Read in తెలుగు / ಕನ್ನಡ / தமிழ் / देवनागरी / English (IAST)
ಭಾಸ್ವಾನ್ ಕಾಶ್ಯಪಗೋತ್ರಜೋಽರುಣರುಚಿರ್ಯಃ ಸಿಂಹಪೋಽರ್ಕಃ ಸಮಿ-
-ತ್ಷಟ್ತ್ರಿಸ್ಥೋಽದಶಶೋಭನೋ ಗುರುಶಶೀ ಭೌಮಾಃ ಸುಮಿತ್ರಾಃ ಸದಾ |
ಶುಕ್ರೋ ಮಂದರಿಪುಃ ಕಳಿಂಗಜನಪಶ್ಚಾಗ್ನೀಶ್ವರೌ ದೇವತೇ
ಮಧ್ಯೇವರ್ತುಲಪೂರ್ವದಿಗ್ದಿನಕರಃ ಕುರ್ಯಾತ್ಸದಾ ಮಂಗಳಮ್ || ೧ ||
ಚಂದ್ರಃ ಕರ್ಕಟಕಪ್ರಭುಃ ಸಿತನಿಭಶ್ಚಾತ್ರೇಯಗೋತ್ರೋದ್ಭವ-
-ಶ್ಚಾತ್ರೇಯಶ್ಚತುರಶ್ರವಾರುಣಮುಖಶ್ಚಾಪೇ ಉಮಾಧೀಶ್ವರಃ |
ಷಟ್ಸಪ್ತಾಗ್ನಿ ದಶೈಕಶೋಭನಫಲೋ ನೋರಿರ್ಬುಧಾರ್ಕೌಪ್ರಿಯೌ
ಸ್ವಾಮೀ ಯಾಮುನಜಶ್ಚ ಪರ್ಣಸಮಿಧಃ ಕುರ್ಯಾತ್ಸದಾ ಮಂಗಳಮ್ || ೨ ||
ಭೌಮೋ ದಕ್ಷಿಣದಿಕ್ತ್ರಿಕೋಣಯಮದಿಗ್ವಿಂಧ್ಯೇಶ್ವರಃ ಖಾದಿರಃ
ಸ್ವಾಮೀ ವೃಶ್ಚಿಕಮೇಷಯೋಸ್ತು ಸುಗುರುಶ್ಚಾರ್ಕಃ ಶಶೀ ಸೌಹೃದಃ |
ಜ್ಞೋಽರಿಃ ಷಟ್ತ್ರಿಫಲಪ್ರದಶ್ಚ ವಸುಧಾಸ್ಕಂದೌ ಕ್ರಮಾದ್ದೇವತೇ
ಭಾರದ್ವಾಜಕುಲೋದ್ವಹೋಽರುಣರುಚಿಃ ಕುರ್ಯಾತ್ಸದಾ ಮಂಗಳಮ್ || ೩ ||
ಸೌಮ್ಯಃ ಪೀತ ಉದಙ್ಮುಖಃ ಸಮಿದಪಾಮಾರ್ಗೋಽತ್ರಿಗೋತ್ರೋದ್ಭವೋ
ಬಾಣೇಶಾನದಿಶಃ ಸುಹೃದ್ರವಿಸುತಃ ಶಾಂತಃ ಸುತಃ ಶೀತಗೋಃ |
ಕನ್ಯಾಯುಗ್ಮಪತಿರ್ದಶಾಷ್ಟಚತುರಃ ಷಣ್ಣೇತ್ರಗಃ ಶೋಭನೋ
ವಿಷ್ಣುರ್ದೇವ್ಯಧಿದೇವತೇ ಮಗಧಪಃ ಕುರ್ಯಾತ್ಸದಾ ಮಂಗಳಮ್ || ೪ ||
ಜೀವಶ್ಚಾಂಗಿರಗೋತ್ರಜೋತ್ತರಮುಖೋ ದೀರ್ಘೋತ್ತರಾಶಾಸ್ಥಿತಃ
ಪೀತೋಽಶ್ವತ್ಥಸಮಿಚ್ಚ ಸಿಂಧುಜನಿತಶ್ಚಾಪೋಽಥ ಮೀನಾಧಿಪಃ |
ಸೂರ್ಯೇಂದುಕ್ಷಿತಿಜಾಃ ಪ್ರಿಯಾ ಬುಧಸಿತೌ ಶತ್ರೂ ಸಮಾಶ್ಚಾಪರೇ
ಸಪ್ತದ್ವೇ ನವಪಂಚಮೇ ಶುಭಕರಃ ಕುರ್ಯಾತ್ಸದಾ ಮಂಗಳಮ್ || ೫ ||
ಶುಕ್ರೋ ಭಾರ್ಗವಗೋತ್ರಜಃ ಸಿತರುಚಿಃ ಪೂರ್ವಾಮುಖಃ ಪೂರ್ವದಿಕ್
ಪಾಂಚಾಲಸ್ಥ ವೃಷಸ್ತುಲಾಧಿಪಮಹಾರಾಷ್ಟ್ರಾಧಿಪೌದುಂಬರಃ |
ಇಂದ್ರಾಣೀಮಘವಾ ಬುಧಶ್ಚ ರವಿಜೋ ಮಿತ್ರೋರ್ಕ ಚಂದ್ರಾವರೀ
ಷಷ್ಠತ್ರಿರ್ದಶವರ್ಜಿತೇ ಭೃಗುಸುತಃ ಕುರ್ಯಾತ್ಸದಾ ಮಂಗಳಮ್ || ೬ ||
ಮಂದಃ ಕೃಷ್ಣನಿಭಃ ಸಪಶ್ಚಿಮಮುಖಃ ಸೌರಾಷ್ಟ್ರಪಃ ಕಾಶ್ಯಪಃ
ಸ್ವಾಮೀ ನಕ್ರಸುಕುಂಭಯೋರ್ಬುಧಸಿತೌ ಮಿತ್ರೌ ಕುಜೇಂದೂ ದ್ವಿಷೌ |
ಸ್ಥಾನಂ ಪಶ್ಚಿಮದಿಕ್ ಪ್ರಜಾಪತಿಯಮೌ ದೇವೌ ಧನುರ್ಧಾರಕಃ
ಷಟ್ತ್ರಿಸ್ಥಃ ಶುಭಕೃಚ್ಛನೀ ರವಿಸುತಃ ಕುರ್ಯಾತ್ಸದಾ ಮಂಗಳಮ್ || ೭ ||
ರಾಹುಃ ಸಿಂಹಳದೇಶಪೋಽಪಿ ಸತಮಃ ಕೃಷ್ಣಾಂಗಶೂರ್ಪಾಸನೋ
ಯಃ ಪೈಠೀನಸಗೋತ್ರಸಂಭವಸಮಿದ್ದೂರ್ವಾಮುಖೋ ದಕ್ಷಿಣಃ |
ಯಃ ಸರ್ಪಃ ಪಶುದೈವತೋಽಖಿಲಗತಃ ಸೂರ್ಯಗ್ರಹೇ ಛಾದಕಃ
ಷಟ್ತ್ರಿಸ್ಥಃ ಶುಭಕೃಚ್ಚ ಸಿಂಹಕಸುತಃ ಕುರ್ಯಾತ್ಸದಾ ಮಂಗಳಮ್ || ೮ ||
ಕೇತುರ್ಜೈಮಿನಿಗೋತ್ರಜಃ ಕುಶಸಮಿದ್ವಾಯವ್ಯಕೋಣೇಸ್ಥಿತ-
-ಶ್ಚಿತ್ರಾಂಕಧ್ವಜಲಾಂಛನೋ ಹಿ ಭಗವಾನ್ ಯೋ ದಕ್ಷಿಣಾಶಾಮುಖಃ |
ಬ್ರಹ್ಮಾ ಚೈವ ತು ಚಿತ್ರಗುಪ್ತಪತಿಮಾನ್ ಪ್ರೀತ್ಯಾಧಿದೇವಃ ಸದಾ
ಷಟ್ತ್ರಿಸ್ಥಃ ಶುಭಕೃಚ್ಚ ಬರ್ಬರಪತಿಃ ಕುರ್ಯಾತ್ಸದಾ ಮಂಗಳಮ್ || ೯ ||
ಇತಿ ನವಗ್ರಹ ಮಂಗಳ ಸ್ತೋತ್ರಮ್ |
ಇನ್ನಷ್ಟು ನವಗ್ರಹ ಸ್ತೋತ್ರಗಳು ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
