Read in తెలుగు / ಕನ್ನಡ / தமிழ் / देवनागरी / English (IAST)
ವಿಸ್ತಾರಾಯಾಮಮಾನಂ ದಶಭಿರುಪಗತೋ ಯೋಜನಾನಾಂ ಸಹಸ್ರೈ-
-ಶ್ಚಕ್ರೇ ಪಂಚಾರನಾಭಿತ್ರಿತಯವತಿ ಲಸನ್ನೇಮಿಷಟ್ಕೇ ನಿವಿಷ್ಟಃ |
ಸಪ್ತಶ್ಛಂದಸ್ತುರಂಗಾಹಿತವಹನಧುರೋ ಹಾಯನಾಂಶತ್ರಿವರ್ಗಃ
ವ್ಯಕ್ತಾಕ್ಲುಪ್ತಾಖಿಲಾಂಗಃ ಸ್ಫುರತು ಮಮ ಪುರಃ ಸ್ಯಂದನಶ್ಚಂಡಭಾನೋಃ || ೧ ||
ಆದಿತ್ಯೈರಪ್ಸರೋಭಿರ್ಮುನಿಭಿರಹಿವರೈರ್ಗ್ರಾಮಣೀಯಾತುಧಾನೈಃ
ಗಂಧರ್ವೈರ್ವಾಲಖಿಲ್ಯೈಃ ಪರಿವೃತದಶಮಾಂಶಸ್ಯ ಕೃತ್ಸ್ನಂ ರಥಸ್ಯ |
ಮಧ್ಯಂ ವ್ಯಾಪ್ಯಾಧಿತಿಷ್ಠನ್ ಮಣಿರಿವ ನಭಸೋ ಮಂಡಲಶ್ಚಂಡರಶ್ಮೇಃ
ಬ್ರಹ್ಮಜ್ಯೋತಿರ್ವಿವರ್ತಃ ಶ್ರುತಿನಿಕರಘನೀಭಾವರೂಪಃ ಸಮಿಂಧೇ || ೨ ||
ನಿರ್ಗಚ್ಛಂತೋಽರ್ಕಬಿಂಬಾನ್ನಿಖಿಲಜನಿಭೃತಾಂ ಹಾರ್ದನಾಡೀಪ್ರವಿಷ್ಟಾಃ
ನಾಡ್ಯೋ ವಸ್ವಾದಿಬೃಂದಾರಕಗಣಮಧುನಸ್ತಸ್ಯ ನಾನಾದಿಗುತ್ಥಾಃ |
ವರ್ಷಂತಸ್ತೋಯಮುಷ್ಣಂ ತುಹಿನಮಪಿ ಜಲಾನ್ಯಾಪಿಬಂತಃ ಸಮಂತಾತ್
ಪಿತ್ರಾದೀನಾಂ ಸ್ವಧೌಷಧ್ಯಮೃತರಸಕೃತೋ ಭಾಂತಿ ಕಾಂತಿಪ್ರರೋಹಾಃ || ೩ ||
ಶ್ರೇಷ್ಠಾಸ್ತೇಷಾಂ ಸಹಸ್ರೇ ತ್ರಿದಿವವಸುಧಯೋಃ ಪಂಚದಿಗ್ವ್ಯಾಪ್ತಿಭಾಜಾಂ
ಶುಭ್ರಾಂಶುಂ ತಾರಕೌಘಂ ಶಶಿತನಯಮುಖಾನ್ ಪಂಚ ಚೋದ್ಭಾಸಯಂತಃ |
ಆರೋಗೋ ಭ್ರಾಜಮುಖ್ಯಾಸ್ತ್ರಿಭುವನದಹನೇ ಸಪ್ತಸೂರ್ಯಾ ಭವಂತಃ
ಸರ್ವಾನ್ ವ್ಯಾಧೀನ್ ಸುಷುಮ್ನಾಪ್ರಭೃತಯ ಇಹ ಮೇ ಸೂರ್ಯಪಾದಾಃ ಕ್ಷಿಪಂತು || ೪ ||
ಆದಿತ್ಯಾನಾಶ್ರಿತಾಃ ಷಣ್ಣವತಿಗುಣಸಹಸ್ರಾನ್ವಿತಾ ರಶ್ಮಯೋಽನ್ಯೇ
ಮಾಸೇ ಮಾಸೇ ವಿಭಕ್ತಾಸ್ತ್ರಿಭುವನಭವನಂ ಪಾವಯಂತಃ ಸ್ಫುರಂತಿ |
ಯೇಷಾಂ ಭುವ್ಯಪ್ರಚಾರೇ ಜಗದವನಕೃತಾಂ ಸಪ್ತರಶ್ಮ್ಯುತ್ಥಿತಾನಾಂ
ಸಂಸರ್ಪೇ ಚಾಧಿಮಾಸೇ ವ್ರತಯಜನಮುಖಾಃ ಸತ್ಕ್ರಿಯಾಃ ನ ಕ್ರಿಯಂತೇ || ೫ ||
ಆದಿತ್ಯಂ ಮಂಡಲಾಂತಃಸ್ಫುರದರುಣವಪುಸ್ತೇಜಸಾ ವ್ಯಾಪ್ತವಿಶ್ವಂ
ಪ್ರಾತರ್ಮಧ್ಯಾಹ್ನಸಾಯಂ ಸಮಯವಿಭಜನಾದೃಗ್ಯಜುಃ ಸಾಮಸೇವ್ಯಮ್ |
ಪ್ರಾಪ್ಯಂ ಚ ಪ್ರಾಪಕಂ ಚ ಪ್ರಥಿತಮತಿಪಥಿಜ್ಞಾನಿನಾಮುತ್ತರಸ್ಮಿನ್
ಸಾಕ್ಷಾದ್ಬ್ರಹ್ಮೇತ್ಯುಪಾಸ್ಯಂ ಸಕಲಭಯಹರಾಭ್ಯುದ್ಗಮಂ ಸಂಶ್ರಯಾಮಿ || ೬ ||
ಯಚ್ಛಕ್ತ್ಯಾಽಧಿಷ್ಠಿತಾನಾಂ ತಪನಹಿಮಜಲೋತ್ಸರ್ಜನಾದಿರ್ಜಗತ್ಯಾ-
-ಮಾದಿತ್ಯಾನಾಮಶೇಷಃ ಪ್ರಭವತಿ ನಿಯತಃ ಸ್ವಸ್ವಮಾಸಾಧಿಕಾರಃ |
ಯತ್ ಪ್ರಾಧಾನ್ಯಂ ವ್ಯನಕ್ತಿ ಸ್ವಯಮಪಿ ಭಗವಾನ್ ದ್ವಾದಶಸ್ತೇಷು ಭೂತ್ವಾ
ತಂ ತ್ರೈಲೋಕ್ಯಸ್ಯ ಮೂಲಂ ಪ್ರಣಮತ ಪರಮಂ ದೈವತಂ ಸಪ್ತಸಪ್ತಿಮ್ || ೭ ||
ಸ್ವಃಸ್ತ್ರೀಗಂಧರ್ವಯಕ್ಷಾ ಮುನಿವರಭುಜಗಾ ಯಾತುಧಾನಾಶ್ಚ ನಿತ್ಯಂ
ನೃತ್ತೈರ್ಗೀತೈರಭೀಶುಗ್ರಹನುತಿವಹನೈರಗ್ರತಃ ಸೇವಯಾ ಚ |
ಯಸ್ಯ ಪ್ರೀತಿಂ ವಿತನ್ವಂತ್ಯಮಿತಪರಿಕರಾ ದ್ವಾದಶ ದ್ವಾದಶೈತೇ
ಹೃದ್ಯಾಭಿರ್ವಾಲಖಿಲ್ಯಾಃ ಸರಣಿಭಣಿತಿಭಿಸ್ತಂ ಭಜೇ ಲೋಕಬಂಧುಮ್ || ೮ ||
ಬ್ರಹ್ಮಾಂಡೇ ಯಸ್ಯ ಜನ್ಮೋದಿತಮುಷಸಿ ಪರಬ್ರಹ್ಮಮುಖ್ಯಾತ್ಮಜಸ್ಯ
ಧ್ಯೇಯಂ ರೂಪಂ ಶಿರೋದೋಶ್ಚರಣಪದಜುಷಾ ವ್ಯಾಹೃತೀನಾಂ ತ್ರಯೇಣ |
ತತ್ಸತ್ಯಂ ಬ್ರಹ್ಮ ಪಶ್ಯಾಮ್ಯಹರಹಮಭಿಧಂ ನಿತ್ಯಮಾದಿತ್ಯರೂಪಂ
ಭೂತಾನಾಂ ಭೂನಭಃ ಸ್ವಃ ಪ್ರಭೃತಿಷು ವಸತಾಂ ಪ್ರಾಣಸೂಕ್ಷ್ಮಾಂಶಮೇಕಮ್ || ೯ ||
ಆದಿತ್ಯೇ ಲೋಕಚಕ್ಷುಷ್ಯವಹಿತಮನಸಾಂ ಯೋಗಿನಾಂ ದೃಶ್ಯಮಂತಃ
ಸ್ವಚ್ಛಸ್ವರ್ಣಾಭಮೂರ್ತಿಂ ವಿದಲಿತನಲಿನೋದಾರದೃಶ್ಯಾಕ್ಷಿಯುಗ್ಮಮ್ |
ಋಕ್ಸಾಮೋದ್ಗಾನಗೇಷ್ಣಂ ನಿರತಿಶಯಲಸಲ್ಲೋಕಕಾಮೇಶಭಾವಂ
ಸರ್ವಾವದ್ಯೋದಿತತ್ವಾದುದಿತಸಮುದಿತಂ ಬ್ರಹ್ಮ ಶಂಭುಂ ಪ್ರಪದ್ಯೇ || ೧೦ ||
ಓಮಿತ್ಯುದ್ಗೀಥಭಕ್ತೇರವಯವಪದವೀಂ ಪ್ರಾಪ್ತವತ್ಯಕ್ಷರೇಽಸ್ಮಿನ್
ಯಸ್ಯೋಪಾಸ್ತಿಃ ಸಮಸ್ತಂ ದುರಿತಮಪನಯತ್ವರ್ಕಬಿಂಬೇ ಸ್ಥಿತಸ್ಯ |
ಯತ್ಪೂಜೈಕಪ್ರಧಾನಾನ್ಯಘಮಖಿಲಮಪಿ ಘ್ನಂತಿ ಕೃಚ್ಛ್ರವ್ರತಾನಿ
ಧ್ಯಾತಃ ಸರ್ವೋಪತಾಪಾನ್ ಹರತು ಪರಶಿವಃ ಸೋಽಯಮಾದ್ಯೋ ಭಿಷಙ್ನಃ || ೧೧ ||
ಆದಿತ್ಯೇ ಮಂಡಲಾರ್ಚಿಃ ಪುರುಷವಿಭಿದಯಾದ್ಯಂತಮಧ್ಯಾಗಮಾತ್ಮ-
-ನ್ಯಾಗೋಪಾಲಾಂಗನಾಭ್ಯೋ ನಯನಪಥಜುಷಾ ಜ್ಯೋತಿಷಾ ದೀಪ್ಯಮಾನಮ್ |
ಗಾಯತ್ರೀಮಂತ್ರಸೇವ್ಯಂ ನಿಖಿಲಜನಧಿಯಾಂ ಪ್ರೇರಕಂ ವಿಶ್ವರೂಪಮ್ |
ನೀಲಗ್ರೀವಂ ತ್ರಿನೇತ್ರಂ ಶಿವಮನಿಶಮುಮಾವಲ್ಲಭಂ ಸಂಶ್ರಯಾಮಿ || ೧೨ ||
ಅಭ್ರಾಕಲ್ಪಃ ಶತಾಂಗಃ ಸ್ಥಿರಫಣಿತಿಮಯಂ ಮಂಡಲಂ ರಶ್ಮಿಭೇದಾಃ
ಸಾಹಸ್ರಾಸ್ತೇಷು ಸಪ್ತ ಶ್ರುತಿಭಿರಭಿಹಿತಾಃ ಕಿಂಚಿದೂನಾಶ್ಚ ಲಕ್ಷಾಃ |
ಏಕೈಕೇಷಾಂ ಚತಸ್ರಸ್ತದನು ದಿನಮಣೇರಾದಿದೇವಸ್ಯ ತಿಸ್ರಃ
ಕ್ಲುಪ್ತಾಃ ತತ್ತತ್ಪ್ರಭಾವಪ್ರಕಟನಮಹಿತಾಃ ಸ್ರಗ್ಧರಾ ದ್ವಾದಶೈತಾಃ || ೧೩ ||
ದುಃಸ್ವಪ್ನಂ ದುರ್ನಿಮಿತ್ತಂ ದುರಿತಮಖಿಲಮಪ್ಯಾಮಯಾನಪ್ಯಸಾಧ್ಯಾನ್
ದೋಷಾನ್ ದುಃಸ್ಥಾನಸಂಸ್ಥಗ್ರಹಗಣಜನಿತಾನ್ ದುಷ್ಟಭೂತಾನ್ ಗ್ರಹಾದೀನ್ |
ನಿರ್ಧೂನೋತಿ ಸ್ಥಿರಾಂ ಚ ಶ್ರಿಯಮಿಹ ಲಭತೇ ಮುಕ್ತಿಮಭ್ಯೇತಿ ಚಾಂತೇ
ಸಂಕೀರ್ತ್ಯ ಸ್ತೋತ್ರರತ್ನಂ ಸಕೃದಪಿ ಮನುಜಃ ಪ್ರತ್ಯಹಂ ಪತ್ಯುರಹ್ನಾಮ್ || ೧೪ ||
ಇತಿ ಶ್ರೀಮದಪ್ಪಯ್ಯದೀಕ್ಷಿತ ವಿರಚಿತಂ ಮಹಾಮಹಿಮಾನ್ವಿತ ಶ್ರೀ ಆದಿತ್ಯ ಸ್ತೋತ್ರರತ್ನಮ್ |
ಇನ್ನಷ್ಟು ಶ್ರೀ ಸೂರ್ಯ ಸ್ತೋತ್ರಗಳು ನೋಡಿ. ಇನ್ನಷ್ಟು ನವಗ್ರಹ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
