Read in తెలుగు / ಕನ್ನಡ / தமிழ் / English (IAST)
<< ವಿಂಶ ದಶಕಮ್ (೨೦) ದೇವಕೀಪುತ್ರವಧಮ್
ಏಕವಿಂಶದಶಕಮ್ (೨೧) – ನವ ವರ್ಷಾಃ ತಥಾ ಸಪ್ತದ್ವೀಪಾಃ | ಜಂಬೂದ್ವೀಪಾದಿಷು ಉಪಾಸನಾಪದ್ಧತಿಃ |
ಮಧ್ಯೋದ್ಭವೇ ಭುವ ಇಲಾವೃತನಾಮ್ನಿ ವರ್ಷೇ
ಗೌರೀಪ್ರಧಾನವನಿತಾಜನಮಾತ್ರಭಾಜಿ |
ಶರ್ವೇಣ ಮನ್ತ್ರನುತಿಭಿಃ ಸುಮುಪಾಸ್ಯಮಾನಂ
ಸಙ್ಕರ್ಷಣಾತ್ಮಕಮಧೀಶ್ವರ ಸಂಶ್ರಯೇ ತ್ವಾಮ್ || ೨೧-೧ ||
ಭದ್ರಾಶ್ವನಾಮಕ ಇಲಾವೃತಪೂರ್ವವರ್ಷೇ
ಭದ್ರಶ್ರವೋಭಿರೃಷಿಭಿಃ ಪರಿಣೂಯಮಾನಮ್ |
ಕಲ್ಪಾನ್ತಗೂಢನಿಗಮೋದ್ಧರಣಪ್ರವೀಣಂ
ಧ್ಯಾಯಾಮಿ ದೇವ ಹಯಶೀರ್ಷತನುಂ ಭವನ್ತಮ್ || ೨೧-೨ ||
ಧ್ಯಾಯಾಮಿ ದಕ್ಷಿಣಗತೇ ಹರಿವರ್ಷವರ್ಷೇ
ಪ್ರಾಹ್ಲಾದಮುಖ್ಯಪುರುಷೈಃ ಪರಿಷೇವ್ಯಮಾಣಮ್ |
ಉತ್ತುಙ್ಗಶಾನ್ತಧವಲಾಕೃತಿಮೇಕಶುದ್ಧ-
ಜ್ಞಾನಪ್ರದಂ ನರಹರಿಂ ಭಗವನ್ ಭವನ್ತಮ್ || ೨೧-೩ ||
ವರ್ಷೇ ಪ್ರತೀಚಿ ಲಲಿತಾತ್ಮನಿ ಕೇತುಮಾಲೇ
ಲೀಲಾವಿಶೇಷಲಲಿತಸ್ಮಿತಶೋಭನಾಙ್ಗಮ್ |
ಲಕ್ಷ್ಮ್ಯಾ ಪ್ರಜಾಪತಿಸುತೈಶ್ಚ ನಿಷೇವ್ಯಮಾಣಂ
ತಸ್ಯಾಃ ಪ್ರಿಯಾಯ ಧೃತಕಾಮತನುಂ ಭಜೇ ತ್ವಾಮ್ || ೨೧-೪ ||
ರಮ್ಯೇ ಹ್ಯುದೀಚಿ ಖಲು ರಮ್ಯಕನಾಮ್ನಿ ವರ್ಷೇ
ತದ್ವರ್ಷನಾಥಮನುವರ್ಯಸಪರ್ಯಮಾಣಮ್ |
ಭಕ್ತೈಕವತ್ಸಲಮಮತ್ಸರಹೃತ್ಸು ಭಾನ್ತಂ
ಮತ್ಸ್ಯಾಕೃತಿಂ ಭುವನನಾಥ ಭಜೇ ಭವನ್ತಮ್ || ೨೧-೫ ||
ವರ್ಷಂ ಹಿರಣ್ಮಯಸಮಾಹ್ವಯಮೌತ್ತರಾಹ-
ಮಾಸೀನಮದ್ರಿಧೃತಿಕರ್ಮಠಕಾಮಠಾಙ್ಗಮ್ |
ಸಂಸೇವತೇ ಪಿತೃಗಣಪ್ರವರೋಽರ್ಯಮಾ ಯಂ
ತಂ ತ್ವಾಂ ಭಜಾಮಿ ಭಗವನ್ ಪರಚಿನ್ಮಯಾತ್ಮನ್ || ೨೧-೬ ||
ಕಿಂ ಚೋತ್ತರೇಷು ಕುರುಷು ಪ್ರಿಯಯಾ ಧರಣ್ಯಾ
ಸಂಸೇವಿತೋ ಮಹಿತಮನ್ತ್ರನುತಿಪ್ರಭೇದೈಃ |
ದಂಷ್ಟ್ರಾಗ್ರಘೃಷ್ಟಘನಪೃಷ್ಠಗರಿಷ್ಠವರ್ಷ್ಮಾ
ತ್ವಂ ಪಾಹಿ ವಿಜ್ಞನುತ ಯಜ್ಞವರಾಹಮೂರ್ತೇ || ೨೧-೭ ||
ಯಾಮ್ಯಾಂ ದಿಶಂ ಭಜತಿ ಕಿಮ್ಪುರುಷಾಖ್ಯವರ್ಷೇ
ಸಂಸೇವಿತೋ ಹನುಮತಾ ದೃಢಭಕ್ತಿಭಾಜಾ |
ಸೀತಾಭಿರಾಮಪರಮಾದ್ಭುತರೂಪಶಾಲೀ
ರಾಮಾತ್ಮಕಃ ಪರಿಲಸನ್ಪರಿಪಾಹಿ ವಿಷ್ಣೋ || ೨೧-೮ ||
ಶ್ರೀನಾರದೇನ ಸಹ ಭಾರತಖಣ್ಡಮುಖ್ಯೈ-
ಸ್ತ್ವಂ ಸಾಙ್ಖ್ಯಯೋಗನುತಿಭಿಃ ಸಮುಪಾಸ್ಯಮಾನಃ |
ಆಕಲ್ಪಕಾಲಮಿಹ ಸಾಧುಜನಾಭಿರಕ್ಷೀ
ನಾರಾಯಣೋ ನರಸಖಃ ಪರಿಪಾಹಿ ಭೂಮನ್ || ೨೧-೯ ||
ಪ್ಲಾಕ್ಷೇಽರ್ಕರೂಪಮಯಿ ಶಾಲ್ಮಲ ಇನ್ದುರೂಪಂ
ದ್ವೀಪೇ ಭಜನ್ತಿ ಕುಶನಾಮನಿ ವಹ್ನಿರೂಪಮ್ |
ಕ್ರೌಞ್ಚೇಽಂಬುರೂಪಮಥ ವಾಯುಮಯಂ ಚ ಶಾಕೇ
ತ್ವಾಂ ಬ್ರಹ್ಮರೂಪಮಯಿ ಪುಷ್ಕರನಾಮ್ನಿ ಲೋಕಾಃ || ೨೧-೧೦ ||
ಸರ್ವೈರ್ಧ್ರುವಾದಿಭಿರುಡುಪ್ರಕರೈರ್ಗ್ರಹೈಶ್ಚ
ಪುಚ್ಛಾದಿಕೇಷ್ವವಯವೇಷ್ವಭಿಕಲ್ಪ್ಯಮಾನೈಃ |
ತ್ವಂ ಶಿಂಶುಮಾರವಪುಷಾ ಮಹತಾಮುಪಾಸ್ಯಃ
ಸನ್ಧ್ಯಾಸು ರುನ್ಧಿ ನರಕಂ ಮಮ ಸಿನ್ಧುಶಾಯಿನ್ || ೨೧-೧೧ ||
ಪಾತಾಲಮೂಲಭುವಿ ಶೇಷತನುಂ ಭವನ್ತಂ
ಲೋಲೈಕಕುಣ್ಡಲವಿರಾಜಿಸಹಸ್ರಶೀರ್ಷಮ್ |
ನೀಲಾಂಬರಂ ಧೃತಹಲಂ ಭುಜಗಾಙ್ಗನಾಭಿ-
ರ್ಜುಷ್ಟಂ ಭಜೇ ಹರ ಗದಾನ್ಗುರುಗೇಹನಾಥ || ೨೧-೧೨ ||
ಇತಿ ಏಕವಿಂಶದಶಕಂ ಸಮಾಪ್ತಮ್ ||
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
