Read in తెలుగు / ಕನ್ನಡ / தமிழ் / देवनागरी / English (IAST)
ಶ್ರೀಆನಂದಭೈರವೀ ಉವಾಚ |
ಮಹಾಕಾಲ ಶಿವಾನಂದ ಪರಮಾನಂದ ನಿರ್ಭರ |
ತ್ರೈಲೋಕ್ಯಸಿದ್ಧಿದ ಪ್ರಾಣವಲ್ಲಭ ಶ್ರೂಯತಾಂ ಸ್ತವಃ || ೧ ||
ಶಾಕಿನೀ ಹೃದಯೇ ಭಾತಿ ಸಾ ದೇವೀ ಜನನೀ ಶಿವಾ |
ಕಾಳೀತಿ ಜಗತಿ ಖ್ಯಾತಾ ಸಾ ದೇವೀ ಹೃದಯಸ್ಥಿತಾ || ೨ ||
ನಿರಂಜನಾ ನಿರಾಕಾರಾ ನೀಲಾಂಜನವಿಕಾಸಿನೀ |
ಆದ್ಯಾ ದೇವೀ ಕಾಳಿಕಾಖ್ಯಾ ಕೇವಲಾ ನಿಷ್ಕಲಾ ಶಿವಾ || ೩ ||
ಅನಂತಾಽನಂತರೂಪಸ್ಥಾ ಶಾಕಿನೀ ಹೃದಯಸ್ಥಿತಾ |
ತಾಮಸೀ ತಾರಿಣೀ ತಾರಾ ಮಹೋಗ್ರಾ ನೀಲವಿಗ್ರಹಾ || ೪ ||
ಕಪಾಲಾ ಮುಂಡಮಾಲಾಢ್ಯಾ ಶವವಾಹನವಾಹನಾ |
ಲಲಜ್ಜಿಹ್ವಾ ಸರೋಜಾಕ್ಷೀ ಚಂದ್ರಕೋಟಿಸಮೋದಯಾ || ೫ ||
ವಾಯ್ವಗ್ನಿಭೂಜಲಾಂತಸ್ಥಾ ಭವಾನೀ ಶೂನ್ಯವಾಸಿನೀ |
ತಸ್ಮಾತ್ ಸ್ತೋತ್ರಮಪ್ರಕಾಶ್ಯಂ ಕೃಷ್ಣಕಾಲ್ಯಾಃ ಕುಲೋದಯಮ್ || ೬ ||
ಶ್ರೀಕೃಷ್ಣಭಗವತ್ಯಾಶ್ಚ ನೀಲದೇವ್ಯಾ ಕುಲಾರ್ಣವಮ್ |
ಗೋಪನೀಯಂ ಪ್ರಯತ್ನೇನ ಸಾವಧಾನೋಽವಧಾರಯ || ೭ ||
ಮಹಾಭೈರವೀ ಉವಾಚ |
ಶ್ರೀಕಾಳೀಚರಣಂ ಚರಾಚರಗುಣಂ ಸೌದಾಮಿನೀಸ್ತಂಭನಂ
ಗುಂಜದ್ಗರ್ವಗುರುಪ್ರಭಾನಖಮುಖಾಹ್ಲಾದೈಕಕೃಷ್ಣಾಸನಮ್ |
ಪ್ರೇತಾರಣ್ಯಾಸನನಿರ್ಮಿತಾಮಲಕಜಾ ನಂದೋಪರಿಶ್ವಾಸನಂ
ಶ್ರೀಮನ್ನಾಥಕರಾರವಿಂದಮಿಲನಂ ನೇತ್ರಾಂಜನಂ ರಾಜತೇ || ೮ ||
ದೀಪ್ತಿಃ ಪ್ರಾಪ್ತಿಃ ಸಮಾಪ್ತಿಃ ಪ್ರಿಯಮತಿಸುಗತಿಃ ಸಂಗತಿಃ ಶೀತನೀತೌ
ಮಿಥ್ಯಾಮಿಥ್ಯಾಸುರಥ್ಯಾ ನತಿರರತಿಸತೀ ಜಾತಿವೃತ್ತಿರ್ಗುಣೋಕ್ತಿಃ |
ವ್ಯಾಪಾರಾರ್ಥೀ ಕ್ಷುಧಾರ್ಥೀ ವಸತಿ ರತಿಪತಿರ್ಜ್ಯೋತಿರಾಕಾಶಗಂಗಾ
ಶ್ರೀದುರ್ಗಾಶಂಭುಕಾಳೀಚರಣಕಮಲಕಂ ಸರ್ವದಾ ಭಾತಿ ಸೂಕ್ಷ್ಮಮ್ || ೯ ||
ದೇವೇಂದ್ರಾಃ ಪಂಚಭೂತಾ ರವಿಶಶಿಮುಕುಟಾಃ ಕ್ರೋಧವೇತಾಲಕೋಲಾಃ
ಕೈಲಾಸಸ್ಥಾಃ ಪ್ರಶಸ್ತಾಃ ಸ್ತವನಮಪಿ ತತ್ಪ್ರತ್ಯಹಂ ಸಂಪಠಂತಿ |
ಆತ್ಮಾನಂ ಶ್ರೀದಕಾಳೀಕುಲಚರಣತಲಂ ಹೃತ್ಕುಲಾನಂದಪದ್ಮೇ
ಧ್ಯಾತ್ವಾ ಧ್ಯಾತ್ವಾ ಪ್ರವೀರಾ ಅಹಮನುಬಹುಧೀಃ ಸ್ತೌಮಿ ಕಿಂ ಧ್ಯಾನನಿಷ್ಠಃ || ೧೦ ||
ಶ್ರುತ್ವಾ ಸ್ತೋತ್ರಗುಣಂ ತವೈವ ಚರಣಾಂಭೋಜಸ್ಯ ವಾಂಛಾಫಲಂ
ಪ್ರೇಚ್ಛಾಮೀಹಯತಿ ಪ್ರಿಯಾಯ ಕುರುತೇ ಮೋಕ್ಷಾಯ ತತ್ತ್ವಾರ್ಥತಃ |
ಮಾತರ್ಮೋಹಿನಿದಾನಮಾನತರುಣೀ ಕಾತೀತಿ ಮನ್ಯಾಮಹೇ
ಯೋಗ್ಯಶ್ರೀಚರಣಾಂಬುಜೇ ತ್ರಿಜಗತಾಮಾನಂದಪುಂಜೇ ಸುಖಮ್ || ೧೧ ||
ಪುತ್ರೌ ಶ್ರೀದೇವಪೂಜ್ಯೌ ಪ್ರಕುರುತ ಇತಿಹಾಸಾದಿಗೂಢಾರ್ಥಗುಪ್ತಿಂ
ಶ್ಯಾಮೇ ಮಾತಃ ಪ್ರಸನ್ನಾ ಭವ ವರದಕರೀ ಕಾರಣಂ ದೇಹಿ ನಿತ್ಯಮ್ |
ಯೋಗಾನಂದಂ ಶಿವಾಂತಃ ಸುರತರುಫಲದಂ ಸರ್ವವೇದಾಂತಭಾಷ್ಯಂ
ಸತ್ಸಂಗಂ ಸದ್ವಿವೇಕಂ ಕುರು ಕುರು ಕವಿತಾಪಂಚಭೂತಪ್ರಕಾಶಮ್ || ೧೨ ||
ಆಹ್ಲಾದೋದ್ರೇಕಕಾರೀ ಪರಮಪದವಿದಾಂ ಪ್ರೋಲ್ಬಣಾರ್ಥಪ್ರಕಾಶಃ
ಪ್ರೇಷ್ಯಃ ಪಾರಾರ್ಥಚಿಂತಾಮಣಿಗುಣಸರಳಃ ಪಾರಣಃ ಪ್ರೇಮಗಾನಃ |
ಸಾರಾತ್ಮಾ ಶ್ರೀಸ್ತವೋಽಯಂ ಜಯಸುರವಸತಾಂ ಶುಕ್ರಸಂಸ್ಕಾರಗಂತಾ
ಮಂತಾ ಮೋಹಾದಿಕಾನಾಂ ಸುರಗಣತರುಣೀ ಕೋಟಿಭಿರ್ಧ್ಯೇಯ ಇಂದ್ರೈಃ || ೧೩ ||
ನಾಮಗ್ರಹಣವಿಮಲಪಾವನಪುಣ್ಯಜಲನಿಧಿಮಂಥನೇನ
ನಿರ್ಮಲಚಿತ್ತಗಸುರಗುಣಪಾರಗ ಸುಖಸುಧಾಕರಸ್ಥಿತ-
-ಹಾಸ್ಯೇನ ಯೋಗಧರಾಧರನರವರ ಕುಂಜರಭುಜಯುಗದೀರ್ಘಪದ್ಮಮೃಣಾಲೇನ || ೧೪ ||
ಹರಿವಿಧಿಹರ ಅಪರಪರಸರಭಾವಕಪಾಲ
ಸೇವನೇನ ಸುಂದರೀ ಕಾಳೀ ಚರಣೇನ || ೧೫ ||
ಭಾಸ್ವತ್ಕೋಟಿಪ್ರಚಂಡಾನಲಗುಣಲಲಿತಾಭಾವಿತಾ ಸಿದ್ಧಕಾಳೀ
ಪ್ರೋಕ್ತಂ ಯದ್ಯೋಗಗೀತಾವಚನಸುರಚನಾಮಂಗಳಂ ಯೋಗಿನಾದ್ಯಾ |
ಶ್ಯಾಮಾನಂದದ್ರುಮಾಖ್ಯೇ ಭಜನಯಜನಗಂಗಾಂಗತೀರಪ್ರಕಾಶಂ
ಸರ್ವಾನಂದೋತ್ಸವತ್ವಂ ವರದಸುರವದಾಸಂಭವೇ ಮಯ್ಯಭಾವೇ || ೧೬ ||
ಏತತ್ಪ್ರಥಮೇ ಕುಲಂ ಗುರುಕುಲಂ ಲಾವಣ್ಯಲೀಲಾಕುಲಂ
ಪ್ರಾಣಾನಂದಕುಲಂ ಕುಲಾಕುಲಕುಲಂ ಕಾಳೀಕುಲಂ ಸಂಕುಲಮ್ |
ಮಾತಃ ಕಾಳಿಯುಗಾದಿ ಕೌಳಿನಿ ಶಿವೇ ಸರ್ವಂತರಾಂಗಸ್ಥಿತಂ
ನಿತ್ಯಂ ತತ್ರ ನಿಯೋಜಯ ಶ್ರುತಿಗಿರಾ ಶ್ರೀಧರ್ಮಪುತ್ರಂ ಭವೇ || ೧೭ ||
ಹೇರಂಬಾದಿಕುಲೇಶಯೋಗಜನನಿ ತ್ವಂ ಯೋಗತತ್ತ್ವಪ್ರಿಯಾ
ಯದ್ಯೇವಂ ಕುರುತೇ ಪದಾಂಬುಜರಜೋ ಯೋಗಂ ತವಾನಂದದಮ್ |
ಸಃ ಸ್ಯಾತ್ಸಂಕಟಪಾಟಲಾರಿಸದನಂ ಜಿತ್ವಾ ಸ್ವಯಂ ಮನ್ಮಥಂ
ಶ್ರೀಮಾನ್ಮನ್ಮಥಮನ್ಮಥಃ ಪ್ರಚಯತಿ ಹ್ಯಷ್ಟಾಂಗಯೋಗಂ ಪರಮ್ || ೧೮ ||
ಯೋಗೀ ಯಾತಿ ಪರಂ ಪದಂ ಸುಖಪದಂ ವಾಂಛಾಸ್ಪದಂ ಸಂಪದಂ
ತ್ರೈಲೋಕ್ಯಂ ಪರಮೇಶ್ವರಂ ಯದಿ ಪುನಃ ಪಾರಂ ಭವಾಂಭೋನಿಧೇಃ |
ಭಾವಂ ಭೂಧರರಾಜರಾಜದುಹಿತೇ ಜ್ಞಾತಂ ವಿಚಾರಂ ತವ
ಶ್ರೀಪಾದಾಂಬುಜಪೂಜನಂ ಪ್ರಕುರುತೇ ತೇ ನೀರದಪ್ರೋಜ್ಜ್ವಲೇ || ೧೯ ||
ಆದಾವಷ್ಟಾಂಗಯೋಗಂ ವದತಿ ಭವಸುಖಂ ಭಕ್ತಿಸಿದ್ಧಾಂತಮೇಕಂ
ಭೂಲೋಕೇ ಪಾವನಾಖ್ಯಂ ಪವನಗಮನಗಂ ಶ್ರೀನಗೇಂದ್ರಾಂಗಜಾಯಾಃ |
ಸಿದ್ಧೀನಾಮಷ್ಟಸಿದ್ಧಿಂ ಯಮನಿಯಮವಶಾದಾಸನಪ್ರಾಣಯೋಗಾತ್
ಪ್ರತ್ಯಾಹಾರಂ ವಿಭೋರ್ಧ್ವಾರುಣಗುಣವಸನಂ ಧ್ಯಾನಮೇವಂ ಸಮಾಧಿಮ್ || ೨೦ ||
ಮಾತಃ ಶಾಂತಿಗುಣಾವಲಂಬಿನಿ ಶಿವೇ ಶಾಂತಿಪ್ರದೇ ಯೋಗಿನಾಂ
ದಾರೇ ದೇವಗುಣೇ ವಿಧೇಹಿ ಸಕಲಂ ಶಾಂತಿಕ್ರಿಯಾಮಂಗಳಮ್ |
ಯಜ್ಞಾನಾಮುದಯಂ ಪ್ರಯಾತಿ ಸಹಸಾ ಯಸ್ಯಾಃ ಪ್ರಸಾದಾದ್ಭುವಂ
ತಾಂ ಸರ್ವಾಂ ಪ್ರವದಾಮಿ ಕಾಮದಹನಸ್ತಂಭಾಯ ಮೋಹಕ್ಷಯಾತ್ || ೨೧ ||
ಏಕೋ ಜೀವತಿ ಯೋಗಿರಾಡತಿಸುಖೀ ಜೀವಂತಿ ನ ಶ್ರೀಸುತಾಃ
ಸರ್ವಂ ಯೋಗಭವಂ ಭವೇ ವಿಭವಗಾಃ ಪಶ್ಯನ್ ಸ್ವಕೀಯಾಯುಷಮ್ |
ಇತ್ಯೇವಂ ಪರಿಭಾವ್ಯ ಸರ್ವವಿಷಯಂ ಶಾಂತಿಂ ಸಮಾಲಂಬ್ಯಕೌ
ಮೂಲೇ ವೇದದಲೋಜ್ಜ್ವಲೇ ಕುಲಪಥೇ ಶ್ರೀಕುಂಡಲೀಂ ಭಾವಯ || ೨೨ ||
ಶಾಂತಿಭ್ರಾಂತಿನಿಕೃಂತನೀ ಸ್ವರಮಣೀ ಪ್ರೇಮೋದ್ಗತಾ ಭಕ್ತಿದಾ
ಲಾವಣ್ಯಾಂಬುಧಿರತ್ನಕೋಟಿಕಿರಣಾಹ್ಲಾದೈಕಮೂರ್ತಿಪ್ರಭಾ |
ಏಕಾಕಾರಪರಾಕ್ರಮಾದಪಯ ಮಾ ಕ್ರೋಧಕ್ರಮಕ್ಷೋಭಿಣೀ
ಯಾ ಮೂಲಾಮಲಪಂಕಜೇ ರಚಯತಿ ಶ್ರೀಮಾಧುರೀ ತಾಂ ಭಜೇ || ೨೩ ||
ರೇ ರೇ ಪಾಮರ ದುರ್ಭಗ ಪ್ರತಿದಿನಂ ಕಿಂ ಕರ್ಮ ವಾ ರಾಧಸೇ
ವ್ಯಾಪಾರಂ ವಿಷಯಾಶ್ರಯಂ ಪ್ರಕುರುಷೇ ನ ಧ್ಯಾಯಸೇ ಶ್ರೀಪದಮ್ |
ಮಿಥ್ಯೈತತ್ಕ್ಷಣಭಂಗುರಂ ತ್ಯಜ ಮುದಾ ಸಂಸಾರಭಾವಂ ವಿಷಂ
ಶ್ರೀಕಾಳೀಂ ಕುಲಪಂಡಿತಾಂ ಗುಣವತೀಂ ಶಾಂತಿಂ ಸಮಾರಾಧಯ || ೨೪ ||
ಶಿವಸ್ತ್ರೀ ಯಾ ಶಾಂತಿಃ ಪರಮಸುಖದಾ ಭಾವಜನಿಕಾ
ವಿವೇಕಃ ಸಂಜಾತೋ ವಹಸಿ ಚ ತಯಾ ಭಾತಿ ನಿಯತಮ್ |
ವಿವೇಕೋಽಸೌ ತ್ಯಾಗೀ ಜನಯತಿ ಸುಧಾಸಿಂಧುಸುಂದರ-
-ಮದೋ ಬ್ರಹ್ಮಜ್ಞಾನಂ ಪರಮಮಮಲೇ ಯೋಗಿನಿ ಪರೇ || ೨೫ ||
ದ್ವಯಂ ಬ್ರಹ್ಮಜ್ಞಾನಂ ಪರಮಮಮಲೇ ಚಾಗಮಮಯಂ
ವಿವೇಕೋದ್ಭೂತಂ ಸ್ಯಾದಮಲಪರಮಂ ಶಬ್ದಮಪರಮ್ |
ದ್ವಯೋರ್ಮೂಲೀಭೂತಾ ಹೃದಿ ಸಪದಿ ಶಾಂತಿಃ ಪ್ರಿಯತಮಾ
ಪ್ರಭಾ ಕಾಳೀಪಾದಾಂಬುಜಯುಗಳಭಕ್ತಿಪ್ರಳಯದಾ || ೨೬ ||
ಕುಲಶ್ರೀಕುಂಡಲ್ಯಾಃ ಪರಮರಸಭಾವಂ ನವಮಯಂ
ಪದಂ ಮಾತುಃ ಕಾಳ್ಯಾಃ ಪ್ರಥಮರವಿಕಾಂತ್ಯಾಃ ಸುಖಮಯಮ್ |
ವದಾಮಿ ಪ್ರೋತ್ಸಾಹೇ ವಶಷಸಶುಭೇ ಹಾಟಕನಿಭೇ
ವಿಧಿಃ ಶ್ರೀಡಾಕಿನ್ಯಾಽಮರಪತಿಧರಿತ್ರೀತಿ ಚ ಭಜೇತ್ || ೨೭ ||
ತ್ರಯಂ ಸ್ಥಾನಂ ನಿತ್ಯಂ ರವಿಶಶಿಕಳಾವಹ್ನಿಘಟಿತಂ
ಮಹಾತೀರ್ಥಂ ಸಮ್ಯಕ್ ಪವನಗಗನಸ್ಥಂ ಭವಕರಮ್ |
ವಿಭಿನ್ನಂ ಸಂಕೃತ್ಯ ದ್ವಯಮಪಿ ಕುಲಗ್ರಂಥಿಸಹಿತಂ
ಸುಷುಮ್ನಾಶ್ರೀತೀರ್ಥೇ ಮಹತಿ ಗಗನೇ ಪೂರ್ಣಲಯವಾನ್ || ೨೮ ||
ತ್ರಯಂ ಸಂಶೋಧ್ಯಾದೌ ಪರಮಪದವೀಂ ಗಚ್ಛತಿ ಮಹಾನ್
ಸುದೃಷ್ಟಾಂಗೈರ್ಯೋಗೈಃ ಪರಿಭವತಿ ಶುದ್ಧಂ ಮಮ ತನುಮ್ |
ಅತೋ ಯೋಗಾಷ್ಟಾಂಗಂ ಕಲುಷಸುಖಮುಕ್ತಂ ವಿತನುತೇ
ಕ್ರಿಯಾದೌ ಸಂಕುರ್ಯಾದ್ಯಮನಿಯಮಕಾರ್ಯಂ ಯತಿವರಃ || ೨೯ ||
ಅಹಿಂಸಾಸತ್ಯಾರ್ಥೀ ಪ್ರಚಯತಿ ಸುಯೋಗಂ ತವ ಪದಂ
ಧನಸ್ತೇ ಯದ್ಯೋಗೀ ಶುಚಿಧೃತಿದಯಾದಾನನಿಪುಣಃ |
ಕ್ಷಮಾಲಧ್ವಾಹಾರೀ ಸಮಗುಣಪರಾನಂದನಿಪುಣಃ
ಸ್ವಯಂ ಸಿದ್ಧಃ ಸದ್ಬ್ರಾಹ್ಮಣಕುಲಪತಾಕೀ ಸುಖಮಯೀ || ೩೦ ||
ತಪಃ ಸಂತೋಷಾಢ್ಯೋ ಹರಯಜನ ಆಸ್ತಿಕ್ಯಮತಿಮಾನ್
ಯತೀನಾಂ ಸಿದ್ಧಾಂತಶ್ರವಣಹೃದಯಪ್ರಾಣವಿಲಯಃ |
ಜಯಾನಂದಾಮಗ್ನೋ ಹವನಮನಲೇಪಃ ಪ್ರಕುರುತೇ
ಮಹಾಭಕ್ತಃ ಶ್ರೀಹ್ರೀರ್ಮತಿರತಿಕುಲೀನಸ್ತವ ಪದಃ || ೩೧ ||
ಸುಷುಮ್ನಾಮುಖಾಂಭೋರುಹಾಗ್ರೇ ಚ ಪದ್ಮಂ
ದಳಂ ಚೇದಹೇಮಾಕ್ಷರಂ ಮೂಲದೇಶೇ |
ಸ್ಥಿರಾಪೃಷ್ಠವಂಶಸ್ಯ ಮಧ್ಯೇ ಸುಷುಮ್ನಾ-
-ಽಂತರೇ ವಜ್ರಿಣೀ ಚಿತ್ರಿಣೀಭಾಸಿಪದ್ಮೈಃ || ೩೨ ||
ಸುಷುಮ್ನಾದಿನಾಡ್ಯಾ ಯುಗಾತ್ ಕರ್ಣಮೂಲಾ-
-ತ್ಪ್ರಕಾಶಪ್ರಕಾಶಾ ಬಹಿರ್ಯುಗ್ಮನಾಡೀ |
ಇಡಾ ಪಿಂಗಳಾ ವಾಮಭಾಗೇ ಚ ದಕ್ಷೇ
ಸುಧಾಂಶೂರವೀ ರಾಜಸೇ ತತ್ರ ನಿತ್ಯಮ್ || ೩೩ ||
ವಿಸರ್ಗಂ ಬಿಂದ್ವಂತಂ ಸ್ವಗುಣನಿಲಯಂ ತ್ವಂ ಜನಯಸಿ
ತ್ವಮೇಕಾ ಕಲ್ಯಾಣೀ ಗಿರಿಶಜನನೀ ಕಾಳಿಕಲಯಾ |
ಪರಾನಂದಂ ಕೃತ್ವಾ ಯದಿ ಪರಿಜಪಂತಿ ಪ್ರಿಯತಮಾಃ
ಪರಿಕ್ಷಾಲ್ಯ ಜ್ಞಾನೈರಿಹ ಪರಿಜಯಂತಿ ಪ್ರಿಯಪದಮ್ || ೩೪ ||
ಅಷ್ಟಾದಶಾಂಗುಲಗತಂ ಋಜುದಂತಕಾಷ್ಠಂ
ಸ್ವೀಯಾಂಗುಲಾರ್ಧಘಟಿತಂ ಪ್ರಶರಂ ಶನೈರ್ಯಃ |
ಸಂಯೋಜ್ಯ ತಾಲುರಸನಾಗಲರಂಧ್ರಮಧ್ಯೇ
ದಂತೀಕ್ರಿಯಾಮುಪಚರೇತ್ ತವ ಭಾವನಾಯ || ೩೫ ||
ನಾಡೀಕ್ಷಾಲನಮಾಕರೋತಿ ಯತಿರಾಡ್ದಂಡೇ ತ್ರಯಂ ಧಾರಯನ್
ಯುಷ್ಮಚ್ಛ್ರೀಚರಣಾರ್ಪಣೋ ನವಮದಂಡಸ್ಯಾನಿಲಸ್ತಂಭನಾತ್ |
ಪ್ರಾಣಾಯಾಮಫಲಂ ಯತಿಃ ಪ್ರತಿದಿನಂ ಸಂವರ್ಧತೇ ಸುಶ್ರಮಾ-
-ದಾನಂದಾಂಬುಧಿಮಜ್ಜನಂ ಕುಲರಸೈರ್ಮುಕ್ತೋ ಭವೇತ್ ತತ್ಕ್ಷಣಾತ್ || ೩೬ ||
ವದಾಮಿ ಪರಮಶ್ರಿಯೇ ಪದಪದ್ಮಯೋಗಂ ಶುಭಂ
ಹಿತಾಯ ಜಗತಾಂ ಮಮ ಪ್ರಿಯಗಣಸ್ಯ ಭಾಗಶ್ರಿಯೇ |
ಸದಾ ಹಿ ಕುರುತೇ ನರಃ ಸಕಲಯೋಗಸಿದ್ಧಿಂ ಮುದಾ
ತದೈವ ತವ ಸೇವಕೋ ಜನನಿ ಮಾತರೇಕಾಕ್ಷರಮ್ || ೩೭ ||
ಕರುಣಾಸಾಗರೇ ಮಗ್ನಃ ಸದಾ ನಿರ್ಮಲತೇಜಸಾ |
ತವಾಂಘ್ರಿಕೋಮಲಾಂಭೋಜಂ ಧ್ಯಾತ್ವಾ ಯೋಗೀಶ್ವರೋ ಭವೇತ್ || ೩೮ ||
ಕರುಣಾಸಾಗರೇ ಮಗ್ನೋ ಯೇನ ಯೋಗೇನ ನಿರ್ಮಲಃ |
ತದ್ಯೋಗಂ ತವ ಪಾದಾಬ್ಜಂ ಕೋ ಮೂರ್ಖಃ ಕಃ ಸುಪಂಡಿತಃ || ೩೯ ||
ಯಮನಿಯಮಸುಕಾಲೇ ನೇಉಲೀಯೋಗಶಿಕ್ಷಾ
ಪ್ರಭವತಿ ಕಫನಾಶಾ ನಾಶರಂಧ್ರೇ ತ್ರಿಸೂತ್ರೀ |
ಹೃದಯಕಫವಿನಾಶಾ ಧೋತಿಕಾ ಯೋಗಶಿಕ್ಷಾ
ಗಲವಿಲಗಲವಸ್ತ್ರಂ ಷಷ್ಟಿಹಸ್ತಂ ವಹಂತೀ || ೪೦ ||
ಸುಸೂಕ್ಷ್ಮರಸನಸ್ಯ ಚ ಸ್ವಭುಜಷಷ್ಟಿಹಸ್ತಂ ಗಲ-
-ಪ್ರಮಾಣಮಿತಿ ಸಂತತಪ್ರಸರಪಂಚಯುಗ್ಮಾಂಗುಲಮ್ |
ಪವಿತ್ರಶುಚಿಧೋತಿಕಾರಂ ಭವಸಿ ಸರ್ವಪೀಡಾಪಹಾ
ಸ್ವಕಂಠಕಮಲೋದಯಾಮಮಲಭೀತದಾಮಾ ಭಜೇ || ೪೧ ||
ಭಜತಿ ಯದಿ ಕುಮಾರೀಂ ನೇಉಲೀ ಯೋಗದೃಷ್ಟ್ಯಾ
ಸ ಭವತಿ ಪರವೇತ್ತಾ ಮೋಹಜಾಲಂ ಛಿನತ್ತಿ |
ಸ್ಮಿತಮುಖಿ ಭವತಿ ತ್ವಾಂ ಮೂಢ ಏವಾತಿಜೀವೋ
ಭ್ರಮಿತಮುದವಧೂರ್ನಾ ಕಾರಸಿದ್ಧಿಂ ದದಾಸಿ || ೪೨ ||
ಶನೈರ್ದಂತೀ ಯೋಗಂ ಸ್ವಪದಯುಗಪದ್ಮೇ ವಿತನುತೇ
ಶಿವೇ ಯೋಗೀ ಮಾಸಾದಪಿ ಭವತಿ ವಾಯುಂ ಸ್ಥಗಯತಿ |
ಅಸೌ ಮಂತ್ರೀ ಚಾಮ್ರಾತಕದಲಂ ಸುದಂಡಂ ಗಲವಿಲೇ
ನಿಯೋಜ್ಯಾದೌ ಧ್ಯಾತ್ವಾ ತವ ಚರಣಪಂಕೇರುಹತಲಮ್ || ೪೩ ||
ಕುಲಾಕುಲಚೇತತಾ ಪರಿಕರೋಷಿ ವಿಲ್ವಚ್ಛದೀ
ಸುಶಾಂತಿಗುಣದಾ ಜಯಾ ಪರಮಭಕ್ತಿನಿರ್ಗುಂಡಿಕಾ |
ಮುಕುಂದತುಲಸೀ ಪ್ರಿಯಾ ಗುಣಿನಿ ಮುಕ್ತಿದಾ ಯೋಗಿನೀ
ದದಾಸ್ಯಮರಸಂಪದಂ ದಲವಿಯೋಗಮೂರ್ಧ್ವೋದರೀಮ್ || ೪೪ ||
ಪಂಚಾಮರಾಸಾಧನಯೋಗಕರ್ತ್ರೀ
ಪಂಚಾಮರಾನಾಮ ಮಹೌಷಧಿಃ ಸ್ಥಿತಾ |
ತ್ವಮೇವ ಸರ್ವೇಶ್ವರರೂಪಧಾರಿಣೀ
ಯೈಃ ಪೂಜ್ಯತೇ ಸೋಽಹಿಕಪಾರಮೇಷ್ಠೀ || ೪೫ ||
ಪಠತಿ ಯದಿ ಭವಾನ್ಯಾಃ ಶಾಕಿನೀದೇಹದೇವ್ಯಾಃ
ಸ್ತವನಮರುಣವರ್ಣಾಮಾರ್ಕಲಕ್ಷ್ಮ್ಯಾಃ ಪ್ರಕಾಶಮ್ |
ವ್ರಜತಿ ಪರಮರಾಜ್ಯಂ ದೇವಪೂಜ್ಯಃ ಪ್ರತಿಷ್ಠೋ
ಮನುಜಪನಸುಶೀಲೋ ಲೀಲಯಾ ಶಂಭುರೂಪಮ್ || ೪೬ ||
ಪ್ರಾತರ್ಮಧ್ಯಾಹ್ನಕಾಲೇ ಚ ಸಾಯಾಹ್ನೇ ಚ ತ್ರಿಸಪ್ತಕೇ |
ಶತಂ ಪಠಿತ್ವಾ ಮೋಕ್ಷಃ ಸ್ಯಾತ್ ಪುರಶ್ಚರ್ಯಾಫಲಂ ಲಭೇತ್ || ೪೭ ||
ಇತಿ ಶ್ರೀರುದ್ರಯಾಮಲೇ ಉತ್ತರತಂತ್ರೇ ಮಹಾತಂತ್ರೋದ್ದೀಪನೇ ಸಿದ್ಧಮಂತ್ರಪ್ರಕರಣೇ ಷಟ್ಚಕ್ರಪ್ರಕಾಶೇ ಭೈರವೀಭೈರವಸಂವಾದೇ ಶಾಕಿನೀಕೃತ ಶ್ರೀ ಕಾಳೀ ಸ್ತವನಂ ನಾಮ ದ್ವಿಸಪ್ತತಿತಮಃ ಪಟಲಃ ||
ಇನ್ನಷ್ಟು ಶ್ರೀ ಕಾಳಿಕಾ ಸ್ತೋತ್ರಗಳು ನೋಡಿ.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
