Narayaneeyam Dasakam 23 – ನಾರಾಯಣೀಯಂ ತ್ರಯೋವಿಂಶತಿದಶಕಮ್

ಸ್ತೋತ್ರನಿಧಿ → ನಾರಾಯಣೀಯಂ → ತ್ರಯೋವಿಂಶತಿದಶಕಮ್

<< ನಾರಾಯಣೀಯಂ ದ್ವಾವಿಂಶತಿದಶಕಮ್

ತ್ರಯೋವಿಂಶತಿದಶಕಮ್ (೨೩) – ದಕ್ಷಚರಿತಂ ತಥಾ ಚಿತ್ರಕೇತೂಪಾಖ್ಯಾನಮ್

ಪ್ರಾಚೇತಸಸ್ತು ಭಗವನ್ನಪರೋಽಪಿ ದಕ್ಷ-
ಸ್ತ್ವತ್ಸೇವನಂ ವ್ಯಧಿತ ಸರ್ಗವಿವೃದ್ಧಿಕಾಮಃ |
ಆವಿರ್ಬಭೂವಿಥ ತದಾ ಲಸದಷ್ಟಬಾಹು
ಸ್ತಸ್ಮೈ ವರಂ ದದಿಥ ತಾಂ ಚ ವಧೂಮಸಿಕ್ನೀಮ್ || ೨೩-೧ ||

ತಸ್ಯಾತ್ಮಜಾಸ್ತ್ವಯುತಮೀಶ ಪುನಃಸ್ಸಹಸ್ರಂ
ಶ್ರೀನಾರದಸ್ಯ ವಚಸಾ ತವ ಮಾರ್ಗಮಾಪುಃ |
ನೈಕತ್ರವಾಸಮೃಷಯೇ ಸ ಮುಮೋಚ ಶಾಪಂ
ಭಕ್ತೋತ್ತಮಸ್ತ್ವೃಷಿರನುಗ್ರಹಮೇವ ಮೇನೇ || ೨೩-೨ ||

ಷಷ್ಟ್ಯಾ ತತೋ ದುಹಿತೃಭಿಃ ಸೃಜತಃ ಕುಲೌಘಾನ್
ದೌಹಿತ್ರಸೂನುರಥ ತಸ್ಯ ಸ ವಿಶ್ವರೂಪಃ |
ತ್ವತ್ಸ್ತೋತ್ರವರ್ಮಿತಮಜಾಪಯದಿನ್ದ್ರಮಾಜೌ
ದೇವ ತ್ವದೀಯಮಹಿಮಾ ಖಲು ಸರ್ವಜೈತ್ರಃ || ೨೩-೩ ||

ಪ್ರಾಕ್ಷೂರಸೇನವಿಷಯೇ ಕಿಲ ಚಿತ್ರಕೇತುಃ
ಪುತ್ರಾಗ್ರಹೀ ನೃಪತಿರಙ್ಗಿರಸಃ ಪ್ರಭಾವಾತ್ |
ಲಬ್ಧ್ವೈಕಪುತ್ರಮಥ ತತ್ರ ಹತೇ ಸಪತ್ನೀ-
ಸಙ್ಘೈರಮುಹ್ಯದವಶಸ್ತವ ಮಾಯಯಾಸೌ || ೨೩-೪ ||

ತಂ ನಾರದಸ್ತು ಸಮಮಙ್ಗಿರಸಾ ದಯಾಲುಃ
ಸಮ್ಪ್ರಾಪ್ಯ ತಾವದುಪದರ್ಶ್ಯ ಸುತಸ್ಯ ಜೀವಮ್ |
ಕಸ್ಯಾಸ್ಮಿ ಪುತ್ರ ಇತಿ ತಸ್ಯ ಗಿರಾ ವಿಮೋಹಂ
ತ್ಯಕ್ತ್ವಾ ತ್ವದರ್ಚನವಿಧೌ ನೃಪತಿಂ ನ್ಯಯುಙ್ಕ್ತ || ೨೩-೫ ||

ಸ್ತೋತ್ರಂ ಚ ಮನ್ತ್ರಮಪಿ ನಾರದತೋಽಥ ಲಬ್ಧ್ವಾ
ತೋಷಾಯ ಶೇಷವಪುಷೋ ನನು ತೇ ತಪಸ್ಯನ್ |
ವಿದ್ಯಾಧರಾಧಿಪತಿತಾಂ ಸ ಹಿ ಸಪ್ತರಾತ್ರೇ
ಲಬ್ಧ್ವಾಪ್ಯಕುಣ್ಠಮತಿರನ್ವಭಜದ್ಭವನ್ತಮ್ || ೨೩-೬ ||

ತಸ್ಮೈ ಮೃಣಾಲಧವಲೇನ ಸಹಸ್ರಶೀರ್ಷ್ಣಾ
ರೂಪೇಣ ಬದ್ಧನುತಿಸಿದ್ಧಗಣಾವೃತೇನ |
ಪ್ರಾದುರ್ಭವನ್ನಚಿರತೋ ನುತಿಭಿಃ ಪ್ರಸನ್ನೋ
ದತ್ತ್ವಾಽಽತ್ಮತತ್ತ್ವಮನುಗೃಹ್ಯ ತಿರೋದಧಾಥ || ೨೩-೭ ||

ತ್ವದ್ಭಕ್ತಮೌಲಿರಥ ಸೋಽಪಿ ಚ ಲಕ್ಷಲಕ್ಷಂ
ವರ್ಷಾಣಿ ಹರ್ಷುಲಮನಾ ಭುವನೇಷು ಕಾಮಮ್ |
ಸಙ್ಗಾಪಯನ್ಗುಣಗಣಂ ತವ ಸುನ್ದರೀಭಿಃ
ಸಙ್ಗಾತಿರೇಕರಹಿತೋ ಲಲಿತಂ ಚಚಾರ || ೨೩-೮ ||

ಅತ್ಯನ್ತಸಙ್ಗವಿಲಯಾಯ ಭವತ್ಪ್ರಣುನ್ನೋ
ನೂನಂ ಸ ರೂಪ್ಯಗಿರಿಮಾಪ್ಯ ಮಹತ್ಸಮಾಜೇ |
ನಿಶ್ಶಙ್ಕಮಙ್ಕಕೃತವಲ್ಲಭಮಙ್ಗಜಾರಿಂ
ತಂ ಶಙ್ಕರಂ ಪರಿಹಸನ್ನುಮಯಾಭಿಶೇಪೇ || ೨೩-೯ ||

ನಿಸ್ಸಂಭ್ರಮಸ್ತ್ವಯಮಯಾಚಿತಶಾಪಮೋಕ್ಷೋ
ವೃತ್ರಾಸುರತ್ವಮುಪಗಮ್ಯ ಸುರೇನ್ದ್ರಯೋಧೀ |
ಭಕ್ತ್ಯಾಽಽತ್ಮತತ್ತ್ವಕಥನೈಃ ಸಮರೇ ವಿಚಿತ್ರಂ
ಶತ್ರೋರಪಿ ಭ್ರಮಮಪಾಸ್ಯ ಗತಃ ಪದಂ ತೇ || ೨೩-೧೦ ||

ತ್ವತ್ಸೇವನೇನ ದಿತಿರಿನ್ದ್ರವಧೋದ್ಯತಾಽಪಿ
ತಾನ್ಪ್ರತ್ಯುತೇನ್ದ್ರಸುಹೃದೋ ಮರುತೋಽಭಿಲೇಭೇ |
ದುಷ್ಟಾಶಯೋಽಪಿ ಶುಭದೈವ ಭವನ್ನಿಷೇವಾ
ತತ್ತಾದೃಶಸ್ತ್ವಮವ ಮಾಂ ಪವನಾಲಯೇಶ || ೨೩-೧೧ ||

ಇತಿ ತ್ರಯೋವಿಂಶದಶಕಂ ಸಮಾಪ್ತಮ್ ||

ನಾರಾಯಣೀಯಂ ಚತುರ್ವಿಂಶದಶಕಮ್ >>

---

ಸಂಪೂರ್ಣ ನಾರಾಯಣೀಯಂ ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.