Read in తెలుగు / ಕನ್ನಡ / தமிழ் / English (IAST)
<< ನಾರಾಯಣೀಯಂ ಚತುಃಪಞ್ಚಾಶತ್ತಮದಶಕಮ್
ಪಞ್ಚಪಞ್ಚಾಶತ್ತಮದಶಕಮ್ (೫೫) – ಕಾಲಿಯನರ್ತನಮ್
ಅಥ ವಾರಿಣಿ ಘೋರತರಂ ಫಣಿನಂ
ಪ್ರತಿವಾರಯಿತುಂ ಕೃತಧೀರ್ಭಗವನ್ |
ದ್ರುತಮಾರಿಥ ತೀರಗನೀಪತರುಂ
ವಿಷಮಾರುತಶೋಷಿತಪರ್ಣಚಯಮ್ || ೫೫-೧ ||
ಅಧಿರುಹ್ಯ ಪದಾಂಬುರುಹೇಣ ಚ ತಂ
ನವಪಲ್ಲವತುಲ್ಯಮನೋಜ್ಞರುಚಾ |
ಹ್ರದವಾರಿಣಿ ದೂರತರಂ ನ್ಯಪತಃ
ಪರಿಘೂರ್ಣಿತಘೋರತರಙ್ಗಗಣೇ || ೫೫-೨ ||
ಭುವನತ್ರಯಭಾರಭೃತೋ ಭವತೋ
ಗುರುಭಾರವಿಕಮ್ಪಿವಿಜೃಂಭಿಜಲಾ |
ಪರಿಮಜ್ಜಯತಿ ಸ್ಮ ಧನುಃಶತಕಂ
ತಟಿನೀ ಝಟಿತಿ ಸ್ಫುಟಘೋಷವತೀ || ೫೫-೩ ||
ಅಥ ದಿಕ್ಷು ವಿದಿಕ್ಷು ಪರಿಕ್ಷುಭಿತ-
ಭ್ರಮಿತೋದರವಾರಿನಿನಾದಭರೈಃ |
ಉದಕಾದುದಗಾದುರಗಾಧಿಪತಿ-
ಸ್ತ್ವದುಪಾನ್ತಮಶಾನ್ತರುಷಾನ್ಧಮನಾಃ || ೫೫-೪ ||
ಫಣಶೃಙ್ಗಸಹಸ್ರವಿನಿಸ್ಸೃಮರ-
ಜ್ವಲದಗ್ನಿಕಣೋಗ್ರವಿಷಾಂಬುಧರಮ್ |
ಪುರತಃ ಫಣಿನಂ ಸಮಲೋಕಯಥಾ
ಬಹುಶೃಙ್ಗಿಣಮಞ್ಜನಶೈಲಮಿವ || ೫೫-೫ ||
ಜ್ವಲದಕ್ಷಿಪರಿಕ್ಷರದುಗ್ರವಿಷ-
ಶ್ವಸನೋಷ್ಮಭರಃ ಸ ಮಹಾಭುಜಗಃ |
ಪರಿದಶ್ಯ ಭವನ್ತಮನನ್ತಬಲಂ
ಸಮವೇಷ್ಟಯದಸ್ಫುಟಚೇಷ್ಟಮಹೋ || ೫೫-೬ || [** ಪರಿವೇಷ್ಟಯ **]
ಅವಿಲೋಕ್ಯ ಭವನ್ತಮಥಾಕುಲಿತೇ
ತಟಗಾಮಿನಿ ಬಾಲಕಧೇನುಗಣೇ |
ವ್ರಜಗೇಹತಲೇಽಪ್ಯನಿಮಿತ್ತಶತಂ
ಸಮುದೀಕ್ಷ್ಯ ಗತಾ ಯಮುನಾಂ ಪಶುಪಾಃ || ೫೫-೭ ||
ಅಖಿಲೇಷು ವಿಭೋ ಭವದೀಯ ದಶಾ-
ಮವಲೋಕ್ಯ ಜಿಹಾಸುಷು ಜೀವಭರಮ್ |
ಫಣಿಬನ್ಧನಮಾಶು ವಿಮುಚ್ಯ ಜವಾ-
ದುದಗಮ್ಯತ ಹಾಸಜುಷಾ ಭವತಾ || ೫೫-೮ ||
ಅಧಿರುಹ್ಯ ತತಃ ಫಣಿರಾಜಫಣಾನ್
ನನೃತೇ ಭವತಾ ಮೃದುಪಾದರುಚಾ |
ಕಲಶಿಞ್ಚಿತನೂಪುರಮಞ್ಚುಮಿಲ-
ತ್ಕರಕಙ್ಕಣಸಙ್ಕುಲಸಙ್ಕ್ವಣಿತಮ್ || ೫೫-೯ ||
ಜಹೃಷುಃ ಪಶುಪಾಸ್ತುತುಷುರ್ಮುನಯೋ
ವವೃಷುಃ ಕುಸುಮಾನಿ ಸುರೇನ್ದ್ರಗಣಾಃ |
ತ್ವಯಿ ನೃತ್ಯತಿ ಮಾರುತಗೇಹಪತೇ
ಪರಿಪಾಹಿ ಸ ಮಾಂ ತ್ವಮದಾನ್ತಗದಾತ್ || ೫೫-೧೦ ||
ಇತಿ ಪಞ್ಚಪಞ್ಚಾತ್ತಮದಶಕಂ ಸಮಾಪ್ತಮ್ |
ನಾರಾಯಣೀಯಂ ಷಟ್ಪಞ್ಚಾಶತ್ತಮದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
