Read in తెలుగు / ಕನ್ನಡ / தமிழ் / देवनागरी / English (IAST)
ಪುನಃ ಸಙ್ಕಲ್ಪಂ –
ಪೂರ್ವೋಕ್ತ ಏವಂ ಗುಣ ವಿಶೇಷಣ ವಿಶಿಷ್ಟಾಯಾಂ ಶುಭ ತಿಥೌ ಶ್ರೀ ಕಾಲಿಕಾ ಪರಮೇಶ್ವರೀ ಅನುಗ್ರಹ ಪ್ರಸಾದ ಸಿದ್ಧಿದ್ವಾರಾ ಸರ್ವಶತ್ರುಬಾಧಾ ಶಾನ್ತ್ಯರ್ಥಂ, ಮಮ ಸರ್ವಾರಿಷ್ಟ ನಿವೃತ್ತ್ಯರ್ಥಂ, ಸರ್ವಕಾರ್ಯ ಸಿದ್ಧ್ಯರ್ಥಂ, ಶ್ರೀ ಕಾಲಿಕಾ ಪರಮೇಶ್ವರೀ ಪ್ರೀತ್ಯರ್ಥಂ ಧ್ಯಾನ ಆವಾಹನಾದಿ ಷೋಡಶೋಪಚಾರ ಪೂಜಾಂ ಕರಿಷ್ಯೇ ॥
ಧ್ಯಾನಮ್ –
ಶವಾರೂಢಾಂ ಮಹಾಭೀಮಾಂ ಘೋರದಂಷ್ಟ್ರಾಂ ಹಸನ್ಮುಖೀಂ
ಚತುರ್ಭುಜಾಂ ಖಡ್ಗಮುಣ್ಡವರಾಭಯಕರಾಂ ಶಿವಾಮ್ ।
ಮುಣ್ಡಮಾಲಾಧರಾಂ ದೇವೀಂ ಲಲಜ್ಜಿಹ್ವಾಂ ದಿಗಮ್ಬರಾಂ
ಏವಂ ಸಞ್ಚಿನ್ತಯೇತ್ಕಾಲೀಂ ಶ್ಮಶಾನಾಲಯವಾಸಿನೀಮ್ ॥ ೧ ॥
ಯಾ ಕಾಲಿಕಾ ರೋಗಹರಾ ಸುವನ್ದ್ಯಾ-
-ರ್ವಶ್ಯೈಃ ಸಮಸ್ತೈರ್ವ್ಯವಹಾರದಕ್ಷೈಃ ।
ಜನೈರ್ಜನಾನಾಂ ಭಯಹಾರಿಣೀ ಚ
ಸಾ ದೇವಮಾತಾ ಮಯಿ ಸೌಖ್ಯದಾತ್ರೀ ॥ ೨ ॥
ಯಾ ಮಾಯಾ ಪ್ರಕೃತಿಶಕ್ತಿಶ್ಚಣ್ಡಮುಣ್ಡವಿಮರ್ದಿನೀ ।
ಸಾ ಪೂಜ್ಯಾ ಸರ್ವದೇವೈಶ್ಚ ಹ್ಯಸ್ಮಾಕಂ ವರದಾ ಭವ ॥ ೩ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಧ್ಯಾಯಾಮಿ ।
ಆವಾಹನಂ –
ಆಗಚ್ಛ ವರದೇ ದೇವಿ ದೈತ್ಯದರ್ಪನಿಷೂದಿನೀ ।
ಪೂಜಾಂ ಗೃಹಾಣ ಸುಮುಖಿ ನಮಸ್ತೇ ಶಙ್ಕರಪ್ರಿಯೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಆವಾಹಯಾಮಿ ।
ಆಸನಂ –
ಅನೇಕರತ್ನಸಮ್ಯುಕ್ತಂ ನಾನಾಮಣಿಗಣಾನ್ವಿತಮ್ ।
ಕಾರ್ತಸ್ವರಮಯಂ ದಿವ್ಯಮಾನಸಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಸುವರ್ಣಸಿಂಹಾಸನಂ ಸಮರ್ಪಯಾಮಿ ।
ಪಾದ್ಯಂ –
ಗಙ್ಗಾದಿ ಸರ್ವತೀರ್ಥೇಭ್ಯೋ ಮಯಾ ಪ್ರಾರ್ಥನಯಾಽಽಹೃತಮ್ ।
ತೋಯಮೇತತ್ಸುಖಸ್ಪರ್ಶ ಪಾದ್ಯರ್ಥಂ ಪ್ರತಿಗೃಹ್ಯತಾಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಪಾದಯೋಃ ಪಾದ್ಯಂ ಸಮರ್ಪಯಾಮಿ ।
ಅರ್ಘ್ಯಂ –
ಗನ್ಧಪುಷ್ಪಾಕ್ಷತೈರ್ಯುಕ್ತಮರ್ಘ್ಯಂ ಸಮ್ಪಾದಿತಂ ಮಯಾ ।
ಗೃಹಾಣ ತ್ವಂ ಮಹಾದೇವಿ ಪ್ರಸನ್ನಾ ಭವ ಸರ್ವದಾ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಹಸ್ತಯೋಃ ಅರ್ಘ್ಯಂ ಸಮರ್ಪಯಾಮಿ ।
ಆಚಮನೀಯಂ –
ಆಚಮ್ಯತಾಂ ತ್ವಯಾ ದೇವಿ ಭಕ್ತಿರ್ಮೇ ಹ್ಯಚಲಾಂ ಕುರು ।
ಈಪ್ಸಿತಾಂ ಮೇ ವರಂ ದೇಹಿ ಪರತ್ರ ಚ ಪರಾಂ ಗತಿಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಮುಖೇ ಆಚಮನೀಯಂ ಸಮರ್ಪಯಾಮಿ ।
ಪಞ್ಚಾಮೃತ ಸ್ನಾನಂ –
ಪಯೋಧಧಿ ಘೃತಂ ಕ್ಷೌದ್ರಂ ಸಿತಯಾ ಚ ಸಮನ್ವಿತಮ್ ।
ಪಞ್ಚಾಮೃತಮನೇನಾದ್ಯ ಕುರು ಸ್ನಾನಂ ದಯಾನಿಧೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಪಞ್ಚಾಮೃತಸ್ನಾನಂ ಸಮರ್ಪಯಾಮಿ ।
ಸ್ನಾನಂ –
ಜಾಹ್ನವೀತೋಯಮಾನೀತಂ ಶುಭಂ ಕರ್ಪೂರಸಮ್ಯುತಮ್ ।
ಸ್ನಾಪಯಾಮಿ ಸುರಶ್ರೇಷ್ಠೇ ತ್ವಾಂ ಪುತ್ರಾದಿ ಫಲಪ್ರದಾನ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಶುದ್ಧೋದಕಸ್ನಾನಂ ಸಮರ್ಪಯಾಮಿ ।
ಸ್ನಾನಾನನ್ತರಂ ಶುದ್ಧಾಚಮನೀಯಂ ಸಮರ್ಪಯಾಮಿ ।
ವಸ್ತ್ರಂ –
ವಸ್ತ್ರಂ ಚ ಸೋಮದೈವತ್ಯಂ ಲಜ್ಜಾಯಾಸ್ತು ನಿವಾರಣಮ್ ।
ಮಯಾ ನಿವೇದಿತಂ ಭಕ್ತ್ಯಾ ಗೃಹಾಣ ಪರಮೇಶ್ವರೀ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ವಸ್ತ್ರಂ ಸಮರ್ಪಯಾಮಿ ।
ಉಪವಸ್ತ್ರಂ –
ಯಾಮಾಶ್ರಿತ್ಯ ಮಹಾಮಾಯಾ ಜಗತ್ ಸಮ್ಮೋಹಿನೀ ಸದಾ ।
ತಸ್ಯೈ ತೇ ಪರಮೇಶಾನಿ ಕಲ್ಪಯಾಮ್ಯುತ್ತರೀಯಕಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಉಪವಸ್ತ್ರಂ ಸಮರ್ಪಯಾಮಿ ।
ಆಭರಣಂ –
ಸ್ವಭಾವ ಸುನ್ದರಾಙ್ಗಾರ್ಥೇ ನಾನಾಶಕ್ತ್ಯಾಶ್ರಿತೇ ಶಿವೇ ।
ಭೂಷಣಾನಿ ವಿಚಿತ್ರಾಣಿ ಕಲ್ಪಯಾಮ್ಯಮರಾರ್ಚಿತೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಆಭರಣಾನಿ ಸಮರ್ಪಯಾಮಿ ।
ಗನ್ಧಂ –
ಪರಮಾನನ್ದ ಸೌಭಾಗ್ಯ ಪರಿಪೂರ್ಣ ದಿಗನ್ತರೇ ।
ಗೃಹಾಣ ಪರಮಂ ಗನ್ಧಂ ಕೃಪಯಾ ಪರಮೇಶ್ವರಿ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಗನ್ಧಂ ಸಮರ್ಪಯಾಮಿ ।
ಕುಙ್ಕುಮಂ –
ಕುಙ್ಕುಮಂ ಕಾನ್ತಿದಂ ದಿವ್ಯಂ ಕಾಮಿನೀ ಕಾಮಸಮ್ಭವಮ್ ।
ಕುಙ್ಕುಮೇನಾರ್ಚಿತೇ ದೇವಿ ಪ್ರಸೀದ ಪರಮೇಶ್ವರಿ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಕುಙ್ಕುಮಂ ಸಮರ್ಪಯಾಮಿ ।
ಸಿನ್ದೂರಂ –
ಸಿನ್ದೂರಮರುಣಾಭಾಸಂ ಜಪಾಕುಸುಮಸನ್ನಿಭಮ್ ।
ಪೂಜಿತಾಸಿ ಮಹಾದೇವಿ ಪ್ರಸೀದ ಪರಮೇಶ್ವರೀ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಸಿನ್ದೂರಂ ಸಮರ್ಪಯಾಮಿ ।
ಕಜ್ಜಲಂ –
ಚಕ್ಷುಭ್ಯಾಂ ಕಜ್ಜಲಂ ರಮ್ಯಂ ಸುಭಗೇ ಶಕ್ತಿಕಾರಿಕೇ ।
ಕರ್ಪೂರಜ್ಯೋತಿರುತ್ಪನ್ನಂ ಗೃಹಾಣ ಪರಮೇಶ್ವರಿ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಕಜ್ಜಲಂ ಸಮರ್ಪಯಾಮಿ ।
ಹರಿದ್ರಾ –
ಹರಿದ್ರಾರಞ್ಜಿತೇ ದೇವಿ ಸುಖಸೌಭಾಗ್ಯದಾಯಿನಿ ।
ತಸ್ಮಾತ್ತ್ವಂ ಪೂಜಯಾಮ್ಯತ್ರ ಸುಖಶಾನ್ತಿಂ ಪ್ರಯಚ್ಛ ಮೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಹರಿದ್ರಾಚೂರ್ಣಂ ಸಮರ್ಪಯಾಮಿ ।
ಪರಿಮಲ ದ್ರವ್ಯಾಣಿ –
ಚನ್ದನಾಗರು ಕರ್ಪೂರಂ ಕುಙ್ಕುಮಂ ರೋಚನಂ ತಥಾ ।
ಕಸ್ತೂರ್ಯಾದಿ ಸುಗನ್ಧಾಂಶ್ಚ ಸರ್ವಾಙ್ಗೇಷು ವಿಲೇಪಯೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ನಾನಾವಿಧ ಪರಿಮಲ ದ್ರವ್ಯಾಣಿ ಸಮರ್ಪಯಾಮಿ ।
ಸೌಭಾಗ್ಯ ಸೂತ್ರಂ –
ಸೌಭಾಗ್ಯಸೂತ್ರಂ ವರದೇ ಸುವರ್ಣಮಣಿಸಮ್ಯುತೇ ।
ಕಣ್ಠೇ ಗೃಹಾಣ ದೇವೇಶಿ ಸೌಭಾಗ್ಯಂ ದೇಹಿ ಮೇ ಸದಾ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಸೌಭಾಗ್ಯ ಸೂತ್ರಂ ಸಮರ್ಪಯಾಮಿ ।
ಅಕ್ಷತಾನ್ –
ರಞ್ಜಿತಾ ಕುಙ್ಕುಮೌಘೇನ ಅಕ್ಷತಾಶ್ಚಾಪಿ ಶೋಭನಾಃ ।
ಮಮೈಷಾಂ ದೇವಿ ದಾನೇನ ಪ್ರಸನ್ನಾಭವಮೀಶ್ವರೀ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಅಕ್ಷತಾನ್ ಸಮರ್ಪಯಾಮಿ ।
ಪುಷ್ಪಮಾಲಾ –
ಸುರಭಿಂ ಪುಷ್ಪನಿಚಯೈರ್ಗ್ರಥಿತಂ ಶುಭಮಾಲಿಕಾಮ್ ।
ದದಾಮಿ ತವ ಶೋಭಾರ್ಥಂ ಗೃಹಾಣ ಪರಮೇಶ್ವರಿ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಪುಷ್ಪಮಾಲಾನ್ ಸಮರ್ಪಯಾಮಿ ।
ಪುಷ್ಪಾಣಿ –
ಮನ್ದಾರ ಪಾರಿಜಾತಾದಿ ಪಾಟಲೀ ಕೇತಕಾನಿ ಚ ।
ಜಾತೀ ಚಮ್ಪಕ ಪುಷ್ಪಾಣಿ ಗೃಹಾಣ ಪರಮೇಶ್ವರೀ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಪುಷ್ಪಾಣಿ ಸಮರ್ಪಯಾಮಿ ।
ಬಿಲ್ವಪತ್ರಂ –
ಅಮೃತೋದ್ಭವ ಶ್ರೀವೃಕ್ಷೋ ಮಹಾದೇವಿ ಪ್ರಿಯಃ ಸದಾ ।
ಬಿಲ್ವಪತ್ರಂ ಪ್ರಯಚ್ಛಾಮಿ ಪವಿತ್ರಂ ತೇ ಸುರೇಶ್ವರೀ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಬಿಲ್ವಪತ್ರಂ ಸಮರ್ಪಯಾಮಿ ।
ಅಥ ಅಷ್ಟೋತ್ತರಶತನಾಮ ಪೂಜಾ –
ಶ್ರೀ ಕಾಲೀ ಅಷ್ಟೋತ್ತರಶತನಾಮಾವಲೀ ಪಶ್ಯತು ।
ಧೂಪಂ –
ದಶಾಙ್ಗ ಗುಗ್ಗುಲಂ ಧೂಪಂ ಚನ್ದನಾಗರು ಸಮ್ಯುತಮ್ ।
ಸಮರ್ಪಿತಂ ಮಯಾ ಭಕ್ತ್ಯಾ ಮಹಾದೇವಿ ಪ್ರಗೃಹ್ಯತಾಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಧೂಪಮಾಘ್ರಾಪಯಾಮಿ ।
ದೀಪಂ –
ಘೃತವರ್ತಿಸಮಾಯುಕ್ತಂ ಮಹಾತೇಜೋ ಮಹೋಜ್ಜ್ವಲಮ್ ।
ದೀಪಂ ದಾಸ್ಯಾಮಿ ದೇವೇಶಿ ಸುಪ್ರೀತಾ ಭವ ಸರ್ವದಾ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ದೀಪಂ ದರ್ಶಯಾಮಿ ।
ನೈವೇದ್ಯಂ –
ಅನ್ನಂ ಚತುರ್ವಿಧಂ ಸ್ವಾದು ರಸೈಃ ಷಡ್ಭಿಃ ಸಮನ್ವಿತಮ್ ।
ನೈವೇದ್ಯಂ ಗೃಹ್ಯತಾಂ ದೇವಿ ಭಕ್ತಿರ್ಮೇಹ್ಯಚಲಾಂ ಕುರು ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ನೈವೇದ್ಯಂ ಸಮರ್ಪಯಾಮಿ ।
ಋತುಫಲಂ –
ದ್ರಾಕ್ಷಾ ಖರ್ಜೂರ ಕದಲೀ ಪನಸಾಮ್ರಕಪಿತ್ಯಕಮ್ ।
ನಾರಿಕೇಲೇಕ್ಷುಜಮ್ಬ್ವಾದಿ ಫಲಾನಿ ಪ್ರತಿಗೃಹ್ಯತಾಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಋತುಫಲಂ ಸಮರ್ಪಯಾಮಿ ।
ಆಚಮನೀಯಜಲಂ –
ಕಾಮಾರಿವಲ್ಲಭೇ ದೇವಿ ಕುರ್ವಾಚಮನಮಮ್ಬಿಕೇ ।
ನಿರನ್ತರಮಹಂ ವನ್ದೇ ಚರಣೌ ತವ ಚಣ್ಡಿಕೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ನೈವೇದ್ಯಾನನ್ತರಂ ಆಚಮನೀಯಜಲಂ ಸಮರ್ಪಯಾಮಿ ।
ತಾಮ್ಬೂಲಂ –
ಏಲಾಲವಙ್ಗ ಕಸ್ತೂರೀ ಕರ್ಪೂರೈಃ ಸುಷ್ಠುವಾಸಿತಾಮ್ ।
ವೀಟಿಕಾಂ ಮುಖವಾಸಾರ್ಥಮರ್ಪಯಾಮಿ ಸುರೇಶ್ವರಿ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ತಾಮ್ಬೂಲಂ ಸಮರ್ಪಯಾಮಿ ।
ದಕ್ಷಿಣ (ಸ್ವರ್ಣಂ) –
ಪೂಜಾಫಲಸಮೃದ್ಧ್ಯರ್ಥಂ ತವಾಗ್ರೇ ಸ್ವರ್ಣಮೀಶ್ವರಿ ।
ಸ್ಥಾಪಿತಂ ತೇನ ಮೇ ಪ್ರೀತಾ ಪೂರ್ಣಾನ್ ಕುರು ಮನೋರಥಾನ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ದಕ್ಷಿಣಾನ್ ಸಮರ್ಪಯಾಮಿ ।
ನೀರಾಜನಂ –
ನೀರಾಜನಂ ಸುಮಙ್ಗಲ್ಯಂ ಕರ್ಪೂರೇಣ ಸಮನ್ವಿತಮ್ ।
ಚನ್ದ್ರಾರ್ಕವಹ್ನಿ ಸದೃಶಂ ಮಹಾದೇವಿ ನಮೋಽಸ್ತು ತೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ನೀರಾಜನಂ ಸಮರ್ಪಯಾಮಿ ।
ಮನ್ತ್ರಪುಷ್ಪಂ –
ಓಂ ಕಾಲಿಕಾಯೈ ಚ ವಿದ್ಮಹೇ ಶ್ಮಶಾನವಾಸಿನ್ಯೈ ಧೀಮಹಿ ತನ್ನೋಽಘೋರಾ ಪ್ರಚೋದಯಾತ್ ।
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಮನ್ತ್ರಪುಷ್ಪಂ ಸಮರ್ಪಯಾಮಿ ।
ಪ್ರದಕ್ಷಿಣ –
ನಮಸ್ತೇ ದೇವಿ ದೇವೇಶಿ ನಮಸ್ತೇ ಈಪ್ಸಿತಪ್ರದೇ ।
ನಮಸ್ತೇ ಜಗತಾಂ ಧಾತ್ರಿ ನಮಸ್ತೇ ಭಕ್ತವತ್ಸಲೇ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಆತ್ಮಪ್ರದಕ್ಷಿಣ ನಮಸ್ಕಾರಾನ್ ಸಮರ್ಪಯಾಮಿ ।
ಸಾಷ್ಟಾಙ್ಗ ನಮಸ್ಕಾರಂ –
ನಮಃ ಸರ್ವಹಿತಾರ್ಥಾಯೈ ಜಗದಾಧಾರ ಹೇತವೇ ।
ಸಾಷ್ಟಾಙ್ಗೋಽಯಂ ಪ್ರಣಾಮಸ್ತು ಪ್ರಯತ್ನೇನ ಮಯಾ ಕೃತಃ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಸಾಷ್ಟಾಙ್ಗ ನಮಸ್ಕಾರಾನ್ ಸಮರ್ಪಯಾಮಿ ।
ಕ್ಷಮಾ ಪ್ರಾರ್ಥನಾ –
ಅಪರಾಧ ಸಹಸ್ರಾಣಿ ಕ್ರಿಯನ್ತೇಽಹರ್ನಿಶಂ ಮಯಾ ।
ದಾಸೋಽಯಮಿತಿ ಮಾಂ ಮತ್ವಾ ಕ್ಷಮಸ್ವ ಪರಮೇಶ್ವರಿ ॥
ಆವಾಹನಂ ನ ಜಾನಾಮಿ ನ ಜಾನಾಮಿ ವಿಸರ್ಜನಮ್ ।
ಪೂಜಾವಿಧಿಂ ನ ಜಾನಾಮಿ ಕ್ಷಮಸ್ವ ಪರಮೇಶ್ವರಿ ॥
ಮನ್ತ್ರಹೀನಂ ಕ್ರಿಯಾಹೀನಂ ಭಕ್ತಿಹೀನಂ ಪರಾತ್ಪರೇ ।
ಯತ್ಪೂಜಿತಂ ಮಯಾ ದೇವಿ ಪರಿಪೂರ್ಣಂ ತದಸ್ತು ತೇ ॥
ಅನಯಾ ಮಯಾ ಕೃತೇನ ಧ್ಯಾನ ಆವಾಹನಾದಿ ಷೋಡಶೋಪಚಾರ ಪೂಜನೇನ ಭಗವತೀ ಸರ್ವಾತ್ಮಿಕಾ ಶ್ರೀ ಕಾಲಿಕಾ ಪರಮೇಶ್ವರೀ ಸುಪ್ರೀತಾ ಸುಪ್ರಸನ್ನಾ ವರದಾ ಭವನ್ತು ॥
ತೀರ್ಥಪ್ರಸಾದ ಗ್ರಹಣಂ –
ಅಕಾಲಮೃತ್ಯಹರಣಂ ಸರ್ವವ್ಯಾಧಿನಿವಾರಣಮ್ ।
ಸಮಸ್ತಪಾಪಕ್ಷಯಕರಂ ಮಾತೃಪಾದೋದಕಂ ಶುಭಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಪ್ರಸಾದಂ ಶಿರಸಾ ಗೃಹ್ಣಾಮಿ ।
ವಿಸರ್ಜನಂ –
ಇದಂ ಪೂಜಾ ಮಯಾ ದೇವಿ ಯಥಾಶಕ್ತ್ಯುಪಪಾದಿತಾಮ್ ।
ರಕ್ಷಾರ್ಥಂ ತ್ವಂ ಸಮದಾಯ ವ್ರಜಸ್ಥಾನಮನುತ್ತಮಮ್ ॥
ಓಂ ಶ್ರೀಕಾಲಿಕಾ ದೇವ್ಯೈ ನಮಃ ಯಥಾಸ್ಥಾನಮುದ್ವಾಸಯಾಮಿ ।
ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ।
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
