Read in తెలుగు / ಕನ್ನಡ / தமிழ் / देवनागरी / English (IAST)
ಅಸ್ಯ ಶ್ರೀರಾಮಚಂದ್ರ ಸ್ತವರಾಜಸ್ತೋತ್ರಮಂತ್ರಸ್ಯ ಸನತ್ಕುಮಾರಋಷಿಃ | ಶ್ರೀರಾಮೋ ದೇವತಾ | ಅನುಷ್ಟುಪ್ ಛಂದಃ | ಸೀತಾ ಬೀಜಮ್ | ಹನುಮಾನ್ ಶಕ್ತಿಃ | ಶ್ರೀರಾಮಪ್ರೀತ್ಯರ್ಥೇ ಜಪೇ ವಿನಿಯೋಗಃ ||
ಸೂತ ಉವಾಚ |
ಸರ್ವಶಾಸ್ತ್ರಾರ್ಥತತ್ತ್ವಜ್ಞಂ ವ್ಯಾಸಂ ಸತ್ಯವತೀಸುತಮ್ |
ಧರ್ಮಪುತ್ರಃ ಪ್ರಹೃಷ್ಟಾತ್ಮಾ ಪ್ರತ್ಯುವಾಚ ಮುನೀಶ್ವರಮ್ || ೧ ||
ಯುಧಿಷ್ಠಿರ ಉವಾಚ |
ಭಗವನ್ಯೋಗಿನಾಂ ಶ್ರೇಷ್ಠ ಸರ್ವಶಾಸ್ತ್ರವಿಶಾರದ |
ಕಿಂ ತತ್ತ್ವಂ ಕಿಂ ಪರಂ ಜಾಪ್ಯಂ ಕಿಂ ಧ್ಯಾನಂ ಮುಕ್ತಿಸಾಧನಮ್ || ೨ ||
ಶ್ರೋತುಮಿಚ್ಛಾಮಿ ತತ್ಸರ್ವಂ ಬ್ರೂಹಿ ಮೇ ಮುನಿಸತ್ತಮ || ೩ ||
ವೇದವ್ಯಾಸ ಉವಾಚ |
ಧರ್ಮರಾಜ ಮಹಾಭಾಗ ಶೃಣು ವಕ್ಷ್ಯಾಮಿ ತತ್ತ್ವತಃ || ೪ ||
ಯತ್ಪರಂ ಯದ್ಗುಣಾತೀತಂ ಯಜ್ಜ್ಯೋತಿರಮಲಂ ಶಿವಮ್ |
ತದೇವ ಪರಮಂ ತತ್ತ್ವಂ ಕೈವಲ್ಯಪದಕಾರಣಮ್ || ೫ ||
ಶ್ರೀರಾಮೇತಿ ಪರಂ ಜಾಪ್ಯಂ ತಾರಕಂ ಬ್ರಹ್ಮಸಂಜ್ಞಕಮ್ |
ಬ್ರಹ್ಮಹತ್ಯಾದಿಪಾಪಘ್ನಮಿತಿ ವೇದವಿದೋ ವಿದುಃ || ೬ ||
ಶ್ರೀರಾಮ ರಾಮೇತಿ ಜನಾ ಯೇ ಜಪಂತಿ ಚ ಸರ್ವದಾ |
ತೇಷಾಂ ಭುಕ್ತಿಶ್ಚ ಮುಕ್ತಿಶ್ಚ ಭವಿಷ್ಯತಿ ನ ಸಂಶಯಃ || ೭ ||
ಸ್ತವರಾಜಂ ಪುರಾ ಪ್ರೋಕ್ತಂ ನಾರದೇನ ಚ ಧೀಮತಾ |
ತತ್ಸರ್ವಂ ಸಂಪ್ರವಕ್ಷ್ಯಾಮಿ ಹರಿಧ್ಯಾನಪುರಃಸರಮ್ || ೮ ||
ತಾಪತ್ರಯಾಗ್ನಿಶಮನಂ ಸರ್ವಾಘೌಘನಿಕೃಂತನಮ್ |
ದಾರಿದ್ರ್ಯದುಃಖಶಮನಂ ಸರ್ವಸಂಪತ್ಕರಂ ಶಿವಮ್ || ೯ ||
ವಿಜ್ಞಾನಫಲದಂ ದಿವ್ಯಂ ಮೋಕ್ಷೈಕಫಲಸಾಧನಮ್ |
ನಮಸ್ಕೃತ್ಯ ಪ್ರವಕ್ಷ್ಯಾಮಿ ರಾಮಂ ಕೃಷ್ಣಂ ಜಗನ್ಮಯಮ್ || ೧೦ ||
ಅಯೋಧ್ಯಾನಗರೇ ರಮ್ಯೇ ರತ್ನಮಂಡಪಮಧ್ಯಗೇ |
ಸ್ಮರೇತ್ಕಲ್ಪತರೋರ್ಮೂಲೇ ರತ್ನಸಿಂಹಾಸನಂ ಶುಭಮ್ || ೧೧ ||
ತನ್ಮಧ್ಯೇಽಷ್ಟದಲಂ ಪದ್ಮಂ ನಾನಾರತ್ನೈಶ್ಚ ವೇಷ್ಟಿತಮ್ |
ಸ್ಮರೇನ್ಮಧ್ಯೇ ದಾಶರಥಿಂ ಸಹಸ್ರಾದಿತ್ಯತೇಜಸಮ್ || ೧೨ ||
ಪಿತುರಂಕಗತಂ ರಾಮಮಿಂದ್ರನೀಲಮಣಿಪ್ರಭಮ್ |
ಕೋಮಲಾಂಗಂ ವಿಶಾಲಾಕ್ಷಂ ವಿದ್ಯುದ್ವರ್ಣಾಂಬರಾವೃತಮ್ || ೧೩ ||
ಭಾನುಕೋಟಿಪ್ರತೀಕಾಶ ಕಿರೀಟೇನ ವಿರಾಜಿತಮ್ |
ರತ್ನಗ್ರೈವೇಯಕೇಯೂರರತ್ನಕುಂಡಲಮಂಡಿತಮ್ || ೧೪ ||
ರತ್ನಕಂಕಣಮಂಜೀರಕಟಿಸೂತ್ರೈರಲಂಕೃತಮ್ |
ಶ್ರೀವತ್ಸಕೌಸ್ತುಭೋರಸ್ಕಂ ಮುಕ್ತಾಹಾರೋಪಶೋಭಿತಮ್ || ೧೫ ||
ದಿವ್ಯರತ್ನಸಮಾಯುಕ್ತಮುದ್ರಿಕಾಭಿರಲಂಕೃತಮ್ |
ರಾಘವಂ ದ್ವಿಭುಜಂ ಬಾಲಂ ರಾಮಮೀಷತ್ಸ್ಮಿತಾನನಮ್ || ೧೬ ||
ತುಲಸೀಕುಂದಮಂದಾರಪುಷ್ಪಮಾಲ್ಯೈರಲಂಕೃತಮ್ |
ಕರ್ಪೂರಾಗುರುಕಸ್ತೂರೀದಿವ್ಯಗಂಧಾನುಲೇಪನಮ್ || ೧೭ ||
ಯೋಗಶಾಸ್ತ್ರೇಷ್ವಭಿರತಂ ಯೋಗೇಶಂ ಯೋಗದಾಯಕಮ್ |
ಸದಾ ಭರತಸೌಮಿತ್ರಿಶತ್ರುಘ್ನೈರುಪಶೋಭಿತಮ್ || ೧೮ ||
ವಿದ್ಯಾಧರಸುರಾಧೀಶಸಿದ್ಧಗಂಧರ್ವಕಿನ್ನರೈಃ |
ಯೋಗೀಂದ್ರೈರ್ನಾರದಾದ್ಯೈಶ್ಚ ಸ್ತೂಯಮಾನಮಹರ್ನಿಶಮ್ || ೧೯ ||
ವಿಶ್ವಾಮಿತ್ರವಸಿಷ್ಠಾದಿಮುನಿಭಿಃ ಪರಿಸೇವಿತಮ್ |
ಸನಕಾದಿಮುನಿಶ್ರೇಷ್ಠೈರ್ಯೋಗಿವೃಂದೈಶ್ಚ ಸೇವಿತಮ್ || ೨೦ ||
ರಾಮಂ ರಘುವರಂ ವೀರಂ ಧನುರ್ವೇದವಿಶಾರದಮ್ |
ಮಂಗಳಾಯತನಂ ದೇವಂ ರಾಮಂ ರಾಜೀವಲೋಚನಮ್ || ೨೧ ||
ಸರ್ವಶಾಸ್ತ್ರಾರ್ಥತತ್ತ್ವಜ್ಞಮಾನಂದಕರಸುಂದರಮ್ |
ಕೌಸಲ್ಯಾನಂದನಂ ರಾಮಂ ಧನುರ್ಬಾಣಧರಂ ಹರಿಮ್ || ೨೨ ||
ಏವಂ ಸಂಚಿಂತಯನ್ವಿಷ್ಣುಂ ಯಜ್ಜ್ಯೋತಿರಮಲಂ ವಿಭುಮ್ |
ಪ್ರಹೃಷ್ಟಮಾನಸೋ ಭೂತ್ವಾ ಮುನಿವರ್ಯಃ ಸ ನಾರದಃ || ೨೩ ||
ಸರ್ವಲೋಕಹಿತಾರ್ಥಾಯ ತುಷ್ಟಾವ ರಘುನಂದನಮ್ |
ಕೃತಾಂಜಲಿಪುಟೋ ಭೂತ್ವಾ ಚಿಂತಯನ್ನದ್ಭುತಂ ಹರಿಮ್ || ೨೪ ||
ಯದೇಕಂ ಯತ್ಪರಂ ನಿತ್ಯಂ ಯದನಂತಂ ಚಿದಾತ್ಮಕಮ್ |
ಯದೇಕಂ ವ್ಯಾಪಕಂ ಲೋಕೇ ತದ್ರೂಪಂ ಚಿಂತಯಾಮ್ಯಹಮ್ || ೨೫ ||
ವಿಜ್ಞಾನಹೇತುಂ ವಿಮಲಾಯತಾಕ್ಷಂ
ಪ್ರಜ್ಞಾನರೂಪಂ ಸ್ವಸುಖೈಕಹೇತುಮ್ |
ಶ್ರೀರಾಮಚಂದ್ರಂ ಹರಿಮಾದಿದೇವಂ
ಪರಾತ್ಪರಂ ರಾಮಮಹಂ ಭಜಾಮಿ || ೨೬ ||
ಕವಿಂ ಪುರಾಣಂ ಪುರುಷಂ ಪುರಸ್ತಾ-
-ತ್ಸನಾತನಂ ಯೋಗಿನಮೀಶಿತಾರಮ್ |
ಅಣೋರಣೀಯಾಂಸಮನಂತವೀರ್ಯಂ
ಪ್ರಾಣೇಶ್ವರಂ ರಾಮಮಸೌ ದದರ್ಶ || ೨೭ ||
ನಾರದ ಉವಾಚ |
ನಾರಾಯಣಂ ಜಗನ್ನಾಥಮಭಿರಾಮಂ ಜಗತ್ಪತಿಮ್ |
ಕವಿಂ ಪುರಾಣಂ ವಾಗೀಶಂ ರಾಮಂ ದಶರಥಾತ್ಮಜಮ್ || ೨೮ ||
ರಾಜರಾಜಂ ರಘುವರಂ ಕೌಸಲ್ಯಾನಂದವರ್ಧನಮ್ |
ಭರ್ಗಂ ವರೇಣ್ಯಂ ವಿಶ್ವೇಶಂ ರಘುನಾಥಂ ಜಗದ್ಗುರುಮ್ || ೨೯ ||
ಸತ್ಯಂ ಸತ್ಯಪ್ರಿಯಂ ಶ್ರೇಷ್ಠಂ ಜಾನಕೀವಲ್ಲಭಂ ವಿಭುಮ್ |
ಸೌಮಿತ್ರಿಪೂರ್ವಜಂ ಶಾಂತಂ ಕಾಮದಂ ಕಮಲೇಕ್ಷಣಮ್ || ೩೦ ||
ಆದಿತ್ಯಂ ರವಿಮೀಶಾನಂ ಘೃಣಿಂ ಸೂರ್ಯಮನಾಮಯಮ್ |
ಆನಂದರೂಪಿಣಂ ಸೌಮ್ಯಂ ರಾಘವಂ ಕರುಣಾಮಯಮ್ || ೩೧ ||
ಜಾಮದಗ್ನಿಂ ತಪೋಮೂರ್ತಿಂ ರಾಮಂ ಪರಶುಧಾರಿಣಮ್ |
ವಾಕ್ಪತಿಂ ವರದಂ ವಾಚ್ಯಂ ಶ್ರೀಪತಿಂ ಪಕ್ಷಿವಾಹನಮ್ || ೩೨ ||
ಶ್ರೀಶಾರ್ಙ್ಗಧಾರಿಣಂ ರಾಮಂ ಚಿನ್ಮಯಾನಂದವಿಗ್ರಹಮ್ |
ಹಲಧೃಗ್ವಿಷ್ಣುಮೀಶಾನಂ ಬಲರಾಮಂ ಕೃಪಾನಿಧಿಮ್ || ೩೩ ||
ಶ್ರೀವಲ್ಲಭಂ ಕೃಪಾನಾಥಂ ಜಗನ್ಮೋಹನಮಚ್ಯುತಮ್ |
ಮತ್ಸ್ಯಕೂರ್ಮವರಾಹಾದಿರೂಪಧಾರಿಣಮವ್ಯಯಮ್ || ೩೪ ||
ವಾಸುದೇವಂ ಜಗದ್ಯೋನಿಮನಾದಿನಿಧನಂ ಹರಿಮ್ |
ಗೋವಿಂದಂ ಗೋಪತಿಂ ವಿಷ್ಣುಂ ಗೋಪೀಜನಮನೋಹರಮ್ || ೩೫ ||
ಗೋಗೋಪಾಲಪರೀವಾರಂ ಗೋಪಕನ್ಯಾಸಮಾವೃತಮ್ |
ವಿದ್ಯುತ್ಪುಂಜಪ್ರತೀಕಾಶಂ ರಾಮಂ ಕೃಷ್ಣಂ ಜಗನ್ಮಯಮ್ || ೩೬ ||
ಗೋಗೋಪಿಕಾಸಮಾಕೀರ್ಣಂ ವೇಣುವಾದನತತ್ಪರಮ್ |
ಕಾಮರೂಪಂ ಕಲಾವಂತಂ ಕಾಮಿನೀಕಾಮದಂ ವಿಭುಮ್ || ೩೭ ||
ಮನ್ಮಥಂ ಮಥುರಾನಾಥಂ ಮಾಧವಂ ಮಕರಧ್ವಜಮ್ |
ಶ್ರೀಧರಂ ಶ್ರೀಕರಂ ಶ್ರೀಶಂ ಶ್ರೀನಿವಾಸಂ ಪರಾತ್ಪರಮ್ || ೩೮ ||
ಭೂತೇಶಂ ಭೂಪತಿಂ ಭದ್ರಂ ವಿಭೂತಿಂ ಭೂಮಿಭೂಷಣಮ್ |
ಸರ್ವದುಃಖಹರಂ ವೀರಂ ದುಷ್ಟದಾನವವೈರಿಣಮ್ || ೩೯ ||
ಶ್ರೀನೃಸಿಂಹಂ ಮಹಾಬಾಹುಂ ಮಹಾಂತಂ ದೀಪ್ತತೇಜಸಮ್ |
ಚಿದಾನಂದಮಯಂ ನಿತ್ಯಂ ಪ್ರಣವಂ ಜ್ಯೋತಿರೂಪಿಣಮ್ || ೪೦ ||
ಆದಿತ್ಯಮಂಡಲಗತಂ ನಿಶ್ಚಿತಾರ್ಥಸ್ವರೂಪಿಣಮ್ |
ಭಕ್ತಿಪ್ರಿಯಂ ಪದ್ಮನೇತ್ರಂ ಭಕ್ತಾನಾಮೀಪ್ಸಿತಪ್ರದಮ್ || ೪೧ ||
ಕೌಸಲ್ಯೇಯಂ ಕಲಾಮೂರ್ತಿಂ ಕಾಕುತ್ಸ್ಥಂ ಕಮಲಾಪ್ರಿಯಮ್ |
ಸಿಂಹಾಸನೇ ಸಮಾಸೀನಂ ನಿತ್ಯವ್ರತಮಕಲ್ಮಷಮ್ || ೪೨ ||
ವಿಶ್ವಾಮಿತ್ರಪ್ರಿಯಂ ದಾಂತಂ ಸ್ವದಾರನಿಯತವ್ರತಮ್ |
ಯಜ್ಞೇಶಂ ಯಜ್ಞಪುರುಷಂ ಯಜ್ಞಪಾಲನತತ್ಪರಮ್ || ೪೩ ||
ಸತ್ಯಸಂಧಂ ಜಿತಕ್ರೋಧಂ ಶರಣಾಗತವತ್ಸಲಮ್ |
ಸರ್ವಕ್ಲೇಶಾಪಹರಣಂ ವಿಭೀಷಣವರಪ್ರದಮ್ || ೪೪ ||
ದಶಗ್ರೀವಹರಂ ರೌದ್ರಂ ಕೇಶವಂ ಕೇಶಿಮರ್ದನಮ್ |
ವಾಲಿಪ್ರಮಥನಂ ವೀರಂ ಸುಗ್ರೀವೇಪ್ಸಿತರಾಜ್ಯದಮ್ || ೪೫ ||
ನರವಾನರದೇವೈಶ್ಚಸೇವಿತಂ ಹನುಮತ್ಪ್ರಿಯಮ್ |
ಶುದ್ಧಂ ಸೂಕ್ಷ್ಮಂ ಪರಂ ಶಾಂತಂ ತಾರಕಂ ಬ್ರಹ್ಮರೂಪಿಣಮ್ || ೪೬ ||
ಸರ್ವಭೂತಾತ್ಮಭೂತಸ್ಥಂ ಸರ್ವಾಧಾರಂ ಸನಾತನಮ್ |
ಸರ್ವಕಾರಣಕರ್ತಾರಂ ನಿದಾನಂ ಪ್ರಕೃತೇಃ ಪರಮ್ || ೪೭ ||
ನಿರಾಮಯಂ ನಿರಾಭಾಸಂ ನಿರವದ್ಯಂ ನಿರಂಜನಮ್ |
ನಿತ್ಯಾನಂದಂ ನಿರಾಕಾರಮದ್ವೈತಂ ತಮಸಃ ಪರಮ್ || ೪೮ ||
ಪರಾತ್ಪರತರಂ ತತ್ತ್ವಂ ಸತ್ಯಾನಂದಂ ಚಿದಾತ್ಮಕಮ್ |
ಮನಸಾ ಶಿರಸಾ ನಿತ್ಯಂ ಪ್ರಣಮಾಮಿ ರಘೂತ್ತಮಮ್ || ೪೯ ||
ಸೂರ್ಯಮಂಡಲಮಧ್ಯಸ್ಥಂ ರಾಮಂ ಸೀತಾಸಮನ್ವಿತಮ್ |
ನಮಾಮಿ ಪುಂಡರೀಕಾಕ್ಷಮಮೇಯಂ ಗುರುತತ್ಪರಮ್ || ೫೦ ||
ನಮೋಽಸ್ತು ವಾಸುದೇವಾಯ ಜ್ಯೋತಿಷಾಂ ಪತಯೇ ನಮಃ |
ನಮೋಽಸ್ತು ರಾಮದೇವಾಯ ಜಗದಾನಂದರೂಪಿಣೇ || ೫೧ ||
ನಮೋ ವೇದಾಂತನಿಷ್ಠಾಯ ಯೋಗಿನೇ ಬ್ರಹ್ಮವಾದಿನೇ |
ಮಾಯಾಮಯನಿರಾಸಾಯ ಪ್ರಪನ್ನಜನಸೇವಿನೇ || ೫೨ ||
ವಂದಾಮಹೇ ಮಹೇಶಾನಚಂಡಕೋದಂಡಖಂಡನಮ್ |
ಜಾನಕೀಹೃದಯಾನಂದವರ್ಧನಂ ರಘುನಂದನಮ್ || ೫೩ ||
ಉತ್ಫುಲ್ಲಾಮಲಕೋಮಲೋತ್ಪಲದಲಶ್ಯಾಮಾಯ ರಾಮಾಯ ತೇ-
-ಽಕಾಮಾಯ ಪ್ರಮದಾಮನೋಹರಗುಣಗ್ರಾಮಾಯ ರಾಮಾತ್ಮನೇ |
ಯೋಗಾರೂಢಮುನೀಂದ್ರಮಾನಸಸರೋಹಂಸಾಯ ಸಂಸಾರವಿ-
-ಧ್ವಂಸಾಯ ಸ್ಫುರದೋಜಸೇ ರಘುಕುಲೋತ್ತಂಸಾಯ ಪುಂಸೇ ನಮಃ || ೫೪ ||
ಭವೋದ್ಭವಂ ವೇದವಿದಾಂ ವರಿಷ್ಠ-
-ಮಾದಿತ್ಯಚಂದ್ರಾನಲಸುಪ್ರಭಾವಮ್ |
ಸರ್ವಾತ್ಮಕಂ ಸರ್ವಗತಸ್ವರೂಪಂ
ನಮಾಮಿ ರಾಮಂ ತಮಸಃ ಪರಸ್ತಾತ್ || ೫೫ ||
ನಿರಂಜನಂ ನಿಷ್ಪ್ರತಿಮಂ ನಿರೀಹಂ
ನಿರಾಶ್ರಯಂ ನಿಷ್ಕಲಮಪ್ರಪಂಚಮ್ |
ನಿತ್ಯಂ ಧ್ರುವಂ ನಿರ್ವಿಷಯಸ್ವರೂಪಂ
ನಿರಂತರಂ ರಾಮಮಹಂ ಭಜಾಮಿ || ೫೬ ||
ಭವಾಬ್ಧಿಪೋತಂ ಭರತಾಗ್ರಜಂ ತಂ
ಭಕ್ತಿಪ್ರಿಯಂ ಭಾನುಕುಲಪ್ರದೀಪಮ್ |
ಭೂತತ್ರಿನಾಥಂ ಭುವನಾಧಿಪಂ ತಂ
ಭಜಾಮಿ ರಾಮಂ ಭವರೋಗವೈದ್ಯಮ್ || ೫೭ ||
ಸರ್ವಾಧಿಪತ್ಯಂ ಸಮರಾಂಗಧೀರಂ
ಸತ್ಯಂ ಚಿದಾನಂದಮಯಸ್ವರೂಪಮ್ |
ಸತ್ಯಂ ಶಿವಂ ಶಾಂತಿಮಯಂ ಶರಣ್ಯಂ
ಸನಾತನಂ ರಾಮಮಹಂ ಭಜಾಮಿ || ೫೮ ||
ಕಾರ್ಯಕ್ರಿಯಾಕಾರಣಮಪ್ರಮೇಯಂ
ಕವಿಂ ಪುರಾಣಂ ಕಮಲಾಯತಾಕ್ಷಮ್ |
ಕುಮಾರವೇದ್ಯಂ ಕರುಣಾಮಯಂ ತಂ
ಕಲ್ಪದ್ರುಮಂ ರಾಮಮಹಂ ಭಜಾಮಿ || ೫೯ ||
ತ್ರೈಲೋಕ್ಯನಾಥಂ ಸರಸೀರುಹಾಕ್ಷಂ
ದಯಾನಿಧಿಂ ದ್ವಂದ್ವವಿನಾಶಹೇತುಮ್ |
ಮಹಾಬಲಂ ವೇದನಿಧಿಂ ಸುರೇಶಂ
ಸನಾತನಂ ರಾಮಮಹಂ ಭಜಾಮಿ || ೬೦ ||
ವೇದಾಂತವೇದ್ಯಂ ಕವಿಮೀಶಿತಾರ-
-ಮನಾದಿಮಧ್ಯಾಂತಮಚಿಂತ್ಯಮಾದ್ಯಮ್ |
ಅಗೋಚರಂ ನಿರ್ಮಲಮೇಕರೂಪಂ
ನಮಾಮಿ ರಾಮಂ ತಮಸಃ ಪರಸ್ತಾತ್ || ೬೧ ||
ಅಶೇಷವೇದಾತ್ಮಕಮಾದಿಸಂಜ್ಞ-
-ಮಜಂ ಹರಿಂ ವಿಷ್ಣುಮನಂತಮಾದ್ಯಮ್ |
ಅಪಾರಸಂವಿತ್ಸುಖಮೇಕರೂಪಂ
ಪರಾತ್ಪರಂ ರಾಮಮಹಂ ಭಜಾಮಿ || ೬೨ ||
ತತ್ತ್ವಸ್ವರೂಪಂ ಪುರುಷಂ ಪುರಾಣಂ
ಸ್ವತೇಜಸಾ ಪೂರಿತವಿಶ್ವಮೇಕಮ್ |
ರಾಜಾಧಿರಾಜಂ ರವಿಮಂಡಲಸ್ಥಂ
ವಿಶ್ವೇಶ್ವರಂ ರಾಮಮಹಂ ಭಜಾಮಿ || ೬೩ ||
ಲೋಕಾಭಿರಾಮಂ ರಘುವಂಶನಾಥಂ
ಹರಿಂ ಚಿದಾನಂದಮಯಂ ಮುಕುಂದಮ್ |
ಅಶೇಷವಿದ್ಯಾಧಿಪತಿಂ ಕವೀಂದ್ರಂ
ನಮಾಮಿ ರಾಮಂ ತಮಸಃ ಪರಸ್ತಾತ್ || ೬೪ ||
ಯೋಗೀಂದ್ರಸಂಘೈಶ್ಚ ಸುಸೇವ್ಯಮಾನಂ
ನಾರಾಯಣಂ ನಿರ್ಮಲಮಾದಿದೇವಮ್ |
ನತೋಽಸ್ಮಿ ನಿತ್ಯಂ ಜಗದೇಕನಾಥ-
-ಮಾದಿತ್ಯವರ್ಣಂ ತಮಸಃ ಪರಸ್ತಾತ್ || ೬೫ ||
ವಿಭೂತಿದಂ ವಿಶ್ವಸೃಜಂ ವಿರಾಮಂ
ರಾಜೇಂದ್ರಮೀಶಂ ರಘುವಂಶನಾಥಮ್ |
ಅಚಿಂತ್ಯಮವ್ಯಕ್ತಮನಂತಮೂರ್ತಿಂ
ಜ್ಯೋತಿರ್ಮಯಂ ರಾಮಮಹಂ ಭಜಾಮಿ || ೬೬ ||
ಅಶೇಷಸಂಸಾರವಿಹಾರಹೀನ-
-ಮಾದಿತ್ಯಗಂ ಪೂರ್ಣಸುಖಾಭಿರಾಮಮ್ |
ಸಮಸ್ತಸಾಕ್ಷಿಂ ತಮಸಃ ಪರಸ್ತಾ-
-ನ್ನಾರಾಯಣಂ ವಿಷ್ಣುಮಹಂ ಭಜಾಮಿ || ೬೭ ||
ಮುನೀಂದ್ರಗುಹ್ಯಂ ಪರಿಪೂರ್ಣಕಾಮಂ
ಕಲಾನಿಧಿಂ ಕಲ್ಮಷನಾಶಹೇತುಮ್ |
ಪರಾತ್ಪರಂ ಯತ್ಪರಮಂ ಪವಿತ್ರಂ
ನಮಾಮಿ ರಾಮಂ ಮಹತೋ ಮಹಾಂತಮ್ || ೬೮ ||
ಬ್ರಹ್ಮಾ ವಿಷ್ಣುಶ್ಚ ರುದ್ರಶ್ಚ ದೇವೇಂದ್ರೋ ದೇವತಾಸ್ತಥಾ |
ಆದಿತ್ಯಾದಿಗ್ರಹಾಶ್ಚೈವ ತ್ವಮೇವ ರಘುನಂದನ || ೬೯ ||
ತಾಪಸಾ ಋಷಯಃ ಸಿದ್ಧಾಃ ಸಾಧ್ಯಾಶ್ಚ ಮರುತಸ್ತಥಾ |
ವಿಪ್ರಾ ವೇದಾಸ್ತಥಾ ಯಜ್ಞಾಃ ಪುರಾಣಂ ಧರ್ಮಸಂಹಿತಾಃ || ೭೦ ||
ವರ್ಣಾಶ್ರಮಾಸ್ತಥಾ ಧರ್ಮಾ ವರ್ಣಧರ್ಮಾಸ್ತಥೈವ ಚ |
ಯಕ್ಷರಾಕ್ಷಸಗಂಧರ್ವಾದಿಕ್ಪಾಲಾ ದಿಗ್ಗಜಾದಯಃ || ೭೧ ||
ಸನಕಾದಿಮುನಿಶ್ರೇಷ್ಠಾಸ್ತ್ವಮೇವ ರಘುಪುಂಗವ |
ವಸವೋಽಷ್ಟೌ ತ್ರಯಃ ಕಾಲಾ ರುದ್ರಾ ಏಕಾದಶ ಸ್ಮೃತಾಃ || ೭೨ ||
ತಾರಕಾಃ ದಶ ದಿಕ್ ಚೈವ ತ್ವಮೇವ ರಘುನಂದನ |
ಸಪ್ತದ್ವೀಪಾಃ ಸಮುದ್ರಾಶ್ಚ ನಗಾಃ ನದ್ಯಸ್ತಥಾ ದ್ರುಮಾಃ || ೭೩ ||
ಸ್ಥಾವರಾಃ ಜಂಗಮಾಶ್ಚೈವ ತ್ವಮೇವ ರಘುನಾಯಕ |
ದೇವತಿರ್ಯಙ್ಮನುಷ್ಯಾಣಾಂ ದಾನವಾನಾಂ ತಥೈವ ಚ || ೭೪ ||
ಮಾತಾ ಪಿತಾ ತಥಾ ಭ್ರಾತಾ ತ್ವಮೇವ ರಘುವಲ್ಲಭ |
ಸರ್ವೇಷಾಂ ತ್ವಂ ಪರಂ ಬ್ರಹ್ಮ ತ್ವನ್ಮಯಂ ಸರ್ವಮೇವ ಹಿ || ೭೫ ||
ತ್ವಮಕ್ಷರಂ ಪರಂ ಜ್ಯೋತಿಸ್ತ್ವಮೇವ ಪುರುಷೋತ್ತಮ |
ತ್ವಮೇವ ತಾರಕಂ ಬ್ರಹ್ಮ ತ್ವತ್ತೋಽನ್ಯನ್ನೈವ ಕಿಂಚನ || ೭೬ ||
ಶಾಂತಂ ಸರ್ವಗತಂ ಸೂಕ್ಷ್ಮಂ ಪರಂ ಬ್ರಹ್ಮ ಸನಾತನಮ್ |
ರಾಜೀವಲೋಚನಂ ರಾಮಂ ಪ್ರಣಮಾಮಿ ಜಗತ್ಪತಿಮ್ || ೭೭ ||
ವ್ಯಾಸ ಉವಾಚ |
ತತಃ ಪ್ರಸನ್ನಃ ಶ್ರೀರಾಮಃ ಪ್ರೋವಾಚ ಮುನಿಪುಂಗವಮ್ |
ತುಷ್ಟೋಽಸ್ಮಿ ಮುನಿಶಾರ್ದೂಲ ವೃಣೀಷ್ವ ವರಮುತ್ತಮಮ್ || ೭೮ ||
ನಾರದ ಉವಾಚ |
ಯದಿ ತುಷ್ಟೋಽಸಿ ಸರ್ವಜ್ಞ ಶ್ರೀರಾಮ ಕರುಣಾನಿಧೇ |
ತ್ವನ್ಮೂರ್ತಿದರ್ಶನೇನೈವ ಕೃತಾರ್ಥೋಽಹಂ ಚ ಸರ್ವದಾ || ೭೯ ||
ಧನ್ಯೋಽಹಂ ಕೃತಕೃತ್ಯೋಽಹಂ ಪುಣ್ಯೋಽಹಂ ಪುರುಷೋತ್ತಮ |
ಅದ್ಯ ಮೇ ಸಫಲಂ ಜನ್ಮ ಜೀವಿತಂ ಸಫಲಂ ಚ ಮೇ || ೮೦ ||
ಅದ್ಯ ಮೇ ಸಫಲಂ ಜ್ಞಾನಮದ್ಯ ಮೇ ಸಫಲಂ ತಪಃ |
ಅದ್ಯ ಮೇ ಸಫಲಂ ಕರ್ಮ ತ್ವತ್ಪಾದಾಂಭೋಜದರ್ಶನಾತ್ || ೮೧ ||
ಅದ್ಯ ಮೇ ಸಫಲಂ ಸರ್ವಂ ತ್ವನ್ನಾಮಸ್ಮರಣಂ ತಥಾ |
ತ್ವತ್ಪಾದಾಂಭೋರುಹದ್ವಂದ್ವಸದ್ಭಕ್ತಿಂ ದೇಹಿ ರಾಘವ || ೮೨
ತತಃ ಪರಮಸಂಪ್ರೀತಃ ಸ ರಾಮಃ ಪ್ರಾಹ ನಾರದಮ್ |
ಮೇಘಗಂಭೀರಯಾ ವಾಚಾ ಧನ್ವೀ ವೀಜಿತಮನ್ಮಥಃ || ೮೩ ||
ಶ್ರೀರಾಮ ಉವಾಚ |
ಮುನಿವರ್ಯ ಮಹಾಭಾಗ ಮುನೇ ತ್ವಿಷ್ಟಂ ದದಾಮಿ ತೇ |
ಯತ್ತ್ವಯಾ ಚೇಪ್ಸಿತಂ ಸರ್ವಂ ಮನಸಾ ತದ್ಭವಿಷ್ಯತಿ || ೮೪ ||
ನಾರದ ಉವಾಚ |
ವರಂ ನ ಯಾಚೇ ರಘುನಾಥ ಯುಷ್ಮ-
-ತ್ಪದಾಬ್ಜಭಕ್ತಿಃ ಸತತಂ ಮಮಾಸ್ತು |
ಇದಂ ಪ್ರಿಯಂ ನಾಥ ವರಂ ಪ್ರಯಾಚ್ಛ
ಪುನಃ ಪುನಸ್ತ್ವಾಮಿದಮೇವ ಯಾಚೇ || ೮೫ ||
ವ್ಯಾಸ ಉವಾಚ |
ಇತ್ಯೇವಮೀಡಿತೋ ರಾಮಃ ಪ್ರಾದಾತ್ತಸ್ಮೈ ವರಾಂತರಮ್ |
ವೀರೋ ರಾಮೋ ಮಹಾತೇಜಾಃ ಸಚ್ಚಿದಾನಂದವಿಗ್ರಹಃ || ೮೬ ||
ಅದ್ವೈತಮಮಲಂ ಜ್ಞಾನಂ ಸ್ವನಾಮಸ್ಮರಣಂ ತಥಾ |
ಅಂತರ್ದಧೌ ಜಗನ್ನಾಥಃ ಪುರತಸ್ತಸ್ಯ ರಾಘವಃ || ೮೭ ||
ಇತಿ ಶ್ರೀರಘುನಾಥಸ್ಯ ಸ್ತವರಾಜಮನುತ್ತಮಮ್ |
ಸರ್ವಸೌಭಾಗ್ಯಸಂಪತ್ತಿದಾಯಕಂ ಮುಕ್ತಿದಂ ಶುಭಮ್ || ೮೮ ||
ಕಥಿತಂ ಬ್ರಹ್ಮಪುತ್ರೇಣ ವೇದಾನಾಂ ಸಾರಮುತ್ತಮಮ್ |
ಗುಹ್ಯಾದ್ಗುಹ್ಯತಮಂ ದಿವ್ಯಂ ತವ ಸ್ನೇಹಾತ್ಪ್ರಕೀರ್ತಿತಮ್ || ೮೯ ||
ಯಃ ಪಠೇಚ್ಛೃಣುಯಾದ್ವಾಪಿ ತ್ರಿಸಂಧ್ಯಂ ಶ್ರದ್ಧಯಾನ್ವಿತಃ |
ಬ್ರಹ್ಮಹತ್ಯಾದಿಪಾಪಾನಿ ತತ್ಸಮಾನಿ ಬಹೂನಿ ಚ || ೯೦ ||
ಸ್ವರ್ಣಸ್ತೇಯಂ ಸುರಾಪಾನಂ ಗುರುತಲ್ಪಗತಿಸ್ತಥಾ |
ಗೋವಧಾದ್ಯುಪಪಾಪಾನಿ ಅನೃತಾತ್ಸಂಭವಾನಿ ಚ || ೯೧ ||
ಸರ್ವೈಃ ಪ್ರಮುಚ್ಯತೇ ಪಾಪೈಃ ಕಲ್ಪಾಯುತಶತೋದ್ಭವೈಃ |
ಮಾನಸಂ ವಾಚಿಕಂ ಪಾಪಂ ಕರ್ಮಣಾ ಸಮುಪಾರ್ಜಿತಮ್ || ೯೨ ||
ಶ್ರೀರಾಮಸ್ಮರಣೇನೈವ ತತ್ಕ್ಷಣಾನ್ನಶ್ಯತಿ ಧ್ರುವಮ್ |
ಇದಂ ಸತ್ಯಮಿದಂ ಸತ್ಯಂ ಸತ್ಯಮೇತದಿಹೋಚ್ಯತೇ || ೯೩ ||
ರಾಮಂ ಸತ್ಯಂ ಪರಂ ಬ್ರಹ್ಮ ರಾಮಾತ್ಕಿಂಚಿನ್ನ ವಿದ್ಯತೇ |
ತಸ್ಮಾದ್ರಾಮಸ್ವರೂಪಂ ಹಿ ಸತ್ಯಂ ಸತ್ಯಮಿದಂ ಜಗತ್ || ೯೪ ||
ಶ್ರೀರಾಮಚಂದ್ರ ರಘುಪುಂಗವ ರಾಜವರ್ಯ
ರಜೇಂದ್ರ ರಾಮ ರಘುನಾಯಕ ರಾಘವೇಶ |
ರಾಜಾಧಿರಾಜ ರಘುನಂದನ ರಾಮಚಂದ್ರ
ದಾಸೋಽಹಮದ್ಯ ಭವತಃ ಶರಣಾಗತೋಽಸ್ಮಿ || ೯೫ ||
ವೈದೇಹೀಸಹಿತಂ ಸುರದ್ರುಮತಲೇ ಹೈಮೇ ಮಹಾಮಂಡಪೇ
ಮಧ್ಯೇ ಪುಷ್ಪಕಮಾಸನೇ ಮಣಿಮಯೇ ವೀರಾಸನೇ ಸಂಸ್ಥಿತಮ್ |
ಅಗ್ರೇ ವಾಚಯತಿ ಪ್ರಭಂಜನಸುತೇ ತತ್ತ್ವಂ ಮುನಿಭ್ಯಃ ಪರಂ
ವ್ಯಾಖ್ಯಾತಂ ಭರತಾದಿಭಿಃ ಪರಿವೃತಂ ರಾಮಂ ಭಜೇ ಶ್ಯಾಮಲಮ್ || ೯೬ ||
ರಾಮಂ ರತ್ನಕಿರೀಟಕುಂಡಲಯುತಂ ಕೇಯೂರಹಾರಾನ್ವಿತಂ
ಸೀತಾಲಂಕೃತವಾಮಭಾಗಮಮಲಂ ಸಿಂಹಾಸನಸ್ಥಂ ವಿಭುಮ್ |
ಸುಗ್ರೀವಾದಿಹರೀಶ್ವರೈಃ ಸುರಗಣೈಃ ಸಂಸೇವ್ಯಮಾನಂ ಸದಾ
ವಿಶ್ವಾಮಿತ್ರಪರಾಶರಾದಿಮುನಿಭಿಃ ಸಂಸ್ತೂಯಮಾನಂ ಪ್ರಭುಮ್ || ೯೭ ||
ಸಕಲಗುಣನಿಧಾನಂ ಯೋಗಿಭಿಃ ಸ್ತೂಯಮಾನಂ
ಭುಜವಿಜಿತಸಮಾನಂ ರಾಕ್ಷಸೇಂದ್ರಾದಿಮಾನಮ್ |
ಮಹಿತನೃಪಭಯಾನಂ ಸೀತಯಾ ಶೋಭಮಾನಂ
ಸ್ಮರ ಹೃದಯ ವಿಮಾನಂ ಬ್ರಹ್ಮ ರಾಮಾಭಿಧಾನಮ್ || ೯೮ ||
ರಘುವರ ತವ ಮೂರ್ತಿರ್ಮಾಮಕೇ ಮಾನಸಾಬ್ಜೇ
ನರಕಗತಿಹರಂ ತೇ ನಾಮಧೇಯಂ ಮುಖೇ ಮೇ |
ಅನಿಶಮತುಲಭಕ್ತ್ಯಾ ಮಸ್ತಕಂ ತ್ವತ್ಪದಾಬ್ಜೇ
ಭವಜಲನಿಧಿಮಗ್ನಂ ರಕ್ಷ ಮಾಮಾರ್ತಬಂಧೋ || ೯೯ ||
ರಾಮರತ್ನಮಹಂ ವಂದೇ ಚಿತ್ರಕೂಟಪತಿಂ ಹರಿಮ್ |
ಕೌಸಲ್ಯಾಭಕ್ತಿಸಂಭೂತಂ ಜಾನಕೀಕಂಠಭೂಷಣಮ್ || ೧೦೦ ||
ಇತಿ ಶ್ರೀಸನತ್ಕುಮಾರಸಂಹಿತಾಯಾಂ ನಾರದೋಕ್ತಂ ಶ್ರೀರಾಮಸ್ತವರಾಜಸ್ತೋತ್ರಂ ಸಂಪೂರ್ಣಮ್ |
ಇನ್ನಷ್ಟು ಶ್ರೀ ರಾಮ ಸ್ತೋತ್ರಗಳು ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
