Read in తెలుగు / ಕನ್ನಡ / தமிழ் / देवनागरी / English (IAST)
ದತ್ತಾತ್ರೇಯ ಮಹಾಮಾಯ ವೇದಗೇಯ ಹತಾಮಯ |
ಅನಸೂಯಾತ್ರಿತನಯ ಮಮಾಪಾಯಂ ನಿವಾರಯ || ೧ ||
ನಮೋ ನಮಸ್ತೇ ಜಗದೇಕನಾಥ
ನಮೋ ನಮಸ್ತೇ ಸುಪವಿತ್ರಗಾಥ |
ನಮೋ ನಮಸ್ತೇ ಜಗತಾಮಧೀಶ
ನಮೋ ನಮಸ್ತೇಽಸ್ತು ಪರಾವರೇಶ || ೨ ||
ತ್ವತ್ತೋಽಖಿಲಂ ಜಾತಮಿದಂ ಹಿ ವಿಶ್ವಂ
ತ್ವಮೇವ ಸರ್ವಂ ಪರಿಪಾಸಿ ವಿಶ್ವಮ್ |
ತ್ವಂ ಶಕ್ತಿತೋ ಧಾರಯಸೀಹ ವಿಶ್ವಂ
ತ್ವಮೇವ ಭೋ ಸಂಹರಸೀಶ ವಿಶ್ವಮ್ || ೩ ||
ತ್ವಂ ಜೀವರೂಪೇಣ ಹಿ ಸರ್ವ ವಿಶ್ವಂ
ಪ್ರವಿಶ್ಯ ಸಂಚೇಷ್ಟಯಸೇ ನ ವಿಶ್ವಮ್ |
ಸ್ವತಂತ್ರಮತ್ರಾಖಿಲಲೋಕಬಂಧೋ
ಕಾರುಣ್ಯಸಿಂಧೋ ಪರಬೋಧಸಿಂಧೋ || ೪ ||
ಯೋ ಬ್ರಹ್ಮರೂಪೇಣ ಸೃಜತ್ಯಶೇಷಂ
ಯೋ ವಿಷ್ಣುರೂಪೇಣ ಚ ಪಾತ್ಯಶೇಷಮ್ |
ಯೋ ರುದ್ರರೂಪೇಣ ಚ ಹಂತ್ಯಶೇಷಂ
ದುರ್ಗಾದಿರೂಪೈಃ ಶಮಯತ್ಯಶೇಷಮ್ || ೫ ||
ಯೋ ದೇವತಾರೂಪಧರೋಽತ್ತಿ ಭಾಗಂ
ಯೋ ವೇದರೂಪೋಽಪಿ ಬಿಭರ್ತಿ ಯಾಗಮ್ |
ಯೋಽಧೀಶರೂಪೇಣ ದದಾತಿ ಭೋಗಂ
ಯೋ ಮೌನಿರೂಪೇಣ ತನೋತಿ ಯೋಗಮ್ || ೬ ||
ಗಾಯಂತಿ ಯಂ ನಿತ್ಯಮಶೇಷವೇದಾಃ
ಯಜಂತಿ ನಿತ್ಯಂ ಮುನಯೋಽಸ್ತಭೇದಾಃ |
ಬ್ರಹ್ಮಾದಿದೇವಾ ಅಪಿ ಯಂ ನಮಂತಿ
ಸರ್ವೇಽಪಿ ತೇ ಲಬ್ಧಹಿತಾ ಭವಂತಿ || ೭ ||
ಯೋ ಧರ್ಮಸೇತೂನ್ ಸುದೃಢಾನ್ ಬಿಭರ್ತಿ
ನೈಕಾವತಾರಾನ್ ಸಮಯೇ ಬಿಭರ್ತಿ |
ಹತ್ವಾ ಖಲಾನ್ ಯೋಽಪಿ ಸತೋ ಬಿಭರ್ತಿ
ಯೋ ಭಕ್ತಕಾರ್ಯಂ ಸ್ವಯಮಾತನೋತಿ || ೮ ||
ಸ ತ್ವಂ ನೂನಂ ದೇವದೇವರ್ಷಿಗೇಯೋ
ದತ್ತಾತ್ರೇಯೋ ಭಾವಗಮ್ಯೋಽಸ್ಯಮೇಯಃ |
ಧ್ಯೇಯಃ ಸರ್ವೈರ್ಯೋಗಿಭಿಃ ಸರ್ವಮಾನ್ಯಃ
ಕೋಽನ್ಯಸ್ತ್ರಾತಾ ತಾರಕೋಽಧೀಶ ಧನ್ಯಃ || ೯ ||
ಸಜಲಜಲದನೀಲೋ ಯೋಽನಸೂಯಾತ್ರಿಬಾಲೋ
ವಿನಿಹತನಿಜಕಾಲೋ ಯೋಽಮಲೋ ದಿವ್ಯಲೀಲಃ |
ಅಮಲವಿಪುಲಕೀರ್ತಿಃ ಸಚ್ಚಿದಾನಂದಮೂರ್ತಿ-
-ರ್ಹೃತನಿಜಭಜಕಾರ್ತಿಃ ಪಾತ್ವಸೌ ದಿವ್ಯಮೂರ್ತಿಃ || ೧೦ ||
ಭಕ್ತಾನಾಂ ವರದಃ ಸತಾಂ ಚ ಪರದಃ ಪಾಪಾತ್ಮನಾಂ ದಂಡದ-
-ಸ್ತ್ರಸ್ತಾನಾಮಭಯಪ್ರದಃ ಕೃತಧಿಯಾಂ ಸನ್ನ್ಯಾಸಿನಾಂ ಮೋಕ್ಷದಃ |
ರುಗ್ಣಾನಾಮಗದಃ ಪರಾಕೃತಮದಃ ಸ್ವರ್ಗಾರ್ಥಿನಾಂ ಸ್ವರ್ಗದಃ
ಸ್ವಚ್ಛಂದಶ್ಚ ವದೋವದಃ ಪರಮುದೋ ದದ್ಯಾತ್ ಸ ನೋ ಬಂಧದಃ || ೧೧ ||
ನಿಜಕೃಪಾರ್ದ್ರಕಟಾಕ್ಷನಿರೀಕ್ಷಣಾ-
-ದ್ಧರತಿ ಯೋ ನಿಜದುಃಖಮಪಿ ಕ್ಷಣಾತ್ |
ಸ ವರದೋ ವರದೋಷಹರೋ ಹರೋ
ಜಯತಿ ಯೋ ಯತಿಯೋಗಿಗತಿಃ ಪರಾ || ೧೨ ||
ಅಜ್ಞಃ ಪ್ರಾಜ್ಞೋ ಭವತಿ ಭವತಿ ನ್ಯಸ್ತಧೀಶ್ಚೇತ್ ಕ್ಷಣೇನ
ಪ್ರಾಜ್ಞೋಽಪ್ಯಜ್ಞೋ ಭವತಿ ಭವತಿ ವ್ಯಸ್ತಧೀಶ್ಚೇತ್ ಕ್ಷಣೇನ |
ಮರ್ತ್ಯೋಽಮರ್ತ್ಯೋ ಭವತಿ ಭವತಃ ಸತ್ಕೃಪಾವೀಕ್ಷಣೇನ
ಧನ್ಯೋ ಮಾನ್ಯಸ್ತ್ರಿಜಗತಿ ಸಮಃ ಶಂಭುನಾ ತ್ರೀಕ್ಷಣೇನ || ೧೩ ||
ತ್ವತ್ತೋ ಭೀತೋ ದೇವ ವಾತೋಽತ್ರ ವಾತಿ
ತ್ವತ್ತೋ ಭೀತೋ ಭಾಸ್ಕರೋಽತ್ರಾಪ್ಯುದೇತಿ |
ತ್ವತ್ತೋ ಭೀತೋ ವರ್ಷತೀಂದ್ರೋದವಾಹ-
-ಸ್ತ್ವತ್ತೋ ಭೀತೋಽಗ್ನಿಸ್ತಥಾ ಹವ್ಯವಾಹಃ || ೧೪ ||
ಭೀತಸ್ತ್ವತ್ತೋ ಧಾವತೀಶಾಂತಕೋಽತ್ರ
ಭೀತಸ್ತ್ವತ್ತೋಽನ್ಯೇಽಪಿ ತಿಷ್ಠಂತಿ ಕೋಽತ್ರ |
ಮರ್ತ್ಯೋಽಮರ್ತ್ಯೋಽನ್ಯೇಽಪಿ ವಾ ಶಾಸನಂ ತೇ
ಪಾತಾಲೇ ವಾಽನ್ಯತ್ರ ವಾಽತಿಕ್ರಮಂತೇ || ೧೫ ||
ಅಗ್ನಿರೇಕಂ ತೃಣಂ ದಗ್ಧುಂ ನ ಶಶಾಕ ತ್ವಯಾರ್ಪಿತಮ್ |
ವಾತೋಽಪಿ ತೃಣಮಾದಾತುಂ ನ ಶಶಾಕ ತ್ವಯಾರ್ಪಿತಮ್ || ೧೬ ||
ವಿನಾ ತವಾಜ್ಞಾಂ ನ ಚ ವೃಕ್ಷಪರ್ಣಂ
ಚಲತ್ಯಹೋ ಕೋಽಪಿ ನಿಮೇಷಮೇಕಮ್ |
ಕರ್ತುಂ ಸಮರ್ಥೋ ಭುವನೇ ಕಿಮರ್ಥಂ
ಕರೋತ್ಯಹಂತಾಂ ಮನುಜೋಽವಶಸ್ತಾಮ್ || ೧೭ ||
ಪಾಷಾಣೇ ಕೃಷ್ಣವರ್ಣೇ ಕಥಮಪಿ ಪರಿತಶ್ಛಿದ್ರಹೀನೇ ನ ಜಾನೇ
ಮಂಡೂಕಂ ಜೀವಯಸ್ಯಪ್ರತಿಹತಮಹಿಮಾಚಿಂತ್ಯಸಚ್ಛಕ್ತಿಜಾನೇ |
ಕಾಷ್ಠಾಶ್ಮಾದ್ಯುತ್ಥವೃಕ್ಷಾಂಸ್ತ್ರ್ಯುದರಕುಹರಗಾನ್ ಜಾರವೀತಾಂಶ್ಚ ಗರ್ಭಾ-
-ನ್ನೂನಂ ವಿಶ್ವಂಭರೇಶಾವಸಿ ಕೃತಪಯಸಾ ದಂತಹೀನಾಂಸ್ತಥಾಽರ್ಭಾನ್ || ೧೮ ||
ಕರೋತಿ ಸರ್ವಸ್ಯ ಭವಾನಪೇಕ್ಷಾ
ಕಥಂ ಭವತ್ತೋಽಸ್ಯ ಭವೇದುಪೇಕ್ಷಾ |
ಅಥಾಪಿ ಮೂಢಃ ಪ್ರಕರೋತಿ ತುಚ್ಛಾಂ
ಸೇವಾಂ ತವೋಜ್ಝಿತ್ಯ ಚ ಜೀವಿತೇಚ್ಛಾಮ್ || ೧೯ ||
ದ್ವೇಷ್ಯಃ ಪ್ರಿಯೋ ವಾ ನ ಚ ತೇಽಸ್ತಿ ಕಶ್ಚಿತ್
ತ್ವಂ ವರ್ತಸೇ ಸರ್ವಸಮೋಽಥ ದುಶ್ಚಿತ್ |
ತ್ವಾಮನ್ಯಥಾ ಭಾವಯತಿ ಸ್ವದೋಷಾ-
-ನ್ನಿರ್ದೋಷತಾಯಾಂ ತವ ವೇದಘೋಷಃ || ೨೦ ||
ಗೃಹ್ಣಾಸಿ ನೋ ಕಸ್ಯಚಿದೀಶ ಪುಣ್ಯಂ
ಗೃಹ್ಣಾಸಿ ನೋ ಕಸ್ಯಚಿದಪ್ಯಪುಣ್ಯಮ್ |
ಕ್ರಿಯಾಫಲಂ ಮಾಽಸ್ಯ ಚ ಕರ್ತೃಭಾವಂ
ಸೃಜಸ್ಯವಿದ್ವೇತ್ತಿ ನ ಚ ಸ್ವಭಾವಮ್ || ೨೧ ||
ಮಾತುಃ ಶಿಶೋರ್ದುರ್ಗುಣನಾಶನಾಯ
ನ ತಾಡನೇ ನಿರ್ದಯತಾ ನ ದೋಷಃ |
ತಥಾ ನಿಯಂತುರ್ಗುಣದೋಷಯೋಸ್ತೇ
ನ ದುಷ್ಟಹತ್ಯಾಽದಯತಾ ನ ದೋಷಃ || ೨೨ ||
ದುರ್ಗಾದಿರೂಪೈರ್ಮಹಿಷಾಸುರಾದ್ಯಾನ್
ರಾಮಾದಿರೂಪೈರಪಿ ರಾವಣಾದ್ಯಾನ್ |
ಅನೇಕಹಿಂಸಾದಿಕಪಾಪಯುಕ್ತಾನ್
ಕ್ರೂರಾನ್ ಸದಾಚಾರಕಥಾವಿಯುಕ್ತಾನ್ || ೨೩ ||
ಸ್ವಪಾಪನಾಶಾರ್ಥಮನೇಕಕಲ್ಪಾ-
-ನ್ಯಾಸ್ಯಂತ ಏತಾನ್ನಿರಯಾನಕಲ್ಪಾನ್ |
ಸ್ವಕೀಯಮುಕ್ತೌ ನಿಜಶಸ್ತ್ರಕೃತ್ತಾನ್
ಕೃತ್ವಾ ಭವಾನ್ ದ್ಯಾಮನಯತ್ ಸುಪೂತಾನ್ || ೨೪ ||
ಯಾಽಪಾಯಯತ್ ಸ್ತನ್ಯಮಿಷಾದ್ವಿಷಂ ಸಾ
ಲೇಭೇ ಗತಿಂ ಮಾತ್ರುಚಿತಾಂ ದಯಾಲುಃ |
ತ್ವತ್ತೋಪರಃ ಕೋ ನಿಜಕಾರ್ಯಸಕ್ತ-
-ಸ್ತ್ವಮೇವ ನಿತ್ಯಂ ಹ್ಯಭಿಮಾನಮುಕ್ತಃ || ೨೫ ||
ನೋ ಕಾರ್ಯಂ ಕರಣಂ ಚ ತೇ ಪರಗತೇ ಲಿಂಗಂ ಕಲಾ ನಾಪಿ ತೇ
ವಿಜ್ಞಾತಾ ತ್ವದಮೇಯ ನಾನ್ಯ ಇತಿ ತೇ ತತ್ತ್ವಂ ಪ್ರಸಿದ್ಧಂ ಶ್ರುತೇಃ |
ನೇಶಸ್ತೇ ಜನಿತಾಧಿಕಃ ಸಮ ಉತಾನ್ಯಃ ಕಶ್ಚನಾಸ್ತಿ ಪ್ರಭು-
-ರ್ದತ್ತಾತ್ರೇಯ ಗುರೋ ನಿಜಾಮರತರೋ ತ್ವಂ ಸತ್ಯಮೇಕೋ ವಿಭುಃ || ೨೬ ||
ಭೋಗಾರ್ಥಂ ಸೃಜಸೀತಿ ಕೋಽಪಿ ವದತಿ ಕ್ರೀಡಾರ್ಥಮಿತ್ಥಂ ಪರೇ
ತೇ ಕೇಚ್ಛಾಸ್ತಿ ಸಮಾಪ್ತಕಾಮ ಮಹಿಮಾನಂ ನೋ ವಿದುರ್ಹೀತರೇ |
ಕೇಽಪೀದಂ ಸದಸದ್ವದಂತ್ವಿತರಥಾ ವಾಮಾಸ್ತು ಮೇತತ್ಕಥಾ-
-ಪಂಥಾ ಮೇ ಶ್ರುತಿದರ್ಶಿತಸ್ತವ ಪದಪ್ರಾಪ್ತ್ಯೈ ಸುಖೋಽನ್ಯೇ ವೃಥಾ || ೨೭ ||
ಸೋಽನನ್ಯಭಕ್ತೋಽಸ್ಯ ತು ಪರ್ಯುಪಾಸಕೋ
ನಿತ್ಯಾಭಿಯುಕ್ತೋ ಯಮುಪೈತ್ಯಭೇದತಃ |
ತತ್ಪ್ರೀತಯೇಽಸೌ ಭವತಾತ್ಸಮರ್ಥನಾ
ತಾರಾವಲೀ ತತ್ಪದಭಕ್ತಿಭಾವನಾ || ೨೮ ||
ಇತಿ ಶ್ರೀಮತ್ಪರಮಹಂಸ ಪರಿವ್ರಾಜಕಾಚಾರ್ಯ ಶ್ರೀವಾಸುದೇವಾನಂದಸರಸ್ವತೀ ವಿರಚಿತಂ ಶ್ರೀ ದತ್ತ ಪ್ರಾರ್ಥನಾ ತಾರಾವಲೀ |
ಇನ್ನಷ್ಟು ಶ್ರೀ ದತ್ತತ್ರೇಯ ಸ್ತೋತ್ರಗಳು ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
