Read in తెలుగు / ಕನ್ನಡ / தமிழ் / देवनागरी / English (IAST)
ಭವಾನಿ ತ್ವಾಂ ವಂದೇ ಭವಮಹಿಷಿ ಸಚ್ಚಿತ್ಸುಖವಪುಃ
ಪರಾಕಾರಾಂ ದೇವೀಮಮೃತಲಹರೀಮೈಂದವಕಳಾಮ್ |
ಮಹಾಕಾಲಾತೀತಾಂ ಕಲಿತಸರಣೀಕಲ್ಪಿತತನುಂ
ಸುಧಾಸಿಂಧೋರಂತರ್ವಸತಿಮನಿಶಂ ವಾಸರಮಯೀಮ್ || ೧ ||
ಮನಸ್ತತ್ತ್ವಂ ಜಿತ್ವಾ ನಯನಮಥ ನಾಸಾಗ್ರಘಟಿತಂ
ಪುನರ್ವ್ಯಾವೃತ್ತಾಕ್ಷಃ ಸ್ವಯಮಪಿ ಯದಾ ಪಶ್ಯತಿ ಪರಾಮ್ |
ತದಾನೀಮೇವಾಸ್ಯ ಸ್ಫುರತಿ ಬಹಿರಂತರ್ಭಗವತೀ
ಪರಾನಂದಾಕಾರಾ ಪರಶಿವಪರಾ ಕಾಚಿದಪರಾ || ೨ ||
ಮನೋಮಾರ್ಗಂ ಜಿತ್ವಾ ಮರುತ ಇಹ ನಾಡೀಗಣಜುಷೋ
ನಿರುಧ್ಯಾರ್ಕಂ ಸೇಂದುಂ ದಹನಮಪಿ ಸಂಜ್ವಾಲ್ಯ ಶಿಖಯಾ |
ಸುಷುಮ್ಣಾಂ ಸಂಯೋಜ್ಯ ಶ್ಲಥಯತಿ ಚ ಷಡ್ಗ್ರಂಥಿಶಶಿನಂ
ತವಾಜ್ಞಾಚಕ್ರಸ್ಥಂ ವಿಲಯತಿ ಮಹಾಯೋಗಿಸಮಯೀ || ೩ ||
ಯದಾ ತೌ ಚಂದ್ರಾರ್ಕೌ ನಿಜಸದನಸಂರೋಧನವಶಾ-
-ದಶಕ್ತೌ ಪೀಯೂಷಸ್ರವಣಹರಣೇ ಸಾ ಚ ಭುಜಗೀ |
ಪ್ರಬುದ್ಧಾ ಕ್ಷುತ್ಕ್ರುದ್ಧಾ ದಶತಿ ಶಶಿನಂ ಬೈಂದವಗತಂ
ಸುಧಾಧಾರಾಸಾರೈಃ ಸ್ನಪಯಸಿ ತನುಂ ಬೈಂದವಕಲೇ || ೪ ||
ಪೃಥಿವ್ಯಾಪಸ್ತೇಜಃ ಪವನಗಗನೇ ತತ್ಪ್ರಕೃತಯಃ
ಸ್ಥಿತಾಸ್ತನ್ಮಾತ್ರಾಸ್ತಾ ವಿಷಯದಶಕಂ ಮಾನಸಮಿತಿ |
ತತೋ ಮಾಯಾ ವಿದ್ಯಾ ತದನು ಚ ಮಹೇಶಃ ಶಿವ ಇತಃ
ಪರಂ ತತ್ತ್ವಾತೀತಂ ಮಿಲಿತವಪುರಿಂದೋಃ ಪರಕಲಾ || ೫ ||
ಕುಮಾರೀ ಯನ್ಮಂದ್ರಂ ಧ್ವನತಿ ಚ ತತೋ ಯೋಷಿದಪರಾ
ಕುಲಂ ತ್ಯಕ್ತ್ವಾ ರೌತಿ ಸ್ಫುಟತಿ ಚ ಮಹಾಕಾಲಭುಜಗೀ |
ತತಃ ಪಾತಿವ್ರತ್ಯಂ ಭಜತಿ ದಹರಾಕಾಶಕಮಲೇ
ಸುಖಾಸೀನಾ ಯೋಷಾ ಭವಸಿ ಭವಸೀತ್ಕಾರರಸಿಕಾ || ೬ ||
ತ್ರಿಕೋಣಂ ತೇ ಕೌಲಾಃ ಕುಲಗೃಹಮಿತಿ ಪ್ರಾಹುರಪರೇ
ಚತುಷ್ಕೋಣಂ ಪ್ರಾಹುಃ ಸಮಯಿನ ಇಮೇ ಬೈಂದವಮಿತಿ |
ಸುಧಾಸಿಂಧೌ ತಸ್ಮಿನ್ ಸುರಮಣಿಗೃಹೇ ಸೂರ್ಯಶಶಿನೋ-
-ರಗಮ್ಯೇ ರಶ್ಮೀನಾಂ ಸಮಯಸಹಿತೇ ತ್ವಂ ವಿಹರಸೇ || ೭ ||
ತ್ರಿಖಂಡಂ ತೇ ಚಕ್ರಂ ಶುಚಿರವಿಶಶಾಂಕಾತ್ಮಕತಯಾ
ಮಯೂಖೈಃ ಷಟ್ತ್ರಿಂಶದ್ದಶಯುತತಯಾ ಖಂಡಕಲಿತೈಃ |
ಪೃಥಿವ್ಯಾದೌ ತತ್ತ್ವೇ ಪೃಥಗುದಿತವದ್ಭಿಃ ಪರಿವೃತಂ
ಭವೇನ್ಮೂಲಾಧಾರಾತ್ಪ್ರಭೃತಿ ತವ ಷಟ್ಚಕ್ರಸದನಮ್ || ೮ ||
ಶತಂ ಚಾಷ್ಟೌ ವಹ್ನೇಃ ಶತಮಪಿ ಕಳಾಃ ಷೋಡಶ ರವೇಃ
ಶತಂ ಷಟ್ ಚ ತ್ರಿಂಶತ್ಸಿತಮಯಮಯೂಖಾಶ್ಚರಣಜಾಃ |
ಯ ಏತೇ ಷಷ್ಟಿಶ್ಚ ತ್ರಿಶತಮಭವಂಸ್ತ್ವಚ್ಚರಣಜಾ
ಮಹಾಕೌಲೇಸ್ತಸ್ಮಾನ್ನ ಹಿ ತವ ಶಿವೇ ಕಾಲಕಲನಾ || ೯ ||
ತ್ರಿಕೋಣಂ ಚಾಧಾರಂ ತ್ರಿಪುರತನು ತೇಽಷ್ಟಾರಮನಘೇ
ಭವೇತ್ ಸ್ವಾಧಿಷ್ಠಾನಂ ಪುನರಪಿ ದಶಾರಂ ಮಣಿಪುರಮ್ |
ದಶಾರಂ ತೇ ಸಂವಿತ್ಕಮಲಮಥ ಮನ್ವಶ್ರಕಮುಮೇ
ವಿಶುದ್ಧಂ ಸ್ಯಾದಾಜ್ಞಾ ಶಿವ ಇತಿ ತತೋ ಬೈಂದವಗೃಹಮ್ || ೧೦ ||
ತ್ರಿಕೋಣೇ ತೇ ವೃತ್ತತ್ರಿತಯಮಿಭಕೋಣೇ ವಸುದಳಂ
ಕಳಾಶ್ರಂ ಮಿಶ್ರೇರೇ ಭವತಿ ಭುವನಾಶ್ರೇ ಚ ಭುವನಮ್ |
ಚತುಶ್ಚಕ್ರಂ ಶೈವಂ ನಿವಸತಿ ಭಗೇ ಶಾಕ್ತಿಕಮುಮೇ
ಪ್ರಧಾನೈಕ್ಯಂ ಷೋಢಾ ಭವತಿ ಚ ತಯೋಃ ಶಕ್ತಿಶಿವಯೋಃ || ೧೧ ||
ಕಳಾಯಾಂ ಬಿಂದ್ವೈಕ್ಯಂ ತದನು ಚ ತಯೋರ್ನಾದವಿಭವೇ
ತಯೋರ್ನಾದೇನೈಕ್ಯಂ ತದನು ಚ ಕಳಾಯಾಮಪಿ ತಯೋಃ |
ತಯೋರ್ಬಿಂದಾವೈಕ್ಯಂ ತ್ರಿತಯವಿಭವೈಕ್ಯಂ ಪರಶಿವೇ
ತದೇವಂ ಷೋಢೈಕ್ಯಂ ಭವತಿ ಹಿ ಸಪರ್ಯಾ ಸಮಯಿನಾಮ್ || ೧೨ ||
ಕಳಾ ನಾದೋ ಬಿಂದುಃ ಕ್ರಮಶ ಇಹ ವರ್ಣಾಶ್ಚ ಚರಣಂ
ಷಡಬ್ಜಂ ಚಾಧಾರಪ್ರಭೃತಿಕಮಮೀಷಾಂ ಚ ಮಿಲನಮ್ |
ತದೇವಂ ಷೋಢೈಕ್ಯಂ ಭವತಿ ಖಲು ಯೇಷಾಂ ಸಮಯಿನಾಂ
ಚತುರ್ಧೈಕ್ಯಂ ತೇಷಾಂ ಭವತಿ ಹಿ ಸಪರ್ಯಾ ಸಮಯಿನಾಮ್ || ೧೩ ||
ತಡಿಲ್ಲೇಖಾಮಧ್ಯೇ ಸ್ಫುರತಿ ಮಣಿಪೂರೇ ಭಗವತೀ
ಚತುರ್ಧೈಕ್ಯಂ ತೇಷಾಂ ಭವತಿ ಚ ಚತುರ್ಬಾಹುರುದಿತಾ |
ಧನುರ್ಬಾಣಾನಿಕ್ಷೂದ್ಭವಕುಸುಮಜಾನಂಕುಶವರಂ
ತಥಾ ಪಾಶಂ ಬಿಭ್ರತ್ಯುದಿತರವಿಬಿಂಬಾಕೃತಿರುಚಿಃ || ೧೪ ||
ಭವತ್ಯೈಕ್ಯಂ ಷೋಢಾ ಭವತಿ ಭಗವತ್ಯಾಃ ಸಮಯಿನಾಂ
ಮರುತ್ವತ್ಕೋದಂಡದ್ಯುತಿನಿಯುತಭಾಸಾ ಸಮರುಚಿಃ |
ಭವತ್ಪಾಣಿವ್ರಾತೋ ದಶವಿಧ ಇತೀದಂ ಮಣಿಪುರೇ
ಭವಾನಿ ಪ್ರತ್ಯಕ್ಷಂ ತವ ವಪುರುಪಾಸ್ತೇ ನ ಹಿ ಪರಮ್ || ೧೫ ||
ಇತ್ಯೈಕ್ಯನಿರೂಪಣಮ್ ||
ಭವಾನಿ ಶ್ರೀಹಸ್ತೈರ್ವಹಸಿ ಫಣಿಪಾಶಂ ಸೃಣಿಮಥೋ
ಧನುಃ ಪೌಂಡ್ರಂ ಪೌಷ್ಪಂ ಶರಮಥ ಜಪಸ್ರಕ್ಛುಕವರೌ |
ಅಥ ದ್ವಾಭ್ಯಾಂ ಮುದ್ರಾಮಭಯವರದಾನೈಕರಸಿಕಾಂ
ಕ್ವಣದ್ವೀಣಾಂ ದ್ವಾಭ್ಯಾಂ ತ್ವಮುರಸಿ ಕರಾಭ್ಯಾಂ ಚ ಬಿಭೃಷೇ || ೧೬ ||
ತ್ರಿಕೋಣೈರಷ್ಟಾರಂ ತ್ರಿಭಿರಪಿ ದಶಾರಂ ಸಮುದಭೂ-
-ದ್ದಶಾರಂ ಭೂಗೇಹಾದಪಿ ಚ ಭುವನಾಶ್ರಂ ಸಮಭವತ್ |
ತತೋಽಭೂನ್ನಾಗಾರಂ ನೃಪತಿದಳಮಸ್ಮಾತ್ ತ್ರಿವಲಯಂ
ಚತುರ್ದ್ವಾಃಪ್ರಾಕಾರತ್ರಿತಯಮಿದಮೇವಾಂಬ ಶರಣಮ್ || ೧೭ ||
ಚತುಃಷಷ್ಟಿಸ್ತಂತ್ರಾಣ್ಯಪಿ ಕುಲಮತಂ ನಿಂದಿತಮಭೂ-
-ದ್ಯದೇತನ್ಮಿಶ್ರಾಖ್ಯಂ ಮತಮಪಿ ಭವೇನ್ನಿಂದಿತಮಿಹ |
ಶುಭಾಖ್ಯಾಃ ಪಂಚೈತಾಃ ಶ್ರುತಿಸರಣಿಸಿದ್ಧಾಃ ಪ್ರಕೃತಯೋ
ಮಹಾವಿದ್ಯಾಸ್ತಾಸಾಂ ಭವತಿ ಪರಮಾರ್ಥೋ ಭಗವತೀ || ೧೮ ||
ಸ್ಮರೋ ಮಾರೋ ಮಾರಃ ಸ್ಮರ ಇತಿ ಪರೋ ಮಾರಮದನಃ
ಸ್ಮರಾನಂಗಾಶ್ಚೇತಿ ಸ್ಮರಮದನಮಾರಾಃ ಸ್ಮರ ಇತಿ |
ತ್ರಿಖಂಡಃ ಖಂಡಾಂತೇ ಕಲಿತಭುವನೇಶ್ಯಕ್ಷರಯುತ-
-ಶ್ಚತುಃ ಪಂಚಾರ್ಣಾಸ್ತೇ ತ್ರಯ ಇತಿ ಚ ಪಂಚಾಕ್ಷರಮನುಃ || ೧೯ ||
ತ್ರಿಖಂಡೇ ತ್ವನ್ಮಂತ್ರೇ ಶಶಿಸವಿತೃವಹ್ನ್ಯಾತ್ಮಕತಯಾ
ಸ್ವರಾಶ್ಚಂದ್ರೇ ಲೀನಾಃ ಸವಿತರಿ ಕಳಾಃ ಕಾದಯ ಇಹ |
ಯಕಾರಾದ್ಯಾ ವಹ್ನಾವಥ ಕಷಯುಗಂ ಬೈಂದವಗೃಹೇ
ನಿಲೀನಂ ಸಾದಾಖ್ಯೇ ಶಿವಯುವತಿ ನಿತ್ಯೈಂದವಕಳೇ || ೨೦ ||
ಕಕಾರಾಕಾರಾಭ್ಯಾಂ ಸ್ವರಗಣಮವಷ್ಟಭ್ಯ ನಿಖಿಲಂ
ಕಳಾಪ್ರತ್ಯಾಹಾರಾತ್ ಸಕಲಮಭವದ್ವ್ಯಂಜನಗಣಃ |
ತ್ರಿಖಂಡೇ ಸ್ಯಾತ್ ಪ್ರತ್ಯಾಹರಣಮಿದಮನ್ವಕ್ಕಷಯುಗಂ
ಕ್ಷಕಾರಶ್ಚಾಕಾಶೇಽಕ್ಷರತನುತಯಾ ಚಾಕ್ಷರಮಿತಿ || ೨೧ ||
ವಿದೇಹೇಂದ್ರಾಪತ್ಯಂ ಶ್ರುತ ಇಹ ಋಷಿರ್ಯಸ್ಯ ಚ ಮನೋ-
-ರಯಂ ಚಾರ್ಥಃ ಸಮ್ಯಕ್ ಶ್ರುತಿಶಿರಸಿ ತೈತ್ತಿರ್ಯಕಋಚಿ |
ಋಷಿಂ ಹಿತ್ವಾ ಚಾಸ್ಯಾ ಹೃದಯಕಮಲೇ ನೈತಮೃಷಿಮಿ-
-ತ್ಯೃಚಾಭ್ಯುಕ್ತಃ ಪೂಜಾವಿಧಿರಿಹ ಭವತ್ಯಾಃ ಸಮಯಿನಾಮ್ || ೨೨ ||
ತ್ರಿಖಂಡಸ್ತ್ವನ್ಮಂತ್ರಸ್ತವ ಚ ಸರಘಾಯಾಂ ನಿವಿಶತೇ
ಶ್ರಿಯೋ ದೇವ್ಯಾಃ ಶೇಷೋ ಯತ ಇಹ ಸಮಸ್ತಾಃ ಶಶಿಕಳಾಃ |
ತ್ರಿಖಂಡೇ ತ್ರೈಖಂಡ್ಯಂ ನಿವಸತಿ ಸಮಂತ್ರೇ ಚ ಸುಭಗೇ
ಷಡಬ್ಜಾರಣ್ಯಾನೀ ತ್ರಿತಯಯುತಖಂಡೇ ನಿವಸತಿ || ೨೩ ||
ತ್ರಯಂ ಚೈತತ್ ಸ್ವಾಂತೇ ಪರಮಶಿವಪರ್ಯಂಕನಿಲಯೇ
ಪರೇ ಸಾದಾಖ್ಯೇಽಸ್ಮಿನ್ನಿವಸತಿ ಚತುರ್ಧೈಕ್ಯಕಲನಾತ್ |
ಸ್ವರಾಸ್ತೇ ಲೀನಾಸ್ತೇ ಭಗವತಿ ಕಳಾಶ್ರೇ ಚ ಸಕಲಾಃ
ಕಕಾರಾದ್ಯಾ ವೃತ್ತೇ ತದನು ಚತುರಶ್ರೇ ಚ ಯಮುಖಾಃ || ೨೪ ||
ಹಲೋ ಬಿಂದುರ್ವರ್ಗಾಷ್ಟಕಮಿಭದಳಂ ಶಾಂಭವವಪು-
-ಶ್ಚತುಶ್ಚಕ್ರಂ ಶಕ್ರಸ್ಥಿತಮನುಭಯಂ ಶಕ್ತಿಶಿವಯೋಃ |
ನಿಶಾದ್ಯಾ ದರ್ಶಾದ್ಯಾಃ ಶ್ರುತಿನಿಗದಿತಾಃ ಪಂಚದಶಧಾ
ಭವೇಯುರ್ನಿತ್ಯಾಸ್ತಾಸ್ತವ ಜನನಿ ಮಂತ್ರಾಕ್ಷರಗಣಾಃ || ೨೫ ||
ಇಮಾಸ್ತಾಃ ಷೋಡಶ್ಯಾಸ್ತವ ಚ ಸರಘಾಯಾಂ ಶಶಿಕಳಾ-
-ಸ್ವರೂಪಾಯಾಂ ಲೀನಾ ನಿವಸತಿ ತವ ಶ್ರೀಶಶಿಕಳಾ |
ಅಯಂ ಪ್ರತ್ಯಾಹಾರಃ ಶ್ರುತ ಇಹ ಕಳಾವ್ಯಂಜನಗಣಃ
ಕಕಾರೇಣಾಕಾರಃ ಸ್ವರಗಣಮಶೇಷಂ ಕಥಯತಿ || ೨೬ ||
ಕ್ಷಕಾರಃ ಪಂಚಾಶತ್ಕಳ ಇತಿ ಹಲೋ ಬೈಂದವಗೃಹಂ
ಕಕಾರಾದೂರ್ಧ್ವಂ ಸ್ಯಾಜ್ಜನನಿ ತವ ನಾಮಾಕ್ಷರಮಿತಿ |
ಭವೇತ್ಪೂಜಾಕಾಲೇ ಮಣಿಖಚಿತಭೂಷಾಭಿರಭಿತಃ
ಪ್ರಭಾಭಿರ್ವ್ಯಾಲೀಢಂ ಭವತಿ ಮಣಿಪೂರಂ ಸರಸಿಜಮ್ || ೨೭ ||
ವದಂತ್ಯೇಕೇ ವೃದ್ಧಾ ಮಣಿರಿತಿ ಜಲಂ ತೇನ ನಿಬಿಡಂ
ಪರೇ ತು ತ್ವದ್ರೂಪಂ ಮಣಿಧನುರಿತೀದಂ ಸಮಯಿನಃ |
ಅನಾಹತ್ಯಾ ನಾದಃ ಪ್ರಭವತಿ ಸುಷುಮ್ಣಾಧ್ವಜನಿತ-
-ಸ್ತದಾ ವಾಯೋಸ್ತತ್ರ ಪ್ರಭವ ಇದಮಾಹುಃ ಸಮಯಿನಃ || ೨೮ ||
ತದೇತತ್ತೇ ಸಂವಿತ್ಕಮಲಮಿತಿ ಸಂಜ್ಞಾಂತರಮುಮೇ
ಭವೇತ್ಸಂವಿತ್ಪೂಜಾ ಭವತಿ ಕಮಲೇಽಸ್ಮಿನ್ ಸಮಯಿನಾಮ್ |
ವಿಶುದ್ಧ್ಯಾಖ್ಯೇ ಚಕ್ರೇ ವಿಯದುದಿತಮಾಹುಃ ಸಮಯಿನಃ
ಸದಾಪೂರ್ವೋ ದೇವಃ ಶಿವ ಇತಿ ಹಿಮಾನೀಸಮತನುಃ || ೨೯ ||
ತ್ವದೀಯೈರುದ್ದ್ಯೋತೈರ್ಭವತಿ ಚ ವಿಶುದ್ಧ್ಯಾಖ್ಯಸದನಂ
ಭವೇತ್ಪೂಜಾ ದೇವ್ಯಾ ಹಿಮಕರಕಳಾಭಿಃ ಸಮಯಿನಾಮ್ |
ಸಹಸ್ರಾರೇ ಚಕ್ರೇ ನಿವಸತಿ ಕಳಾಪಂಚದಶಕಂ
ತದೇತನ್ನಿತ್ಯಾಖ್ಯಂ ಭ್ರಮತಿ ಸಿತಪಕ್ಷೇ ಸಮಯಿನಾಮ್ || ೩೦ ||
ಅತಃ ಶುಕ್ಲೇ ಪಕ್ಷೇ ಪ್ರತಿದಿನಮಿಹ ತ್ವಾಂ ಭಗವತೀಂ
ನಿಶಾಯಾಂ ಸೇವಂತೇ ನಿಶಿ ಚರಮಭಾಗೇ ಸಮಯಿನಃ |
ಶುಚಿಃ ಸ್ವಾಧಿಷ್ಠಾನೇ ರವಿರುಪರಿ ಸಂವಿತ್ಸರಸಿಜೇ
ಶಶೀ ಚಾಜ್ಞಾಚಕ್ರೇ ಹರಿಹರವಿಧಿಗ್ರಂಥಯ ಇಮೇ || ೩೧ ||
ಕಳಾಯಾಃ ಷೋಡಶ್ಯಾಃ ಪ್ರತಿಫಲಿತಬಿಂಬೇನ ಸಹಿತಂ
ತದೀಯೈಃ ಪೀಯೂಷೈಃ ಪುನರಧಿಕಮಾಪ್ಲಾವಿತತನುಃ |
ಸಿತೇ ಪಕ್ಷೇ ಸರ್ವಾಸ್ತಿಥಯ ಇಹ ಕೃಷ್ಣೇಽಪಿ ಚ ಸಮಾ
ಯದಾ ಚಾಮಾವಾಸ್ಯಾ ಭವತಿ ನ ಹಿ ಪೂಜಾ ಸಮಯಿನಾಮ್ || ೩೨ ||
ಇಡಾಯಾಂ ಪಿಂಗಳ್ಯಾಂ ಚರತ ಇಹ ತೌ ಸೂರ್ಯಶಶಿನೌ
ತಮಸ್ಯಾಧಾರೇ ತೌ ಯದಿ ತು ಮಿಳಿತೌ ಸಾ ತಿಥಿರಮಾ |
ತದಾಜ್ಞಾಚಕ್ರಸ್ಥಂ ಶಿಶಿರಕರಬಿಂಬೇ ರವಿನಿಭಂ
ದೃಢವ್ಯಾಲೀಢಂ ಸದ್ವಿಗಳಿತಸುಧಾಸಾರವಿಸರಮ್ || ೩೩ ||
ಮಹಾವ್ಯೋಮಸ್ಥೇಂದೋರಮೃತಲಹರೀಪ್ಲಾವಿತತನುಃ
ಪ್ರಶುಷ್ಯದ್ವೈ ನಾಡೀಪ್ರಕರಮನಿಶಂ ಪ್ಲಾವಯತಿ ತತ್ |
ಯದಾಜ್ಞಾಯಾಂ ವಿದ್ಯುನ್ನಿಯುತನಿಯುತಾಭಾಕ್ಷರಮಯೀ
ಸ್ಥಿತಾ ವಿದ್ಯುಲ್ಲೇಖಾ ಭಗವತಿ ವಿಧಿಗ್ರಂಥಿಮಭಿನತ್ || ೩೪ ||
ತತೋ ಗತ್ವಾ ಜ್ಯೋತ್ಸ್ನಾಮಯಸಮಯಲೋಕಂ ಸಮಯಿನಾಂ
ಪರಾಖ್ಯಾ ಸಾದಾಖ್ಯಾ ಜಯತಿ ಶಿವತತ್ತ್ವೇನ ಮಿಳಿತಾ |
ಸಹಸ್ರಾರೇ ಪದ್ಮೇ ಶಿಶಿರಮಹಸಾಂ ಬಿಂಬಮಪರಂ
ತದೇವ ಶ್ರೀಚಕ್ರಂ ಸರಘಮಿತಿ ತದ್ಬೈಂದವಮಿತಿ || ೩೫ ||
ವದಂತ್ಯೇಕೇ ಸಂತಃ ಪರಶಿವಪದೇ ತತ್ತ್ವಮಿಳಿತೇ
ತತಸ್ತ್ವಂ ಷಡ್ವಿಂಶೀ ಭವಸಿ ಶಿವಯೋರ್ಮೇಳನವಪುಃ |
ತ್ರಿಖಂಡೇಽಸ್ಮಿನ್ ಸ್ವಾಂತೇ ಪರಮಪದಪರ್ಯಂಕಸದನೇ
ಪರೇ ಸಾದಾಖ್ಯೇಽಸ್ಮಿನ್ನಿವಸತಿ ಚತುರ್ಧೈಕ್ಯಕಲನಾತ್ || ೩೬ ||
ಕ್ಷಿತೌ ವಹ್ನಿರ್ವಹ್ನೌ ವಸುದಳಜಲೇ ದಿಙ್ಮರುತಿ ದಿಕ್-
-ಕಳಾಶ್ರೇ ಮನ್ವಶ್ರಂ ದೃಶಿ ವಸುರಥೋ ರಾಜಕಮಲೇ |
ಪ್ರತಿದ್ವೈತಗ್ರಂಥಿಸ್ತದುಪರಿ ಚತುರ್ದ್ವಾರಸಹಿತಂ
ಮಹೀಚಕ್ರಂ ಚೈಕಂ ಭವತಿ ಭಗಕೋಣೈಕ್ಯಕಲನಾತ್ || ೩೭ ||
ಇತಿ ಮಂತ್ರಚಕ್ರೈಕ್ಯಮ್ ||
ಷಡಬ್ಜಾರಣ್ಯೇ ತ್ವಾಂ ಸಮಯಿನ ಇಮೇ ಪಂಚಕಸಮಾಂ
ಯದಾ ಸಂವಿದ್ರೂಪಾಂ ವಿದಧತಿ ಚ ಷೋಢೈಕ್ಯಕಲಿತಾಮ್ |
ಮನೋ ಜಿತ್ವಾ ಚಾಜ್ಞಾಸರಸಿಜ ಇಹ ಪ್ರಾದುರಭವತ್
ತಡಿಲ್ಲೇಖಾ ನಿತ್ಯಾ ಭಗವತಿ ತವಾಧಾರಸದನಾತ್ || ೩೮ ||
ಭವತ್ಸಾಮ್ಯಂ ಕೇಚಿತ್ ತ್ರಿತಯಮಿತಿ ಕೌಳಪ್ರಭೃತಯಃ
ಪರಂ ತತ್ತ್ವಾಖ್ಯಂ ಚೇತ್ಯಪರಮಿದಮಾಹುಃ ಸಮಯಿನಃ |
ಕ್ರಿಯಾವಸ್ಥಾರೂಪಂ ಪ್ರಕೃತಿರಭಿಧಾಪಂಚಕಸಮಂ
ತದೇಷಾಂ ಸಾಮ್ಯಂ ಸ್ಯಾದವನಿಷು ಚ ಯೋ ವೇತ್ತಿ ಸ ಮುನಿಃ || ೩೯ ||
ಇತ್ಯೈಕ್ಯನಿರೂಪಣಮ್ ||
ವಶಿನ್ಯಾದ್ಯಾ ಅಷ್ಟಾವಕಚಟತಪಾದ್ಯಾಃ ಪ್ರಕೃತಯಃ
ಸ್ವವರ್ಗಸ್ಥಾಃ ಸ್ವಸ್ವಾಯುಧಕಲಿತಹಸ್ತಾಃ ಸ್ವವಿಷಯಾಃ |
ಯಥಾವರ್ಗಂ ವರ್ಣಪ್ರಚುರತನವೋ ಯಾಭಿರಭವಂ-
-ಸ್ತವ ಪ್ರಸ್ತಾರಾಸ್ತೇ ತ್ರಯ ಇತಿ ಜಗುಸ್ತೇ ಸಮಯಿನಃ || ೪೦ ||
ಇಮಾ ನಿತ್ಯಾ ವರ್ಣಾಸ್ತವ ಚರಣಸಮ್ಮೇಳನವಶಾ-
-ನ್ಮಹಾಮೇರುಸ್ಥಾಃ ಸ್ಯುರ್ಮನುಮಿಲನಕೈಲಾಸವಪುಷಃ |
ವಶಿನ್ಯಾದ್ಯಾ ಏತಾ ಅಪಿ ತವ ಸಬಿಂದ್ವಾತ್ಮಕತಯಾ
ಮಹೀಪ್ರಸ್ತಾರೋಽಯಂ ಕ್ರಮ ಇತಿ ರಹಸ್ಯಂ ಸಮಯಿನಾಮ್ || ೪೧ ||
ಇತಿ ಪ್ರಸ್ತಾರತ್ರಯನಿರೂಪಣಮ್ ||
ಭವೇನ್ಮೂಲಾಧಾರಂ ತದುಪರಿತನಂ ಚಕ್ರಮಪಿ ತ-
-ದ್ದ್ವಯಂ ತಾಮಿಸ್ರಾಖ್ಯಂ ಶಿಖಿಕಿರಣಸಮ್ಮೇಳನವಶಾತ್ |
ತದೇತತ್ಕೌಲಾನಾಂ ಪ್ರತಿದಿನಮನುಷ್ಠೇಯಮುದಿತಂ
ಭವತ್ಯಾ ವಾಮಾಖ್ಯಂ ಮತಮಪಿ ಪರಿತ್ಯಾಜ್ಯಮುಭಯಮ್ || ೪೨ ||
ಅಮೀಷಾಂ ಕೌಲಾನಾಂ ಭಗವತಿ ಭವೇತ್ಪೂಜನವಿಧಿ-
-ಸ್ತವ ಸ್ವಾಧಿಷ್ಠಾನೇ ತದನು ಚ ಭವೇನ್ಮೂಲಸದನೇ |
ಅತೋ ಬಾಹ್ಯಾ ಪೂಜಾ ಭವತಿ ಭಗರೂಪೇಣ ಚ ತತೋ
ನಿಷಿದ್ಧಾಚಾರೋಽಯಂ ನಿಗಮವಿರಹೋಽನಿಂದ್ಯಚರಿತೇ || ೪೩ ||
ನವವ್ಯೂಹಂ ಕೌಲಪ್ರಭೃತಿಕಮತಂ ತೇನ ಸ ವಿಭು-
-ರ್ನವಾತ್ಮಾ ದೇವೋಽಯಂ ಜಗದುದಯಕೃದ್ಭೈರವವಪುಃ |
ನವಾತ್ಮಾ ವಾಮಾದಿಪ್ರಭೃತಿಭಿರಿದಂ ಭೈರವವಪು-
-ರ್ಮಹಾದೇವೀ ತಾಭ್ಯಾಂ ಜನಕಜನನೀಮಜ್ಜಗದಿದಮ್ || ೪೪ ||
ಭವೇದೇತಚ್ಚಕ್ರದ್ವಿತಯಮತಿದೂರಂ ಸಮಯಿನಾಂ
ವಿಸೃಜ್ಯೈತದ್ಯುಗ್ಮಂ ತದನು ಮಣಿಪೂರಾಖ್ಯಸದನೇ |
ತ್ವಯಾ ಸೃಷ್ಟೈರ್ವಾರಿಪ್ರತಿಫಲಿತಸೂರ್ಯೇಂದುಕಿರಣೈ-
-ರ್ದ್ವಿಧಾ ಲೋಕೇ ಪೂಜಾಂ ವಿದಧತಿ ಭವತ್ಯಾಃ ಸಮಯಿನಃ || ೪೫ ||
ಅಧಿಷ್ಠಾನಾಧಾರದ್ವಿತಯಮಿದಮೇವಂ ದಶದಳಂ
ಸಹಸ್ರಾರಾಜ್ಜಾತಂ ಮಣಿಪುರಮತೋಽಭೂದ್ದಶದಳಮ್ |
ಹೃದಂಭೋಜಾನ್ಮೂಲಾನ್ನೃಪದಲಮಭೂತ್ ಸ್ವಾಂತಕಮಲಂ
ತದೇವೈಕೋ ಬಿಂದುರ್ಭವತಿ ಜಗದುತ್ಪತ್ತಿಕೃದಯಮ್ || ೪೬ ||
ಸಹಸ್ರಾರಂ ಬಿಂದುರ್ಭವತಿ ಚ ತತೋ ಬೈಂದವಗೃಹಂ
ತದೇತಸ್ಮಾಜ್ಜಾತಂ ಜಗದಿದಮಶೇಷಂ ಸಕರಣಮ್ |
ತತೋ ಮೂಲಾಧಾರಾದ್ದ್ವಿತಯಮಭವತ್ ತದ್ದಶದಳಂ
ಸಹಸ್ರಾರಾಜ್ಜಾತಂ ತದಿತಿ ದಶಧಾ ಬಿಂದುರಭವತ್ || ೪೭ ||
ತದೇತದ್ಬಿಂದೋರ್ಯದ್ದಶಕಮಭವತ್ತತ್ಪ್ರಕೃತಿಕಂ
ದಶಾರಂ ಸೂರ್ಯಾರಂ ನೃಪದಳಮಭೂತ್ ಸ್ವಾಂತಕಮಲಮ್ |
ರಹಸ್ಯಂ ಕೌಲಾನಾಂ ದ್ವಿತಯಮಭವನ್ಮೂಲಸದನಂ
ತಥಾಧಿಷ್ಠಾನಂ ಚ ಪ್ರಕೃತಿಮಿಹ ಸೇವಂತ ಇಹ ತೇ || ೪೮ ||
ಅತಸ್ತೇ ಕೌಲಾಸ್ತೇ ಭಗವತಿ ದೃಢಪ್ರಾಕೃತಜನಾ
ಇತಿ ಪ್ರಾಹುಃ ಪ್ರಾಜ್ಞಾಃ ಕುಲಸಮಯಮಾರ್ಗದ್ವಯವಿದಃ |
ಮಹಾಂತಃ ಸೇವಂತೇ ಸಕಲಜನನೀಂ ಬೈಂದವಗೃಹೇ
ಶಿವಾಕಾರಾಂ ನಿತ್ಯಾಮಮೃತಝರಿಕಾಮೈಂದವಕಳಾಮ್ || ೪೯ ||
ಇದಂ ಕಾಲೋತ್ಪತ್ತಿಸ್ಥಿತಿಲಯಕರಂ ಪದ್ಮನಿಕರಂ
ತ್ರಿಖಂಡಂ ಶ್ರೀಚಕ್ರಂ ಮನುರಪಿ ಚ ತೇಷಾಂ ಚ ಮಿಲನಮ್ |
ತದೈಕ್ಯಂ ಷೋಢಾ ವಾ ಭವತಿ ಚ ಚತುರ್ಧೇತಿ ಚ ತಥಾ
ತಯೋಃ ಸಾಮ್ಯಂ ಪಂಚಪ್ರಕೃತಿಕಮಿದಂ ಶಾಸ್ತ್ರಮುದಿತಮ್ || ೫೦ ||
ಉಪಾಸ್ತೇರೇತಸ್ಯಾಃ ಫಲಮಪಿ ಚ ಸರ್ವಾಧಿಕಮಭೂ-
-ತ್ತದೇತತ್ಕೌಲಾನಾಂ ಫಲಮಿಹ ಹಿ ಚೈತತ್ ಸಮಯಿನಾಮ್ |
ಸಹಸ್ರಾರೇ ಪದ್ಮೇ ಸುಭಗಸುಭಗೋದೇತಿ ಸುಭಗೇ
ಪರಂ ಸೌಭಾಗ್ಯಂ ಯತ್ತದಿಹ ತವ ಸಾಯುಜ್ಯಪದವೀ || ೫೧ ||
ಅತೋಽಸ್ಯಾಃ ಸಂಸಿದ್ಧೌ ಸುಭಗಸುಭಗಾಖ್ಯಾ ಗುರುಕೃಪಾ-
-ಕಟಾಕ್ಷವ್ಯಾಸಂಗಾತ್ ಸ್ರವದಮೃತನಿಷ್ಯಂದಸುಲಭಾ |
ತಯಾ ವಿದ್ಧೋ ಯೋಗೀ ವಿಚರತಿ ನಿಶಾಯಾಮಪಿ ದಿವಾ
ದಿವಾ ಭಾನೂ ರಾತ್ರೌ ವಿಧುರಿವ ಕೃತಾರ್ಥೀಕೃತಮತಿಃ || ೫೨ ||
ಇತಿ ಪರಮಪೂಜ್ಯ ಶ್ರೀಗೌಡಪಾದಾಚರ್ಯ ವಿರಚಿತಾ ಸುಭಗೋದಯ ಸ್ತುತಿಃ ||
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
