Read in తెలుగు / ಕನ್ನಡ / தமிழ் / English (IAST)
ದ್ವಿಪಞ್ಚಾಶತ್ತಮದಶಕಮ್ (೫೨) – ವತ್ಸಸ್ತೇಯಂ ತಥಾ ಬ್ರಹ್ಮಗರ್ವಶಮನಮ್ |
ಅನ್ಯಾವತಾರನಿಕರೇಷ್ವನಿರೀಕ್ಷಿತಂ ತೇ
ಭೂಮಾತಿರೇಕಮಭಿವೀಕ್ಷ್ಯ ತದಾಘಮೋಕ್ಷೇ |
ಬ್ರಹ್ಮಾ ಪರೀಕ್ಷಿತುಮನಾಃ ಸ ಪರೋಕ್ಷಭಾವಂ
ನಿನ್ಯೇಽಥ ವತ್ಸಕಗಣಾನ್ಪ್ರವಿತತ್ಯ ಮಾಯಾಮ್ || ೫೨-೧ ||
ವತ್ಸಾನವೀಕ್ಷ್ಯ ವಿವಶೇ ಪಶುಪೋತ್ಕರೇ ತಾ-
ನಾನೇತುಕಾಮ ಇವ ಧಾತೃಮತಾನುವರ್ತೀ |
ತ್ವಂ ಸಾಮಿಭುಕ್ತಕಬಲೋ ಗತವಾಂಸ್ತದಾನೀಂ
ಭುಕ್ತಾಂಸ್ತಿರೋಧಿತ ಸರೋಜಭವಃ ಕುಮಾರಾನ್ || ೫೨-೨ ||
ವತ್ಸಾಯಿತಸ್ತದನು ಗೋಪಗಣಾಯಿತಸ್ತ್ವಂ
ಶಿಕ್ಯಾದಿಭಾಣ್ಡಮುರಲೀಗವಲಾದಿರೂಪಃ |
ಪ್ರಾಗ್ವದ್ವಿಹೃತ್ಯ ವಿಪಿನೇಷು ಚಿರಾಯ ಸಾಯಂ
ತ್ವಂ ಮಾಯಯಾಥ ಬಹುಧಾ ವ್ರಜಮಾಯಯಾಥ || ೫೨-೩ ||
ತ್ವಾಮೇವ ಶಿಕ್ಯಗವಲಾದಿಮಯಂ ದಧಾನೋ
ಭೂಯಸ್ತ್ವಮೇವ ಪಶುವತ್ಸಕಬಾಲರೂಪಃ |
ಗೋರೂಪಿಣೀಭಿರಪಿ ಗೋಪವಧೂಮಯೀಭಿ-
ರಾಸಾದಿತೋಽಸಿ ಜನನೀಭಿರತಿಪ್ರಹರ್ಷಾತ್ || ೫೨-೪ ||
ಜೀವಂ ಹಿ ಕಞ್ಚಿದಭಿಮಾನವಶಾತ್ಸ್ವಕೀಯಂ
ಮತ್ವಾ ತನೂಜ ಇತಿ ರಾಗಭರಂ ವಹನ್ತ್ಯಃ |
ಆತ್ಮಾನಮೇವ ತು ಭವನ್ತಮವಾಪ್ಯ ಸೂನುಂ
ಪ್ರೀತಿಂ ಯಯುರ್ನ ಕಿಯತೀಂ ವನಿತಾಶ್ಚ ಗಾವಃ || ೫೨-೫ ||
ಏವಂ ಪ್ರತಿಕ್ಷಣವಿಜೃಂಭಿತಹರ್ಷಭಾರ-
ನಿಶ್ಶೇಷಗೋಪಗಣಲಾಲಿತಭೂರಿಮೂರ್ತಿಮ್ |
ತ್ವಾಮಗ್ರಜೋಽಪಿ ಬುಬುಧೇ ಕಿಲ ವತ್ಸರಾನ್ತೇ
ಬ್ರಹ್ಮಾತ್ಮನೋರಪಿ ಮಹಾನ್ಯುವಯೋರ್ವಿಶೇಷಃ || ೫೨-೬ ||
ವರ್ಷಾವಧೌ ನವಪುರಾತನವತ್ಸಪಾಲಾನ್
ದೃಷ್ಟ್ವಾ ವಿವೇಕಮಸೃಣೇ ದ್ರುಹಿಣೇ ವಿಮೂಢೇ |
ಪ್ರಾದೀದೃಶಃ ಪ್ರತಿನವಾನ್ಮಕುಟಾಙ್ಗದಾದಿ
ಭೂಷಾಂಶ್ಚತುರ್ಭುಜಯುಜಃ ಸಜಲಾಂಬುದಾಭಾನ್ || ೫೨-೭ ||
ಪ್ರತ್ಯೇಕಮೇವ ಕಮಲಾಪರಿಲಾಲಿತಾಙ್ಗಾನ್
ಭೋಗೀನ್ದ್ರಭೋಗಶಯನಾನ್ನಯನಾಭಿರಾಮಾನ್ |
ಲೀಲಾನಿಮೀಲಿತದೃಶಃ ಸನಕಾದಿಯೋಗಿ-
ವ್ಯಾಸೇವಿತಾನ್ಕಮಲಭೂರ್ಭವತೋ ದದರ್ಶ || ೫೨-೮ ||
ನಾರಾಯಣಾಕೃತಿಮಸಙ್ಖ್ಯತಮಾಂ ನಿರೀಕ್ಷ್ಯ
ಸರ್ವತ್ರ ಸೇವಕಮಪಿ ಸ್ವಮವೇಕ್ಷ್ಯ ಧಾತಾ |
ಮಾಯಾನಿಮಗ್ನಹೃದಯೋ ವಿಮುಮೋಹ ಯಾವ-
ದೇಕೋ ಬಭೂವಿಥ ತದಾ ಕಬಲಾರ್ಧಪಾಣಿಃ || ೫೨-೯ ||
ನಶ್ಯನ್ಮದೇ ತದನು ವಿಶ್ವಪತಿಂ ಮುಹುಸ್ತ್ವಾಂ
ನತ್ವಾ ಚ ನೂತವತಿ ಧಾತರಿ ಧಾಮ ಯಾತೇ |
ಪೋತೈಃ ಸಮಂ ಪ್ರಮುದಿತೈಃ ಪ್ರವಿಶನ್ನಿಕೇತಂ
ವಾತಾಲಯಾಧಿಪ ವಿಭೋ ಪರಿಪಾಹಿ ರೋಗಾತ್ || ೫೨-೧೦ ||
ಇತಿ ದ್ವಿಪಞ್ಚಾಶತ್ತಮದಶಕಂ ಸಮಾಪ್ತಂ
ನಾರಾಯಣೀಯಂ ತ್ರಿಪಞ್ಚಾಶತ್ತಮದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
