Manoratha Siddhiprada Ganesha Stotram – ಮನೋರಥಸಿದ್ಧಿಪ್ರದ ಗಣೇಶ ಸ್ತೋತ್ರಂ


ಸ್ಕಂದ ಉವಾಚ |
ನಮಸ್ತೇ ಯೋಗರೂಪಾಯ ಸಂಪ್ರಜ್ಞಾನಶರೀರಿಣೇ |
ಅಸಂಪ್ರಜ್ಞಾನಮೂರ್ಧ್ನೇ ತೇ ತಯೋರ್ಯೋಗಮಯಾಯ ಚ || ೧ ||

ವಾಮಾಂಗಭ್ರಾಂತಿರೂಪಾ ತೇ ಸಿದ್ಧಿಃ ಸರ್ವಪ್ರದಾ ಪ್ರಭೋ |
ಭ್ರಾಂತಿಧಾರಕರೂಪಾ ವೈ ಬುದ್ಧಿಸ್ತೇ ದಕ್ಷಿಣಾಂಗಕೇ || ೨ ||

ಮಾಯಾಸಿದ್ಧಿಸ್ತಥಾ ದೇವೋ ಮಾಯಿಕೋ ಬುದ್ಧಿಸಂಜ್ಞಿತಃ |
ತಯೋರ್ಯೋಗೇ ಗಣೇಶಾನ ತ್ವಂ ಸ್ಥಿತೋಽಸಿ ನಮೋಽಸ್ತು ತೇ || ೩ ||

ಜಗದ್ರೂಪೋ ಗಕಾರಶ್ಚ ಣಕಾರೋ ಬ್ರಹ್ಮವಾಚಕಃ |
ತಯೋರ್ಯೋಗೇ ಹಿ ಗಣಪೋ ನಾಮ ತುಭ್ಯಂ ನಮೋ ನಮಃ || ೪ ||

ಚತುರ್ವಿಧಂ ಜಗತ್ಸರ್ವಂ ಬ್ರಹ್ಮ ತತ್ರ ತದಾತ್ಮಕಮ್ |
ಹಸ್ತಾಶ್ಚತ್ವಾರ ಏವಂ ತೇ ಚತುರ್ಭುಜ ನಮೋಽಸ್ತು ತೇ || ೫ ||

ಸ್ವಸಂವೇದ್ಯಂ ಚ ಯದ್ಬ್ರಹ್ಮ ತತ್ರ ಖೇಲಕರೋ ಭವಾನ್ |
ತೇನ ಸ್ವಾನಂದವಾಸೀ ತ್ವಂ ಸ್ವಾನಂದಪತಯೇ ನಮಃ || ೬ ||

ದ್ವಂದ್ವಂ ಚರಸಿ ಭಕ್ತಾನಾಂ ತೇಷಾಂ ಹೃದಿ ಸಮಾಸ್ಥಿತಃ |
ಚೌರವತ್ತೇನ ತೇಽಭೂದ್ವೈ ಮೂಷಕೋ ವಾಹನಂ ಪ್ರಭೋ || ೭ ||

ಜಗತಿ ಬ್ರಹ್ಮಣಿ ಸ್ಥಿತ್ವಾ ಭೋಗಾನ್ಭುಂಕ್ಷಿ ಸ್ವಯೋಗಗಃ |
ಜಗದ್ಭಿರ್ಬ್ರಹ್ಮಭಿಸ್ತೇನ ಚೇಷ್ಟಿತಂ ಜ್ಞಾಯತೇ ನ ಚ || ೮ ||

ಚೌರವದ್ಭೋಗಕರ್ತಾ ತ್ವಂ ತೇನ ತೇ ವಾಹನಂ ಪರಮ್ |
ಮೂಷಕೋ ಮೂಷಕಾರೂಢೋ ಹೇರಂಬಾಯ ನಮೋ ನಮಃ || ೯ ||

ಕಿಂ ಸ್ತೌಮಿ ತ್ವಾಂ ಗಣಾಧೀಶ ಯೋಗಶಾಂತಿಧರಂ ಪರಮ್ |
ವೇದಾದಯೋ ಯಯುಃ ಶಾಂತಿಮತೋ ದೇವಂ ನಮಾಮ್ಯಹಮ್ || ೧೦ ||

ಇತಿ ಸ್ತೋತ್ರಂ ಸಮಾಕರ್ಣ್ಯ ಗಣೇಶಸ್ತಮುವಾಚ ಹ |
ವರಂ ವೃಣು ಮಹಾಭಾಗ ದಾಸ್ಯಾಮಿ ದುರ್ಲಭಂ ಹ್ಯಪಿ || ೧೧ ||

ತ್ವಯಾ ಕೃತಮಿದಂ ಸ್ತೋತ್ರಂ ಯೋಗಶಾಂತಿಪ್ರದಂ ಭವೇತ್ |
ಮಯಿ ಭಕ್ತಿಕರಂ ಸ್ಕಂದ ಸರ್ವಸಿದ್ಧಿಪ್ರದಂ ತಥಾ || ೧೨ ||

ಯಂ ಯಮಿಚ್ಛಸಿ ತಂ ತಂ ವೈ ದಾಸ್ಯಾಮಿ ಸ್ತೋತ್ರಯಂತ್ರಿತಃ |
ಪಠತೇ ಶೃಣ್ವತೇ ನಿತ್ಯಂ ಕಾರ್ತಿಕೇಯ ವಿಶೇಷತಃ || ೧೩ ||

ಇತಿ ಶ್ರೀಮುದ್ಗಲಪುರಾಣೇ ಮನೋರಥಸಿದ್ಧಿಪ್ರದಂ ನಾಮ ಗಣೇಶಸ್ತೋತ್ರಂ ಸಂಪೂರ್ಣಮ್ |


ಇನ್ನಷ್ಟು ಶ್ರೀ ಗಣೇಶ ಸ್ತೋತ್ರಗಳು ನೋಡಿ.


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed