Read in తెలుగు / ಕನ್ನಡ / தமிழ் / देवनागरी / English (IAST)
ಶ್ರುತೀನಾಮುತ್ತರಂ ಭಾಗಂ ವೇಗವತ್ಯಾಶ್ಚ ದಕ್ಷಿಣಮ್ |
ಕಾಮಾದಧಿವಸನ್ ಜೀಯಾತ್ ಕಶ್ಚಿದದ್ಭುತ ಕೇಸರೀ || ೧ ||
ತಪನೇಂದ್ವಗ್ನಿನಯನಃ ತಾಪಾನಪಚಿನೋತು ನಃ |
ತಾಪನೀಯರಹಸ್ಯಾನಾಂ ಸಾರಃ ಕಾಮಾಸಿಕಾ ಹರಿಃ || ೨ ||
ಆಕಂಠಮಾದಿಪುರುಷಂ
ಕಂಠೀರವಮುಪರಿ ಕುಂಠಿತಾರಾತಿಮ್ |
ವೇಗೋಪಕಂಠಸಂಗಾತ್
ವಿಮುಕ್ತವೈಕುಂಠಬಹುಮತಿಮುಪಾಸೇ || ೩ ||
ಬಂಧುಮಖಿಲಸ್ಯ ಜಂತೋಃ
ಬಂಧುರಪರ್ಯಂಕಬಂಧರಮಣೀಯಮ್ |
ವಿಷಮವಿಲೋಚನಮೀಡೇ
ವೇಗವತೀಪುಳಿನಕೇಳಿನರಸಿಂಹಮ್ || ೪ ||
ಸ್ವಸ್ಥಾನೇಷು ಮರುದ್ಗಣಾನ್ ನಿಯಮಯನ್ ಸ್ವಾಧೀನಸರ್ವೇಂದ್ರಿಯಃ
ಪರ್ಯಂಕಸ್ಥಿರಧಾರಣಾ ಪ್ರಕಟಿತಪ್ರತ್ಯಙ್ಮುಖಾವಸ್ಥಿತಿಃ |
ಪ್ರಾಯೇಣ ಪ್ರಣಿಪೇದುಷಃ ಪ್ರಭುರಸೌ ಯೋಗಂ ನಿಜಂ ಶಿಕ್ಷಯನ್
ಕಾಮಾನಾತನುತಾದಶೇಷಜಗತಾಂ ಕಾಮಾಸಿಕಾ ಕೇಸರೀ || ೫ ||
ವಿಕಸ್ವರನಖಸ್ವರುಕ್ಷತಹಿರಣ್ಯವಕ್ಷಃಸ್ಥಲೀ-
-ನಿರರ್ಗಲವಿನಿರ್ಗಲದ್ರುಧಿರಸಿಂಧುಸಂಧ್ಯಾಯಿತಾಃ |
ಅವಂತು ಮದನಾಸಿಕಾಮನುಜಪಂಚವಕ್ತ್ರಸ್ಯ ಮಾಂ
ಅಹಂಪ್ರಥಮಿಕಾಮಿಥಃ ಪ್ರಕಟಿತಾಹವಾ ಬಾಹವಃ || ೬ ||
ಸಟಾಪಟಲಭೀಷಣೇ ಸರಭಸಾಟ್ಟಹಾಸೋದ್ಭಟೇ
ಸ್ಫುರತ್ ಕ್ರುಧಿಪರಿಸ್ಫುಟ ಭ್ರುಕುಟಿಕೇಽಪಿ ವಕ್ತ್ರೇ ಕೃತೇ |
ಕೃಪಾಕಪಟಕೇಸರಿನ್ ದನುಜಡಿಂಭದತ್ತಸ್ತನಾ
ಸರೋಜಸದೃಶಾ ದೃಶಾ ವ್ಯತಿವಿಷಜ್ಯ ತೇ ವ್ಯಜ್ಯತೇ || ೭ ||
ತ್ವಯಿ ರಕ್ಷತಿ ರಕ್ಷಕೈಃ ಕಿಮನ್ಯೈ-
-ಸ್ತ್ವಯಿ ಚಾರಕ್ಷತಿ ರಕ್ಷಕೈಃ ಕಿಮನ್ಯೈಃ |
ಇತಿ ನಿಶ್ಚಿತಧೀಃ ಶ್ರಯಾಮಿ ನಿತ್ಯಂ
ನೃಹರೇ ವೇಗವತೀತಟಾಶ್ರಯಂ ತ್ವಾಮ್ || ೮ ||
ಇತ್ಥಂ ಸ್ತುತಃ ಸಕೃದಿಹಾಷ್ಟಭಿರೇಷ ಪದ್ಯೈಃ
ಶ್ರೀವೇಂಕಟೇಶರಚಿತೈಸ್ತ್ರಿದಶೇಂದ್ರವಂದ್ಯಃ |
ದುರ್ದಾಂತಘೋರದುರಿತದ್ವಿರದೇಂದ್ರಭೇದೀ
ಕಾಮಾಸಿಕಾನರಹರಿರ್ವಿತನೋತು ಕಾಮಾನ್ || ೯ ||
ಇತಿ ಶ್ರೀವೇದಾಂತದೇಶಿಕಕೃತಂ ಕಾಮಾಸಿಕಾಷ್ಟಕಮ್ |
ಇನ್ನಷ್ಟು ಶ್ರೀ ನೃಸಿಂಹ ಸ್ತೋತ್ರಗಳು ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
