Sri Suparna Stotram (Mahabharatam) – ಶ್ರೀ ಸುಪರ್ಣ ಸ್ತೋತ್ರಂ (ಮಹಾಭಾರತೇ)

ಸ್ತೋತ್ರನಿಧಿ → ಶ್ರೀ ವಿಷ್ಣು ಸ್ತೋತ್ರಗಳು → ಶ್ರೀ ಸುಪರ್ಣ ಸ್ತೋತ್ರಂ (ಮಹಾಭಾರತೇ)

ದೇವಾ ಊಚುಃ |
ತ್ವಮೃಷಿಸ್ತ್ವಂ ಮಹಾಭಾಗಸ್ತ್ವಂ ದೇವಃ ಪತಗೇಶ್ವರಃ |
ತ್ವಂ ಪ್ರಭುಸ್ತಪನಃ ಸೂರ್ಯಃ ಪರಮೇಷ್ಠೀ ಪ್ರಜಾಪತಿಃ || ೧ ||

ತ್ವಮಿಂದ್ರಸ್ತ್ವಂ ಹಯಮುಖಸ್ತ್ವಂ ಶರ್ವಸ್ತ್ವಂ ಜಗತ್ಪತಿಃ |
ತ್ವಂ ಮುಖಂ ಪದ್ಮಜೋ ವಿಪ್ರಸ್ತ್ವಮಗ್ನಿಃ ಪವನಸ್ತಥಾ || ೨ ||

ತ್ವಂ ಹಿ ಧಾತಾ ವಿಧಾತಾ ಚ ತ್ವಂ ವಿಷ್ಣುಃ ಸುರಸತ್ತಮಃ |
ತ್ವಂ ಮಹಾನಭಿಭೂಃ ಶಶ್ವದಮೃತಂ ತ್ವಂ ಮಹದ್ಯಶಃ |
ತ್ವಂ ಪ್ರಭಾಸ್ತ್ವಮಭಿಪ್ರೇತಂ ತ್ವಂ ನಸ್ತ್ರಾಣಮನುತ್ತಮಮ್ || ೩ ||

ಬಲೋರ್ಮಿಮಾನ್ ಸಾಧುರದೀನಸತ್ತ್ವಃ
ಸಮೃದ್ಧಿಮಾನ್ ದುರ್ವಿಷಹಸ್ತ್ವಮೇವ |
ತ್ವತ್ತಃ ಸೃತಂ ಸರ್ವಮಹೀನಕೀರ್ತೇ
ಹ್ಯನಾಗತಂ ಚೋಪಗತಂ ಚ ಸರ್ವಮ್ || ೪ ||

ತ್ವಮುತ್ತಮಃ ಸರ್ವಮಿದಂ ಚರಾಚರಂ
ಗಭಸ್ತಿಭಿರ್ಭಾನುರಿವಾವಭಾಸಸೇ |
ಸಮಾಕ್ಷಿಪನ್ ಭಾನುಮತಃ ಪ್ರಭಾಂ ಮುಹು-
-ಸ್ತ್ವಮಂತಕಃ ಸರ್ವಮಿದಂ ಧ್ರುವಾಧ್ರುವಮ್ || ೫ ||

ದಿವಾಕರಃ ಪರಿಕುಪಿತೋ ಯಥಾ ದಹೇತ್
ಪ್ರಜಾಸ್ತಥಾ ದಹಸಿ ಹುತಾಶನಪ್ರಭ |
ಭಯಂಕರಃ ಪ್ರಲಯ ಇವಾಗ್ನಿರುತ್ಥಿತೋ
ವಿನಾಶಯನ್ ಯುಗಪರಿವರ್ತನಾಂತಕೃತ್ || ೬ ||

ಖಗೇಶ್ವರಂ ಶರಣಮುಪಾಗತಾ ವಯಂ
ಮಹೌಜಸಂ ಜ್ವಲನಸಮಾನವರ್ಚಸಮ್ |
ತಡಿತ್ಪ್ರಭಂ ವಿತಿಮಿರಮಭ್ರಗೋಚರಂ
ಮಹಾಬಲಂ ಗರುಡಮುಪ್ಯೇತ ಖೇಚರಮ್ || ೭ ||

ಪರಾವರಂ ವರದಮಜಯ್ಯವಿಕ್ರಮಂ
ತವೌಜಸಾ ಸರ್ವಮಿದಂ ಪ್ರತಾಪಿತಮ್ |
ಜಗತ್ಪ್ರಭೋ ತಪ್ತಸುವರ್ಣವರ್ಚಸಾ
ತ್ವಂ ಪಾಹಿ ಸರ್ವಾಂಶ್ಚ ಸುರಾನ್ ಮಹಾತ್ಮನಃ || ೮ ||

ಭಯಾನ್ವಿತಾ ನಭಸಿ ವಿಮಾನಗಾಮಿನೋ
ವಿಮಾನಿತಾ ವಿಪಥಗತಿಂ ಪ್ರಯಾಂತಿ ತೇ |
ಋಷೇಃ ಸುತಸ್ತ್ವಮಸಿ ದಯಾವತಃ ಪ್ರಭೋ
ಮಹಾತ್ಮನಃ ಖಗವರ ಕಶ್ಯಪಸ್ಯ ಹ || ೯ ||

ಸ ಮಾ ಕ್ರುಧಃ ಕುರು ಜಗತೋ ದಯಾಂ ಪರಾಂ
ತ್ವಮೀಶ್ವರಃ ಪ್ರಶಮಮುಪೈಹಿ ಪಾಹಿ ನಃ |
ಮಹಾಶನಿಸ್ಫುರಿತಸಮಸ್ವನೇನ ತೇ
ದಿಶೋಽಂಬರಂ ತ್ರಿದಿವಮಿಯಂ ಚ ಮೇದಿನೀ || ೧೦ ||

ಚಲಂತಿ ನಃ ಖಗ ಹೃದಯಾನಿ ಚಾನಿಶಂ
ನಿಗೃಹ್ಯತಾಂ ವಪುರಿದಮಗ್ನಿಸನ್ನಿಭಮ್ |
ತವ ದ್ಯುತಿಂ ಕುಪಿತಕೃತಾಂತಸನ್ನಿಭಾಂ
ನಿಶಮ್ಯ ನಶ್ಚಲತಿ ಮನೋಽವ್ಯವಸ್ಥಿತಮ್ |
ಪ್ರಸೀದ ನಃ ಪತಗಪತೇ ಪ್ರಯಾಚತಾಂ
ಶಿವಶ್ಚ ನೋ ಭವ ಭಗವನ್ ಸುಖಾವಹಃ || ೧೧ ||

ಏವಂ ಸ್ತುತಃ ಸುಪರ್ಣಸ್ತು ದೇವೈಃ ಸರ್ಷಿಗಣೈಸ್ತದಾ |
ತೇಜಸಃ ಪ್ರತಿಸಂಹಾರಮಾತ್ಮನಃ ಸ ಚಕಾರ ಹ || ೧೨ ||

ಇತಿ ಶ್ರೀಮನ್ಮಹಾಭಾರತೇ ಆದಿಪರ್ವಣಿ ತ್ರಯೋವಿಂಶೋಽಧ್ಯಾಯೇ ದೇವಕೃತ ಶ್ರೀ ಸುಪರ್ಣ ಸ್ತೋತ್ರಮ್ ||

---

ಇನ್ನಷ್ಟು ಶ್ರೀ ವಿಷ್ಣು ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.