Read in తెలుగు / ಕನ್ನಡ / தமிழ் / देवनागरी / English (IAST)
ಕಂಡುರುವಾಚ |
ನಾರಾಯಣ ಹರೇ ಕೃಷ್ಣ ಶ್ರೀವತ್ಸಾಂಕ ಜಗತ್ಪತೇ |
ಜಗದ್ಬೀಜ ಜಗದ್ಧಾಮ ಜಗತ್ಸಾಕ್ಷಿನ್ನಮೋಽಸ್ತು ತೇ || ೧ ||
ಅವ್ಯಕ್ತ ಜಿಷ್ಣೋ ಪ್ರಭವ ಪ್ರಧಾನಪುರುಷೋತ್ತಮ |
ಪುಂಡರೀಕಾಕ್ಷ ಗೋವಿಂದ ಲೋಕನಾಥ ನಮೋಽಸ್ತು ತೇ || ೨ ||
ಹಿರಣ್ಯಗರ್ಭ ಶ್ರೀನಾಥ ಪದ್ಮನಾಭ ಸನಾತನ |
ಭೂಗರ್ಭ ಧ್ರುವ ಈಶಾನ ಹೃಷೀಕೇಶ ನಮೋಽಸ್ತು ತೇ || ೩ ||
ಅನಾದ್ಯಂತಾಮೃತಾಜೇಯ ಜಯ ತ್ವಂ ಜಯತಾಂ ವರ |
ಅಜಿತಾಖಂಡ ಶ್ರೀಕೃಷ್ಣ ಶ್ರೀನಿವಾಸ ನಮೋಽಸ್ತು ತೇ || ೪ ||
ಪರ್ಜನ್ಯಧರ್ಮಕರ್ತಾ ಚ ದುಷ್ಪಾರ ದುರಧಿಷ್ಠಿತ |
ದುಃಖಾರ್ತಿನಾಶನ ಹರೇ ಜಲಶಾಯಿನ್ನಮೋಽಸ್ತು ತೇ || ೫ ||
ಭೂತಪಾವ್ಯಕ್ತ ಭೂತೇಶ ಭೂತತತ್ತ್ವೈರನಾಕುಲ |
ಭೂತಾಧಿವಾಸ ಭೂತಾತ್ಮನ್ ಭೂತಗರ್ಭ ನಮೋಽಸ್ತು ತೇ || ೬ ||
ಯಜ್ಞಯಜ್ವನ್ ಯಜ್ಞಧರ ಯಜ್ಞಧಾತಾಽಭಯಪ್ರದ |
ಯಜ್ಞಗರ್ಭ ಹಿರಣ್ಯಾಂಗ ಪೃಶ್ನಿಗರ್ಭ ನಮೋಽಸ್ತು ತೇ || ೭ ||
ಕ್ಷೇತ್ರಜ್ಞ ಕ್ಷೇತ್ರಭೃತ್ ಕ್ಷೇತ್ರೀ ಕ್ಷೇತ್ರಹಾ ಕ್ಷೇತ್ರಕೃದ್ವಶೀ |
ಕ್ಷೇತ್ರಾತ್ಮನ್ ಕ್ಷೇತ್ರರಹಿತ ಕ್ಷೇತ್ರಸ್ರಷ್ಟ್ರೇ ನಮೋಽಸ್ತು ತೇ || ೮ ||
ಗುಣಾಲಯ ಗುಣಾವಾಸ ಗುಣಾಶ್ರಯ ಗುಣಾವಹ |
ಗುಣಭೋಕ್ತೃ ಗುಣಾರಾಮ ಗುಣತ್ಯಾಗಿನ್ನಮೋಽಸ್ತು ತೇ || ೯ ||
ತ್ವಂ ವಿಷ್ಣುಸ್ತ್ವಂ ಹರಿಶ್ಚಕ್ರೀ ತ್ವಂ ಜಿಷ್ಣುಸ್ತ್ವಂ ಜನಾರ್ದನಃ |
ತ್ವಂ ಭೂತಸ್ತ್ವಂ ವಷಟ್ಕಾರಸ್ತ್ವಂ ಭವ್ಯಸ್ತ್ವಂ ಭವತ್ಪ್ರಭುಃ || ೧೦ ||
ತ್ವಂ ಭೂತಕೃತ್ತ್ವಮವ್ಯಕ್ತಸ್ತ್ವಂ ಭವೋ ಭೂತಭೃದ್ಭವಾನ್ |
ತ್ವಂ ಭೂತಭಾವನೋ ದೇವಸ್ತ್ವಾಮಾಹುರಜಮೀಶ್ವರಮ್ || ೧೧ ||
ತ್ವಮನಂತಃ ಕೃತಜ್ಞಸ್ತ್ವಂ ಪ್ರಕೃತಿಸ್ತ್ವಂ ವೃಷಾಕಪಿಃ |
ತ್ವಂ ರುದ್ರಸ್ತ್ವಂ ದುರಾಧರ್ಷಸ್ತ್ವಮಮೋಘಸ್ತ್ವಮೀಶ್ವರಃ || ೧೨ ||
ತ್ವಂ ವಿಶ್ವಕರ್ಮಾ ಜಿಷ್ಣುಸ್ತ್ವಂ ತ್ವಂ ಶಂಭುಸ್ತ್ವಂ ವೃಷಾಕೃತಿಃ |
ತ್ವಂ ಶಂಕರಸ್ತ್ವಮುಶನಾ ತ್ವಂ ಸತ್ಯಂ ತ್ವಂ ತಪೋ ಜನಃ || ೧೩ ||
ತ್ವಂ ವಿಶ್ವಜೇತಾ ತ್ವಂ ಶರ್ಮ ತ್ವಂ ಶರಣ್ಯಸ್ತ್ವಮಕ್ಷರಮ್ |
ತ್ವಂ ಶಂಭುಸ್ತ್ವಂ ಸ್ವಯಂಭೂಶ್ಚ ತ್ವಂ ಜ್ಯೇಷ್ಠಸ್ತ್ವಂ ಪರಾಯಣಃ || ೧೪ ||
ತ್ವಮಾದಿತ್ಯಸ್ತ್ವಮೋಂಕಾರಸ್ತ್ವಂ ಪ್ರಾಣಸ್ತ್ವಂ ತಮಿಸ್ರಹಾ |
ತ್ವಂ ಪರ್ಜನ್ಯಸ್ತ್ವಂ ಪ್ರಥಿತಸ್ತ್ವಂ ವೇಧಾಸ್ತ್ವಂ ಸುರೇಶ್ವರಃ || ೧೫ ||
ತ್ವಮೃಗ್ಯಜುಃ ಸಾಮಚೈವ ತ್ವಮಾತ್ಮಾ ಸಮ್ಮತೋ ಭವಾನ್ |
ತ್ವಮಗ್ನಿಸ್ತ್ವಂ ಚ ಪವನಸ್ತ್ವಮಾಪೋ ವಸುಧಾ ಭವಾನ್ || ೧೬ ||
ತ್ವಂ ಸ್ರಷ್ಟಾ ತ್ವಂ ತಥಾ ಭೋಕ್ತಾ ಹೋತಾ ತ್ವಂ ಚ ಹವಿಃ ಕ್ರತುಃ |
ತ್ವಂ ಪ್ರಭುಸ್ತ್ವಂ ವಿಭುಃ ಶ್ರೇಷ್ಠಸ್ತ್ವಂ ಲೋಕಪತಿರಚ್ಯುತಃ || ೧೭ ||
ತ್ವಂ ಸರ್ವದರ್ಶನಃ ಶ್ರೀಮಾಂಸ್ತ್ವಂ ಸರ್ವದಮನೋಽರಿಹಾ |
ತ್ವಮಹಸ್ತ್ವಂ ತಥಾರಾತ್ರಿಸ್ತ್ವಾಮಾಹುರ್ವತ್ಸರಂ ಬುಧಾಃ || ೧೮ ||
ತ್ವಂ ಕಾಲಸ್ತ್ವಂ ಕಲಾ ಕಾಷ್ಠಾ ತ್ವಂ ಮುಹೂರ್ತಃ ಕ್ಷಣಾ ಲವಾಃ |
ತ್ವಂ ಬಾಲಸ್ತ್ವಂ ತಥಾ ವೃದ್ಧಸ್ತ್ವಂ ಪುಮಾನ್ ಸ್ತ್ರೀ ನಪುಂಸಕಃ || ೧೯ ||
ತ್ವಂ ವಿಶ್ವಯೋನಿಸ್ತ್ವಂ ಚಕ್ಷುಸ್ತ್ವಂ ವೇದಾಂಗಂ ತ್ವಮವ್ಯಯಃ |
ತ್ವಂ ವೇದವೇದಸ್ತ್ವಂ ಧಾತಾ ವಿಧಾತಾ ತ್ವಂ ಸಮಾಹಿತಃ || ೨೦ ||
ತ್ವಂ ಜಲನಿಧಿರಾಮೂಲಂ ತ್ವಂ ಧಾತಾ ತ್ವಂ ಪುನರ್ವಸುಃ |
ತ್ವಂ ವೈದ್ಯಸ್ತ್ವಂ ಧೃತಾತ್ಮಾ ಚ ತ್ವಮತೀಂದ್ರಿಯಗೋಚರಃ || ೨೧ ||
ತ್ವಮಗ್ರಣೀರ್ಗ್ರಾಮಣೀಸ್ತ್ವಂ ತ್ವಂ ಸುಪರ್ಣಸ್ತ್ವಮಾದಿಮಾನ್ |
ತ್ವಂ ಸಂಗ್ರಹಸ್ತ್ವಂ ಸುಮಹತ್ ತ್ವಂ ಧೃತಾತ್ಮಾ ತ್ವಮಚ್ಯುತಃ || ೨೨ ||
ತ್ವಂ ಯಮಸ್ತ್ವಂ ಚ ನಿಯಮಸ್ತ್ವಂ ಪ್ರಾಂಶುಸ್ತ್ವಂ ಚತುರ್ಭುಜಃ |
ತ್ವಮೇವಾನ್ನಾಂತರಾತ್ಮಾ ತ್ವಂ ಪರಮಾತ್ಮಾ ತ್ವಮುಚ್ಯತೇ || ೨೩ ||
ತ್ವಂ ಗುರುಸ್ತ್ವಂ ಗುರುತಮಸ್ತ್ವಂ ವಾಮಸ್ತ್ವಂ ಪ್ರದಕ್ಷಿಣಃ |
ತ್ವಂ ಪಿಪ್ಪಲಸ್ತ್ವಮಗಮಸ್ತ್ವಂ ವ್ಯಕ್ತಸ್ತ್ವಂ ಪ್ರಜಾಪತಿಃ || ೨೪ ||
ಹಿರಣ್ಯನಾಭಸ್ತ್ವಂ ದೇವಸ್ತ್ವಂ ಶಶೀ ತ್ವಂ ಪ್ರಜಾಪತಿಃ |
ಅನಿರ್ದೇಶ್ಯವಪುಸ್ತ್ವಂ ವೈ ತ್ವಂ ಯಮಸ್ತ್ವಂ ಸುರಾರಿಹಾ || ೨೫ ||
ತ್ವಂ ಚ ಸಂಕರ್ಷಣೋ ದೇವಸ್ತ್ವಂ ಕರ್ತಾ ತ್ವಂ ಸನಾತನಃ |
ತ್ವಂ ವಾಸುದೇವೋಽಮೇಯಾತ್ಮಾ ತ್ವಮೇವ ಗುಣವರ್ಜಿತಃ || ೨೬ ||
ತ್ವಂ ಜ್ಯೇಷ್ಠಸ್ತ್ವಂ ವರಿಷ್ಠಸ್ತ್ವಂ ತ್ವಂ ಸಹಿಷ್ಣುಶ್ಚ ಮಾಧವಃ |
ಸಹಸ್ರಶೀರ್ಷಾ ತ್ವಂ ದೇವಸ್ತ್ವಮವ್ಯಕ್ತಃ ಸಹಸ್ರದೃಕ್ || ೨೭ ||
ಸಹಸ್ರಪಾದಸ್ತ್ವಂ ದೇವಸ್ತ್ವಂ ವಿರಾಟ್ತ್ವಂ ಸುರಪ್ರಭುಃ |
ತ್ವಮೇವ ತಿಷ್ಠಸೇ ಭೂಯೋ ದೇವದೇವ ದಶಾಂಗುಳಃ || ೨೮ ||
ಯದ್ಭೂತಂ ತತ್ತ್ವಮೇವೋಕ್ತಃ ಪುರುಷಃ ಶಕ್ರ ಉತ್ತಮಃ |
ಯದ್ಭಾವ್ಯಂ ತತ್ತ್ವಮೀಶಾನಸ್ತ್ವಮೃತಸ್ತ್ವಂ ತಥಾಽಮೃತಃ || ೨೯ ||
ತ್ವತ್ತೋ ರೋಹತ್ಯಯಂ ಲೋಕೋ ಮಹೀಯಾಂಸ್ತ್ವಮನುತ್ತಮಃ |
ತ್ವಂ ಜ್ಯಾಯಾನ್ ಪುರುಷಸ್ತ್ವಂ ಚ ತ್ವಂ ದೇವ ದಶಧಾ ಸ್ಥಿತಃ || ೩೦ ||
ವಿಶ್ವಭೂತಶ್ಚತುರ್ಭಾಗೋ ನವಭಾಗೋಽಮೃತೋ ದಿವಿ |
ನವಭಾಗೋಽಂತರಿಕ್ಷಸ್ಥಃ ಪೌರುಷೇಯಃ ಸನಾತನಃ || ೩೧ ||
ಭಾಗದ್ವಯಂ ಚ ಭೂಸಂಸ್ಥಂ ಚತುರ್ಭಾಗೋಽಪ್ಯಭೂದಿಹ |
ತ್ವತ್ತೋ ಯಜ್ಞಾಃ ಸಂಭವಂತಿ ಜಗತೋ ವೃಷ್ಟಿಕಾರಣಮ್ || ೩೨ ||
ತ್ವತ್ತೋ ವಿರಾಟ್ಸಮುತ್ಪನ್ನೋ ಜಗತೋ ಹೃದಿ ಯಃ ಪುಮಾನ್ |
ಸೋಽತಿರಿಚ್ಯತ ಭೂತೇಭ್ಯಸ್ತೇಜಸಾ ಯಶಸಾ ಶ್ರಿಯಾ || ೩೩ ||
ತ್ವತ್ತಃ ಸುರಾಣಾಮಾಹಾರಃ ಪೃಷದಾಜ್ಯಮಜಾಯತ |
ಗ್ರಾಮ್ಯಾರಣ್ಯಾಶ್ಚೌಷಧಯಸ್ತ್ವತ್ತಃ ಪಶುಮೃಗಾದಯಃ || ೩೪ ||
ಧ್ಯೇಯಧ್ಯಾನಪರಸ್ತ್ವಂ ಚ ಕೃತವಾನಸಿ ಚೌಷಧೀಃ |
ತ್ವಂ ದೇವದೇವ ಸಪ್ತಾಸ್ಯ ಕಾಲಾಖ್ಯೋ ದೀಪ್ತವಿಗ್ರಹಃ || ೩೫ ||
ಜಂಗಮಾಜಂಗಮಂ ಸರ್ವಂ ಜಗದೇತಚ್ಚರಾಚರಮ್ |
ತ್ವತ್ತಃ ಸರ್ವಮಿದಂ ಜಾತಂ ತ್ವಯಿ ಸರ್ವಂ ಪ್ರತಿಷ್ಠಿತಮ್ || ೩೬ ||
ಅನಿರುದ್ಧಸ್ತ್ವಂ ಮಾಧವಸ್ತ್ವಂ ಪ್ರದ್ಯುಮ್ನಃ ಸುರಾರಿಹಾ |
ದೇವ ಸರ್ವಸುರಶ್ರೇಷ್ಠ ಸರ್ವಲೋಕಪರಾಯಣ || ೩೭ ||
ತ್ರಾಹಿ ಮಾಮರವಿಂದಾಕ್ಷ ನಾರಾಯಣ ನಮೋಽಸ್ತು ತೇ |
ನಮಸ್ತೇ ಭಗವನ್ ವಿಷ್ಣೋ ನಮಸ್ತೇ ಪುರುಷೋತ್ತಮ || ೩೮ ||
ನಮಸ್ತೇ ಸರ್ವಲೋಕೇಶ ನಮಸ್ತೇ ಕಮಲಾಲಯ |
ಗುಣಾಲಯ ನಮಸ್ತೇಽಸ್ತು ನಮಸ್ತೇಽಸ್ತು ಗುಣಾಕರ || ೩೯ ||
ವಾಸುದೇವ ನಮಸ್ತೇಽಸ್ತು ನಮಸ್ತೇಽಸ್ತು ಸುರೋತ್ತಮ |
ಜನಾರ್ದನ ನಮಸ್ತೇಽಸ್ತು ನಮಸ್ತೇಽಸ್ತು ಸನಾತನ || ೪೦ ||
ನಮಸ್ತೇ ಯೋಗಿನಾಂ ಗಮ್ಯ ಯೋಗಾವಾಸ ನಮೋಽಸ್ತು ತೇ |
ಗೋಪತೇ ಶ್ರೀಪತೇ ವಿಷ್ಣೋ ನಮಸ್ತೇಽಸ್ತು ಮರುತ್ಪತೇ || ೪೧ ||
ಜಗತ್ಪತೇ ಜಗತ್ಸೂತೇ ನಮಸ್ತೇ ಜ್ಞಾನಿನಾಂ ಪತೇ |
ದಿವಸ್ಪತೇ ನಮಸ್ತೇಽಸ್ತು ನಮಸ್ತೇಽಸ್ತು ಮಹೀಪತೇ || ೪೨ ||
ನಮಸ್ತೇ ಮಧುಹಂತ್ರೇ ಚ ನಮಸ್ತೇ ಪುಷ್ಕರೇಕ್ಷಣ |
ಕೈಟಭಘ್ನ ನಮಸ್ತೇಽಸ್ತು ಸುಬ್ರಹ್ಮಣ್ಯ ನಮೋಽಸ್ತು ತೇ || ೪೩ ||
ನಮೋಽಸ್ತು ತೇ ಮಹಾಮೀನ ಶ್ರುತಿಪೃಷ್ಠಧರಾಚ್ಯುತ |
ಸಮುದ್ರಸಲಿಲಕ್ಷೋಭ ಪದ್ಮಜಾಹ್ಲಾದಕಾರಿಣೇ || ೪೪ ||
ಅಶ್ವಶೀರ್ಷ ಮಹಾಘೋಣ ಮಹಾಪುರುಷವಿಗ್ರಹ |
ಮಧುಕೈಟಭಹಂತ್ರೇ ಚ ನಮಸ್ತೇ ತುರಗಾನನ || ೪೫ ||
ಮಹಾಕಮಠಭೋಗಾಯ ಪೃಥಿವ್ಯುದ್ಧರಣಾಯ ಚ |
ವಿಧೃತಾದ್ರಿಸ್ವರೂಪಾಯ ಮಹಾಕೂರ್ಮಾಯ ತೇ ನಮಃ || ೪೬ ||
ನಮೋ ಮಹಾವರಾಹಾಯ ಪೃಥಿವ್ಯುದ್ಧಾರಕಾರಿಣೇ |
ನಮಶ್ಚಾಽಽದಿವರಾಹಾಯ ವಿಶ್ವರೂಪಾಯ ವೇಧಸೇ || ೪೭ ||
ನಮೋಽನಂತಾಯ ಸೂಕ್ಷ್ಮಾಯ ಮುಖ್ಯಾಯ ಚ ವರಾಯ ಚ |
ಪರಮಾಣುಸ್ವರೂಪಾಯ ಯೋಗಿಗಮ್ಯಾಯ ತೇ ನಮಃ || ೪೮ ||
ತಸ್ಮೈ ನಮಃ ಪರಮ ಕಾರಣಕಾರಣಾಯ
ಯೋಗೀಂದ್ರವೃತ್ತನಿಲಯಾಯ ಸುದುರ್ವಿದಾಯ |
ಕ್ಷೀರಾರ್ಣವಾಶ್ರಿತಮಹಾಹಿಸುತಲ್ಪಗಾಯ
ತುಭ್ಯಂ ನಮಃ ಕನಕರತ್ನಸುಕುಂಡಲಾಯ || ೪೯ ||
ಇತಿ ಶ್ರೀಬ್ರಹ್ಮಪುರಾಣೇ ಸಪ್ತತ್ಯಧಿಕಶತತಮೋಽಧ್ಯಾಯೇ ಕಂಡುಮುನಿ ಕೃತ ಶ್ರೀ ವಿಷ್ಣು ಸ್ತುತಿಃ ||
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
