Read in తెలుగు / ಕನ್ನಡ / தமிழ் / देवनागरी / English (IAST)
bhagavantaṁ dēvadēvaṁ brahmāṇaṁ paramēṣṭhinam |
vidhātāraṁ viśvasr̥jaṁ padmayōniṁ prajāpatim || 1 ||
śuddhasphaṭikasaṅkāśaṁ mahēndraśikharōpamam |
baddhapiṅgajaṭājūṭaṁ taḍitkanakakuṇḍalam || 2 ||
śaraccandrābhavadanaṁ sphuradindīvarēkṣaṇam |
hiraṇmayaṁ viśvarūpamupavītājināvr̥tam || 3 ||
mauktikābhākṣavalayastantrīlayasamanvitaḥ |
karpūrōddhūlitatanuṁ sraṣṭāraṁ nētragōcaram || 4 ||
vinayēnōpasaṅgamya śirasā praṇipatya ca |
nāradaḥ paripapraccha dēvarṣigaṇamadhyagaḥ || 5 ||
nārada uvāca |
bhagavan dēvadēvēśa sarvajña karuṇānidhē |
śrōtumicchāmi tattatvaṁ bhōgamōkṣaikasādhanam || 6 ||
aiśvaryasya samagrasya phaladaṁ dvandvavarjitam |
brahmahatyādipāpaghnaṁ pāpādyaribhayāpaham || 7 ||
yadēkaṁ niṣkalaṁ sūkṣmaṁ nirañjanamanāmayam |
yattē priyatamaṁ lōkē tanmē brūhi pitarmama || 8 ||
brahmōvāca |
śr̥ṇu nārada vakṣyāmi brahmamūlaṁ sanātanam |
sr̥ṣṭyādau manmukhē kṣiptaṁ dēvadēvēna viṣṇunā || 9 ||
prapañcabījamityāhurutpattisthitihētukam |
purā mayā tu kathitaṁ kaśyapāya sudhīmatē || 10 ||
sāvitrīpañjaraṁ nāma rahasyaṁ nigamatrayē |
r̥ṣyādikaṁ ca digvarṇaṁ sāṅgāvaraṇakaṁ kramāt || 11 ||
vāhanāyudhamantrāstramūrtidhyānasamanvitam |
stōtraṁ śr̥ṇu pravakṣyāmi tava snēhācca nārada || 12 ||
brahmaniṣṭhāya dēyaṁ syādadēyaṁ yasya kasyacit |
ācamya niyataḥ paścādātmadhyānapuraḥsaram || 13 ||
ōmityādau vicintyātha vyōmahēmābjasaṁsthitam |
dharmakandagatajñānādaiśvaryāṣṭadalānvitam || 14 ||
vairāgyakarṇikādhīnāṁ praṇavagrahamadhyagām |
brahmavēdisamāyuktāṁ caitanyapuramadhyagām || 15 ||
tattvahaṁsasamākīrṇāṁ śabdapīṭhē susaṁsthitām |
nādabindukalātītāṁ gōpurairapi saṁvr̥tām || 16 ||
vidyā:’vidyā:’mr̥tatvādi prakārairapisaṁvr̥tām |
nigamārgalasañchannāṁ nirguṇadvāravāṭikām || 17 ||
caturvargaphalōpētāṁ mahākalpavanairvr̥tām |
sāndrānandasudhāsindhunigamadvāravāṭikām || 18 ||
dhyānadhāraṇayōgādi tr̥ṇagulmalatāvr̥tām |
sadasaccitsvarūpākhya mr̥gapakṣisamākulām || 19 ||
vidyā:’vidyāvicārākhyalōkālōkācalāvr̥tām |
pañcīkaraṇapañcōtthabhūtatattvanivēditām || 20 ||
avikārasamāśliṣṭanijadhyānaguṇāvr̥tām |
vēdōpaniṣadarthākhya dēvarṣigaṇasēvitām || 21 ||
itihāsagrahagaṇaiḥ sadārairabhivanditām |
gāthāpsarōbhiryakṣaiśca gaṇakinnarasēvitām || 22 ||
nārasiṁhamukhaiścāpi puruṣaiḥ kalpacāraṇaiḥ |
kr̥tagānavinōdādikathālāpanatatparām || 23 ||
tadityavāṅmanōgamyatējōrūpadharāṁ parām |
jagataḥ prasavitrīṁ tāṁ savituḥ sr̥ṣṭikāriṇīm || 24 ||
varēṇyamityannamayīṁ puruṣārthaphalapradām |
avidyāvarṇavarjyāṁ ca tējōvadbhargasañjñikām || 25 ||
dēvasya saccidānanda parabrahmarasātmikām |
dhīmahyahaṁ sa vai tadvadbrahmādvaitasvarūpiṇīm || 26 ||
dhiyō yō nastu savitā pracōdayādupāsitām |
parō:’sau savitā sākṣāddēvōnirharaṇāya ca || 27 ||
parōrajasa ityādi parabrahmātmasāvadōm |
āpō jyōtiriti dvābhyāṁ pāñcabhautikasañjñikām || 28 ||
rasō:’mr̥taṁ brahmapadaistāṁ nityāṁ tāpinīṁ parām |
bhūrbhuvaḥsuvarityētairnigamatvaprakāśikām || 29 ||
maharjanastapaḥsatyalōkōparisusaṁsthitām |
tādr̥gasyā virāḍrūpaṁ rahasyaṁ pravadāmyaham || 30 ||
vyōmakēśākulākāśa dyōkirīṭavirājitām |
taṭidbhrukuṭinākrāntavidhiviṣṇuśivārcitām || 31 ||
gurubhārgavakarṇāntāṁ sōmasūryāgnilōcanām |
iḍāpiṅgalasauṣumṇa vāmanāsāpuṭānvitām || 32 ||
sandhyādvirōṣṭhapuṭitāṁ lasadvāgbhavajihvikām |
sandhyāsau dyumaṇēḥ kaṇṭhalasadbāhusamanvitām || 33 ||
parjanyahr̥dayāsaktavasusustanamaṇḍalām |
ākāśōdaravitrastanābhyavāntaradēśikām || 34 ||
prājāpatyākhyajaghanāmindrāṇīkaṭisañjñikām |
ūrū malayamērubhyāṁ śōbhamānāṁ suradviṣam || 35 ||
jānunī jahnukuśikau vaiśvadēvalasadbhujām |
ayanadvayajaṅghādyasurādyapitr̥sañjñikām || 36 ||
padāṅghrinakharōmālibhūtaladrumalāñchitām |
graharāśyarkṣadēvarṣimūrtiṁ ca parasañjñikām || 37 ||
tithimāsartuvarṣākhyasukētunimiṣātmikām |
ahōrātrārdhamāsākhyāmāryāṁ candramasātmikām || 38 ||
māyākalpitavaicitryasandhyācchādanasaṁvr̥tām |
jvalatkālānalaprakhyāṁ taḍitkōṭisamaprabhām || 39 ||
kōṭisūryapratīkāśāṁ candrakōṭisuśītalām |
sudhāmaṇḍalamadhyasthāṁ sāndrānandāmr̥tātmikām || 40 ||
vāgatītāṁ manōramyāṁ varadāṁ vēdamātaram |
carācaramayīṁ nityāṁ brahmākṣarasamanvitām || 41 ||
dhyātvā svātmanyabhēdēna brahmapañjaramārabhēt |
pañjarasya r̥ṣiścāhaṁ chandō vikr̥tirucyatē || 42 ||
dēvatā ca parō haṁsaḥ parabrahmādhidēvatā |
praṇavō bījaśaktiḥ syādōṁ kīlakamudāhr̥tam || 43 ||
tattattvaṁ dhīmahi kṣētraṁ dhiyō:’straṁ yaḥ paraṁ padam |
mantramāpō jyōtiriti yōnirhaṁsaḥ savēdhakam || 44 ||
viniyōgastu siddhyarthaṁ puruṣārthacatuṣṭayē |
tatastairaṅgaṣaṭkaṁ syāttairēva vyāpakatrayam || 45 ||
pūrvōktadēvatāṁ dhyāyētsākāraguṇasamyutām |
pañcavaktrāṁ daśabhujāṁ tripañcanayanairyutām || 46 ||
muktāvidrumasauvarṇāmōṣadhīśasamānanām |
vāṇīṁ parāṁ ramāṁ māyāṁ cāmarairdarpaṇairyutām || 47 ||
ṣaḍaṅgadēvatāmantrai rūpādyavayavātmikām |
mr̥gēndravr̥ṣapakṣīndramr̥gahaṁsāsanasthitām || 48 ||
ardhēndubaddhamukuṭakirīṭamaṇikuṇḍalām |
ratnatāṭaṅkamāṅgalyaparagraivēyanūpurām || 49 ||
aṅgulīyakakēyūrakaṅkaṇādyairalaṅkr̥tām |
divyasragvastrasañchannaravimaṇḍalamadhyagām || 50 ||
varā:’bhayābjayugalāṁ śaṅkhacakragadāṅkuśām |
śubhraṁ kapālaṁ dadhatīṁ vahantīmakṣamālikām || 51 ||
gāyatrīṁ varadāṁ dēvīṁ sāvitrīṁ vēdamātaram |
ādityapathagāṁ dēvīṁ smarēdbrahmasvarūpiṇīm || 52 ||
vicitramantrajananīṁ smarēdvidyāṁ sarasvatīm |
tripadā r̥ṅmayī pūrvā mukhī brahmāstrasañjñikā || 53 ||
caturviṁśatitattvākhyā pātu prācīṁ diśaṁ mama |
catuṣpādā yajurbrahmadaṇḍākhyā pātu dakṣiṇā || 54 ||
ṣaṭtriṁśattattvayuktā sā pātu mē dakṣiṇāṁ diśam |
pratyaṅmukhī pañcapadī pañcāśattattvarūpiṇī || 55 ||
pātu pratīcīmaniśaṁ sāmabrahmaśirōṅkitā |
saumyā brahmasvarūpākhyā sātharvāṅgirasātmikā || 56 ||
udīcīṁ ṣaṭpadā pātu catuḥṣaṣṭikalātmikā |
pañcāśattattvaracitā bhavapādā śatākṣarī || 57 ||
vyōmākhyā pātu mē cōrdhvaṁ diśaṁ vēdāṅgasaṁsthitā |
vidyunnibhā brahmasañjñā mr̥gārūḍhā caturbhujā || 58 ||
cāpēṣucarmāsidharā pātu mē pāvakīṁ diśam |
brāhmī kumārī gāyatrī raktāṅgī haṁsavāhinī || 59 ||
bibhratkamaṇḍalvakṣasraksruvānmē pātu nairr̥tīm |
caturbhujā vēdamātā śuklāṅgī vr̥ṣavāhinī || 60 ||
varā:’bhayakapālākṣasragviṇī pātu mārutīm |
śyāmā sarasvatī vr̥ddhā vaiṣṇavī garuḍāsanā || 61 ||
śaṅkhārābjābhayakarā pātu śaivīṁ diśaṁ mama |
caturbhujā vēdamātā gaurāṅgī siṁhavāhanā || 62 ||
varābhayābjayugalairbhujaiḥ pātvadharāṁ diśam |
tattatpārśvasthitāḥ svasvavāhanāyudhabhūṣaṇāḥ || 63 ||
svasvadikṣu sthitāḥ pāntu grahaśaktyaṅgadēvatāḥ |
mantrādhidēvatārūpā mudrādhiṣṭhānadēvatāḥ || 64 ||
vyāpakatvēna pātvasmānāpahr̥ttalamastakī |
tatpadaṁ mē śiraḥ pātu phālaṁ mē savituḥpadam || 65 ||
varēṇyaṁ mē dr̥śau pātu śrutiṁ bhargaḥ sadā mama |
ghrāṇaṁ dēvasya mē pātu pātu dhīmahi mē mukham || 66 ||
jihvāṁ mama dhiyaḥ pātu kaṇṭhaṁ mē pātu yaḥpadam |
naḥ padaṁ pātu mē skandhau bhujau pātu pracōdayāt || 67 ||
karau mē ca paraḥ pātu pādau mē rajasō:’vatu |
sā mē nābhiṁ sadā pātu kaṭiṁ vai pātumēvadōm || 68 ||
ōmāpaḥ sakthinī pātu guhyaṁ jyōtiḥ sadā mama |
ūrū mama rasaḥ pātu jānunī amr̥taṁ mama || 69 ||
jaṅghē brahmapadaṁ pātu gulphau bhūḥ pātu mē sadā |
pādau mama bhuvaḥ pātu suvaḥ pātvakhilaṁ vapuḥ || 70 ||
rōmāṇi mē mahaḥ pātu lōmakaṁ pātu mē janaḥ |
prāṇāṁśca dhātutattvāni tadīśaḥ pātu mē tapaḥ || 71 ||
satyaṁ pātu mamāyūṁṣi haṁsō vr̥ddhiṁ ca pātu mē |
śuciṣatpātu mē śukraṁ vasuḥ pātu śriyaṁ mama || 72 ||
matiṁ pātvantarikṣasaddhōtā dānaṁ ca pātu mē |
vēdiṣatpātu mē vidyāmatithiḥ pātu mē gr̥ham || 73 ||
dharmaṁ durōṇasatpātu nr̥ṣatpātu vadhūṁ mama |
varasatpātu mē māyā:’mr̥tasatpātu mē sutān || 74 ||
vyōmasatpātu mē bandhūn bhrātr̥̄nabjaśca pātu mē |
paśūnmē pātu gōjāśca r̥tajāḥ pātu mē bhuvam || 75 ||
sarvaṁ mē adrijā pātu yānaṁ mē pātvr̥taṁ sadā |
mama sarvaṁ br̥hatpātu vibhurōṁ pātu sarvadā || 76 ||
anuktamatha yatsthānaṁ śarīrāntarbahiśca yat |
tatsarvaṁ pātu mē nityaṁ haṁsaḥ sō:’hamaharniśam || 77 ||
idaṁ tu kathitaṁ samyaṅmayā tē brahmapañjaram |
sandhyayōḥ pratyahaṁ bhaktyā japakālē viśēṣataḥ || 78 ||
dhārayēddvijavaryō yaḥ śrāvayēdvā samāhitaḥ |
sa viṣṇuḥ sa śivaḥ sō:’haṁ sō:’kṣaraḥ sa virāṭ svarāṭ || 79 ||
śatākṣarātmakaṁ dēvyā nāmāṣṭāviṁśatiḥ śatam |
śr̥ṇu vakṣyāmi tatsarvamati guhyaṁ sanātanam || 80 ||
bhūtidā bhuvanā vāṇī vasudhā sumanā mahī |
turyā śōbhā dvijaprītā kāmadhuk bhaktasiddhidā || 81 ||
viśvā ca vijayā vēdyā sandhyā brāhmī sarasvatī |
hariṇī jananī nandā savisargā tapasvinī || 82 ||
payasvinī satī tyāgā caindavī satyavī rasā |
śaivī lāsyapriyā tuṣṭā japyā satyā satī dhruvā || 83 ||
bhaktavaśyā ca gāyatrī bhīmā viṣṇupriyā jayā |
viśvā turyā parā rēcyā nirghr̥ṇī yaminī bhavā || 84 ||
gōvēdyā ca jariṣṭhā ca skandinī dhīrmatirhimā |
anantā ravimadhyasthā sāvitrī brāhmaṇī trayī || 85 ||
aparṇā caṇḍikā dhyēyā manuśrēṣṭhā ca sātvikī |
bhīṣaṇā yōginī pakṣī nadī prajñā ca cōdinī || 86 ||
dhaninī yāminī padmā rōhiṇī ramaṇī r̥ṣiḥ |
brahmiṣṭhā bhaktigamyā ca kāmadā baladā vasuḥ || 87 ||
ādyā varṇamayī hr̥dyā lakṣmīḥ śāntā ramā:’cyutā |
sēnāmukhī sāmamayī bahulā dōṣavarjitā || 88 ||
sarvakāmadughā sōmōdbhavā:’haṅkāravarjitā |
tatparā sukhadā siddhiḥ vēdyā pūjyā prasādinī || 89 ||
vipraprasādinī pūjyā viśvavandyā vinōdinī |
dvipadā ca catuṣpādā tripadā caiva ṣaṭpadā || 90 ||
aṣṭāpadī navapadī sā sahasrākṣarātmikā |
amōghaphaladā:’nādiḥ sarvā sarvāṅgasundarī || 91 ||
śarvāṇī vaiṣṇavī candracūḍā triṇayanā kṣamā |
viśvamātā trayīsārā trikālajñānarūpiṇī || 92 ||
candramaṇḍalamadhyasthā bhaktapāpavināśinī |
varadā chandasāṁ mātā brāhmaṇyapadadāyinī || 93 ||
ya idaṁ paramaṁ guhyaṁ sāvitrīmantrapañjaram |
nāmāṣṭaviṁśatiśataṁ śr̥ṇuyācchrāvayētpaṭhēt || 94 ||
martyānāmamr̥tattvāya bhītānāmabhayāya ca |
mōkṣāya ca mumukṣūṇāṁ śrīkāmānāṁ śriyē sadā || 95 ||
vijayāya yuyutsūnāṁ vyādhitānāmarōgakr̥t |
vaśyāya vaśyakāmānāṁ vidyāyai vēdakāminām || 96 ||
draviṇāya daridrāṇāṁ pāpināṁ pāpaśāntayē |
vādināṁ vādavijayē kavīnāṁ kavitāpradam || 97 ||
annāya kṣudhitānāṁ ca svargāya svargamicchatām |
paśubhyaḥ paśukāmānāṁ putrēbhyaḥ putrakāṅkṣiṇām || 98 ||
klēśināṁ śōkaśāntyarthaṁ nr̥ṇāṁ śatrubhayāya ca |
rājavaśyāya draṣṭavyaṁ pañjaraṁ nr̥pasēvinām || 99 ||
bhaktyarthaṁ viṣṇubhaktānāṁ viṣṇōḥ sarvāntarātmani |
nāyakaṁ vidhisr̥ṣṭānāṁ śāntayē bhavati dhruvam || 100 ||
niḥspr̥hāṇāṁ nr̥ṇāṁ muktiḥ śāśvatī bhavatī dhruvam |
japyaṁ trivargasamyuktaṁ gr̥hasthēna viśēṣataḥ || 101 ||
munīnāṁ jñānasiddhyarthaṁ yatīnāṁ mōkṣasiddhayē |
udyantaṁ candrakiraṇamupasthāya kr̥tāñjaliḥ || 102 ||
kānanē vā svabhavanē tiṣṭhañchuddhō japēdidam |
sarvānkāmānavāpnōti tathaiva śivasannidhau || 103 ||
mama prītikaraṁ divyaṁ viṣṇubhaktivivardhanam |
jvarārtānāṁ kuśāgrēṇa mārjayētkuṣṭharōgiṇām || 104 ||
mr̥gamaṅgaṁ yathāliṅgaṁ kavacēna tu sādhakaḥ |
maṇḍalēna viśuddhyēta sarvarōgairna saṁśayaḥ || 105 ||
mr̥taprajā ca yā nārī janmavandhyā tathaiva ca |
kanyādivandhyā yā nārī tāsāmaṅgaṁ pramārjayēt || 106 ||
tāstāḥ saṁvatsarādarvāgdhriyēyurgarbhamuttamam |
patividvēṣiṇī yā strī aṅgaṁ tasyāḥ pramārjayēt || 107 ||
tamēva bhajatē sā strī patiṁ kāmavaśaṁ nayēt |
aśvatthē rājavaśyārthaṁ bilvamūlē surūpabhāk || 108 ||
pālāśamūlē vidyārthī tējasvyabhimukhō ravēḥ |
kanyārthī caṇḍikāgēhē japēcchatrubhayāya ca || 109 ||
śrīkāmō viṣṇugēhē ca udyānē strīrvaśī bhavēt |
ārōgyārthē svagēhē ca mōkṣārthī śailamastakē || 110 ||
sarvakāmō viṣṇugēhē mōkṣārthī yatra kutracit |
japārambhē tu hr̥dayaṁ japāntē kavacaṁ paṭhēt || 111 ||
kimatra bahunōktēna śr̥ṇu nārada tattvataḥ |
yaṁ yaṁ cintayatē nityaṁ taṁ taṁ prāpnōti niścitam || 112 ||
iti śrīmadvasiṣṭhasaṁhitāyāṁ brahmanāradasaṁvādē śrī gāyatrī pañjara stōtram |
See more śrī gāyatrī stōtrāṇi for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
