Read in తెలుగు / ಕನ್ನಡ / தமிழ் / देवनागरी / English (IAST)
ಯಸ್ಮಾದ್ವಿಶ್ವಂ ಜಾತಮಿದಂ ಚಿತ್ರಮತರ್ಕ್ಯಂ
ಯಸ್ಮಿನ್ನಾನಂದಾತ್ಮನಿ ನಿತ್ಯಂ ರಮತೇ ವೈ |
ಯತ್ರಾಂತೇ ಸಂಯಾತಿ ಲಯಂ ಚೈತದಶೇಷಂ
ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೧ ||
ಯಸ್ಯಾಜ್ಞಾನಾಜ್ಜನ್ಮಜರಾರೋಗಕದಂಬಂ
ಜ್ಞಾತೇ ಯಸ್ಮಿನ್ನಶ್ಯತಿ ತತ್ಸರ್ವಮಿಹಾಶು |
ಗತ್ವಾ ಯತ್ರಾಯಾತಿ ಪುನರ್ನೋ ಭವಭೂಮಿಂ
ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೨ ||
ತಿಷ್ಠನ್ನಂತರ್ಯೋ ಯಮಯತ್ಯೇತದಜಸ್ರಂ
ಯಂ ಕಶ್ಚಿನ್ನೋ ವೇದ ಜನೋಽಪ್ಯಾತ್ಮನಿ ಸಂತಮ್ |
ಸರ್ವಂ ಯಸ್ಯೇದಂ ಚ ವಶೇ ತಿಷ್ಠತಿ ವಿಶ್ವಂ
ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೩ ||
ಧರ್ಮೋಽಧರ್ಮೇಣೇಹ ತಿರಸ್ಕಾರಮುಪೈತಿ
ಕಾಲೇ ಯಸ್ಮಿನ್ ಮತ್ಸ್ಯಮುಖೈಶ್ಚಾರುಚರಿತ್ರೈಃ |
ನಾನಾರೂಪೈಃ ಪಾತಿ ತದಾ ಯೋಽವನಿಬಿಂಬಂ
ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೪ ||
ಪ್ರಾಣಾಯಾಮೈರ್ಧ್ವಸ್ತಸಮಸ್ತೇಂದ್ರಿಯದೋಷಾ
ರುದ್ಧ್ವಾ ಚಿತ್ತಂ ಯಂ ಹೃದಿ ಪಶ್ಯಂತಿ ಸಮಾಧೌ |
ಜ್ಯೋತೀರೂಪಂ ಯೋಗಿಜನಾ ಮೋದನಿಮಗ್ನಾ-
-ಸ್ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೫ ||
ಭಾನುಶ್ಚಂದ್ರಶ್ಚೋಡುಗಣಶ್ಚೈವ ಹುತಾಶೋ
ಯಸ್ಮಿನ್ನೈವಾಭಾತಿ ತಡಿಚ್ಚಾಪಿ ಕದಾಪಿ |
ಯದ್ಭಾಸಾ ಚಾಭಾತಿ ಸಮಸ್ತಂ ಜಗದೇತತ್
ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೬ ||
ಸತ್ಯಂ ಜ್ಞಾನಂ ಮೋದಮವೋಚುರ್ನಿಗಮಾ ಯಂ
ಯೋ ಬ್ರಹ್ಮೇಂದ್ರಾದಿತ್ಯಗಿರೀಶಾರ್ಚಿತಪಾದಃ |
ಶೇತೇಽನಂತೋಽನಂತತನಾವಂಬುನಿಧೌ ಯ-
-ಸ್ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೭ ||
ಶೈವಾಃ ಪ್ರಾಹುರ್ಯಂ ಶಿವಮನ್ಯೇ ಗಣನಾಥಂ
ಶಕ್ತಿಂ ಚೈಕೇಽರ್ಕಂ ಚ ತಥಾನ್ಯೇ ಮತಿಭೇದಾತ್ |
ನಾನಾಕಾರೈರ್ಭಾತಿ ಯ ಏಕೋಽಖಿಲಶಕ್ತಿ-
-ಸ್ತಂ ಗೋಪಾಲಂ ಸಂತತಕಾಲಂ ಪ್ರತಿ ವಂದೇ || ೮ ||
ಶ್ರೀಮದ್ಗೋಪಾಲಾಷ್ಟಕಮೇತತ್ ಸಮಧೀತೇ
ಭಕ್ತ್ಯಾ ನಿತ್ಯಂ ಯೋ ಮನುಜೋ ವೈ ಸ್ಥಿರಚೇತಾಃ |
ಹಿತ್ವಾ ತೂರ್ಣಂ ಪಾಪಕಲಾಪಂ ಸ ಸಮೇತಿ
ಪುಣ್ಯಂ ವಿಷ್ಣೋರ್ಧಾಮ ಯತೋ ನೈವ ನಿಪಾತಃ || ೯ ||
ಇತಿ ಶ್ರೀಮತ್ಪರಮಹಂಸ ಸ್ವಾಮಿ ಬ್ರಹ್ಮಾನಂದ ವಿರಚಿತಂ ಶ್ರೀ ಗೋಪಾಲಾಷ್ಟಕಮ್ |
ಇನ್ನಷ್ಟು ಶ್ರೀ ಕೃಷ್ಣ ಸ್ತೋತ್ರಗಳು ನೋಡಿ.
గమనిక : రాబోయే మహాశివరాత్రి సందర్భంగా "శ్రీ శివ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.