Read in తెలుగు / ಕನ್ನಡ / தமிழ் / देवनागरी / English (IAST)
ಉಷಸಿ ಮಾಗಧಮಂಗಲಗಾಯನೈ-
-ರ್ಝಟಿತಿ ಜಾಗೃಹಿ ಜಾಗೃಹಿ ಜಾಗೃಹಿ |
ಅತಿಕೃಪಾರ್ದ್ರಕಟಾಕ್ಷನಿರೀಕ್ಷಣೈ-
-ರ್ಜಗದಿದಂ ಜಗದಂಬ ಸುಖೀಕುರು || ೧ ||
ಕನಕಮಯವಿತರ್ದಿಶೋಭಮಾನಂ
ದಿಶಿ ದಿಶಿ ಪೂರ್ಣಸುವರ್ಣಕುಂಭಯುಕ್ತಮ್ |
ಮಣಿಮಯಮಂಟಪಮಧ್ಯಮೇಹಿ ಮಾತ-
-ರ್ಮಯಿ ಕೃಪಯಾಶು ಸಮರ್ಚನಂ ಗ್ರಹೀತುಮ್ || ೨ ||
ಕನಕಕಲಶಶೋಭಮಾನಶೀರ್ಷಂ
ಜಲಧರಲಂಬಿ ಸಮುಲ್ಲಸತ್ಪತಾಕಮ್ |
ಭಗವತಿ ತವ ಸಂನಿವಾಸಹೇತೋ-
-ರ್ಮಣಿಮಯಮಂದಿರಮೇತದರ್ಪಯಾಮಿ || ೩ ||
ತಪನೀಯಮಯೀ ಸುತೂಲಿಕಾ
ಕಮನೀಯಾ ಮೃದುಲೋತ್ತರಚ್ಛದಾ |
ನವರತ್ನವಿಭೂಷಿತಾ ಮಯಾ
ಶಿಬಿಕೇಯಂ ಜಗದಂಬ ತೇಽರ್ಪಿತಾ || ೪ ||
ಕನಕಮಯವಿತರ್ದಿಸ್ಥಾಪಿತೇ ತೂಲಿಕಾಢ್ಯೇ
ವಿವಿಧಕುಸುಮಕೀರ್ಣೇ ಕೋಟಿಬಾಲಾರ್ಕವರ್ಣೇ |
ಭಗವತಿ ರಮಣೀಯೇ ರತ್ನಸಿಂಹಾಸನೇಽಸ್ಮಿ-
-ನ್ನುಪವಿಶ ಪದಯುಗ್ಮಂ ಹೇಮಪೀಠೇ ನಿಧಾಯ || ೫ ||
ಮಣಿಮೌಕ್ತಿಕನಿರ್ಮಿತಂ ಮಹಾಂತಂ
ಕನಕಸ್ತಂಭಚತುಷ್ಟಯೇನ ಯುಕ್ತಮ್ |
ಕಮನೀಯತಮಂ ಭವಾನಿ ತುಭ್ಯಂ
ನವಮುಲ್ಲೋಚಮಹಂ ಸಮರ್ಪಯಾಮಿ || ೬ ||
ದೂರ್ವಯಾ ಸರಸಿಜಾನ್ವಿತವಿಷ್ಣು-
-ಕ್ರಾಂತಯಾ ಚ ಸಹಿತಂ ಕುಸುಮಾಢ್ಯಮ್ |
ಪದ್ಮಯುಗ್ಮಸದೃಶೇ ಪದಯುಗ್ಮೇ
ಪಾದ್ಯಮೇತದುರರೀಕುರು ಮಾತಃ || ೭ ||
ಗಂಧಪುಷ್ಪಯವಸರ್ಷಪದೂರ್ವಾ-
-ಸಂಯುತಂ ತಿಲಕುಶಾಕ್ಷತಮಿಶ್ರಮ್ |
ಹೇಮಪಾತ್ರನಿಹಿತಂ ಸಹ ರತ್ನೈ-
-ರರ್ಘ್ಯಮೇತದುರರೀಕುರು ಮಾತಃ || ೮ ||
ಜಲಜದ್ಯುತಿನಾ ಕರೇಣ ಜಾತೀ-
-ಫಲತಕ್ಕೋಲಲವಂಗಗಂಧಯುಕ್ತೈಃ |
ಅಮೃತೈರಮೃತೈರಿವಾತಿಶೀತೈ-
-ರ್ಭಗವತ್ಯಾಚಮನಂ ವಿಧೀಯತಾಮ್ || ೯ ||
ನಿಹಿತಂ ಕನಕಸ್ಯ ಸಂಪುಟೇ
ಪಿಹಿತಂ ರತ್ನಪಿಧಾನಕೇನ ಯತ್ |
ತದಿದಂ ಜಗದಂಬ ತೇಽರ್ಪಿತಂ
ಮಧುಪರ್ಕಂ ಜನನಿ ಪ್ರಗೃಹ್ಯತಾಮ್ || ೧೦ ||
ಏತಚ್ಚಂಪಕತೈಲಮಂಬ ವಿವಿಧೈಃ ಪುಷ್ಪೈರ್ಮುಹುರ್ವಾಸಿತಂ
ನ್ಯಸ್ತಂ ರತ್ನಮಯೇ ಸುವರ್ಣಚಷಕೇ ಭೃಂಗೈರ್ಭ್ರಮದ್ಭಿರ್ವೃತಮ್ |
ಸಾನಂದಂ ಸುರಸುಂದರೀಭಿರಭಿತೋ ಹಸ್ತೈರ್ಧೃತಂ ತೇ ಮಯಾ
ಕೇಶೇಷು ಭ್ರಮರಭ್ರಮೇಷು ಸಕಲೇಷ್ವಂಗೇಷು ಚಾಲಿಪ್ಯತೇ || ೧೧ ||
ಮಾತಃ ಕುಂಕುಮಪಂಕನಿರ್ಮಿತಮಿದಂ ದೇಹೇ ತವೋದ್ವರ್ತನಂ
ಭಕ್ತ್ಯಾಹಂ ಕಲಯಾಮಿ ಹೇಮರಜಸಾ ಸಂಮಿಶ್ರಿತಂ ಕೇಸರೈಃ |
ಕೇಶಾನಾಮಲಕೈರ್ವಿಶೋಧ್ಯ ವಿಶದಾನ್ಕಸ್ತೂರಿಕೋದಂಚಿತೈಃ
ಸ್ನಾನಂ ತೇ ನವರತ್ನಕುಂಭಸಹಿತೈಃ ಸಂವಾಸಿತೋಷ್ಣೋದಕೈಃ || ೧೨ ||
ದಧಿದುಗ್ಧಘೃತೈಃ ಸಮಾಕ್ಷಿಕೈಃ
ಸಿತಯಾ ಶರ್ಕರಯಾ ಸಮನ್ವಿತೈಃ |
ಸ್ನಪಯಾಮಿ ತವಾಹಮಾದರಾ-
-ಜ್ಜನನಿ ತ್ವಾಂ ಪುನರುಷ್ಣವಾರಿಭಿಃ || ೧೩ ||
ಏಲೋಶೀರಸುವಾಸಿತೈಃ ಸಕುಸುಮೈರ್ಗಂಗಾದಿತೀರ್ಥೋದಕೈ-
-ರ್ಮಾಣಿಕ್ಯಾಮಲಮೌಕ್ತಿಕಾಮೃತರಸೈಃ ಸ್ವಚ್ಛೈಃ ಸುವರ್ಣೋದಕೈಃ |
ಮಂತ್ರಾನ್ವೈದಿಕತಾಂತ್ರಿಕಾನ್ಪರಿಪಠನ್ಸಾನಂದಮತ್ಯಾದರಾ-
-ತ್ಸ್ನಾನಂ ತೇ ಪರಿಕಲ್ಪಯಾಮಿ ಜನನಿ ಸ್ನೇಹಾತ್ತ್ವಮಂಗೀಕುರು || ೧೪ ||
ಬಾಲಾರ್ಕದ್ಯುತಿ ದಾಡಿಮೀಯಕುಸುಮಪ್ರಸ್ಪರ್ಧಿ ಸರ್ವೋತ್ತಮಂ
ಮಾತಸ್ತ್ವಂ ಪರಿಧೇಹಿ ದಿವ್ಯವಸನಂ ಭಕ್ತ್ಯಾ ಮಯಾ ಕಲ್ಪಿತಮ್ |
ಮುಕ್ತಾಭಿರ್ಗ್ರಥಿತಂ ಸುಕಂಚುಕಮಿದಂ ಸ್ವೀಕೃತ್ಯ ಪೀತಪ್ರಭಂ
ತಪ್ತಸ್ವರ್ಣಸಮಾನವರ್ಣಮತುಲಂ ಪ್ರಾವರ್ಣಮಂಗೀಕುರು || ೧೫ ||
ನವರತ್ನಮಯೇ ಮಯಾರ್ಪಿತೇ
ಕಮನೀಯೇ ತಪನೀಯಪಾದುಕೇ |
ಸವಿಲಾಸಮಿದಂ ಪದದ್ವಯಂ
ಕೃಪಯಾ ದೇವಿ ತಯೋರ್ನಿಧೀಯತಾಮ್ || ೧೬ ||
ಬಹುಭಿರಗರುಧೂಪೈಃ ಸಾದರಂ ಧೂಪಯಿತ್ವಾ
ಭಗವತಿ ತವ ಕೇಶಾಂಕಂಕತೈರ್ಮಾರ್ಜಯಿತ್ವಾ |
ಸುರಭಿಭಿರರವಿಂದೈಶ್ಚಂಪಕೈಶ್ಚಾರ್ಚಯಿತ್ವಾ
ಝಟಿತಿ ಕನಕಸೂತ್ರೈರ್ಜೂಟಯನ್ವೇಷ್ಟಯಾಮಿ || ೧೭ ||
ಸೌವೀರಾಂಜನಮಿದಮಂಬ ಚಕ್ಷುಷೋಸ್ತೇ
ವಿನ್ಯಸ್ತಂ ಕನಕಶಲಾಕಯಾ ಮಯಾ ಯತ್ |
ತನ್ನ್ಯೂನಂ ಮಲಿನಮಪಿ ತ್ವದಕ್ಷಿಸಂಗಾತ್
ಬ್ರಹ್ಮೇಂದ್ರಾದ್ಯಭಿಲಷಣೀಯತಾಮಿಯಾಯ || ೧೮ ||
ಮಂಜೀರೇ ಪದಯೋರ್ನಿಧಾಯ ರುಚಿರಾಂ ವಿನ್ಯಸ್ಯ ಕಾಂಚೀಂ ಕಟೌ
ಮುಕ್ತಾಹಾರಮುರೋಜಯೋರನುಪಮಾಂ ನಕ್ಷತ್ರಮಾಲಾಂ ಗಲೇ |
ಕೇಯೂರಾಣಿ ಭುಜೇಷು ರತ್ನವಲಯಶ್ರೇಣೀಂ ಕರೇಷು ಕ್ರಮಾ-
-ತ್ತಾಟಂಕೇ ತವ ಕರ್ಣಯೋರ್ವಿನಿದಧೇ ಶೀರ್ಷೇ ಚ ಚೂಡಾಮಣಿಮ್ || ೧೯ ||
ಧಮ್ಮಿಲ್ಲೇ ತವ ದೇವಿ ಹೇಮಕುಸುಮಾನ್ಯಾಧಾಯ ಫಾಲಸ್ಥಲೇ
ಮುಕ್ತಾರಾಜಿವಿರಾಜಮಾನತಿಲಕಂ ನಾಸಾಪುಟೇ ಮೌಕ್ತಿಕಮ್ |
ಮಾತರ್ಮೌಕ್ತಿಕಜಾಲಿಕಾಂ ಚ ಕುಚಯೋಃ ಸರ್ವಾಂಗುಲೀಷೂರ್ಮಿಕಾಃ
ಕಟ್ಯಾಂ ಕಾಂಚನಕಿಂಕಿಣೀರ್ವಿನಿದಧೇ ರತ್ನಾವತಂಸಂ ಶ್ರುತೌ || ೨೦ ||
ಮಾತಃ ಫಾಲತಲೇ ತವಾತಿವಿಮಲೇ ಕಾಶ್ಮೀರಕಸ್ತೂರಿಕಾ-
-ಕರ್ಪೂರಾಗರುಭಿಃ ಕರೋಮಿ ತಿಲಕಂ ದೇಹೇಽಂಗರಾಗಂ ತತಃ |
ವಕ್ಷೋಜಾದಿಷು ಯಕ್ಷಕರ್ದಮರಸಂ ಸಿಕ್ತ್ವಾ ಚ ಪುಷ್ಪದ್ರವಂ
ಪಾದೌ ಚಂದನಲೇಪನಾದಿಭಿರಹಂ ಸಂಪೂಜಯಾಮಿ ಕ್ರಮಾತ್ || ೨೧ ||
ರತ್ನಾಕ್ಷತೈಸ್ತ್ವಾಂ ಪರಿಪೂಜಯಾಮಿ
ಮುಕ್ತಾಫಲೈರ್ವಾ ರುಚಿರೈರವಿದ್ಧೈಃ |
ಅಖಂಡಿತೈರ್ದೇವಿ ಯವಾದಿಭಿರ್ವಾ
ಕಾಶ್ಮೀರಪಂಕಾಂಕಿತತಂಡುಲೈರ್ವಾ || ೨೨ ||
ಜನನಿ ಚಂಪಕತೈಲಮಿದಂ ಪುರೋ
ಮೃಗಮದೋಪಯುತಂ ಪಟವಾಸಕಮ್ |
ಸುರಭಿಗಂಧಮಿದಂ ಚ ಚತುಃಸಮಂ
ಸಪದಿ ಸರ್ವಮಿದಂ ಪರಿಗೃಹ್ಯತಾಮ್ || ೨೩ ||
ಸೀಮಂತೇ ತೇ ಭಗವತಿ ಮಯಾ ಸಾದರಂ ನ್ಯಸ್ತಮೇತ-
-ತ್ಸಿಂದೂರಂ ಮೇ ಹೃದಯಕಮಲೇ ಹರ್ಷವರ್ಷಂ ತನೋತಿ |
ಬಾಲಾದಿತ್ಯದ್ಯುತಿರಿವ ಸದಾ ಲೋಹಿತಾ ಯಸ್ಯ ಕಾಂತೀ-
-ರಂತರ್ಧ್ವಾಂತಂ ಹರತಿ ಸಕಲಂ ಚೇತಸಾ ಚಿಂತಯೈವ || ೨೪ ||
ಮಂದಾರಕುಂದಕರವೀರಲವಂಗಪುಷ್ಪೈ-
-ಸ್ತ್ವಾಂ ದೇವಿ ಸಂತತಮಹಂ ಪರಿಪೂಜಯಾಮಿ |
ಜಾತೀಜಪಾವಕುಲಚಂಪಕಕೇತಕಾದಿ-
-ನಾನಾವಿಧಾನಿ ಕುಸುಮಾನಿ ಚ ತೇಽರ್ಪಯಾಮಿ || ೨೫ ||
ಮಾಲತೀವಕುಲಹೇಮಪುಷ್ಪಿಕಾ-
-ಕಾಂಚನಾರಕರವೀರಕೈತಕೈಃ |
ಕರ್ಣಿಕಾರಗಿರಿಕರ್ಣಿಕಾದಿಭಿಃ
ಪೂಜಯಾಮಿ ಜಗದಂಬ ತೇ ವಪುಃ || ೨೬ ||
ಪಾರಿಜಾತಶತಪತ್ರಪಾಟಲೈ-
-ರ್ಮಲ್ಲಿಕಾವಕುಲಚಂಪಕಾದಿಭಿಃ |
ಅಂಬುಜೈಃ ಸುಕುಸುಮೈಶ್ಚ ಸಾದರಂ
ಪೂಜಯಾಮಿ ಜಗದಂಬ ತೇ ವಪುಃ || ೨೭ ||
ಲಾಕ್ಷಾಸಂಮಿಲಿತೈಃ ಸಿತಾಭ್ರಸಹಿತೈಃ ಶ್ರೀವಾಸಸಂಮಿಶ್ರಿತೈಃ
ಕರ್ಪೂರಾಕಲಿತೈಃ ಶಿರೈರ್ಮಧುಯುತೈರ್ಗೋಸರ್ಪಿಷಾ ಲೋಡಿತೈಃ |
ಶ್ರೀಖಂಡಾಗರುಗುಗ್ಗುಲುಪ್ರಭೃತಿಭಿರ್ನಾನಾವಿಧೈರ್ವಸ್ತುಭಿ-
-ರ್ಧೂಪಂ ತೇ ಪರಿಕಲ್ಪಯಾಮಿ ಜನನಿ ಸ್ನೇಹಾತ್ತ್ವಮಂಗೀಕುರು || ೨೮ ||
ರತ್ನಾಲಂಕೃತಹೇಮಪಾತ್ರನಿಹಿತೈರ್ಗೋಸರ್ಪಿಷಾ ಲೋಡಿತೈ-
-ರ್ದೀಪೈರ್ದೀರ್ಘತರಾಂಧಕಾರಭಿದುರೈರ್ಬಾಲಾರ್ಕಕೋಟಿಪ್ರಭೈಃ |
ಆತಾಮ್ರಜ್ವಲದುಜ್ಜ್ವಲಪ್ರವಿಲಸದ್ರತ್ನಪ್ರದೀಪೈಸ್ತಥಾ
ಮಾತಸ್ತ್ವಾಮಹಮಾದರಾದನುದಿನಂ ನೀರಾಜಯಾಮ್ಯುಚ್ಚಕೈಃ || ೨೯ ||
ಮಾತಸ್ತ್ವಾಂ ದಧಿದುಗ್ಧಪಾಯಸಮಹಾಶಾಲ್ಯನ್ನಸಂತಾನಿಕಾಃ
ಸೂಪಾಪೂಪಸಿತಾಘೃತೈಃ ಸವಟಕೈಃ ಸಕ್ಷೌದ್ರರಂಭಾಫಲೈಃ |
ಏಲಾಜೀರಕಹಿಂಗುನಾಗರನಿಶಾಕುಸ್ತುಂಭರೀಸಂಸ್ಕೃತೈಃ
ಶಾಕೈಃ ಸಾಕಮಹಂ ಸುಧಾಧಿಕರಸೈಃ ಸಂತರ್ಪಯಾಮ್ಯರ್ಚಯನ್ || ೩೦ ||
ಸಾಪೂಪಸೂಪದಧಿದುಗ್ಧಸಿತಾಘೃತಾನಿ
ಸುಸ್ವಾದುಭಕ್ತಪರಮಾನ್ನಪುರಃಸರಾಣಿ |
ಶಾಕೋಲ್ಲಸನ್ಮರಿಚಿಜೀರಕಬಾಹ್ಲಿಕಾನಿ
ಭಕ್ಷ್ಯಾಣಿ ಭುಂಕ್ಷ್ವ ಜಗದಂಬ ಮಯಾರ್ಪಿತಾನಿ || ೩೧ ||
ಕ್ಷೀರಮೇತದಿದಮುತ್ತಮೋತ್ತಮಂ
ಪ್ರಾಜ್ಯಮಾಜ್ಯಮಿದಮುಜ್ಜ್ವಲಂ ಮಧು |
ಮಾತರೇತದಮೃತೋಪಮಂ ಪಯಃ
ಸಂಭ್ರಮೇಣ ಪರಿಪೀಯತಾಂ ಮುಹುಃ || ೩೨ ||
ಉಷ್ಣೋದಕೈಃ ಪಾಣಿಯುಗಂ ಮುಖಂ ಚ
ಪ್ರಕ್ಷಾಲ್ಯ ಮಾತಃ ಕಲಧೌತಪಾತ್ರೇ |
ಕರ್ಪೂರಮಿಶ್ರೇಣ ಸಕುಂಕುಮೇನ
ಹಸ್ತೌ ಸಮುದ್ವರ್ತಯ ಚಂದನೇನ || ೩೩ ||
ಅತಿಶೀತಮುಶೀರವಾಸಿತಂ
ತಪನೀಯೇ ಕಲಶೇ ನಿವೇಶಿತಮ್ |
ಪಟಪೂತಮಿದಂ ಜಿತಾಮೃತಂ
ಶುಚಿ ಗಂಗಾಜಲಮಂಬ ಪೀಯತಾಮ್ || ೩೪ ||
ಜಂಬ್ವಾಮ್ರರಂಭಾಫಲಸಂಯುತಾನಿ
ದ್ರಾಕ್ಷಾಫಲಕ್ಷೌದ್ರಸಮನ್ವಿತಾನಿ |
ಸನಾರಿಕೇಲಾನಿ ಸದಾಡಿಮಾನಿ
ಫಲಾನಿ ತೇ ದೇವಿ ಸಮರ್ಪಯಾಮಿ || ೩೫ ||
ಕೂಶ್ಮಾಂಡಕೋಶಾತಕಿಸಂಯುತಾನಿ
ಜಂಬೀರನಾರಂಗಸಮನ್ವಿತಾನಿ |
ಸಬೀಜಪೂರಾಣಿ ಸಬಾದರಾಣಿ
ಫಲಾನಿ ತೇ ದೇವಿ ಸಮರ್ಪಯಾಮಿ || ೩೬ ||
ಕರ್ಪೂರೇಣ ಯುತೈರ್ಲವಂಗಸಹಿತೈಸ್ತಕ್ಕೋಲಚೂರ್ಣಾನ್ವಿತೈಃ
ಸುಸ್ವಾದುಕ್ರಮುಕೈಃ ಸಗೌರಖದಿರೈಃ ಸುಸ್ನಿಗ್ಧಜಾತೀಫಲೈಃ |
ಮಾತಃ ಕೈತಕಪತ್ರಪಾಂಡುರುಚಿಭಿಸ್ತಾಂಬೂಲವಲ್ಲೀದಲೈಃ
ಸಾನಂದಂ ಮುಖಮಂಡನಾರ್ಥಮತುಲಂ ತಾಂಬೂಲಮಂಗೀಕುರು || ೩೭ ||
ಏಲಾಲವಂಗಾದಿಸಮನ್ವಿತಾನಿ
ತಕ್ಕೋಲಕರ್ಪೂರವಿಮಿಶ್ರಿತಾನಿ |
ತಾಂಬೂಲವಲ್ಲೀದಲಸಂಯುತಾನಿ
ಪೂಗಾನಿ ತೇ ದೇವಿ ಸಮರ್ಪಯಾಮಿ || ೩೮ ||
ತಾಂಬೂಲನಿರ್ಜಿತಸುತಪ್ತಸುವರ್ಣವರ್ಣಂ
ಸ್ವರ್ಣಾಕ್ತಪೂಗಫಲಮೌಕ್ತಿಕಚೂರ್ಣಯುಕ್ತಮ್ |
ಸೌವರ್ಣಪಾತ್ರನಿಹಿತಂ ಖದಿರೇನ ಸಾರ್ಧಂ
ತಾಂಬೂಲಮಂಬ ವದನಾಂಬುರುಹೇ ಗೃಹಾಣ || ೩೯ ||
ಮಹತಿ ಕನಕಪಾತ್ರೇ ಸ್ಥಾಪಯಿತ್ವಾ ವಿಶಾಲಾನ್
ಡಮರುಸದೃಶರೂಪಾನ್ಬದ್ಧಗೋಧೂಮದೀಪಾನ್ |
ಬಹುಘೃತಮಥ ತೇಷು ನ್ಯಸ್ಯ ದೀಪಾನ್ಪ್ರಕೃಷ್ಟಾ-
-ನ್ಭುವನಜನನಿ ಕುರ್ವೇ ನಿತ್ಯಮಾರಾರ್ತಿಕಂ ತೇ || ೪೦ ||
ಸವಿನಯಮಥ ದತ್ವಾ ಜಾನುಯುಗ್ಮಂ ಧರಣ್ಯಾಂ
ಸಪದಿ ಶಿರಸಿ ಧೃತ್ವಾ ಪಾತ್ರಮಾರಾರ್ತಿಕಸ್ಯ |
ಮುಖಕಮಲಸಮೀಪೇ ತೇಽಂಬ ಸಾರ್ಥಂ ತ್ರಿವಾರಂ
ಭ್ರಮಯತಿ ಮಯಿ ಭೂಯಾತ್ತೇ ಕೃಪಾರ್ದ್ರಃ ಕಟಾಕ್ಷಃ || ೪೧ ||
ಅಥ ಬಹುಮಣಿಮಿಶ್ರೈರ್ಮೌಕ್ತಿಕೈಸ್ತ್ವಾಂ ವಿಕೀರ್ಯ
ತ್ರಿಭುವನಕಮನೀಯೈಃ ಪೂಜಯಿತ್ವಾ ಚ ವಸ್ತ್ರೈಃ |
ಮಿಲಿತವಿವಿಧಮುಕ್ತಾಂ ದಿವ್ಯಮಾಣಿಕ್ಯಯುಕ್ತಾಂ
ಜನನಿ ಕನಕವೃಷ್ಟಿಂ ದಕ್ಷಿಣಾಂ ತೇಽರ್ಪಯಾಮಿ || ೪೨ ||
ಮಾತಃ ಕಾಂಚನದಂಡಮಂಡಿತಮಿದಂ ಪೂರ್ಣೇಂದುಬಿಂಬಪ್ರಭಂ
ನಾನಾರತ್ನವಿಶೋಭಿಹೇಮಕಲಶಂ ಲೋಕತ್ರಯಾಹ್ಲಾದಕಮ್ |
ಭಾಸ್ವನ್ಮೌಕ್ತಿಕಜಾಲಿಕಾಪರಿವೃತಂ ಪ್ರೀತ್ಯಾತ್ಮಹಸ್ತೇ ಧೃತಂ
ಛತ್ರಂ ತೇ ಪರಿಕಲ್ಪಯಾಮಿ ಶಿರಸಿ ತ್ವಷ್ಟ್ರಾ ಸ್ವಯಂ ನಿರ್ಮಿತಮ್ || ೪೩ ||
ಶರದಿಂದುಮರೀಚಿಗೌರವರ್ಣೈ-
-ರ್ಮಣಿಮುಕ್ತಾವಿಲಸತ್ಸುವರ್ಣದಂಡೈಃ |
ಜಗದಂಬ ವಿಚಿತ್ರಚಾಮರೈಸ್ತ್ವಾ-
-ಮಹಮಾನಂದಭರೇಣ ವೀಜಯಾಮಿ || ೪೪ ||
ಮಾರ್ತಾಂಡಮಂಡಲನಿಭೋ ಜಗದಂಬ ಯೋಽಯಂ
ಭಕ್ತ್ಯಾ ಮಯಾ ಮಣಿಮಯೋ ಮುಕುರೋಽರ್ಪಿತಸ್ತೇ |
ಪೂರ್ಣೇಂದುಬಿಂಬರುಚಿರಂ ವದನಂ ಸ್ವಕೀಯ-
-ಮಸ್ಮಿನ್ವಿಲೋಕಯ ವಿಲೋಲವಿಲೋಚನೇ ತ್ವಮ್ || ೪೫ ||
ಇಂದ್ರಾದಯೋ ನತಿನತೈರ್ಮಕುಟಪ್ರದೀಪೈ-
-ರ್ನೀರಾಜಯಂತಿ ಸತತಂ ತವ ಪಾದಪೀಠಮ್ |
ತಸ್ಮಾದಹಂ ತವ ಸಮಸ್ತಶರೀರಮೇತ-
-ನ್ನೀರಾಜಯಾಮಿ ಜಗದಂಬ ಸಹಸ್ರದೀಪೈಃ || ೪೬ ||
ಪ್ರಿಯಗತಿರತಿತುಂಗೋ ರತ್ನಪಲ್ಯಾಣಯುಕ್ತಃ
ಕನಕಮಯವಿಭೂಷಃ ಸ್ನಿಗ್ಧಗಂಭೀರಘೋಷಃ |
ಭಗವತಿ ಕಲಿತೋಽಯಂ ವಾಹನಾರ್ಥಂ ಮಯಾ ತೇ
ತುರಗಶತಸಮೇತೋ ವಾಯುವೇಗಸ್ತುರಂಗಃ || ೪೭ ||
ಮಧುಕರವೃತಕುಂಭನ್ಯಸ್ತಸಿಂದೂರರೇಣುಃ
ಕನಕಕಲಿತಘಂಟಾಕಿಂಕಣೀಶೋಭಿಕಂಠಃ |
ಶ್ರವಣಯುಗಲಚಂಚಚ್ಚಾಮರೋ ಮೇಘತುಲ್ಯೋ
ಜನನಿ ತವ ಮುದೇ ಸ್ಯಾನ್ಮತ್ತಮಾತಂಗ ಏಷಃ || ೪೮ ||
ದ್ರುತತರತುರಗೈರ್ವಿರಾಜಮಾನಂ
ಮಣಿಮಯಚಕ್ರಚತುಷ್ಟಯೇನ ಯುಕ್ತಮ್ |
ಕನಕಮಯಮಮುಂ ವಿತಾನವಂತಂ
ಭಗವತಿ ತೇ ಹಿ ರಥಂ ಸಮರ್ಪಯಾಮಿ || ೪೯ ||
ಹಯಗಜರಥಪತ್ತಿಶೋಭಮಾನಂ
ದಿಶಿ ದಿಶಿ ದುಂದುಭಿಮೇಘನಾದಯುಕ್ತಮ್ |
ಅತಿಬಹು ಚತುರಂಗಸೈನ್ಯಮೇತ-
-ದ್ಭಗವತಿ ಭಕ್ತಿಭರೇಣ ತೇಽರ್ಪಯಾಮಿ || ೫೦ ||
ಪರಿಘೀಕೃತಸಪ್ತಸಾಗರಂ
ಬಹುಸಂಪತ್ಸಹಿತಂ ಮಯಾಂಬ ತೇ ವಿಪುಲಮ್ |
ಪ್ರಬಲಂ ಧರಣೀತಲಾಭಿಧಂ
ದೃಢದುರ್ಗಂ ನಿಖಿಲಂ ಸಮರ್ಪಯಾಮಿ || ೫೧ ||
ಶತಪತ್ರಯುತೈಃ ಸ್ವಭಾವಶೀತೈ-
-ರತಿಸೌರಭ್ಯಯುತೈಃ ಪರಾಗಪೀತೈಃ |
ಭ್ರಮರೀಮುಖರೀಕೃತೈರನಂತೈ-
-ರ್ವ್ಯಜನೈಸ್ತ್ವಾಂ ಜಗದಂಬ ವೀಜಯಾಮಿ || ೫೨ ||
ಭ್ರಮರಲುಲಿತಲೋಲಕುಂತಲಾಲೀ-
-ವಿಗಲಿತಮಾಲ್ಯವಿಕೀರ್ಣರಂಗಭೂಮಿಃ |
ಇಯಮತಿರುಚಿರಾ ನಟೀ ನಟಂತೀ
ತವ ಹೃದಯೇ ಮುದಮಾತನೋತು ಮಾತಃ || ೫೩ ||
ಮುಖನಯನವಿಲಾಸಲೋಲವೇಣೀ-
-ವಿಲಸಿತನಿರ್ಜಿತಲೋಲಭೃಂಗಮಾಲಾಃ |
ಯುವಜನಸುಖಕಾರಿಚಾರುಲೀಲಾ
ಭಗವತಿ ತೇ ಪುರತೋ ನಟಂತಿ ಬಾಲಾಃ || ೫೪ ||
ಭ್ರಮದಲಿಕುಲತುಲ್ಯಾಲೋಲಧಮ್ಮಿಲ್ಲಭಾರಾಃ
ಸ್ಮಿತಮುಖಕಮಲೋದ್ಯದ್ದಿವ್ಯಲಾವಣ್ಯಪೂರಾಃ |
ಅನುಪಮಿತಸುವೇಷಾ ವಾರಯೋಷಾ ನಟಂತಿ
ಪರಭೃತಕಲಕಂಠ್ಯೋ ದೇವಿ ದೈನ್ಯಂ ಧುನೋತು || ೫೫ ||
ಡಮರುಡಿಂಡಿಮಜರ್ಝರಝಲ್ಲರೀ-
-ಮೃದುರವದ್ರಗಡದ್ದ್ರಗಡಾದಯಃ |
ಝಟಿತಿ ಝಾಂಕೃತಝಾಂಕೃತಝಾಂಕೃತೈ-
-ರ್ಬಹುದಯಂ ಹೃದಯಂ ಸುಖಯಂತು ತೇ || ೫೬ ||
ವಿಪಂಚೀಷು ಸಪ್ತಸ್ವರಾನ್ವಾದಯಂತ್ಯ-
-ಸ್ತವ ದ್ವಾರಿ ಗಾಯಂತಿ ಗಂಧರ್ವಕನ್ಯಾಃ |
ಕ್ಷಣಂ ಸಾವಧಾನೇನ ಚಿತ್ತೇನ ಮಾತಃ
ಸಮಾಕರ್ಣಯ ತ್ವಂ ಮಯಾ ಪ್ರಾರ್ಥಿತಾಸಿ || ೫೭ ||
ಅಭಿನಯಕಮನೀಯೈರ್ನರ್ತನೈರ್ನರ್ತಕೀನಾಂ
ಕ್ಷಣಮಪಿ ರಮಯಿತ್ವಾ ಚೇತ ಏತತ್ತ್ವದೀಯಮ್ |
ಸ್ವಯಮಹಮತಿಚಿತ್ರೈರ್ನೃತ್ತವಾದಿತ್ರಗೀತೈ-
-ರ್ಭಗವತಿ ಭವದೀಯಂ ಮಾನಸಂ ರಂಜಯಾಮಿ || ೫೮ ||
ತವ ದೇವಿ ಗುಣಾನುವರ್ಣನೇ
ಚತುರಾ ನೋ ಚತುರಾನನಾದಯಃ |
ತದಿಹೈಕಮುಖೇಷು ಜಂತುಷು
ಸ್ತವನಂ ಕಸ್ತವ ಕರ್ತುಮೀಶ್ವರಃ || ೫೯ ||
ಪದೇ ಪದೇ ಯತ್ಪರಿಪೂಜಕೇಭ್ಯಃ
ಸದ್ಯೋಽಶ್ವಮೇಧಾದಿಫಲಂ ದದಾತಿ |
ತತ್ಸರ್ವಪಾಪಕ್ಷಯ ಹೇತುಭೂತಂ
ಪ್ರದಕ್ಷಿಣಂ ತೇ ಪರಿತಃ ಕರೋಮಿ || ೬೦ ||
ರಕ್ತೋತ್ಪಲಾರಕ್ತಲತಾಪ್ರಭಾಭ್ಯಾಂ
ಧ್ವಜೋರ್ಧ್ವರೇಖಾಕುಲಿಶಾಂಕಿತಾಭ್ಯಾಮ್ |
ಅಶೇಷಬೃಂದಾರಕವಂದಿತಾಭ್ಯಾಂ
ನಮೋ ಭವಾನೀಪದಪಂಕಜಾಭ್ಯಾಮ್ || ೬೧ ||
ಚರಣನಲಿನಯುಗ್ಮಂ ಪಂಕಜೈಃ ಪೂಜಯಿತ್ವಾ
ಕನಕಕಮಲಮಾಲಾಂ ಕಂಠದೇಶೇಽರ್ಪಯಿತ್ವಾ |
ಶಿರಸಿ ವಿನಿಹಿತೋಽಯಂ ರತ್ನಪುಷ್ಪಾಂಜಲಿಸ್ತೇ
ಹೃದಯಕಮಲಮಧ್ಯೇ ದೇವಿ ಹರ್ಷಂ ತನೋತು || ೬೨ ||
ಅಥ ಮಣಿಮಯಮಂಚಕಾಭಿರಾಮೇ
ಕನಕಮಯವಿತಾನರಾಜಮಾನೇ |
ಪ್ರಸರದಗರುಧೂಪಧೂಪಿತೇಽಸ್ಮಿ-
-ನ್ಭಗವತಿ ಭವನೇಽಸ್ತು ತೇ ನಿವಾಸಃ || ೬೩ ||
ಏತಸ್ಮಿನ್ಮಣಿಖಚಿತೇ ಸುವರ್ಣಪೀಠೇ
ತ್ರೈಲೋಕ್ಯಾಭಯವರದೌ ನಿಧಾಯ ಹಸ್ತೌ |
ವಿಸ್ತೀರ್ಣೇ ಮೃದುಲತರೋತ್ತರಚ್ಛದೇಽಸ್ಮಿ-
-ನ್ಪರ್ಯಂಕೇ ಕನಕಮಯೇ ನಿಷೀದ ಮಾತಃ || ೬೪ ||
ತವ ದೇವಿ ಸರೋಜಚಿಹ್ನಯೋಃ
ಪದಯೋರ್ನಿರ್ಜಿತಪದ್ಮರಾಗಯೋಃ |
ಅತಿರಕ್ತತರೈರಲಕ್ತಕೈಃ
ಪುನರುಕ್ತಾಂ ರಚಯಾಮಿ ರಕ್ತತಾಮ್ || ೬೫ ||
ಅಥ ಮಾತರುಶೀರವಾಸಿತಂ
ನಿಜತಾಂಬೂಲರಸೇನ ರಂಜಿತಮ್ |
ತಪನೀಯಮಯೇ ಹಿ ಪಟ್ಟಕೇ
ಮುಖಗಂಡೂಷಜಲಂ ವಿಧೀಯತಾಮ್ || ೬೬ ||
ಕ್ಷಣಮಥ ಜಗದಂಬ ಮಂಚಕೇಽಸ್ಮಿ-
-ನ್ಮೃದುತಲತೂಲಿಕಯಾ ವಿರಾಜಮಾನೇ |
ಅತಿರಹಸಿ ಮುದಾ ಶಿವೇನ ಸಾರ್ಧಂ
ಸುಖಶಯನಂ ಕುರು ತತ್ರ ಮಾಂ ಸ್ಮರಂತೀ || ೬೭ ||
ಮುಕ್ತಾಕುಂದೇಂದುಗೌರಾಂ ಮಣಿಮಯಮಕುಟಾಂ ರತ್ನತಾಟಂಕಯುಕ್ತಾ-
-ಮಕ್ಷಸ್ರಕ್ಪುಷ್ಪಹಸ್ತಾಮಭಯವರಕರಾಂ ಚಂದ್ರಚೂಡಾಂ ತ್ರಿನೇತ್ರಾಮ್ |
ನಾನಾಲಂಕಾರಯುಕ್ತಾಂ ಸುರಮಕುಟಮಣಿದ್ಯೋತಿತಸ್ವರ್ಣಪೀಠಾಂ
ಸಾನಂದಾಂ ಸುಪ್ರಸನ್ನಾಂ ತ್ರಿಭುವನಜನನೀಂ ಚೇತಸಾ ಚಿಂತಯಾಮಿ || ೬೮ ||
ಏಷಾ ಭಕ್ತ್ಯಾ ತವ ವಿರಚಿತಾ ಯಾ ಮಯಾ ದೇವಿ ಪೂಜಾ
ಸ್ವೀಕೃತ್ಯೈನಾಂ ಸಪದಿ ಸಕಲಾನ್ಮೇಽಪರಾಧಾನ್ ಕ್ಷಮಸ್ವ |
ನ್ಯೂನಂ ಯತ್ತತ್ತವ ಕರುಣಯಾ ಪೂರ್ಣತಾಮೇತು ಸದ್ಯಃ
ಸಾನಂದಂ ಮೇ ಹೃದಯಕಮಲೇ ತೇಽಸ್ತು ನಿತ್ಯಂ ನಿವಾಸಃ || ೬೯ ||
ಪೂಜಾಮಿಮಾಂ ಯಃ ಪಠತಿ ಪ್ರಭಾತೇ
ಮಧ್ಯಾಹ್ನಕಾಲೇ ಯದಿ ವಾ ಪ್ರದೋಷೇ |
ಧರ್ಮಾರ್ಥಕಾಮಾನ್ಪುರುಷೋಽಭ್ಯುಪೈತಿ
ದೇಹಾವಸಾನೇ ಶಿವಭಾವಮೇತಿ || ೭೦ ||
ಪೂಜಾಮಿಮಾಂ ಪಠೇನ್ನಿತ್ಯಂ ಪೂಜಾಂ ಕರ್ತುಮನೀಶ್ವರಃ |
ಪೂಜಾಫಲಮವಾಪ್ನೋತಿ ವಾಂಛಿತಾರ್ಥಂ ಚ ವಿಂದತಿ || ೭೧ ||
ಪ್ರತ್ಯಹಂ ಭಕ್ತಿಸಂಯುಕ್ತೋ ಯಃ ಪೂಜನಮಿದಂ ಪಠೇತ್ |
ವಾಗ್ವಾದಿನ್ಯಾಃ ಪ್ರಸಾದೇನ ವತ್ಸರಾತ್ಸ ಕವಿರ್ಭವೇತ್ || ೭೨ ||
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿಂದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಂಕರಭಗವತಃ ಕೃತೌ ದೇವೀ ಚತುಃಷಷ್ಟ್ಯುಪಚಾರಪೂಜಾ ಸ್ತೋತ್ರಮ್ |
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
