Narayaneeyam Dasakam 40 – ನಾರಾಯಣೀಯಂ ಚತ್ವಾರಿಂಶದಶಕಮ್

ಸ್ತೋತ್ರನಿಧಿ → ನಾರಾಯಣೀಯಂ → ಚತ್ವಾರಿಂಶದಶಕಮ್

<< ನಾರಾಯಣೀಯಂ ಏಕೋನಚತ್ವಾರಿಂಶದಶಕಮ್

ನಾರಾಯಣೀಯಂ ಚತ್ವಾರಿಂಶದಶಕಮ್ (೪೦) – ಪೂತನಾಮೋಕ್ಷಮ್

ತದನು ನಂದಮಮಂದಶುಭಾಸ್ಪದಂ
ನೃಪಪುರೀಂ ಕರದಾನಕೃತೇ ಗತಮ್ |
ಸಮವಲೋಕ್ಯ ಜಗಾದ ಭವತ್ಪಿತಾ
ವಿದಿತಕಂಸಸಹಾಯಜನೋದ್ಯಮಃ || ೪೦-೧ ||

ಅಯಿ ಸಖೇ ತವ ಬಾಲಕಜನ್ಮ ಮಾಂ
ಸುಖಯತೇಽದ್ಯ ನಿಜಾತ್ಮಜಜನ್ಮವತ್ |
ಇತಿ ಭವತ್ಪಿತೃತಾಂ ವ್ರಜನಾಯಕೇ
ಸಮಧಿರೋಪ್ಯ ಶಶಂಸ ತಮಾದರಾತ್ || ೪೦-೨ ||

ಇಹ ಚ ಸಂತ್ಯನಿಮಿತ್ತಶತಾನಿ ತೇ
ಕಟಕಸೀಮ್ನಿ ತತೋ ಲಘು ಗಮ್ಯತಾಮ್ |
ಇತಿ ಚ ತದ್ವಚಸಾ ವ್ರಜನಾಯಕೋ
ಭವದಪಾಯಭಿಯಾ ದ್ರುತಮಾಯಯೌ || ೪೦-೩ ||

ಅವಸರೇ ಖಲು ತತ್ರ ಚ ಕಾಚನ
ವ್ರಜಪದೇ ಮಧುರಾಕೃತಿರಂಗನಾ |
ತರಲಷಟ್ಪದಲಾಲಿತಕುಂತಲಾ
ಕಪಟಪೋತಕ ತೇ ನಿಕಟಂ ಗತಾ || ೪೦-೪ ||

ಸಪದಿ ಸಾ ಹೃತಬಾಲಕಚೇತನಾ
ನಿಶಿಚರಾನ್ವಯಜಾ ಕಿಲ ಪೂತನಾ |
ವ್ರಜವಧೂಷ್ವಿಹ ಕೇಯಮಿತಿ ಕ್ಷಣಂ
ವಿಮೃಶತೀಷು ಭವಂತಮುಪಾದದೇ || ೪೦-೫ ||

ಲಲಿತಭಾವವಿಲಾಸಹೃತಾತ್ಮಭಿ-
-ರ್ಯುವತಿಭಿಃ ಪ್ರತಿರೋದ್ಧುಮಪಾರಿತಾ |
ಸ್ತನಮಸೌ ಭವನಾಂತನಿಷೇದುಷೀ
ಪ್ರದದುಷೀ ಭವತೇ ಕಪಟಾತ್ಮನೇ || ೪೦-೬ ||

ಸಮಧಿರುಹ್ಯ ತದಂಕಮಶಂಕಿತ-
-ಸ್ತ್ವಮಥ ಬಾಲಕಲೋಪನರೋಷಿತಃ |
ಮಹದಿವಾಮ್ರಫಲಂ ಕುಚಮಂಡಲಂ
ಪ್ರತಿಚುಚೂಷಿಥ ದುರ್ವಿಷದೂಷಿತಮ್ || ೪೦-೭ ||

ಅಸುಭಿರೇವ ಸಮಂ ಧಯತಿ ತ್ವಯಿ
ಸ್ತನಮಸೌ ಸ್ತನಿತೋಪಮನಿಸ್ವನಾ |
ನಿರಪತದ್ಭಯದಾಯಿ ನಿಜಂ ವಪುಃ
ಪ್ರತಿಗತಾ ಪ್ರವಿಸಾರ್ಯ ಭುಜಾವುಭೌ || ೪೦-೮ ||

ಭಯದಘೋಷಣಭೀಷಣವಿಗ್ರಹ-
-ಶ್ರವಣದರ್ಶನಮೋಹಿತವಲ್ಲವೇ |
ವ್ರಜಪದೇ ತದುರಃಸ್ಥಲಖೇಲನಂ
ನನು ಭವಂತಮಗೃಹ್ಣತ ಗೋಪಿಕಾಃ || ೪೦-೯ ||

ಭುವನಮಂಗಳನಾಮಭಿರೇವ ತೇ
ಯುವತಿಭಿರ್ಬಹುಧಾ ಕೃತರಕ್ಷಣಃ |
ತ್ವಮಯಿ ವಾತನಿಕೇತನನಾಥ ಮಾ-
-ಮಗದಯನ್ ಕುರು ತಾವಕಸೇವಕಮ್ || ೪೦-೧೦ ||

ಇತಿ ಚತ್ವಾರಿಂಶದಶಕಂ ಸಮಾಪ್ತಮ್ |

ನಾರಾಯಣೀಯಂ ಏಕಚತ್ವಾರಿಂಶದಶಕಮ್ >>

---

ಸಂಪೂರ್ಣ ನಾರಾಯಣೀಯಂ ನೋಡಿ.

---