Read in తెలుగు / ಕನ್ನಡ / தமிழ் / देवनागरी / English (IAST)
ಮುನಯಃ ಊಚುಃ |
ನಿಖಿಲಾಗಮತತ್ತ್ವಜ್ಞ ಬ್ರಹ್ಮಧ್ಯಾನಪರಾಯಣ |
ವದಾಸ್ಮಾಕಂ ಮುಕ್ತ್ಯುಪಾಯಂ ಸೂತ ಸರ್ವೋಪಕಾರಕಮ್ || ೧ ||
ಸರ್ವದೇವೇಷು ಕೋ ದೇವಃ ಸದ್ಯೋ ಮೋಕ್ಷಪ್ರದೋ ಭವೇತ್ |
ಕೋ ಮನುರ್ವಾ ಭವೇತ್ತಸ್ಯ ಸದ್ಯಃ ಪ್ರೀತಿಕರೋ ಧ್ರುವಮ್ || ೨ ||
ಸೂತ ಉವಾಚ |
ನಿಗಮಾಗಮತತ್ತ್ವಜ್ಞೋ ಹ್ಯವಧೂತಶ್ಚಿದಂಬರಃ |
ಭಕ್ತವಾತ್ಸಲ್ಯಪ್ರವಣೋ ದತ್ತ ಏವ ಹಿ ಕೇವಲಃ || ೩ ||
ಸದಾ ಪ್ರಸನ್ನವದನೋ ಭಕ್ತಚಿಂತೈಕತತ್ಪರಃ |
ತಸ್ಯ ನಾಮಾನ್ಯನಂತಾನಿ ವರ್ತಂತೇಽಥಾಪ್ಯದಃ ಪರಮ್ || ೪ ||
ದತ್ತಸ್ಯ ನಾಮಸಾಹಸ್ರಂ ತಸ್ಯ ಪ್ರೀತಿವಿವರ್ಧನಮ್ |
ಯಸ್ತ್ವಿದಂ ಪಠತೇ ನಿತ್ಯಂ ದತ್ತಾತ್ರೇಯೈಕಮಾನಸಃ || ೫ ||
ಮುಚ್ಯತೇ ಸರ್ವಪಾಪೇಭ್ಯಃ ಸ ಸದ್ಯೋ ನಾತ್ರ ಸಂಶಯಃ |
ಅಂತೇ ತದ್ಧಾಮ ಸಂಯಾತಿ ಪುನರಾವೃತ್ತಿದುರ್ಲಭಮ್ || ೬ ||
ಅಸ್ಯ ಶ್ರೀಮದ್ದತ್ತಾತ್ರೇಯಸಹಸ್ರನಾಮಸ್ತೋತ್ರಮಂತ್ರಸ್ಯ ಅವಧೂತ ಋಷಿಃ, ಅನುಷ್ಟುಪ್ ಛಂದಃ, ದಿಗಂಬರೋ ದೇವತಾ, ಓಂ ಬೀಜಂ, ಹ್ರೀಂ ಶಕ್ತಿಃ, ಕ್ರೌಂ ಕೀಲಕಂ, ಶ್ರೀದತ್ತಾತ್ರೇಯಪ್ರೀತ್ಯರ್ಥೇ ಜಪೇ ವಿನಿಯೋಗಃ |
ಅಥ ಧ್ಯಾನಮ್ |
ದಿಗಂಬರಂ ಭಸ್ಮವಿಲೇಪಿತಾಂಗಂ
ಬೋಧಾತ್ಮಕಂ ಮುಕ್ತಿಕರಂ ಪ್ರಸನ್ನಮ್ |
ನಿರ್ಮಾನಸಂ ಶ್ಯಾಮತನುಂ ಭಜೇಽಹಂ
ದತ್ತಾತ್ರೇಯಂ ಬ್ರಹ್ಮಸಮಾಧಿಯುಕ್ತಮ್ ||
ಅಥ ಸ್ತೋತ್ರಮ್ |
ದತ್ತಾತ್ರೇಯೋ ಮಹಾಯೋಗೀ ಯೋಗೇಶಶ್ಚಾಮರಪ್ರಭುಃ |
ಮುನಿರ್ದಿಗಂಬರೋ ಬಾಲೋ ಮಾಯಾಮುಕ್ತೋ ಮದಾಪಹಃ || ೧ ||
ಅವಧೂತೋ ಮಹಾನಾಥಃ ಶಂಕರೋಽಮರವಲ್ಲಭಃ |
ಮಹಾದೇವಶ್ಚಾದಿದೇವಃ ಪುರಾಣಪ್ರಭುರೀಶ್ವರಃ || ೨ ||
ಸತ್ತ್ವಕೃತ್ಸತ್ತ್ವಭೃದ್ಭಾವಃ ಸತ್ತ್ವಾತ್ಮಾ ಸತ್ತ್ವಸಾಗರಃ |
ಸತ್ತ್ವವಿತ್ಸತ್ತ್ವಸಾಕ್ಷೀ ಚ ಸತ್ತ್ವಸಾಧ್ಯೋಽಮರಾಧಿಪಃ || ೩ ||
ಭೂತಕೃದ್ಭೂತಭೃಚ್ಚೈವ ಭೂತಾತ್ಮಾ ಭೂತಸಂಭವಃ |
ಭೂತಭಾವೋ ಭವೋ ಭೂತವಿತ್ತಥಾ ಭೂತಕಾರಣಃ || ೪ ||
ಭೂತಸಾಕ್ಷೀ ಪ್ರಭೂತಿಶ್ಚ ಭೂತಾನಾಂ ಪರಮಾ ಗತಿಃ |
ಭೂತಸಂಗವಿಹೀನಾತ್ಮಾ ಭೂತಾತ್ಮಾ ಭೂತಶಂಕರಃ || ೫ ||
ಭೂತನಾಥೋ ಮಹಾನಾಥ ಆದಿನಾಥೋ ಮಹೇಶ್ವರಃ |
ಸರ್ವಭೂತನಿವಾಸಾತ್ಮಾ ಭೂತಸಂತಾಪನಾಶನಃ || ೬ ||
ಸರ್ವಾತ್ಮಾ ಸರ್ವಭೃತ್ಸರ್ವಃ ಸರ್ವಜ್ಞಃ ಸರ್ವನಿರ್ಣಯಃ |
ಸರ್ವಸಾಕ್ಷೀ ಬೃಹದ್ಭಾನುಃ ಸರ್ವವಿತ್ ಸರ್ವಮಂಗಳಃ || ೭ ||
ಶಾಂತಃ ಸತ್ಯಃ ಸಮಃ ಪೂರ್ಣೋ ಏಕಾಕೀ ಕಮಲಾಪತಿಃ |
ರಾಮೋ ರಾಮಪ್ರಿಯಶ್ಚೈವ ವಿರಾಮೋ ರಾಮಕಾರಣಃ || ೮ ||
ಶುದ್ಧಾತ್ಮಾ ಪಾವನೋಽನಂತಃ ಪ್ರತೀತಃ ಪರಮಾರ್ಥಭೃತ್ |
ಹಂಸಸಾಕ್ಷೀ ವಿಭುಶ್ಚೈವ ಪ್ರಭುಃ ಪ್ರಳಯ ಇತ್ಯಪಿ || ೯ ||
ಸಿದ್ಧಾತ್ಮಾ ಪರಮಾತ್ಮಾ ಚ ಸಿದ್ಧಾನಾಂ ಪರಮಾ ಗತಿಃ |
ಸಿದ್ಧಿಸಿದ್ಧಸ್ತಥಾ ಸಾಧ್ಯಃ ಸಾಧನೋ ಹ್ಯುತ್ತಮಸ್ತಥಾ || ೧೦ ||
ಸುಲಕ್ಷಣಃ ಸುಮೇಧಾವೀ ವಿದ್ಯಾವಾನ್ವಿಗತಾಂತರಃ |
ವಿಜ್ವರಶ್ಚ ಮಹಾಬಾಹುರ್ಬಹುಲಾನಂದವರ್ಧನಃ || ೧೧ ||
ಅವ್ಯಕ್ತಪುರುಷಃ ಪ್ರಾಜ್ಞಃ ಪರಜ್ಞಃ ಪರಮಾರ್ಥದೃಕ್ |
ಪರಾಪರವಿನಿರ್ಮುಕ್ತೋ ಯುಕ್ತಸ್ತತ್ತ್ವಪ್ರಕಾಶವಾನ್ || ೧೨ ||
ದಯಾವಾನ್ ಭಗವಾನ್ ಭಾವೀ ಭಾವಾತ್ಮಾ ಭಾವಕಾರಣಃ |
ಭವಸಂತಾಪನಾಶಶ್ಚ ಪುಷ್ಪವಾನ್ ಪಂಡಿತೋ ಬುಧಃ || ೧೩ ||
ಪ್ರತ್ಯಕ್ಷವಸ್ತುರ್ವಿಶ್ವಾತ್ಮಾ ಪ್ರತ್ಯಗ್ಬ್ರಹ್ಮ ಸನಾತನಃ |
ಪ್ರಮಾಣವಿಗತಶ್ಚೈವ ಪ್ರತ್ಯಾಹಾರನಿಯೋಜಕಃ || ೧೪ ||
ಪ್ರಣವಃ ಪ್ರಣವಾತೀತಃ ಪ್ರಮುಖಃ ಪ್ರಲಯಾತ್ಮಕಃ |
ಮೃತ್ಯುಂಜಯೋ ವಿವಿಕ್ತಾತ್ಮಾ ಶಂಕರಾತ್ಮಾ ಪರೋ ವಪುಃ || ೧೫ ||
ಪರಮಸ್ತನುವಿಜ್ಞೇಯಃ ಪರಮಾತ್ಮನಿ ಸಂಸ್ಥಿತಃ |
ಪ್ರಬೋಧಕಲನಾಧಾರಃ ಪ್ರಭಾವಪ್ರವರೋತ್ತಮಃ || ೧೬ ||
ಚಿದಂಬರಶ್ಚಿದ್ವಿಲಾಸಶ್ಚಿದಾಕಾಶಶ್ಚಿದುತ್ತಮಃ |
ಚಿತ್ತಚೈತನ್ಯಚಿತ್ತಾತ್ಮಾ ದೇವಾನಾಂ ಪರಮಾ ಗತಿಃ || ೧೭ ||
ಅಚೇತ್ಯಶ್ಚೇತನಾಧಾರಶ್ಚೇತನಾಚಿತ್ತವಿಕ್ರಮಃ |
ಚಿತ್ತಾತ್ಮಾ ಚೇತನಾರೂಪೋ ಲಸತ್ಪಂಕಜಲೋಚನಃ || ೧೮ ||
ಪರಂ ಬ್ರಹ್ಮ ಪರಂ ಜ್ಯೋತಿಃ ಪರಂ ಧಾಮ ಪರಂತಪಃ |
ಪರಂ ಸೂತ್ರಂ ಪರಂ ತಂತ್ರಂ ಪವಿತ್ರಃ ಪರಮೋಹವಾನ್ || ೧೯ ||
ಕ್ಷೇತ್ರಜ್ಞಃ ಕ್ಷೇತ್ರಗಃ ಕ್ಷೇತ್ರಃ ಕ್ಷೇತ್ರಾಧಾರಃ ಪುರಂಜನಃ |
ಕ್ಷೇತ್ರಶೂನ್ಯೋ ಲೋಕಸಾಕ್ಷೀ ಕ್ಷೇತ್ರವಾನ್ ಬಹುನಾಯಕಃ || ೨೦ ||
ಯೋಗೇಂದ್ರೋ ಯೋಗಪೂಜ್ಯಶ್ಚ ಯೋಗ್ಯ ಆತ್ಮವಿದಾಂ ಶುಚಿಃ |
ಯೋಗಮಾಯಾಧರಃ ಸ್ಥಾಣುರಚಲಃ ಕಮಲಾಪತಿಃ || ೨೧ ||
ಯೋಗೇಶೋ ಯೋಗನಿರ್ಮಾತಾ ಯೋಗಜ್ಞಾನಪ್ರಕಾಶನಃ |
ಯೋಗಪಾಲೋ ಲೋಕಪಾಲಃ ಸಂಸಾರತಮನಾಶನಃ || ೨೨ ||
ಗುಹ್ಯೋ ಗುಹ್ಯತಮೋ ಗುಪ್ತೋ ಮುಕ್ತೋ ಯುಕ್ತಃ ಸನಾತನಃ |
ಗಹನೋ ಗಗನಾಕಾರೋ ಗಂಭೀರೋ ಗಣನಾಯಕಃ || ೨೩ ||
ಗೋವಿಂದೋ ಗೋಪತಿರ್ಗೋಪ್ತಾ ಗೋಭಾಗೋ ಭಾವಸಂಸ್ಥಿತಃ |
ಗೋಸಾಕ್ಷೀ ಗೋತಮಾರಿಶ್ಚ ಗಾಂಧಾರೋ ಗಗನಾಕೃತಿಃ || ೨೪ ||
ಯೋಗಯುಕ್ತೋ ಭೋಗಯುಕ್ತಃ ಶಂಕಾಮುಕ್ತಸಮಾಧಿಮಾನ್ |
ಸಹಜಃ ಸಕಲೇಶಾನಃ ಕಾರ್ತವೀರ್ಯವರಪ್ರದಃ || ೨೫ ||
ಸರಜೋ ವಿರಜೋ ಪುಂಸೋ ಪಾವನಃ ಪಾಪನಾಶನಃ |
ಪರಾವರವಿನಿರ್ಮುಕ್ತಃ ಪರಂಜ್ಯೋತಿಃ ಪುರಾತನಃ || ೨೬ ||
ನಾನಾಜ್ಯೋತಿರನೇಕಾತ್ಮಾ ಸ್ವಯಂಜ್ಯೋತಿಃ ಸದಾಶಿವಃ |
ದಿವ್ಯಜ್ಯೋತಿರ್ಮಯಶ್ಚೈವ ಸತ್ಯವಿಜ್ಞಾನಭಾಸ್ಕರಃ || ೨೭ ||
ನಿತ್ಯಶುದ್ಧಃ ಪರಃ ಪೂರ್ಣಃ ಪ್ರಕಾಶಃ ಪ್ರಕಟೋದ್ಭವಃ |
ಪ್ರಮಾದವಿಗತಶ್ಚೈವ ಪರೇಶಃ ಪರವಿಕ್ರಮಃ || ೨೮ ||
ಯೋಗೀ ಯೋಗೋ ಯೋಗಪಶ್ಚ ಯೋಗಾಭ್ಯಾಸಪ್ರಕಾಶನಃ |
ಯೋಕ್ತಾ ಮೋಕ್ತಾ ವಿಧಾತಾ ಚ ತ್ರಾತಾ ಪಾತಾ ನಿರಾಯುಧಃ || ೨೯ ||
ನಿತ್ಯಮುಕ್ತೋ ನಿತ್ಯಯುಕ್ತಃ ಸತ್ಯಃ ಸತ್ಯಪರಾಕ್ರಮಃ |
ಸತ್ತ್ವಶುದ್ಧಿಕರಃ ಸತ್ತ್ವಸ್ತಥಾ ಸತ್ತ್ವಭೃತಾಂ ಗತಿಃ || ೩೦ ||
ಶ್ರೀಧರಃ ಶ್ರೀವಪುಃ ಶ್ರೀಮಾನ್ ಶ್ರೀನಿವಾಸೋಽಮರಾರ್ಚಿತಃ |
ಶ್ರೀನಿಧಿಃ ಶ್ರೀಪತಿಃ ಶ್ರೇಷ್ಠಃ ಶ್ರೇಯಸ್ಕಶ್ಚರಮಾಶ್ರಯಃ || ೩೧ ||
ತ್ಯಾಗೀ ತ್ಯಾಗಾರ್ಥಸಂಪನ್ನಸ್ತ್ಯಾಗಾತ್ಮಾ ತ್ಯಾಗವಿಗ್ರಹಃ |
ತ್ಯಾಗಲಕ್ಷಣಸಿದ್ಧಾತ್ಮಾ ತ್ಯಾಗಜ್ಞಸ್ತ್ಯಾಗಕಾರಣಃ || ೩೨ ||
ಭೋಗೋ ಭೋಕ್ತಾ ತಥಾ ಭೋಗ್ಯೋ ಭೋಗಸಾಧನಕಾರಣಃ |
ಭೋಗೀ ಭೋಗಾರ್ಥಸಂಪನ್ನೋ ಭೋಗಜ್ಞಾನಪ್ರಕಾಶನಃ || ೩೩ ||
ಕೇವಲಃ ಕೇಶವಃ ಕೃಷ್ಣಃ ಕಂವಾಸಾಃ ಕಮಲಾಲಯಃ |
ಕಮಲಾಸನಪೂಜ್ಯಶ್ಚ ಹರಿರಜ್ಞಾನಖಂಡನಃ || ೩೪ ||
ಮಹಾತ್ಮಾ ಮಹದಾದಿಶ್ಚ ಮಹೇಶೋತ್ತಮವಂದಿತಃ |
ಮನೋಬುದ್ಧಿವಿಹೀನಾತ್ಮಾ ಮಾನಾತ್ಮಾ ಮಾನವಾಧಿಪಃ || ೩೫ ||
ಭುವನೇಶೋ ವಿಭೂತಿಶ್ಚ ಧೃತಿರ್ಮೇಧಾ ಸ್ಮೃತಿರ್ದಯಾ |
ದುಃಖದಾವಾನಲೋ ಬುದ್ಧಃ ಪ್ರಬುದ್ಧಃ ಪರಮೇಶ್ವರಃ || ೩೬ ||
ಕಾಮಹಾ ಕ್ರೋಧಹಾ ಚೈವ ದಂಭದರ್ಪಮದಾಪಹಃ |
ಅಜ್ಞಾನತಿಮಿರಾರಿಶ್ಚ ಭವಾರಿರ್ಭುವನೇಶ್ವರಃ || ೩೭ ||
ರೂಪಕೃದ್ರೂಪಭೃದ್ರೂಪೀ ರೂಪಾತ್ಮಾ ರೂಪಕಾರಣಃ |
ರೂಪಜ್ಞೋ ರೂಪಸಾಕ್ಷೀ ಚ ನಾಮರೂಪೋ ಗುಣಾಂತಕಃ || ೩೮ ||
ಅಪ್ರಮೇಯಃ ಪ್ರಮೇಯಶ್ಚ ಪ್ರಮಾಣಂ ಪ್ರಣವಾಶ್ರಯಃ |
ಪ್ರಮಾಣರಹಿತೋಽಚಿಂತ್ಯಶ್ಚೇತನಾವಿಗತೋಽಜರಃ || ೩೯ ||
ಅಕ್ಷರೋಽಕ್ಷರಮುಕ್ತಶ್ಚ ವಿಜ್ವರೋ ಜ್ವರನಾಶನಃ |
ವಿಶಿಷ್ಟೋ ವಿತ್ತಶಾಸ್ತ್ರೀ ಚ ದೃಷ್ಟೋ ದೃಷ್ಟಾಂತವರ್ಜಿತಃ || ೪೦ ||
ಗುಣೇಶೋ ಗುಣಕಾಯಶ್ಚ ಗುಣಾತ್ಮಾ ಗುಣಭಾವನಃ |
ಅನಂತಗುಣಸಂಪನ್ನೋ ಗುಣಗರ್ಭೋ ಗುಣಾಧಿಪಃ || ೪೧ ||
ಗಣೇಶೋ ಗುಣನಾಥಶ್ಚ ಗುಣಾತ್ಮಾ ಗಣಭಾವನಃ |
ಗಣಬಂಧುರ್ವಿವೇಕಾತ್ಮಾ ಗುಣಯುಕ್ತಃ ಪರಾಕ್ರಮೀ || ೪೨ ||
ಅತರ್ಕ್ಯಃ ಕ್ರತುರಗ್ನಿಶ್ಚ ಕೃತಜ್ಞಃ ಸಫಲಾಶ್ರಯಃ |
ಯಜ್ಞಶ್ಚ ಯಜ್ಞಫಲದೋ ಯಜ್ಞ ಇಜ್ಯೋಽಮರೋತ್ತಮಃ || ೪೩ ||
ಹಿರಣ್ಯಗರ್ಭಃ ಶ್ರೀಗರ್ಭಃ ಖಗರ್ಭಃ ಕುಣಪೇಶ್ವರಃ |
ಮಾಯಾಗರ್ಭೋ ಲೋಕಗರ್ಭಃ ಸ್ವಯಂಭೂರ್ಭುವನಾಂತಕಃ || ೪೪ ||
ನಿಷ್ಪಾಪೋ ನಿಬಿಡೋ ನಂದೀ ಬೋಧೀ ಬೋಧಸಮಾಶ್ರಯಃ |
ಬೋಧಾತ್ಮಾ ಬೋಧನಾತ್ಮಾ ಚ ಭೇದವೈತಂಡಖಂಡನಃ || ೪೫ ||
ಸ್ವಾಭಾವ್ಯೋ ಭಾವನಿರ್ಮುಕ್ತೋ ವ್ಯಕ್ತೋಽವ್ಯಕ್ತಸಮಾಶ್ರಯಃ |
ನಿತ್ಯತೃಪ್ತೋ ನಿರಾಭಾಸೋ ನಿರ್ವಾಣಃ ಶರಣಃ ಸುಹೃತ್ || ೪೬ ||
ಗುಹ್ಯೇಶೋ ಗುಣಗಂಭೀರೋ ಗುಣದೋಷನಿವಾರಣಃ |
ಗುಣಸಂಗವಿಹೀನಶ್ಚ ಯೋಗಾರೇರ್ದರ್ಪನಾಶನಃ || ೪೭ ||
ಆನಂದಃ ಪರಮಾನಂದಃ ಸ್ವಾನಂದಸುಖವರ್ಧನಃ |
ಸತ್ಯಾನಂದಶ್ಚಿದಾನಂದಃ ಸರ್ವಾನಂದಪರಾಯಣಃ || ೪೮ ||
ಸದ್ರೂಪಃ ಸಹಜಃ ಸತ್ಯಃ ಸ್ವಾನಂದಃ ಸುಮನೋಹರಃ |
ಸರ್ವಃ ಸರ್ವಾಂತರಶ್ಚೈವ ಪೂರ್ವಾತ್ಪೂರ್ವತರಸ್ತಥಾ || ೪೯ ||
ಖಮಯಃ ಖಪರಃ ಖಾದಿಃ ಖಂಬ್ರಹ್ಮ ಖತನುಃ ಖಗಃ |
ಖವಾಸಾಃ ಖವಿಹೀನಶ್ಚ ಖನಿಧಿಃ ಖಪರಾಶ್ರಯಃ || ೫೦ ||
ಅನಂತಶ್ಚಾದಿರೂಪಶ್ಚ ಸೂರ್ಯಮಂಡಲಮಧ್ಯಗಃ |
ಅಮೋಘಃ ಪರಮಾಮೋಘಃ ಪರೋಕ್ಷಃ ಪರದಃ ಕವಿಃ || ೫೧ ||
ವಿಶ್ವಚಕ್ಷುರ್ವಿಶ್ವಸಾಕ್ಷೀ ವಿಶ್ವಬಾಹುರ್ಧನೇಶ್ವರಃ |
ಧನಂಜಯೋ ಮಹಾತೇಜಾಸ್ತೇಜಿಷ್ಠಸ್ತೈಜಸಃ ಸುಖೀ || ೫೨ ||
ಜ್ಯೋತಿರ್ಜ್ಯೋತಿರ್ಮಯೋ ಜೇತಾ ಜ್ಯೋತಿಷಾಂ ಜ್ಯೋತಿರಾತ್ಮಕಃ |
ಜ್ಯೋತಿಷಾಮಪಿ ಜ್ಯೋತಿಶ್ಚ ಜನಕೋ ಜನಮೋಹನಃ || ೫೩ ||
ಜಿತೇಂದ್ರಿಯೋ ಜಿತಕ್ರೋಧೋ ಜಿತಾತ್ಮಾ ಜಿತಮಾನಸಃ |
ಜಿತಸಂಗೋ ಜಿತಪ್ರಾಣೋ ಜಿತಸಂಸಾರವಾಸನಃ || ೫೪ ||
ನಿರ್ವಾಸನೋ ನಿರಾಲಂಬೋ ನಿರ್ಯೋಗಕ್ಷೇಮವರ್ಜಿತಃ |
ನಿರೀಹೋ ನಿರಹಂಕಾರೋ ನಿರಾಶೀರ್ನಿರುಪಾಧಿಕಃ || ೫೫ ||
ನಿತ್ಯಬೋಧೋ ವಿವಿಕ್ತಾತ್ಮಾ ವಿಶುದ್ಧೋತ್ತಮಗೌರವಃ |
ವಿದ್ಯಾರ್ಥೀ ಪರಮಾರ್ಥೀ ಚ ಶ್ರದ್ಧಾರ್ಥೀ ಸಾಧನಾತ್ಮಕಃ || ೫೬ ||
ಪ್ರತ್ಯಾಹಾರೀ ನಿರಾಹಾರೀ ಸರ್ವಾಹಾರಪರಾಯಣಃ |
ನಿತ್ಯಶುದ್ಧೋ ನಿರಾಕಾಂಕ್ಷೀ ಪಾರಾಯಣಪರಾಯಣಃ || ೫೭ ||
ಅಣೋರಣುತರಃ ಸೂಕ್ಷ್ಮಃ ಸ್ಥೂಲಃ ಸ್ಥೂಲತರಸ್ತಥಾ |
ಏಕಸ್ತಥಾಽನೇಕರೂಪೋ ವಿಶ್ವರೂಪಃ ಸನಾತನಃ || ೫೮ ||
ನೈಕರೂಪೋ ವಿರೂಪಾತ್ಮಾ ನೈಕಬೋಧಮಯಸ್ತಥಾ |
ನೈಕನಾಮಮಯಶ್ಚೈವ ನೈಕವಿದ್ಯಾವಿವರ್ಧನಃ || ೫೯ ||
ಏಕಶ್ಚೈಕಾಂತಿಕಶ್ಚೈವ ನಾನಾಭಾವವಿವರ್ಜಿತಃ |
ಏಕಾಕ್ಷರಸ್ತಥಾ ಬೀಜಃ ಪೂರ್ಣಬಿಂಬಃ ಸನಾತನಃ || ೬೦ ||
ಮಂತ್ರವೀರ್ಯೋ ಮಂತ್ರಬೀಜಃ ಶಾಸ್ತ್ರವೀರ್ಯೋ ಜಗತ್ಪತಿಃ |
ನಾನಾವೀರ್ಯಧರಶ್ಚೈವ ಶಕ್ರೇಶಃ ಪೃಥಿವೀಪತಿಃ || ೬೧ ||
ಪ್ರಾಣೇಶಃ ಪ್ರಾಣದಃ ಪ್ರಾಣಃ ಪ್ರಾಣಾಯಾಮಪರಾಯಣಃ |
ಪ್ರಾಣಪಂಚಕನಿರ್ಮುಕ್ತಃ ಕೋಶಪಂಚಕವರ್ಜಿತಃ || ೬೨ ||
ನಿಶ್ಚಲೋ ನಿಷ್ಕಲೋಽಸಂಗೋ ನಿಷ್ಪ್ರಪಂಚೋ ನಿರಾಮಯಃ |
ನಿರಾಧಾರೋ ನಿರಾಕಾರೋ ನಿರ್ವಿಕಾರೋ ನಿರಂಜನಃ || ೬೩ ||
ನಿಷ್ಪ್ರತೀತೋ ನಿರಾಭಾಸೋ ನಿರಾಸಕ್ತೋ ನಿರಾಕುಲಃ |
ನಿಷ್ಠಾಸರ್ವಗತಶ್ಚೈವ ನಿರಾರಂಭೋ ನಿರಾಶ್ರಯಃ || ೬೪ ||
ನಿರಂತರಃ ಸರ್ವಗೋಪ್ತಾ ಶಾಂತೋ ದಾಂತೋ ಮಹಾಮುನಿಃ | [ಸತ್ತ್ವ]
ನಿಃಶಬ್ದಃ ಸುಕೃತಃ ಸ್ವಸ್ಥಃ ಸತ್ಯವಾದೀ ಸುರೇಶ್ವರಃ || ೬೫ ||
ಜ್ಞಾನದೋ ಜ್ಞಾನವಿಜ್ಞಾನೀ ಜ್ಞಾನಾತ್ಮಾಽಽನಂದಪೂರಿತಃ |
ಜ್ಞಾನಯಜ್ಞವಿದಾಂ ದಕ್ಷೋ ಜ್ಞಾನಾಗ್ನಿರ್ಜ್ವಲನೋ ಬುಧಃ || ೬೬ ||
ದಯಾವಾನ್ ಭವರೋಗಾರಿಶ್ಚಿಕಿತ್ಸಾಚರಮಾಗತಿಃ |
ಚಂದ್ರಮಂಡಲಮಧ್ಯಸ್ಥಶ್ಚಂದ್ರಕೋಟಿಸುಶೀತಲಃ || ೬೭ ||
ಯಂತ್ರಕೃತ್ಪರಮೋ ಯಂತ್ರೀ ಯಂತ್ರಾರೂಢಾಪರಾಜಿತಃ |
ಯಂತ್ರವಿದ್ಯಂತ್ರವಾಸಶ್ಚ ಯಂತ್ರಾಧಾರೋ ಧರಾಧರಃ || ೬೮ ||
ತತ್ತ್ವಜ್ಞಸ್ತತ್ತ್ವಭೂತಾತ್ಮಾ ಮಹತ್ತತ್ತ್ವಪ್ರಕಾಶನಃ |
ತತ್ತ್ವಸಂಖ್ಯಾನಯೋಗಜ್ಞಃ ಸಾಂಖ್ಯಶಾಸ್ತ್ರಪ್ರವರ್ತಕಃ || ೬೯ ||
ಅನಂತವಿಕ್ರಮೋ ದೇವೋ ಮಾಧವಶ್ಚ ಧನೇಶ್ವರಃ |
ಸಾಧುಃ ಸಾಧುವರಿಷ್ಠಾತ್ಮಾ ಸಾವಧಾನೋಽಮರೋತ್ತಮಃ || ೭೦ ||
ನಿಃಸಂಕಲ್ಪೋ ನಿರಾಧಾರೋ ದುರ್ಧರೋ ಹ್ಯಾತ್ಮವಿತ್ಪತಿಃ |
ಆರೋಗ್ಯಸುಖದಶ್ಚೈವ ಪ್ರವರೋ ವಾಸವಸ್ತಥಾ || ೭೧ ||
ಪರೇಶಃ ಪರಮೋದಾರಃ ಪ್ರತ್ಯಕ್ಚೈತನ್ಯದುರ್ಗಮಃ |
ದುರಾಧರ್ಷೋ ದುರಾವಾಸೋ ದೂರತ್ವಪರಿನಾಶನಃ || ೭೨ ||
ವೇದವಿದ್ವೇದಕೃದ್ವೇದೋ ವೇದಾತ್ಮಾ ವಿಮಲಾಶಯಃ |
ವಿವಿಕ್ತಸೇವೀ ಚ ಸಂಸಾರಶ್ರಮನಾಶನಸ್ತಥಾ || ೭೩ ||
ಬ್ರಹ್ಮಯೋನಿರ್ಬೃಹದ್ಯೋನಿರ್ವಿಶ್ವಯೋನಿರ್ವಿದೇಹವಾನ್ |
ವಿಶಾಲಾಕ್ಷೋ ವಿಶ್ವನಾಥೋ ಹಾಟಕಾಂಗದಭೂಷಣಃ || ೭೪ ||
ಅಬಾಧ್ಯೋ ಜಗದಾರಾಧ್ಯೋ ಜಗದಾರ್ಜವಪಾಲನಃ |
ಜನವಾನ್ ಧನವಾನ್ ಧರ್ಮೀ ಧರ್ಮಗೋ ಧರ್ಮವರ್ಧನಃ || ೭೫ ||
ಅಮೃತಃ ಶಾಶ್ವತಃ ಸಾಧ್ಯಃ ಸಿದ್ಧಿದಃ ಸುಮನೋಹರಃ |
ಖಲುಬ್ರಹ್ಮಖಲುಸ್ಥಾನೋ ಮುನೀನಾಂ ಪರಮಾ ಗತಿಃ || ೭೬ ||
ಉಪದ್ರಷ್ಟಾ ತಥಾ ಶ್ರೇಷ್ಠಃ ಶುಚಿಭೂತೋ ಹ್ಯನಾಮಯಃ |
ವೇದಸಿದ್ಧಾಂತವೇದ್ಯಶ್ಚ ಮಾನಸಾಹ್ಲಾದವರ್ಧನಃ || ೭೭ ||
ದೇಹಾದನ್ಯೋ ಗುಣಾದನ್ಯೋ ಲೋಕಾದನ್ಯೋ ವಿವೇಕವಿತ್ |
ದುಷ್ಟಸ್ವಪ್ನಹರಶ್ಚೈವ ಗುರುರ್ಗುರುವರೋತ್ತಮಃ || ೭೮ ||
ಕರ್ಮೀ ಕರ್ಮವಿನಿರ್ಮುಕ್ತಃ ಸಂನ್ಯಾಸೀ ಸಾಧಕೇಶ್ವರಃ |
ಸರ್ವಭಾವವಿಹೀನಶ್ಚ ತೃಷ್ಣಾಸಂಗನಿವಾರಕಃ || ೭೯ ||
ತ್ಯಾಗೀ ತ್ಯಾಗವಪುಸ್ತ್ಯಾಗಸ್ತ್ಯಾಗದಾನವಿವರ್ಜಿತಃ |
ತ್ಯಾಗಕಾರಣತ್ಯಾಗಾತ್ಮಾ ಸದ್ಗುರುಃ ಸುಖದಾಯಕಃ || ೮೦ ||
ದಕ್ಷೋ ದಕ್ಷಾದಿವಂದ್ಯಶ್ಚ ಜ್ಞಾನವಾದಪ್ರವರ್ತಕಃ |
ಶಬ್ದಬ್ರಹ್ಮಮಯಾತ್ಮಾ ಚ ಶಬ್ದಬ್ರಹ್ಮಪ್ರಕಾಶವಾನ್ || ೮೧ ||
ಗ್ರಸಿಷ್ಣುಃ ಪ್ರಭವಿಷ್ಣುಶ್ಚ ಸಹಿಷ್ಣುರ್ವಿಗತಾಂತರಃ |
ವಿದ್ವತ್ತಮೋ ಮಹಾವಂದ್ಯೋ ವಿಶಾಲೋತ್ತಮವಾಙ್ಮುನಿಃ || ೮೨ ||
ಬ್ರಹ್ಮವಿದ್ಬ್ರಹ್ಮಭಾವಶ್ಚ ಬ್ರಹ್ಮರ್ಷಿರ್ಬ್ರಾಹ್ಮಣಪ್ರಿಯಃ |
ಬ್ರಹ್ಮ ಬ್ರಹ್ಮಪ್ರಕಾಶಾತ್ಮಾ ಬ್ರಹ್ಮವಿದ್ಯಾಪ್ರಕಾಶನಃ || ೮೩ ||
ಅತ್ರಿವಂಶಪ್ರಭೂತಾತ್ಮಾ ತಾಪಸೋತ್ತಮವಂದಿತಃ |
ಆತ್ಮವಾಸೀ ವಿಧೇಯಾತ್ಮಾ ಹ್ಯತ್ರಿವಂಶವಿವರ್ಧನಃ || ೮೪ ||
ಪ್ರವರ್ತನೋ ನಿವೃತ್ತಾತ್ಮಾ ಪ್ರಲಯೋದಕಸನ್ನಿಭಃ |
ನಾರಾಯಣೋ ಮಹಾಗರ್ಭೋ ಭಾರ್ಗವಪ್ರಿಯಕೃತ್ತಮಃ || ೮೫ ||
ಸಂಕಲ್ಪದುಃಖದಲನಃ ಸಂಸಾರತಮನಾಶನಃ |
ತ್ರಿವಿಕ್ರಮಸ್ತ್ರಿಧಾಕಾರಸ್ತ್ರಿಮೂರ್ತಿಸ್ತ್ರಿಗುಣಾತ್ಮಕಃ || ೮೬ ||
ಭೇದತ್ರಯಹರಶ್ಚೈವ ತಾಪತ್ರಯನಿವಾರಕಃ |
ದೋಷತ್ರಯವಿಭೇದೀ ಚ ಸಂಶಯಾರ್ಣವಖಂಡನಃ || ೮೭ ||
ಅಸಂಶಯಸ್ತ್ವಸಮ್ಮೂಢೋ ಹ್ಯವಾದೀ ರಾಜವಂದಿತಃ |
ರಾಜಯೋಗೀ ಮಹಾಯೋಗೀ ಸ್ವಭಾವಗಲಿತಸ್ತಥಾ || ೮೮ ||
ಪುಣ್ಯಶ್ಲೋಕಃ ಪವಿತ್ರಾಂಘ್ರಿರ್ಧ್ಯಾನಯೋಗಪರಾಯಣಃ |
ಧ್ಯಾನಸ್ಥೋ ಧ್ಯಾನಗಮ್ಯಶ್ಚ ವಿಧೇಯಾತ್ಮಾ ಪುರಾತನಃ || ೮೯ ||
ಅವಿಜ್ಞೇಯೋ ಹ್ಯಂತರಾತ್ಮಾ ಮುಖ್ಯಬಿಂಬಸನಾತನಃ |
ಜೀವಸಂಜೀವನೋ ಜೀವಶ್ಚಿದ್ವಿಲಾಸಶ್ಚಿದಾಶ್ರಯಃ || ೯೦ ||
ಮಹೇಂದ್ರೋಽಮರಮಾನ್ಯಶ್ಚ ಯೋಗೇಂದ್ರೋ ಯೋಗವಿತ್ತಮಃ |
ಯೋಗಧರ್ಮಸ್ತಥಾ ಯೋಗಸ್ತತ್ತ್ವಸ್ತತ್ತ್ವವಿನಿಶ್ಚಯಃ || ೯೧ ||
ನೈಕಬಾಹುರನಂತಾತ್ಮಾ ನೈಕನಾಮಪರಾಕ್ರಮಃ |
ನೈಕಾಕ್ಷೀ ನೈಕಪಾದಶ್ಚ ನಾಥನಾಥೋತ್ತಮೋತ್ತಮಃ || ೯೨ ||
ಸಹಸ್ರಶೀರ್ಷಾ ಪುರುಷಃ ಸಹಸ್ರಾಕ್ಷಃ ಸಹಸ್ರಪಾತ್ |
ಸಹಸ್ರರೂಪದೃಕ್ ಚೈವ ಸಹಸ್ರಾರಮಯೋದ್ಧವಃ || ೯೩ ||
ತ್ರಿಪಾದಪುರುಷಶ್ಚೈವ ತ್ರಿಪಾದೂರ್ಧ್ವಸ್ತಥೈವ ಚ |
ತ್ರ್ಯಂಬಕಶ್ಚ ಮಹಾವೀರ್ಯೋ ಯೋಗವೀರ್ಯವಿಶಾರದಃ || ೯೪ ||
ವಿಜಯೀ ವಿನಯೀ ಜೇತಾ ವೀತರಾಗೀ ವಿರಾಜಿತಃ |
ರುದ್ರೋ ರೌದ್ರೋ ಮಹಾಭೀಮಃ ಪ್ರಾಜ್ಞಮುಖ್ಯಃ ಸದಾಶುಚಿಃ || ೯೫ ||
ಅಂತರ್ಜ್ಯೋತಿರನಂತಾತ್ಮಾ ಪ್ರತ್ಯಗಾತ್ಮಾ ನಿರಂತರಃ |
ಅರೂಪಶ್ಚಾತ್ಮರೂಪಶ್ಚ ಸರ್ವಭಾವವಿನಿರ್ವೃತಃ || ೯೬ ||
ಅಂತಃಶೂನ್ಯೋ ಬಹಿಃಶೂನ್ಯಃ ಶೂನ್ಯಾತ್ಮಾ ಶೂನ್ಯಭಾವನಃ |
ಅಂತಃಪೂರ್ಣೋ ಬಹಿಃಪೂರ್ಣಃ ಪೂರ್ಣಾತ್ಮಾ ಪೂರ್ಣಭಾವನಃ || ೯೭ ||
ಅಂತಸ್ತ್ಯಾಗೀ ಬಹಿಸ್ತ್ಯಾಗೀ ತ್ಯಾಗಾತ್ಮಾ ಸರ್ವಯೋಗವಾನ್ |
ಅಂತರ್ಯೋಗೀ ಬಹಿರ್ಯೋಗೀ ಸರ್ವಯೋಗಪರಾಯಣಃ || ೯೮ ||
ಅಂತರ್ಭೋಗೀ ಬಹಿರ್ಭೋಗೀ ಸರ್ವಭೋಗವಿದುತ್ತಮಃ |
ಅಂತರ್ನಿಷ್ಠೋ ಬಹಿರ್ನಿಷ್ಠಃ ಸರ್ವನಿಷ್ಠಾಮಯಸ್ತಥಾ || ೯೯ ||
ಬಾಹ್ಯಾಂತರವಿಮುಕ್ತಶ್ಚ ಬಾಹ್ಯಾಂತರವಿವರ್ಜಿತಃ |
ಶಾಂತಃ ಶುದ್ಧೋ ವಿಶುದ್ಧಶ್ಚ ನಿರ್ವಾಣಃ ಪ್ರಕೃತೇಃ ಪರಃ || ೧೦೦ ||
ಅಕಾಲಃ ಕಾಲನೇಮೀ ಚ ಕಾಲಕಾಲೋ ಜನೇಶ್ವರಃ |
ಕಾಲಾತ್ಮಾ ಕಾಲಕರ್ತಾ ಚ ಕಾಲಜ್ಞಃ ಕಾಲನಾಶನಃ || ೧೦೧ ||
ಕೈವಲ್ಯಪದದಾತಾ ಚ ಕೈವಲ್ಯಸುಖದಾಯಕಃ |
ಕೈವಲ್ಯಕಲನಾಧಾರೋ ನಿರ್ಭರೋ ಹರ್ಷವರ್ಧನಃ || ೧೦೨ ||
ಹೃದಯಸ್ಥೋ ಹೃಷೀಕೇಶೋ ಗೋವಿಂದೋ ಗರ್ಭವರ್ಜಿತಃ |
ಸಕಲಾಗಮಪೂಜ್ಯಶ್ಚ ನಿಗಮೋ ನಿಗಮಾಶ್ರಯಃ || ೧೦೩ ||
ಪರಾಶಕ್ತಿಃ ಪರಾಕೀರ್ತಿಃ ಪರಾವೃತ್ತಿರ್ನಿಧಿಸ್ಮೃತಿಃ |
ಪರವಿದ್ಯಾ ಪರಾಕ್ಷಾಂತಿರ್ವಿಭಕ್ತಿರ್ಯುಕ್ತಸದ್ಗತಿಃ || ೧೦೪ ||
ಸ್ವಪ್ರಕಾಶಃ ಪ್ರಕಾಶಾತ್ಮಾ ಪರಸಂವೇದನಾತ್ಮಕಃ |
ಸ್ವಸೇವ್ಯಃ ಸ್ವವಿದಾಂ ಸ್ವಾತ್ಮಾ ಸ್ವಸಂವೇದ್ಯೋಽನಘಃ ಕ್ಷಮೀ || ೧೦೫ ||
ಸ್ವಾನುಸಂಧಾನಶೀಲಾತ್ಮಾ ಸ್ವಾನುಸಂಧಾನಗೋಚರಃ |
ಸ್ವಾನುಸಂಧಾನಶೂನ್ಯಾತ್ಮಾ ಸ್ವಾನುಸಂಧಾನಕಾಶ್ರಯಃ || ೧೦೬ ||
ಸ್ವಬೋಧದರ್ಪಣೋಽಭಂಗಃ ಕಂದರ್ಪಕುಲನಾಶನಃ |
ಬ್ರಹ್ಮಚಾರೀ ಬ್ರಹ್ಮವೇತ್ತಾ ಬ್ರಾಹ್ಮಣೋ ಬ್ರಹ್ಮವಿತ್ತಮಃ || ೧೦೭ ||
ತತ್ತ್ವಬೋಧಃ ಸುಧಾವರ್ಷಃ ಪಾವನಃ ಪಾಪಪಾವಕಃ |
ಬ್ರಹ್ಮಸೂತ್ರವಿಧೇಯಾತ್ಮಾ ಬ್ರಹ್ಮಸೂತ್ರಾರ್ಥನಿರ್ಣಯಃ || ೧೦೮ ||
ಆತ್ಯಂತಿಕೋ ಮಹಾಕಲ್ಪಃ ಸಂಕಲ್ಪಾವರ್ತನಾಶನಃ |
ಆಧಿವ್ಯಾಧಿಹರಶ್ಚೈವ ಸಂಶಯಾರ್ಣವಶೋಷಕಃ || ೧೦೯ ||
ತತ್ತ್ವಾತ್ಮಜ್ಞಾನಸಂದೇಶೋ ಮಹಾನುಭವಭಾವಿತಃ |
ಆತ್ಮಾನುಭವಸಂಪನ್ನಃ ಸ್ವಾನುಭಾವಸುಖಾಶ್ರಯಃ || ೧೧೦ ||
ಅಚಿಂತ್ಯಶ್ಚ ಬೃಹದ್ಭಾನುಃ ಪ್ರಮದೋತ್ಕರ್ಷನಾಶನಃ |
ಅನಿಕೇತ ಪ್ರಶಾಂತಾತ್ಮಾ ಶೂನ್ಯಾವಾಸೋ ಜಗದ್ವಪುಃ || ೧೧೧ ||
ಚಿದ್ಗತಿಶ್ಚಿನ್ಮಯಶ್ಚಕ್ರೀ ಮಾಯಾಚಕ್ರಪ್ರವರ್ತಕಃ |
ಸರ್ವವರ್ಣವಿದಾರಂಭೀ ಸರ್ವಾರಂಭಪರಾಯಣಃ || ೧೧೨ ||
ಪುರಾಣಃ ಪ್ರವರೋ ದಾತಾ ಸುಂದರಃ ಕನಕಾಂಗದೀ |
ಅನಸೂಯಾತ್ಮಜೋ ದತ್ತಃ ಸರ್ವಜ್ಞಃ ಸರ್ವಕಾಮದಃ || ೧೧೩ ||
ಕಾಮಜಿತ್ ಕಾಮಪಾಲಶ್ಚ ಕಾಮೀ ಕಾಮಪ್ರದಾಗಮಃ |
ಕಾಮವಾನ್ ಕಾಮಪೋಷಶ್ಚ ಸರ್ವಕಾಮನಿವರ್ತಕಃ || ೧೧೪ ||
ಸರ್ವಕರ್ಮಫಲೋತ್ಪತ್ತಿಃ ಸರ್ವಕಾಮಫಲಪ್ರದಃ |
ಸರ್ವಕರ್ಮಫಲೈಃ ಪೂಜ್ಯಃ ಸರ್ವಕರ್ಮಫಲಾಶ್ರಯಃ || ೧೧೫ ||
ವಿಶ್ವಕರ್ಮಾ ಕೃತಾತ್ಮಾ ಚ ಕೃತಜ್ಞಃ ಸರ್ವಸಾಕ್ಷಿಕಃ |
ಸರ್ವಾರಂಭಪರಿತ್ಯಾಗೀ ಜಡೋನ್ಮತ್ತಪಿಶಾಚವಾನ್ || ೧೧೬ ||
ಭಿಕ್ಷುರ್ಭೈಕ್ಷಾಕರಶ್ಚೈವ ಭೈಕ್ಷಾಹಾರೀ ನಿರಾಶ್ರಮೀ |
ಅಕೂಲಶ್ಚಾನುಕೂಲಶ್ಚ ವಿಕಲೋ ಹ್ಯಕಲಸ್ತಥಾ || ೧೧೭ ||
ಜಟಿಲೋ ವನಚಾರೀ ಚ ದಂಡೀ ಮುಂಡೀ ಚ ಗಂಡವಾನ್ |
ದೇಹಧರ್ಮವಿಹೀನಾತ್ಮಾ ಹ್ಯೇಕಾಕೀ ಸಂಗವರ್ಜಿತಃ || ೧೧೮ ||
ಆಶ್ರಮ್ಯನಾಶ್ರಮಾರಂಭೋಽನಾಚಾರೀ ಕರ್ಮವರ್ಜಿತಃ |
ಅಸಂದೇಹೀ ಚ ಸಂದೇಹೀ ನ ಕಿಂಚಿನ್ನ ಚ ಕಿಂಚನಃ || ೧೧೯ ||
ನೃದೇಹೀ ದೇಹಶೂನ್ಯಶ್ಚ ನಾಭಾವೀ ಭಾವನಿರ್ಗತಃ |
ನಾಬ್ರಹ್ಮಾ ಚ ಪರಬ್ರಹ್ಮ ಸ್ವಯಮೇವ ನಿರಾಕುಲಃ || ೧೨೦ ||
ಅನಘಶ್ಚಾಗುರುಶ್ಚೈವ ನಾಥನಾಥೋತ್ತಮೋ ಗುರುಃ |
ದ್ವಿಭುಜಃ ಪ್ರಾಕೃತಶ್ಚೈವ ಜನಕಶ್ಚ ಪಿತಾಮಹಃ || ೧೨೧ ||
ಅನಾತ್ಮಾ ನ ಚ ನಾನಾತ್ಮಾ ನೀತಿರ್ನೀತಿಮತಾಂ ವರಃ |
ಸಹಜಃ ಸದೃಶಃ ಸಿದ್ಧಶ್ಚೈಕಶ್ಚಿನ್ಮಾತ್ರ ಏವ ಚ || ೧೨೨ ||
ನ ಕರ್ತಾಪಿ ಚ ಕರ್ತಾ ಚ ಭೋಕ್ತಾ ಭೋಗವಿವರ್ಜಿತಃ |
ತುರೀಯಸ್ತುರೀಯಾತೀತಃ ಸ್ವಚ್ಛಃ ಸರ್ವಮಯಸ್ತಥಾ || ೧೨೩ ||
ಸರ್ವಾಧಿಷ್ಠಾನರೂಪಶ್ಚ ಸರ್ವಧ್ಯೇಯವಿವರ್ಜಿತಃ |
ಸರ್ವಲೋಕನಿವಾಸಾತ್ಮಾ ಸಕಲೋತ್ತಮವಂದಿತಃ || ೧೨೪ ||
ದೇಹಭೃದ್ದೇಹಕೃಚ್ಚೈವ ದೇಹಾತ್ಮಾ ದೇಹಭಾವನಃ |
ದೇಹೀ ದೇಹವಿಭಕ್ತಶ್ಚ ದೇಹಭಾವಪ್ರಕಾಶನಃ || ೧೨೫ ||
ಲಯಸ್ಥೋ ಲಯವಿಚ್ಚೈವ ಲಯಾಭಾವಶ್ಚ ಬೋಧವಾನ್ |
ಲಯಾತೀತೋ ಲಯಸ್ಯಾಂತೋ ಲಯಭಾವನಿವಾರಣಃ || ೧೨೬ ||
ವಿಮುಖಃ ಪ್ರಮುಖಶ್ಚೈವ ಪ್ರತ್ಯಙ್ಮುಖವದಾಚರೀ |
ವಿಶ್ವಭುಗ್ವಿಶ್ವಧೃಗ್ವಿಶ್ವೋ ವಿಶ್ವಕ್ಷೇಮಕರಸ್ತಥಾ || ೧೨೭ ||
ಅವಿಕ್ಷಿಪ್ತೋಽಪ್ರಮಾದೀ ಚ ಪರರ್ಧಿಃ ಪರಮಾರ್ಥದೃಕ್ |
ಸ್ವಾನುಭಾವವಿಹೀನಶ್ಚ ಸ್ವಾನುಭಾವಪ್ರಕಾಶನಃ || ೧೨೮ ||
ನಿರಿಂದ್ರಿಯಶ್ಚ ನಿರ್ಬುದ್ಧಿರ್ನಿರಾಭಾಸೋ ನಿರಾಕೃತಃ |
ನಿರಹಂಕಾರರೂಪಾತ್ಮಾ ನಿರ್ವಪುಃ ಸಕಲಾಶ್ರಯಃ || ೧೨೯ ||
ಶೋಕದುಃಖಹರಶ್ಚೈವ ಭೋಗಮೋಕ್ಷಫಲಪ್ರದಃ |
ಸುಪ್ರಸನ್ನಸ್ತಥಾ ಸೂಕ್ಷ್ಮಃ ಶಬ್ದಬ್ರಹ್ಮಾರ್ಥಸಂಗ್ರಹಃ || ೧೩೦ ||
ಆಗಮಾಪಾಯಶೂನ್ಯಶ್ಚ ಸ್ಥಾನದಶ್ಚ ಸತಾಂಗತಿಃ |
ಅಕೃತಃ ಸುಕೃತಶ್ಚೈವ ಕೃತಕರ್ಮಾ ವಿನಿರ್ವೃತಃ || ೧೩೧ ||
ಭೇದತ್ರಯಹರಶ್ಚೈವ ದೇಹತ್ರಯವಿನಿರ್ಗತಃ |
ಸರ್ವಕಾಮಮಯಶ್ಚೈವ ಸರ್ವಕಾಮನಿವರ್ತಕಃ || ೧೩೨ ||
ಸಿದ್ಧೇಶ್ವರೋಽಜರಃ ಪಂಚಬಾಣದರ್ಪಹುತಾಶನಃ |
ಚತುರಕ್ಷರಬೀಜಾತ್ಮಾ ಸ್ವಭೂಶ್ಚಿತ್ಕೀರ್ತಿಭೂಷಣಃ || ೧೩೩ ||
ಅಗಾಧಬುದ್ಧಿರಕ್ಷುಬ್ಧಶ್ಚಂದ್ರಸೂರ್ಯಾಗ್ನಿಲೋಚನಃ |
ಯಮದಂಷ್ಟ್ರೋಽತಿಸಂಹರ್ತಾ ಪರಮಾನಂದಸಾಗರಃ || ೧೩೪ ||
ಲೀಲಾವಿಶ್ವಂಭರೋ ಭಾನುರ್ಭೈರವೋ ಭೀಮಲೋಚನಃ |
ಬ್ರಹ್ಮಚರ್ಮಾಂಬರಃ ಕಾಲಸ್ತ್ವಚಲಶ್ಚಲನಾಂತಕಃ || ೧೩೫ ||
ಆದಿದೇವೋ ಜಗದ್ಯೋನಿರ್ವಾಸವಾರಿವಿಮರ್ದನಃ |
ವಿಕರ್ಮಕರ್ಮಕರ್ಮಜ್ಞೋ ಅನನ್ಯಗಮಕೋಽಗಮಃ || ೧೩೬ ||
ಅಬದ್ಧಕರ್ಮಶೂನ್ಯಶ್ಚ ಕಾಮರಾಗಕುಲಕ್ಷಯಃ |
ಯೋಗಾಂಧಕಾರಮಥನಃ ಪದ್ಮಜನ್ಮಾದಿವಂದಿತಃ || ೧೩೭ ||
ಭಕ್ತಕಾಮೋಽಗ್ರಜಶ್ಚಕ್ರೀ ಭಾವನಿರ್ಭಾವಭಾವಕಃ |
ಭೇದಾಂತಕೋ ಮಹಾನಗ್ರ್ಯೋ ನಿಗೂಹೋ ಗೋಚರಾಂತಕಃ || ೧೩೮ ||
ಕಾಲಾಗ್ನಿಶಮನಃ ಶಂಖಚಕ್ರಪದ್ಮಗದಾಧರಃ |
ದೀಪ್ತೋ ದೀನಪತಿಃ ಶಾಸ್ತಾ ಸ್ವಚ್ಛಂದೋ ಮುಕ್ತಿದಾಯಕಃ || ೧೩೯ ||
ವ್ಯೋಮಧರ್ಮಾಂಬರೋ ಭೇತ್ತಾ ಭಸ್ಮಧಾರೀ ಧರಾಧರಃ |
ಧರ್ಮಗುಪ್ತೋಽನ್ವಯಾತ್ಮಾ ಚ ವ್ಯತಿರೇಕಾರ್ಥನಿರ್ಣಯಃ || ೧೪೦ ||
ಏಕಾನೇಕಗುಣಾಭಾಸಾಭಾಸನಿರ್ಭಾಸವರ್ಜಿತಃ |
ಭಾವಾಭಾವಸ್ವಭಾವಾತ್ಮಾ ಭಾವಾಭಾವವಿಭಾವವಿತ್ || ೧೪೧ ||
ಯೋಗಿಹೃದಯವಿಶ್ರಾಮೋಽನಂತವಿದ್ಯಾವಿವರ್ಧನಃ |
ವಿಘ್ನಾಂತಕಸ್ತ್ರಿಕಾಲಜ್ಞಸ್ತತ್ತ್ವಾತ್ಮಾ ಜ್ಞಾನಸಾಗರಃ || ೧೪೨ ||
ಇತೀದಂ ದತ್ತಸಾಹಸ್ರಂ ಸಾಯಂ ಪ್ರಾತಃ ಪಠೇತ್ತು ಯಃ |
ಸ ಇಹಾಮುತ್ರ ಲಭತೇ ನಿರ್ವಾಣಂ ಪರಮಂ ಸುಖಮ್ || ೧೪೩ ||
ಗುರುವಾರೇ ದತ್ತಭಕ್ತೋ ಭಕ್ತಿಭಾವಸಮನ್ವಿತಃ |
ಪಠೇತ್ ಸದೈವ ಯೋ ಹ್ಯೇತತ್ ಸ ಲಭೇಚ್ಚಿಂತಿತಂ ಧ್ರುವಮ್ || ೧೪೪ ||
ಇತಿ ಶ್ರೀಮದ್ದತ್ತಾತ್ರೇಯಪುರಾಣೇ ಶ್ರೀ ದತ್ತಾತ್ರೇಯ ಸಹಸ್ರನಾಮ ಸ್ತೋತ್ರಮ್ |
ಇನ್ನಷ್ಟು ಶ್ರೀ ದತ್ತತ್ರೇಯ ಸ್ತೋತ್ರಗಳು ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.