Read in తెలుగు / ಕನ್ನಡ / தமிழ் / देवनागरी / English (IAST)
ಸ್ತೋಷ್ಯೇ ಭಕ್ತ್ಯಾ ವಿಷ್ಣುಮನಾದಿಂ ಜಗದಾದಿಂ
ಯಸ್ಮಿನ್ನೇತತ್ಸಂಸೃತಿಚಕ್ರಂ ಭ್ರಮತೀತ್ಥಮ್ |
ಯಸ್ಮಿನ್ ದೃಷ್ಟೇ ನಶ್ಯತಿ ತತ್ಸಂಸೃತಿಚಕ್ರಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧ ||
ಯಸ್ಯೈಕಾಂಶಾದಿತ್ಥಮಶೇಷಂ ಜಗದೇತತ್
ಪ್ರಾದುರ್ಭೂತಂ ಯೇನ ಪಿನದ್ಧಂ ಪುನರಿತ್ಥಮ್ |
ಯೇನ ವ್ಯಾಪ್ತಂ ಯೇನ ವಿಬುದ್ಧಂ ಸುಖದುಃಖೈ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨ ||
ಸರ್ವಜ್ಞೋ ಯೋ ಯಶ್ಚ ಹಿ ಸರ್ವಃ ಸಕಲೋ ಯೋ
ಯಶ್ಚಾನಂದೋಽನಂತಗುಣೋ ಯೋ ಗುಣಧಾಮಾ |
ಯಶ್ಚಾವ್ಯಕ್ತೋ ವ್ಯಸ್ತಸಮಸ್ತಃ ಸದಸದ್ಯ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩ ||
ಯಸ್ಮಾದನ್ಯನ್ನಾಸ್ತ್ಯಪಿ ನೈವಂ ಪರಮಾರ್ಥಂ
ದೃಶ್ಯಾದನ್ಯೋ ನಿರ್ವಿಷಯಜ್ಞಾನಮಯತ್ವಾತ್ |
ಜ್ಞಾತೃಜ್ಞಾನಜ್ಞೇಯವಿಹೀನೋಽಪಿ ಸದಾ ಜ್ಞ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೪ ||
ಆಚಾರ್ಯೇಭ್ಯೋ ಲಬ್ಧಸುಸೂಕ್ಷ್ಮಾಚ್ಯುತತತ್ತ್ವಾ
ವೈರಾಗ್ಯೇಣಾಭ್ಯಾಸಬಲಾಚ್ಚೈವ ದ್ರಢಿಮ್ನಾ |
ಭಕ್ತ್ಯೈಕಾಗ್ರ್ಯಧ್ಯಾನಪರಾ ಯಂ ವಿದುರೀಶಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೫ ||
ಪ್ರಾಣಾನಾಯಮ್ಯೋಮಿತಿ ಚಿತ್ತಂ ಹೃದಿ ರುದ್ಧ್ವಾ
ನಾನ್ಯತ್ ಸ್ಮೃತ್ವಾ ತತ್ಪುನರತ್ರೈವ ವಿಲಾಪ್ಯ |
ಕ್ಷೀಣೇ ಚಿತ್ತೇ ಭಾದೃಶಿರಸ್ಮೀತಿ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೬ ||
ಯಂ ಬ್ರಹ್ಮಾಖ್ಯಂ ದೇವಮನನ್ಯಂ ಪರಿಪೂರ್ಣಂ
ಹೃತ್ಸ್ಥಂ ಭಕ್ತೈರ್ಲಭ್ಯಮಜಂ ಸೂಕ್ಷ್ಮಮತರ್ಕ್ಯಮ್ |
ಧ್ಯಾತ್ವಾತ್ಮಸ್ಥಂ ಬ್ರಹ್ಮವಿದೋ ಯಂ ವಿದುರೀಶಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೭ ||
ಮಾತ್ರಾತೀತಂ ಸ್ವಾತ್ಮವಿಕಾಸಾತ್ಮವಿಬೋಧಂ
ಜ್ಞೇಯಾತೀತಂ ಜ್ಞಾನಮಯಂ ಹೃದ್ಯುಪಲಭ್ಯಮ್ |
ಭಾವಗ್ರಾಹ್ಯಾನಂದಮನನ್ಯಂ ಚ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೮ ||
ಯದ್ಯದ್ವೇದ್ಯಂ ವಸ್ತುಸತತ್ತ್ವಂ ವಿಷಯಾಖ್ಯಂ
ತತ್ತದ್ಬ್ರಹ್ಮೈವೇತಿ ವಿದಿತ್ವಾ ತದಹಂ ಚ |
ಧ್ಯಾಯಂತ್ಯೇವಂ ಯಂ ಸನಕಾದ್ಯಾ ಮುನಯೋಽಜಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೯ ||
ಯದ್ಯದ್ವೇದ್ಯಂ ತತ್ತದಹಂ ನೇತಿ ವಿಹಾಯ
ಸ್ವಾತ್ಮಜ್ಯೋತಿರ್ಜ್ಞಾನಮಯಾನಂದಮವಾಪ್ಯ |
ತಸ್ಮಿನ್ನಸ್ಮೀತ್ಯಾತ್ಮವಿದೋ ಯಂ ವಿದುರೀಶಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೦ ||
ಹಿತ್ವಾಹಿತ್ವಾ ದೃಶ್ಯಮಶೇಷಂ ಸವಿಕಲ್ಪಂ
ಮತ್ವಾ ಶಿಷ್ಟಂ ಭಾದೃಶಿಮಾತ್ರಂ ಗಗನಾಭಮ್ |
ತ್ಯಕ್ತ್ವಾ ದೇಹಂ ಯಂ ಪ್ರವಿಶಂತ್ಯಚ್ಯುತಭಕ್ತಾ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೧ ||
ಸರ್ವತ್ರಾಸ್ತೇ ಸರ್ವಶರೀರೀ ನ ಚ ಸರ್ವಃ
ಸರ್ವಂ ವೇತ್ತ್ಯೇವೇಹ ನ ಯಂ ವೇತ್ತಿ ಚ ಸರ್ವಃ |
ಸರ್ವತ್ರಾಂತರ್ಯಾಮಿತಯೇತ್ಥಂ ಯಮಯನ್ಯ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೨ ||
ಸರ್ವಂ ದೃಷ್ಟ್ವಾ ಸ್ವಾತ್ಮನಿ ಯುಕ್ತ್ಯಾ ಜಗದೇತ-
-ದ್ದೃಷ್ಟ್ವಾತ್ಮಾನಂ ಚೈವಮಜಂ ಸರ್ವಜನೇಷು |
ಸರ್ವಾತ್ಮೈಕೋಽಸ್ಮೀತಿ ವಿದುರ್ಯಂ ಜನಹೃತ್ಸ್ಥಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೩ ||
ಸರ್ವತ್ರೈಕಃ ಪಶ್ಯತಿ ಜಿಘ್ರತ್ಯಥ ಭುಂಕ್ತೇ
ಸ್ಪ್ರಷ್ಟಾ ಶ್ರೋತಾ ಬುಧ್ಯತಿ ಚೇತ್ಯಾಹುರಿಮಂ ಯಮ್ |
ಸಾಕ್ಷೀ ಚಾಸ್ತೇ ಕರ್ತೃಷು ಪಶ್ಯನ್ನಿತಿ ಚಾನ್ಯೇ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೪ ||
ಪಶ್ಯನ್ ಶೃಣ್ವನ್ನತ್ರ ವಿಜಾನನ್ರಸಯನ್ಸಂ-
-ಜಿಘ್ರದ್ಬಿಭ್ರದ್ದೇಹಮಿಮಂ ಜೀವತಯೇತ್ಥಮ್ |
ಇತ್ಯಾತ್ಮಾನಂ ಯಂ ವಿದುರೀಶಂ ವಿಷಯಜ್ಞಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೫ ||
ಜಾಗ್ರದ್ದೃಷ್ಟ್ವಾ ಸ್ಥೂಲಪದಾರ್ಥಾನಥ ಮಾಯಾಂ
ದೃಷ್ಟ್ವಾ ಸ್ವಪ್ನೇಽಥಾಪಿ ಸುಷುಪ್ತೌ ಸುಖನಿದ್ರಾಮ್ |
ಇತ್ಯಾತ್ಮಾನಂ ವೀಕ್ಷ್ಯ ಮುದಾಸ್ತೇ ಚ ತುರೀಯೇ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೬ ||
ಪಶ್ಯನ್ ಶುದ್ಧೋಽಪ್ಯಕ್ಷರ ಏಕೋ ಗುಣಭೇದಾ-
-ನ್ನಾನಾಕಾರಾನ್ ಸ್ಫಾಟಿಕವದ್ಭಾತಿ ವಿಚಿತ್ರಃ |
ಭಿನ್ನಶ್ಛಿನ್ನಶ್ಚಾಯಮಜಃ ಕರ್ಮಫಲೈರ್ಯ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೭ ||
ಬ್ರಹ್ಮಾ ವಿಷ್ಣೂ ರುದ್ರಹುತಾಶೌ ರವಿಚಂದ್ರಾ-
-ವಿಂದ್ರೋ ವಾಯುರ್ಯಜ್ಞ ಇತೀತ್ಥಂ ಪರಿಕಲ್ಪ್ಯ |
ಏಕಂ ಸಂತಂ ಯಂ ಬಹುಧಾಹುರ್ಮತಿಭೇದಾ-
-ತ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೮ ||
ಸತ್ಯಂ ಜ್ಞಾನಂ ಶುದ್ಧಮನಂತಂ ವ್ಯತಿರಿಕ್ತಂ
ಶಾಂತಂ ಗೂಢಂ ನಿಷ್ಕಲಮಾನಂದಮನನ್ಯಮ್ |
ಇತ್ಯಾಹಾದೌ ಯಂ ವರುಣೋಽಸೌ ಭೃಗವೇಽಜಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೧೯ ||
ಕೋಶಾನೇತಾನ್ ಪಂಚರಸಾದೀನತಿಹಾಯ
ಬ್ರಹ್ಮಾಸ್ಮೀತಿ ಸ್ವಾತ್ಮನಿ ನಿಶ್ಚಿತ್ಯ ದೃಶಿಸ್ಥಮ್ |
ಪಿತ್ರಾ ಶಿಷ್ಟೋ ವೇದ ಭೃಗುರ್ಯಂ ಯಜುರಂತೇ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೦ ||
ಯೇನಾವಿಷ್ಟೋ ಯಸ್ಯ ಚ ಶಕ್ತ್ಯಾ ಯದಧೀನಃ
ಕ್ಷೇತ್ರಜ್ಞೋಽಯಂ ಕಾರಯಿತಾ ಜಂತುಷು ಕರ್ತುಃ |
ಕರ್ತಾ ಭೋಕ್ತಾತ್ಮಾತ್ರ ಹಿ ಯಚ್ಛಕ್ತ್ಯಧಿರೂಢ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೧ ||
ಸೃಷ್ಟ್ವಾ ಸರ್ವಂ ಸ್ವಾತ್ಮತಯೈವೇತ್ಥಮತರ್ಕ್ಯಂ
ವ್ಯಾಪ್ಯಾಥಾಂತಃ ಕೃತ್ಸ್ನಮಿದಂ ಸೃಷ್ಟಮಶೇಷಮ್ |
ಸಚ್ಚ ತ್ಯಚ್ಚಾಭೂತ್ಪರಮಾತ್ಮಾ ಸ ಯ ಏಕ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೨ ||
ವೇದಾಂತೈಶ್ಚಾಧ್ಯಾತ್ಮಿಕಶಾಸ್ತ್ರೈಶ್ಚ ಪುರಾಣೈಃ
ಶಾಸ್ತ್ರೈಶ್ಚಾನ್ಯೈಃ ಸಾತ್ತ್ವತತಂತ್ರೈಶ್ಚ ಯಮೀಶಮ್ |
ದೃಷ್ಟ್ವಾಥಾಂತಶ್ಚೇತಸಿ ಬುದ್ಧ್ವಾ ವಿವಿಶುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೩ ||
ಶ್ರದ್ಧಾಭಕ್ತಿಧ್ಯಾನಶಮಾದ್ಯೈರ್ಯತಮಾನೈ-
-ರ್ಜ್ಞಾತುಂ ಶಕ್ಯೋ ದೇವ ಇಹೈವಾಶು ಯ ಈಶಃ |
ದುರ್ವಿಜ್ಞೇಯೋ ಜನ್ಮಶತೈಶ್ಚಾಪಿ ವಿನಾ ತೈ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೪ ||
ಯಸ್ಯಾತರ್ಕ್ಯಂ ಸ್ವಾತ್ಮವಿಭೂತೇಃ ಪರಮಾರ್ಥಂ
ಸರ್ವಂ ಖಲ್ವಿತ್ಯತ್ರ ನಿರುಕ್ತಂ ಶ್ರುತಿವಿದ್ಭಿಃ |
ತಜ್ಜಾತಿತ್ವಾದಬ್ಧಿತರಂಗಾಭಮಭಿನ್ನಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೫ ||
ದೃಷ್ಟ್ವಾ ಗೀತಾಸ್ವಕ್ಷರತತ್ತ್ವಂ ವಿಧಿನಾಜಂ
ಭಕ್ತ್ಯಾ ಗುರ್ವ್ಯಾ ಲಭ್ಯ ಹೃದಿಸ್ಥಂ ದೃಶಿಮಾತ್ರಮ್ |
ಧ್ಯಾತ್ವಾ ತಸ್ಮಿನ್ನಸ್ಮ್ಯಹಮಿತ್ಯತ್ರ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೬ ||
ಕ್ಷೇತ್ರಜ್ಞತ್ವಂ ಪ್ರಾಪ್ಯ ವಿಭುಃ ಪಂಚಮುಖೈರ್ಯೋ
ಭುಂಕ್ತೇಽಜಸ್ರಂ ಭೋಗ್ಯಪದಾರ್ಥಾನ್ ಪ್ರಕೃತಿಸ್ಥಃ |
ಕ್ಷೇತ್ರೇ ಕ್ಷೇತ್ರೇಽಪ್ಸ್ವಿಂದುವದೇಕೋ ಬಹುಧಾಸ್ತೇ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೭ ||
ಯುಕ್ತ್ಯಾಲೋಡ್ಯ ವ್ಯಾಸವಚಾಂಸ್ಯತ್ರ ಹಿ ಲಭ್ಯಃ
ಕ್ಷೇತ್ರಕ್ಷೇತ್ರಜ್ಞಾಂತರವಿದ್ಭಿಃ ಪುರುಷಾಖ್ಯಃ |
ಯೋಽಹಂ ಸೋಽಸೌ ಸೋಽಸ್ಮ್ಯಹಮೇವೇತಿ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೮ ||
ಏಕೀಕೃತ್ಯಾನೇಕಶರೀರಸ್ಥಮಿಮಂ ಜ್ಞಂ
ಯಂ ವಿಜ್ಞಾಯೇಹೈವ ಸ ಏವಾಶು ಭವಂತಿ |
ಯಸ್ಮಿಂಲ್ಲೀನಾ ನೇಹ ಪುನರ್ಜನ್ಮ ಲಭಂತೇ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೨೯ ||
ದ್ವಂದ್ವೈಕತ್ವಂ ಯಚ್ಚ ಮಧುಬ್ರಾಹ್ಮಣವಾಕ್ಯೈಃ
ಕೃತ್ವಾ ಶಕ್ರೋಪಾಸನಮಾಸಾದ್ಯ ವಿಭೂತ್ಯಾ |
ಯೋಽಸೌ ಸೋಽಹಂ ಸೋಽಸ್ಮ್ಯಹಮೇವೇತಿ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೦ ||
ಯೋಽಯಂ ದೇಹೇ ಚೇಷ್ಟಯಿತಾಽಂತಃಕರಣಸ್ಥಃ
ಸೂರ್ಯೇ ಚಾಸೌ ತಾಪಯಿತಾ ಸೋಽಸ್ಮ್ಯಹಮೇವ |
ಇತ್ಯಾತ್ಮೈಕ್ಯೋಪಾಸನಯಾ ಯಂ ವಿದುರೀಶಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೧ ||
ವಿಜ್ಞಾನಾಂಶೋ ಯಸ್ಯ ಸತಃ ಶಕ್ತ್ಯಧಿರೂಢೋ
ಬುದ್ಧಿರ್ಬುಧ್ಯತ್ಯತ್ರ ಬಹಿರ್ಬೋಧ್ಯಪದಾರ್ಥಾನ್ |
ನೈವಾಂತಃಸ್ಥಂ ಬುಧ್ಯತಿ ಯಂ ಬೋಧಯಿತಾರಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೨ ||
ಕೋಽಯಂ ದೇಹೇ ದೇವ ಇತೀತ್ಥಂ ಸುವಿಚಾರ್ಯ
ಜ್ಞಾತಾ ಶ್ರೋತಾ ಮಂತಯಿತಾ ಚೈಷ ಹಿ ದೇವಃ |
ಇತ್ಯಾಲೋಚ್ಯ ಜ್ಞಾಂಶ ಇಹಾಸ್ಮೀತಿ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೩ ||
ಕೋ ಹ್ಯೇವಾನ್ಯಾದಾತ್ಮನಿ ನ ಸ್ಯಾದಯಮೇಷ
ಹ್ಯೇವಾನಂದಃ ಪ್ರಾಣಿತಿ ಚಾಪಾನಿತಿ ಚೇತಿ |
ಇತ್ಯಸ್ತಿತ್ವಂ ವಕ್ತ್ಯುಪಪತ್ತ್ಯಾ ಶ್ರುತಿರೇಷಾ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೪ ||
ಪ್ರಾಣೋ ವಾಽಹಂ ವಾಕ್ಛ್ರವಣಾದೀನಿ ಮನೋ ವಾ
ಬುದ್ಧಿರ್ವಾಹಂ ವ್ಯಸ್ತ ಉತಾಹೋಽಪಿ ಸಮಸ್ತಃ |
ಇತ್ಯಾಲೋಚ್ಯ ಜ್ಞಪ್ತಿರಿಹಾಸ್ಮೀತಿ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೫ ||
ನಾಹಂ ಪ್ರಾಣೋ ನೈವ ಶರೀರಂ ನ ಮನೋಽಹಂ
ನಾಹಂ ಬುದ್ಧಿರ್ನಾಹಮಹಂಕಾರಧಿಯೌ ಚ |
ಯೋಽತ್ರ ಜ್ಞಾಂಶಃ ಸೋಽಸ್ಮ್ಯಹಮೇವೇತಿ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೬ ||
ಸತ್ತಾಮಾತ್ರಂ ಕೇವಲವಿಜ್ಞಾನಮಜಂ ಸ-
-ತ್ಸೂಕ್ಷ್ಮಂ ನಿತ್ಯಂ ತತ್ತ್ವಮಸೀತ್ಯಾತ್ಮಸುತಾಯ |
ಸಾಮ್ನಾಮಂತೇ ಪ್ರಾಹ ಪಿತಾ ಯಂ ವಿಭುಮಾದ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೭ ||
ಮೂರ್ತಾಮೂರ್ತೇ ಪೂರ್ವಮಪೋಹ್ಯಾಥ ಸಮಾಧೌ
ದೃಶ್ಯಂ ಸರ್ವಂ ನೇತಿ ಚ ನೇತೀತಿ ವಿಹಾಯ |
ಚೈತನ್ಯಾಂಶೇ ಸ್ವಾತ್ಮನಿ ಸಂತಂ ಚ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೮ ||
ಓತಂ ಪ್ರೋತಂ ಯತ್ರ ಚ ಸರ್ವಂ ಗಗನಾಂತಂ
ಯೋಽಸ್ಥೂಲಾನಣ್ವಾದಿಷು ಸಿದ್ಧೋಽಕ್ಷರಸಂಜ್ಞಃ |
ಜ್ಞಾತಾತೋಽನ್ಯೋ ನೇತ್ಯುಪಲಭ್ಯೋ ನ ಚ ವೇದ್ಯ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೩೯ ||
ತಾವತ್ಸರ್ವಂ ಸತ್ಯಮಿವಾಭಾತಿ ಯದೇತ-
-ದ್ಯಾವತ್ಸೋಽಸ್ಮೀತ್ಯಾತ್ಮನಿ ಯೋ ಜ್ಞೋ ನ ಹಿ ದೃಷ್ಟಃ |
ದೃಷ್ಟೇ ಯಸ್ಮಿನ್ ಸರ್ವಮಸತ್ಯಂ ಭವತೀದಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೪೦ ||
ರಾಗಾಮುಕ್ತಂ ಲೋಹಯುತಂ ಹೇಮ ಯಥಾಗ್ನೌ
ಯೋಗಾಷ್ಟಾಂಗೈರುಜ್ಜ್ವಲಿತಜ್ಞಾನಮಯಾಗ್ನೌ |
ದಗ್ಧ್ವಾತ್ಮಾನಂ ಜ್ಞಂ ಪರಿಶಿಷ್ಟಂ ಚ ವಿದುರ್ಯಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೪೧ ||
ಯಂ ವಿಜ್ಞಾನಜ್ಯೋತಿಷಮಾದ್ಯಂ ಸುವಿಭಾಂತಂ
ಹೃದ್ಯರ್ಕೇಂದ್ವಗ್ನ್ಯೋಕಸಮೀಡ್ಯಂ ತಟಿದಾಭಮ್ |
ಭಕ್ತ್ಯಾರಾಧ್ಯೇಹೈವ ವಿಶಂತ್ಯಾತ್ಮನಿ ಸಂತಂ
ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೪೨ ||
ಪಾಯಾದ್ಭಕ್ತಂ ಸ್ವಾತ್ಮನಿ ಸಂತಂ ಪುರುಷಂ ಯೋ
ಭಕ್ತ್ಯಾ ಸ್ತೌತೀತ್ಯಾಂಗಿರಸಂ ವಿಷ್ಣುರಿಮಂ ಮಾಮ್ |
ಇತ್ಯಾತ್ಮಾನಂ ಸ್ವಾತ್ಮನಿ ಸಂಹೃತ್ಯ ಸದೈಕ-
-ಸ್ತಂ ಸಂಸಾರಧ್ವಾಂತವಿನಾಶಂ ಹರಿಮೀಡೇ || ೪೩ ||
[* ಅಧಿಕಶ್ಲೋಕಃ –
ಇತ್ಥಂ ಸ್ತೋತ್ರಂ ಭಕ್ತಜನೇಡ್ಯಂ ಭವಭೀತಿ-
-ಧ್ವಾಂತಾರ್ಕಾಭಂ ಭಗವತ್ಪಾದೀಯಮಿದಂ ಯಃ |
ವಿಷ್ಣೋರ್ಲೋಕಂ ಪಠತಿ ಶೃಣೋತಿ ವ್ರಜತಿ ಜ್ಞೋ
ಜ್ಞಾನಂ ಜ್ಞೇಯಂ ಸ್ವಾತ್ಮನಿ ಚಾಪ್ನೋತಿ ಮನುಷ್ಯಃ || ೪೪ ||
*]
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿಂದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಂಕರಭಗವತಃ ಕೃತೌ ಶ್ರೀ ಹರಿ ಸ್ತುತಿಃ ಸಂಪೂರ್ಣಮ್ |
ಇನ್ನಷ್ಟು ಶ್ರೀ ವಿಷ್ಣು ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
