Read in తెలుగు / ಕನ್ನಡ / தமிழ் / देवनागरी / English (IAST)
ಮಹಾನೀಲಮೇಘಾತಿಭವ್ಯಂ ಸುಹಾಸಂ
ಶಿವಬ್ರಹ್ಮದೇವಾದಿಭಿಃ ಸಂಸ್ತುತಂ ಚ |
ರಮಾಮಂದಿರಂ ದೇವನಂದಾಪದಾಹಂ
ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೧ ||
ರಸಂ ವೇದವೇದಾಂತವೇದ್ಯಂ ದುರಾಪಂ
ಸುಗಮ್ಯಂ ತದೀಯಾದಿಭಿರ್ದಾನವಘ್ನಮ್ |
ಚಲತ್ಕುಂಡಲಂ ಸೋಮವಂಶಪ್ರದೀಪಂ
ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೨ ||
ಯಶೋದಾದಿಸಂಲಾಲಿತಂ ಪೂರ್ಣಕಾಮಂ
ದೃಶೋ ರಂಜನಂ ಪ್ರಾಕೃತಸ್ಥಸ್ವರೂಪಮ್ |
ದಿನಾಂತೇ ಸಮಾಯಾಂತಮೇಕಾಂತಭಕ್ತೈ-
-ರ್ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೩ ||
ಕೃಪಾದೃಷ್ಟಿಸಂಪಾತಸಿಕ್ತಸ್ವಕುಂಜಂ
ತದಂತಃಸ್ಥಿತಸ್ವೀಯಸಮ್ಯಗ್ದಶಾದಮ್ |
ಪುನಸ್ತತ್ರ ತೈಃ ಸತ್ಕೃತೈಕಾಂತಲೀಲಂ
ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೪ ||
ಗೃಹೇ ಗೋಪಿಕಾಭಿರ್ಧೃತೇ ಚೌರ್ಯಕಾಲೇ
ತದಕ್ಷ್ಣೋಶ್ಚ ನಿಕ್ಷಿಪ್ಯ ದುಗ್ಧಂ ಚಲಂತಮ್ |
ತದಾ ತದ್ವಿಯೋಗಾದಿಸಂಪತ್ತಿಕಾರಂ
ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೫ ||
ಚಲತ್ಕೌಸ್ತುಭವ್ಯಾಪ್ತವಕ್ಷಃಪ್ರದೇಶಂ
ಮಹಾವೈಜಯಂತೀಲಸತ್ಪಾದಯುಗ್ಮಮ್ |
ಸುಕಸ್ತೂರಿಕಾದೀಪ್ತಭಾಲಪ್ರದೇಶಂ
ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೬ ||
ಗವಾಂ ದೋಹನೇ ದೃಷ್ಟರಾಧಾಮುಖಾಬ್ಜಂ
ತದಾನೀಂ ಚ ತನ್ಮೇಲನವ್ಯಗ್ರಚಿತ್ತಮ್ |
ಸಮುತ್ಪನ್ನತನ್ಮಾನಸೈಕಾಂತಭಾವಂ
ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಮ್ || ೭ ||
ಅದಃ ಕೃಷ್ಣಚಂದ್ರಾಷ್ಟಕಂ ಪ್ರೇಮಯುಕ್ತಃ
ಪಠೇತ್ಕೃಷ್ಣಸಾನ್ನಿಧ್ಯಮಾಪ್ನೋತಿ ನಿತ್ಯಮ್ |
ಕಲೌ ಯಃ ಸ ಸಂಸಾರದುಃಖಾತಿರಿಕ್ತಂ
ಪ್ರಯಾತ್ಯೇವ ವಿಷ್ಣೋಃ ಪದಂ ನಿರ್ಭಯಂ ತತ್ || ೮ ||
ಇತಿ ಶ್ರೀರಘುನಾಥಪ್ರಭು ವಿರಚಿತಂ ಶ್ರೀ ಕೃಷ್ಣಚಂದ್ರಾಷ್ಟಕಮ್ ||
ಇನ್ನಷ್ಟು ಶ್ರೀ ಕೃಷ್ಣ ಸ್ತೋತ್ರಗಳು ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
