Read in తెలుగు / ಕನ್ನಡ / தமிழ் / देवनागरी / English (IAST)
<< ಶ್ರೀಮದ್ದೇವೀಭಾಗವತೇ ದ್ವಾದಶಸ್ಕಂಧೇ ಅಷ್ಟಮೋಽಧ್ಯಾಯಃ
(ಬ್ರಾಹ್ಮಣಾದೀನಾಂ ಗಾಯತ್ರೀಭಿನ್ನಾನ್ಯದೇವೋಪಾಸನಾಶ್ರದ್ಧಾಹೇತುನಿರೂಪಣಮ್)
ವ್ಯಾಸ ಉವಾಚ |
ಕದಾಚಿದಥ ಕಾಲೇ ತು ದಶಪಂಚ ಸಮಾ ವಿಭೋ |
ಪ್ರಾಣಿನಾಂ ಕರ್ಮವಶತೋ ನ ವವರ್ಷ ಶತಕ್ರತುಃ || ೧ ||
ಅನಾವೃಷ್ಟ್ಯಾಽತಿದುರ್ಭಿಕ್ಷಮಭವತ್ ಕ್ಷಯಕಾರಕಮ್ |
ಗೃಹೇ ಗೃಹೇ ಶವಾನಾಂ ತು ಸಂಖ್ಯಾ ಕರ್ತುಂ ನ ಶಕ್ಯತೇ || ೨ ||
ಕೇಚಿದಶ್ವಾನ್ವರಾಹಾನ್ವಾ ಭಕ್ಷಯಂತಿ ಕ್ಷುಧಾರ್ದಿತಾಃ |
ಶವಾನಿ ಚ ಮನುಷ್ಯಾಣಾಂ ಭಕ್ಷಯಂತ್ಯಪರೇ ಜನಾಃ || ೩ ||
ಬಾಲಕಂ ಬಾಲಜನನೀ ಸ್ತ್ರಿಯಂ ಪುರುಷ ಏವ ಚ |
ಭಕ್ಷಿತುಂ ಚಲಿತಾಃ ಸರ್ವೇ ಕ್ಷುಧಯಾ ಪೀಡಿತಾ ನರಾಃ || ೪ ||
ಬ್ರಾಹ್ಮಣಾ ಬಹವಸ್ತತ್ರ ವಿಚಾರಂ ಚಕ್ರುರುತ್ತಮಮ್ |
ತಪೋಧನೋ ಗೌತಮೋಽಸ್ತಿ ಸ ನಃ ಖೇದಂ ಹರಿಷ್ಯತಿ || ೫ ||
ಸರ್ವೈರ್ಮಿಲಿತ್ವಾ ಗಂತವ್ಯಂ ಗೌತಮಸ್ಯಾಶ್ರಮೇಽಧುನಾ |
ಗಾಯತ್ರೀಜಪಸಂಸಕ್ತಗೌತಮಸ್ಯಾಶ್ರಮೇಽಧುನಾ || ೬ ||
ಸುಭಿಕ್ಷಂ ಶ್ರೂಯತೇ ತತ್ರ ಪ್ರಾಣಿನೋ ಬಹವೋ ಗತಾಃ |
ಏವಂ ವಿಮೃಶ್ಯ ಭೂದೇವಾಃ ಸಾಗ್ನಿಹೋತ್ರಾಃ ಕುಟುಂಬಿನಃ || ೭ ||
ಸಗೋಧನಾಃ ಸದಾಸಾಶ್ಚ ಗೌತಮಸ್ಯಾಶ್ರಮಂ ಯಯುಃ |
ಪೂರ್ವದೇಶಾದ್ಯಯುಃ ಕೇಚಿತ್ಕೇಚಿದ್ದಕ್ಷಿಣದೇಶತಃ || ೮ ||
ಪಾಶ್ಚಾತ್ಯಾ ಔತ್ತರಾಹಾಶ್ಚ ನಾನಾದಿಗ್ಭ್ಯಃ ಸಮಾಯಯುಃ |
ದೃಷ್ಟ್ವಾ ಸಮಾಜಂ ವಿಪ್ರಾಣಾಂ ಪ್ರಣನಾಮ ಸ ಗೌತಮಃ || ೯ ||
ಆಸನಾದ್ಯುಪಚಾರೈಶ್ಚ ಪೂಜಯಾಮಾಸ ವಾಡವಾನ್ |
ಚಕಾರ ಕುಶಲಪ್ರಶ್ನಂ ತತಶ್ಚಾಗಮಕಾರಣಮ್ || ೧೦ ||
ತೇ ಸರ್ವೇ ಸ್ವಸ್ವವೃತ್ತಾಂತಂ ಕಥಯಾಮಾಸುರುತ್ಸ್ಮಯಾಃ |
ದೃಷ್ಟ್ವಾ ತಾನ್ ದುಃಖಿತಾನ್ ವಿಪ್ರಾನಭಯಂ ದತ್ತವಾನ್ ಮುನಿಃ || ೧೧ ||
ಯುಷ್ಮಾಕಮೇತತ್ ಸದನಂ ಭವದ್ದಾಸೋಽಸ್ಮಿ ಸರ್ವಥಾ |
ಕಾ ಚಿಂತಾ ಭವತಾಂ ವಿಪ್ರಾ ಮಯಿ ದಾಸೇ ವಿರಾಜತಿ || ೧೨ ||
ಧನ್ಯೋಽಹಮಸ್ಮಿನ್ ಸಮಯೇ ಯೂಯಂ ಸರ್ವೇ ತಪೋಧನಾಃ |
ಯೇಷಾಂ ದರ್ಶನಮಾತ್ರೇಣ ದುಷ್ಕೃತಂ ಸುಕೃತಾಯತೇ || ೧೩ ||
ತೇ ಸರ್ವೇ ಪಾದರಜಸಾ ಪಾವಯಂತಿ ಗೃಹಂ ಮಮ |
ಕೋ ಮದನ್ಯೋ ಭವೇದ್ಧನ್ಯೋ ಭವತಾಂ ಸಮನುಗ್ರಹಾತ್ || ೧೪ ||
ಸ್ಥೇಯಂ ಸರ್ವೈಃ ಸುಖೇನೈವ ಸಂಧ್ಯಾಜಪಪರಾಯಣೈಃ |
ವ್ಯಾಸ ಉವಾಚ |
ಇತಿ ಸರ್ವಾನ್ ಸಮಾಶ್ವಾಸ್ಯ ಗೌತಮೋ ಮುನಿರಾಟ್ ತತಃ || ೧೫ ||
ಗಾಯತ್ರೀಂ ಪ್ರಾರ್ಥಯಾಮಾಸ ಭಕ್ತಿಸನ್ನತಕಂಧರಃ |
ನಮೋ ದೇವಿ ಮಹಾವಿದ್ಯೇ ವೇದಮಾತಃ ಪರಾತ್ಪರೇ || ೧೬ ||
ವ್ಯಾಹೃತ್ಯಾದಿಮಹಾಮಂತ್ರರೂಪೇ ಪ್ರಣವರೂಪಿಣಿ |
ಸಾಮ್ಯಾವಸ್ಥಾತ್ಮಿಕೇ ಮಾತರ್ನಮೋ ಹ್ರೀಂಕಾರರೂಪಿಣಿ || ೧೭ ||
ಸ್ವಾಹಾಸ್ವಧಾಸ್ವರೂಪೇ ತ್ವಾಂ ನಮಾಮಿ ಸಕಲಾರ್ಥದಾಮ್ |
ಭಕ್ತಕಲ್ಪಲತಾಂ ದೇವೀಮವಸ್ಥಾತ್ರಯಸಾಕ್ಷಿಣೀಮ್ || ೧೮ ||
ತುರ್ಯಾತೀತಸ್ವರೂಪಾಂ ಚ ಸಚ್ಚಿದಾನಂದರೂಪಿಣೀಮ್ |
ಸರ್ವವೇದಾಂತಸಂವೇದ್ಯಾಂ ಸೂರ್ಯಮಂಡಲವಾಸಿನೀಮ್ || ೧೯ ||
ಪ್ರಾತರ್ಬಾಲಾಂ ರಕ್ತವರ್ಣಾಂ ಮಧ್ಯಾಹ್ನೇ ಯುವತೀಂ ಪರಾಮ್ |
ಸಾಯಾಹ್ನೇ ಕೃಷ್ಣವರ್ಣಾಂ ತಾಂ ವೃದ್ಧಾಂ ನಿತ್ಯಂ ನಮಾಮ್ಯಹಮ್ || ೨೦ ||
ಸರ್ವಭೂತಾರಣೇ ದೇವಿ ಕ್ಷಮಸ್ವ ಪರಮೇಶ್ವರಿ |
ಇತಿ ಸ್ತುತಾ ಜಗನ್ಮಾತಾ ಪ್ರತ್ಯಕ್ಷಂ ದರ್ಶನಂ ದದೌ || ೨೧ ||
ಪೂರ್ಣಪಾತ್ರಂ ದದೌ ತಸ್ಮೈ ಯೇನ ಸ್ಯಾತ್ ಸರ್ವಪೋಷಣಮ್ |
ಉವಾಚ ಮುನಿಮಂಬಾ ಸಾ ಯಂ ಯಂ ಕಾಮಂ ತ್ವಮಿಚ್ಛಸಿ || ೨೨ ||
ತಸ್ಯ ಪೂರ್ತಿಕರಂ ಪಾತ್ರಂ ಮಯಾ ದತ್ತಂ ಭವಿಷ್ಯತಿ |
ಇತ್ಯುಕ್ತ್ವಾಂತರ್ದಧೇ ದೇವೀ ಗಾಯತ್ರೀ ಪರಮಾ ಕಳಾ || ೨೩ ||
ಅನ್ನಾನಾಂ ರಾಶಯಸ್ತಸ್ಮಾನಿರ್ಗತಾಃ ಪರ್ವತೋಪಮಾಃ |
ಷಡ್ರಸಾ ವಿವಿಧಾ ರಾಜಂಸ್ತೃಣಾನಿ ವಿವಿಧಾನಿ ಚ || ೨೪ ||
ಭೂಷಣಾನಿ ಚ ದಿವ್ಯಾನಿ ಕ್ಷೌಮಾಣಿ ವಸನಾನಿ ಚ |
ಯಜ್ಞಾನಾಂ ಚ ಸಮಾರಂಭಾಃ ಪಾತ್ರಾಣಿ ವಿವಿಧಾನಿ ಚ || ೨೫ ||
ಯದ್ಯದಿಷ್ಟಮಭೂದ್ರಾಜನ್ ಮುನೇಸ್ತಸ್ಯ ಮಹಾತ್ಮನಃ |
ತತ್ಸರ್ವಂ ನಿರ್ಗತಂ ತಸ್ಮಾದ್ಗಾಯತ್ರೀಪೂರ್ಣಪಾತ್ರತಃ || ೨೬ ||
ಅಥಾಹೂಯ ಮುನೀನ್ ಸರ್ವಾನ್ಮುನಿರಾಡ್ಗೌತಮಸ್ತದಾ |
ಧನಂ ಧಾನ್ಯಂ ಭೂಷಣಾನಿ ವಸನಾನಿ ದದೌ ಮುದಾ || ೨೭ ||
ಗೋಮಹಿಷ್ಯಾದಿಪಶವೋ ನಿರ್ಗತಾಃ ಪೂರ್ಣಪಾತ್ರತಃ |
ನಿರ್ಗತಾನ್ ಯಜ್ಞಸಂಭಾರಾನ್ ಸ್ರುಕ್ ಸ್ರುವಪ್ರಭೃತೀನ್ ದದೌ || ೨೮ ||
ತೇ ಸರ್ವೇ ಮಿಲಿತಾ ಯಜ್ಞಾಂಶ್ಚಕ್ರಿರೇ ಮುನಿವಾಕ್ಯತಃ |
ಸ್ಥಾನಂ ತದೇವ ಭೂಯಿಷ್ಠಮಭವತ್ ಸ್ವರ್ಗಸನ್ನಿಭಮ್ || ೨೯ ||
ಯತ್ಕಿಂಚಿತ್ ತ್ರಿಷು ಲೋಕೇಷು ಸುಂದರಂ ವಸ್ತು ದೃಶ್ಯತೇ |
ತತ್ಸರ್ವಂ ತತ್ರ ನಿಷ್ಪನ್ನಂ ಗಾಯತ್ರೀದತ್ತಪಾತ್ರತಃ || ೩೦ ||
ದೇವಾಂಗನಾಸಮಾ ದಾರಾಃ ಶೋಭಂತೇ ಭೂಷಣಾದಿಭಿಃ |
ಮುನಯೋ ದೇವಸದೃಶಾ ವಸ್ತ್ರಚಂದನಭೂಷಣೈಃ || ೩೧ ||
ನಿತ್ಯೋತ್ಸವಃ ಪ್ರವವೃತೇ ಮುನೇರಾಶ್ರಮಮಂಡಲೇ |
ನ ರೋಗಾದಿಭಯಂ ಕಿಂಚಿನ್ನ ಚ ದೈತ್ಯಭಯಂ ಕ್ವಚಿತ್ || ೩೨ ||
ಸ ಮುನೇರಾಶ್ರಮೋ ಜಾತಃ ಸಮಂತಾಚ್ಛತಯೋಜನಃ |
ಅನ್ಯೇ ಚ ಪ್ರಾಣಿನೋ ಯೇಽಪಿ ತೇಽಪಿ ತತ್ರ ಸಮಾಗತಾಃ || ೩೩ ||
ತಾಂಶ್ಚ ಸರ್ವಾನ್ ಪುಪೋಷಾಯಂ ದತ್ತ್ವಾಽಭಯಮಥಾತ್ಮವಾನ್ |
ನಾನಾವಿಧೈರ್ಮಹಾಯಜ್ಞೈರ್ವಿಧಿವತ್ಕಲ್ಪಿತೈಃ ಸುರಾಃ || ೩೪ ||
ಸಂತೋಷಂ ಪರಮಂ ಪ್ರಾಪುರ್ಮುನೇಶ್ಚೈವ ಜಗುರ್ಯಶಃ |
ಸಭಾಯಾಂ ವೃತ್ರಹಾ ಭೂಯೋ ಜಗೌ ಶ್ಲೋಕಂ ಮಹಾಯಶಾಃ || ೩೫ ||
ಅಹೋ ಅಯಂ ನಃ ಕಿಲ ಕಲ್ಪಪಾದಪೋ
ಮನೋರಥಾನ್ ಪೂರಯತಿ ಪ್ರತಿಷ್ಠಿತಃ |
ನೋಚೇದಕಾಂಡೇ ಕ್ವ ಹವಿರ್ವಪಾ ವಾ
ಸುದುರ್ಲಭಾ ಯತ್ರ ತು ಜೀವನಾಶಾ || ೩೬ ||
ಇತ್ಥಂ ದ್ವಾದಶವರ್ಷಾಣಿ ಪುಪೋಷ ಮುನಿಪುಂಗವಾನ್ |
ಪುತ್ರವನ್ಮುನಿರಾಡ್ಗರ್ವಗಂಧೇನ ಪರಿವರ್ಜಿತಃ || ೩೭ ||
ಗಾಯತ್ರ್ಯಾಃ ಪರಮಂ ಸ್ಥಾನಂ ಚಕಾರ ಮುನಿಸತ್ತಮಃ |
ಯತ್ರ ಸರ್ವೈರ್ಮುನಿವರೈಃ ಪೂಜ್ಯತೇ ಜಗದಂಬಿಕಾ || ೩೮ ||
ತ್ರಿಕಾಲಂ ಪರಯಾ ಭಕ್ತ್ಯಾ ಪುರಶ್ಚರಣಕರ್ಮಭಿಃ |
ಅದ್ಯಾಪಿ ಯತ್ರ ದೇವೀ ಸಾ ಪ್ರಾತರ್ಬಾಲಾ ತು ದೃಶ್ಯತೇ || ೩೯ ||
ಮಧ್ಯಾಹ್ನೇ ಯುವತೀ ವೃದ್ಧಾ ಸಾಯಂಕಾಲೇ ತು ದೃಶ್ಯತೇ |
ತತ್ರೈಕದಾ ಸಮಾಯಾತೋ ನಾರದೋ ಮುನಿಸತ್ತಮಃ || ೪೦ ||
ರಣಯನ್ಮಹತೀಂ ಗಾಯನ್ ಗಾಯತ್ರ್ಯಾಃ ಪರಮಾನ್ ಗುಣಾನ್ |
ನಿಷಸಾದ ಸಭಾಮಧ್ಯೇ ಮುನೀನಾಂ ಭಾವಿತಾತ್ಮನಾಮ್ || ೪೧ ||
ಗೌತಮಾದಿಭಿರತ್ಯುಚ್ಚೈಃ ಪೂಜಿತಃ ಶಾಂತಮಾನಸಃ |
ಕಥಾಶ್ಚಕಾರ ವಿವಿಧಾ ಯಶಸೋ ಗೌತಮಸ್ಯ ಚ || ೪೨ ||
ಬ್ರಹ್ಮರ್ಷೇ ದೇವಸದಸಿ ದೇವರಾಟ್ ತವ ಯದ್ಯಶಃ |
ಜಗೌ ಬಹುವಿಧಂ ಸ್ವಚ್ಛಂ ಮುನಿಪೋಷಣಜಂ ಪರಮ್ || ೪೩ ||
ಶ್ರುತ್ವಾ ಶಚೀಪತೇರ್ವಾಣೀಂ ತ್ವಾಂ ದ್ರಷ್ಟುಮಹಮಾಗತಃ |
ಧನ್ಯೋಽಸಿ ತ್ವಂ ಮುನಿಶ್ರೇಷ್ಠ ಜಗದಂಬಾಪ್ರಸಾದತಃ || ೪೪ ||
ಇತ್ಯುಕ್ತ್ವಾ ಮುನಿವರ್ಯಂ ತಂ ಗಾಯತ್ರೀಸದನಂ ಯಯೌ |
ದದರ್ಶ ಜಗದಂಬಾಂ ತಾಂ ಪ್ರೇಮೋತ್ಫುಲ್ಲವಿಲೋಚನಃ || ೪೫ ||
ತುಷ್ಟಾವ ವಿಧಿವದ್ದೇವೀಂ ಜಗಾಮ ತ್ರಿದಿವಂ ಪುನಃ |
ಅಥ ತತ್ರ ಸ್ಥಿತಾ ಯೇ ತೇ ಬ್ರಾಹ್ಮಣಾ ಮುನಿಪೋಷಿತಾಃ || ೪೬ ||
ಉತ್ಕರ್ಷಂ ತು ಮುನೇಃ ಶ್ರುತ್ವಾಽಸೂಯಯಾ ಖೇದಮಾಗತಾಃ |
ಯಥಾಽಸ್ಯ ನ ಯಶೋ ಭೂಯಾತ್ ಕರ್ತವ್ಯಂ ಸರ್ವಥೈವ ಹಿ || ೪೭ ||
ಕಾಲೇ ಸಮಾಗತೇ ಪಶ್ಚಾದಿತಿ ಸರ್ವೈಸ್ತು ನಿಶ್ಚಿತಮ್ |
ತತಃ ಕಾಲೇನ ಕಿಯತಾಽಪ್ಯಭೂದ್ವೃಷ್ಟಿರ್ಧರಾತಲೇ || ೪೮ ||
ಸುಭಿಕ್ಷಮಭವತ್ ಸರ್ವದೇಶೇಷು ನೃಪಸತ್ತಮ |
ಶ್ರುತ್ವಾ ವಾರ್ತಾಂ ಸುಭಿಕ್ಷಸ್ಯ ಮಿಲಿತಾಃ ಸರ್ವವಾಡವಾಃ || ೪೯ ||
ಗೌತಮಂ ಶಪ್ತುಮುದ್ಯೋಗಂ ಹಾ ಹಾ ರಾಜನ್ ಪ್ರಚಕ್ರಿರೇ |
ಧನ್ಯೌ ತೇಷಾಂ ಚ ಪಿತರೌ ಯಯೋರುತ್ಪತ್ತಿರೀದೃಶೀ || ೫೦ ||
ಕಾಲಸ್ಯ ಮಹಿಮಾ ರಾಜನ್ ವಕ್ತುಂ ಕೇನ ಹಿ ಶಕ್ಯತೇ |
ಗೌರ್ನಿರ್ಮಿತಾ ಮಾಯಯೈಕಾ ಮುಮೂರ್ಷುರ್ಜರತೀ ನೃಪ || ೫೧ ||
ಜಗಾಮ ಸಾ ಚ ಶಾಲಾಯಾಂ ಹೋಮಕಾಲೇ ಮುನೇಸ್ತದಾ |
ಹುಂಹುಂಶಬ್ದೈರ್ವಾರಿತಾ ಸಾ ಪ್ರಾಣಾಂಸ್ತತ್ಯಾಜ ತತ್ ಕ್ಷಣೇ || ೫೨ ||
ಗೌರ್ಹತಾಽನೇನ ದುಷ್ಟೇನೇತ್ಯೇವಂ ತೇ ಚುಕ್ರುಶುರ್ದ್ವಿಜಾಃ |
ಹೋಮಂ ಸಮಾಪ್ಯ ಮುನಿರಾಡ್ವಿಸ್ಮಯಂ ಪರಮಂ ಗತಃ || ೫೩ ||
ಸಮಾಧಿಮೀಲಿತಾಕ್ಷಃ ಸಂಶ್ಚಿಂತಯಾಮಾಸ ಕಾರಣಮ್ |
ಕೃತಂ ಸರ್ವಂ ದ್ವಿಜೈರೇತದಿತಿ ಜ್ಞಾತ್ವಾ ತದೈವ ಸಃ || ೫೪ ||
ದಧಾರ ಕೋಪಂ ಪರಮಂ ಪ್ರಳಯೇ ರುದ್ರಕೋಪವತ್ |
ಶಶಾಪ ಚ ಋಷೀನ್ ಸರ್ವಾನ್ ಕೋಪಸಂರಕ್ತಲೋಚನಃ || ೫೫ ||
ವೇದಮಾತರಿ ಗಾಯತ್ರ್ಯಾಂ ತದ್ಧ್ಯಾನೇ ತನ್ಮನೋರ್ಜಪೇ |
ಭವತಾನುನ್ಮುಖಾ ಯೂಯಂ ಸರ್ವಥಾ ಬ್ರಾಹ್ಮಣಾಧಮಾಃ || ೫೬ ||
ವೇದೇ ವೇದೋಕ್ತಯಜ್ಞೇಷು ತದ್ವಾರ್ತಾಸು ತಥೈವ ಚ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೫೭ ||
ಶಿವೇ ಶಿವಸ್ಯ ಮಂತ್ರೇ ಚ ಶಿವಶಾಸ್ತ್ರೇ ತಥೈವ ಚ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೫೮ ||
ಮೂಲಪ್ರಕೃತ್ಯಾಃ ಶ್ರೀದೇವ್ಯಾಸ್ತದ್ಧ್ಯಾನೇ ತತ್ಕಥಾಸು ಚ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೫೯ ||
ದೇವೀಮಂತ್ರೇ ತಥಾ ದೇವ್ಯಾಃ ಸ್ಥಾನೇಽನುಷ್ಠಾನಕರ್ಮಣಿ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೦ ||
ದೇವ್ಯುತ್ಸವದಿದೃಕ್ಷಾಯಾಂ ದೇವೀನಾಮಾನುಕೀರ್ತನೇ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೧ ||
ದೇವೀಭಕ್ತಸ್ಯ ಸಾನ್ನಿಧ್ಯೇ ದೇವೀಭಕ್ತಾರ್ಚನೇ ತಥಾ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೨ ||
ಶಿವೋತ್ಸವದಿದೃಕ್ಷಾಯಾಂ ಶಿವಭಕ್ತಸ್ಯ ಪೂಜನೇ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೩ ||
ರುದ್ರಾಕ್ಷಂ ಬಿಲ್ವಪತ್ರೇ ಚ ತಥಾ ಶುದ್ಧೇ ಚ ಭಸ್ಮನಿ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೪ ||
ಶ್ರೌತಸ್ಮಾರ್ತಸದಾಚಾರೇ ಜ್ಞಾನಮಾರ್ಗೇ ತಥೈವ ಚ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೫ ||
ಅದ್ವೈತಜ್ಞಾನನಿಷ್ಠಾಯಾಂ ಶಾಂತಿದಾಂತ್ಯಾದಿಸಾಧನೇ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೬ ||
ನಿತ್ಯಕರ್ಮಾದ್ಯನುಷ್ಠಾನೇಽಪ್ಯಗ್ನಿಹೋತ್ರಾದಿಸಾಧನೇ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೭ ||
ಸ್ವಾಧ್ಯಾಯಾಧ್ಯಯನೇ ಚೈವ ತಥಾ ಪ್ರವಚನೇಽಪಿ ಚ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೮ ||
ಗೋದಾನಾದಿಷು ದಾನೇಷು ಪಿತೃಶ್ರಾದ್ಧೇಷು ಚೈವ ಹಿ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೬೯ ||
ಕೃಚ್ಛ್ರಚಾಂದ್ರಾಯಣೇ ಚೈವ ಪ್ರಾಯಶ್ಚಿತ್ತೇ ತಥೈವ ಚ |
ಭವತಾನುನ್ಮುಖಾ ಯೂಯಂ ಸರ್ವದಾ ಬ್ರಾಹ್ಮಣಾಧಮಾಃ || ೭೦ ||
ಶ್ರೀದೇವೀಭಿನ್ನದೇವೇಷು ಶ್ರದ್ಧಾಭಕ್ತಿಸಮನ್ವಿತಾಃ |
ಶಂಖಚಕ್ರಾದ್ಯಂಕಿತಾಶ್ಚ ಭವತ ಬ್ರಾಹ್ಮಣಾಧಮಾಃ || ೭೧ ||
ಕಾಪಾಲಿಕಮತಾಸಕ್ತಾ ಬೌದ್ಧಶಾಸ್ತ್ರರತಾಃ ಸದಾ |
ಪಾಖಂಡಾಚಾರನಿರತಾ ಭವತ ಬ್ರಾಹ್ಮಣಾಧಮಾಃ || ೭೨ ||
ಪಿತೃಮಾತೃಸುತಾಭ್ರಾತೃಕನ್ಯಾವಿಕ್ರಯಿಣಸ್ತಥಾ |
ಭಾರ್ಯಾವಿಕ್ರಯಿಣಸ್ತದ್ವದ್ಭವತ ಬ್ರಾಹ್ಮಣಾಧಮಾಃ || ೭೩ ||
ವೇದವಿಕ್ರಯಿಣಸ್ತದ್ವತ್ತೀರ್ಥವಿಕ್ರಯಿಣಸ್ತಥಾ |
ಧರ್ಮವಿಕ್ರಯಿಣಸ್ತದ್ವದ್ಭವತ ಬ್ರಾಹ್ಮಣಾಧಮಾಃ || ೭೪ ||
ಪಾಂಚರಾತ್ರೇ ಕಾಮಶಾಸ್ತ್ರೇ ತಥಾ ಕಾಪಾಲಿಕೇ ಮತೇ |
ಬೌದ್ಧೇ ಶ್ರದ್ಧಾಯುತಾ ಯೂಯಂ ಭವತ ಬ್ರಾಹ್ಮಣಾಧಮಾಃ || ೭೫ ||
ಮಾತೃಕನ್ಯಾಗಾಮಿನಶ್ಚ ಭಗಿನೀಗಾಮಿನಸ್ತಥಾ |
ಪರಸ್ತ್ರೀಲಂಪಟಾಃ ಸರ್ವೇ ಭವತ ಬ್ರಾಹ್ಮಣಾಧಮಾಃ || ೭೬ ||
ಯುಷ್ಮಾಕಂ ವಂಶಜಾತಾಶ್ಚ ಸ್ತ್ರಿಯಶ್ಚ ಪುರುಷಾಸ್ತಥಾ |
ಮದ್ದತ್ತಶಾಪದಗ್ಧಾಸ್ತೇ ಭವಿಷ್ಯಂತಿ ಭವತ್ಸಮಾಃ || ೭೭ ||
ಕಿಂ ಮಯಾ ಬಹುನೋಕ್ತೇನ ಮೂಲಪ್ರಕೃತಿರೀಶ್ವರೀ |
ಗಾಯತ್ರೀ ಪರಮಾ ಭೂಯಾದ್ಯುಷ್ಮಾಸು ಖಲು ಕೋಪಿತಾ || ೭೮ ||
ಅಂಧಕೂಪಾದಿಕುಂಡೇಷು ಯುಷ್ಮಾಕಂ ಸ್ಯಾತ್ ಸದಾ ಸ್ಥಿತಿಃ |
ವ್ಯಾಸ ಉವಾಚ |
ವಾಗ್ದಂಡಮೀದೃಶಂ ಕೃತ್ವಾಽಪ್ಯುಪಸ್ಪೃಶ್ಯ ಜಲಂ ತತಃ || ೭೯ ||
ಜಗಾಮ ದರ್ಶನಾರ್ಥಂ ಚ ಗಾಯತ್ರ್ಯಾಃ ಪರಮೋತ್ಸುಕಃ |
ಪ್ರಣನಾಮ ಮಹಾದೇವೀಂ ಸಾಽಪಿ ದೇವೀ ಪರಾತ್ಪರಾ || ೮೦ ||
ಬ್ರಾಹ್ಮಣಾನಾಂ ಕೃತಿಂ ದೃಷ್ಟ್ವಾ ಸ್ಮಯಂ ಚಿತ್ತೇ ಚಕಾರ ಹ |
ಅದ್ಯಾಪಿ ತಸ್ಯಾ ವದನಂ ಸ್ಮಯಯುಕ್ತಂ ಚ ದೃಶ್ಯತೇ || ೮೧ ||
ಉವಾಚ ಮುನಿವರ್ಯಂ ತಂ ಸ್ಮಯಮಾನಮುಖಾಂಬುಜಾ |
ಭುಜಂಗಾಯಾರ್ಪಿತಂ ದುಗ್ಧಂ ವಿಷಾಯೈವೋಪಜಾಯತೇ || ೮೨ ||
ಶಾಂತಿಂ ಕುರು ಮಹಾಭಾಗ ಕರ್ಮಣೋ ಗತಿರೀದೃಶೀ |
ಇತಿ ದೇವೀಂ ಪ್ರಣಮ್ಯಾಥ ತತೋಽಗಾತ್ಸ್ವಾಶ್ರಮಂ ಪ್ರತಿ || ೮೩ ||
ತತೋ ವಿಪ್ರೈಃ ಶಾಪದಗ್ಧೈರ್ವಿಸ್ಮೃತಾ ವೇದರಾಶಯಃ |
ಗಾಯತ್ರೀ ವಿಸ್ಮೃತಾ ಸರ್ವೈಸ್ತದದ್ಭುತಮಿವಾಭವತ್ || ೮೪ ||
ತೇ ಸರ್ವೇಽಥ ಮಿಲಿತ್ವಾ ತು ಪಶ್ಚಾತ್ತಾಪಯುತಾಸ್ತಥಾ |
ಪ್ರಣೇಮುರ್ಮುನಿವರ್ಯಂ ತಂ ದಂಡವತ್ ಪತಿತಾ ಭುವಿ || ೮೫ ||
ನೋಚುಃ ಕಿಂಚನ ವಾಕ್ಯಂ ತು ಲಜ್ಜಯಾಽಧೋಮುಖಾಃ ಸ್ಥಿತಾಃ |
ಪ್ರಸೀದೇತಿ ಪ್ರಸೀದೇತಿ ಪ್ರಸೀದೇತಿ ಪುನಃ ಪುನಃ || ೮೬ ||
ಪ್ರಾರ್ಥಯಾಮಾಸುರಭಿತಃ ಪರಿವಾರ್ಯ ಮುನೀಶ್ವರಮ್ |
ಕರುಣಾಪೂರ್ಣಹೃದಯೋ ಮುನಿಸ್ತಾನ್ ಸಮುವಾಚ ಹ || ೮೭ ||
ಕೃಷ್ಣಾವತಾರಪರ್ಯಂತಂ ಕುಂಭೀಪಾಕೇ ಭವೇತ್ ಸ್ಥಿತಿಃ |
ನ ಮೇ ವಾಕ್ಯಂ ಮೃಷಾ ಭೂಯಾದಿತಿ ಜಾನೀಥ ಸರ್ವಥಾ || ೮೮ ||
ತತಃ ಪರಂ ಕಲಿಯುಗೇ ಭುವಿ ಜನ್ಮ ಭವೇದ್ಧಿ ವಾಮ್ |
ಮದುಕ್ತಂ ಸರ್ವಮೇತತ್ತು ಭವೇದೇವ ನ ಚಾನ್ಯಥಾ || ೮೯ ||
ಮಚ್ಛಾಪಸ್ಯ ವಿಮೋಕ್ಷಾರ್ಥಂ ಯುಷ್ಮಾಕಂ ಸ್ಯಾದ್ಯದೀಷಣಾ |
ತರ್ಹಿ ಸೇವ್ಯಂ ಸದಾ ಸರ್ವೈರ್ಗಾಯತ್ರೀಪದಪಂಕಜಮ್ || ೯೦ ||
ವ್ಯಾಸ ಉವಾಚ |
ಇತಿ ಸರ್ವಾನ್ ವಿಸೃಜ್ಯಾಥ ಗೌತಮೋ ಮುನಿಸತ್ತಮಃ |
ಪ್ರಾರಬ್ಧಮಿತಿ ಮತ್ವಾ ತು ಚಿತ್ತೇ ಶಾಂತಿಂ ಜಗಾಮ ಹ || ೯೧ ||
ಏತಸ್ಮಾತ್ ಕಾರಣಾದ್ರಾಜನ್ ಗತೇ ಕೃಷ್ಣೇ ತು ಧೀಮತಿ |
ಕಲೌ ಯುಗೇ ಪ್ರವೃತ್ತೇ ತು ಕುಂಭೀಪಾಕಾತ್ತು ನಿರ್ಗತಾಃ || ೯೨ ||
ಭುವಿ ಜಾತಾ ಬ್ರಾಹ್ಮಣಾಶ್ಚ ಶಾಪದಗ್ಧಾಃ ಪುರಾ ತು ಯೇ |
ಸಂಧ್ಯಾತ್ರಯವಿಹೀನಾಶ್ಚ ಗಾಯತ್ರೀಭಕ್ತಿವರ್ಜಿತಾಃ || ೯೩ ||
ವೇದಭಕ್ತಿವಿಹೀನಾಶ್ಚ ಪಾಖಂಡಮತಗಾಮಿನಃ |
ಅಗ್ನಿಹೋತ್ರಾದಿಸತ್ಕರ್ಮಸ್ವಧಾಸ್ವಾಹಾವಿವರ್ಜಿತಾಃ || ೯೪ ||
ಮೂಲಪ್ರಕೃತಿಮವ್ಯಕ್ತಾಂ ನೈವ ಜಾನಂತಿ ಕರ್ಹಿಚಿತ್ |
ತಪ್ತಮುದ್ರಾಂಕಿತಾಃ ಕೇಚಿತ್ಕಾಮಾಚಾರರತಾಃ ಪರೇ || ೯೫ ||
ಕಾಪಾಲಿಕಾಃ ಕೌಲಿಕಾಶ್ಚ ಬೌದ್ಧಾ ಜೈನಾಸ್ತಥಾಪರೇ |
ಪಂಡಿತಾ ಅಪಿ ತೇ ಸರ್ವೇ ದುರಾಚಾರಪ್ರವರ್ತಕಾಃ || ೯೬ ||
ಲಂಪಟಾಃ ಪರದಾರೇಷು ದುರಾಚಾರಪರಾಯಣಾಃ |
ಕುಂಭೀಪಾಕಂ ಪುನಃ ಸರ್ವೇ ಯಾಸ್ಯಂತಿ ನಿಜಕರ್ಮಭಿಃ || ೯೭ ||
ತಸ್ಮಾತ್ ಸರ್ವಾತ್ಮನಾ ರಾಜನ್ ಸಂಸೇವ್ಯಾ ಪರಮೇಶ್ವರೀ |
ನ ವಿಷ್ಣೂಪಾಸನಾ ನಿತ್ಯಾ ನ ಶಿವೋಪಾಸನಾ ತಥಾ || ೯೮ ||
ನಿತ್ಯಾ ಚೋಪಾಸನಾ ಶಕ್ತೇರ್ಯಾಂ ವಿನಾ ತು ಪತತ್ಯಧಃ |
ಸರ್ವಮುಕ್ತಂ ಸಮಾಸೇನ ಯತ್ಪೃಷ್ಟಂ ತತ್ತ್ವಯಾಽನಘ || ೯೯ ||
ಅತಃ ಪರಂ ಮಣಿದ್ವೀಪವರ್ಣನಂ ಶೃಣು ಸುಂದರಮ್ |
ಯತ್ಪರಂ ಸ್ಥಾನಮಾದ್ಯಾಯಾ ಭುವನೇಶ್ಯಾ ಭವಾರಣೇಃ || ೧೦೦ ||
ಇತಿ ಶ್ರೀಮದ್ದೇವೀಭಾಗವತೇ ಮಹಾಪುರಾಣೇ ದ್ವಾದಶಸ್ಕಂಧೇ ಬ್ರಾಹ್ಮಣಾದೀನಾಂ ಗಾಯತ್ರೀಭಿನ್ನಾನ್ಯದೇವೋಪಾಸನಾಶ್ರದ್ಧಾಹೇತುನಿರೂಪಣಮ್ ನಾಮ ನವಮೋಽಧ್ಯಾಯಃ ||
ಶ್ರೀಮದ್ದೇವೀಭಾಗವತೇ ದ್ವಾದಶಸ್ಕಂಧೇ ದಶಮೋಽಧ್ಯಾಯಃ >>
ಇನ್ನಷ್ಟು ದೇವೀ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
