Read in తెలుగు / ಕನ್ನಡ / தமிழ் / English (IAST)
ಏಕಚತ್ವಾರಿಂಶದಶಕಮ್ (೪೧) – ಪೂತನಾದಹನಂ ತಥಾ ಕೃಷ್ಣಲಾಲನಾಹ್ಲಾದಮ್ |
ವ್ರಜೇಶ್ವರಃ ಶೌರಿವಚೋ ನಿಶಮ್ಯ ಸಮಾವ್ರಜನ್ನಧ್ವನಿ ಭೀತಚೇತಾಃ |
ನಿಷ್ಪಿಷ್ಟನಿಶ್ಶೇಷತರುಂ ನಿರೀಕ್ಷ್ಯ ಕಞ್ಚಿತ್ಪದಾರ್ಥಂ ಶರಣಂ ಗತಸ್ತ್ವಾಮ್ || ೪೧-೧ ||
ನಿಶಮ್ಯ ಗೋಪೀವಚನಾದುದನ್ತಂ ಸರ್ವೇಽಪಿ ಗೋಪಾ ಭಯವಿಸ್ಮಯಾನ್ಧಾಃ |
ತ್ವತ್ಪಾತಿತಂ ಘೋರಪಿಶಾಚದೇಹಂ ದೇಹುರ್ವಿದೂರೇಽಥ ಕುಠಾರಕೃತ್ತಮ್ || ೪೧-೨ ||
ತ್ವತ್ಪೀತಪೂತಸ್ತನತಚ್ಛರೀರಾ-ತ್ಸಮುಚ್ಚಲನ್ನುಚ್ಚತರೋ ಹಿ ಧೂಮಃ |
ಶಙ್ಕಾಮಧಾದಾಗರವಃ ಕಿಮೇಷ ಕಿಂ ಚಾನ್ದನೋ ಗೌಲ್ಗುಲವೋಽಥವೇತಿ || ೪೧-೩ ||
ಮದಙ್ಗಸಙ್ಗಸ್ಯ ಫಲಂ ನ ದೂರೇ ಕ್ಷಣೇನ ತಾವದ್ಭವತಾಮಪಿ ಸ್ಯಾತ್ |
ಇತ್ಯುಲ್ಲಪನ್ವಲ್ಲವತಲ್ಲಜೇಭ್ಯಸ್ತ್ವಂ ಪೂತನಾಮಾತನುಥಾಸ್ಸುಗನ್ಧಿಮ್ || ೪೧-೪ ||
ಚಿತ್ರಂ ಪಿಶಾಚ್ಯಾ ನ ಹತಃ ಕುಮಾರಶ್ಚಿತ್ರಂ ಪುರೈವಾಕಥಿ ಶೌರಿಣೇದಮ್ |
ಇತಿ ಪ್ರಶಂಸನ್ಕಿಲ ಗೋಪಲೋಕೋ ಭವನ್ಮುಖಾಲೋಕರಸೇ ನ್ಯಮಾಙ್ಕ್ಷೀತ್ || ೪೧-೫ ||
ದಿನೇ ದಿನೇಽಥ ಪ್ರತಿವೃದ್ಧಲಕ್ಷ್ಮೀರಕ್ಷೀಣಮಾಙ್ಗಲ್ಯಶತೋ ವ್ರಜೋಽಯಮ್ |
ಭವನ್ನಿವಾಸಾದಯಿ ವಾಸುದೇವ ಪ್ರಮೋದಸಾನ್ದ್ರಃ ಪರಿತೋ ವಿರೇಜೇ || ೪೧-೬ ||
ಗೃಹೇಷು ತೇ ಕೋಮಲರೂಪಹಾಸಮಿಥಃ ಕಥಾಸಙ್ಕುಲಿತಾಃ ಕಮನ್ಯಃ |
ವೃತ್ತೇಷು ಕೃತ್ಯೇಷು ಭವನ್ನಿರೀಕ್ಷಾಸಮಾಗತಾಃ ಪ್ರತ್ಯಹಮತ್ಯನನ್ದನ್ || ೪೧-೭ ||
ಅಹೋ ಕುಮಾರೋ ಮಯಿ ದತ್ತದೃಷ್ಟಿಃ ಸ್ಮಿತಂ ಕೃತಂ ಮಾಂ ಪ್ರತಿ ವತ್ಸಕೇನ |
ಏಹ್ಯೇಹಿ ಮಾಮಿತ್ಯುಪಸಾರ್ಯ ಪಾಣಿಂ ತ್ವಯೀಶ ಕಿಂ ಕಿಂ ನ ಕೃತಂ ವಧೂಭಿಃ || ೪೧-೮ ||
ಭವದ್ವಪುಃಸ್ಪರ್ಶನಕೌತುಕೇನ ಕರಾತ್ಕರಂ ಗೋಪವಧೂಜನೇನ |
ನೀತಸ್ತ್ವಮಾತಾಮ್ರಸರೋಜಮಾಲಾ-ವ್ಯಾಲಂಬಿಲೋಲಂಬತುಲಾಮಲಾಸೀಃ || ೪೧-೯ ||
ನಿಪಾಯಯನ್ತೀ ಸ್ತನಮಙ್ಕಗಂ ತ್ವಾಂ ವಿಲೋಕಯನ್ತೀ ವದನಂ ಹಸನ್ತೀ |
ದಶಾಂ ಯಶೋದಾ ಕತಮಾನ್ನ ಭೇಜೇ ಸ ತಾದೃಶಃ ಪಾಹಿ ಹರೇ ಗದಾನ್ಮಾಮ್ || ೪೧-೧೦ ||
ಇತಿ ಏಕಚತ್ವಾರಿಂಶದಶಕಂ ಸಮಾಪ್ತಮ್ ||
ನಾರಾಯಣೀಯಂ ದ್ವಿಚತ್ವಾರಿಂಶದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
