Sri Dakshinamurthy Stotram 4 – ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಂ – 4

ಸ್ತೋತ್ರನಿಧಿ → ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಗಳು → ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಂ – 4

ನತಖೇಟನಿಶಾಟಕಿರೀಟತಟೀ
ಘಟಿತೋಪಲಪಾಟಲಪೀಠಿತಲಮ್ |
ತಟಿದಾಭಜಟಾಪಟಲೀಮುಕುಟಂ
ವಟಮೂಲಕುಟೀನಿಲಯಂ ಕಲಯೇ || ೧ ||

ಸ್ಮರಣಂ ಖಲು ಯಚ್ಚರಣಾಂಬುಜಯೋ-
-ರ್ಭರಣಾಯ ಭವೋತ್ತರಣಾಯ ಭವೇತ್ |
ಶರಣಂ ಕರುಣಾವರುಣಾವಸಥಂ
ಭಜ ಬಾಲಸುಧಾಕಿರಣಾಭರಣಮ್ || ೨ ||

ಪರಿಕೀರ್ಣಸುವರ್ಣಸವರ್ಣಜಟಾ-
-ಭ್ರಮದಭ್ರಸರಿಚ್ಛರದಭ್ರರುಚಿಃ |
ಮಕುಟೋಕುಟಿಲಂ ಛಟಯನ್ ಶಶಿನಂ
ನಿಟಿಲೇನಲದೃಗ್ಜಟಿಲೋ ಜಯತಿ || ೩ ||

ವರಭೂಜಕುಟೀಘಟಿತಸ್ಫಟಿಕೋ-
-ಪಲಕುಟ್ಟಿಮವೇದಿತಲೇ ವಿಮಲೇ |
ಸ್ಮಿತಫುಲ್ಲಮುಖಂ ಚಿದುಪಾತ್ತಸುಖಂ
ಪುರವೈರಿಮಹಃ ಕರವೈ ಹೃದಯೇ || ೪ ||

ಅಕಲಂಕಶಶಾಂಕಸಹಸ್ರಸಹೋ-
-ದರದೀಧಿತಿದೀಪಿತದಿಗ್ವಲಯಮ್ |
ನಿಗಮಾಗಮನೀರಧಿನಿರ್ಮಥನೋ-
-ದಿತಮಾಕಲಯಾಮ್ಯಮೃತಂ ಕಿಮಪಿ || ೫ ||

ವಿಷಭೂಷಮಪಾಕೃತದೋಷಚಯಂ
ಮುನಿವೇಷವಿಶೇಷಮಶೇಷಗುರುಮ್ |
ಧೃತಚಿನ್ಮಯಮುದ್ರಮಹಂ ಕಲಯೇ
ಗತನಿದ್ರಮಮುದ್ರಸಮಾಧಿವಿಧೌ || ೬ ||

ದೃಢಯೋಗರಸಾನುಭವೋತ್ಕಲಿಕಂ
ಪ್ರಸರತ್ಪುಲಕಂ ಕ್ರತುಭುಕ್ತಿಲಕಮ್ |
ಭಸಿತೋಲ್ಲಸಿತಾಲಿಕವಿಸ್ಫುರಿತಾ-
-ನಲದೃಕ್ತಿಲಕಂ ಕಲಯೇಂದುಶಿಖಮ್ || ೭ ||

ವದ ಚಿತ್ತ ಕಿಮಾತ್ತಮಭೂದ್ಭವತಾ
ಭ್ರಮತಾ ಬಹುಧಾಖಿಲದಿಕ್ಷು ಮುಧಾ |
ನಿಜಶರ್ಮಕರಂ ಕುರು ಕರ್ಮ ಪರಂ
ಭವಮೇವ ಭಯಾಪಹಮಾಕಲಯ || ೮ ||

ವರಪುಸ್ತಕಹಸ್ತಮಪಾಸ್ತತಮಃ
ಶ್ರುತಿಮಸ್ತಕಶಸ್ತಸಮಸ್ತಗುಣಮ್ |
ಮಮ ನಿಸ್ತುಲವಸ್ತು ಪುರೋಽಸ್ತು ವರಂ
ಪ್ರಣವಪ್ರವಣಪ್ರವರಾವಗತಮ್ || ೯ ||

ಇತಿ ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಮ್ ||

---

ಇನ್ನಷ್ಟು ಶ್ರೀ ಶಿವ ಸ್ತೋತ್ರಗಳು ನೋಡಿ. ಇನ್ನಷ್ಟು ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.