂಡಲಮಧ್ಯಗಾಮ್ || ೫೦ ||
ವರಾಽಭಯಾಬ್ಜಯುಗಳಾಂ ಶಂಖಚಕ್ರಗದಾಂಕುಶಾಮ್ |
ಶುಭ್ರಂ ಕಪಾಲಂ ದಧತೀಂ ವಹಂತೀಮಕ್ಷಮಾಲಿಕಾಮ್ || ೫೧ ||
ಗಾಯತ್ರೀಂ ವರದಾಂ ದೇವೀಂ ಸಾವಿತ್ರೀಂ ವೇದಮಾತರಮ್ |
ಆದಿತ್ಯಪಥಗಾಂ ದೇವೀಂ ಸ್ಮರೇದ್ಬ್ರಹ್ಮಸ್ವರೂಪಿಣೀಮ್ || ೫೨ ||
ವಿಚಿತ್ರಮಂತ್ರಜನನೀಂ ಸ್ಮರೇದ್ವಿದ್ಯಾಂ ಸರಸ್ವತೀಮ್ |
ತ್ರಿಪದಾ ಋಙ್ಮಯೀ ಪೂರ್ವಾ ಮುಖೀ ಬ್ರಹ್ಮಾಸ್ತ್ರಸಂಜ್ಞಿಕಾ || ೫೩ ||
ಚತುರ್ವಿಂಶತಿತತ್ತ್ವಾಖ್ಯಾ ಪಾತು ಪ್ರಾಚೀಂ ದಿಶಂ ಮಮ |
ಚತುಷ್ಪಾದಾ ಯಜುರ್ಬ್ರಹ್ಮದಂಡಾಖ್ಯಾ ಪಾತು ದಕ್ಷಿಣಾ || ೫೪ ||
ಷಟ್ತ್ರಿಂಶತ್ತತ್ತ್ವಯುಕ್ತಾ ಸಾ ಪಾತು ಮೇ ದಕ್ಷಿಣಾಂ ದಿಶಮ್ |
ಪ್ರತ್ಯಙ್ಮುಖೀ ಪಂಚಪದೀ ಪಂಚಾಶತ್ತತ್ತ್ವರೂಪಿಣೀ || ೫೫ ||
ಪಾತು ಪ್ರತೀಚೀಮನಿಶಂ ಸಾಮಬ್ರಹ್ಮಶಿರೋಂಕಿತಾ |
ಸೌಮ್ಯಾ ಬ್ರಹ್ಮಸ್ವರೂಪಾಖ್ಯಾ ಸಾಥರ್ವಾಂಗಿರಸಾತ್ಮಿಕಾ || ೫೬ ||
ಉದೀಚೀಂ ಷಟ್ಪದಾ ಪಾತು ಚತುಃಷಷ್ಟಿಕಳಾತ್ಮಿಕಾ |
ಪಂಚಾಶತ್ತತ್ತ್ವರಚಿತಾ ಭವಪಾದಾ ಶತಾಕ್ಷರೀ || ೫೭ ||
ವ್ಯೋಮಾಖ್ಯಾ ಪಾತು ಮೇ ಚೋರ್ಧ್ವಂ ದಿಶಂ ವೇದಾಂಗಸಂಸ್ಥಿತಾ |
ವಿದ್ಯುನ್ನಿಭಾ ಬ್ರಹ್ಮಸಂಜ್ಞಾ ಮೃಗಾರೂಢಾ ಚತುರ್ಭುಜಾ || ೫೮ ||
ಚಾಪೇಷುಚರ್ಮಾಸಿಧರಾ ಪಾತು ಮೇ ಪಾವಕೀಂ ದಿಶಮ್ |
ಬ್ರಾಹ್ಮೀ ಕುಮಾರೀ ಗಾಯತ್ರೀ ರಕ್ತಾಂಗೀ ಹಂಸವಾಹಿನೀ || ೫೯ ||
ಬಿಭ್ರತ್ಕಮಂಡಲ್ವಕ್ಷಸ್ರಕ್ಸ್ರುವಾನ್ಮೇ ಪಾತು ನೈರೃತೀಮ್ |
ಚತುರ್ಭುಜಾ ವೇದಮಾತಾ ಶುಕ್ಲಾಂಗೀ ವೃಷವಾಹಿನೀ || ೬೦ ||
ವರಾಽಭಯಕಪಾಲಾಕ್ಷಸ್ರಗ್ವಿಣೀ ಪಾತು ಮಾರುತೀಮ್ |
ಶ್ಯಾಮಾ ಸರಸ್ವತೀ ವೃದ್ಧಾ ವೈಷ್ಣವೀ ಗರುಡಾಸನಾ || ೬೧ ||
ಶಂಖಾರಾಬ್ಜಾಭಯಕರಾ ಪಾತು ಶೈವೀಂ ದಿಶಂ ಮಮ |
ಚತುರ್ಭುಜಾ ವೇದಮಾತಾ ಗೌರಾಂಗೀ ಸಿಂಹವಾಹನಾ || ೬೨ ||
ವರಾಭಯಾಬ್ಜಯುಗಳೈರ್ಭುಜೈಃ ಪಾತ್ವಧರಾಂ ದಿಶಮ್ |
ತತ್ತತ್ಪಾರ್ಶ್ವಸ್ಥಿತಾಃ ಸ್ವಸ್ವವಾಹನಾಯುಧಭೂಷಣಾಃ || ೬೩ ||
ಸ್ವಸ್ವದಿಕ್ಷು ಸ್ಥಿತಾಃ ಪಾಂತು ಗ್ರಹಶಕ್ತ್ಯಂಗದೇವತಾಃ |
ಮಂತ್ರಾಧಿದೇವತಾರೂಪಾ ಮುದ್ರಾಧಿಷ್ಠಾನದೇವತಾಃ || ೬೪ ||
ವ್ಯಾಪಕತ್ವೇನ ಪಾತ್ವಸ್ಮಾನಾಪಹೃತ್ತಲಮಸ್ತಕೀ |
ತತ್ಪದಂ ಮೇ ಶಿರಃ ಪಾತು ಫಾಲಂ ಮೇ ಸವಿತುಃಪದಮ್ || ೬೫ ||
ವರೇಣ್ಯಂ ಮೇ ದೃಶೌ ಪಾತು ಶ್ರುತಿಂ ಭರ್ಗಃ ಸದಾ ಮಮ |
ಘ್ರಾಣಂ ದೇವಸ್ಯ ಮೇ ಪಾತು ಪಾತು ಧೀಮಹಿ ಮೇ ಮುಖಮ್ || ೬೬ ||
ಜಿಹ್ವಾಂ ಮಮ ಧಿಯಃ ಪಾತು ಕಂಠಂ ಮೇ ಪಾತು ಯಃಪದಮ್ |
ನಃ ಪದಂ ಪಾತು ಮೇ ಸ್ಕಂಧೌ ಭುಜೌ ಪಾತು ಪ್ರಚೋದಯಾತ್ || ೬೭ ||
ಕರೌ ಮೇ ಚ ಪರಃ ಪಾತು ಪಾದೌ ಮೇ ರಜಸೋಽವತು |
ಸಾ ಮೇ ನಾಭಿಂ ಸದಾ ಪಾತು ಕಟಿಂ ವೈ ಪಾತುಮೇವದೋಮ್ || ೬೮ ||
ಓಮಾಪಃ ಸಕ್ಥಿನೀ ಪಾತು ಗುಹ್ಯಂ ಜ್ಯೋತಿಃ ಸದಾ ಮಮ |
ಊರೂ ಮಮ ರಸಃ ಪಾತು ಜಾನುನೀ ಅಮೃತಂ ಮಮ || ೬೯ ||
ಜಂಘೇ ಬ್ರಹ್ಮಪದಂ ಪಾತು ಗುಲ್ಫೌ ಭೂಃ ಪಾತು ಮೇ ಸದಾ |
ಪಾದೌ ಮಮ ಭುವಃ ಪಾತು ಸುವಃ ಪಾತ್ವಖಿಲಂ ವಪುಃ || ೭೦ ||
ರೋಮಾಣಿ ಮೇ ಮಹಃ ಪಾತು ಲೋಮಕಂ ಪಾತು ಮೇ ಜನಃ |
ಪ್ರಾಣಾಂಶ್ಚ ಧಾತುತತ್ತ್ವಾನಿ ತದೀಶಃ ಪಾತು ಮೇ ತಪಃ || ೭೧ ||
ಸತ್ಯಂ ಪಾತು ಮಮಾಯೂಂಷಿ ಹಂಸೋ ವೃದ್ಧಿಂ ಚ ಪಾತು ಮೇ |
ಶುಚಿಷತ್ಪಾತು ಮೇ ಶುಕ್ರಂ ವಸುಃ ಪಾತು ಶ್ರಿಯಂ ಮಮ || ೭೨ ||
ಮತಿಂ ಪಾತ್ವಂತರಿಕ್ಷಸದ್ಧೋತಾ ದಾನಂ ಚ ಪಾತು ಮೇ |
ವೇದಿಷತ್ಪಾತು ಮೇ ವಿದ್ಯಾಮತಿಥಿಃ ಪಾತು ಮೇ ಗೃಹಮ್ || ೭೩ ||
ಧರ್ಮಂ ದುರೋಣಸತ್ಪಾತು ನೃಷತ್ಪಾತು ವಧೂಂ ಮಮ |
ವರಸತ್ಪಾತು ಮೇ ಮಾಯಾಽಮೃತಸತ್ಪಾತು ಮೇ ಸುತಾನ್ || ೭೪ ||
ವ್ಯೋಮಸತ್ಪಾತು ಮೇ ಬಂಧೂನ್ ಭ್ರಾತೄನಬ್ಜಶ್ಚ ಪಾತು ಮೇ |
ಪಶೂನ್ಮೇ ಪಾತು ಗೋಜಾಶ್ಚ ಋತಜಾಃ ಪಾತು ಮೇ ಭುವಮ್ || ೭೫ ||
ಸರ್ವಂ ಮೇ ಅದ್ರಿಜಾ ಪಾತು ಯಾನಂ ಮೇ ಪಾತ್ವೃತಂ ಸದಾ |
ಮಮ ಸರ್ವಂ ಬೃಹತ್ಪಾತು ವಿಭುರೋಂ ಪಾತು ಸರ್ವದಾ || ೭೬ ||
ಅನುಕ್ತಮಥ ಯತ್ಸ್ಥಾನಂ ಶರೀರಾಂತರ್ಬಹಿಶ್ಚ ಯತ್ |
ತತ್ಸರ್ವಂ ಪಾತು ಮೇ ನಿತ್ಯಂ ಹಂಸಃ ಸೋಽಹಮಹರ್ನಿಶಮ್ || ೭೭ ||
ಇದಂ ತು ಕಥಿತಂ ಸಮ್ಯಙ್ಮಯಾ ತೇ ಬ್ರಹ್ಮಪಂಜರಮ್ |
ಸಂಧ್ಯಯೋಃ ಪ್ರತ್ಯಹಂ ಭಕ್ತ್ಯಾ ಜಪಕಾಲೇ ವಿಶೇಷತಃ || ೭೮ ||
ಧಾರಯೇದ್ದ್ವಿಜವರ್ಯೋ ಯಃ ಶ್ರಾವಯೇದ್ವಾ ಸಮಾಹಿತಃ |
ಸ ವಿಷ್ಣುಃ ಸ ಶಿವಃ ಸೋಽಹಂ ಸೋಽಕ್ಷರಃ ಸ ವಿರಾಟ್ ಸ್ವರಾಟ್ || ೭೯ ||
ಶತಾಕ್ಷರಾತ್ಮಕಂ ದೇವ್ಯಾ ನಾಮಾಷ್ಟಾವಿಂಶತಿಃ ಶತಮ್ |
ಶೃಣು ವಕ್ಷ್ಯಾಮಿ ತತ್ಸರ್ವಮತಿ ಗುಹ್ಯಂ ಸನಾತನಮ್ || ೮೦ ||
ಭೂತಿದಾ ಭುವನಾ ವಾಣೀ ವಸುಧಾ ಸುಮನಾ ಮಹೀ |
ತುರ್ಯಾ ಶೋಭಾ ದ್ವಿಜಪ್ರೀತಾ ಕಾಮಧುಕ್ ಭಕ್ತಸಿದ್ಧಿದಾ || ೮೧ ||
ವಿಶ್ವಾ ಚ ವಿಜಯಾ ವೇದ್ಯಾ ಸಂಧ್ಯಾ ಬ್ರಾಹ್ಮೀ ಸರಸ್ವತೀ |
ಹರಿಣೀ ಜನನೀ ನಂದಾ ಸವಿಸರ್ಗಾ ತಪಸ್ವಿನೀ || ೮೨ ||
ಪಯಸ್ವಿನೀ ಸತೀ ತ್ಯಾಗಾ ಚೈಂದವೀ ಸತ್ಯವೀ ರಸಾ |
ಶೈವೀ ಲಾಸ್ಯಪ್ರಿಯಾ ತುಷ್ಟಾ ಜಪ್ಯಾ ಸತ್ಯಾ ಸತೀ ಧ್ರುವಾ || ೮೩ ||
ಭಕ್ತವಶ್ಯಾ ಚ ಗಾಯತ್ರೀ ಭೀಮಾ ವಿಷ್ಣುಪ್ರಿಯಾ ಜಯಾ |
ವಿಶ್ವಾ ತುರ್ಯಾ ಪರಾ ರೇಚ್ಯಾ ನಿರ್ಘೃಣೀ ಯಮಿನೀ ಭವಾ || ೮೪ ||
ಗೋವೇದ್ಯಾ ಚ ಜರಿಷ್ಠಾ ಚ ಸ್ಕಂದಿನೀ ಧೀರ್ಮತಿರ್ಹಿಮಾ |
ಅನಂತಾ ರವಿಮಧ್ಯಸ್ಥಾ ಸಾವಿತ್ರೀ ಬ್ರಾಹ್ಮಣೀ ತ್ರಯೀ || ೮೫ ||
ಅಪರ್ಣಾ ಚಂಡಿಕಾ ಧ್ಯೇಯಾ ಮನುಶ್ರೇಷ್ಠಾ ಚ ಸಾತ್ವಿಕೀ |
ಭೀಷಣಾ ಯೋಗಿನೀ ಪಕ್ಷೀ ನದೀ ಪ್ರಜ್ಞಾ ಚ ಚೋದಿನೀ || ೮೬ ||
ಧನಿನೀ ಯಾಮಿನೀ ಪದ್ಮಾ ರೋಹಿಣೀ ರಮಣೀ ಋಷಿಃ |
ಬ್ರಹ್ಮಿಷ್ಠಾ ಭಕ್ತಿಗಮ್ಯಾ ಚ ಕಾಮದಾ ಬಲದಾ ವಸುಃ || ೮೭ ||
ಆದ್ಯಾ ವರ್ಣಮಯೀ ಹೃದ್ಯಾ ಲಕ್ಷ್ಮೀಃ ಶಾಂತಾ ರಮಾಽಚ್ಯುತಾ |
ಸೇನಾಮುಖೀ ಸಾಮಮಯೀ ಬಹುಳಾ ದೋಷವರ್ಜಿತಾ || ೮೮ ||
ಸರ್ವಕಾಮದುಘಾ ಸೋಮೋದ್ಭವಾಽಹಂಕಾರವರ್ಜಿತಾ |
ತತ್ಪರಾ ಸುಖದಾ ಸಿದ್ಧಿಃ ವೇದ್ಯಾ ಪೂಜ್ಯಾ ಪ್ರಸಾದಿನೀ || ೮೯ ||
ವಿಪ್ರಪ್ರಸಾದಿನೀ ಪೂಜ್ಯಾ ವಿಶ್ವವಂದ್ಯಾ ವಿನೋದಿನೀ |
ದ್ವಿಪದಾ ಚ ಚತುಷ್ಪಾದಾ ತ್ರಿಪದಾ ಚೈವ ಷಟ್ಪದಾ || ೯೦ ||
ಅಷ್ಟಾಪದೀ ನವಪದೀ ಸಾ ಸಹಸ್ರಾಕ್ಷರಾತ್ಮಿಕಾ |
ಅಮೋಘಫಲದಾಽನಾದಿಃ ಸರ್ವಾ ಸರ್ವಾಂಗಸುಂದರೀ || ೯೧ ||
ಶರ್ವಾಣೀ ವೈಷ್ಣವೀ ಚಂದ್ರಚೂಡಾ ತ್ರಿಣಯನಾ ಕ್ಷಮಾ |
ವಿಶ್ವಮಾತಾ ತ್ರಯೀಸಾರಾ ತ್ರಿಕಾಲಜ್ಞಾನರೂಪಿಣೀ || ೯೨ ||
ಚಂದ್ರಮಂಡಲಮಧ್ಯಸ್ಥಾ ಭಕ್ತಪಾಪವಿನಾಶಿನೀ |
ವರದಾ ಛಂದಸಾಂ ಮಾತಾ ಬ್ರಾಹ್ಮಣ್ಯಪದದಾಯಿನೀ || ೯೩ ||
ಯ ಇದಂ ಪರಮಂ ಗುಹ್ಯಂ ಸಾವಿತ್ರೀಮಂತ್ರಪಂಜರಮ್ |
ನಾಮಾಷ್ಟವಿಂಶತಿಶತಂ ಶೃಣುಯಾಚ್ಛ್ರಾವಯೇತ್ಪಠೇತ್ || ೯೪ ||
ಮರ್ತ್ಯಾನಾಮಮೃತತ್ತ್ವಾಯ ಭೀತಾನಾಮಭಯಾಯ ಚ |
ಮೋಕ್ಷಾಯ ಚ ಮುಮುಕ್ಷೂಣಾಂ ಶ್ರೀಕಾಮಾನಾಂ ಶ್ರಿಯೇ ಸದಾ || ೯೫ ||
ವಿಜಯಾಯ ಯುಯುತ್ಸೂನಾಂ ವ್ಯಾಧಿತಾನಾಮರೋಗಕೃತ್ |
ವಶ್ಯಾಯ ವಶ್ಯಕಾಮಾನಾಂ ವಿದ್ಯಾಯೈ ವೇದಕಾಮಿನಾಮ್ || ೯೬ ||
ದ್ರವಿಣಾಯ ದರಿದ್ರಾಣಾಂ ಪಾಪಿನಾಂ ಪಾಪಶಾಂತಯೇ |
ವಾದಿನಾಂ ವಾದವಿಜಯೇ ಕವೀನಾಂ ಕವಿತಾಪ್ರದಮ್ || ೯೭ ||
ಅನ್ನಾಯ ಕ್ಷುಧಿತಾನಾಂ ಚ ಸ್ವರ್ಗಾಯ ಸ್ವರ್ಗಮಿಚ್ಛತಾಮ್ |
ಪಶುಭ್ಯಃ ಪಶುಕಾಮಾನಾಂ ಪುತ್ರೇಭ್ಯಃ ಪುತ್ರಕಾಂಕ್ಷಿಣಾಮ್ || ೯೮ ||
ಕ್ಲೇಶಿನಾಂ ಶೋಕಶಾಂತ್ಯರ್ಥಂ ನೃಣಾಂ ಶತ್ರುಭಯಾಯ ಚ |
ರಾಜವಶ್ಯಾಯ ದ್ರಷ್ಟವ್ಯಂ ಪಂಜರಂ ನೃಪಸೇವಿನಾಮ್ || ೯೯ ||
ಭಕ್ತ್ಯರ್ಥಂ ವಿಷ್ಣುಭಕ್ತಾನಾಂ ವಿಷ್ಣೋಃ ಸರ್ವಾಂತರಾತ್ಮನಿ |
ನಾಯಕಂ ವಿಧಿಸೃಷ್ಟಾನಾಂ ಶಾಂತಯೇ ಭವತಿ ಧ್ರುವಮ್ || ೧೦೦ ||
ನಿಃಸ್ಪೃಹಾಣಾಂ ನೃಣಾಂ ಮುಕ್ತಿಃ ಶಾಶ್ವತೀ ಭವತೀ ಧ್ರುವಮ್ |
ಜಪ್ಯಂ ತ್ರಿವರ್ಗಸಂಯುಕ್ತಂ ಗೃಹಸ್ಥೇನ ವಿಶೇಷತಃ || ೧೦೧ ||
ಮುನೀನಾಂ ಜ್ಞಾನಸಿದ್ಧ್ಯರ್ಥಂ ಯತೀನಾಂ ಮೋಕ್ಷಸಿದ್ಧಯೇ |
ಉದ್ಯಂತಂ ಚಂದ್ರಕಿರಣಮುಪಸ್ಥಾಯ ಕೃತಾಂಜಲಿಃ || ೧೦೨ ||
ಕಾನನೇ ವಾ ಸ್ವಭವನೇ ತಿಷ್ಠಂಛುದ್ಧೋ ಜಪೇದಿದಮ್ |
ಸರ್ವಾನ್ಕಾಮಾನವಾಪ್ನೋತಿ ತಥೈವ ಶಿವಸನ್ನಿಧೌ || ೧೦೩ ||
ಮಮ ಪ್ರೀತಿಕರಂ ದಿವ್ಯಂ ವಿಷ್ಣುಭಕ್ತಿವಿವರ್ಧನಮ್ |
ಜ್ವರಾರ್ತಾನಾಂ ಕುಶಾಗ್ರೇಣ ಮಾರ್ಜಯೇತ್ಕುಷ್ಠರೋಗಿಣಾಮ್ || ೧೦೪ ||
ಮೃಗಮಂಗಂ ಯಥಾಲಿಂಗಂ ಕವಚೇನ ತು ಸಾಧಕಃ |
ಮಂಡಲೇನ ವಿಶುದ್ಧ್ಯೇತ ಸರ್ವರೋಗೈರ್ನ ಸಂಶಯಃ || ೧೦೫ ||
ಮೃತಪ್ರಜಾ ಚ ಯಾ ನಾರೀ ಜನ್ಮವಂಧ್ಯಾ ತಥೈವ ಚ |
ಕನ್ಯಾದಿವಂಧ್ಯಾ ಯಾ ನಾರೀ ತಾಸಾಮಂಗಂ ಪ್ರಮಾರ್ಜಯೇತ್ || ೧೦೬ ||
ತಾಸ್ತಾಃ ಸಂವತ್ಸರಾದರ್ವಾಗ್ಧ್ರಿಯೇಯುರ್ಗರ್ಭಮುತ್ತಮಮ್ |
ಪತಿವಿದ್ವೇಷಿಣೀ ಯಾ ಸ್ತ್ರೀ ಅಂಗಂ ತಸ್ಯಾಃ ಪ್ರಮಾರ್ಜಯೇತ್ || ೧೦೭ ||
ತಮೇವ ಭಜತೇ ಸಾ ಸ್ತ್ರೀ ಪತಿಂ ಕಾಮವಶಂ ನಯೇತ್ |
ಅಶ್ವತ್ಥೇ ರಾಜವಶ್ಯಾರ್ಥಂ ಬಿಲ್ವಮೂಲೇ ಸುರೂಪಭಾಕ್ || ೧೦೮ ||
ಪಾಲಾಶಮೂಲೇ ವಿದ್ಯಾರ್ಥೀ ತೇಜಸ್ವ್ಯಭಿಮುಖೋ ರವೇಃ |
ಕನ್ಯಾರ್ಥೀ ಚಂಡಿಕಾಗೇಹೇ ಜಪೇಚ್ಛತ್ರುಭಯಾಯ ಚ || ೧೦೯ ||
ಶ್ರೀಕಾಮೋ ವಿಷ್ಣುಗೇಹೇ ಚ ಉದ್ಯಾನೇ ಸ್ತ್ರೀರ್ವಶೀ ಭವೇತ್ |
ಆರೋಗ್ಯಾರ್ಥೇ ಸ್ವಗೇಹೇ ಚ ಮೋಕ್ಷಾರ್ಥೀ ಶೈಲಮಸ್ತಕೇ || ೧೧೦ ||
ಸರ್ವಕಾಮೋ ವಿಷ್ಣುಗೇಹೇ ಮೋಕ್ಷಾರ್ಥೀ ಯತ್ರ ಕುತ್ರಚಿತ್ |
ಜಪಾರಂಭೇ ತು ಹೃದಯಂ ಜಪಾಂತೇ ಕವಚಂ ಪಠೇತ್ || ೧೧೧ ||
ಕಿಮತ್ರ ಬಹುನೋಕ್ತೇನ ಶೃಣು ನಾರದ ತತ್ತ್ವತಃ |
ಯಂ ಯಂ ಚಿಂತಯತೇ ನಿತ್ಯಂ ತಂ ತಂ ಪ್ರಾಪ್ನೋತಿ ನಿಶ್ಚಿತಮ್ || ೧೧೨ ||
ಇತಿ ಶ್ರೀಮದ್ವಸಿಷ್ಠಸಂಹಿತಾಯಾಂ ಬ್ರಹ್ಮನಾರದಸಂವಾದೇ ಶ್ರೀ ಗಾಯತ್ರೀ ಪಂಜರ ಸ್ತೋತ್ರಮ್ |
ಇನ್ನಷ್ಟು ಶ್ರೀ ಗಾಯತ್ರೀ ಸ್ತೋತ್ರಗಳು ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
