Read in తెలుగు / ಕನ್ನಡ / தமிழ் / देवनागरी / English (IAST)
ವೇದಪಾದಸ್ತವಂ ವಕ್ಷ್ಯೇ ದೇವ್ಯಾಃ ಪ್ರಿಯಚಿಕೀರ್ಷಯಾ |
ಯಥಾಮತಿ ಮತಿಂ ದೇವಸ್ತನ್ನೋ ದಂತಿಃ ಪ್ರಚೋದಯಾತ್ || ೧ ||
ಅಕಿಂಚಿತ್ಕರಕರ್ಮಭ್ಯಃ ಪ್ರತ್ಯಾಹೃತ್ಯ ಕೃಪಾವಶಾತ್ |
ಸುಬ್ರಹ್ಮಣ್ಯಃ ಸ್ತುತಾವಸ್ಯಾಂ ತನ್ನಃ ಷಣ್ಮುಖಃ ಪ್ರಚೋದಯಾತ್ || ೨ ||
ಅಕಾರಾದಿಕ್ಷಕಾರಾಂತವರ್ಣಾವಯವಶಾಲಿನೀ |
ವೀಣಾಪುಸ್ತಕಹಸ್ತಾವ್ಯಾತ್ಪ್ರಣೋ ದೇವೀ ಸರಸ್ವತೀ || ೩ ||
ಯಾ ವರ್ಣಪದವಾಕ್ಯಾರ್ಥಗದ್ಯಪದ್ಯಸ್ವರೂಪಿಣೀ |
ವಾಚಿ ನರ್ತಯತು ಕ್ಷಿಪ್ರಂ ಮೇಧಾಂ ದೇವೀ ಸರಸ್ವತೀ || ೪ ||
ಉಪಾಸ್ಯಮಾನಾ ವಿಪ್ರೇಂದ್ರೈಃ ಸಂಧ್ಯಾಸು ಚ ತಿಸೃಷ್ವಪಿ |
ಸದ್ಯಃ ಪ್ರಸೀದ ಮೇ ಮಾತಃ ಸಂಧ್ಯಾವಿದ್ಯೇ ಸರಸ್ವತೀ || ೫ ||
ಮಂದಾ ನಿಂದಾಲೋಲುಪಾಹಂ ಸ್ವಭಾವಾ-
-ದೇತತ್ಸ್ತೋತ್ರಂ ಪೂರ್ಯತೇ ಕಿಂ ಮಯೇತಿ |
ಮಾ ತೇ ಭೀತಿರ್ಹೇ ಮತೇ ತ್ವಾದೃಶಾನಾ-
-ಮೇಷಾ ನೇತ್ರೀ ರಾಧಸಾ ಸೂನೃತಾನಾಮ್ || ೬ ||
ತರಂಗಭ್ರುಕುಟೀಕೋಟಿಭಂಗ್ಯಾ ತರ್ಜಯತೇ ಜರಾಮ್ |
ಸುಧಾಮಯಾಯ ಶುಭ್ರಾಯ ಸಿಂಧೂನಾಂ ಪತಯೇ ನಮಃ || ೭ ||
ತಸ್ಯ ಮಧ್ಯೇ ಮಣಿದ್ವೀಪಃ ಕಲ್ಪಕಾರಾಮಭೂಷಿತಃ |
ಅಸ್ತು ಮೇ ಲಲಿತಾವಾಸಃ ಸ್ವಸ್ತಿದಾ ಅಭಯಂಕರಃ || ೮ ||
ಕದಂಬಮಂಜರೀನಿರ್ಯದ್ವಾರುಣೀಪಾರಣೋನ್ಮದೈಃ |
ದ್ವಿರೇಫೈರ್ವರ್ಣನೀಯಾಯ ವನಾನಾಂ ಪತಯೇ ನಮಃ || ೯ ||
ತತ್ರ ವಪ್ರಾವಲೀ ಲೀಲಾ ಗಗನೋಲ್ಲಂಘಿಗೋಪುರಮ್ |
ಮಾತಃ ಕೌತೂಹಲಂ ದದ್ಯಾತ್ಸಗ್ಂಹಾರ್ಯಂ ನಗರಂ ತವ || ೧೦ ||
ಮಕರಂದಝರೀಮಜ್ಜನ್ಮಿಲಿಂದಕುಲಸಂಕುಲಾಮ್ |
ಮಹಾಪದ್ಮಾಟವೀಂ ವಂದೇ ಯಶಸಾ ಸಂಪರೀವೃತಾಮ್ || ೧೧ ||
ತತ್ರೈವ ಚಿಂತಾಮಣಿಧೋರಣಾರ್ಚಿಭಿ-
-ರ್ವಿನಿರ್ಮಿತಂ ರೋಪಿತರತ್ನಶೃಂಗಮ್ |
ಭಜೇ ಭವಾನೀಭವನಾವತಂಸ-
-ಮಾದಿತ್ಯವರ್ಣಂ ತಮಸಃ ಪರಸ್ತಾತ್ || ೧೨ ||
ಮುನಿಭಿಃ ಸ್ವಾತ್ಮಲಾಭಾಯ ಯಚ್ಚಕ್ರಂ ಹೃದಿ ಸೇವ್ಯತೇ |
ತತ್ರ ಪಶ್ಯಾಮಿ ಬುದ್ಧ್ಯಾ ತದಕ್ಷರೇ ಪರಮೇ ವ್ಯೋಮನ್ || ೧೩ ||
ಪಂಚಬ್ರಹ್ಮಮಯೋ ಮಂಚಸ್ತತ್ರ ಯೋ ಬಿಂದುಮಧ್ಯಗಃ |
ತವ ಕಾಮೇಶಿ ವಾಸೋಽಯಮಾಯುಷ್ಮಂತಂ ಕರೋತು ಮಾಮ್ || ೧೪ ||
ನಾನಾರತ್ನಗುಲುಚ್ಛಾಲೀಕಾಂತಿಕಿಮ್ಮೀಲಿತೋದರಮ್ |
ವಿಮೃಶಾಮಿ ವಿತಾನಂ ತೇಽತಿಶ್ಲಕ್ಷ್ಣಮತಿಲೋಮಶಮ್ || ೧೫ ||
ಪರ್ಯಂಕತಲ್ಪೋಪರಿ ದರ್ಶನೀಯಂ
ಸಬಾಣಚಾಪಾಂಕುಶಪಾಶಪಾಣಿಮ್ |
ಅಶೇಷಭೂಷಾರಮಣೀಯಮೀಡೇ
ತ್ರಿಲೋಚನಂ ನೀಲಕಂಠಂ ಪ್ರಶಾಂತಮ್ || ೧೬ ||
ಜಟಾರುಣಂ ಚಂದ್ರಕಲಾಲಲಾಮಂ
ಉದ್ವೇಲಲಾವಣ್ಯಕಲಾಭಿರಾಮಮ್ |
ಕಾಮೇಶ್ವರಂ ಕಾಮಶರಾಸನಾಂಕಂ
ಸಮಸ್ತಸಾಕ್ಷಿಂ ತಮಸಃ ಪರಸ್ತಾತ್ || ೧೭ ||
ತತ್ರ ಕಾಮೇಶವಾಮಾಂಕೇ ಖೇಲಂತೀಮಲಿಕುಂತಲಾಮ್ |
ಸಚ್ಚಿದಾನಂದಲಹರೀಂ ಮಹಾಲಕ್ಷ್ಮೀಮುಪಾಸ್ಮಹೇ || ೧೮ ||
ಚಾರುಗೋರೋಚನಾಪಂಕಜಂಬಾಲಿತಘನಸ್ತನೀಮ್ |
ನಮಾಮಿ ತ್ವಾಮಹಂ ಲೋಕಮಾತರಂ ಪದ್ಮಮಾಲಿನೀಮ್ || ೧೯ ||
ಶಿವೇ ನಮನ್ನಿರ್ಜರಕುಂಜರಾಸುರ-
-ಪ್ರತೋಲಿಕಾಮೌಲಿಮರೀಚಿವೀಚಿಭಿಃ |
ಇದಂ ತವ ಕ್ಷಾಲನಜಾತಸೌಭಗಂ
ಚರಣಂ ನೋ ಲೋಕೇ ಸುಧಿತಾಂ ದಧಾತು || ೨೦ ||
ಕಲ್ಪಸ್ಯಾದೌ ಕಾರಣೇಶಾನಪಿ ತ್ರೀ-
-ನ್ಸ್ರಷ್ಟುಂ ದೇವಿ ತ್ರೀನ್ಗುಣಾನಾದಧಾನಾಮ್ |
ಸೇವೇ ನಿತ್ಯಂ ಶ್ರೇಯಸೇ ಭೂಯಸೇ ತ್ವಾ-
-ಮಜಾಮೇಕಾಂ ಲೋಹಿತಶುಕ್ಲಕೃಷ್ಣಾಮ್ || ೨೧ ||
ಕೇಶೋದ್ಭೂತೈರದ್ಭುತಾಮೋದಪೂರೈ-
-ರಾಶಾಬೃಂದಂ ಸಾಂದ್ರಮಾಪೂರಯಂತೀಮ್ |
ತ್ವಾಮಾನಮ್ಯ ತ್ವತ್ಪ್ರಸಾದಾತ್ಸ್ವಯಂಭೂ-
-ರಸ್ಮಾನ್ಮಾಯೀ ಸೃಜತೇ ವಿಶ್ವಮೇತತ್ || ೨೨ ||
ಅರ್ಧೋನ್ಮೀಲದ್ಯೌವನೋದ್ದಾಮದರ್ಪಾಂ
ದಿವ್ಯಾಕಲ್ಪೈರರ್ಪಯಂತೀಂ ಮಯೂಖಾನ್ |
ದೇವಿ ಧ್ಯಾತ್ವಾ ತ್ವಾಂ ಪುರಾ ಕೈಟಭಾರಿ-
-ರ್ವಿಶ್ವಂ ಬಿಭರ್ತಿ ಭುವನಸ್ಯ ನಾಭಿಃ || ೨೩ ||
ಕಲ್ಹಾರಶ್ರೀಮಂಜರೀಪುಂಜರೀತಿಂ
ಧಿಕ್ಕುರ್ವಂತೀಮಂಬ ತೇ ಪಾಟಲಿಮ್ನಾ |
ಮೂರ್ತಿಂ ಧ್ಯಾತ್ವಾ ಶಾಶ್ವತೀಂ ಭೂತಿಮಾಯ-
-ನ್ನಿಂದ್ರೋ ರಾಜಾ ಜಗತೋ ಯ ಈಶೇ || ೨೪ ||
ದೇವತಾಂತರಮಂತ್ರೌಘಜಪಶ್ರೀಫಲಭೂತಯಾ |
ಜಾಪಕಸ್ತವ ದೇವ್ಯಂತೇ ವಿದ್ಯಯಾ ವಿಂದತೇಽಮೃತಮ್ || ೨೫ ||
ಪುಂಸ್ಕೋಕಿಲಕಲಕ್ವಾಣಕೋಮಲಾಲಾಪಶಾಲಿನಿ |
ಭದ್ರಾಣಿ ಕುರು ಮೇ ಮಾತರ್ದುರಿತಾನಿ ಪರಾಸುವ || ೨೬ ||
ಅಂತೇವಾಸಿನ್ನಸ್ತಿ ಚೇತ್ತೇ ಮುಮುಕ್ಷಾ
ವಕ್ಷ್ಯೇ ಯುಕ್ತಿಂ ಮುಕ್ತಸರ್ವೈಷಣಃ ಸನ್ |
ಸದ್ಭ್ಯಃ ಸಾಕ್ಷಾತ್ಸುಂದರೀಂ ಜ್ಞಪ್ತಿರೂಪಾಂ
ಶ್ರದ್ಧಾಭಕ್ತಿಧ್ಯಾನಯೋಗಾದವೇಹಿ || ೨೭ ||
ಷೋಢಾನ್ಯಾಸಾದಿದೇವೈಶ್ಚ ಸೇವಿತಾ ಚಕ್ರಮಧ್ಯಗಾ |
ಕಾಮೇಶಮಹಿಷೀ ಭೂಯಃ ಷೋಡಶೀ ಶರ್ಮ ಯಚ್ಛತು || ೨೮ ||
ಶಾಂತೋ ದಾಂತೋ ದೇಶಿಕೇಂದ್ರಂ ಪ್ರಣಮ್ಯ
ತಸ್ಯಾದೇಶಾತ್ತಾರಕಂ ಮಂತ್ರತತ್ತ್ವಮ್ |
ಜಾನೀತೇ ಚೇದಂಬ ಧನ್ಯಃ ಸಮಾನಂ
ನಾತಃ ಪರಂ ವೇದಿತವ್ಯಂ ಹಿ ಕಿಂಚಿತ್ || ೨೯ ||
ತ್ವಮೇವ ಕಾರಣಂ ಕಾರ್ಯಂ ಕ್ರಿಯಾ ಜ್ಞಾನಂ ತ್ವಮೇವ ಚ |
ತ್ವಾಮಂಬ ನ ವಿನಾ ಕಿಂಚಿತ್ತ್ವಯಿ ಸರ್ವಂ ಪ್ರತಿಷ್ಠಿತಮ್ || ೩೦ ||
ಪರಾಗಮದ್ರೀಂದ್ರಸುತೇ ತವಾಂಘ್ರಿ-
-ಸರೋಜಯೋರಂಬ ದಧಾಮಿ ಮೂರ್ಧ್ನಾ |
ಅಲಂಕೃತಂ ವೇದವಧೂಶಿರೋಭಿ-
-ರ್ಯತೋ ಜಾತೋ ಭುವನಾನಿ ವಿಶ್ವಾ || ೩೧ ||
ದುಷ್ಟಾನ್ದೈತ್ಯಾನ್ಹಂತುಕಾಮಾಂ ಮಹರ್ಷೀನ್
ಶಿಷ್ಟಾನನ್ಯಾನ್ಪಾತುಕಾಮಾಂ ಕರಾಬ್ಜೈಃ |
ಅಷ್ಟಾಭಿಸ್ತ್ವಾಂ ಸಾಯುಧೈರ್ಭಾಸಮಾನಾಂ
ದುರ್ಗಾಂ ದೇವೀಗ್ಂ ಶರಣಮಹಂ ಪ್ರಪದ್ಯೇ || ೩೨ ||
ದೇವಿ ಸರ್ವಾನವದ್ಯಾಂಗಿ ತ್ವಾಮನಾದೃತ್ಯ ಯೇ ಕ್ರಿಯಾಃ |
ಕುರ್ವಂತಿ ನಿಷ್ಫಲಾಸ್ತೇಷಾಮದುಗ್ಧಾ ಇವ ಧೇನವಃ || ೩೩ ||
ನಾಹಂ ಮನ್ಯೇ ದೈವತಂ ಮಾನ್ಯಮನ್ಯ-
-ತ್ತ್ವತ್ಪಾದಾಬ್ಜಾದಂಬಿಕೇ ಕುಂಭಜಾದ್ಯಾಃ |
ಯೇ ಧ್ಯಾತಾರೋ ಭಕ್ತಿಸಂಶುದ್ಧಚಿತ್ತಾಃ
ಪರಾಮೃತಾತ್ಪರಿಮುಚ್ಯಂತಿ ಸರ್ವೇ || ೩೪ ||
ಕುರ್ವಾಣೋಽಪಿ ದುರಾರಂಭಾಂಸ್ತವ ನಾಮಾನಿ ಶಾಂಭವಿ |
ಪ್ರಜಪನ್ನೇತಿ ಮಾಯಾಂತಮತಿ ಮೃತ್ಯುಂ ತರಾಮ್ಯಹಮ್ || ೩೫ ||
ಕಲ್ಯಾಣಿ ತ್ವಂ ಕುಂದಹಾಸಪ್ರಕಾಶೈ-
-ರಂತರ್ಧ್ವಾಂತಂ ನಾಶಯಂತೀ ಕ್ಷಣೇನ |
ಹಂತಾಸ್ಮಾಕಂ ಧ್ಯಾಯತಾಂ ತ್ವತ್ಪದಾಬ್ಜ-
-ಮುಚ್ಚತಿಷ್ಠ ಮಹತೇ ಸೌಭಗಾಯ || ೩೬ ||
ತಿತೀರ್ಷಯಾ ಭವಾಂಭೋಧೇರ್ಹಯಗ್ರೀವಾದಯಃ ಪುರಾ |
ಅಪ್ರಮತ್ತಾ ಭವತ್ಪೂಜಾಂ ಸುವಿದ್ವಾಂಸೋ ವಿತೇನಿರೇ || ೩೭ ||
ಮದ್ವಶ್ಯಾ ಯೇ ದುರಾಚಾರಾ ಯೇ ಚ ಸನ್ಮಾರ್ಗಗಾಮಿನಃ |
ಭವತ್ಯಾಃ ಕೃಪಯಾ ಸರ್ವೇ ಸುವರ್ಯಂತು ಯಜಮಾನಾಃ || ೩೮ ||
ಶ್ರೀಚಕ್ರಸ್ಥಾಂ ಶಾಶ್ವತೈಶ್ವರ್ಯದಾತ್ರೀಂ
ಪೌಂಡ್ರಂ ಚಾಪಂ ಪುಷ್ಪಬಾಣಾನ್ದಧಾನಾಮ್ |
ಬಂಧೂಕಾಭಾಂ ಭಾವಯಾಮಿ ತ್ರಿನೇತ್ರಾಂ
ತಾಮಗ್ನಿವರ್ಣಾಂ ತಪಸಾ ಜ್ವಲಂತೀಮ್ || ೩೯ ||
ಭವಾನಿ ತವ ಪಾದಾಬ್ಜನಿರ್ಣೇಜನಪವಿತ್ರತಾಃ |
ಭವಾಮಯಪ್ರಶಾಂತ್ಯೈ ತ್ವಾಮಪೋ ಯಾಚಾಮಿ ಭೇಷಜಮ್ || ೪೦ ||
ಚಿದಾನಂದಸುಧಾಂಭೋಧೇಸ್ತವಾನಂದಲವೋಽಸ್ತಿ ಯಃ |
ಕಾರಣೇಶೈಸ್ತ್ರಿಭಿಃ ಸಾಕಂ ತದ್ವಿಶ್ವಮುಪಜೀವತಿ || ೪೧ ||
ನೋ ವಾ ಯಾಗೈರ್ನೈವ ಪೂರ್ತಾದಿಕೃತ್ಯೈ-
-ರ್ನೋ ವಾ ಜಪ್ಯೈರ್ನೋ ಮಹದ್ಭಿಸ್ತಪೋಭಿಃ |
ನೋ ವಾ ಯೋಗೈಃ ಕ್ಲೇಶಕೃದ್ಭಿಃ ಸುಮೇಧಾ
ನಿಚಾಯ್ಯೇಮಾಂ ಶಾಂತಿಮತ್ಯಂತಮೇತಿ || ೪೨ ||
ಪ್ರಾತಃ ಪಾಹಿ ಮಹಾವಿದ್ಯೇ ಮಧ್ಯಾಹ್ನೇ ತು ಮೃಡಪ್ರಿಯೇ |
ಸಾಯಂ ಪಾಹಿ ಜಗದ್ವಂದ್ಯೇ ಪುನರ್ನಃ ಪಾಹಿ ವಿಶ್ವತಃ || ೪೩ ||
ಬಂಧೂಕಾಭೈರ್ಭಾನುಭಿರ್ಭಾಸಯಂತೀ
ವಿಶ್ವಂ ಶಶ್ವತ್ತುಂಗಪೀನಸ್ತನಾರ್ಧಾ |
ಲಾವಣ್ಯಾಬ್ಧೇಃ ಸುಂದರಿ ತ್ವಂ ಪ್ರಸಾದಾ-
-ದಾಯುಃ ಪ್ರಜಾಗ್ಂ ರಯಿಮಸ್ಮಾಸು ಧೇಹಿ || ೪೪ ||
ಕರ್ಣಾಕರ್ಣಯ ಮೇ ತತ್ತ್ವಂ ಯಾ ಚಿಚ್ಛಕ್ತಿರಿತೀರ್ಯತೇ |
ತ್ರಿರ್ವದಾಮಿ ಮುಮುಕ್ಷೂಣಾಂ ಸಾ ಕಾಷ್ಠಾ ಸಾ ಪರಾ ಗತಿಃ || ೪೫ ||
ವಾಗ್ದೇವೀತಿ ತ್ವಾಂ ವದಂತ್ಯಂಬ ಕೇಚಿ-
-ಲ್ಲಕ್ಷ್ಮೀರ್ಗೌರೀತ್ಯೇವಮನ್ಯೇಽಪ್ಯುಶಂತಿ |
ಶಶ್ವನ್ಮಾತಃ ಪ್ರತ್ಯಗದ್ವೈತರೂಪಾಂ
ಶಂಸಂತಿ ಕೇಚಿನ್ನಿವಿದೋ ಜನಾಃ || ೪೬ ||
ಲಲಿತೇತಿ ಸುಧಾಪೂರಮಾಧುರೀಚೋರಮಂಬಿಕೇ |
ತವ ನಾಮಾಸ್ತಿ ಯತ್ತೇನ ಜಿಹ್ವಾ ಮೇ ಮಧುಮತ್ತಮಾ || ೪೭ ||
ಯೇ ಸಂಪನ್ನಾಃ ಸಾಧನೈಸ್ತೈಶ್ಚತ್ತುರ್ಭಿಃ
ಶುಶ್ರೂಷಾಭಿರ್ದೇಶಿಕಂ ಪ್ರೀಣಯಂತಿ |
ಸಮ್ಯಗ್ವಿದ್ವಾನ್ ಶುದ್ಧಸತ್ತ್ವಾಂತರಾಣಾಂ
ತೇಷಾಮೇವೈತಾಂ ಬ್ರಹ್ಮವಿದ್ಯಾಂ ವದೇತ || ೪೮ ||
ಅಭಿಚಾರಾದಿಭಿಃ ಕೃತ್ಯಾಂ ಯಃ ಪ್ರೇರಯತಿ ಮಯ್ಯುಮೇ |
ತವ ಹುಂಕಾರಸಂತ್ರಸ್ತಾ ಪ್ರತ್ಯಕ್ಕರ್ತಾರಮೃಚ್ಛತು || ೪೯ ||
ಜಗತ್ಪವಿತ್ರಿ ಮಾಮಿಕಾಮಪಾಹರಾಶು ದುರ್ಜರಾಮ್ |
ಪ್ರಸೀದ ಮೇ ದಯಾಧುನೇ ಪ್ರಶಸ್ತಿಮಂಬ ನಃ ಸ್ಕೃಧಿ || ೫೦ ||
ಕದಂಬಾರುಣಮಂಬಾಯಾ ರೂಪಂ ಚಿಂತಯ ಚಿತ್ತ ಮೇ |
ಮುಂಚ ಪಾಪೀಯಸೀಂ ನಿಷ್ಠಾಂ ಮಾ ಗೃಧಃ ಕಸ್ಯ ಸ್ವಿದ್ಧನಮ್ || ೫೧ ||
ಭಂಡಭಂಡನಲೀಲಾಯಾಂ ರಕ್ತಚಂದನಪಂಕಿಲಃ |
ಅಂಕುಶಸ್ತವ ತಂ ಹನ್ಯಾದ್ಯಶ್ಚ ನೋ ದ್ವಿಷತೇ ಜನಃ || ೫೨ ||
ರೇ ರೇ ಚಿತ್ತ ತ್ವಂ ವೃಧಾ ಶೋಕಸಿಂಧೌ
ಮಜ್ಜಸ್ಯಂತರ್ವಚ್ಮ್ಯುಪಾಯಂ ವಿಮುಕ್ತ್ಯೈ |
ದೇವ್ಯಾಃ ಪಾದೌ ಪೂಜಯೈಕಾಕ್ಷರೇಣ
ತತ್ತೇ ಪದಂ ಸಂಗ್ರಹೇಣ ಬ್ರವೀಮ್ಯೋಮ್ || ೫೩ ||
ಚಂಚದ್ಬಾಲಾತಪಜ್ಯೋತ್ಸ್ನಾಕಲಾಮಂಡಲಶಾಲಿನೇ |
ಐಕ್ಷವಾಯ ನಮೋ ಮಾತರ್ಬಾಹುಭ್ಯಾಂ ತವ ಧನ್ವನೇ || ೫೪ ||
ತಾಮೇವಾದ್ಯಾಂ ಬ್ರಹ್ಮವಿದ್ಯಾಮುಪಾಸೇ
ಮೂರ್ತೈರ್ವೇದೈಃ ಸ್ತೂಯಮಾನಾಂ ಭವಾನೀಮ್ |
ಹಂತ ಸ್ವಾತ್ಮತ್ವೇನ ಯಾಂ ಮುಕ್ತಿಕಾಮೋ
ಮತ್ವಾ ಧೀರೋ ಹರ್ಷಶೋಕೌ ಜಹಾತಿ || ೫೫ ||
ಶರಣಂ ಕರವಾಣ್ಯಂಬ ಚರಣಂ ತವ ಸುಂದರಿ |
ಶಪೇ ತ್ವತ್ಪಾದುಕಾಭ್ಯಾಂ ಮೇ ನಾನ್ಯಃ ಪಂಥಾ ಅಯನಾಯ || ೫೬ ||
ರತ್ನಚ್ಛತ್ರೈಶ್ಚಾಮರೈರ್ದರ್ಪಣಾದ್ಯೈ-
-ಶ್ಚಕ್ರೇಶಾನೀಂ ಸರ್ವದೋಪಾಚರಂತ್ಯಃ |
ಯೋಗಿನ್ಯೋಽನ್ಯಾಃ ಶಕ್ತಯಶ್ಚಾಣಿಮಾದ್ಯಾ
ಯೂಯಂ ಪಾತಃ ಸ್ವಸ್ತಿಭಿಃ ಸದಾ ನಃ || ೫೭ ||
ದರಿದ್ರಂ ಮಾಂ ವಿಜಾನೀಹಿ ಸರ್ವಜ್ಞಾಸಿ ಯತಃ ಶಿವೇ |
ದೂರೀಕೃತ್ಯಾಶು ದುರಿತಮಥಾ ನೋ ವರ್ಧಯಾ ರಯಿಮ್ || ೫೮ ||
ಮಹೇಶ್ವರಿ ಮಹಾಮಂತ್ರಕೂಟತ್ರಯಕಲೇಬರೇ |
ಕಾದಿವಿದ್ಯಾಕ್ಷರಶ್ರೇಣಿಮುಶಂತಸ್ತ್ವಾ ಹವಾಮಹೇ || ೫೯ ||
ಮೂಲಾಧಾರಾದೂರ್ಧ್ವಮಂತಶ್ಚರಂತೀಂ
ಭಿತ್ತ್ವಾ ಗ್ರಂಥೀನ್ಮೂರ್ಧ್ನಿ ನಿರ್ಯತ್ಸುಧಾರ್ದ್ರಾಮ್ |
ಪಶ್ಯಂತಸ್ತ್ವಾಂ ಯೇ ಚ ತೃಪ್ತಿಂ ಲಭಂತೇ
ತೇಷಾಂ ಶಾಂತಿಃ ಶಾಶ್ವತೀ ನೇತರೇಷಾಮ್ || ೬೦ ||
ಮಹ್ಯಂ ದ್ರುಹ್ಯಂತಿ ಯೇ ಮಾತಸ್ತ್ವದ್ಧ್ಯಾನಾಸಕ್ತಚೇತಸೇ |
ತಾನಂಬ ಸಾಯಕೈರೇಭಿರವ ಬ್ರಹ್ಮದ್ವಿಷೋ ಜಹಿ || ೬೧ ||
ತ್ವದ್ಭಕ್ತಾನಾಮಂಬ ಶಾಂತೈಷಣಾನಾಂ
ಬ್ರಹ್ಮಿಷ್ಠಾನಾಂ ದೃಷ್ಟಿಪಾತೇನ ಪೂತಃ |
ಪಾಪೀಯಾನಪ್ಯಾವೃತಃ ಸ್ವರ್ವಧೂಭಿಃ
ಶೋಕಾತಿಗೋ ಮೋದತೇ ಸ್ವರ್ಗಲೋಕೇ || ೬೨ ||
ಸಂತು ವಿದ್ಯಾ ಜಗತ್ಯಸ್ಮಿನ್ಸಂಸಾರಭ್ರಮಹೇತವಃ |
ಭಜೇಽಹಂ ತ್ವಾಂ ಯಯಾ ವಿದ್ವಾನ್ವಿದ್ಯಯಾಮೃತಮಶ್ನುತೇ || ೬೩ ||
ವಿದ್ವನ್ಮುಖ್ಯೈರ್ವಿದ್ರುಮಾಭಂ ವಿಶಾಲ-
-ಶ್ರೋಣೀಶಿಂಜನ್ಮೇಖಲಾಕಿಂಕಿಣೀಕಮ್ |
ಚಂದ್ರೋತ್ತಂಸಂ ಚಿನ್ಮಯಂ ವಸ್ತು ಕಿಂಚಿ-
-ದ್ವಿದ್ಧಿ ತ್ವಮೇತನ್ನಿಹಿತಂ ಗುಹಾಯಾಮ್ || ೬೪ ||
ನ ವಿಸ್ಮರಾಮಿ ಚಿನ್ಮೂರ್ತಿಮಿಕ್ಷುಕೋದಂಡಶಾಲಿನೀಮ್ |
ಮುನಯಃ ಸನಕಪ್ರೇಷ್ಠಾಸ್ತಾಮಾಹುಃ ಪರಮಾಂ ಗತಿಮ್ || ೬೫ ||
ಚಕ್ಷುಃಪ್ರೇಂಖತ್ಪ್ರೇಮಕಾರುಣ್ಯಧಾರಾಂ
ಹಂಸಜ್ಯೋತ್ಸ್ನಾಪೂರಹೃಷ್ಯಚ್ಚಕೋರಾಮ್ |
ಯಾಮಾಶ್ಲಿಷ್ಯನ್ಮೋದತೇ ದೇವದೇವಃ
ಸಾ ನೋ ದೇವೀ ಸುಹವಾ ಶರ್ಮ ಯಚ್ಛತು || ೬೬ ||
ಮುಂಚ ವಂಚಕತಾಂ ಚಿತ್ತ ಪಾಮರಂ ಚಾಪಿ ದೈವತಮ್ |
ಗೃಹಾಣ ಪದಮಂಬಾಯಾ ಏತದಾಲಂಬನಂ ಪರಮ್ || ೬೭ ||
ಕಾ ಮೇ ಭೀತಿಃ ಕಾ ಕ್ಷತಿಃ ಕಿಂ ದುರಾಪಂ
ಕಾಮೇಶಾಂಕೋತ್ತುಂಗಪರ್ಯಂಕಸಂಸ್ಥಾಮ್ |
ತತ್ತ್ವಾತೀತಾಮಚ್ಯುತಾನಂದದಾತ್ರೀಂ
ದೇವೀಮಹಂ ನಿರೃತಿಂ ವಂದಮಾನಃ || ೬೮ ||
ಚಿಂತಾಮಣಿಮಯೋತ್ತಂಸಕಾಂತಿಕಂಚುಕಿತಾನನೇ |
ಲಲಿತೇ ತ್ವಾಂ ಸಕೃನ್ನತ್ವಾ ನ ಬಿಭೇತಿ ಕುತಶ್ಚನ || ೬೯ ||
ತಾರುಣ್ಯೋತ್ತುಂಗಿತಕುಚೇ ಲಾವಣ್ಯೋಲ್ಲಾಸಿತೇಕ್ಷಣೇ |
ತವಾಜ್ಞಯೈವ ಕಾಮಾದ್ಯಾ ಮಾಸ್ಮಾನ್ಪ್ರಾಪನ್ನರಾತಯಃ || ೭೦ ||
ಆಕರ್ಣಾಕೃಷ್ಟಕಾಮಾಸಸ್ತ್ರಸಂಜಾತಂ ತಾಪಮಂಬ ಮೇ |
ಆಚಾಮತು ಕಟಾಕ್ಷಸ್ತೇ ಪರ್ಜನ್ಯೋ ವೃಷ್ಟಿಮಾನಿವ || ೭೧ ||
ಕುರ್ವೇ ಗರ್ವೇಣಾಪಚಾರಾನಪಾರಾ-
-ನದ್ಯಪ್ಯಂಬ ತ್ವತ್ಪದಾಬ್ಜಂ ತಥಾಪಿ |
ಮನ್ಯೇ ಧನ್ಯೇ ದೇವಿ ವಿದ್ಯಾವಲಂಬಂ
ಮಾತೇವ ಪುತ್ರಂ ಬಿಭೃತಾಸ್ವೇನಮ್ || ೭೨ ||
ಯಥೋಪಾಸ್ತಿಕ್ಷತಿರ್ನ ಸ್ಯಾತ್ತವ ಚಕ್ರಸ್ಯ ಸುಂದರಿ |
ಕೃಪಯಾ ಕುರು ಕಲ್ಯಾಣಿ ತಥಾ ಮೇ ಸ್ವಸ್ತಿರಾಯುಷಿ || ೭೩ ||
ಚಕ್ರಂ ಸೇವೇ ತಾರಕಂ ಸರ್ವಸಿಧ್ಯೈ
ಶ್ರೀಮನ್ಮಾತಃ ಸಿದ್ಧಯಶ್ಚಾಣಿಮಾದ್ಯಾಃ |
ನಿತ್ಯಾ ಮುದ್ರಾ ಶಕ್ತಯಶ್ಚಾಂಗದೇವ್ಯೋ
ಯಸ್ಮಿನ್ದೇವಾ ಅಧಿ ವಿಶ್ವೇ ನಿಷೇದುಃ || ೭೪ ||
ಸುಕುಮಾರೇ ಸುಖಾಕಾರೇ ಸುನೇತ್ರೇ ಸೂಕ್ಷ್ಮಮಧ್ಯಮೇ |
ಸುಪ್ರಸನ್ನಾ ಭವ ಶಿವೇ ಸುಮೃಡೀಕಾ ಸರಸ್ವತೀ || ೭೫ ||
ವಿದ್ಯುದ್ವಲ್ಲೀಕಂದಲೀಂ ಕಲ್ಪಯಂತೀಂ
ಮೂರ್ತಿಂ ಸ್ಫೂರ್ತ್ಯಾ ಪಂಕಜಂ ಧಾರಯಂತೀಮ್ |
ಧ್ಯಾಯನ್ಹಿ ತ್ವಾಂ ಜಾಯತೇ ಸಾರ್ವಭೌಮೋ
ವಿಶ್ವಾ ಆಶಾಃ ಪೃತನಾಃ ಸಂಜಯಂಜಯನ್ || ೭೬ ||
ಅವಿಜ್ಞಾಯ ಪರಾಂ ಶಕ್ತಿಮಾತ್ಮಭೂತಾಂ ಮಹೇಶ್ವರೀಮ್ |
ಅಹೋ ಪತಂತಿ ನಿರಯೇಷ್ವೇಕೇ ಚಾತ್ಮಹನೋ ಜನಾಃ || ೭೭ ||
ಸಿಂದೂರಾಭೈಃ ಸುಂದರೈರಂಶುಬೃಂದೈ-
-ರ್ಲಾಕ್ಷಾಲಕ್ಷ್ಮ್ಯಾಂ ಮಜ್ಜಯಂತೀಂ ಜಗಂತಿ |
ಹೇರಂಬಾಂಬ ತ್ವಾಂ ಹೃದಾ ಲಂಬತೇ ಯ-
-ಸ್ತಸ್ಮೈ ವಿಶಃ ಸ್ವಯಮೇವಾನಮಂತೇ || ೭೮ ||
ತವ ತತ್ತ್ವಂ ವಿಮೃಶತಾಂ ಪ್ರತ್ಯಗದ್ವೈತಲಕ್ಷಣಮ್ |
ಚಿದಾನಂದಘನಾದನ್ಯನ್ನೇಹ ನಾನಾಸ್ತಿ ಕಿಂಚನ || ೭೯ ||
ಕಂಠಾತ್ಕುಂಡಲಿನೀಂ ನೀತ್ವಾ ಸಹಸ್ರಾರಂ ಶಿವೇ ತವ |
ನ ಪುನರ್ಜಾಯತೇ ಗರ್ಭೇ ಸುಮೇಧಾ ಅಮೃತೋಕ್ಷಿತಃ || ೮೦ ||
ತ್ವತ್ಪಾದುಕಾನುಸಂಧಾನಪ್ರಾಪ್ತಸರ್ವಾತ್ಮತಾದೃಶಿ |
ಪೂರ್ಣಾಹಂಕೃತಿಮತ್ಯಸ್ಮಿನ್ನ ಕರ್ಮ ಲಿಪ್ಯತೇ ನರೇ || ೮೧ ||
ತವಾನುಗ್ರಹನಿರ್ಭಿನ್ನಹೃದಯಗ್ರಂಥಿರದ್ರಿಜೇ |
ಸ್ವಾತ್ಮತ್ವೇನ ಜಗನ್ಮತ್ವಾ ತತೋ ನ ವಿಜುಗುಪ್ಸತೇ || ೮೨ ||
ಕದಾ ವಸುದಲೋಪೇತೇ ತ್ರಿಕೋಣನವಕಾನ್ವಿತೇ |
ಆವಾಹಯಾಮಿ ಚಕ್ರೇ ತ್ವಾಂ ಸೂರ್ಯಾಭಾಂ ಶ್ರಿಯಮೈಶ್ವರೀಮ್ || ೮೩ ||
ಹ್ರೀಮಿತ್ಯೇಕಂ ತಾವಕಂ ವಾಚಕಾರ್ಣಂ
ಯಜ್ಜಿಹ್ವಾಗ್ರೇ ದೇವಿ ಜಾಗರ್ತಿ ಕಿಂಚಿತ್ |
ಕೋ ವಾಯಂ ಸ್ಯಾತ್ಕಾಮಕಾಮಸ್ತ್ರಿಲೋಕ್ಯಾಂ
ಸರ್ವೇಽಸ್ಮೈ ದೇವಾಃ ಬಲಿಮಾವಹಂತಿ || ೮೪ ||
ನಾಕಸ್ತ್ರೀಣಾಂ ಕಿನ್ನರೀಣಾಂ ನೃಪಾಣಾ-
-ಮಪ್ಯಾಕರ್ಷೀ ಚೇತಸಾ ಚಿಂತನೀಯಮ್ |
ತ್ವತ್ಪಾಣಿಸ್ಥಂ ಕುಂಕುಮಾಭಂ ಶಿವೇ ಯಂ
ದ್ವಿಷ್ಮಸ್ತಸ್ಮಿನ್ಪ್ರತಿ ಮುಂಚಾಮಿ ಪಾಶಮ್ || ೮೫ ||
ನೂನಂ ಸಿಂಹಾಸನೇಶ್ವರ್ಯಾಸ್ತವಾಜ್ಞಾಂ ಶಿರಸಾ ವಹನ್ |
ಭಯೇನ ಪವಮಾನೋಽಯಂ ಸರ್ವಾ ದಿಶೋಽನುವಿಧಾವತಿ || ೮೬ ||
ತ್ರಿಕಲಾಢ್ಯಾಂ ತ್ರಿಹೃಲ್ಲೇಖಾಂ ದ್ವಿಹಂಸಸ್ವರಭೂಷಿತಾಮ್ |
ಯೋ ಜಪತ್ಯಂಬ ತೇ ವಿದ್ಯಾಂ ಸೋಽಕ್ಷರಃ ಪರಮಃ ಸ್ವರಾಟ್ || ೮೭ ||
ದಾರಿದ್ರ್ಯಾಬ್ಧೌ ದೇವಿ ಮಗ್ನೋಽಪಿ ಶಶ್ವ-
-ದ್ವಾಚಾ ಯಾಚೇ ನಾಹಮಂಬ ತ್ವದನ್ಯಮ್ |
ತಸ್ಮಾದಸ್ಮದ್ವಾಂಛಿತಂ ಪೂರಯೈತ-
-ದುಷಾ ಸಾ ನಕ್ತಾ ಸುದುಘೇವ ಧೇನುಃ || ೮೮ ||
ಯೋ ವಾ ಯದ್ಯತ್ಕಾಮನಾಕೃಷ್ಟಚಿತ್ತಃ
ಸ್ತುತ್ವೋಪಾಸ್ತೇ ದೇವಿ ತೇ ಚಕ್ರವಿದ್ಯಾಮ್ |
ಕಲ್ಯಾಣಾನಾಮಾಲಯಃ ಕಾಲಯೋಗಾ-
-ತ್ತಂ ತಂ ಲೋಕಂ ಜಯತೇ ತಾಂಶ್ಚ ಕಾಮಾನ್ || ೮೯ ||
ಸಾಧಕಃ ಸತತಂ ಕುರ್ಯಾದೈಕ್ಯಂ ಶ್ರೀಚಕ್ರದೇಹಯೋಃ |
ತಥಾ ದೇವ್ಯಾತ್ಮನೋರೈಕ್ಯಮೇತಾವದನುಶಾಸನಮ್ || ೯೦ ||
ಹಸ್ತಾಂಭೋಜಪ್ರೋಲ್ಲಸಚ್ಚಾಮರಾಭ್ಯಾಂ
ಶ್ರೀವಾಣೀಭ್ಯಾಂ ಪಾರ್ಶ್ವಯೋರ್ವೀಜ್ಯಮಾನಾಮ್ |
ಶ್ರೀಸಂಮ್ರಾಜ್ಞಿ ತ್ವಾಂ ಸದಾಲೋಕಯೇಯಂ
ಸದಾ ಸದ್ಭಿಃ ಸೇವ್ಯಮಾನಾಂ ನಿಗೂಢಾಮ್ || ೯೧ ||
ಇಷ್ಟಾನಿಷ್ಟಪ್ರಾಪ್ತಿವಿಚ್ಛಿತ್ತಿಹೇತುಃ
ಸ್ತೋತುಂ ವಾಚಾಂ ಕ್ಲುಪ್ತಿರಿತ್ಯೇವ ಮನ್ಯೇ |
ತ್ವದ್ರೂಪಂ ಹಿ ಸ್ವಾನುಭೂತ್ಯೈಕವೇದ್ಯಂ
ನ ಚಕ್ಷುಷಾ ಗೃಹ್ಯತೇ ನಾಪಿ ವಾಚಾ || ೯೨ ||
ಹರಸ್ವರೈಶ್ಚತುರ್ವರ್ಗಪ್ರದಂ ಮಂತ್ರಂ ಸಬಿಂದುಕಮ್ |
ದೇವ್ಯಾ ಜಪತ ವಿಪ್ರೇಂದ್ರಾ ಅನ್ಯಾ ವಾಚೋ ವಿಮುಂಚಥ || ೯೩ ||
ಯಸ್ತೇ ರಾಕಾಚಂದ್ರಬಿಂಬಾಸನಸ್ಥಾಂ
ಪೀಯೂಷಾಬ್ಧಿಂ ಕಲ್ಪಯಂತೀಂ ಮಯೂಖೈಃ |
ಮೂರ್ತಿಂ ಭಕ್ತ್ಯಾ ಧ್ಯಾಯತೇ ಹೃತ್ಸರೋಜೇ
ನ ತಸ್ಯ ರೋಗೋ ನ ಜರಾ ನ ಮೃತ್ಯುಃ || ೯೪ ||
ತುಭ್ಯಂ ಮಾತರ್ಯೋಽಂಜಲಿಂ ಮೂರ್ಧ್ನಿ ಧತ್ತೇ
ಮೌಲಿಶ್ರೇಣ್ಯಾ ಭೂಭುಜಸ್ತಂ ನಮಂತಿ |
ಯಃ ಸ್ತೌತಿ ತ್ವಾಮಂಬ ಚಿದ್ವಲ್ಲಿವಾಚಾ
ತಂ ಧೀರಾಸಃ ಕವಯ ಉನ್ನಯಂತಿ || ೯೫ ||
ವೈರಿಂಚೋಘೈರ್ವಿಷ್ಣುರುದ್ರೇಂದ್ರಬೃಂದೈ-
-ರ್ದುರ್ಗಾಕಾಲೀಭೈರವೀಶಕ್ತಿಸಂಘೈಃ |
ಯಂತ್ರೇಶಿ ತ್ವಂ ವರ್ತಸೇ ಸ್ತೂಯಮಾನಾ
ನ ತತ್ರ ಸೂರ್ಯೋ ಭಾತಿ ನ ಚಂದ್ರತಾರಕಮ್ || ೯೬ ||
ಭೂತ್ಯೈ ಭವಾನಿ ತ್ವಾಂ ವಂದೇ ಸುರಾಃ ಶತಮಖಾದಯಃ |
ತ್ವಾಮಾನಮ್ಯ ಸಮೃದ್ಧಾಃ ಸ್ಯುರಾಯೋ ಧಾಮಾನಿ ದಿವ್ಯಾನಿ || ೯೭ ||
ಪುಷ್ಪವತ್ಪುಲ್ಲತಾಟಂಕಾಂ ಪ್ರಾತರಾದಿತ್ಯಪಾಟಲಾಮ್ |
ಯಸ್ತ್ವಾಮಂತಃ ಸ್ಮರತ್ಯಂಬ ತಸ್ಯ ದೇವಾ ಅಸನ್ವಶೇ || ೯೮ ||
ವಶ್ಯೇ ವಿದ್ರುಮಸಂಕಾಶಾಂ ವಿದ್ಯಾಯಾಂ ವಿಶದಪ್ರಭಾಮ್ |
ತ್ವಾಮಂಬ ಭಾವಯೇದ್ಭೂತ್ಯೈ ಸುವರ್ಣಾಂ ಹೇಮಮಾಲಿನೀಮ್ || ೯೯ ||
ವಾಮಾಂಕಸ್ಥಾಮೀಶಿತುರ್ದೀಪ್ಯಮಾನಾಂ
ಭೂಷಾಬೃಂದೈರಿಂದುರೇಖಾವತಂಸಾಮ್ |
ಯಸ್ತ್ವಾಂ ಪಶ್ಯನ್ ಸಂತತಂ ನೈವ ತೃಪ್ತಃ
ತಸ್ಮೈ ಚ ದೇವಿ ವಷಡಸ್ತು ತುಭ್ಯಮ್ || ೧೦೦ ||
ನವನೀಪವನೀವಾಸಲಾಲಸೋತ್ತರಮಾನಸೇ |
ಶೃಂಗಾರದೇವತೇ ಮಾತಃ ಶ್ರಿಯಂ ವಾಸಯ ಮೇ ಕುಲೇ || ೧೦೧ ||
ಭಕ್ತ್ಯಾಭಕ್ತ್ಯಾ ವಾಪಿ ಪದ್ಯಾವಸಾನ-
-ಶ್ರುತ್ಯಾ ಸ್ತುತ್ಯಾ ಚೈತಯಾ ಸ್ತೌತಿ ಯಸ್ತ್ವಾಮ್ |
ತಸ್ಯ ಕ್ಷಿಪ್ರಂ ತ್ವತ್ಪ್ರಸಾದೇನ ಮಾತಃ
ಸತ್ಯಾಃ ಸಂತು ಯಜಮಾನಸ್ಯ ಕಾಮಾಃ || ೧೦೨ ||
ಬಾಲಿಶೇನ ಮಯಾ ಪ್ರೋಕ್ತಮಪಿ ವಾತ್ಸಲ್ಯಶಾಲಿನೋಃ |
ಆನಂದಮಾದಿದಂಪತ್ಯೋರಿಮಾ ವರ್ಧಂತು ವಾಂಗಿರಃ || ೧೦೩ ||
ಮಾಧುರೀಸೌರಭಾವಾಸಚಾಪಸಾಯಕಧಾರಿಣೀಮ್ |
ದೇವೀಂ ಧ್ಯಾಯನ್ ಪಠೇದೇತತ್ಸರ್ವಕಾಮಾರ್ಥಸಿದ್ಧಯೇ || ೧೦೪ ||
ಸ್ತೋತ್ರಮೇತತ್ಪ್ರಜಪತಸ್ತವ ತ್ರಿಪುರಸುಂದರಿ |
ಅನುದ್ವೀಕ್ಷ್ಯ ಭಯಾದ್ದೂರಂ ಮೃತ್ಯುರ್ಧಾವತಿ ಪಂಚಮಃ || ೧೦೫ ||
ಯಃ ಪಠತಿ ಸ್ತುತಿಮೇತಾಂ
ವಿದ್ಯಾವಂತಂ ತಮಂಬ ಧನವಂತಮ್ |
ಕುರು ದೇವಿ ಯಶಸ್ವಂತಂ
ವರ್ಚಸ್ವಂತಂ ಮನುಷ್ಯೇಷು || ೧೦೬ ||
ಯೇ ಶೃಣ್ವಂತಿ ಸ್ತುತಿಮಿಮಾಂ ತವ ದೇವ್ಯನಸೂಯಕಾಃ |
ತೇಭ್ಯೋ ದೇಹಿ ಶ್ರಿಯಂ ವಿದ್ಯಾಮುದ್ವರ್ಚ ಉತ್ತನೂಬಲಮ್ || ೧೦೭ ||
ತ್ವಾಮೇವಾಹಂ ಸ್ತೌಮಿ ನಿತ್ಯಂ ಪ್ರಣೌಮಿ
ಶ್ರೀವಿದ್ಯೇಶಾಂ ವಚ್ಮಿ ಸಂಚಿಂತಯಾಮಿ |
ಅಧ್ಯಾಸ್ತೇ ಯಾ ವಿಶ್ವಮಾತಾ ವಿರಾಜೋ
ಹೃತ್ಪುಂಡರೀಕಂ ವಿರಜಂ ವಿಶುದ್ಧಮ್ || ೧೦೮ ||
ಶಂಕರೇಣ ರಚಿತಂ ಸ್ತವೋತ್ತಮಂ
ಯಃ ಪಠೇಜ್ಜಗತಿ ಭಕ್ತಿಮಾನ್ನರಃ |
ತಸ್ಯ ಸಿದ್ಧಿರತುಲಾ ಭವೇದ್ಧ್ರುವಾ
ಸುಂದರೀ ಚ ಸತತಂ ಪ್ರಸೀದತಿ || ೧೦೯ ||
ಯತ್ರೈವ ಯತ್ರೈವ ಮನೋ ಮದೀಯಂ
ತತ್ರೈವ ತತ್ರೈವ ತವ ಸ್ವರೂಪಮ್ |
ಯತ್ರೈವ ಯತ್ರೈವ ಶಿರೋ ಮದೀಯಂ
ತತ್ರೈವ ತತ್ರೈವ ಪದದ್ವಯಂ ತೇ || ೧೧೦ ||
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿಂದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಮಚ್ಛಂಕರಭಗವತಃ ಕೃತೌ ತ್ರಿಪುರಸುಂದರೀ ವೇದಪಾದ ಸ್ತವಃ |
ಇನ್ನಷ್ಟು ದಶಮಹಾವಿದ್ಯಾ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
