Read in తెలుగు / ಕನ್ನಡ / தமிழ் / देवनागरी / English (IAST)
(ಪರಾಶಕ್ತೇರಾವಿರ್ಭಾವವರ್ಣನಮ್)
ಅಥ ಶ್ರೀಮದ್ದೇವೀಭಾಗವತೇ ದ್ವಾದಶಸ್ಕಂಧೇ ದಶಮೋಽಧ್ಯಾಯಃ ||
ಜನಮೇಜಯ ಉವಾಚ |
ಭಗವನ್ ಸರ್ವಧರ್ಮಜ್ಞ ಸರ್ವಶಾಸ್ತ್ರವತಾಂ ವರ |
ದ್ವಿಜಾತೀನಾಂ ತು ಸರ್ವೇಷಾಂ ಶಕ್ತ್ಯುಪಾಸ್ತಿಃ ಶ್ರುತೀರಿತಾ || ೧ ||
ಸಂಧ್ಯಾಕಾಲತ್ರಯೇಽನ್ಯಸ್ಮಿನ್ ಕಾಲೇ ನಿತ್ಯತಯಾ ವಿಭೋ |
ತಾಂ ವಿಹಾಯ ದ್ವಿಜಾಃ ಕಸ್ಮಾದ್ಗೃಹ್ಣೀಯುಶ್ಚಾನ್ಯದೇವತಾಃ || ೨ ||
ದೃಶ್ಯಂತೇ ವೈಷ್ಣವಾಃ ಕೇಚಿದ್ಗಾಣಪತ್ಯಾಸ್ತಥಾಪರೇ |
ಕಾಪಾಲಿಕಾಶ್ಚೀನಮಾರ್ಗರತಾ ವಲ್ಕಲಧಾರಿಣಃ || ೩ ||
ದಿಗಂಬರಾಸ್ತಥಾ ಬೌದ್ಧಾಶ್ಚಾರ್ವಾಕಾ ಏವಮಾದಯಃ |
ದೃಶ್ಯಂತೇ ಬಹವೋ ಲೋಕೇ ವೇದಶ್ರದ್ಧಾವಿವರ್ಜಿತಾಃ || ೪ ||
ಕಿಮತ್ರ ಕಾರಣಂ ಬ್ರಹ್ಮಂಸ್ತದ್ಭವಾನ್ ವಕ್ತುಮರ್ಹತಿ |
ಬುದ್ಧಿಮಂತಃ ಪಂಡಿತಾಶ್ಚ ನಾನಾತರ್ಕವಿಚಕ್ಷಣಾಃ || ೫ ||
ಅಪಿ ಸಂತ್ಯೇವ ವೇದೇಷು ಶ್ರದ್ಧಯಾ ತು ವಿವರ್ಜಿತಾಃ |
ನ ಹಿ ಕಶ್ಚಿತ್ಸ್ವಕಲ್ಯಾಣಂ ಬುದ್ಧ್ಯಾ ಹಾತುಮಿಹೇಚ್ಛತಿ || ೬ ||
ಕಿಮತ್ರ ಕಾರಣಂ ತಸ್ಮಾದ್ವದ ವೇದವಿದಾಂ ವರ |
ಮಣಿದ್ವೀಪಸ್ಯ ಮಹಿಮಾ ವರ್ಣಿತೋ ಭವತಾ ಪುರಾ || ೭ ||
ಕೀದೃಕ್ತದಸ್ತಿ ಯದ್ದೇವ್ಯಾಃ ಪರಂ ಸ್ಥಾನಂ ಮಹತ್ತರಮ್ |
ತಚ್ಚಾಪಿ ವದ ಭಕ್ತಾಯ ಶ್ರದ್ದಧಾನಾಯ ಮೇಽನಘ || ೮ ||
ಪ್ರಸನ್ನಾಸ್ತು ವದಂತ್ಯೇವ ಗುರವೋ ಗುಹ್ಯಮಪ್ಯುತ |
ಸೂತ ಉವಾಚ |
ಇತಿ ರಾಜ್ಞೋ ವಚಃ ಶ್ರುತ್ವಾ ಭಗವಾನ್ ಬಾದರಾಯಣಃ || ೯ ||
ನಿಜಗಾದ ತತಃ ಸರ್ವಂ ಕ್ರಮೇಣೈವ ಮುನೀಶ್ವರಾಃ |
ಯಚ್ಛ್ರುತ್ವಾ ತು ದ್ವಿಜಾತೀನಾಂ ವೇದಶ್ರದ್ಧಾ ವಿವರ್ಧತೇ || ೧೦ ||
ವ್ಯಾಸ ಉವಾಚ |
ಸಮ್ಯಕ್ಪೃಷ್ಟಂ ತ್ವಯಾ ರಾಜನ್ ಸಮಯೇ ಸಮಯೋಚಿತಮ್ |
ಬುದ್ಧಿಮಾನಸಿ ವೇದೇಷು ಶ್ರದ್ಧಾವಾಂಶ್ಚೈವ ಲಕ್ಷ್ಯಸೇ || ೧೧ ||
ಪೂರ್ವಂ ಮದೋದ್ಧತಾ ದೈತ್ಯಾ ದೇವೈರ್ಯುದ್ಧಂ ತು ಚಕ್ರಿರೇ |
ಶತವರ್ಷಂ ಮಹಾರಾಜ ಮಹಾವಿಸ್ಮಯಕಾರಕಮ್ || ೧೨ ||
ನಾನಾಶಸ್ತ್ರಪ್ರಹರಣಂ ನಾನಾಮಾಯಾವಿಚಿತ್ರಿತಮ್ |
ಜಗತ್ ಕ್ಷಯಕರಂ ನೂನಂ ತೇಷಾಂ ಯುದ್ಧಮಭೂನ್ನೃಪ || ೧೩ ||
ಪರಾಶಕ್ತಿಕೃಪಾವೇಶಾದ್ದೇವೈರ್ದೈತ್ಯಾ ಜಿತಾ ಯುಧಿ |
ಭುವಂ ಸ್ವರ್ಗಂ ಪರಿತ್ಯಜ್ಯ ಗತಾಃ ಪಾತಾಲವೇಶ್ಮನಿ || ೧೪ ||
ತತಃ ಪ್ರಹರ್ಷಿತಾ ದೇವಾಃ ಸ್ವಪರಾಕ್ರಮವರ್ಣನಮ್ |
ಚಕ್ರುಃ ಪರಸ್ಪರಂ ಮೋಹಾತ್ಸಾಭಿಮಾನಾಃ ಸಮಂತತಃ || ೧೫ ||
ಜಯೋಽಸ್ಮಾಕಂ ಕುತೋ ನ ಸ್ಯಾದಸ್ಮಾಕಂ ಮಹಿಮಾ ಯತಃ |
ಸರ್ವೋತ್ತಮಃ ಕುತ್ರ ದೈತ್ಯಾಃ ಪಾಮರಾ ನಿಷ್ಪರಾಕ್ರಮಾಃ || ೧೬ ||
ಸೃಷ್ಟಿಸ್ಥಿತಿಕ್ಷಯಕರಾ ವಯಂ ಸರ್ವೇ ಯಶಸ್ವಿನಃ |
ಅಸ್ಮದಗ್ರೇ ಪಾಮರಾಣಾಂ ದೈತ್ಯಾನಾಂ ಚೈವ ಕಾ ಕಥಾ || ೧೭ ||
ಪರಾಶಕ್ತಿಪ್ರಭಾವಂ ತೇ ನ ಜ್ಞಾತ್ವಾ ಮೋಹಮಾಗತಾಃ |
ತೇಷಾಮನುಗ್ರಹಂ ಕರ್ತುಂ ತದೈವ ಜಗದಂಬಿಕಾ || ೧೮ ||
ಪ್ರಾದುರಾಸೀತ್ಕೃಪಾಪೂರ್ಣಾ ಯಕ್ಷರೂಪೇಣ ಭೂಮಿಪ |
ಕೋಟಿಸೂರ್ಯಪ್ರತೀಕಾಶಂ ಚಂದ್ರಕೋಟಿಸುಶೀತಲಮ್ || ೧೯ ||
ವಿದ್ಯುತ್ಕೋಟಿಸಮಾನಾಭಂ ಹಸ್ತಪಾದಾದಿವರ್ಜಿತಮ್ |
ಅದೃಷ್ಟಪೂರ್ವಂ ತದ್ದೃಷ್ಟ್ವಾ ತೇಜಃ ಪರಮಸುಂದರಮ್ || ೨೦ ||
ಸವಿಸ್ಮಯಾಸ್ತದಾ ಪ್ರೋಚುಃ ಕಿಮಿದಂ ಕಿಮಿದಂ ತ್ವಿತಿ |
ದೈತ್ಯಾನಾಂ ಚೇಷ್ಟಿತಂ ಕಿಂ ವಾ ಮಾಯಾ ಕಾಪಿ ಮಹೀಯಸೀ || ೨೧ ||
ಕೇನಚಿನ್ನಿರ್ಮಿತಾ ವಾಽಥ ದೇವಾನಾಂ ಸ್ಮಯಕಾರಿಣೀ |
ಸಂಭೂಯ ತೇ ತದಾ ಸರ್ವೇ ವಿಚಾರಂ ಚಕ್ರುರುತ್ತಮಮ್ || ೨೨ ||
ಯಕ್ಷಸ್ಯ ನಿಕಟೇ ಗತ್ವಾ ಪ್ರಷ್ಟವ್ಯಂ ಕಸ್ತ್ವಮಿತ್ಯಪಿ |
ಬಲಾಬಲಂ ತತೋ ಜ್ಞಾತ್ವಾ ಕರ್ತವ್ಯಾ ತು ಪ್ರತಿಕ್ರಿಯಾ || ೨೩ ||
ತತೋ ವಹ್ನಿಂ ಸಮಾಹೂಯ ಪ್ರೋವಾಚೇಂದ್ರಃ ಸುರಾಧಿಪಃ |
ಗಚ್ಛ ವಹ್ನೇ ತ್ವಮಸ್ಮಾಕಂ ಯತೋಽಸಿ ಮುಖಮುತ್ತಮಮ್ || ೨೪ ||
ತತೋ ಗತ್ವಾ ತು ಜಾನೀಹಿ ಕಿಮಿದಂ ಯಕ್ಷಮಿತ್ಯಪಿ |
ಸಹಸ್ರಾಕ್ಷವಚಃ ಶ್ರುತ್ವಾ ಸ್ವಪರಾಕ್ರಮಗರ್ಭಿತಮ್ || ೨೫ ||
ವೇಗಾತ್ಸ ನಿರ್ಗತೋ ವಹ್ನಿರ್ಯಯೌ ಯಕ್ಷಸ್ಯ ಸನ್ನಿಧೌ |
ತದಾ ಪ್ರೋವಾಚ ಯಕ್ಷಸ್ತಂ ತ್ವಂ ಕೋಽಸೀತಿ ಹುತಾಶನಮ್ || ೨೬ ||
ವೀರ್ಯಂ ಚ ತ್ವಯಿ ಕಿಂ ಯತ್ತದ್ವದ ಸರ್ವಂ ಮಮಾಗ್ರತಃ |
ಅಗ್ನಿರಸ್ಮಿ ತಥಾ ಜಾತವೇದಾ ಅಸ್ಮೀತಿ ಸೋಽಬ್ರವೀತ್ || ೨೭ ||
ಸರ್ವಸ್ಯ ದಹನೇ ಶಕ್ತಿರ್ಮಯಿ ವಿಶ್ವಸ್ಯ ತಿಷ್ಠತಿ |
ತದಾ ಯಕ್ಷಃ ಪರಂ ತೇಜಸ್ತದಗ್ರೇ ನಿದಧೌ ತೃಣಮ್ || ೨೮ ||
ದಹೈನಂ ಯದಿ ತೇ ಶಕ್ತಿರ್ವಿಶ್ವಸ್ಯ ದಹನೇಽಸ್ತಿ ಹಿ |
ತದಾ ಸರ್ವಬಲೇನೈವಾಕರೋದ್ಯತ್ನಂ ಹುತಾಶನಃ || ೨೯ ||
ನ ಶಶಾಕ ತೃಣಂ ದಗ್ಧುಂ ಲಜ್ಜಿತೋಽಗಾತ್ಸುರಾನ್ ಪ್ರತಿ |
ಪೃಷ್ಟೇ ದೇವೈಸ್ತು ವೃತ್ತಾಂತೇ ಸರ್ವಂ ಪ್ರೋವಾಚ ಹವ್ಯಭುಕ್ || ೩೦ ||
ವೃಥಾಽಭಿಮಾನೋ ಹ್ಯಸ್ಮಾಕಂ ಸರ್ವೇಶತ್ವಾದಿಕೇ ಸುರಾಃ |
ತತಸ್ತು ವೃತ್ರಹಾ ವಾಯುಂ ಸಮಾಹೂಯೇದಮಬ್ರವೀತ್ || ೩೧ ||
ತ್ವಯಿ ಪ್ರೋತಂ ಜಗತ್ಸರ್ವಂ ತ್ವಚ್ಚೇಷ್ಟಾಭಿಸ್ತು ಚೇಷ್ಟಿತಮ್ |
ತ್ವಂ ಪ್ರಾಣರೂಪಃ ಸರ್ವೇಷಾಂ ಸರ್ವಶಕ್ತಿವಿಧಾರಕಃ || ೩೨ ||
ತ್ವಮೇವ ಗತ್ವಾ ಜಾನೀಹಿ ಕಿಮಿದಂ ಯಕ್ಷಮಿತ್ಯಪಿ |
ನಾನ್ಯಃ ಕೋಽಪಿ ಸಮರ್ಥೋಽಸ್ತಿ ಜ್ಞಾತುಂ ಯಕ್ಷಂ ಪರಂ ಮಹಃ || ೩೩ ||
ಸಹಸ್ರಾಕ್ಷವಚಃ ಶ್ರುತ್ವಾ ಗುಣಗೌರವಗುಂಫಿತಮ್ |
ಸಾಭಿಮಾನೋ ಜಗಾಮಾಶು ಯತ್ರ ಯಕ್ಷಂ ವಿರಾಜತೇ || ೩೪ ||
ಯಕ್ಷಂ ದೃಷ್ಟ್ವಾ ತತೋ ವಾಯುಂ ಪ್ರೋವಾಚ ಮೃದುಭಾಷಯಾ |
ಕೋಽಸಿ ತ್ವಂ ತ್ವಯಿ ಕಾ ಶಕ್ತಿರ್ವದ ಸರ್ವಂ ಮಮಾಗ್ರತಃ || ೩೫ ||
ತತೋ ಯಕ್ಷವಚಃ ಶ್ರುತ್ವಾ ಗರ್ವೇಣ ಮರುದಬ್ರವೀತ್ |
ಮಾತರಿಶ್ವಾಽಹಮಸ್ಮೀತಿ ವಾಯುರಸ್ಮೀತಿ ಚಾಬ್ರವೀತ್ || ೩೬ ||
ವೀರ್ಯಂ ತು ಮಯಿ ಸರ್ವಸ್ಯ ಚಾಲನೇ ಗ್ರಹಣೇಽಸ್ತಿ ಹಿ |
ಮಚ್ಚೇಷ್ಟಯಾ ಜಗತ್ಸರ್ವಂ ಸರ್ವವ್ಯಾಪಾರವದ್ಭವೇತ್ || ೩೭ ||
ಇತಿ ಶ್ರುತ್ವಾ ವಾಯುವಾಣೀಂ ನಿಜಗಾದ ಪರಂ ಮಹಃ |
ತೃಣಮೇತತ್ತವಾಗ್ರೇ ಯತ್ತಚ್ಚಾಲಯ ಯಥೇಪ್ಸಿತಮ್ || ೩೮ ||
ನೋಚೇದ್ಗರ್ವಂ ವಿಹಾಯೈನಂ ಲಜ್ಜಿತೋ ಗಚ್ಛ ವಾಸವಮ್ |
ಶ್ರುತ್ವಾ ಯಕ್ಷವಚೋ ವಾಯುಃ ಸರ್ವಶಕ್ತಿಸಮನ್ವಿತಃ || ೩೯ ||
ಉದ್ಯೋಗಮಕರೋತ್ತಚ್ಚ ಸ್ವಸ್ಥಾನಾನ್ನ ಚಚಾಲ ಹ |
ಲಜ್ಜಿತೋಽಗಾದ್ದೇವಪಾರ್ಶ್ವೇ ಹಿತ್ವಾ ಗರ್ವಂ ಸ ಚಾನಿಲಃ || ೪೦ ||
ವೃತ್ತಾಂತಮವದತ್ಸರ್ವಂ ಗರ್ವನಿರ್ವಾಪಕಾರಣಮ್ |
ನೈತಜ್ಜ್ಞಾತುಂ ಸಮರ್ಥಾಃ ಸ್ಮ ಮಿಥ್ಯಾಗರ್ವಾಭಿಮಾನಿನಃ || ೪೧ ||
ಅಲೌಕಿಕಂ ಭಾತಿ ಯಕ್ಷಂ ತೇಜಃ ಪರಮದಾರುಣಮ್ |
ತತಃ ಸರ್ವೇ ಸುರಗಣಾಃ ಸಹಸ್ರಾಕ್ಷಂ ಸಮೂಚಿರೇ || ೪೨ ||
ದೇವರಾಡಸಿ ಯಸ್ಮಾತ್ತ್ವಂ ಯಕ್ಷಂ ಜಾನೀಹಿ ತತ್ತ್ವತಃ |
ತತ ಇಂದ್ರೋ ಮಹಾಗರ್ವಾತ್ತದ್ಯಕ್ಷಂ ಸಮುಪಾದ್ರವತ್ || ೪೩ ||
ಪ್ರಾದ್ರವಚ್ಚ ಪರಂ ತೇಜೋ ಯಕ್ಷರೂಪಂ ಪರಾತ್ಪರಮ್ |
ಅಂತರ್ಧಾನಂ ತತಃ ಪ್ರಾಪ ತದ್ಯಕ್ಷಂ ವಾಸವಾಗ್ರತಃ || ೪೪ ||
ಅತೀವ ಲಜ್ಜಿತೋ ಜಾತೋ ವಾಸವೋ ದೇವರಾಡಪಿ |
ಯಕ್ಷಸಂಭಾಷಣಾಭಾವಾಲ್ಲಘುತ್ವಂ ಪ್ರಾಪ ಚೇತಸಿ || ೪೫ ||
ಅತಃ ಪರಂ ನ ಗಂತವ್ಯಂ ಮಯಾ ತು ಸುರಸಂಸದಿ |
ಕಿಂ ಮಯಾ ತತ್ರ ವಕ್ತವ್ಯಂ ಸ್ವಲಘುತ್ವಂ ಸುರಾನ್ಪ್ರತಿ || ೪೬ ||
ದೇಹತ್ಯಾಗೋ ವರಸ್ತಸ್ಮಾನ್ಮಾನೋ ಹಿ ಮಹತಾಂ ಧನಮ್ |
ಮಾನೇ ನಷ್ಟೇ ಜೀವಿತಂ ತು ಮೃತತುಲ್ಯಂ ನ ಸಂಶಯಃ || ೪೭ ||
ಇತಿ ನಿಶ್ಚಿತ್ಯ ತತ್ರೈವ ಗರ್ವಂ ಹಿತ್ವಾ ಸುರೇಶ್ವರಃ |
ಚರಿತ್ರಮೀದೃಶಂ ಯಸ್ಯ ತಮೇವ ಶರಣಂ ಗತಃ || ೪೮ ||
ತಸ್ಮಿನ್ನೇವ ಕ್ಷಣೇ ಜಾತಾ ವ್ಯೋಮವಾಣೀ ನಭಸ್ತಲೇ |
ಮಾಯಾಬೀಜಂ ಸಹಸ್ರಾಕ್ಷ ಜಪ ತೇನ ಸುಖೀ ಭವ || ೪೯ ||
ತತೋ ಜಜಾಪ ಪರಮಂ ಮಾಯಾಬೀಜಂ ಪರಾತ್ಪರಮ್ |
ಲಕ್ಷವರ್ಷಂ ನಿರಾಹಾರೋ ಧ್ಯಾನಮೀಲಿತಲೋಚನಃ || ೫೦ ||
ಅಕಸ್ಮಾಚ್ಚೈತ್ರಮಾಸೀಯನವಮ್ಯಾಂ ಮಧ್ಯಗೇ ರವೌ |
ತದೇವಾವಿರಭೂತ್ತೇಜಸ್ತಸ್ಮಿನ್ನೇವ ಸ್ಥಲೇ ಪುನಃ || ೫೧ ||
ತೇಜೋಮಂಡಲಮಧ್ಯೇ ತು ಕುಮಾರೀಂ ನವಯೌವನಾಮ್ |
ಭಾಸ್ವಜ್ಜಪಾಪ್ರಸೂನಾಭಾಂ ಬಾಲಕೋಟಿರವಿಪ್ರಭಾಮ್ || ೫೨ ||
ಬಾಲಶೀತಾಂಶಮುಕುಟಾಂ ವಸ್ತ್ರಾಂತರ್ವ್ಯಂಜಿತಸ್ತನೀಮ್ |
ಚತುರ್ಭಿರ್ವರಹಸ್ತೈಸ್ತು ವರಪಾಶಾಂಕುಶಾಭಯಾನ್ || ೫೩ ||
ದಧಾನಾಂ ರಮಣೀಯಾಂಗೀಂ ಕೋಮಲಾಂಗಲತಾಂ ಶಿವಾಮ್ |
ಭಕ್ತಕಲ್ಪದ್ರುಮಾಮಂಬಾಂ ನಾನಾಭೂಷಣಭೂಷಿತಾಮ್ || ೫೪ ||
ತ್ರಿನೇತ್ರಾಂ ಮಲ್ಲಿಕಾಮಾಲಾಕಬರೀಜೂಟಶೋಭಿತಾಮ್ |
ಚತುರ್ದಿಕ್ಷು ಚತುರ್ವೇದೈರ್ಮೂರ್ತಿಮದ್ಭಿರಭಿಷ್ಟುತಾಮ್ || ೫೫ ||
ದಂತಚ್ಛಟಾಭಿರಭಿತಃ ಪದ್ಮರಾಗೀಕೃತಕ್ಷಮಾಮ್ |
ಪ್ರಸನ್ನಸ್ಮೇರವದನಾಂ ಕೋಟಿಕಂದರ್ಪಸುಂದರಾಮ್ || ೫೬ ||
ರಕ್ತಾಂಬರಪರೀಧಾನಾಂ ರಕ್ತಚಂದನಚರ್ಚಿತಾಮ್ |
ಉಮಾಭಿಧಾನಾಂ ಪುರತೋ ದೇವೀಂ ಹೈಮವತೀಂ ಶಿವಾಮ್ || ೫೭ ||
ನಿರ್ವ್ಯಾಜಕರುಣಾಮೂರ್ತಿಂ ಸರ್ವಕಾರಣಕಾರಣಾಮ್ |
ದದರ್ಶ ವಾಸವಸ್ತತ್ರ ಪ್ರೇಮಗದ್ಗದಿತಾಂತರಃ || ೫೮ ||
ಪ್ರೇಮಾಶ್ರುಪೂರ್ಣನಯನೋ ರೋಮಾಂಚಿತತನುಸ್ತತಃ |
ದಂಡವತ್ ಪ್ರಣನಾಮಾಥ ಪಾದಯೋರ್ಜಗದೀಶಿತುಃ || ೫೯ ||
ತುಷ್ಟಾವ ವಿವಿಧೈಃ ಸ್ತೋತ್ರೈರ್ಭಕ್ತಿಸನ್ನತಕಂಧರಃ |
ಉವಾಚ ಪರಮಪ್ರೀತಃ ಕಿಮಿದಂ ಯಕ್ಷಮಿತ್ಯಪಿ || ೬೦ ||
ಪ್ರಾದುರ್ಭೂತಂ ಚ ಕಸ್ಮಾತ್ತದ್ವದ ಸರ್ವಂ ಸುಶೋಭನೇ |
ಇತಿ ತಸ್ಯ ವಚಃ ಶ್ರುತ್ವಾ ಪ್ರೋವಾಚ ಕರುಣಾರ್ಣವಾ || ೬೧ ||
ರೂಪಂ ಮದೀಯಂ ಬ್ರಹ್ಮೈತತ್ಸರ್ವಕಾರಣಕಾರಣಮ್ |
ಮಾಯಾಧಿಷ್ಠಾನಭೂತಂ ತು ಸರ್ವಸಾಕ್ಷಿ ನಿರಾಮಯಮ್ || ೬೨ ||
ಸರ್ವೇ ವೇದಾ ಯತ್ಪದಮಾಮನಂತಿ
ತಪಾಂಸಿ ಸರ್ವಾಣಿ ಚ ಯದ್ವದಂತಿ |
ಯದಿಚ್ಛಂತೋ ಬ್ರಹ್ಮಚರ್ಯಂ ಚರಂತಿ
ತತ್ತೇ ಪದಂ ಸಂಗ್ರಹೇಣ ಬ್ರವೀಮಿ || ೬೩ ||
ಓಮಿತ್ಯೇಕಾಕ್ಷರಂ ಬ್ರಹ್ಮ ತದೇವಾಹುಶ್ಚ ಹ್ರೀಂಮಯಮ್ |
ದ್ವೇ ಬೀಜೇ ಮಮ ಮಂತ್ರೌ ಸ್ತೋ ಮುಖ್ಯತ್ವೇನ ಸುರೋತ್ತಮ || ೬೪ ||
ಭಾಗದ್ವಯವತೀ ಯಸ್ಮಾತ್ ಸೃಜಾಮಿ ಸಕಲಂ ಜಗತ್ |
ತತ್ರೈಕಭಾಗಃ ಸಂಪ್ರೋಕ್ತಃ ಸಚ್ಚಿದಾನಂದನಾಮಕಃ || ೬೫ ||
ಮಾಯಾಪ್ರಕೃತಿಸಂಜ್ಞಸ್ತು ದ್ವಿತೀಯೋ ಭಾಗ ಈರಿತಃ |
ಸಾ ಚ ಮಾಯಾ ಪರಾ ಶಕ್ತಿಃ ಶಕ್ತಿಮತ್ಯಹಮೀಶ್ವರೀ || ೬೬ ||
ಚಂದ್ರಸ್ಯ ಚಂದ್ರಿಕೇವೇಯಂ ಮಮಾಭಿನ್ನತ್ವಮಾಗತಾ |
ಸಾಮ್ಯಾವಸ್ಥಾತ್ಮಿಕಾ ಚೈಷಾ ಮಾಯಾ ಮಮ ಸುರೋತ್ತಮ || ೬೭ ||
ಪ್ರಲಯೇ ಸರ್ವಜಗತೋ ಮದಭಿನ್ನೈವ ತಿಷ್ಠತಿ |
ಪ್ರಾಣಿಕರ್ಮಪರೀಪಾಕವಶತಃ ಪುನರೇವ ಹಿ || ೬೮ ||
ರೂಪಂ ತದೇವಮವ್ಯಕ್ತಂ ವ್ಯಕ್ತೀಭಾವಮುಪೈತಿ ಚ |
ಅಂತರ್ಮುಖಾ ತು ಯಾಽವಸ್ಥಾ ಸಾ ಮಾಯೇತ್ಯಭಿಧೀಯತೇ || ೬೯ ||
ಬಹಿರ್ಮುಖಾ ತು ಯಾ ಮಾಯಾ ತಮಃಶಬ್ದೇನ ಸೋಚ್ಯತೇ |
ಬಹಿರ್ಮುಖಾತ್ತಮೋರೂಪಾಜ್ಜಾಯತೇ ಸತ್ತ್ವಸಂಭವಃ || ೭೦ ||
ರಜೋಗುಣಸ್ತದೈವ ಸ್ಯಾತ್ ಸರ್ಗಾದೌ ಸುರಸತ್ತಮ |
ಗುಣತ್ರಯಾತ್ಮಕಾಃ ಪ್ರೋಕ್ತಾ ಬ್ರಹ್ಮವಿಷ್ಣುಮಹೇಶ್ವರಾಃ || ೭೧ ||
ರಜೋಗುಣಾಧಿಕೋ ಬ್ರಹ್ಮಾ ವಿಷ್ಣುಃ ಸತ್ತ್ವಾಧಿಕೋ ಭವೇತ್ |
ತಮೋಗುಣಾಧಿಕೋ ರುದ್ರಃ ಸರ್ವಕಾರಣರೂಪಧೃಕ್ || ೭೨ ||
ಸ್ಥೂಲದೇಹೋ ಭವೇದ್ಬ್ರಹ್ಮಾ ಲಿಂಗದೇಹೋ ಹರಿಃ ಸ್ಮೃತಃ |
ರುದ್ರಸ್ತು ಕಾರಣೋ ದೇಹಸ್ತುರೀಯಾ ತ್ವಹಮೇವ ಹಿ || ೭೩ ||
ಸಾಮ್ಯಾವಸ್ಥಾ ತು ಯಾ ಪ್ರೋಕ್ತಾ ಸರ್ವಾಂತರ್ಯಾಮಿರೂಪಿಣೀ |
ಅತ ಊರ್ಧ್ವಂ ಪರಂ ಬ್ರಹ್ಮ ಮದ್ರೂಪಂ ರೂಪವರ್ಜಿತಮ್ || ೭೪ ||
ನಿರ್ಗುಣಂ ಸಗುಣಂ ಚೇತಿ ದ್ವಿಧಾ ಮದ್ರೂಪಮುಚ್ಯತೇ |
ನಿರ್ಗುಣಂ ಮಾಯಯಾ ಹೀನಂ ಸಗುಣಂ ಮಾಯಯಾ ಯುತಮ್ || ೭೫ ||
ಸಾಽಹಂ ಸರ್ವಂ ಜಗತ್ಸೃಷ್ಟ್ವಾ ತದಂತಃ ಸಂಪ್ರವಿಶ್ಯ ಚ |
ಪ್ರೇರಯಾಮ್ಯನಿಶಂ ಜೀವಂ ಯಥಾಕರ್ಮ ಯಥಾಶ್ರುತಮ್ || ೭೬ ||
ಸೃಷ್ಟಿಸ್ಥಿತಿತಿರೋಧಾನೇ ಪ್ರೇರಯಾಮ್ಯಹಮೇವ ಹಿ |
ಬ್ರಹ್ಮಾಣಂ ಚ ತಥಾ ವಿಷ್ಣುಂ ರುದ್ರಂ ವೈ ಕಾರಣಾತ್ಮಕಮ್ || ೭೭ ||
ಮದ್ಭಯಾದ್ವಾತಿ ಪವನೋ ಭೀತ್ಯಾ ಸೂರ್ಯಶ್ಚ ಗಚ್ಛತಿ |
ಇಂದ್ರಾಗ್ನಿಮೃತ್ಯವಸ್ತದ್ವತ್ಸಾಽಹಂ ಸರ್ವೋತ್ತಮಾ ಸ್ಮೃತಾ || ೭೮ ||
ಮತ್ಪ್ರಸಾದಾದ್ಭವದ್ಭಿಸ್ತು ಜಯೋ ಲಬ್ಧೋಽಸ್ತಿ ಸರ್ವಥಾ |
ಯುಷ್ಮಾನಹಂ ನರ್ತಯಾಮಿ ಕಾಷ್ಠಪುತ್ತಲಿಕೋಪಮಾನ್ || ೭೯ ||
ಕದಾಚಿದ್ದೇವವಿಜಯಂ ದೈತ್ಯಾನಾಂ ವಿಜಯಂ ಕ್ವಚಿತ್ |
ಸ್ವತಂತ್ರಾ ಸ್ವೇಚ್ಛಯಾ ಸರ್ವಂ ಕುರ್ವೇ ಕರ್ಮಾನುರೋಧತಃ || ೮೦ ||
ತಾಂ ಮಾಂ ಸರ್ವಾತ್ಮಿಕಾಂ ಯೂಯಂ ವಿಸ್ಮೃತ್ಯ ನಿಜಗರ್ವತಃ |
ಅಹಂಕಾರಾವೃತಾತ್ಮಾನೋ ಮೋಹಮಾಪ್ತಾ ದುರಂತಕಮ್ || ೮೧ ||
ಅನುಗ್ರಹಂ ತತಃ ಕರ್ತುಂ ಯುಷ್ಮದ್ದೇಹಾದನುತ್ತಮಮ್ |
ನಿಃಸೃತಂ ಸಹಸಾ ತೇಜೋ ಮದೀಯಂ ಯಕ್ಷಮಿತ್ಯಪಿ || ೮೨ ||
ಅತಃ ಪರಂ ಸರ್ವಭಾವೈರ್ಹಿತ್ವಾ ಗರ್ವಂ ತು ದೇಹಜಮ್ |
ಮಾಮೇವ ಶರಣಂ ಯಾತ ಸಚ್ಚಿದಾನಂದರೂಪಿಣೀಮ್ || ೮೩ ||
ವ್ಯಾಸ ಉವಾಚ |
ಇತ್ಯುಕ್ತ್ಯಾ ಚ ಮಹಾದೇವೀ ಮೂಲಪ್ರಕೃತಿರೀಶ್ವರೀ |
ಅಂತರ್ಧಾನಂ ಗತಾ ಸದ್ಯೋ ಭಕ್ತ್ಯಾ ದೇವೈರಭಿಷ್ಟುತಾ || ೮೪ ||
ತತಃ ಸರ್ವೇ ಸ್ವಗರ್ವಂ ತು ವಿಹಾಯ ಪದಪಂಕಜಮ್ |
ಸಮ್ಯಗಾರಾಧಯಾಮಾಸುರ್ಭಗವತ್ಯಾಃ ಪರಾತ್ಪರಮ್ || ೮೫ ||
ತ್ರಿಸಂಧ್ಯಂ ಸರ್ವದಾ ಸರ್ವೇ ಗಾಯತ್ರೀಜಪತತ್ಪರಾಃ |
ಯಜ್ಞಭಾಗಾದಿಭಿಃ ಸರ್ವೇ ದೇವೀಂ ನಿತ್ಯಂ ಸಿಷೇವಿರೇ || ೮೬ ||
ಏವಂ ಸತ್ಯಯುಗೇ ಸರ್ವೇ ಗಾಯತ್ರೀಜಪತತ್ಪರಾಃ |
ತಾರಹೃಲ್ಲೇಖಯೋಶ್ಚಾಪಿ ಜಪೇ ನಿಷ್ಣಾತಮಾನಸಾಃ || ೮೭ ||
ನ ವಿಷ್ಣೂಪಾಸನಾ ನಿತ್ಯಾ ವೇದೇ ನೋಕ್ತಾ ತು ಕುತ್ರಚಿತ್ |
ನ ವಿಷ್ಣುದೀಕ್ಷಾ ನಿತ್ಯಾಸ್ತಿ ಶಿವಸ್ಯಾಪಿ ತಥೈವ ಚ || ೮೮ ||
ಗಾಯತ್ರ್ಯುಪಾಸನಾ ನಿತ್ಯಾ ಸರ್ವವೇದೈಃ ಸಮೀರಿತಾ |
ಯಯಾ ವಿನಾ ತ್ವಧಃಪಾತೋ ಬ್ರಾಹ್ಮಣಸ್ಯಾಸ್ತಿ ಸರ್ವಥಾ || ೮೯ ||
ತಾವತಾ ಕೃತಕೃತ್ಯತ್ವಂ ನಾನ್ಯಾಪೇಕ್ಷಾ ದ್ವಿಜಸ್ಯ ಹಿ |
ಗಾಯತ್ರೀಮಾತ್ರನಿಷ್ಣಾತೋ ದ್ವಿಜೋ ಮೋಕ್ಷಮವಾಪ್ನುಯಾತ್ || ೯೦ ||
ಕುರ್ಯಾದನ್ಯನ್ನ ವಾ ಕುರ್ಯಾದಿತಿ ಪ್ರಾಹ ಮನುಃ ಸ್ವಯಮ್ |
ವಿಹಾಯ ತಾಂ ತು ಗಾಯತ್ರೀಂ ವಿಷ್ಣೂಪಾಸ್ತಿಪರಾಯಣಾಃ || ೯೧ ||
ಶಿವೋಪಾಸ್ತಿರತೋ ವಿಪ್ರೋ ನರಕಂ ಯಾತಿ ಸರ್ವಥಾ |
ತಸ್ಮಾದಾದ್ಯಯುಗೇ ರಾಜನ್ ಗಾಯತ್ರೀಜಪತತ್ಪರಾಃ |
ದೇವೀಪದಾಂಬುಜರತಾ ಆಸನ್ ಸರ್ವೇ ದ್ವಿಜೋತ್ತಮಾಃ || ೯೨ ||
ಇತಿ ಶ್ರೀಮದ್ದೇವೀಭಾಗವತೇ ಮಹಾಪುರಾಣೇ ದ್ವಾದಶಸ್ಕಂಧೇ ಪರಾಶಕ್ತೇರಾವಿರ್ಭಾವವರ್ಣನಂ ನಾಮ ಅಷ್ಟಮೋಽಧ್ಯಾಯಃ ||
ಇನ್ನಷ್ಟು ದೇವೀ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
