Read in తెలుగు / ಕನ್ನಡ / தமிழ் / देवनागरी / English (IAST)
ಶ್ರೀಶುಕ ಉವಾಚ |
ಮಹಾದೇವ ಮಹಾದೇವ ದೇವದೇವ ಮಹೇಶ್ವರ |
ದತ್ತಾತ್ರೇಯಸ್ತವಂ ದಿವ್ಯಂ ಶ್ರೋತುಮಿಚ್ಛಾಮ್ಯಹಂ ಪ್ರಭೋ || ೧ ||
ತದಸ್ಯ ವದ ಮಾಹಾತ್ಮ್ಯಂ ದೇವದೇವ ದಯಾನಿಧೇ |
ದತ್ತಾತ್ಪರತರಂ ನಾಸ್ತಿ ಪುರಾ ವ್ಯಾಸೇನ ಕೀರ್ತಿತಮ್ || ೨ ||
ಜಗದ್ಗುರುರ್ಜಗನ್ನಾಥೋ ಗೀಯತೇ ನಾರದಾದಿಭಿಃ |
ತತ್ಸರ್ವಂ ಬ್ರೂಹಿ ಮೇ ದೇವ ಕರುಣಾಕರ ಶಂಕರ || ೩ ||
ಶ್ರೀಮಹಾದೇವ ಉವಾಚ |
ಶೃಣು ವ್ಯಾಸಾತ್ಮಜಾತ ತ್ವಂ ಗುಹ್ಯಾದ್ಗುಹ್ಯತರಂ ಮಹತ್ | [ದಿವ್ಯಂ]
ಯಸ್ಯ ಸ್ಮರಣಮಾತ್ರೇಣ ಮುಚ್ಯತೇ ಸರ್ವಬಂಧನಾತ್ || ೪ ||
ದತ್ತಂ ಸನಾತನಂ ಬ್ರಹ್ಮ ನಿರ್ವಿಕಾರಂ ನಿರಂಜನಮ್ |
ಆದಿದೇವಂ ನಿರಾಕಾರಂ ವ್ಯಕ್ತಂ ಗುಣವಿವರ್ಜಿತಮ್ || ೫ ||
ನಾಮರೂಪಕ್ರಿಯಾತೀತಂ ನಿಃಸಂಗಂ ದೇವವಂದಿತಮ್ |
ನಾರಾಯಣಂ ಶಿವಂ ಶುದ್ಧಂ ದೃಶ್ಯದರ್ಶನವರ್ಜಿತಮ್ || ೬ ||
ಪರೇಶಂ ಪಾರ್ವತೀಕಾಂತಂ ರಮಾಧೀಶಂ ದಿಗಂಬರಮ್ |
ನಿರ್ಮಲೋ ನಿತ್ಯತೃಪ್ತಾತ್ಮಾ ನಿತ್ಯಾನಂದೋ ಮಹೇಶ್ವರಃ || ೭ ||
ಬ್ರಹ್ಮಾ ವಿಷ್ಣುಃ ಶಿವಃ ಸಾಕ್ಷಾದ್ಗೋವಿಂದೋ ಗತಿದಾಯಕಃ |
ಪೀತಾಂಬರಧರೋ ದೇವೋ ಮಾಧವಃ ಸುರಸೇವಿತಃ || ೮ ||
ಮೃತ್ಯುಂಜಯೋ ಮಹಾರುದ್ರಃ ಕಾರ್ತವೀರ್ಯವರಪ್ರದಃ |
ಓಮಿತ್ಯೇಕಾಕ್ಷರಂ ಬೀಜಂ ಕ್ಷರಾಕ್ಷರಪದಂ ಹರಿಃ || ೯ ||
ಗಯಾ ಕಾಶೀ ಕುರುಕ್ಷೇತ್ರಂ ಪ್ರಯಾಗಂ ಬದ್ರಿಕಾಶ್ರಮಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೦ ||
ಗೋಮತೀ ಜಾಹ್ನವೀ ಭೀಮಾ ಗಂಡಕೀ ಚ ಸರಸ್ವತೀ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೧ ||
ಸರಯೂಸ್ತುಂಗಭದ್ರಾ ಚ ಯಮುನಾ ಪಯವಾಹಿನೀ | [ಜಲ]
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೨ ||
ತಾಮ್ರಪರ್ಣೀ ಪ್ರಣೀತಾ ಚ ಗೌತಮೀ ತಾಪನಾಶಿನೀ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೩ ||
ನರ್ಮದಾ ಸಿಂಧು ಕಾವೇರೀ ಕೃಷ್ಣವೇಣೀ ತಥೈವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೪ ||
ಅವಂತೀ ದ್ವಾರಕಾ ಮಾಯಾ ಮಲ್ಲಿನಾಥಸ್ಯ ದರ್ಶನಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೫ ||
ದ್ವಾದಶ ಜ್ಯೋತಿರ್ಲಿಂಗಾನಿ ವಾರಾಹೇ ಪುಷ್ಕರೇ ತಥಾ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೬ ||
ಜ್ವಾಲಾಮುಖೀ ಹಿಂಗುಲಾ ಚ ಸಪ್ತಶೃಂಗಸ್ತಥೈವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೭ ||
ಅಯೋಧ್ಯಾ ಮಥುರಾ ಕಾಂಚೀ ರೇಣುಕಾ ಸೇತುಬಂಧನಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೮ ||
ಅಹೋಬಿಲಂ ತ್ರಿಪಥಗಾಂ ಗಂಗಾ ಸಾಗರಮೇವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೧೯ ||
ಕರವೀರಮಹಾಸ್ಥಾನಂ ರಂಗನಾಥಂ ತಥೈವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೦ ||
ಏಕಾದಶೀವ್ರತಂ ಚೈವ ಅಷ್ಟಾಂಗೈರ್ಯೋಗಸಾಧನಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೧ ||
ಶಾಕಂಭರೀ ಚ ಮೂಕಾಂಬಾ ಕಾರ್ತಿಕಸ್ವಾಮಿದರ್ಶನಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೨ ||
ವ್ರತಂ ನಿಷ್ಠಾ ತಪೋ ದಾನಂ ಸಾಮಗಾನಂ ತಥೈವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೩ ||
ಮುಕ್ತಿಕ್ಷೇತ್ರಂ ಚ ಕಾಮಾಕ್ಷೀ ತುಲಜಾ ಸಿದ್ಧಿದೇವತಾ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೪ ||
ಅನ್ನಹೋಮಾದಿಕಂ ದಾನಂ ಮೇದಿನ್ಯಶ್ವ ಗಜಾನ್ ವೃಷಾನ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೫ ||
ಮಾಘಕಾರ್ತಿಕಯೋಃ ಸ್ನಾನಂ ಸನ್ಯಾಸಂ ಬ್ರಹ್ಮಚರ್ಯಕಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೬ ||
ಅಶ್ವಮೇಧಸಹಸ್ರಾಣಿ ಮಾತಾಪಿತೃಪ್ರಪೋಷಣಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೭ ||
ಅಮಿತಂ ಪೋಷಣಂ ಪುಣ್ಯಮುಪಕಾರಂ ತಥೈವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೮ ||
ಜಗನ್ನಾಥಂ ಚ ಗೋಕರ್ಣಂ ಪಾಂಡುರಂಗಂ ತಥೈವ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೨೯ ||
ಸರ್ವದೇವನಮಸ್ಕಾರಃ ಸರ್ವೇ ಯಜ್ಞಾಃ ಪ್ರಕೀರ್ತಿತಾಃ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೦ ||
ಶಾಸ್ತ್ರಷಟ್ಕಂ ಪುರಾಣಾನಿ ಅಷ್ಟೌ ವ್ಯಾಕರಣಾನಿ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೧ ||
ಸಾವಿತ್ರೀ ಪ್ರಣವಂ ಜಪ್ತ್ವಾ ಚತುರ್ವೇದಾಂಶ್ಚ ಪಾರಗಾಃ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೨ ||
ಕನ್ಯಾದಾನಾನಿ ಪುಣ್ಯಾನಿ ವಾನಪ್ರಸ್ಥಸ್ಯ ಪೋಷಣಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೩ ||
ವಾಪೀ ಕೂಪ ತಟಾಕಾನಿ ಕಾನನಾರೋಪಣಾನಿ ಚ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೪ ||
ಅಶ್ವತ್ಥ ತುಲಸೀ ಧಾತ್ರೀ ಸೇವತೇ ಯೋ ನರಃ ಸದಾ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೫ ||
ಶಿವಂ ವಿಷ್ಣುಂ ಗಣೇಶಂ ಚ ಶಕ್ತಿಂ ಸೂರ್ಯಂ ಚ ಪೂಜನಮ್ |
ಏತತ್ಸರ್ವಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೬ ||
ಗೋಹತ್ಯಾದಿಸಹಸ್ರಾಣಿ ಬ್ರಹ್ಮಹತ್ಯಾಸ್ತಥೈವ ಚ |
ಪ್ರಾಯಶ್ಚಿತ್ತಂ ಕೃತಂ ತೇನ ದತ್ತ ಇತ್ಯಕ್ಷರದ್ವಯಮ್ || ೩೭ ||
ಸ್ವರ್ಣಸ್ತೇಯಂ ಸುರಾಪಾನಂ ಮಾತುರ್ಗಮನಕಿಲ್ಬಿಷಮ್ |
ಮುಚ್ಯತೇ ಸರ್ವಪಾಪೇಭ್ಯೋ ದತ್ತ ಇತ್ಯಕ್ಷರದ್ವಯಮ್ || ೩೮ ||
ಸ್ತ್ರೀಹತ್ಯಾದಿಕೃತಂ ಪಾಪಂ ಬಾಲಹತ್ಯಾಸ್ತಥೈವ ಚ |
ಮುಚ್ಯತೇ ಸರ್ವಪಾಪೇಭ್ಯೋ ದತ್ತ ಇತ್ಯಕ್ಷರದ್ವಯಮ್ || ೩೯ ||
ಪ್ರಾಯಶ್ಚಿತ್ತಂ ಕೃತಂ ತೇನ ಸರ್ವಪಾಪಪ್ರಣಾಶನಮ್ |
ಬ್ರಹ್ಮತ್ವಂ ಲಭತೇ ಜ್ಞಾನಂ ದತ್ತ ಇತ್ಯಕ್ಷರದ್ವಯಮ್ || ೪೦ ||
ಕಲಿದೋಷವಿನಾಶಾರ್ಥಂ ಜಪೇದೇಕಾಗ್ರಮಾನಸಃ |
ಶ್ರೀಗುರುಂ ಪರಮಾನಂದಂ ದತ್ತ ಇತ್ಯಕ್ಷರದ್ವಯಮ್ || ೪೧ ||
ದತ್ತ ದತ್ತ ಇದಂ ವಾಕ್ಯಂ ತಾರಕಂ ಸರ್ವದೇಹಿನಾಮ್ |
ಶ್ರದ್ಧಾಯುಕ್ತೋ ಜಪೇನ್ನಿತ್ಯಂ ದತ್ತ ಇತ್ಯಕ್ಷರದ್ವಯಮ್ || ೪೨ ||
ಕೇಶವಂ ಮಾಧವಂ ವಿಷ್ಣುಂ ಗೋವಿಂದಂ ಗೋಪತಿಂ ಹರಿಮ್ |
ಗುರೂಣಾಂ ಪಠ್ಯತೇ ನಿತ್ಯಂ ತತ್ಸರ್ವಂ ಚ ಶುಭಾವಹಮ್ || ೪೩ ||
ನಿರಂಜನಂ ನಿರಾಕಾರಂ ದೇವದೇವಂ ಜನಾರ್ದನಮ್ |
ಮಾಯಾಮುಕ್ತಂ ಜಪೇನ್ನಿತ್ಯಂ ಪಾವನಂ ಸರ್ವದೇಹಿನಾಮ್ || ೪೪ ||
ಆದಿನಾಥಂ ಸುರಶ್ರೇಷ್ಠಂ ಕೃಷ್ಣಂ ಶ್ಯಾಮಂ ಜಗದ್ಗುರುಮ್ |
ಸಿದ್ಧರಾಜಂ ಗುಣಾತೀತಂ ರಾಮಂ ರಾಜೀವಲೋಚನಮ್ || ೪೫ ||
ನಾರಾಯಣಂ ಪರಂ ಬ್ರಹ್ಮ ಲಕ್ಷ್ಮೀಕಾಂತಂ ಪರಾತ್ಪರಮ್ |
ಅಪ್ರಮೇಯಂ ಸುರಾನಂದಂ ನಮೋ ದತ್ತಂ ದಿಗಂಬರಮ್ || ೪೬ ||
ಯೋಗಿರಾಜೋಽತ್ರಿವರದಃ ಸುರಾಧ್ಯಕ್ಷೋ ಗುಣಾಂತಕಃ |
ಅನಸೂಯಾತ್ಮಜೋ ದೇವೋ ದೇವತಾಗತಿದಾಯಕಃ || ೪೭ ||
ಗೋಪನೀಯಂ ಪ್ರಯತ್ನೇನ ಅಯಂ ಸುರಮುನೀಶ್ವರೈಃ |
ಸಮಸ್ತಋಷಿಭಿಃ ಸರ್ವೈಃ ಭಕ್ತ್ಯಾ ಸ್ತುತ್ವಾ ಮಹಾತ್ಮಭಿಃ || ೪೮ ||
ನಾರದೇನ ಸುರೇಂದ್ರೇಣ ಸನಕಾದ್ಯೈರ್ಮಹಾತ್ಮಭಿಃ |
ಗೌತಮೇನ ಚ ಗಾರ್ಗೇಣ ವ್ಯಾಸೇನ ಕಪಿಲೇನ ಚ || ೪೯ ||
ವಾಮದೇವೇನ ದಕ್ಷೇಣ ಅತ್ರಿ ಭಾರ್ಗವ ಮುದ್ಗಲೈಃ |
ವಸಿಷ್ಠಪ್ರಮುಖೈಃ ಸರ್ವೈಃ ಗೀಯತೇ ಸರ್ವದಾದರಾತ್ || ೫೦ ||
ವಿನಾಯಕೇನ ರುದ್ರೇಣ ಮಹಾಸೇನೇನ ವೈ ಸದಾ |
ಮಾರ್ಕಂಡೇಯೇನ ಧೌಮ್ಯೇನ ಕೀರ್ತಿತಂ ಸ್ತವಮುತ್ತಮಮ್ || ೫೧ ||
ಮರೀಚ್ಯಾದಿಮುನೀಂದ್ರೈಶ್ಚ ಶುಕಕರ್ದಮಸತ್ತಮೈಃ |
ಅಂಗಿರಾಕೃತ ಪೌಲಸ್ತ್ಯ ಭೃಗು ಕಶ್ಯಪ ಜೈಮಿನೀ || ೫೨ ||
ಗುರೋಃ ಸ್ತವಮಧೀಯಾನೋ ವಿಜಯೀ ಸರ್ವದಾ ಭವೇತ್ |
ಗುರೋಃ ಸಾಯುಜ್ಯಮಾಪ್ನೋತಿ ಗುರೋರ್ನಾಮ ಪಠೇದ್ಬುಧಃ || ೫೩ ||
ಗುರೋಃ ಪರತರಂ ನಾಸ್ತಿ ಸತ್ಯಂ ಸತ್ಯಂ ನ ಸಂಶಯಃ |
ಗುರೋಃ ಪಾದೋದಕಂ ಪೀತ್ವಾ ಗುರೋರ್ನಾಮ ಸದಾ ಜಪೇತ್ || ೫೪ ||
ತೇಽಪಿ ಸನ್ನ್ಯಾಸಿನೋ ಜ್ಞೇಯಾಃ ಇತರೇ ವೇಷಧಾರಿಣಃ |
ಗಂಗಾದ್ಯಾಃ ಸರಿತಃ ಸರ್ವೇ ಗುರೋಃ ಪಾದಾಂಬುಜೇ ಸದಾ || ೫೫ ||
ಗುರುಸ್ತವಂ ನ ಜಾನಾತಿ ಗುರುನಾಮ ಮುಖೇ ನ ಹಿ |
ಪಶುತುಲ್ಯಂ ವಿಜಾನೀಯಾತ್ ಸತ್ಯಂ ಸತ್ಯಂ ಮಹಾಮುನೇ || ೫೬ ||
ಇದಂ ಸ್ತೋತ್ರಂ ಮಹದ್ದಿವ್ಯಂ ಸ್ತವರಾಜಂ ಮನೋಹರಮ್ |
ಪಠನಾಚ್ಛ್ರವಣಾದ್ವಾಪಿ ಸರ್ವಾನ್ ಕಾಮಾನವಾಪ್ನುಯಾತ್ || ೫೭ ||
ಇತಿ ಶ್ರೀರುದ್ರಯಾಮಲೇ ಶ್ರೀಮನ್ಮಹಾದೇವಶುಕಸಂವಾದೇ ಶ್ರೀ ದತ್ತಾತ್ರೇಯ ಸ್ತವರಾಜಃ |
ಇನ್ನಷ್ಟು ಶ್ರೀ ದತ್ತತ್ರೇಯ ಸ್ತೋತ್ರಗಳು ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
