Narayaneeyam Dasakam 55 – నారాయణీయం పఞ్చపఞ్చాశత్తమదశకమ్

పఞ్చపఞ్చాశత్తమదశకమ్ (౫౫) – కాలియనర్తనమ్

అథ వారిణి ఘోరతరం ఫణినం
ప్రతివారయితుం కృతధీర్భగవన్ |
ద్రుతమారిథ తీరగనీపతరుం
విషమారుతశోషితపర్ణచయమ్ || ౫౫-౧ ||

అధిరుహ్య పదాంబురుహేణ చ తం
నవపల్లవతుల్యమనోజ్ఞరుచా |
హ్రదవారిణి దూరతరం న్యపతః
పరిఘూర్ణితఘోరతరఙ్గగణే || ౫౫-౨ ||

భువనత్రయభారభృతో భవతో
గురుభారవికమ్పివిజృంభిజలా |
పరిమజ్జయతి స్మ ధనుఃశతకం
తటినీ ఝటితి స్ఫుటఘోషవతీ || ౫౫-౩ ||

అథ దిక్షు విదిక్షు పరిక్షుభిత-
భ్రమితోదరవారినినాదభరైః |
ఉదకాదుదగాదురగాధిపతి-
స్త్వదుపాన్తమశాన్తరుషాన్ధమనాః || ౫౫-౪ ||

ఫణశృఙ్గసహస్రవినిస్సృమర-
జ్వలదగ్నికణోగ్రవిషాంబుధరమ్ |
పురతః ఫణినం సమలోకయథా
బహుశృఙ్గిణమఞ్జనశైలమివ || ౫౫-౫ ||

జ్వలదక్షిపరిక్షరదుగ్రవిష-
శ్వసనోష్మభరః స మహాభుజగః |
పరిదశ్య భవన్తమనన్తబలం
సమవేష్టయదస్ఫుటచేష్టమహో || ౫౫-౬ || [** పరివేష్టయ **]

అవిలోక్య భవన్తమథాకులితే
తటగామిని బాలకధేనుగణే |
వ్రజగేహతలేఽప్యనిమిత్తశతం
సముదీక్ష్య గతా యమునాం పశుపాః || ౫౫-౭ ||

అఖిలేషు విభో భవదీయ దశా-
మవలోక్య జిహాసుషు జీవభరమ్ |
ఫణిబన్ధనమాశు విముచ్య జవా-
దుదగమ్యత హాసజుషా భవతా || ౫౫-౮ ||

అధిరుహ్య తతః ఫణిరాజఫణాన్
ననృతే భవతా మృదుపాదరుచా |
కలశిఞ్చితనూపురమఞ్చుమిల-
త్కరకఙ్కణసఙ్కులసఙ్క్వణితమ్ || ౫౫-౯ ||

జహృషుః పశుపాస్తుతుషుర్మునయో
వవృషుః కుసుమాని సురేన్ద్రగణాః |
త్వయి నృత్యతి మారుతగేహపతే
పరిపాహి స మాం త్వమదాన్తగదాత్ || ౫౫-౧౦ ||

ఇతి పఞ్చపఞ్చాత్తమదశకం సమాప్తమ్ |


సంపూర్ణ శ్రీమన్నారాయణీయం (౧౦౦ దశకాలు) చూడండి.

Facebook Comments

You may also like...

స్పందించండి

మీ ఈమెయిలు చిరునామా ప్రచురించబడదు.

error: Not allowed
%d bloggers like this: