Read in తెలుగు / ಕನ್ನಡ / தமிழ் / English (IAST)
ಏಕತ್ರಿಂಶದಶಕಮ್ (೩೧) – ಬಲಿದರ್ಪಹರಣಮ್
ಪ್ರೀತ್ಯಾ ದೈತ್ಯಸ್ತವ ತನುಮಹಃಪ್ರೇಕ್ಷಣಾತ್ಸರ್ವಥಾಽಪಿ
ತ್ವಾಮಾರಾಧ್ಯನ್ನಜಿತ ರಚಯನ್ನಞ್ಜಲಿಂ ಸಞ್ಜಗಾದ |
ಮತ್ತಃ ಕಿಂ ತೇ ಸಮಭಿಲಷಿತಂ ವಿಪ್ರಸೂನೋ ವದ ತ್ವಂ
ವಿತ್ತಂ ಭಕ್ತಂ ಭವನಮವನೀಂ ವಾಪಿ ಸರ್ವಂ ಪ್ರದಾಸ್ಯೇ || ೩೧-೧ ||
[** ಪಾಠಭೇದಃ – ವ್ಯಕ್ತಂ ಭಕ್ತಂ ಭುವನಮವನೀಂ **]
ತಾಮಕ್ಷೀಣಾಂ ಬಲಿಗಿರಮುಪಾಕರ್ಣ್ಯ ಕಾರುಣ್ಯಪೂರ್ಣೋಽ-
ಪ್ಯಸ್ಯೋತ್ಸೇಕಂ ಶಮಯಿತುಮನಾ ದೈತ್ಯವಂಶಂ ಪ್ರಶಂಸನ್ |
ಭೂಮಿಂ ಪಾದತ್ರಯಪರಿಮಿತಾಂ ಪ್ರಾರ್ಥಯಾಮಾಸಿಥ ತ್ವಂ
ಸರ್ವಂ ದೇಹೀತಿ ತು ನಿಗದಿತೇ ಕಸ್ಯ ಹಾಸ್ಯಂ ನ ವಾ ಸ್ಯಾತ್ || ೩೧-೨ ||
ವಿಶ್ವೇಶಂ ಮಾಂ ತ್ರಿಪದಮಿಹ ಕಿಂ ಯಾಚಸೇ ಬಾಲಿಶಸ್ತ್ವಂ
ಸರ್ವಾಂ ಭೂಮಿಂ ವೃಣು ಕಿಮಮುನೇತ್ಯಾಲಪತ್ತ್ವಾಂ ಸ ದೃಪ್ಯನ್ |
ಯಸ್ಮಾದ್ದರ್ಪಾತ್ತ್ರಿಪದಪರಿಪೂರ್ತ್ಯಕ್ಷಮಃ ಕ್ಷೇಪವಾದಾನ್
ಬನ್ಧಂ ಚಾಸಾವಗಮದತದರ್ಹೋಽಪಿ ಗಾಢೋಪಶಾನ್ತ್ಯೈ || ೩೧-೩ ||
ಪಾದತ್ರಯ್ಯಾ ಯದಿ ನ ಮುದಿತೋ ವಿಷ್ಟಪೈರ್ನಾಪಿ ತುಷ್ಯೇ-
ದಿತ್ಯುಕ್ತೇಽಸ್ಮಿನ್ವರದ ಭವತೇ ದಾತುಕಾಮೇಽಥ ತೋಯಮ್ |
ದೈತ್ಯಾಚಾರ್ಯಸ್ತವ ಖಲು ಪರೀಕ್ಷಾರ್ಥಿನಃ ಪ್ರೇರಣಾತ್ತಂ
ಮಾ ಮಾ ದೇಯಂ ಹರಿರಯಮಿತಿ ವ್ಯಕ್ತಮೇವಾಬಭಾಷೇ || ೩೧-೪ ||
ಯಾಚತ್ಯೇವಂ ಯದಿ ಸ ಭಗವಾನ್ಪೂರ್ಣಕಾಮೋಽಸ್ಮಿ ಸೋಽಹಂ
ದಾಸ್ಯಾಮ್ಯೇವ ಸ್ಥಿರಮಿತಿ ವದನ್ ಕಾವ್ಯಶಪ್ತೋಽಪಿ ದೈತ್ಯಃ |
ವಿನ್ಧ್ಯಾವಲ್ಯಾ ನಿಜದಯಿತಯಾ ದತ್ತಪಾದ್ಯಾಯ ತುಭ್ಯಂ
ಚಿತ್ರಂ ಚಿತ್ರಂ ಸಕಲಮಪಿ ಸ ಪ್ರಾರ್ಪಯತ್ತೋಯಪೂರ್ವಮ್ || ೩೧-೫ ||
ನಿಸ್ಸನ್ದೇಹಂ ದಿತಿಕುಲಪತೌ ತ್ವಯ್ಯಶೇಷಾರ್ಪಣಂ ತದ್-
ವ್ಯಾತನ್ವಾನೇ ಮುಮುಚುರೃಷಯಃ ಸಾಮರಾಃ ಪುಷ್ಪವರ್ಷಮ್ |
ದಿವ್ಯಂ ರೂಪಂ ತವ ಚ ತದಿದಂ ಪಶ್ಯತಾಂ ವಿಶ್ವಭಾಜಾ-
ಮುಚ್ಚೈರುಚ್ಚೈರವೃಧದವಧೀಕೃತ್ಯ ವಿಶ್ವಾಣ್ಡಭಾಣ್ಡಮ್ || ೩೧-೬ ||
ತ್ವತ್ಪಾದಾಗ್ರಂ ನಿಜಪದಗತಂ ಪುಣ್ಡರೀಕೋದ್ಭವೋಽಸೌ
ಕುಣ್ಡೀತೋಯೈರಸಿಚದಪುನಾದ್ಯಜ್ಜಲಂ ವಿಶ್ವಲೋಕಾನ್ |
ಹರ್ಷೋತ್ಕರ್ಷಾತ್ಸುಬಹು ನನೃತೇ ಖೇಚರೈರುತ್ಸವೇಽಸ್ಮಿನ್
ಭೇರೀಂ ನಿಘ್ನನ್ ಭುವನಮಚರಜ್ಜಾಂಬವಾನ್ ಭಕ್ತಿಶಾಲೀ || ೩೧-೭ ||
ತಾವದ್ದೈತ್ಯಾಸ್ತ್ವನುಮತಿಮೃತೇ ಭರ್ತುರಾರಬ್ಧಯುದ್ಧಾ
ದೇವೋಪೇತೈರ್ಭವದನುಚರೈಸ್ಸಙ್ಗತಾ ಭಙ್ಗಮಾಪನ್ |
ಕಾಲಾತ್ಮಾಯಂ ವಸತಿ ಪುರತೋ ಯದ್ವಶಾತ್ಪ್ರಾಗ್ಜಿತಾಃ ಸ್ಮಃ
ಕಿಂ ವೋ ಯುದ್ಧೈರಿತಿ ಬಲಿಗಿರಾ ತೇಽಥ ಪಾತಾಲಮಾಪುಃ || ೩೧-೮ ||
ಪಾಶೈರ್ಬದ್ಧಂ ಪತಗಪತಿನಾ ದೈತ್ಯಮುಚ್ಚೈರವಾದೀ-
ಸ್ತಾರ್ತೀಯೀಕಂ ದಿಶ ಮಮ ಪದಂ ಕಿಂ ನ ವಿಶ್ವೇಶ್ವರೋಽಸಿ |
ಪಾದಂ ಮೂರ್ಧ್ನಿ ಪ್ರಣಯ ಭಗವನ್ನಿತ್ಯಕಮ್ಪಂ ವದನ್ತಂ
ಪ್ರಹ್ಲಾದಸ್ತಂ ಸ್ವಯಮುಪಗತೋ ಮಾನಯನ್ನಸ್ತವೀತ್ತ್ವಾಮ್ || ೩೧-೯ ||
ದರ್ಪೋಚ್ಛಿತ್ತ್ಯೈ ವಿಹಿತಮಖಿಲಂ ದೈತ್ಯ ಸಿದ್ಧೋಽಸಿ ಪುಣ್ಯೈ-
ರ್ಲೋಕಸ್ತೇಽಸ್ತು ತ್ರಿದಿವವಿಜಯೀ ವಾಸವತ್ವಂ ಚ ಪಶ್ಚಾತ್ |
ಮತ್ಸಾಯುಜ್ಯಂ ಭಜ ಚ ಪುನರಿತ್ಯನ್ವಗೃಹ್ಣಾ ಬಲಿಂ ತಂ
ವಿಪ್ರೈಸ್ಸನ್ತಾನಿತಮಖವರಃ ಪಾಹಿ ವಾತಾಲಯೇಶ || ೩೧-೧೦ ||
ಇತಿ ಏಕತ್ರಿಂಶದಶಕಂ ಸಮಾಪ್ತಮ್ ||
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
