Narayaneeyam Dasakam 70 – ನಾರಾಯಣೀಯಂ ಸಪ್ತತಿತಮದಶಕಮ್

ಸ್ತೋತ್ರನಿಧಿ → ನಾರಾಯಣೀಯಂ → ಸಪ್ತತಿತಮದಶಕಮ್

<< ನಾರಾಯಣೀಯಂ ಏಕೋನಸಪ್ತತಿತಮದಶಕಮ್

ಸಪ್ತತಿತಮದಶಕಮ್ (೭೦) – ಸುದರ್ಶನಶಾಪಮೋಕ್ಷಂ ತಥಾ ಶಙ್ಖಚೂಡ-ಅರಿಷ್ಟವಧಮ್ |

ಇತಿ ತ್ವಯಿ ರಸಾಕುಲಂ ರಮಿತವಲ್ಲಭೇ ವಲ್ಲವಾಃ
ಕದಾಪಿ ಪುರಮಮ್ಬಿಕಾಕಮಿತುರಂಬಿಕಾಕಾನನೇ |
ಸಮೇತ್ಯ ಭವತಾ ಸಮಂ ನಿಶಿ ನಿಷೇವ್ಯ ದಿವ್ಯೋತ್ಸವಂ
ಸುಖಂ ಸುಷುಪುರಗ್ರಸೀದ್ವ್ರಜಪಮುಗ್ರನಾಗಸ್ತದಾ || ೭೦-೧ ||

ಸಮುನ್ಮುಖಮಥೋಲ್ಮುಕೈರಭಿಹತೇಽಪಿ ತಸ್ಮಿನ್ಬಲಾ-
ದಮುಞ್ಚತಿ ಭವತ್ಪದೇ ನ್ಯಪತಿ ಪಾಹಿ ಪಾಹೀತಿ ತೈಃ |
ತದಾ ಖಲು ಪದಾ ಭವಾನ್ಸಮುಪಗಮ್ಯ ಪಸ್ಪರ್ಶ ತಂ
ಬಭೌ ಸ ಚ ನಿಜಾಂ ತನುಂ ಸಮುಪಸಾದ್ಯ ವೈದ್ಯಾಧರೀಮ್ || ೭೦-೨ ||

ಸುದರ್ಶನಧರ ಪ್ರಭೋ ನನು ಸುದರ್ಶನಾಖ್ಯೋಽಸ್ಮ್ಯಹಂ
ಮುನೀನ್ಕ್ವಚಿದಪಾಹಸಂ ತ ಇಹ ಮಾಂ ವ್ಯಧುರ್ವಾಹಸಮ್ |
ಭವತ್ಪದಸಮರ್ಪಣಾದಮಲತಾಂ ಗತೋಽಸ್ಮೀತ್ಯಸೌ
ಸ್ತುವನ್ನಿಜಪದಂ ಯಯೌ ವ್ರಜಪದಂ ಚ ಗೋಪಾ ಮುದಾ || ೭೦-೩ ||

ಕದಾಪಿ ಖಲು ಸೀರಿಣಾ ವಿಹರತಿ ತ್ವಯಿ ಸ್ತ್ರೀಜನೈ-
ರ್ಜಹಾರ ಧನದಾನುಗಃ ಸ ಕಿಲ ಶಙ್ಖಚೂಡೋಽಬಲಾಃ |
ಅತಿದ್ರುತಮನುದ್ರುತಸ್ತಮಥ ಮುಕ್ತನಾರೀಜನಂ
ರುರೋಜಿಥ ಶಿರೋಮಣಿಂ ಹಲಭೃತೇ ಚ ತಸ್ಯಾದದಾಃ || ೭೦-೪ ||

ದಿನೇಷು ಚ ಸುಹೃಜ್ಜನೈಃ ಸಹ ವನೇಷು ಲೀಲಾಪರಂ
ಮನೋಭವಮನೋಹರಂ ರಸಿತವೇಣುನಾದಾಮೃತಮ್ |
ಭವನ್ತಮಮರೀದೃಶಾಮಮೃತಪಾರಣಾದಾಯಿನಂ
ವಿಚಿನ್ತ್ಯ ಕಿಮು ನಾಲಪನ್ ವಿರಹತಾಪಿತಾ ಗೋಪಿಕಾಃ || ೭೦-೫ ||

ಭೋಜರಾಜಭೃತಕಸ್ತ್ವಥ ಕಶ್ಚಿತ್ಕಷ್ಟದುಷ್ಟಪಥದೃಷ್ಟಿರರಿಷ್ಟಃ |
ನಿಷ್ಠುರಾಕೃತಿರಪಷ್ಠುನಿನಾದಸ್ತಿಷ್ಠತೇ ಸ್ಮ ಭವತೇ ವೃಷರೂಪೀ || ೭೦-೬ ||

ಶಾಕ್ವರೋಽಥ ಜಗತೀಧೃತಿಹಾರೀ ಮೂರ್ತಿಮೇಷ ಬೃಹತೀಂ ಪ್ರದಧಾನಃ |
ಪಙ್ಕ್ತಿಮಾಶು ಪರಿಘೂರ್ಣ್ಯ ಪಶೂನಾಂ ಛನ್ದಸಾಂ ನಿಧಿಮವಾಪ ಭವನ್ತಮ್ || ೭೦-೭ ||

ತುಙ್ಗಶೃಙ್ಗಮುಖಮಾಶ್ವಭಿಯನ್ತಂ ಸಙ್ಗೃಹಯ್ಯ ರಭಸಾದಭಿಯಂ ತಮ್ |
ಭದ್ರರೂಪಮಪಿ ದೈತ್ಯಮಭದ್ರಂ ಮರ್ದಯನ್ನಮದಯಃ ಸುರಲೋಕಮ್ || ೭೦-೮ ||

ಚಿತ್ರಮದ್ಯ ಭಗವನ್ ವೃಷಘಾತಾತ್ಸುಸ್ಥಿರಾಜನಿ ವೃಷಸ್ಥಿತಿರುರ್ವ್ಯಾಮ್ |
ವರ್ಧತೇ ಚ ವೃಷಚೇತಸಿ ಭೂಯಾನ್ಮೋದ ಇತ್ಯಭಿನುತೋಽಸಿ ಸುರೈಸ್ತ್ವಮ್ || ೭೦-೯ ||

ಔಕ್ಷಕಾಣಿ ಪರಿಧಾವತ ದೂರಂ ವೀಕ್ಷ್ಯತಾಮಯಮಿಹೋಕ್ಷವಿಭೇದೀ |
ಇತ್ಥಮಾತ್ತಹಸಿತೈಃ ಸಹ ಗೋಪೈರ್ಗೇಹಗಸ್ತ್ವಮವ ವಾತಪುರೇಶ || ೭೦-೧೦ ||

ಇತಿ ಸಪ್ತತಿತಮದಶಕಂ ಸಮಾಪ್ತಂ

ನಾರಾಯಣೀಯಂ ಏಕಸಪ್ತತಿತಮದಶಕಮ್ >>

---

ಸಂಪೂರ್ಣ ನಾರಾಯಣೀಯಂ ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.