Narayaneeyam Dasakam 84 – ನಾರಾಯಣೀಯಂ ಚತುರಶೀತಿತಮದಶಕಮ್


ಚತುರಶೀತಿತಮದಶಕಮ್ (೮೪) – ಸಮನ್ತಪಞ್ಚಕತೀರ್ಥಯಾತ್ರಾ | – ಬನ್ಧುಮಿತ್ರಾದಿ ಸಮಾಗಮಮ್ |

ಕ್ವಚಿದಥ ತಪನೋಪರಾಗಕಾಲೇ
ಪುರಿ ನಿದಧತ್ಕೃತವರ್ಮಕಾಮಸೂನೂ |
ಯದುಕುಲಮಹಿಲಾವೃತಃ ಸುತೀರ್ಥಂ
ಸಮುಪಗತೋಽಸಿ ಸಮನ್ತಪಞ್ಚಕಾಖ್ಯಮ್ || ೮೪-೧ ||

ಬಹುತರಜನತಾಹಿತಾಯ ತತ್ರ
ತ್ವಮಪಿ ಪುನರ್ವಿನಿಮಜ್ಜ್ಯ ತೀರ್ಥತೋಯಮ್ |
ದ್ವಿಜಗಣಪರಿಮುಕ್ತವಿತ್ತರಾಶಿಃ
ಸಮಮಿಲಥಾಃ ಕುರುಪಾಣ್ಡವಾದಿಮಿತ್ರೈಃ || ೮೪-೨ ||

ತವ ಖಲು ದಯಿತಾಜನೈಃ ಸಮೇತಾ
ದ್ರುಪದಸುತಾ ತ್ವಯಿ ಗಾಢಭಕ್ತಿಭಾರಾ |
ತದುದಿತಭವದಾಹೃತಿಪ್ರಕಾರೈ-
ರತಿಮುಮುದೇ ಸಮಮನ್ಯಭಾಮಿನೀಭಿಃ || ೮೪-೩ ||

ತದನು ಚ ಭಗವನ್ ನಿರೀಕ್ಷ್ಯ ಗೋಪಾ-
ನತಿಕುತುಕಾದುಪಗಮ್ಯ ಮಾನಯಿತ್ವಾ |
ಚಿರತರವಿರಹಾತುರಾಙ್ಗರೇಖಾಃ
ಪಶುಪವಧೂಃ ಸರಸಂ ತ್ವಮನ್ವಯಾಸೀಃ || ೮೪-೪ ||

ಸಪದಿ ಚ ಭವದೀಕ್ಷಣೋತ್ಸವೇನ
ಪ್ರಮುದಿತಮಾನಹೃದಾಂ ನಿತಂಬಿನೀನಾಮ್ | [** ಪ್ರಮುಷಿತ **]
ಅತಿರಸಪರಿಮುಕ್ತಕಞ್ಚುಲೀಕೇ
ಪರಿಚಿತಹೃದ್ಯತರೇ ಕುಚೇ ನ್ಯಲೈಷೀಃ || ೮೪-೫ ||

ರಿಪುಜನಕಲಹೈಃ ಪುನಃ ಪುನರ್ಮೇ
ಸಮುಪಗತೈರಿಯತೀ ವಿಲಂಬನಾಭೂತ್ |
ಇತಿ ಕೃತಪರಿರಂಭಣೇ ತ್ವಯಿ ದ್ರಾ-
ಗತಿವಿವಶಾ ಖಲು ರಾಧಿಕಾ ನಿಲಿಲ್ಯೇ || ೮೪-೬ ||

ಅಪಗತವಿರಹವ್ಯಥಾಸ್ತದಾ ತಾ
ರಹಸಿ ವಿಧಾಯ ದದಾಥ ತತ್ತ್ವಬೋಧಮ್ |
ಪರಮಸುಖಚಿದಾತ್ಮಕೋಽಹಮಾತ್ಮೇ-
ತ್ಯುದಯತು ವಃ ಸ್ಫುಟಮೇವ ಚೇತಸೀತಿ || ೮೪-೭ ||

ಸುಖರಸಪರಿಮಿಶ್ರಿತೋ ವಿಯೋಗಃ
ಕಿಮಪಿ ಪುರಾಽಭವದುದ್ಧವೋಪದೇಶೈಃ |
ಸಮಭವದಮುತಃ ಪರಂ ತು ತಾಸಾಂ
ಪರಮಸುಖೈಕ್ಯಮಯೀ ಭವದ್ವಿಚಿನ್ತಾ || ೮೪-೮ ||

ಮುನಿವರನಿವಹೈಸ್ತವಾಥ ಪಿತ್ರಾ
ದುರಿತಶಮಾಯ ಶುಭಾನಿ ಪೃಚ್ಛ್ಯಮಾನೈಃ |
ತ್ವಯಿ ಸತಿ ಕಿಮಿದಂ ಶುಭಾನ್ತರೈರಿ-
ತ್ಯುರುಹಸಿತೈರಪಿ ಯಾಜಿತಸ್ತದಾಸೌ || ೮೪-೯ ||

ಸುಮಹತಿ ಯಜನೇ ವಿತಾಯಮಾನೇ
ಪ್ರಮುದಿತಮಿತ್ರಜನೇ ಸಹೈವ ಗೋಪಾಃ |
ಯದುಜನಮಹಿತಾಸ್ತ್ರಿಮಾಸಮಾತ್ರಂ
ಭವದನುಷಙ್ಗರಸಂ ಪುರೇವ ಭೇಜುಃ || ೮೪-೧೦ ||

ವ್ಯಪಗಮಸಮಯೇ ಸಮೇತ್ಯ ರಾಧಾಂ
ದೃಢಮುಪಗೂಹ್ಯ ನಿರೀಕ್ಷ್ಯ ವೀತಖೇದಾಮ್ |
ಪ್ರಮುದಿತಹೃದಯಃ ಪುರಂ ಪ್ರಯಾತಃ
ಪವನಪುರೇಶ್ವರ ಪಾಹಿ ಮಾಂ ಗದೇಭ್ಯಃ || ೧೧ ||

ಇತಿ ಚತುರಶೀತಿತಮದಶಕಂ ಸಮಾಪ್ತಂ


ಸಂಪೂರ್ಣ ನಾರಾಯಣೀಯಂ ನೋಡಿ.

Report mistakes and corrections in Stotranidhi content.

Facebook Comments

ನಿಮ್ಮದೊಂದು ಉತ್ತರ

ನಿಮ್ಮ ಮಿಂಚೆ ವಿಳಾಸ ಎಲ್ಲೂ ಪ್ರಕಟವಾಗುವುದಿಲ್ಲ.

error: Not allowed
%d bloggers like this: