Sri Durga Sahasranama stotram – ಶ್ರೀ ದುರ್ಗಾ ಸಹಸ್ರನಾಮ ಸ್ತೋತ್ರಂ

ಸ್ತೋತ್ರನಿಧಿ → ಶ್ರೀ ದುರ್ಗಾ ಸ್ತೋತ್ರಗಳು → ಶ್ರೀ ದುರ್ಗಾ ಸಹಸ್ರನಾಮ ಸ್ತೋತ್ರಂ

ನಾರದ ಉವಾಚ |
ಕುಮಾರ ಗುಣಗಂಭೀರ ದೇವಸೇನಾಪತೇ ಪ್ರಭೋ |
ಸರ್ವಾಭೀಷ್ಟಪ್ರದಂ ಪುಂಸಾಂ ಸರ್ವಪಾಪಪ್ರಣಾಶನಮ್ || ೧ ||

ಗುಹ್ಯಾದ್ಗುಹ್ಯತರಂ ಸ್ತೋತ್ರಂ ಭಕ್ತಿವರ್ಧಕಮಂಜಸಾ |
ಮಂಗಳಂ ಗ್ರಹಪೀಡಾದಿಶಾಂತಿದಂ ವಕ್ತುಮರ್ಹಸಿ || ೨ ||

ಸ್ಕಂದ ಉವಾಚ |
ಶೃಣು ನಾರದ ದೇವರ್ಷೇ ಲೋಕಾನುಗ್ರಹಕಾಮ್ಯಯಾ |
ಯತ್ಪೃಚ್ಛಸಿ ಪರಂ ಪುಣ್ಯಂ ತತ್ತೇ ವಕ್ಷ್ಯಾಮಿ ಕೌತುಕಾತ್ || ೩ ||

ಮಾತಾ ಮೇ ಲೋಕಜನನೀ ಹಿಮವನ್ನಗಸತ್ತಮಾತ್ |
ಮೇನಾಯಾಂ ಬ್ರಹ್ಮವಾದಿನ್ಯಾಂ ಪ್ರಾದುರ್ಭೂತಾ ಹರಪ್ರಿಯಾ || ೪ ||

ಮಹತಾ ತಪಸಾಽಽರಾಧ್ಯ ಶಂಕರಂ ಲೋಕಶಂಕರಮ್ |
ಸ್ವಮೇವ ವಲ್ಲಭಂ ಭೇಜೇ ಕಲೇವ ಹಿ ಕಲಾನಿಧಿಮ್ || ೫ ||

ನಗಾನಾಮಧಿರಾಜಸ್ತು ಹಿಮವಾನ್ ವಿರಹಾತುರಃ |
ಸ್ವಸುತಾಯಾಃ ಪರಿಕ್ಷೀಣೇ ವಸಿಷ್ಠೇನ ಪ್ರಬೋಧಿತಃ || ೬ ||

ತ್ರಿಲೋಕಜನನೀ ಸೇಯಂ ಪ್ರಸನ್ನಾ ತ್ವಯಿ ಪುಣ್ಯತಃ |
ಪ್ರಾದುರ್ಭೂತಾ ಸುತಾತ್ವೇನ ತದ್ವಿಯೋಗಂ ಶುಭಂ ತ್ಯಜ || ೭ ||

ಬಹುರೂಪಾ ಚ ದುರ್ಗೇಯಂ ಬಹುನಾಮ್ನೀ ಸನಾತನೀ |
ಸನಾತನಸ್ಯ ಜಾಯಾ ಸಾ ಪುತ್ರೀಮೋಹಂ ತ್ಯಜಾಧುನಾ || ೮ ||

ಇತಿ ಪ್ರಬೋಧಿತಃ ಶೈಲಃ ತಾಂ ತುಷ್ಟಾವ ಪರಾಂ ಶಿವಾಮ್ |
ತದಾ ಪ್ರಸನ್ನಾ ಸಾ ದುರ್ಗಾ ಪಿತರಂ ಪ್ರಾಹ ನಂದಿನೀ || ೯ ||

ಮತ್ಪ್ರಸಾದಾತ್ಪರಂ ಸ್ತೋತ್ರಂ ಹೃದಯೇ ಪ್ರತಿಭಾಸತಾಮ್ |
ತೇನ ನಾಮ್ನಾಂ ಸಹಸ್ರೇಣ ಪೂಜಯನ್ ಕಾಮಮಾಪ್ನುಹಿ || ೧೦ ||

ಇತ್ಯುಕ್ತ್ವಾಂತರ್ಹಿತಾಯಾಂ ತು ಹೃದಯೇ ಸ್ಫುರಿತಂ ತದಾ |
ನಾಮ್ನಾಂ ಸಹಸ್ರಂ ದುರ್ಗಾಯಾಃ ಪೃಚ್ಛತೇ ಮೇ ಯದುಕ್ತವಾನ್ || ೧೧ ||

ಮಂಗಳಾನಾಂ ಮಂಗಳಂ ತದ್ದುರ್ಗಾನಾಮಸಹಸ್ರಕಮ್ |
ಸರ್ವಾಭೀಷ್ಟಪ್ರದಂ ಪುಂಸಾಂ ಬ್ರವೀಮ್ಯಖಿಲಕಾಮದಮ್ || ೧೨ ||

ದುರ್ಗಾದೇವೀ ಸಮಾಖ್ಯಾತಾ ಹಿಮವಾನೃಷಿರುಚ್ಯತೇ |
ಛಂದೋಽನುಷ್ಟುಪ್ ಜಪೋ ದೇವ್ಯಾಃ ಪ್ರೀತಯೇ ಕ್ರಿಯತೇ ಸದಾ || ೧೩ ||

ಅಸ್ಯ ಶ್ರೀದುರ್ಗಾಸ್ತೋತ್ರಮಹಾಮಂತ್ರಸ್ಯ, ಹಿಮವಾನ್ ಋಷಿಃ, ಅನುಷ್ಟುಪ್ ಛಂದಃ, ದುರ್ಗಾ ಭಗವತೀ ದೇವತಾ, ಶ್ರೀದುರ್ಗಾ ಪ್ರಸಾದ ಸಿದ್ಧ್ಯರ್ಥೇ ಜಪೇ ವಿನಿಯೋಗಃ |

ಧ್ಯಾನಮ್ –
ಕಾಲಾಭ್ರಾಭಾಂ ಕಟಾಕ್ಷೈರರಿಕುಲಭಯದಾಂ ಮೌಲಿಬದ್ಧೇಂದುರೇಖಾಂ
ಶಂಖಂ ಚಕ್ರಂ ಕೃಪಾಣಂ ತ್ರಿಶಿಖಮಪಿ ಕರೈರುದ್ವಹಂತೀಂ ತ್ರಿನೇತ್ರಾಮ್ |
ಸಿಂಹಸ್ಕಂಧಾಧಿರೂಢಾಂ ತ್ರಿಭುವನಮಖಿಲಂ ತೇಜಸಾ ಪೂರಯಂತೀಂ
ಧ್ಯಾಯೇದ್ದುರ್ಗಾಂ ಜಯಾಖ್ಯಾಂ ತ್ರಿದಶಪರಿವೃತಾಂ ಸೇವಿತಾಂ ಸಿದ್ಧಿಕಾಮೈಃ ||

|| ಓಂ ಹ್ರೀಂ ||

ಅಥ ಸ್ತೋತ್ರಮ್ –
ಶಿವಾಽಥೋಮಾ ರಮಾ ಶಕ್ತಿರನಂತಾ ನಿಷ್ಕಲಾಽಮಲಾ |
ಶಾಂತಾ ಮಾಹೇಶ್ವರೀ ನಿತ್ಯಾ ಶಾಶ್ವತಾ ಪರಮಾ ಕ್ಷಮಾ || ೧ ||

ಅಚಿಂತ್ಯಾ ಕೇವಲಾಽನಂತಾ ಶಿವಾತ್ಮಾ ಪರಮಾತ್ಮಿಕಾ |
ಅನಾದಿರವ್ಯಯಾ ಶುದ್ಧಾ ಸರ್ವಜ್ಞಾ ಸರ್ವಗಾಽಚಲಾ || ೨ ||

ಏಕಾನೇಕವಿಭಾಗಸ್ಥಾ ಮಾಯಾತೀತಾ ಸುನಿರ್ಮಲಾ |
ಮಹಾಮಾಹೇಶ್ವರೀ ಸತ್ಯಾ ಮಹಾದೇವೀ ನಿರಂಜನಾ || ೩ ||

ಕಾಷ್ಠಾ ಸರ್ವಾಂತರಸ್ಥಾಽಪಿ ಚಿಚ್ಛಕ್ತಿಶ್ಚಾತ್ರಿಲಾಲಿತಾ |
ಸರ್ವಾ ಸರ್ವಾತ್ಮಿಕಾ ವಿಶ್ವಾ ಜ್ಯೋತೀರೂಪಾಽಕ್ಷರಾಽಮೃತಾ || ೪ ||

ಶಾಂತಾ ಪ್ರತಿಷ್ಠಾ ಸರ್ವೇಶಾ ನಿವೃತ್ತಿರಮೃತಪ್ರದಾ |
ವ್ಯೋಮಮೂರ್ತಿರ್ವ್ಯೋಮಸಂಸ್ಥಾ ವ್ಯೋಮಾಧಾರಾಽಚ್ಯುತಾಽತುಲಾ || ೫ ||

ಅನಾದಿನಿಧನಾಽಮೋಘಾ ಕಾರಣಾತ್ಮಕಲಾಕುಲಾ |
ಋತುಪ್ರಥಮಜಾಽನಾಭಿರಮೃತಾತ್ಮಸಮಾಶ್ರಯಾ || ೬ ||

ಪ್ರಾಣೇಶ್ವರಪ್ರಿಯಾ ನಮ್ಯಾ ಮಹಾಮಹಿಷಘಾತಿನೀ |
ಪ್ರಾಣೇಶ್ವರೀ ಪ್ರಾಣರೂಪಾ ಪ್ರಧಾನಪುರುಷೇಶ್ವರೀ || ೭ ||

ಸರ್ವಶಕ್ತಿಕಲಾಽಕಾಮಾ ಮಹಿಷೇಷ್ಟವಿನಾಶಿನೀ |
ಸರ್ವಕಾರ್ಯನಿಯಂತ್ರೀ ಚ ಸರ್ವಭೂತೇಶ್ವರೇಶ್ವರೀ || ೮ ||

ಅಂಗದಾದಿಧರಾ ಚೈವ ತಥಾ ಮುಕುಟಧಾರಿಣೀ |
ಸನಾತನೀ ಮಹಾನಂದಾಽಽಕಾಶಯೋನಿಸ್ತಥೋಚ್ಯತೇ || ೯ ||

ಚಿತ್ಪ್ರಕಾಶಸ್ವರೂಪಾ ಚ ಮಹಾಯೋಗೇಶ್ವರೇಶ್ವರೀ |
ಮಹಾಮಾಯಾ ಸುದುಷ್ಪಾರಾ ಮೂಲಪ್ರಕೃತಿರೀಶಿಕಾ || ೧೦ ||

ಸಂಸಾರಯೋನಿಃ ಸಕಲಾ ಸರ್ವಶಕ್ತಿಸಮುದ್ಭವಾ |
ಸಂಸಾರಪಾರಾ ದುರ್ವಾರಾ ದುರ್ನಿರೀಕ್ಷಾ ದುರಾಸದಾ || ೧೧ ||

ಪ್ರಾಣಶಕ್ತಿಶ್ಚ ಸೇವ್ಯಾ ಚ ಯೋಗಿನೀ ಪರಮಾ ಕಲಾ |
ಮಹಾವಿಭೂತಿರ್ದುರ್ದರ್ಶಾ ಮೂಲಪ್ರಕೃತಿಸಂಭವಾ || ೧೨ ||

ಅನಾದ್ಯನಂತವಿಭವಾ ಪರಾರ್ಥಾ ಪುರುಷಾರಣಿಃ |
ಸರ್ಗಸ್ಥಿತ್ಯಂತಕೃಚ್ಚೈವ ಸುದುರ್ವಾಚ್ಯಾ ದುರತ್ಯಯಾ || ೧೩ ||

ಶಬ್ದಗಮ್ಯಾ ಶಬ್ದಮಾಯಾ ಶಬ್ದಾಖ್ಯಾನಂದವಿಗ್ರಹಾ |
ಪ್ರಧಾನಪುರುಷಾತೀತಾ ಪ್ರಧಾನಪುರುಷಾತ್ಮಿಕಾ || ೧೪ ||

ಪುರಾಣೀ ಚಿನ್ಮಯಾ ಪುಂಸಾಮಿಷ್ಟದಾ ಪುಷ್ಟಿರೂಪಿಣೀ |
ಪೂತಾಂತರಸ್ಥಾ ಕೂಟಸ್ಥಾ ಮಹಾಪುರುಷಸಂಜ್ಞಿತಾ || ೧೫ ||

ಜನ್ಮಮೃತ್ಯುಜರಾತೀತಾ ಸರ್ವಶಕ್ತಿಸ್ವರೂಪಿಣೀ |
ವಾಂಛಾಪ್ರದಾಽನವಚ್ಛಿನ್ನಪ್ರಧಾನಾನುಪ್ರವೇಶಿನೀ || ೧೬ ||

ಕ್ಷೇತ್ರಜ್ಞಾಽಚಿಂತ್ಯಶಕ್ತಿಸ್ತು ಪ್ರೋಚ್ಯತೇಽವ್ಯಕ್ತಲಕ್ಷಣಾ |
ಮಲಾಪವರ್ಜಿತಾಽನಾದಿಮಾಯಾ ತ್ರಿತಯತತ್ತ್ವಿಕಾ || ೧೭ ||

ಪ್ರೀತಿಶ್ಚ ಪ್ರಕೃತಿಶ್ಚೈವ ಗುಹಾವಾಸಾ ತಥೋಚ್ಯತೇ |
ಮಹಾಮಾಯಾ ನಗೋತ್ಪನ್ನಾ ತಾಮಸೀ ಚ ಧ್ರುವಾ ತಥಾ || ೧೮ ||

ವ್ಯಕ್ತಾವ್ಯಕ್ತಾತ್ಮಿಕಾ ಕೃಷ್ಣಾ ರಕ್ತಾ ಶುಕ್ಲಾ ಹ್ಯಕಾರಣಾ |
ಪ್ರೋಚ್ಯತೇ ಕಾರ್ಯಜನನೀ ನಿತ್ಯಪ್ರಸವಧರ್ಮಿಣೀ || ೧೯ ||

ಸರ್ಗಪ್ರಲಯಮುಕ್ತಾ ಚ ಸೃಷ್ಟಿಸ್ಥಿತ್ಯಂತಧರ್ಮಿಣೀ |
ಬ್ರಹ್ಮಗರ್ಭಾ ಚತುರ್ವಿಂಶಸ್ವರೂಪಾ ಪದ್ಮವಾಸಿನೀ || ೨೦ ||

ಅಚ್ಯುತಾಹ್ಲಾದಿಕಾ ವಿದ್ಯುದ್ಬ್ರಹ್ಮಯೋನಿರ್ಮಹಾಲಯಾ |
ಮಹಾಲಕ್ಷ್ಮೀಃ ಸಮುದ್ಭಾವಭಾವಿತಾತ್ಮಾ ಮಹೇಶ್ವರೀ || ೨೧ ||

ಮಹಾವಿಮಾನಮಧ್ಯಸ್ಥಾ ಮಹಾನಿದ್ರಾ ಸಕೌತುಕಾ |
ಸರ್ವಾರ್ಥಧಾರಿಣೀ ಸೂಕ್ಷ್ಮಾ ಹ್ಯವಿದ್ಧಾ ಪರಮಾರ್ಥದಾ || ೨೨ ||

ಅನಂತರೂಪಾಽನಂತಾರ್ಥಾ ತಥಾ ಪುರುಷಮೋಹಿನೀ |
ಅನೇಕಾನೇಕಹಸ್ತಾ ಚ ಕಾಲತ್ರಯವಿವರ್ಜಿತಾ || ೨೩ ||

ಬ್ರಹ್ಮಜನ್ಮಾ ಹರಪ್ರೀತಾ ಮತಿರ್ಬ್ರಹ್ಮಶಿವಾತ್ಮಿಕಾ |
ಬ್ರಹ್ಮೇಶವಿಷ್ಣುಸಂಪೂಜ್ಯಾ ಬ್ರಹ್ಮಾಖ್ಯಾ ಬ್ರಹ್ಮಸಂಜ್ಞಿತಾ || ೨೪ ||

ವ್ಯಕ್ತಾ ಪ್ರಥಮಜಾ ಬ್ರಾಹ್ಮೀ ಮಹಾರಾತ್ರಿಃ ಪ್ರಕೀರ್ತಿತಾ |
ಜ್ಞಾನಸ್ವರೂಪಾ ವೈರಾಗ್ಯರೂಪಾ ಹ್ಯೈಶ್ವರ್ಯರೂಪಿಣೀ || ೨೫ ||

ಧರ್ಮಾತ್ಮಿಕಾ ಬ್ರಹ್ಮಮೂರ್ತಿಃ ಪ್ರತಿಶ್ರುತಪುಮರ್ಥಿಕಾ |
ಅಪಾಂಯೋನಿಃ ಸ್ವಯಂಭೂತಾ ಮಾನಸೀ ತತ್ತ್ವಸಂಭವಾ || ೨೬ ||

ಈಶ್ವರಸ್ಯ ಪ್ರಿಯಾ ಪ್ರೋಕ್ತಾ ಶಂಕರಾರ್ಧಶರೀರಿಣೀ |
ಭವಾನೀ ಚೈವ ರುದ್ರಾಣೀ ಮಹಾಲಕ್ಷ್ಮೀಸ್ತಥಾಽಂಬಿಕಾ || ೨೭ ||

ಮಹೇಶ್ವರಸಮುತ್ಪನ್ನಾ ಭುಕ್ತಿಮುಕ್ತಿಪ್ರದಾಯಿನೀ |
ಸರ್ವೇಶ್ವರೀ ಸರ್ವವಂದ್ಯಾ ನಿತ್ಯಮುಕ್ತಾ ಸುಮಾನಸಾ || ೨೮ ||

ಮಹೇಂದ್ರೋಪೇಂದ್ರನಮಿತಾ ಶಾಂಕರೀಶಾನುವರ್ತಿನೀ |
ಈಶ್ವರಾರ್ಧಾಸನಗತಾ ಮಹೇಶ್ವರಪತಿವ್ರತಾ || ೨೯ ||

ಸಂಸಾರಶೋಷಿಣೀ ಚೈವ ಪಾರ್ವತೀ ಹಿಮವತ್ಸುತಾ |
ಪರಮಾನಂದದಾತ್ರೀ ಚ ಗುಣಾಗ್ರ್ಯಾ ಯೋಗದಾ ತಥಾ || ೩೦ ||

ಜ್ಞಾನಮೂರ್ತಿಶ್ಚ ಸಾವಿತ್ರೀ ಲಕ್ಷ್ಮೀಃ ಶ್ರೀಃ ಕಮಲಾ ತಥಾ |
ಅನಂತಗುಣಗಂಭೀರಾ ಹ್ಯುರೋನೀಲಮಣಿಪ್ರಭಾ || ೩೧ ||

ಸರೋಜನಿಲಯಾ ಗಂಗಾ ಯೋಗಿಧ್ಯೇಯಾಽಸುರಾರ್ದಿನೀ |
ಸರಸ್ವತೀ ಸರ್ವವಿದ್ಯಾ ಜಗಜ್ಜ್ಯೇಷ್ಠಾ ಸುಮಂಗಳಾ || ೩೨ ||

ವಾಗ್ದೇವೀ ವರದಾ ವರ್ಯಾ ಕೀರ್ತಿಃ ಸರ್ವಾರ್ಥಸಾಧಿಕಾ |
ವಾಗೀಶ್ವರೀ ಬ್ರಹ್ಮವಿದ್ಯಾ ಮಹಾವಿದ್ಯಾ ಸುಶೋಭನಾ || ೩೩ ||

ಗ್ರಾಹ್ಯವಿದ್ಯಾ ವೇದವಿದ್ಯಾ ಧರ್ಮವಿದ್ಯಾಽಽತ್ಮಭಾವಿತಾ |
ಸ್ವಾಹಾ ವಿಶ್ವಂಭರಾ ಸಿದ್ಧಿಃ ಸಾಧ್ಯಾ ಮೇಧಾ ಧೃತಿಃ ಕೃತಿಃ || ೩೪ ||

ಸುನೀತಿಃ ಸಂಕೃತಿಶ್ಚೈವ ಕೀರ್ತಿತಾ ನರವಾಹಿನೀ |
ಪೂಜಾವಿಭಾವಿನೀ ಸೌಮ್ಯಾ ಭೋಗ್ಯಭಾಗ್ಭೋಗದಾಯಿನೀ || ೩೫ ||

ಶೋಭಾವತೀ ಶಾಂಕರೀ ಚ ಲೋಲಾ ಮಾಲಾವಿಭೂಷಿತಾ |
ಪರಮೇಷ್ಠಿಪ್ರಿಯಾ ಚೈವ ತ್ರಿಲೋಕಸುಂದರೀ ಮತಾ || ೩೬ ||

ನಂದಾ ಸಂಧ್ಯಾ ಕಾಮಧಾತ್ರೀ ಮಹಾದೇವೀ ಸುಸಾತ್ತ್ವಿಕಾ |
ಮಹಾಮಹಿಷದರ್ಪಘ್ನೀ ಪದ್ಮಮಾಲಾಽಘಹಾರಿಣೀ || ೩೭ ||

ವಿಚಿತ್ರಮುಕುಟಾ ರಾಮಾ ಕಾಮದಾತಾ ಪ್ರಕೀರ್ತಿತಾ |
ಪಿತಾಂಬರಧರಾ ದಿವ್ಯವಿಭೂಷಣವಿಭೂಷಿತಾ || ೩೮ ||

ದಿವ್ಯಾಖ್ಯಾ ಸೋಮವದನಾ ಜಗತ್ಸಂಸೃಷ್ಟಿವರ್ಜಿತಾ |
ನಿರ್ಯಂತ್ರಾ ಯಂತ್ರವಾಹಸ್ಥಾ ನಂದಿನೀ ರುದ್ರಕಾಲಿಕಾ || ೩೯ ||

ಆದಿತ್ಯವರ್ಣಾ ಕೌಮಾರೀ ಮಯೂರವರವಾಹಿನೀ |
ಪದ್ಮಾಸನಗತಾ ಗೌರೀ ಮಹಾಕಾಲೀ ಸುರಾರ್ಚಿತಾ || ೪೦ ||

ಅದಿತಿರ್ನಿಯತಾ ರೌದ್ರೀ ಪದ್ಮಗರ್ಭಾ ವಿವಾಹನಾ |
ವಿರೂಪಾಕ್ಷಾ ಕೇಶಿವಾಹಾ ಗುಹಾಪುರನಿವಾಸಿನೀ || ೪೧ ||

ಮಹಾಫಲಾಽನವದ್ಯಾಂಗೀ ಕಾಮರೂಪಾ ಸರಿದ್ವರಾ |
ಭಾಸ್ವದ್ರೂಪಾ ಮುಕ್ತಿದಾತ್ರೀ ಪ್ರಣತಕ್ಲೇಶಭಂಜನಾ || ೪೨ ||

ಕೌಶಿಕೀ ಗೋಮಿನೀ ರಾತ್ರಿಸ್ತ್ರಿದಶಾರಿವಿನಾಶಿನೀ |
ಬಹುರೂಪಾ ಸುರೂಪಾ ಚ ವಿರೂಪಾ ರೂಪವರ್ಜಿತಾ || ೪೩ ||

ಭಕ್ತಾರ್ತಿಶಮನಾ ಭವ್ಯಾ ಭವಭಾವವಿನಾಶಿನೀ |
ಸರ್ವಜ್ಞಾನಪರೀತಾಂಗೀ ಸರ್ವಾಸುರವಿಮರ್ದಿಕಾ || ೪೪ ||

ಪಿಕಸ್ವನೀ ಸಾಮಗೀತಾ ಭವಾಂಕನಿಲಯಾ ಪ್ರಿಯಾ |
ದೀಕ್ಷಾ ವಿದ್ಯಾಧರೀ ದೀಪ್ತಾ ಮಹೇಂದ್ರಾಹಿತಪಾತಿನೀ || ೪೫ ||

ಸರ್ವದೇವಮಯಾ ದಕ್ಷಾ ಸಮುದ್ರಾಂತರವಾಸಿನೀ |
ಅಕಲಂಕಾ ನಿರಾಧಾರಾ ನಿತ್ಯಸಿದ್ಧಾ ನಿರಾಮಯಾ || ೪೬ ||

ಕಾಮಧೇನುರ್ಬೃಹದ್ಗರ್ಭಾ ಧೀಮತೀ ಮೌನನಾಶಿನೀ |
ನಿಃಸಂಕಲ್ಪಾ ನಿರಾತಂಕಾ ವಿನಯಾ ವಿನಯಪ್ರದಾ || ೪೭ ||

ಜ್ವಾಲಾಮಾಲಾ ಸಹಸ್ರಾಢ್ಯಾ ದೇವದೇವೀ ಮನೋಮಯಾ |
ಸುಭಗಾ ಸುವಿಶುದ್ಧಾ ಚ ವಸುದೇವಸಮುದ್ಭವಾ || ೪೮ ||

ಮಹೇಂದ್ರೋಪೇಂದ್ರಭಗಿನೀ ಭಕ್ತಿಗಮ್ಯಾ ಪರಾವರಾ |
ಜ್ಞಾನಜ್ಞೇಯಾ ಪರಾತೀತಾ ವೇದಾಂತವಿಷಯಾ ಮತಿಃ || ೪೯ ||

ದಕ್ಷಿಣಾ ದಾಹಿಕಾ ದಹ್ಯಾ ಸರ್ವಭೂತಹೃದಿಸ್ಥಿತಾ |
ಯೋಗಮಾಯಾ ವಿಭಾಗಜ್ಞಾ ಮಹಾಮೋಹಾ ಗರೀಯಸೀ || ೫೦ ||

ಸಂಧ್ಯಾ ಸರ್ವಸಮುದ್ಭೂತಾ ಬ್ರಹ್ಮವೃಕ್ಷಾಶ್ರಯಾಽದಿತಿಃ |
ಬೀಜಾಂಕುರಸಮುದ್ಭೂತಾ ಮಹಾಶಕ್ತಿರ್ಮಹಾಮತಿಃ || ೫೧ ||

ಖ್ಯಾತಿಃ ಪ್ರಜ್ಞಾವತೀ ಸಂಜ್ಞಾ ಮಹಾಭೋಗೀಂದ್ರಶಾಯಿನೀ |
ಹೀಂಕೃತಿಃ ಶಂಕರೀ ಶಾಂತಿರ್ಗಂಧರ್ವಗಣಸೇವಿತಾ || ೫೨ ||

ವೈಶ್ವಾನರೀ ಮಹಾಶೂಲಾ ದೇವಸೇನಾ ಭವಪ್ರಿಯಾ |
ಮಹಾರಾತ್ರೀ ಪರಾನಂದಾ ಶಚೀ ದುಃಸ್ವಪ್ನನಾಶಿನೀ || ೫೩ ||

ಈಡ್ಯಾ ಜಯಾ ಜಗದ್ಧಾತ್ರೀ ದುರ್ವಿಜ್ಞೇಯಾ ಸುರೂಪಿಣೀ |
ಗುಹಾಂಬಿಕಾ ಗಣೋತ್ಪನ್ನಾ ಮಹಾಪೀಠಾ ಮರುತ್ಸುತಾ || ೫೪ ||

ಹವ್ಯವಾಹಾ ಭವಾನಂದಾ ಜಗದ್ಯೋನಿಃ ಪ್ರಕೀರ್ತಿತಾ |
ಜಗನ್ಮಾತಾ ಜಗನ್ಮೃತ್ಯುರ್ಜರಾತೀತಾ ಚ ಬುದ್ಧಿದಾ || ೫೫ ||

ಸಿದ್ಧಿದಾತ್ರೀ ರತ್ನಗರ್ಭಾ ರತ್ನಗರ್ಭಾಶ್ರಯಾ ಪರಾ |
ದೈತ್ಯಹಂತ್ರೀ ಸ್ವೇಷ್ಟದಾತ್ರೀ ಮಂಗಳೈಕಸುವಿಗ್ರಹಾ || ೫೬ ||

ಪುರುಷಾಂತರ್ಗತಾ ಚೈವ ಸಮಾಧಿಸ್ಥಾ ತಪಸ್ವಿನೀ |
ದಿವಿಸ್ಥಿತಾ ತ್ರಿಣೇತ್ರಾ ಚ ಸರ್ವೇಂದ್ರಿಯಮನೋಧೃತಿಃ || ೫೭ ||

ಸರ್ವಭೂತಹೃದಿಸ್ಥಾ ಚ ತಥಾ ಸಂಸಾರತಾರಿಣೀ |
ವೇದ್ಯಾ ಬ್ರಹ್ಮ ವಿವೇದ್ಯಾ ಚ ಮಹಾಲೀಲಾ ಪ್ರಕೀರ್ತಿತಾ || ೫೮ ||

ಬ್ರಾಹ್ಮಣಿ ಬೃಹತೀ ಬ್ರಾಹ್ಮೀ ಬ್ರಹ್ಮಭೂತಾಽಘಹಾರಿಣೀ |
ಹಿರಣ್ಮಯೀ ಮಹಾದಾತ್ರೀ ಸಂಸಾರಪರಿವರ್ತಿಕಾ || ೫೯ ||

ಸುಮಾಲಿನೀ ಸುರೂಪಾ ಚ ಭಾಸ್ವಿನೀ ಧಾರಿಣೀ ತಥಾ |
ಉನ್ಮೂಲಿನೀ ಸರ್ವಸಮಾ ಸರ್ವಪ್ರತ್ಯಯಸಾಕ್ಷಿಣೀ || ೬೦ ||

ಸುಸೌಮ್ಯಾ ಚಂದ್ರವದನಾ ತಾಂಡವಾಸಕ್ತಮಾನಸಾ |
ಸತ್ತ್ವಶುದ್ಧಿಕರೀ ಶುದ್ಧಾ ಮಲತ್ರಯವಿನಾಶಿನೀ || ೬೧ ||

ಜಗತ್ತ್ರಯೀ ಜಗನ್ಮೂರ್ತಿಸ್ತ್ರಿಮೂರ್ತಿರಮೃತಾಶ್ರಯಾ |
ವಿಮಾನಸ್ಥಾ ವಿಶೋಕಾ ಚ ಶೋಕನಾಶಿನ್ಯನಾಹತಾ || ೬೨ ||

ಹೇಮಕುಂಡಲಿನೀ ಕಾಲೀ ಪದ್ಮವಾಸಾ ಸನಾತನೀ |
ಸದಾಕೀರ್ತಿಃ ಸರ್ವಭೂತಶಯಾ ದೇವೀ ಸತಾಂ ಪ್ರಿಯಾ || ೬೩ ||

ಬ್ರಹ್ಮಮೂರ್ತಿಕಲಾ ಚೈವ ಕೃತ್ತಿಕಾ ಕಂಜಮಾಲಿನೀ |
ವ್ಯೋಮಕೇಶಾ ಕ್ರಿಯಾಶಕ್ತಿರಿಚ್ಛಾಶಕ್ತಿಃ ಪರಾ ಗತಿಃ || ೬೪ ||

ಕ್ಷೋಭಿಕಾ ಖಂಡಿಕಾಭೇದ್ಯಾ ಭೇದಾಭೇದವಿವರ್ಜಿತಾ |
ಅಭಿನ್ನಾ ಭಿನ್ನಸಂಸ್ಥಾನಾ ವಶಿನೀ ವಂಶಧಾರಿಣೀ || ೬೫ ||

ಗುಹ್ಯಶಕ್ತಿರ್ಗುಹ್ಯತತ್ತ್ವಾ ಸರ್ವದಾ ಸರ್ವತೋಮುಖೀ |
ಭಗಿನೀ ಚ ನಿರಾಧಾರಾ ನಿರಾಹಾರಾ ಪ್ರಕೀರ್ತಿತಾ || ೬೬ ||

ನಿರಂಕುಶಪದೋದ್ಭೂತಾ ಚಕ್ರಹಸ್ತಾ ವಿಶೋಧಿಕಾ |
ಸ್ರಗ್ವಿಣೀ ಪದ್ಮಸಂಭೇದಕಾರಿಣೀ ಪರಿಕೀರ್ತಿತಾ || ೬೭ ||

ಪರಾವರವಿಧಾನಜ್ಞಾ ಮಹಾಪುರುಷಪೂರ್ವಜಾ |
ಪರಾವರಜ್ಞಾ ವಿದ್ಯಾ ಚ ವಿದ್ಯುಜ್ಜಿಹ್ವಾ ಜಿತಾಶ್ರಯಾ || ೬೮ ||

ವಿದ್ಯಾಮಯೀ ಸಹಸ್ರಾಕ್ಷೀ ಸಹಸ್ರವದನಾತ್ಮಜಾ |
ಸಹಸ್ರರಶ್ಮಿಃ ಸತ್ವಸ್ಥಾ ಮಹೇಶ್ವರಪದಾಶ್ರಯಾ || ೬೯ ||

ಜ್ವಾಲಿನೀ ಸನ್ಮಯಾ ವ್ಯಾಪ್ತಾ ಚಿನ್ಮಯಾ ಪದ್ಮಭೇದಿಕಾ |
ಮಹಾಶ್ರಯಾ ಮಹಾಮಂತ್ರಾ ಮಹಾದೇವಮನೋರಮಾ || ೭೦ ||

ವ್ಯೋಮಲಕ್ಷ್ಮೀಃ ಸಿಂಹರಥಾ ಚೇಕಿತಾನಾಽಮಿತಪ್ರಭಾ |
ವಿಶ್ವೇಶ್ವರೀ ಭಗವತೀ ಸಕಲಾ ಕಾಲಹಾರಿಣೀ || ೭೧ ||

ಸರ್ವವೇದ್ಯಾ ಸರ್ವಭದ್ರಾ ಗುಹ್ಯಾ ಗೂಢಾ ಗುಹಾರಣೀ |
ಪ್ರಲಯಾ ಯೋಗಧಾತ್ರೀ ಚ ಗಂಗಾ ವಿಶ್ವೇಶ್ವರೀ ತಥಾ || ೭೨ ||

ಕಾಮದಾ ಕನಕಾ ಕಾಂತಾ ಕಂಜಗರ್ಭಪ್ರಭಾ ತಥಾ |
ಪುಣ್ಯದಾ ಕಾಲಕೇಶಾ ಚ ಭೋಕ್ತ್ರೀ ಪುಷ್ಕರಿಣೀ ತಥಾ || ೭೩ ||

ಸುರೇಶ್ವರೀ ಭೂತಿದಾತ್ರೀ ಭೂತಿಭೂಷಾ ಪ್ರಕೀರ್ತಿತಾ |
ಪಂಚಬ್ರಹ್ಮಸಮುತ್ಪನ್ನಾ ಪರಮಾರ್ಥಾಽರ್ಥವಿಗ್ರಹಾ || ೭೪ ||

ವರ್ಣೋದಯಾ ಭಾನುಮೂರ್ತಿರ್ವಾಗ್ವಿಜ್ಞೇಯಾ ಮನೋಜವಾ |
ಮನೋಹರಾ ಮಹೋರಸ್ಕಾ ತಾಮಸೀ ವೇದರೂಪಿಣೀ || ೭೫ ||

ವೇದಶಕ್ತಿರ್ವೇದಮಾತಾ ವೇದವಿದ್ಯಾಪ್ರಕಾಶಿನೀ |
ಯೋಗೇಶ್ವರೇಶ್ವರೀ ಮಾಯಾ ಮಹಾಶಕ್ತಿರ್ಮಹಾಮಯೀ || ೭೬ ||

ವಿಶ್ವಾಂತಃಸ್ಥಾ ವಿಯನ್ಮೂರ್ತಿರ್ಭಾರ್ಗವೀ ಸುರಸುಂದರೀ |
ಸುರಭಿರ್ನಂದಿನೀ ವಿದ್ಯಾ ನಂದಗೋಪತನೂದ್ಭವಾ || ೭೭ ||

ಭಾರತೀ ಪರಮಾನಂದಾ ಪರಾವರವಿಭೇದಿಕಾ |
ಸರ್ವಪ್ರಹರಣೋಪೇತಾ ಕಾಮ್ಯಾ ಕಾಮೇಶ್ವರೇಶ್ವರೀ || ೭೮ ||

ಅನಂತಾನಂದವಿಭವಾ ಹೃಲ್ಲೇಖಾ ಕನಕಪ್ರಭಾ |
ಕೂಷ್ಮಾಂಡಾ ಧನರತ್ನಾಢ್ಯಾ ಸುಗಂಧಾ ಗಂಧದಾಯಿನೀ || ೭೯ ||

ತ್ರಿವಿಕ್ರಮಪದೋದ್ಭೂತಾ ಚತುರಾಸ್ಯಾ ಶಿವೋದಯಾ |
ಸುದುರ್ಲಭಾ ಧನಾಧ್ಯಕ್ಷಾ ಧನ್ಯಾ ಪಿಂಗಲಲೋಚನಾ || ೮೦ ||

ಶಾಂತಾ ಪ್ರಭಾಸ್ವರೂಪಾ ಚ ಪಂಕಜಾಯತಲೋಚನಾ |
ಇಂದ್ರಾಕ್ಷೀ ಹೃದಯಾಂತಃಸ್ಥಾ ಶಿವಾ ಮಾತಾ ಚ ಸತ್ಕ್ರಿಯಾ || ೮೧ ||

ಗಿರಿಜಾ ಚ ಸುಗೂಢಾ ಚ ನಿತ್ಯಪುಷ್ಟಾ ನಿರಂತರಾ |
ದುರ್ಗಾ ಕಾತ್ಯಾಯನೀ ಚಂಡೀ ಚಂದ್ರಿಕಾ ಕಾಂತವಿಗ್ರಹಾ || ೮೨ ||

ಹಿರಣ್ಯವರ್ಣಾ ಜಗತೀ ಜಗದ್ಯಂತ್ರಪ್ರವರ್ತಿಕಾ |
ಮಂದರಾದ್ರಿನಿವಾಸಾ ಚ ಶಾರದಾ ಸ್ವರ್ಣಮಾಲಿನೀ || ೮೩ ||

ರತ್ನಮಾಲಾ ರತ್ನಗರ್ಭಾ ವ್ಯುಷ್ಟಿರ್ವಿಶ್ವಪ್ರಮಾಥಿನೀ |
ಪದ್ಮಾನಂದಾ ಪದ್ಮನಿಭಾ ನಿತ್ಯಪುಷ್ಟಾ ಕೃತೋದ್ಭವಾ || ೮೪ ||

ನಾರಾಯಣೀ ದುಷ್ಟಶಿಕ್ಷಾ ಸೂರ್ಯಮಾತಾ ವೃಷಪ್ರಿಯಾ |
ಮಹೇಂದ್ರಭಗಿನೀ ಸತ್ಯಾ ಸತ್ಯಭಾಷಾ ಸುಕೋಮಲಾ || ೮೫ ||

ವಾಮಾ ಚ ಪಂಚತಪಸಾಂ ವರದಾತ್ರೀ ಪ್ರಕೀರ್ತಿತಾ |
ವಾಚ್ಯವರ್ಣೇಶ್ವರೀ ವಿದ್ಯಾ ದುರ್ಜಯಾ ದುರತಿಕ್ರಮಾ || ೮೬ ||

ಕಾಲರಾತ್ರಿರ್ಮಹಾವೇಗಾ ವೀರಭದ್ರಪ್ರಿಯಾ ಹಿತಾ |
ಭದ್ರಕಾಲೀ ಜಗನ್ಮಾತಾ ಭಕ್ತಾನಾಂ ಭದ್ರದಾಯಿನೀ || ೮೭ ||

ಕರಾಲಾ ಪಿಂಗಲಾಕಾರಾ ಕಾಮಭೇತ್ತ್ರೀ ಮಹಾಮನಾಃ |
ಯಶಸ್ವಿನೀ ಯಶೋದಾ ಚ ಷಡಧ್ವಪರಿವರ್ತಿಕಾ || ೮೮ ||

ಶಂಖಿನೀ ಪದ್ಮಿನೀ ಸಂಖ್ಯಾ ಸಾಂಖ್ಯಯೋಗಪ್ರವರ್ತಿಕಾ |
ಚೈತ್ರಾದಿರ್ವತ್ಸರಾರೂಢಾ ಜಗತ್ಸಂಪೂರಣೀಂದ್ರಜಾ || ೮೯ ||

ಶುಂಭಘ್ನೀ ಖೇಚರಾರಾಧ್ಯಾ ಕಂಬುಗ್ರೀವಾ ಬಲೀಡಿತಾ |
ಖಗಾರೂಢಾ ಮಹೈಶ್ವರ್ಯಾ ಸುಪದ್ಮನಿಲಯಾ ತಥಾ || ೯೦ ||

ವಿರಕ್ತಾ ಗರುಡಸ್ಥಾ ಚ ಜಗತೀಹೃದ್ಗುಹಾಶ್ರಯಾ |
ಶುಂಭಾದಿಮಥನಾ ಭಕ್ತಹೃದ್ಗಹ್ವರನಿವಾಸಿನೀ || ೯೧ ||

ಜಗತ್ತ್ರಯಾರಣೀ ಸಿದ್ಧಸಂಕಲ್ಪಾ ಕಾಮದಾ ತಥಾ |
ಸರ್ವವಿಜ್ಞಾನದಾತ್ರೀ ಚಾನಲ್ಪಕಲ್ಮಷಹಾರಿಣೀ || ೯೨ ||

ಸಕಲೋಪನಿಷದ್ಗಮ್ಯಾ ದುಷ್ಟದುಷ್ಪ್ರೇಕ್ಷ್ಯಸತ್ತಮಾ |
ಸದ್ವೃತಾ ಲೋಕಸಂವ್ಯಾಪ್ತಾ ತುಷ್ಟಿಃ ಪುಷ್ಟಿಃ ಕ್ರಿಯಾವತೀ || ೯೩ ||

ವಿಶ್ವಾಮರೇಶ್ವರೀ ಚೈವ ಭುಕ್ತಿಮುಕ್ತಿಪ್ರದಾಯಿನೀ |
ಶಿವಾ ಧೃತಾ ಲೋಹಿತಾಕ್ಷೀ ಸರ್ಪಮಾಲಾವಿಭೂಷಣಾ || ೯೪ ||

ನಿರಾನಂದಾ ತ್ರಿಶೂಲಾಸಿಧನುರ್ಬಾಣಾದಿಧಾರಿಣೀ |
ಅಶೇಷಧ್ಯೇಯಮೂರ್ತಿಶ್ಚ ದೇವತಾನಾಂ ಚ ದೇವತಾ || ೯೫ ||

ವರಾಂಬಿಕಾ ಗಿರೇಃ ಪುತ್ರೀ ನಿಶುಂಭವಿನಿಪಾತಿನೀ |
ಸುವರ್ಣಾ ಸ್ವರ್ಣಲಸಿತಾಽನಂತವರ್ಣಾ ಸದಾಧೃತಾ || ೯೬ ||

ಶಾಂಕರೀ ಶಾಂತಹೃದಯಾ ಅಹೋರಾತ್ರವಿಧಾಯಿಕಾ |
ವಿಶ್ವಗೋಪ್ತ್ರೀ ಗೂಢರೂಪಾ ಗುಣಪೂರ್ಣಾ ಚ ಗಾರ್ಗ್ಯಜಾ || ೯೭ ||

ಗೌರೀ ಶಾಕಂಭರೀ ಸತ್ಯಸಂಧಾ ಸಂಧ್ಯಾತ್ರಯೀಧೃತಾ |
ಸರ್ವಪಾಪವಿನಿರ್ಮುಕ್ತಾ ಸರ್ವಬಂಧವಿವರ್ಜಿತಾ || ೯೮ ||

ಸಾಂಖ್ಯಯೋಗಸಮಾಖ್ಯಾತಾ ಅಪ್ರಮೇಯಾ ಮುನೀಡಿತಾ |
ವಿಶುದ್ಧಸುಕುಲೋದ್ಭೂತಾ ಬಿಂದುನಾದಸಮಾದೃತಾ || ೯೯ ||

ಶಂಭುವಾಮಾಂಕಗಾ ಚೈವ ಶಶಿತುಲ್ಯನಿಭಾನನಾ |
ವನಮಾಲಾವಿರಾಜಂತೀ ಅನಂತಶಯನಾದೃತಾ || ೧೦೦ ||

ನರನಾರಾಯಣೋದ್ಭೂತಾ ನಾರಸಿಂಹೀ ಪ್ರಕೀರ್ತಿತಾ |
ದೈತ್ಯಪ್ರಮಾಥಿನೀ ಶಂಖಚಕ್ರಪದ್ಮಗದಾಧರಾ || ೧೦೧ ||

ಸಂಕರ್ಷಣಸಮುತ್ಪನ್ನಾ ಅಂಬಿಕಾ ಸಜ್ಜನಾಶ್ರಯಾ |
ಸುವೃತಾ ಸುಂದರೀ ಚೈವ ಧರ್ಮಕಾಮಾರ್ಥದಾಯಿನೀ || ೧೦೨ ||

ಮೋಕ್ಷದಾ ಭಕ್ತಿನಿಲಯಾ ಪುರಾಣಪುರುಷಾದೃತಾ |
ಮಹಾವಿಭೂತಿದಾಽಽರಾಧ್ಯಾ ಸರೋಜನಿಲಯಾಽಸಮಾ || ೧೦೩ ||

ಅಷ್ಟಾದಶಭುಜಾಽನಾದಿರ್ನೀಲೋತ್ಪಲದಲಾಕ್ಷಿಣೀ |
ಸರ್ವಶಕ್ತಿಸಮಾರೂಢಾ ಧರ್ಮಾಧರ್ಮವಿವರ್ಜಿತಾ || ೧೦೪ ||

ವೈರಾಗ್ಯಜ್ಞಾನನಿರತಾ ನಿರಾಲೋಕಾ ನಿರಿಂದ್ರಿಯಾ |
ವಿಚಿತ್ರಗಹನಾಧಾರಾ ಶಾಶ್ವತಸ್ಥಾನವಾಸಿನೀ || ೧೦೫ ||

ಜ್ಞಾನೇಶ್ವರೀ ಪೀತಚೇಲಾ ವೇದವೇದಾಂಗಪಾರಗಾ |
ಮನಸ್ವಿನೀ ಮನ್ಯುಮಾತಾ ಮಹಾಮನ್ಯುಸಮುದ್ಭವಾ || ೧೦೬ ||

ಅಮನ್ಯುರಮೃತಾಸ್ವಾದಾ ಪುರಂದರಪರಿಷ್ಟುತಾ |
ಅಶೋಚ್ಯಾ ಭಿನ್ನವಿಷಯಾ ಹಿರಣ್ಯರಜತಪ್ರಿಯಾ || ೧೦೭ ||

ಹಿರಣ್ಯಜನನೀ ಭೀಮಾ ಹೇಮಾಭರಣಭೂಷಿತಾ |
ವಿಭ್ರಾಜಮಾನಾ ದುರ್ಜ್ಞೇಯಾ ಜ್ಯೋತಿಷ್ಟೋಮಫಲಪ್ರದಾ || ೧೦೮ ||

ಮಹಾನಿದ್ರಾಸಮುತ್ಪತ್ತಿರನಿದ್ರಾ ಸತ್ಯದೇವತಾ |
ದೀರ್ಘಾ ಕಕುದ್ಮಿನೀ ಪಿಂಗಜಟಾಧಾರಾ ಮನೋಜ್ಞಧೀಃ || ೧೦೯ ||

ಮಹಾಶ್ರಯಾ ರಮೋತ್ಪನ್ನಾ ತಮಃಪಾರೇ ಪ್ರತಿಷ್ಠಿತಾ |
ತ್ರಿತತ್ತ್ವಮಾತಾ ತ್ರಿವಿಧಾ ಸುಸೂಕ್ಷ್ಮಾ ಪದ್ಮಸಂಶ್ರಯಾ || ೧೧೦ ||

ಶಾಂತ್ಯತೀತಕಲಾಽತೀತವಿಕಾರಾ ಶ್ವೇತಚೇಲಿಕಾ |
ಚಿತ್ರಮಾಯಾ ಶಿವಜ್ಞಾನಸ್ವರೂಪಾ ದೈತ್ಯಮಾಥಿನೀ || ೧೧೧ ||

ಕಾಶ್ಯಪೀ ಕಾಲಸರ್ಪಾಭವೇಣಿಕಾ ಶಾಸ್ತ್ರಯೋನಿಕಾ |
ತ್ರಯೀಮೂರ್ತಿಃ ಕ್ರಿಯಾಮೂರ್ತಿಶ್ಚತುರ್ವರ್ಗಾ ಚ ದರ್ಶಿನೀ || ೧೧೨ ||

ನಾರಾಯಣೀ ನರೋತ್ಪನ್ನಾ ಕೌಮುದೀ ಕಾಂತಿಧಾರಿಣೀ |
ಕೌಶಿಕೀ ಲಲಿತಾ ಲೀಲಾ ಪರಾವರವಿಭಾವಿನೀ || ೧೧೩ ||

ವರೇಣ್ಯಾಽದ್ಭುತಮಾಹಾತ್ಮ್ಯಾ ವಡವಾ ವಾಮಲೋಚನಾ |
ಸುಭದ್ರಾ ಚೇತನಾರಾಧ್ಯಾ ಶಾಂತಿದಾ ಶಾಂತಿವರ್ಧಿನೀ || ೧೧೪ ||

ಜಯಾದಿಶಕ್ತಿಜನನೀ ಶಕ್ತಿಚಕ್ರಪ್ರವರ್ತಿಕಾ |
ತ್ರಿಶಕ್ತಿಜನನೀ ಜನ್ಯಾ ಷಟ್ಸೂತ್ರಪರಿವರ್ಣಿತಾ || ೧೧೫ ||

ಸುಧೌತಕರ್ಮಣಾಽಽರಾಧ್ಯಾ ಯುಗಾಂತದಹನಾತ್ಮಿಕಾ |
ಸಂಕರ್ಷಿಣೀ ಜಗದ್ಧಾತ್ರೀ ಕಾಮಯೋನಿಃ ಕಿರೀಟಿನೀ || ೧೧೬ ||

ಐಂದ್ರೀ ತ್ರೈಲೋಕ್ಯನಮಿತಾ ವೈಷ್ಣವೀ ಪರಮೇಶ್ವರೀ |
ಪ್ರದ್ಯುಮ್ನಜನನೀ ಬಿಂಬಸಮೋಷ್ಠೀ ಪದ್ಮಲೋಚನಾ || ೧೧೭ ||

ಮದೋತ್ಕಟಾ ಹಂಸಗತಿಃ ಪ್ರಚಂಡಾ ಚಂಡವಿಕ್ರಮಾ |
ವೃಷಾಧೀಶಾ ಪರಾತ್ಮಾ ಚ ವಿಂಧ್ಯಪರ್ವತವಾಸಿನೀ || ೧೧೮ ||

ಹಿಮವನ್ಮೇರುನಿಲಯಾ ಕೈಲಾಸಪುರವಾಸಿನೀ |
ಚಾಣೂರಹಂತ್ರೀ ನೀತಿಜ್ಞಾ ಕಾಮರೂಪಾ ತ್ರಯೀತನುಃ || ೧೧೯ ||

ವ್ರತಸ್ನಾತಾ ಧರ್ಮಶೀಲಾ ಸಿಂಹಾಸನನಿವಾಸಿನೀ |
ವೀರಭದ್ರಾದೃತಾ ವೀರಾ ಮಹಾಕಾಲಸಮುದ್ಭವಾ || ೧೨೦ ||

ವಿದ್ಯಾಧರಾರ್ಚಿತಾ ಸಿದ್ಧಸಾಧ್ಯಾರಾಧಿತಪಾದುಕಾ |
ಶ್ರದ್ಧಾತ್ಮಿಕಾ ಪಾವನೀ ಚ ಮೋಹಿನೀ ಅಚಲಾತ್ಮಿಕಾ || ೧೨೧ ||

ಮಹಾದ್ಭುತಾ ವಾರಿಜಾಕ್ಷೀ ಸಿಂಹವಾಹನಗಾಮಿನೀ |
ಮನೀಷಿಣೀ ಸುಧಾವಾಣೀ ವೀಣಾವಾದನತತ್ಪರಾ || ೧೨೨ ||

ಶ್ವೇತವಾಹನಿಷೇವ್ಯಾ ಚ ಲಸನ್ಮತಿರರುಂಧತೀ |
ಹಿರಣ್ಯಾಕ್ಷೀ ತಥಾ ಚೈವ ಮಹಾನಂದಪ್ರದಾಯಿನೀ || ೧೨೩ ||

ವಸುಪ್ರಭಾ ಸುಮಾಲ್ಯಾಪ್ತಕಂಧರಾ ಪಂಕಜಾನನಾ |
ಪರಾವರಾ ವರಾರೋಹಾ ಸಹಸ್ರನಯನಾರ್ಚಿತಾ || ೧೨೪ ||

ಶ್ರೀರೂಪಾ ಶ್ರೀಮತೀ ಶ್ರೇಷ್ಠಾ ಶಿವನಾಮ್ನೀ ಶಿವಪ್ರಿಯಾ |
ಶ್ರೀಪ್ರದಾ ಶ್ರಿತಕಲ್ಯಾಣಾ ಶ್ರೀಧರಾರ್ಧಶರೀರಿಣೀ || ೧೨೫ ||

ಶ್ರೀಕಲಾಽನಂತದೃಷ್ಟಿಶ್ಚ ಹ್ಯಕ್ಷುದ್ರಾಽಽರಾತಿಸೂದನೀ |
ರಕ್ತಬೀಜನಿಹಂತ್ರೀ ಚ ದೈತ್ಯಸಂಘವಿಮರ್ದಿನೀ || ೧೨೬ ||

ಸಿಂಹಾರೂಢಾ ಸಿಂಹಿಕಾಸ್ಯಾ ದೈತ್ಯಶೋಣಿತಪಾಯಿನೀ |
ಸುಕೀರ್ತಿಸಹಿತಾ ಛಿನ್ನಸಂಶಯಾ ರಸವೇದಿನೀ || ೧೨೭ ||

ಗುಣಾಭಿರಾಮಾ ನಾಗಾರಿವಾಹನಾ ನಿರ್ಜರಾರ್ಚಿತಾ |
ನಿತ್ಯೋದಿತಾ ಸ್ವಯಂಜ್ಯೋತಿಃ ಸ್ವರ್ಣಕಾಯಾ ಪ್ರಕೀರ್ತಿತಾ || ೧೨೮ ||

ವಜ್ರದಂಡಾಂಕಿತಾ ಚೈವ ತಥಾಽಮೃತಸಂಜೀವಿನೀ |
ವಜ್ರಚ್ಛನ್ನಾ ದೇವದೇವೀ ವರವಜ್ರಸ್ವವಿಗ್ರಹಾ || ೧೨೯ ||

ಮಾಂಗಳ್ಯಾ ಮಂಗಳಾತ್ಮಾ ಚ ಮಾಲಿನೀ ಮಾಲ್ಯಧಾರಿಣೀ |
ಗಂಧರ್ವೀ ತರುಣೀ ಚಾಂದ್ರೀ ಖಡ್ಗಾಯುಧಧರಾ ತಥಾ || ೧೩೦ ||

ಸೌದಾಮಿನೀ ಪ್ರಜಾನಂದಾ ತಥಾ ಪ್ರೋಕ್ತಾ ಭೃಗೂದ್ಭವಾ |
ಏಕಾನಂಗಾ ಚ ಶಾಸ್ತ್ರಾರ್ಥಕುಶಲಾ ಧರ್ಮಚಾರಿಣೀ || ೧೩೧ ||

ಧರ್ಮಸರ್ವಸ್ವವಾಹಾ ಚ ಧರ್ಮಾಧರ್ಮವಿನಿಶ್ಚಯಾ |
ಧರ್ಮಶಕ್ತಿರ್ಧರ್ಮಮಯಾ ಧಾರ್ಮಿಕಾನಾಂ ಶಿವಪ್ರದಾ || ೧೩೨ ||

ವಿಧರ್ಮಾ ವಿಶ್ವಧರ್ಮಜ್ಞಾ ಧರ್ಮಾರ್ಥಾಂತರವಿಗ್ರಹಾ |
ಧರ್ಮವರ್ಷ್ಮಾ ಧರ್ಮಪೂರ್ವಾ ಧರ್ಮಪಾರಂಗತಾಂತರಾ || ೧೩೩ ||

ಧರ್ಮೋಪದೇಷ್ಟ್ರೀ ಧರ್ಮಾತ್ಮಾ ಧರ್ಮಗಮ್ಯಾ ಧರಾಧರಾ |
ಕಪಾಲಿನೀ ಶಾಕಲಿನೀ ಕಲಾಕಲಿತವಿಗ್ರಹಾ || ೧೩೪ ||

ಸರ್ವಶಕ್ತಿವಿಮುಕ್ತಾ ಚ ಕರ್ಣಿಕಾರಧರಾಽಕ್ಷರಾ |
ಕಂಸಪ್ರಾಣಹರಾ ಚೈವ ಯುಗಧರ್ಮಧರಾ ತಥಾ || ೧೩೫ ||

ಯುಗಪ್ರವರ್ತಿಕಾ ಪ್ರೋಕ್ತಾ ತ್ರಿಸಂಧ್ಯಾ ಧ್ಯೇಯವಿಗ್ರಹಾ |
ಸ್ವರ್ಗಾಪವರ್ಗದಾತ್ರೀ ಚ ತಥಾ ಪ್ರತ್ಯಕ್ಷದೇವತಾ || ೧೩೬ ||

ಆದಿತ್ಯಾ ದಿವ್ಯಗಂಧಾ ಚ ದಿವಾಕರನಿಭಪ್ರಭಾ |
ಪದ್ಮಾಸನಗತಾ ಪ್ರೋಕ್ತಾ ಖಡ್ಗಬಾಣಶರಾಸನಾ || ೧೩೭ ||

ಶಿಷ್ಟಾ ವಿಶಿಷ್ಟಾ ಶಿಷ್ಟೇಷ್ಟಾ ಶಿಷ್ಟಶ್ರೇಷ್ಠಪ್ರಪೂಜಿತಾ |
ಶತರೂಪಾ ಶತಾವರ್ತಾ ವಿತತಾ ರಾಸಮೋದಿನೀ || ೧೩೮ ||

ಸೂರ್ಯೇಂದುನೇತ್ರಾ ಪ್ರದ್ಯುಮ್ನಜನನೀ ಸುಷ್ಠುಮಾಯಿನೀ |
ಸೂರ್ಯಾಂತರಸ್ಥಿತಾ ಚೈವ ಸತ್ಪ್ರತಿಷ್ಠಿತವಿಗ್ರಹಾ || ೧೩೯ ||

ನಿವೃತ್ತಾ ಪ್ರೋಚ್ಯತೇ ಜ್ಞಾನಪಾರಗಾ ಪರ್ವತಾತ್ಮಜಾ |
ಕಾತ್ಯಾಯನೀ ಚಂಡಿಕಾ ಚ ಚಂಡೀ ಹೈಮವತೀ ತಥಾ || ೧೪೦ ||

ದಾಕ್ಷಾಯಣೀ ಸತೀ ಚೈವ ಭವಾನೀ ಸರ್ವಮಂಗಳಾ |
ಧೂಮ್ರಲೋಚನಹಂತ್ರೀ ಚ ಚಂಡಮುಂಡವಿನಾಶಿನೀ || ೧೪೧ ||

ಯೋಗನಿದ್ರಾ ಯೋಗಭದ್ರಾ ಸಮುದ್ರತನಯಾ ತಥಾ |
ದೇವಪ್ರಿಯಂಕರೀ ಶುದ್ಧಾ ಭಕ್ತಭಕ್ತಿಪ್ರವರ್ಧಿನೀ || ೧೪೨ ||

ತ್ರಿನೇತ್ರಾ ಚಂದ್ರಮುಕುಟಾ ಪ್ರಮಥಾರ್ಚಿತಪಾದುಕಾ |
ಅರ್ಜುನಾಭೀಷ್ಟದಾತ್ರೀ ಚ ಪಾಂಡವಪ್ರಿಯಕಾರಿಣೀ || ೧೪೩ ||

ಕುಮಾರಲಾಲನಾಸಕ್ತಾ ಹರಬಾಹೂಪಧಾನಿಕಾ |
ವಿಘ್ನೇಶಜನನೀ ಭಕ್ತವಿಘ್ನಸ್ತೋಮಪ್ರಹಾರಿಣೀ || ೧೪೪ ||

ಸುಸ್ಮಿತೇಂದುಮುಖೀ ನಮ್ಯಾ ಜಯಾಪ್ರಿಯಸಖೀ ತಥಾ |
ಅನಾದಿನಿಧನಾ ಪ್ರೇಷ್ಠಾ ಚಿತ್ರಮಾಲ್ಯಾನುಲೇಪನಾ || ೧೪೫ ||

ಕೋಟಿಚಂದ್ರಪ್ರತೀಕಾಶಾ ಕೂಟಜಾಲಪ್ರಮಾಥಿನೀ |
ಕೃತ್ಯಾಪ್ರಹಾರಿಣೀ ಚೈವ ಮಾರಣೋಚ್ಚಾಟನೀ ತಥಾ || ೧೪೬ ||

ಸುರಾಸುರಪ್ರವಂದ್ಯಾಂಘ್ರಿರ್ಮೋಹಘ್ನೀ ಜ್ಞಾನದಾಯಿನೀ |
ಷಡ್ವೈರಿನಿಗ್ರಹಕರೀ ವೈರಿವಿದ್ರಾವಿಣೀ ತಥಾ || ೧೪೭ ||

ಭೂತಸೇವ್ಯಾ ಭೂತದಾತ್ರೀ ಭೂತಪೀಡಾವಿಮರ್ದಿಕಾ |
ನಾರದಸ್ತುತಚಾರಿತ್ರಾ ವರದೇಶಾ ವರಪ್ರದಾ || ೧೪೮ ||

ವಾಮದೇವಸ್ತುತಾ ಚೈವ ಕಾಮದಾ ಸೋಮಶೇಖರಾ |
ದಿಕ್ಪಾಲಸೇವಿತಾ ಭವ್ಯಾ ಭಾಮಿನೀ ಭಾವದಾಯಿನೀ || ೧೪೯ ||

ಸ್ತ್ರೀಸೌಭಾಗ್ಯಪ್ರದಾತ್ರೀ ಚ ಭೋಗದಾ ರೋಗನಾಶಿನೀ |
ವ್ಯೋಮಗಾ ಭೂಮಿಗಾ ಚೈವ ಮುನಿಪೂಜ್ಯಪದಾಂಬುಜಾ |
ವನದುರ್ಗಾ ಚ ದುರ್ಬೋಧಾ ಮಹಾದುರ್ಗಾ ಪ್ರಕೀರ್ತಿತಾ || ೧೫೦ ||

|| ಫಲಶ್ರುತಿಃ ||
ಇತೀದಂ ಕೀರ್ತಿದಂ ಭದ್ರ ದುರ್ಗಾನಾಮಸಹಸ್ರಕಮ್ |
ತ್ರಿಸಂಧ್ಯಂ ಯಃ ಪಠೇನ್ನಿತ್ಯಂ ತಸ್ಯ ಲಕ್ಷ್ಮೀಃ ಸ್ಥಿರಾ ಭವೇತ್ || ೧ ||

ಗ್ರಹಭೂತಪಿಶಾಚಾದಿಪೀಡಾ ನಶ್ಯತ್ಯಸಂಶಯಮ್ |
ಬಾಲಗ್ರಹಾದಿಪೀಡಾಯಾಃ ಶಾಂತಿರ್ಭವತಿ ಕೀರ್ತನಾತ್ || ೨ ||

ಮಾರಿಕಾದಿಮಹಾರೋಗೇ ಪಠತಾಂ ಸೌಖ್ಯದಂ ನೃಣಾಮ್ |
ವ್ಯವಹಾರೇ ಚ ಜಯದಂ ಶತ್ರುಬಾಧಾನಿವಾರಕಮ್ || ೩ ||

ದಂಪತ್ಯೋಃ ಕಲಹೇ ಪ್ರಾಪ್ತೇ ಮಿಥಃ ಪ್ರೇಮಾಭಿವರ್ಧಕಮ್ |
ಆಯುರಾರೋಗ್ಯದಂ ಪುಂಸಾಂ ಸರ್ವಸಂಪತ್ಪ್ರದಾಯಕಮ್ || ೪ ||

ವಿದ್ಯಾಭಿವರ್ಧಕಂ ನಿತ್ಯಂ ಪಠತಾಮರ್ಥಸಾಧಕಮ್ |
ಶುಭದಂ ಶುಭಕಾರ್ಯೇಷು ಪಠತಾಂ ಶೃಣ್ವತಾಮಪಿ || ೫ ||

ಯಃ ಪೂಜಯತಿ ದುರ್ಗಾಂ ತಾಂ ದುರ್ಗಾನಾಮಸಹಸ್ರಕೈಃ |
ಪುಷ್ಪೈಃ ಕುಂಕುಮಸಮ್ಮಿಶ್ರೈಃ ಸ ತು ಯತ್ಕಾಂಕ್ಷತೇ ಹೃದಿ || ೬ ||

ತತ್ಸರ್ವಂ ಸಮವಾಪ್ನೋತಿ ನಾಸ್ತಿ ನಾಸ್ತ್ಯತ್ರ ಸಂಶಯಃ |
ಯನ್ಮುಖೇ ಧ್ರಿಯತೇ ನಿತ್ಯಂ ದುರ್ಗಾನಾಮಸಹಸ್ರಕಮ್ || ೭ ||

ಕಿಂ ತಸ್ಯೇತರಮಂತ್ರೌಘೈಃ ಕಾರ್ಯಂ ಧನ್ಯತಮಸ್ಯ ಹಿ |
ದುರ್ಗಾನಾಮಸಹಸ್ರಸ್ಯ ಪುಸ್ತಕಂ ಯದ್ಗೃಹೇ ಭವೇತ್ || ೮ ||

ನ ತತ್ರ ಗ್ರಹಭೂತಾದಿಬಾಧಾ ಸ್ಯಾನ್ಮಂಗಳಾಸ್ಪದೇ |
ತದ್ಗೃಹಂ ಪುಣ್ಯದಂ ಕ್ಷೇತ್ರಂ ದೇವೀಸಾನ್ನಿಧ್ಯಕಾರಕಮ್ || ೯ ||

ಏತಸ್ಯ ಸ್ತೋತ್ರಮುಖ್ಯಸ್ಯ ಪಾಠಕಃ ಶ್ರೇಷ್ಠಮಂತ್ರವಿತ್ |
ದೇವತಾಯಾಃ ಪ್ರಸಾದೇನ ಸರ್ವಪೂಜ್ಯಃ ಸುಖೀ ಭವೇತ್ || ೧೦ ||

ಇತ್ಯೇತನ್ನಗರಾಜೇನ ಕೀರ್ತಿತಂ ಮುನಿಸತ್ತಮ |
ಗುಹ್ಯಾದ್ಗುಹ್ಯತರಂ ಸ್ತೋತ್ರಂ ತ್ವಯಿ ಸ್ನೇಹಾತ್ ಪ್ರಕೀರ್ತಿತಮ್ || ೧೧ ||

ಭಕ್ತಾಯ ಶ್ರದ್ಧಧಾನಾಯ ಕೇವಲಂ ಕೀರ್ತ್ಯತಾಮಿದಮ್ |
ಹೃದಿ ಧಾರಯ ನಿತ್ಯಂ ತ್ವಂ ದೇವ್ಯನುಗ್ರಹಸಾಧಕಮ್ || ೧೨ ||

ಇತಿ ಶ್ರೀಸ್ಕಾಂದಪುರಾಣೇ ಸ್ಕಂದನಾರದಸಂವಾದೇ ದುರ್ಗಾ ಸಹಸ್ರನಾಮ ಸ್ತೋತ್ರಮ್ ||

---

ಇನ್ನಷ್ಟು ಶ್ರೀ ದುರ್ಗಾ ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.