Suparna Stotram – suparṇa stōtram

dēvā ūcuḥ |
tvaṁ r̥ṣistvaṁ mahābhāgaḥ tvaṁ dēvaḥ patagēśvaraḥ |
tvaṁ prabhustapanaḥ sūryaḥ paramēṣṭhī prajāpatiḥ || 1 ||

tvamindrastvaṁ hayamukhaḥ tvaṁ śarvastvaṁ jagatpatiḥ |
tvaṁ mukhaṁ padmajō vipraḥ tvamagniḥ pavanastathā || 2 ||

tvaṁ hi dhātā vidhātā ca tvaṁ viṣṇuḥ surasattamaḥ |
tvaṁ mahānabhibhūḥ śaśvadamr̥taṁ tvaṁ mahadyaśaḥ || 3 ||

tvaṁ prabhāstvamabhiprētaṁ tvaṁ nastrāṇamanuttamam |
tvaṁ gatiḥ satataṁ tvattaḥ kathaṁ naḥ prāpnuyādbhayam || 4 ||

balōrmimān sādhuradīnasattvaḥ
samr̥ddhimān durviṣahastvamēva |
tvattaḥ sr̥taṁ sarvamahīnakīrtē
hyanāgataṁ cōpagataṁ ca sarvam || 5 ||

tvamuttamaḥ sarvamidaṁ carācaraṁ
gabhastibhirbhānurivāvabhāsasē |
samākṣipan bhānumataḥ prabhāṁ muhuḥ
tvamantakaḥ sarvamidaṁ dhruvādhruvam || 6 ||

divākaraḥ parikupitō yathā dahēt
prajāstathā dahasi hutāśanaprabha |
bhayaṅkaraḥ pralaya ivāgnirutthitō
vināśayan yugaparivartanāntakr̥t || 7 ||

khagēśvaraṁ śaraṇamupāgatā vayaṁ
mahaujasaṁ jvalanasamānavarcasam |
taḍitprabhaṁ vitimiramabhragōcaraṁ
mahābalaṁ garuḍamupyēta khēcaram || 8 ||

parāvaraṁ varadamajayyavikramaṁ
tavaujasā sarvamidaṁ pratāpitam |
jagatprabhō taptasuvarṇavarcasā
tvaṁ pāhi sarvāṁśca surān mahātmanaḥ || 9 ||

bhayānvitā nabhasi vimānagāminō
vimānitā vipathagatiṁ prayānti tē |
r̥ṣēḥ sutastvamasi dayāvataḥ prabhō
mahātmanaḥ khagavara kaśyapasya ha || 10 ||

sa mā krudhaḥ jagatō dayāṁ parāṁ
tvamīśvaraḥ praśamamupaihi pāhi naḥ |
mahāśanisphurita samasvanēna tē
diśōmbaraṁ tridivamiyaṁ ca mēdinī || 11 ||

calanti naḥ khaga hr̥dayāni cāniśaṁ
nigr̥hya tāṁ vapuridamagnisannibham |
tava dyutiṁ kupitakr̥tāntasannibhāṁ
niśamya naścalati manōvyavasthitam || 12 ||

ēvaṁ stutaḥ suparṇastu dēvaiḥ sarṣigaṇaistadā |
tējasaḥ pratisaṁhāramātmanaḥ sa cakāra ha || 13 ||

iti śrīmanmahābhāratē ādiparvaṇi suparṇastōtram sampūrṇam |


See more śrī viṣṇu stōtrāṇi for chanting.

Facebook Comments

You may also like...

Leave a Reply

Your email address will not be published. Required fields are marked *

error: Not allowed
%d bloggers like this: