Read in తెలుగు / ಕನ್ನಡ / தமிழ் / English (IAST)
ತೃತೀಯದಶಕಮ್ (೩) – ಉತ್ತಮಭಕ್ತಸ್ಯ ಗುಣಾಃ
ಪಠನ್ತೋ ನಾಮಾನಿ ಪ್ರಮದಭರಸಿನ್ಧೌ ನಿಪತಿತಾಃ
ಸ್ಮರನ್ತೋ ರೂಪಂ ತೇ ವರದ ಕಥಯನ್ತೋ ಗುಣಕಥಾಃ |
ಚರನ್ತೋ ಯೇ ಭಕ್ತಾಸ್ತ್ವಯಿ ಖಲು ರಮನ್ತೇ ಪರಮಮೂ-
ನಹಂ ಧನ್ಯಾನ್ಮನ್ಯೇ ಸಮಧಿಗತಸರ್ವಾಭಿಲಷಿತಾನ್ || ೩-೧ ||
ಗದಕ್ಲಿಷ್ಟಂ ಕಷ್ಟಂ ತವ ಚರಣಸೇವಾರಸಭರೇಽ-
ಪ್ಯನಾಸಕ್ತಂ ಚಿತ್ತಂ ಭವತಿ ಬತ ವಿಷ್ಣೋ ಕುರು ದಯಾಮ್ |
ಭವತ್ಪಾದಾಂಭೋಜಸ್ಮರಣರಸಿಕೋ ನಾಮನಿವಹಾ-
ನಹಂ ಗಾಯಂ ಗಾಯಂ ಕುಹಚನ ವಿವತ್ಸ್ಯಾಮಿ ವಿಜನೇ || ೩-೨ ||
ಕೃಪಾ ತೇ ಜಾತಾ ಚೇತ್ಕಿಮಿವ ನ ಹಿ ಲಭ್ಯಂ ತನುಭೃತಾಂ
ಮದೀಯಕ್ಲೇಶೌಘಪ್ರಶಮನದಶಾ ನಾಮ ಕಿಯತೀ |
ನ ಕೇ ಕೇ ಲೋಕೇಽಸ್ಮಿನ್ನನಿಶಮಯಿ ಶೋಕಾಭಿರಹಿತಾ
ಭವದ್ಭಕ್ತಾ ಮುಕ್ತಾಃ ಸುಖಗತಿಮಸಕ್ತಾ ವಿದಧತೇ || ೩-೩ ||
ಮುನಿಪ್ರೌಢಾ ರೂಢಾ ಜಗತಿ ಖಲು ಗೂಢಾತ್ಮಗತಯೋ
ಭವತ್ಪಾದಾಂಭೋಜಸ್ಮರಣವಿರುಜೋ ನಾರದಮುಖಾಃ |
ಚರನ್ತೀಶ ಸ್ವೈರಂ ಸತತಪರಿನಿರ್ಭಾತಪರಚಿ-
ತ್ಸದಾನನ್ದಾದ್ವೈತಪ್ರಸರಪರಿಮಗ್ನಾಃ ಕಿಮಪರಮ್ || ೩-೪ ||
ಭವದ್ಭಕ್ತಿಃ ಸ್ಫೀತಾ ಭವತು ಮಮ ಸೈವ ಪ್ರಶಮಯೇ-
ದಶೇಷಕ್ಲೇಶೌಘಂ ನ ಖಲು ಹೃದಿ ಸನ್ದೇಹಕಣಿಕಾ |
ನ ಚೇದ್ವ್ಯಾಸಸ್ಯೋಕ್ತಿಸ್ತವ ಚ ವಚನಂ ನೈಗಮವಚೋ
ಭವೇನ್ಮಿಥ್ಯಾ ರಥ್ಯಾಪುರುಷವಚನಪ್ರಾಯಮಖಿಲಮ್ || ೩-೫ ||
ಭವದ್ಭಕ್ತಿಸ್ತಾವತ್ಪ್ರಮುಖಮಧುರಾ ತ್ವದ್ಗುಣರಸಾತ್
ಕಿಮಪ್ಯಾರೂಢಾ ಚೇದಖಿಲಪರಿತಾಪಪ್ರಶಮನೀ |
ಪುನಶ್ಚಾನ್ತೇ ಸ್ವಾನ್ತೇ ವಿಮಲಪರಿಬೋಧೋದಯಮಿಲ-
ನ್ಮಹಾನನ್ದಾದ್ವೈತಂ ದಿಶತಿ ಕಿಮತಃ ಪ್ರಾರ್ಥ್ಯಮಪರಮ್ || ೩-೬ ||
ವಿಧೂಯ ಕ್ಲೇಶಾನ್ಮೇ ಕುರು ಚರಣಯುಗ್ಮಂ ಧೃತರಸಂ
ಭವತ್ಕ್ಷೇತ್ರಪ್ರಾಪ್ತೌ ಕರಮಪಿ ಚ ತೇ ಪೂಜನವಿಧೌ |
ಭವನ್ಮೂರ್ತ್ಯಾಲೋಕೇ ನಯನಮಥ ತೇ ಪಾದತುಲಸೀ-
ಪರಿಘ್ರಾಣೇ ಘ್ರಾಣಂ ಶ್ರವಣಮಪಿ ತೇ ಚಾರುಚರಿತೇ || ೩-೭ ||
ಪ್ರಭೂತಾಧಿವ್ಯಾಧಿಪ್ರಸಭಚಲಿತೇ ಮಾಮಕಹೃದಿ
ತ್ವದೀಯಂ ತದ್ರೂಪಂ ಪರಮಸುಖಚಿದ್ರೂಪಮುದಿಯಾತ್ | [** ಪರಮರಸ **]
ಉದಞ್ಚದ್ರೋಮಾಞ್ಚೋ ಗಲಿತಬಹುಹರ್ಷಾಶ್ರುನಿವಹೋ
ಯಥಾ ವಿಸ್ಮರ್ಯಾಸಂ ದುರುಪಶಮಪೀಡಾಪರಿಭವಾನ್ || ೩-೮ ||
ಮರುದ್ಗೇಹಾಧೀಶ ತ್ವಯಿ ಖಲು ಪರಾಞ್ಚೋಽಪಿ ಸುಖಿನೋ
ಭವತ್ಸ್ನೇಹೀ ಸೋಽಹಂ ಸುಬಹು ಪರಿತಪ್ಯೇ ಚ ಕಿಮಿದಮ್ |
ಅಕೀರ್ತಿಸ್ತೇ ಮಾ ಭೂದ್ವರದ ಗದಭಾರಂ ಪ್ರಶಮಯನ್
ಭವದ್ಭಕ್ತೋತ್ತಂಸಂ ಝಟಿತಿ ಕುರು ಮಾಂ ಕಂಸದಮನ || ೩-೯ ||
ಕಿಮುಕ್ತೈರ್ಭೂಯೋಭಿಸ್ತವ ಹಿ ಕರುಣಾ ಯಾವದುದಿಯಾ-
ದಹಂ ತಾವದ್ದೇವ ಪ್ರಹಿತವಿವಿಧಾರ್ತಪ್ರಲಪಿತಃ |
ಪುರಃ ಕ್ಲೃಪ್ತೇ ಪಾದೇ ವರದ ತವ ನೇಷ್ಯಾಮಿ ದಿವಸಾ-
ನ್ಯಥಾಶಕ್ತಿ ವ್ಯಕ್ತಂ ನತಿನುತಿನಿಷೇವಾ ವಿರಚಯನ್ || ೩-೧೦ ||
ಇತಿ ತೃತೀಯದಶಕಂ ಸಮಾಪ್ತಮ್ |
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
