Read in తెలుగు / ಕನ್ನಡ / தமிழ் / देवनागरी / English (IAST)
ಶ್ರೀಭೈರವ ಉವಾಚ |
ಜಯ ದೇವಿ ಜಗದ್ಧಾತ್ರಿ ಜಯ ಪಾಪೌಘಹಾರಿಣಿ |
ಜಯ ದುಃಖಪ್ರಶಮನಿ ಶಾಂತಿರ್ಭವ ಮಮಾರ್ಚನೇ || ೧ ||
ಶ್ರೀಬಾಲೇ ಪರಮೇಶಾನಿ ಜಯ ಕಲ್ಪಾಂತಕಾರಿಣಿ |
ಜಯ ಸರ್ವವಿಪತ್ತಿಘ್ನೇ ಶಾಂತಿರ್ಭವ ಮಮಾರ್ಚನೇ || ೨ ||
ಜಯ ಬಿಂದುನಾದರೂಪೇ ಜಯ ಕಳ್ಯಾಣಕಾರಿಣಿ |
ಜಯ ಘೋರೇ ಚ ಶತ್ರುಘ್ನೇ ಶಾಂತಿರ್ಭವ ಮಮಾರ್ಚನೇ || ೩ ||
ಮುಂಡಮಾಲೇ ವಿಶಾಲಾಕ್ಷಿ ಸ್ವರ್ಣವರ್ಣೇ ಚತುರ್ಭುಜೇ |
ಮಹಾಪದ್ಮವನಾಂತಸ್ಥೇ ಶಾಂತಿರ್ಭವ ಮಮಾರ್ಚನೇ || ೪ ||
ಜಗದ್ಯೋನಿ ಮಹಾಯೋನಿ ನಿರ್ಣಯಾತೀತರೂಪಿಣಿ |
ಪರಾಪ್ರಾಸಾದಗೃಹಿಣಿ ಶಾಂತಿರ್ಭವ ಮಮಾರ್ಚನೇ || ೫ ||
ಇಂದುಚೂಡಯುತೇ ಚಾಕ್ಷಹಸ್ತೇ ಶ್ರೀಪರಮೇಶ್ವರಿ |
ರುದ್ರಸಂಸ್ಥೇ ಮಹಾಮಾಯೇ ಶಾಂತಿರ್ಭವ ಮಮಾರ್ಚನೇ || ೬ ||
ಸೂಕ್ಷ್ಮೇ ಸ್ಥೂಲೇ ವಿಶ್ವರೂಪೇ ಜಯ ಸಂಕಟತಾರಿಣಿ |
ಯಜ್ಞರೂಪೇ ಜಾಪ್ಯರೂಪೇ ಶಾಂತಿರ್ಭವ ಮಮಾರ್ಚನೇ || ೭ ||
ದೂತೀಪ್ರಿಯೇ ದ್ರವ್ಯಪ್ರಿಯೇ ಶಿವೇ ಪಂಚಾಂಕುಶಪ್ರಿಯೇ |
ಭಕ್ತಿಭಾವಪ್ರಿಯೇ ಭದ್ರೇ ಶಾಂತಿರ್ಭವ ಮಮಾರ್ಚನೇ || ೮ ||
ಭಾವಪ್ರಿಯೇ ಲಾಸಪ್ರಿಯೇ ಕಾರಣಾನಂದವಿಗ್ರಹೇ |
ಶ್ಮಶಾನಸ್ಯ ದೇವಮೂಲೇ ಶಾಂತಿರ್ಭವ ಮಮಾರ್ಚನೇ || ೯ ||
ಜ್ಞಾನಾಜ್ಞಾನಾತ್ಮಿಕೇ ಚಾದ್ಯೇ ಭೀತಿನಿರ್ಮೂಲನಕ್ಷಮೇ |
ವೀರವಂದ್ಯೇ ಸಿದ್ಧಿದಾತ್ರಿ ಶಾಂತಿರ್ಭವ ಮಮಾರ್ಚನೇ || ೧೦ ||
ಸ್ಮರಚಂದನಸುಪ್ರೀತೇ ಶೋಣಿತಾರ್ಣವಸಂಸ್ಥಿತೇ |
ಸರ್ವಸೌಖ್ಯಪ್ರದೇ ಶುದ್ಧೇ ಶಾಂತಿರ್ಭವ ಮಮಾರ್ಚನೇ || ೧೧ ||
ಕಾಪಾಲಿಕಿ ಕಳಾಧಾರೇ ಕೋಮಲಾಂಗಿ ಕುಲೇಶ್ವರಿ |
ಕುಲಮಾರ್ಗರತೇ ಸಿದ್ಧೇ ಶಾಂತಿರ್ಭವ ಮಮಾರ್ಚನೇ || ೧೨ ||
ಶಾಂತಿಸ್ತೋತ್ರಂ ಸುಖಕರಂ ಬಲ್ಯಂತೇ ಪಠತೇ ಶಿವೇ |
ದೇವ್ಯಾಃ ಶಾಂತಿರ್ಭವೇತ್ತಸ್ಯ ನ್ಯೂನಾಧಿಕ್ಯಾದಿಕರ್ಮಣಿ || ೧೩ ||
ಮಂತ್ರಸಿದ್ಧಿಕಾಮನಯಾ ದಶಾವೃತ್ತ್ಯಾ ಪಠೇದ್ಯದಿ |
ಮಂತ್ರಸಿದ್ಧಿರ್ಭವೇತ್ತಸ್ಯ ನಾತ್ರ ಕಾರ್ಯಾ ವಿಚಾರಣಾ || ೧೪ ||
ಚಂದ್ರಸೂರ್ಯೋಪರಾಗೇ ಚ ಯಃ ಪಠೇತ್ ಸ್ತೋತ್ರಮುತ್ತಮಮ್ |
ಬಾಲಾ ಸದ್ಮನಿ ಸೌಖ್ಯೇನ ಬಹುಕಾಲಂ ವಸೇತ್ತತಃ || ೧೫ ||
ಸರ್ವಭದ್ರಮವಾಪ್ನೋತಿ ಸರ್ವತ್ರ ವಿಜಯೀ ಭವೇತ್ |
ತೀರ್ಥಕೋಟಿಗುಣಂ ಚೈವ ದಾನಕೋಟಿಫಲಂ ತಥಾ |
ಲಭತೇ ನಾತ್ರ ಸಂದೇಹಃ ಸತ್ಯಂ ಸತ್ಯಂ ಮಯೋದಿತಮ್ || ೧೬ ||
ಇತಿ ಚಿಂತಾಮಣಿತಂತ್ರೇ ಶ್ರೀ ಬಾಲಾ ಶಾಂತಿ ಸ್ತೋತ್ರಮ್ |
ಇನ್ನಷ್ಟು ಶ್ರೀ ಬಾಲಾ ಸ್ತೋತ್ರಗಳು ನೋಡಿ.
గమనిక : రాబోయే మహాశివరాత్రి సందర్భంగా "శ్రీ శివ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
