Read in తెలుగు / ಕನ್ನಡ / தமிழ் / देवनागरी / English (IAST)
ಶ್ರೀದೇವ್ಯುವಾಚ |
ವಿನಾ ತಪೋ ವಿನಾ ಧ್ಯಾನಂ ವಿನಾ ಹೋಮಂ ವಿನಾ ಜಪಮ್ |
ಅನಾಯಾಸೇನ ವಿಘ್ನೇಶಪ್ರೀಣನಂ ವದ ಮೇ ಪ್ರಭೋ || ೧ ||
ಮಹೇಶ್ವರ ಉವಾಚ |
ಮಂತ್ರಾಕ್ಷರಾವಲಿಸ್ತೋತ್ರಂ ಮಹಾಸೌಭಾಗ್ಯವರ್ಧನಮ್ |
ದುರ್ಲಭಂ ದುಷ್ಟಮನಸಾಂ ಸುಲಭಂ ಶುದ್ಧಚೇತಸಾಮ್ || ೨ ||
ಮಹಾಗಣಪತಿಪ್ರೀತಿಪ್ರತಿಪಾದಕಮಂಜಸಾ |
ಕಥಯಾಮಿ ಘನಶ್ರೋಣಿ ಕರ್ಣಾಭ್ಯಾಮವತಂಸಯ || ೩ ||
ಓಂಕಾರವಲಯಾಕಾರಂ ಅಚ್ಛಕಲ್ಲೋಲಮಾಲಿಕಮ್ |
ಐಕ್ಷವಂ ಚೇತಸಾ ವಂದೇ ಸಿಂಧುಂ ಸಂಧುಕ್ಷಿತಸ್ವನಮ್ || ೪ ||
ಶ್ರೀಮಂತಮಿಕ್ಷುಜಲಧೇಃ ಅಂತರಭ್ಯುದಿತಂ ನುಮಃ |
ಮಣಿದ್ವೀಪಂ ಮಹಾಕಾರಂ ಮಹಾಕಲ್ಪಂ ಮಹೋದಯಮ್ || ೫ ||
ಹ್ರೀಪ್ರದೇನ ಮಹಾಧಾಮ್ನಾ ಧಾಮ್ನಾಮೀಶೇ ವಿಭಾರಕೇ |
ಕಲ್ಪೋದ್ಯಾನಸ್ಥಿತಂ ವಂದೇ ಭಾಸ್ವಂತಂ ಮಣಿಮಂಡಪಮ್ || ೬ ||
ಕ್ಲೀಬಸ್ಯಾಪಿ ಸ್ಮರೋನ್ಮಾದಕಾರಿಶೃಂಗಾರಶಾಲಿನಿ |
ತನ್ಮಧ್ಯೇ ಗಣನಾಥಸ್ಯ ಮಣಿಸಿಂಹಾಸನಂ ಭಜೇ || ೭ ||
ಗ್ಲೌಕಲಾಭಿರಿವಾಚ್ಛಾಭಿಸ್ತೀವ್ರಾದಿನವಶಕ್ತಿಭಿಃ |
ಜುಷ್ಟಂ ಲಿಪಿಮಯಂ ಪದ್ಮಂ ಧರ್ಮಾದ್ಯಾಶ್ರಯಮಾಶ್ರಯೇ || ೮ ||
ಗಂಭೀರಮಿವ ತತ್ರಾಬ್ಧಿಂ ವಸಂತಂ ತ್ರ್ಯಶ್ರಮಂಡಲೇ |
ಉತ್ಸಂಗಗತಲಕ್ಷ್ಮೀಕಂ ಉದ್ಯತ್ತಿಗ್ಮಾಂಶುಪಾಟಲಮ್ || ೯ ||
ಗದೇಕ್ಷುಕಾರ್ಮುಕರುಜಾಚಕ್ರಾಂಬುಜಗುಣೋತ್ಪಲೈಃ |
ವ್ರೀಹ್ಯಗ್ರನಿಜದಂತಾಗ್ರಕಲಶೀಮಾತುಲುಂಗಕೈಃ || ೧೦ ||
ಣಷಷ್ಠವರ್ಣವಾಚ್ಯಸ್ಯ ದಾರಿದ್ರ್ಯಸ್ಯ ವಿಭಂಜಕೈಃ |
ಏತೈರೇಕಾದಶಕರಾನ್ ಅಲಂಕುರ್ವಾಣಮುನ್ಮದಮ್ || ೧೧ ||
ಪರಾನಂದಮಯಂ ಭಕ್ತಪ್ರತ್ಯೂಹವ್ಯೂಹನಾಶನಮ್ |
ಪರಮಾರ್ಥಪ್ರಬೋಧಾಬ್ಧಿಂ ಪಶ್ಯಾಮಿ ಗಣನಾಯಕಮ್ || ೧೨ ||
ತತ್ಪುರಃ ಪ್ರಸ್ಫುರದ್ಬಿಲ್ವಮೂಲಪೀಠಸಮಾಶ್ರಯೌ |
ರಮಾರಮೇಶೌ ವಿಮೃಶಾಮ್ಯಶೇಷಶುಭದಾಯಕೌ || ೧೩ ||
ಯೇನ ದಕ್ಷಿಣಭಾಗಸ್ಥನ್ಯಗ್ರೋಧತಲಮಾಶ್ರಿತಮ್ |
ಸಾಕಲ್ಪಂ ಸಾಯುಧಂ ವಂದೇ ತಂ ಸಾಂಬಂ ಪರಮೇಶ್ವರಮ್ || ೧೪ ||
ವರಸಂಭೋಗರುಚಿರೌ ಪಶ್ಚಿಮೇ ಪಿಪ್ಪಲಾಶ್ರಯೌ |
ರಮಣೀಯತರೌ ವಂದೇ ರತಿಪುಷ್ಪಶಿಲೀಮುಖೌ | ೧೫ ||
ರಮಮಾಣೌ ಗಣೇಶಾನೋತ್ತರದಿಕ್ಫಲಿನೀತಲೇ |
ಭೂಭೂಧರಾವುದಾರಾಭೌ ಭಜೇ ಭುವನಪಾಲಕೌ || ೧೬ ||
ವಲಮಾನವಪುರ್ಜ್ಯೋತಿಃ ಕಡಾರಿತಕಕುಪ್ತಟೀಃ |
ಹೃದಯಾದ್ಯಂಗಷಡ್ದೇವೀರಂಗರಕ್ಷಾಕೃತೇ ಭಜೇ || ೧೭ ||
ರದಕಾಂಡರುಚಿಜ್ಯೋತ್ಸ್ನಾಕಾಶಗಂಡಸ್ರವನ್ಮದಮ್ |
ಋದ್ಧ್ಯಾಶ್ಲೇಷಕೃತಾಮೋದಮಾಮೋದಂ ದೇವಮಾಶ್ರಯೇ || ೧೮ ||
ದಲತ್ಕಪೋಲವಿಗಲನ್ಮದಧಾರಾವಲಾಹಕಮ್ |
ಸಮೃದ್ಧಿತಟಿದಾಶ್ಲಿಷ್ಟಂ ಪ್ರಮೋದಂ ಹೃದಿ ಭಾವಯೇ || ೧೯ ||
ಸಕಾಂತಿಂ ಕಾಂತಿಲತಿಕಾಪರಿರಬ್ಧತನುಂ ಭಜೇ |
ಭುಜಪ್ರಕಾಂಡಸಚ್ಛಾಯಂ ಸುಮುಖಂ ಕಲ್ಪಪಾದಪಮ್ || ೨೦ ||
ವಂದೇ ತುಂದಿಲಮಿಂಧಾನಂ ಚಂದ್ರಕಂದಲಶೀತಲಮ್ |
ದುರ್ಮುಖಂ ಮದನಾವತ್ಯಾ ನಿರ್ಮಿತಾಲಿಂಗನಾಮೃತಮ್ || ೨೧ ||
ಜಂಭವೈರಿಕೃತಾಭ್ಯರ್ಚ್ಯೌ ಜಗದಭ್ಯುದಯಪ್ರದೌ |
ಅಹಂ ಮದದ್ರವಾವಿಘ್ನೌ ಹತಯೇ ತ್ವೇನಸಾಂ ಶ್ರಯೇ || ೨೨ ||
ನವಶೃಂಗಾರರುಚಿರೌ ನಮತ್ಸರ್ವಸುರಾಸುರೌ |
ದ್ರಾವಿಣೀವಿಘ್ನಕರ್ತಾರೌ ದ್ರಾವಯೇತಾಂ ದರಿದ್ರತಾಮ್ || ೨೩ ||
ಮೇದುರಂ ಮೌಕ್ತಿಕಾಸಾರಂ ವರ್ಷಂತೌ ಭಕ್ತಿಶಾಲಿನಾಮ್ |
ವಸುಧಾರಾಶಂಖನಿಧೀ ವಾಕ್ಪುಷ್ಪಾಂಜಲಿಭಿಃ ಸ್ತುಮಃ || ೨೪ ||
ವರ್ಷಂತೌ ರತ್ನವರ್ಷೇಣ ವಲದ್ಬಾಲಾತಪತ್ವಿಷೌ |
ವರದೌ ನಮತಾಂ ವಂದೇ ವಸುಧಾಪದ್ಮಶೇವಧೀ || ೨೫ ||
ಶಮಿತಾಧಿಮಹಾವ್ಯಾಧೀಃ ಸಾಂದ್ರಾನಂದಕರಂಬಿತಾಃ |
ಬ್ರಾಹ್ಮ್ಯಾದೀಃ ಕಲಯೇ ಶಕ್ತೀಃ ಶಕ್ತೀನಾಮಭಿವೃದ್ಧಯೇ || ೨೬ ||
ಮಾಮವಂತು ಮಹೇಂದ್ರಾದ್ಯಾ ದಿಕ್ಪಾಲಾ ದರ್ಪಶಾಲಿನಃ |
ಸಂನತಾಃ ಶ್ರೀಗಣಾಧೀಶಂ ಸವಾಹಾಯುಧಶಕ್ತಯಃ || ೨೭ ||
ನವೀನಪಲ್ಲವಚ್ಛಾಯಾದಾಯಾದವಪುರುಜ್ಜ್ವಲಮ್ |
ಮೇದಸ್ವಿ ಮದನಿಷ್ಯಂದಸ್ರೋತಸ್ವಿ ಕಟಕೋಟರಮ್ || ೨೮ ||
ಯಜಮಾನತನುಂ ಯಾಗರೂಪಿಣಂ ಯಜ್ಞಪೂರುಷಮ್ |
ಯಮಂ ಯಮವತಾಮರ್ಚ್ಯಂ ಯತ್ನಭಾಜಾಮದುರ್ಲಭಮ್ || ೨೯ ||
ಸ್ವಾರಸ್ಯಪರಮಾನಂದಸ್ವರೂಪಂ ಸ್ವಯಮುದ್ಗತಮ್ |
ಸ್ವಯಂ ವೇದ್ಯಂ ಸ್ವಯಂ ಶಕ್ತಂ ಸ್ವಯಂ ಕೃತ್ಯತ್ರಯಾಕರಮ್ || ೩೦ ||
ಹಾರಕೇಯೂರ ಮುಕುಟಕನಕಾಂಗದ ಕುಂಡಲೈಃ |
ಅಲಂಕೃತಂ ಚ ವಿಘ್ನಾನಾಂ ಹರ್ತಾರಂ ದೇವಮಾಶ್ರಯೇ || ೩೧ ||
ಮಂತ್ರಾಕ್ಷರಾವಲಿಸ್ತೋತ್ರಂ ಕಥಿತಂ ತವ ಸುಂದರಿ |
ಸಮಸ್ತಮೀಪ್ಸಿತಂ ತೇನ ಸಂಪಾದಯ ಶಿವೇ ಶಿವಮ್ || ೩೨ ||
ಇತಿ ಶ್ರೀ ಗಣಪತಿ ಮಂತ್ರಾಕ್ಷರಾವಲಿ ಸ್ತೋತ್ರಮ್ |
ಇನ್ನಷ್ಟು ಶ್ರೀ ಗಣೇಶ ಸ್ತೋತ್ರಗಳು ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
