Read in తెలుగు / ಕನ್ನಡ / தமிழ் / English (IAST)
ఏకవింశదశకమ్ (౨౧) – నవ వర్షాః తథా సప్తద్వీపాః | జంబూద్వీపాదిషు ఉపాసనాపద్ధతిః |
మధ్యోద్భవే భువ ఇలావృతనామ్ని వర్షే
గౌరీప్రధానవనితాజనమాత్రభాజి |
శర్వేణ మన్త్రనుతిభిః సుముపాస్యమానం
సఙ్కర్షణాత్మకమధీశ్వర సంశ్రయే త్వామ్ || ౨౧-౧ ||
భద్రాశ్వనామక ఇలావృతపూర్వవర్షే
భద్రశ్రవోభిరృషిభిః పరిణూయమానమ్ |
కల్పాన్తగూఢనిగమోద్ధరణప్రవీణం
ధ్యాయామి దేవ హయశీర్షతనుం భవన్తమ్ || ౨౧-౨ ||
ధ్యాయామి దక్షిణగతే హరివర్షవర్షే
ప్రాహ్లాదముఖ్యపురుషైః పరిషేవ్యమాణమ్ |
ఉత్తుఙ్గశాన్తధవలాకృతిమేకశుద్ధ-
జ్ఞానప్రదం నరహరిం భగవన్ భవన్తమ్ || ౨౧-౩ ||
వర్షే ప్రతీచి లలితాత్మని కేతుమాలే
లీలావిశేషలలితస్మితశోభనాఙ్గమ్ |
లక్ష్మ్యా ప్రజాపతిసుతైశ్చ నిషేవ్యమాణం
తస్యాః ప్రియాయ ధృతకామతనుం భజే త్వామ్ || ౨౧-౪ ||
రమ్యే హ్యుదీచి ఖలు రమ్యకనామ్ని వర్షే
తద్వర్షనాథమనువర్యసపర్యమాణమ్ |
భక్తైకవత్సలమమత్సరహృత్సు భాన్తం
మత్స్యాకృతిం భువననాథ భజే భవన్తమ్ || ౨౧-౫ ||
వర్షం హిరణ్మయసమాహ్వయమౌత్తరాహ-
మాసీనమద్రిధృతికర్మఠకామఠాఙ్గమ్ |
సంసేవతే పితృగణప్రవరోఽర్యమా యం
తం త్వాం భజామి భగవన్ పరచిన్మయాత్మన్ || ౨౧-౬ ||
కిం చోత్తరేషు కురుషు ప్రియయా ధరణ్యా
సంసేవితో మహితమన్త్రనుతిప్రభేదైః |
దంష్ట్రాగ్రఘృష్టఘనపృష్ఠగరిష్ఠవర్ష్మా
త్వం పాహి విజ్ఞనుత యజ్ఞవరాహమూర్తే || ౨౧-౭ ||
యామ్యాం దిశం భజతి కిమ్పురుషాఖ్యవర్షే
సంసేవితో హనుమతా దృఢభక్తిభాజా |
సీతాభిరామపరమాద్భుతరూపశాలీ
రామాత్మకః పరిలసన్పరిపాహి విష్ణో || ౨౧-౮ ||
శ్రీనారదేన సహ భారతఖణ్డముఖ్యై-
స్త్వం సాఙ్ఖ్యయోగనుతిభిః సముపాస్యమానః |
ఆకల్పకాలమిహ సాధుజనాభిరక్షీ
నారాయణో నరసఖః పరిపాహి భూమన్ || ౨౧-౯ ||
ప్లాక్షేఽర్కరూపమయి శాల్మల ఇన్దురూపం
ద్వీపే భజన్తి కుశనామని వహ్నిరూపమ్ |
క్రౌఞ్చేఽంబురూపమథ వాయుమయం చ శాకే
త్వాం బ్రహ్మరూపమయి పుష్కరనామ్ని లోకాః || ౨౧-౧౦ ||
సర్వైర్ధ్రువాదిభిరుడుప్రకరైర్గ్రహైశ్చ
పుచ్ఛాదికేష్వవయవేష్వభికల్ప్యమానైః |
త్వం శింశుమారవపుషా మహతాముపాస్యః
సన్ధ్యాసు రున్ధి నరకం మమ సిన్ధుశాయిన్ || ౨౧-౧౧ ||
పాతాలమూలభువి శేషతనుం భవన్తం
లోలైకకుణ్డలవిరాజిసహస్రశీర్షమ్ |
నీలాంబరం ధృతహలం భుజగాఙ్గనాభి-
ర్జుష్టం భజే హర గదాన్గురుగేహనాథ || ౨౧-౧౨ ||
ఇతి ఏకవింశదశకం సమాప్తమ్ |
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
