Read in తెలుగు / ಕನ್ನಡ / தமிழ் / देवनागरी / English (IAST)
<< ತೃತೀಯ ದಶಕಮ್ (೩) ಮಹಾಕಾಳ್ಯವತಾರಮ್
|| ಮಧುಕೈಟಭವಧಮ್ ||
ತ್ವಂ ತಾಮಸೀ ಸುಪ್ತರಮಾಧವಾಂಗಜಾ
ಶ್ಯಾಮಾ ರುಚಾ ಮೋಹನತಾಮ್ರಲೋಚನಾ |
ಏಕಾರ್ಣವೇ ಘೋರರಣೋತ್ಸುಕಾನ್ ಹರಿಂ
ದೈತ್ಯೌ ಚ ತೌ ಸ್ಮೇರಮುಖೀ ಸಮೈಕ್ಷಥಾಃ || ೪-೧ ||
ಪಶ್ಯತ್ಯಜೇ ಬಾಹುರಣಂ ಮುರಾರಿಣಾ
ಕೃತ್ವಾ ಮಧುಃ ಶ್ರಾಂತಿಮವಾಪ ಸತ್ವರಮ್ |
ಅಭ್ಯೇತ್ಯ ಯುದ್ಧಂ ಕುರುತೇ ಸ್ಮ ಕೈಟಭಃ
ಶ್ರಾಂತೇ ಚ ತಸ್ಮಿನ್ನಕೃತಾಹವಂ ಮಧುಃ || ೪-೨ ||
ಏವಂ ಮುಹುಃ ಸಂಗರವಿಶ್ರಮಾವುಭೌ
ಪರ್ಯಾಯತೋ ವರ್ಷಸಹಸ್ರಪಂಚಕಮ್ |
ಗ್ಲಾನಿಂ ವಿನಾ ಚಕ್ರತುರಚ್ಯುತಃ ಕ್ಲಮಾ-
-ದ್ವಿಶ್ರಾಂತಿಮಿಚ್ಛನ್ನಸುರೌ ಜಗಾದ ತೌ || ೪-೩ ||
ಶ್ರಾಂತೇನ ಭೀತೇನ ಚ ಬಾಲಕೇನ ಚ
ಪ್ರಭುಃ ಪುಮಾನ್ನೈವ ಕರೋತಿ ಸಂಯುಗಮ್ |
ಮಧ್ಯೇರಣಂ ದ್ವೌ ಕೃತವಿಶ್ರಮೌ ಯುವಾ-
-ಮೇಕಃ ಕರೋಮ್ಯೇವ ನಿರಂತರಾಹವಮ್ || ೪-೪ ||
ಜ್ಞಾತ್ವಾ ಹರಿಂ ಶ್ರಾಂತಮುಭೌ ವಿದೂರತಃ
ಸಂತಸ್ಥತುರ್ವಿಶ್ರಮಸೌಖ್ಯವಾಂಸ್ತತಃ |
ತ್ವಾಮೇವ ತುಷ್ಟಾವ ಕೃಪಾತರಂಗಿಣೀಂ
ಸರ್ವೇಶ್ವರೀಂ ದೈತ್ಯಜಯಾಯ ಮಾಧವಃ || ೪-೫ ||
ದೇವಿ ಪ್ರಸೀದೈಷ ರಣೇ ಜಿತೋಽಸ್ಮ್ಯಹಂ
ದೈತ್ಯದ್ವಯೇನಾಬ್ಜಭವಂ ಜಿಘಾಂಸುನಾ |
ಸರ್ವಂ ಕಟಾಕ್ಷೈಸ್ತವ ಸಾಧ್ಯಮತ್ರ ಮಾಂ
ರಕ್ಷೇತಿ ವಕ್ತಾರಮಭಾಷಥಾ ಹರಿಮ್ || ೪-೬ ||
ಯುದ್ಧಂ ಕುರು ತ್ವಂ ಜಹಿ ತೌ ಮಯಾ ಭೃಶಂ
ಸಮ್ಮೋಹಿತೌ ವಕ್ರದೃಶೇತ್ಯಯಂ ತ್ವಯಾ |
ಸಂಚೋದಿತೋ ಹೃಷ್ಟಮನಾ ಮಹಾರ್ಣವೇ
ತಸ್ಥೌ ರಣಾಯಾಯಯತುಶ್ಚ ದಾನವೌ || ೪-೭ ||
ಭೂಯೋಽಪಿ ಕುರ್ವನ್ ರಣಮಚ್ಯುತೋ ಹಸನ್
ಕಾಮಾತುರೌ ತೇ ಮುಖಪದ್ಮದರ್ಶನಾತ್ |
ತಾವಾಹ ತುಷ್ಟೋಽಸ್ಮ್ಯತುಲೌ ರಣೇ ಯುವಾಂ
ದದಾಮ್ಯಹಂ ವಾಂ ವರಮೇಷ ವಾಂಛಿತಮ್ || ೪-೮ ||
ತಾವೂಚತುರ್ವಿದ್ಧಿ ಹರೇ ನ ಯಾಚಕಾ-
-ವಾವಾಂ ದದಾವಸ್ತವ ವಾಂಛಿತಂ ವರಮ್ |
ನಾಸತ್ಯವಾಚೌ ಸ್ವ ಇತೀರಿತೋ ಹರಿ-
-ಸ್ತ್ವಾಂ ಸಂಸ್ಮರನ್ ಶತ್ರುಜಿಗೀಷಯಾಽಬ್ರವೀತ್ || ೪-೯ ||
ಮಹ್ಯಂ ವರಂ ಯಚ್ಛತಮದ್ಯ ಮೇ ಯತೋ
ವಧ್ಯೌ ಯುವಾಂ ಸ್ಯಾತಮಿತೀರಿತಾವುಭೌ |
ದೃಷ್ಟ್ವಾಽಪ್ಸು ಲೀನಂ ಸಕಲಂ ಸಮೂಚತು-
-ಸ್ತ್ವಂ ಸತ್ಯವಾಙ್ನೌ ಜಹಿ ನಿರ್ಜಲೇ ಸ್ಥಲೇ || ೪-೧೦ ||
ಅಸ್ತ್ವೇವಮಿತ್ಯಾದೃತವಾಙ್ಮುದಾ ಹರಿಃ
ಸ್ವೋರೌ ಪೃಥಾವುನ್ನಮಿತೇ ಜಲೋಪರಿ |
ಕೃತ್ವಾಽರಿಣಾ ತಚ್ಛಿರಸೀ ತದಾಽಚ್ಛಿನ-
-ತ್ಸ್ವಚ್ಛಂದಮೃತ್ಯೂ ತವ ಮಾಯಯಾ ಹತೌ || ೪-೧೧ ||
ದ್ವೇಷಶ್ಚ ರಾಗಶ್ಚ ಸದಾ ಮಮಾಂಬಿಕೇ
ದೈತ್ಯೌ ಹೃದಿ ಸ್ತೋಽತ್ರ ವಿವೇಕಮಾಧವಃ |
ಆಭ್ಯಾಂ ಕರೋತ್ಯೇವ ರಣಂ ಜಯತ್ವಯಂ
ತುಭ್ಯಂ ಮಹಾಕಾಳಿ ನಮಃ ಪ್ರಸೀದ ಮೇ || ೪-೧೨ ||
ಪಂಚಮ ದಶಕಮ್ (೫) – ಸುದ್ಯುಮ್ನಕಥಾ >>
ಸಂಪೂರ್ಣ ದೇವೀ ನಾರಾಯಣೀಯಂ ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
