Read in తెలుగు / ಕನ್ನಡ / தமிழ் / देवनागरी / English (IAST)
(ತೈ।ಆ।7-1-1)
ಓಂ ಶ್ರೀ ಗುರುಭ್ಯೋ ನಮಃ । ಹರಿಃ ಓಮ್ ॥
ಓಂ ಶಂ ನೋ॑ ಮಿ॒ತ್ರಶ್ಶಂ ವರು॑ಣಃ । ಶಂ ನೋ॑ ಭವತ್ವರ್ಯ॒ಮಾ ।
ಶಂ ನ॒ ಇನ್ದ್ರೋ॒ ಬೃಹ॒ಸ್ಪತಿ॑: । ಶಂ ನೋ॒ ವಿಷ್ಣು॑ರುರುಕ್ರ॒ಮಃ ।
ನಮೋ॒ ಬ್ರಹ್ಮ॑ಣೇ । ನಮ॑ಸ್ತೇ ವಾಯೋ । ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾ॑ಸಿ ।
ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮ॑ ವದಿಷ್ಯಾಮಿ । ಋ॒ತಂ ವ॑ದಿಷ್ಯಾಮಿ ।
ಸ॒ತ್ಯಂ ವ॑ದಿಷ್ಯಾಮಿ । ತನ್ಮಾಮ॑ವತು । ತದ್ವ॒ಕ್ತಾರ॑ಮವತು ।
ಅವ॑ತು॒ ಮಾಮ್ । ಅವ॑ತು ವ॒ಕ್ತಾರಮ್᳚ ।
ಓಂ ಶಾನ್ತಿ॒: ಶಾನ್ತಿ॒: ಶಾನ್ತಿ॑: ॥ 1 ॥
ಇತಿ ಪ್ರಥಮೋಽನುವಾಕಃ ॥
ಶೀಕ್ಷಾಂ ವ್ಯಾ᳚ಖ್ಯಾಸ್ಯಾ॒ಮಃ । ವರ್ಣ॒ಸ್ಸ್ವರಃ । ಮಾತ್ರಾ॒ ಬಲಮ್ ।
ಸಾಮ॑ ಸನ್ತಾ॒ನಃ । ಇತ್ಯುಕ್ತಶ್ಶೀ᳚ಕ್ಷಾಧ್ಯಾ॒ಯಃ ॥ 1 ॥
ಇತಿ ದ್ವಿತೀಯೋಽನುವಾಕಃ ॥
ಸ॒ಹ ನೌ॒ ಯಶಃ । ಸ॒ಹ ನೌ ಬ್ರ॑ಹ್ಮವ॒ರ್ಚಸಮ್ ।
ಅಥಾತಸ್ಸಗ್ಂಹಿತಾಯಾ ಉಪನಿಷದಂ ವ್ಯಾ᳚ಖ್ಯಾಸ್ಯಾ॒ಮಃ ।
ಪಞ್ಚಸ್ವಧಿಕ॑ರಣೇ॒ಷು ।
ಅಧಿಲೋಕಮಧಿಜ್ಯೌತಿಷಮಧಿವಿದ್ಯಮಧಿಪ್ರಜ॑ಮಧ್ಯಾ॒ತ್ಮಮ್ ।
ತಾ ಮಹಾಸಗ್ಂಹಿತಾ ಇ॑ತ್ಯಾಚ॒ಕ್ಷತೇ । ಅಥಾ॑ಧಿಲೋ॒ಕಮ್ ।
ಪೃಥಿವೀ ಪೂ᳚ರ್ವರೂ॒ಪಮ್ । ದ್ಯೌರುತ್ತ॑ರರೂ॒ಪಮ್ ।
ಆಕಾ॑ಶಸ್ಸ॒ನ್ಧಿಃ ॥ 1 ॥
ವಾಯು॑ಸ್ಸನ್ಧಾ॒ನಮ್ । ಇತ್ಯ॑ಧಿಲೋ॒ಕಮ್ । ಅಥಾ॑ಧಿಜ್ಯೌ॒ತಿಷಮ್ ।
ಅಗ್ನಿಃ ಪೂ᳚ರ್ವರೂ॒ಪಮ್ । ಆದಿತ್ಯ ಉತ್ತ॑ರರೂ॒ಪಮ್ । ಆ॑ಪಸ್ಸ॒ನ್ಧಿಃ ।
ವೈದ್ಯುತ॑ಸ್ಸನ್ಧಾ॒ನಮ್ । ಇತ್ಯ॑ಧಿಜ್ಯೌ॒ತಿಷಮ್ । ಅಥಾ॑ಧಿವಿ॒ದ್ಯಮ್ ।
ಆಚಾರ್ಯಃ ಪೂ᳚ರ್ವರೂ॒ಪಮ್ ॥ 2 ॥
ಅನ್ತೇವಾಸ್ಯುತ್ತ॑ರರೂ॒ಪಮ್ । ವಿ॑ದ್ಯಾ ಸ॒ನ್ಧಿಃ ।
ಪ್ರವಚನಗ್ಂ॑ ಸನ್ಧಾ॒ನಮ್ ।
ಇತ್ಯ॑ಧಿವಿ॒ದ್ಯಮ್ । ಅಥಾಧಿ॒ಪ್ರಜಮ್ । ಮಾತಾ ಪೂ᳚ರ್ವರೂ॒ಪಮ್ ।
ಪಿತೋತ್ತ॑ರರೂ॒ಪಮ್ । ಪ್ರ॑ಜಾ ಸ॒ನ್ಧಿಃ । ಪ್ರಜನನಗ್ಂ॑ ಸನ್ಧಾ॒ನಮ್ ।
ಇತ್ಯಧಿ॒ಪ್ರಜಮ್ ॥ 3 ॥
ಅಥಾಧ್ಯಾ॒ತ್ಮಮ್ । ಅಧರಾ ಹನುಃ ಪೂ᳚ರ್ವರೂ॒ಪಮ್ ।
ಉತ್ತರಾ ಹನುರುತ್ತ॑ರರೂ॒ಪಮ್ । ವಾಕ್ಸ॒ನ್ಧಿಃ । ಜಿಹ್ವಾ॑ ಸನ್ಧಾ॒ನಮ್ ।
ಇತ್ಯಧ್ಯಾ॒ತ್ಮಮ್ । ಇತೀಮಾ ಮ॑ಹಾಸ॒ಗ್ಂ॒ಹಿತಾಃ ।
ಯ ಏವಮೇತಾ ಮಹಾಸಗ್ಂಹಿತಾ ವ್ಯಾಖ್ಯಾ॑ತಾ ವೇ॒ದ ।
ಸನ್ಧೀಯತೇ ಪ್ರಜ॑ಯಾ ಪ॒ಶುಭಿಃ ।
ಬ್ರಹ್ಮವರ್ಚಸೇನಾನ್ನಾದ್ಯೇನ ಸುವರ್ಗ್ಯೇಣ॑ ಲೋಕೇ॒ನ ॥ 4 ॥
ಇತಿ ತೃತೀಯೋಽನುವಾಕಃ ॥
ಯಶ್ಛನ್ದ॑ಸಾಮೃಷ॒ಭೋ ವಿ॒ಶ್ವರೂ॑ಪಃ ।
ಛನ್ದೋ॒ಭ್ಯೋಽಧ್ಯ॒ಮೃತಾ᳚ಥ್ಸಂ ಬ॒ಭೂವ॑ ।
ಸ ಮೇನ್ದ್ರೋ॑ ಮೇ॒ಧಯಾ᳚ ಸ್ಪೃಣೋತು ।
ಅ॒ಮೃತ॑ಸ್ಯ ದೇವ॒ ಧಾರ॑ಣೋ ಭೂಯಾಸಮ್ ।
ಶರೀ॑ರಂ ಮೇ॒ ವಿಚ॑ರ್ಷಣಮ್ । ಜಿ॒ಹ್ವಾ ಮೇ॒ ಮಧು॑ಮತ್ತಮಾ ।
ಕರ್ಣಾ᳚ಭ್ಯಾಂ ಭೂರಿ॒ ವಿಶ್ರು॑ವಮ್ ।
ಬ್ರಹ್ಮ॑ಣಃ ಕೋ॒ಶೋ॑ಽಸಿ ಮೇ॒ಧಯಾಽಪಿ॑ಹಿತಃ ।
ಶ್ರು॒ತಂ ಮೇ॑ ಗೋಪಾಯ । ಆ॒ವಹ॑ನ್ತೀ ವಿತನ್ವಾ॒ನಾ ॥ 1 ॥
ಕು॒ರ್ವಾ॒ಣಾ ಚೀರ॑ಮಾ॒ತ್ಮನ॑: । ವಾಸಾಗ್ಂ॑ಸಿ॒ ಮಮ॒ ಗಾವ॑ಶ್ಚ ।
ಅ॒ನ್ನ॒ಪಾ॒ನೇ ಚ॑ ಸರ್ವ॒ದಾ । ತತೋ॑ ಮೇ॒ ಶ್ರಿಯ॒ಮಾವ॑ಹ ।
ಲೋ॒ಮ॒ಶಾಂ ಪ॒ಶುಭಿ॑ಸ್ಸ॒ಹ ಸ್ವಾಹಾ᳚ ।
ಆಮಾ॑ ಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ ।
ವಿಮಾ॑ಽಽಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ ।
ಪ್ರಮಾ॑ಽಽಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ ।
ದಮಾ॑ಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ ।
ಶಮಾ॑ಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ ॥ 2 ॥
ಯಶೋ॒ ಜನೇ॑ಽಸಾನಿ॒ ಸ್ವಾಹಾ᳚ । ಶ್ರೇಯಾ॒ನ್ವಸ್ಯ॑ಸೋಽಸಾನಿ॒ ಸ್ವಾಹಾ᳚ ।
ತಂ ತ್ವಾ॑ ಭಗ॒ ಪ್ರವಿ॑ಶಾನಿ॒ ಸ್ವಾಹಾ᳚ ।
ಸ ಮಾ॑ ಭಗ॒ ಪ್ರವಿ॑ಶ॒ ಸ್ವಾಹಾ᳚ ।
ತಸ್ಮಿ᳚ನ್ಥ್ಸ॒ಹಸ್ರ॑ಶಾಖೇ । ನಿಭ॑ಗಾ॒ಹಂ ತ್ವಯಿ॑ ಮೃಜೇ॒ ಸ್ವಾಹಾ᳚ ।
ಯಥಾಽಽಪ॒: ಪ್ರವ॑ತಾ॒ಽಽಯನ್ತಿ॑ । ಯಥಾ॒ ಮಾಸಾ॑ ಅಹರ್ಜ॒ರಮ್ ।
ಏ॒ವಂ ಮಾಂ ಬ್ರ॑ಹ್ಮಚಾ॒ರಿಣ॑: । ಧಾತ॒ರಾಯ॑ನ್ತು ಸ॒ರ್ವತ॒ಸ್ಸ್ವಾಹಾ᳚ ।
ಪ್ರ॒ತಿ॒ವೇ॒ಶೋ॑ಽಸಿ॒ ಪ್ರಮಾ॑ಭಾಹಿ॒ ಪ್ರಮಾ॑ಪದ್ಯಸ್ವ ॥ 3 ॥
ಇತಿ ಚತುರ್ಥೋಽನುವಾಕಃ ॥
ಭೂರ್ಭುವ॒ಸ್ಸುವ॒ರಿತಿ॒ ವಾ ಏ॒ತಾಸ್ತಿ॒ಸ್ರೋ ವ್ಯಾಹೃ॑ತಯಃ ।
ತಾಸಾ॑ಮುಹಸ್ಮೈ॒ ತಾಂ ಚ॑ತು॒ರ್ಥೀಮ್ । ಮಾಹಾ॑ಚಮಸ್ಯ॒: ಪ್ರವೇ॑ದಯತೇ ।
ಮಹ॒ ಇತಿ॑ । ತದ್ಬ್ರಹ್ಮ॑ । ಸ ಆ॒ತ್ಮಾ । ಅಙ್ಗಾ᳚ನ್ಯ॒ನ್ಯಾ ದೇ॒ವತಾ᳚: ।
ಭೂರಿತಿ॒ ವಾ ಅ॒ಯಂ ಲೋ॒ಕಃ । ಭುವ॒ ಇತ್ಯ॒ನ್ತರಿ॑ಕ್ಷಮ್ ।
ಸುವ॒ರಿತ್ಯ॒ಸೌ ಲೋ॒ಕಃ ॥ 1 ॥
ಮಹ॒ ಇತ್ಯಾ॑ದಿ॒ತ್ಯಃ । ಆ॒ದಿ॒ತ್ಯೇನ॒ ವಾವ ಸರ್ವೇ॑ ಲೋ॒ಕಾ ಮಹೀ॑ಯನ್ತೇ ।
ಭೂರಿತಿ॒ ವಾ ಅ॒ಗ್ನಿಃ । ಭುವ॒ ಇತಿ॑ ವಾ॒ಯುಃ । ಸುವ॒ರಿತ್ಯಾ॑ದಿ॒ತ್ಯಃ ।
ಮಹ॒ ಇತಿ॑ ಚ॒ನ್ದ್ರಮಾ᳚: ।
ಚ॒ನ್ದ್ರಮ॑ಸಾ॒ ವಾವ ಸರ್ವಾ॑ಣಿ॒ ಜ್ಯೋತೀಗ್ಂ॑ಷಿ॒ ಮಹೀ॑ಯನ್ತೇ । ಭೂರಿತಿ॒ ವಾ ಋಚ॑: ।
ಭುವ॒ ಇತಿ॒ ಸಾಮಾ॑ನಿ ।
ಸುವ॒ರಿತಿ॒ ಯಜೂಗ್ಂ॑ಷಿ ॥ 2 ॥
ಮಹ॒ ಇತಿ॒ ಬ್ರಹ್ಮ॑ । ಬ್ರಹ್ಮ॑ಣಾ॒ ವಾವ ಸರ್ವೇ॑ ವೇ॒ದಾ ಮಹೀ॑ಯನ್ತೇ ।
ಭೂರಿತಿ॒ ವೈ ಪ್ರಾ॒ಣಃ । ಭುವ॒ ಇತ್ಯ॑ಪಾ॒ನಃ । ಸುವ॒ರಿತಿ॑ ವ್ಯಾ॒ನಃ ।
ಮಹ॒ ಇತ್ಯನ್ನಮ್᳚ । ಅನ್ನೇ॑ನ॒ ವಾವ ಸರ್ವೇ᳚ ಪ್ರಾ॒ಣಾ ಮಹೀ॑ಯನ್ತೇ ।
ತಾ ವಾ ಏ॒ತಾಶ್ಚತ॑ಸ್ರಶ್ಚತು॒ರ್ಧಾ । ಚತ॑ಸ್ರಶ್ಚತಸ್ರೋ॒ ವ್ಯಾಹೃ॑ತಯಃ ।
ತಾ ಯೋ ವೇದ॑ ।
ಸ ವೇ॑ದ॒ ಬ್ರಹ್ಮ॑ । ಸರ್ವೇ᳚ಽಸ್ಮೈ ದೇ॒ವಾ ಬ॒ಲಿಮಾವ॑ಹನ್ತಿ ॥ 3 ॥
ಇತಿ ಪಞ್ಚಮೋಽನುವಾಕಃ ॥
ಸ ಯ ಏ॒ಷೋ᳚ಽನ್ತರಹೃ॑ದಯ ಆಕಾ॒ಶಃ ।
ತಸ್ಮಿ॑ನ್ನ॒ಯಂ ಪುರು॑ಷೋ ಮನೋ॒ಮಯ॑: । ಅಮೃ॑ತೋ ಹಿರ॒ಣ್ಮಯ॑: ।
ಅನ್ತ॑ರೇಣ॒ ತಾಲು॑ಕೇ । ಯ ಏ॒ಷಸ್ತನ॑ ಇವಾವ॒ಲಮ್ಬ॑ತೇ । ಸೇ᳚ನ್ದ್ರಯೋ॒ನಿಃ ।
ಯತ್ರಾ॒ಸೌ ಕೇ॑ಶಾ॒ನ್ತೋ ವಿ॒ವರ್ತ॑ತೇ । ವ್ಯ॒ಪೋಹ್ಯ॑ ಶೀರ್ಷಕಪಾ॒ಲೇ ।
ಭೂರಿತ್ಯ॒ಗ್ನೌ ಪ್ರತಿ॑ತಿಷ್ಠತಿ । ಭುವ॒ ಇತಿ॑ ವಾ॒ಯೌ ॥ 1 ॥
ಸುವ॒ರಿತ್ಯಾ॑ದಿ॒ತ್ಯೇ । ಮಹ॒ ಇತಿ॒ ಬ್ರಹ್ಮ॑ಣಿ । ಆ॒ಪ್ನೋತಿ॒ ಸ್ವಾರಾ᳚ಜ್ಯಮ್ ।
ಆ॒ಪ್ನೋತಿ॒ ಮನ॑ಸ॒ಸ್ಪತಿಮ್᳚ । ವಾಕ್ಪ॑ತಿ॒ಶ್ಚಕ್ಷು॑ಷ್ಪತಿಃ ।
ಶ್ರೋತ್ರ॑ಪತಿರ್ವಿ॒ಜ್ಞಾನ॑ಪತಿಃ । ಏ॒ತತ್ತತೋ॑ ಭವತಿ ।
ಆ॒ಕಾ॒ಶಶ॑ರೀರಂ॒ ಬ್ರಹ್ಮ॑ ।
ಸ॒ತ್ಯಾತ್ಮ॑ ಪ್ರಾ॒ಣಾರಾ॑ಮಂ॒ ಮನ॑ ಆನನ್ದಮ್ ।
ಶಾನ್ತಿ॑ಸಮೃದ್ಧಮ॒ಮೃತಮ್᳚ ।
ಇತಿ॑ ಪ್ರಾಚೀನ ಯೋ॒ಗ್ಯೋಪಾ᳚ಸ್ಸ್ವ ॥ 2 ॥
ಇತಿ ಷಷ್ಠೋಽನುವಾಕಃ ॥
ಪೃ॒ಥಿ॒ವ್ಯ॑ನ್ತರಿ॑ಕ್ಷಂ॒ ದ್ಯೌರ್ದಿಶೋ॑ಽವಾನ್ತರದಿ॒ಶಾಃ ।
ಅ॒ಗ್ನಿರ್ವಾ॒ಯುರಾ॑ದಿ॒ತ್ಯಶ್ಚ॒ನ್ದ್ರಮಾ॒ ನಕ್ಷ॑ತ್ರಾಣಿ ।
ಆಪ॒ ಓಷ॑ಧಯೋ॒ ವನ॒ಸ್ಪತ॑ಯ ಆಕಾ॒ಶ ಆ॒ತ್ಮಾ । ಇತ್ಯ॑ಧಿಭೂ॒ತಮ್ ।
ಅಥಾಧ್ಯಾ॒ತ್ಮಮ್ । ಪ್ರಾ॒ಣೋ ವ್ಯಾ॒ನೋ॑ಽಪಾ॒ನ ಉ॑ದಾ॒ನಸ್ಸ॑ಮಾ॒ನಃ ।
ಚಕ್ಷು॒ಶ್ಶ್ರೋತ್ರಂ॒ ಮನೋ॒ ವಾಕ್ತ್ವಕ್ ।
ಚರ್ಮ॑ಮಾ॒ಗ್ಂ॒ಸಗ್ಗ್ ಸ್ನಾವಾಸ್ಥಿ॑ ಮ॒ಜ್ಜಾ ।
ಏ॒ತದ॑ಧಿವಿ॒ಧಾಯ॒ ಋಷಿ॒ರವೋ॑ಚತ್ ।
ಪಾಙ್ಕ್ತಂ॒ ವಾ ಇ॒ದಗ್ಂ ಸರ್ವಮ್᳚ ।
ಪಾಙ್ಕ್ತೇ॑ನೈ॒ವ ಪಾಙ್ಕ್ತಗ್ಗ್॑ ಸ್ಪೃಣೋ॒ತೀತಿ॑ ॥ 1 ॥
ಇತಿ ಸಪ್ತಮೋಽನುವಾಕಃ ॥
ಓಮಿತಿ॒ ಬ್ರಹ್ಮ॑ । ಓಮಿತೀ॒ದಗ್ಂ ಸರ್ವಮ್᳚ ।
ಓಮಿತ್ಯೇ॒ತದ॑ನುಕೃತಿ ಹ ಸ್ಮ॒ ವಾ ಅ॒ಪ್ಯೋ ಶ್ರಾ॑ವ॒ಯೇತ್ಯಾಶ್ರಾ॑ವಯನ್ತಿ ।
ಓಮಿತಿ॒ ಸಾಮಾ॑ನಿ ಗಾಯನ್ತಿ । ಓಗ್ಂ ಶೋಮಿತಿ॑ ಶ॒ಸ್ತ್ರಾಣಿ॑ ಶಗ್ಂಸನ್ತಿ ।
ಓಮಿತ್ಯ॑ಧ್ವ॒ರ್ಯುಃ ಪ್ರ॑ತಿಗ॒ರಂ ಪ್ರತಿ॑ಗೃಣಾತಿ ।
ಓಮಿತಿ॒ ಬ್ರಹ್ಮಾ॒ ಪ್ರಸೌ॑ತಿ । ಓಮಿತ್ಯ॑ಗ್ನಿಹೋ॒ತ್ರಮನು॑ಜಾನಾತಿ ।
ಓಮಿತಿ॑ ಬ್ರಾಹ್ಮ॒ಣಃ ಪ್ರ॑ವ॒ಕ್ಷ್ಯನ್ನಾ॑ಹ॒ ಬ್ರಹ್ಮೋಪಾ᳚ಪ್ನವಾ॒ನೀತಿ॑ ।
ಬ್ರಹ್ಮೈ॒ವೋಪಾ᳚ಪ್ನೋತಿ ॥ 1 ॥
ಇತ್ಯಷ್ಟಮೋಽನುವಾಕಃ ॥
ಋತಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಸತ್ಯಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ತಪಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ದಮಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಶಮಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಅಗ್ನಯಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಅಗ್ನಿಹೋತ್ರಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಅತಿಥಯಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಮಾನುಷಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಪ್ರಜಾ ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಪ್ರಜನಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಪ್ರಜಾತಿಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ ।
ಸತ್ಯಮಿತಿ ಸತ್ಯವಚಾ॑ ರಾಥೀ॒ತರಃ ।
ತಪ ಇತಿ ತಪೋನಿತ್ಯಃ ಪೌ॑ರುಶಿ॒ಷ್ಟಿಃ ।
ಸ್ವಾಧ್ಯಾಯಪ್ರವಚನೇ ಏವೇತಿ ನಾಕೋ॑ ಮೌದ್ಗ॒ಲ್ಯಃ ।
ತದ್ಧಿ ತಪ॑ಸ್ತದ್ಧಿ॒ ತಪಃ ॥ 1 ॥
ಇತಿ ನವಮೋಽನುವಾಕಃ ॥
ಅ॒ಹಂ ವೃ॒ಕ್ಷಸ್ಯ॒ ರೇರಿ॑ವಾ । ಕೀ॒ರ್ತಿಃ ಪೃ॒ಷ್ಠಂ ಗಿ॒ರೇರಿ॑ವ ।
ಊ॒ರ್ಧ್ವಪ॑ವಿತ್ರೋ ವಾ॒ಜಿನೀ॑ವ ಸ್ವ॒ಮೃತ॑ಮಸ್ಮಿ ।
ದ್ರವಿ॑ಣ॒ಗ್ಂ॒ ಸವ॑ರ್ಚಸಮ್ । ಸುಮೇಧಾ ಅ॑ಮೃತೋ॒ಕ್ಷಿತಃ ।
ಇತಿ ತ್ರಿಶಙ್ಕೋರ್ವೇದಾ॑ನುವ॒ಚನಮ್ ॥ 1 ॥
ಇತಿ ದಶಮೋಽನುವಾಕಃ ॥
ವೇದಮನೂಚ್ಯಾಚಾರ್ಯೋಽನ್ತೇವಾಸಿನಮ॑ನುಶಾ॒ಸ್ತಿ ।
ಸತ್ಯಂ॒ ವದ । ಧರ್ಮಂ॒ ಚರ । ಸ್ವಾಧ್ಯಾಯಾ᳚ನ್ಮಾ ಪ್ರ॒ಮದಃ ।
ಆಚಾರ್ಯಾಯ ಪ್ರಿಯಂ ಧನಮಾಹೃತ್ಯ ಪ್ರಜಾತನ್ತುಂ ಮಾ ವ್ಯ॑ವಚ್ಛೇ॒ತ್ಸೀಃ ।
ಸತ್ಯಾನ್ನ ಪ್ರಮ॑ದಿತ॒ವ್ಯಮ್ । ಧರ್ಮಾನ್ನ ಪ್ರಮ॑ದಿತ॒ವ್ಯಮ್ ।
ಕುಶಲಾನ್ನ ಪ್ರಮ॑ದಿತ॒ವ್ಯಮ್ । ಭೂತ್ಯೈ ನ ಪ್ರಮ॑ದಿತ॒ವ್ಯಮ್ ।
ಸ್ವಾಧ್ಯಾಯಪ್ರವಚನಾಭ್ಯಾಂ ನ ಪ್ರಮ॑ದಿತ॒ವ್ಯಮ್ ॥ 1 ॥
ದೇವಪಿತೃಕಾರ್ಯಾಭ್ಯಾಂ ನ ಪ್ರಮ॑ದಿತ॒ವ್ಯಮ್ । ಮಾತೃ॑ದೇವೋ॒ ಭವ ।
ಪಿತೃ॑ದೇವೋ॒ ಭವ । ಆಚಾರ್ಯ॑ದೇವೋ॒ ಭವ । ಅತಿಥಿ॑ದೇವೋ॒ ಭವ ।
ಯಾನ್ಯನವದ್ಯಾನಿ॑ ಕರ್ಮಾ॒ಣಿ । ತಾನಿ ಸೇವಿ॑ತವ್ಯಾ॒ನಿ । ನೋ ಇ॑ತರಾ॒ಣಿ ।
ಯಾನ್ಯಸ್ಮಾಕಗ್ಂ ಸುಚ॑ರಿತಾ॒ನಿ । ತಾನಿ ತ್ವಯೋ॑ಪಾಸ್ಯಾ॒ನಿ ॥ 2 ॥
ನೋ ಇ॑ತರಾ॒ಣಿ । ಯೇ ಕೇ ಚಾರುಮಚ್ಛ್ರೇಯಾಗ್ಂ॑ಸೋ ಬ್ರಾ॒ಹ್ಮಣಾಃ ।
ತೇಷಾಂ ತ್ವಯಾಽಽಸನೇ ನ ಪ್ರಶ್ವ॑ಸಿತ॒ವ್ಯಮ್ । ಶ್ರದ್ಧ॑ಯಾ ದೇ॒ಯಮ್ ।
ಅಶ್ರದ್ಧ॑ಯಾಽದೇ॒ಯಮ್ । ಶ್ರಿ॑ಯಾ ದೇ॒ಯಮ್ । ಹ್ರಿ॑ಯಾ ದೇ॒ಯಮ್ ।
ಭಿ॑ಯಾ ದೇ॒ಯಮ್ । ಸಂವಿ॑ದಾ ದೇ॒ಯಮ್ ।
ಅಥ ಯದಿ ತೇ ಕರ್ಮವಿಚಿಕಿಥ್ಸಾ ವಾ ವೃತ್ತವಿಚಿಕಿ॑ಥ್ಸಾ ವಾ॒ ಸ್ಯಾತ್ ॥ 3 ॥
ಯೇ ತತ್ರ ಬ್ರಾಹ್ಮಣಾ᳚ಸ್ಸಂಮ॒ರ್ಶಿನಃ । ಯುಕ್ತಾ॑ ಆಯು॒ಕ್ತಾಃ ।
ಅಲೂಕ್ಷಾ॑ ಧರ್ಮ॑ಕಾಮಾ॒ಸ್ಸ್ಯುಃ । ಯಥಾ ತೇ॑ ತತ್ರ॑ ವರ್ತೇ॒ರನ್ನ್ ।
ತಥಾ ತತ್ರ॑ ವರ್ತೇ॒ಥಾಃ । ಅಥಾಭ್ಯಾ᳚ಖ್ಯಾ॒ತೇಷು ।
ಯೇ ತತ್ರ ಬ್ರಾಹ್ಮಣಾ᳚ಸ್ಸಂಮ॒ರ್ಶಿನಃ । ಯುಕ್ತಾ॑ ಆಯು॒ಕ್ತಾಃ ।
ಅಲೂಕ್ಷಾ॑ ಧರ್ಮಕಾಮಾ॒ಸ್ಸ್ಯುಃ । ಯಥಾ ತೇ॑ ತೇಷು॑ ವರ್ತೇ॒ರನ್ನ್ ।
ತಥಾ ತೇಷು॑ ವರ್ತೇ॒ಥಾಃ । ಏಷ॑ ಆದೇ॒ಶಃ । ಏಷ ಉ॑ಪದೇ॒ಶಃ ।
ಏಷಾ ವೇ॑ದೋಪ॒ನಿಷತ್ । ಏತದ॑ನುಶಾ॒ಸನಮ್ । ಏವಮುಪಾ॑ಸಿತ॒ವ್ಯಮ್ ।
ಏವಮು ಚೈತ॑ದುಪಾ॒ಸ್ಯಮ್ ॥ 4 ॥
ಇತ್ಯೇಕಾದಶಽನುವಾಕಃ ॥
ಶಂ ನೋ॑ ಮಿ॒ತ್ರಶ್ಶಂ ವರು॑ಣಃ । ಶಂ ನೋ॑ ಭವತ್ವರ್ಯ॒ಮಾ ।
ಶಂ ನ॒ ಇನ್ದ್ರೋ॒ ಬೃಹ॒ಸ್ಪತಿ॑: । ಶಂ ನೋ॒ ವಿಷ್ಣು॑ರುರುಕ್ರ॒ಮಃ ।
ನಮೋ॒ ಬ್ರಹ್ಮ॑ಣೇ । ನಮ॑ಸ್ತೇ ವಾಯೋ । ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾ॑ಸಿ ।
ತ್ವಾಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾವಾ॑ದಿಷಮ್ । ಋ॒ತಮ॑ವಾದಿಷಮ್ ।
ಸ॒ತ್ಯಮ॑ವಾದಿಷಮ್ । ತನ್ಮಾಮಾ॑ವೀತ್ । ತದ್ವ॒ಕ್ತಾರ॑ಮಾವೀತ್ ।
ಆವೀ॒ನ್ಮಾಮ್ । ಆವೀ᳚ದ್ವ॒ಕ್ತಾರಮ್᳚ ।
ಓಂ ಶಾನ್ತಿ॒: ಶಾನ್ತಿ॒: ಶಾನ್ತಿ॑: ॥ 1 ॥
ಇತಿ ದ್ವಾದಶೋಽನುವಾಕಃ ॥
॥ ಇತಿ ಶೀಕ್ಷಾವಲ್ಲೀ ಸಮಾಪ್ತಾ ॥
ತೈತ್ತಿರೀಯೋಪನಿಷತ್ – 2 (ಬ್ರಹ್ಮಾನನ್ದವಲ್ಲೀ) >>
ಇನ್ನಷ್ಟು ವೇದಸೂಕ್ತಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
