Sri Krishna Stavaraja 1 (Narada Krutam) – ಶ್ರೀ ಕೃಷ್ಣ ಸ್ತವರಾಜಃ (ನಾರದ ಕೃತಂ)

ಸ್ತೋತ್ರನಿಧಿ → ಶ್ರೀ ಕೃಷ್ಣ ಸ್ತೋತ್ರಗಳು → ಶ್ರೀ ಕೃಷ್ಣ ಸ್ತವರಾಜಃ (ನಾರದ ಕೃತಂ)

ಪ್ರಸೀದ ಭಗವನ್ ಮಹ್ಯಮಜ್ಞಾನಾತ್ಕುಂಠಿತಾತ್ಮನೇ |
ತವಾಂಘ್ರಿಪಂಕಜರಜೋರಾಗಿಣೀಂ ಭಕ್ತಿಮುತ್ತಮಾಮ್ || ೧ ||

ಅಜ ಪ್ರಸೀದ ಭಗವನ್ನಮಿತದ್ಯುತಿಪಂಜರ |
ಅಪ್ರಮೇಯ ಪ್ರಸೀದಾಸ್ಮದ್ದುಃಖಹನ್ ಪುರುಷೋತ್ತಮ || ೨ ||

ಸ್ವಸಂವೇದ್ಯ ಪ್ರಸೀದಾಸ್ಮದಾನಂದಾತ್ಮನ್ನನಾಮಯ |
ಅಚಿಂತ್ಯಸಾರ ವಿಶ್ವಾತ್ಮನ್ ಪ್ರಸೀದ ಪರಮೇಶ್ವರ || ೩ ||

ಪ್ರಸೀದ ತುಂಗ ತುಂಗಾನಾಂ ಪ್ರಸೀದ ಶಿವ ಶೋಭನ |
ಪ್ರಸೀದ ಗುಣಗಂಭೀರ ಗಂಭೀರಾಣಾಂ ಮಹಾದ್ಯುತೇ || ೪ ||

ಪ್ರಸೀದ ವ್ಯಕ್ತ ವಿಸ್ತೀರ್ಣ ವಿಸ್ತೀರ್ಣಾನಾಮಗೋಚರ |
ಪ್ರಸೀದಾರ್ದ್ರಾರ್ದ್ರಜಾತೀನಾಂ ಪ್ರಸೀದಾಂತಾಂತದಾಯಿನಾಮ್ || ೫ ||

ಗುರೋರ್ಗರೀಯಃ ಸರ್ವೇಶ ಪ್ರಸೀದಾನಂತ ದೇಹಿನಾಮ್ |
ಜಯ ಮಾಧವ ಮಾಯಾತ್ಮನ್ ಜಯ ಶಾಶ್ವತ ಶಂಖಭೃತ್ || ೬ ||

ಜಯ ಶಂಖಧರ ಶ್ರೀಮನ್ ಜಯ ನಂದಕನಂದನ |
ಜಯ ಚಕ್ರಗದಾಪಾಣೇ ಜಯ ದೇವ ಜನಾರ್ದನ || ೭ ||

ಜಯ ರತ್ನವರಾಬದ್ಧಕಿರೀಟಾಕ್ರಾಂತಮಸ್ತಕ |
ಜಯ ಪಕ್ಷಿಪತಿಚ್ಛಾಯಾನಿರುದ್ಧಾರ್ಕಕರಾರುಣ || ೮ ||

ನಮಸ್ತೇ ನರಕಾರಾತೇ ನಮಸ್ತೇ ಮಧುಸೂದನ |
ನಮಸ್ತೇ ಲಲಿತಾಪಾಂಗ ನಮಸ್ತೇ ನರಕಾಂತಕ || ೯ ||

ನಮಃ ಪಾಪಹರೇಶಾನ ನಮಃ ಸರ್ವಭಯಾಪಹ |
ನಮಃ ಸಂಭೂತಸರ್ವಾತ್ಮನ್ ನಮಃ ಸಂಭೃತಕೌಸ್ತುಭ || ೧೦ ||

ನಮಸ್ತೇ ನಯನಾತೀತ ನಮಸ್ತೇ ಭಯಹಾರಕ |
ನಮೋ ವಿಭಿನ್ನವೇಷಾಯ ನಮಃ ಶ್ರುತಿಪಥಾತಿಗ || ೧೧ ||

ನಮಸ್ತ್ರಿಮೂರ್ತಿಭೇದೇನ ಸರ್ಗಸ್ಥಿತ್ಯಂತಹೇತವೇ |
ವಿಷ್ಣವೇ ತ್ರಿದಶಾರಾತಿಜಿಷ್ಣವೇ ಪರಮಾತ್ಮನೇ || ೧೨ ||

ಚಕ್ರಭಿನ್ನಾರಿಚಕ್ರಾಯ ಚಕ್ರಿಣೇ ಚಕ್ರವಲ್ಲಭ |
ವಿಶ್ವಾಯ ವಿಶ್ವವಂದ್ಯಾಯ ವಿಶ್ವಭೂತಾನುವರ್ತಿನೇ || ೧೩ ||

ನಮೋಽಸ್ತು ಯೋಗಿಧ್ಯೇಯಾತ್ಮನ್ ನಮೋಽಸ್ತ್ವಧ್ಯಾತ್ಮರೂಪಿಣೇ |
ಭಕ್ತಿಪ್ರದಾಯ ಭಕ್ತಾನಾಂ ನಮಸ್ತೇ ಭಕ್ತಿದಾಯಿನೇ || ೧೪ ||

ಪೂಜನಂ ಹವನಂ ಚೇಜ್ಯಾ ಧ್ಯಾನಂ ಪಶ್ಚಾನ್ನಮಸ್ಕ್ರಿಯಾ |
ದೇವೇಶ ಕರ್ಮ ಸರ್ವಂ ಮೇ ಭವೇದಾರಾಧನಂ ತವ || ೧೫ ||

ಇತಿ ಹವನಜಪಾರ್ಚಾಭೇದತೋ ವಿಷ್ಣುಪೂಜಾ-
-ನಿಯತಹೃದಯಕರ್ಮಾ ಯಸ್ತು ಮಂತ್ರೀ ಚಿರಾಯ |
ಸ ಖಲು ಸಕಲಕಾಮಾನ್ ಪ್ರಾಪ್ಯ ಕೃಷ್ಣಾಂತರಾತ್ಮಾ
ಜನನಮೃತಿವಿಮುಕ್ತೋಽಪ್ಯುತ್ತಮಾಂ ಭಕ್ತಿಮೇತಿ || ೧೬ ||

ಗೋಗೋಪಗೋಪಿಕಾವೀತಂ ಗೋಪಾಲಂ ಗೋಷು ಗೋಪ್ರದಮ್ |
ಗೋಪೈರೀಡ್ಯಂ ಗೋಸಹಸ್ರೈರ್ನೌಮಿ ಗೋಕುಲನಾಯಕಮ್ || ೧೭ ||

ಪ್ರೀಣಯೇದನಯಾ ಸ್ತುತ್ಯಾ ಜಗನ್ನಾಥಂ ಜಗನ್ಮಯಮ್ |
ಧರ್ಮಾರ್ಥಕಾಮಮೋಕ್ಷಾಣಾಮಾಪ್ತಯೇ ಪುರುಷೋತ್ತಮಮ್ || ೧೮ ||

ಇತಿ ಶ್ರೀನಾರದಪಾಂಚರಾತ್ರೇ ಜ್ಞಾನಾಮೃತಸಾರೇ ನಾರದ ಕೃತ ಶ್ರೀ ಕೃಷ್ಣ ಸ್ತವರಾಜಃ ||

---

ಇನ್ನಷ್ಟು ಶ್ರೀ ಕೃಷ್ಣ ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.