Achyuta Ashtakam 2 – ಶ್ರೀ ಅಚ್ಯುತಾಷ್ಟಕಂ 2

ಸ್ತೋತ್ರನಿಧಿ → ಶ್ರೀ ಕೃಷ್ಣ ಸ್ತೋತ್ರಗಳು → ಶ್ರೀ ಅಚ್ಯುತಾಷ್ಟಕಂ 2

ಅಚ್ಯುತಾಚ್ಯುತ ಹರೇ ಪರಮಾತ್ಮನ್
ರಾಮ ಕೃಷ್ಣ ಪುರುಷೋತ್ತಮ ವಿಷ್ಣೋ |
ವಾಸುದೇವ ಭಗವನ್ನನಿರುದ್ಧ
ಶ್ರೀಪತೇ ಶಮಯ ದುಃಖಮಶೇಷಮ್ || ೧ ||

ವಿಶ್ವಮಂಗಳ ವಿಭೋ ಜಗದೀಶ
ನಂದನಂದನ ನೃಸಿಂಹ ನರೇಂದ್ರ |
ಮುಕ್ತಿದಾಯಕ ಮುಕುಂದ ಮುರಾರೇ
ಶ್ರೀಪತೇ ಶಮಯ ದುಃಖಮಶೇಷಮ್ || ೨ ||

ರಾಮಚಂದ್ರ ರಘುನಾಯಕ ದೇವ
ದೀನನಾಥ ದುರಿತಕ್ಷಯಕಾರಿನ್ |
ಯಾದವೇಂದ್ರ ಯದುಭೂಷಣ ಯಜ್ಞ
ಶ್ರೀಪತೇ ಶಮಯ ದುಃಖಮಶೇಷಮ್ || ೩ ||

ದೇವಕೀತನಯ ದುಃಖದವಾಗ್ನೇ
ರಾಧಿಕಾರಮಣ ರಮ್ಯಸುಮೂರ್ತೇ |
ದುಃಖಮೋಚನ ದಯಾರ್ಣವ ನಾಥ
ಶ್ರೀಪತೇ ಶಮಯ ದುಃಖಮಶೇಷಮ್ || ೪ ||

ಗೋಪಿಕಾವದನಚಂದ್ರಚಕೋರ
ನಿತ್ಯ ನಿರ್ಗುಣ ನಿರಂಜನ ಜಿಷ್ಣೋ |
ಪೂರ್ಣರೂಪ ಜಯ ಶಂಕರ ಶರ್ವ
ಶ್ರೀಪತೇ ಶಮಯ ದುಃಖಮಶೇಷಮ್ || ೫ ||

ಗೋಕುಲೇಶ ಗಿರಿಧಾರಣ ಧೀರ
ಯಾಮುನಾಚ್ಛತಟಖೇಲನವೀರ |
ನಾರದಾದಿಮುನಿವಂದಿತಪಾದ
ಶ್ರೀಪತೇ ಶಮಯ ದುಃಖಮಶೇಷಮ್ || ೬ ||

ದ್ವಾರಕಾಧಿಪ ದುರಂತಗುಣಾಬ್ಧೇ
ಪ್ರಾಣನಾಥ ಪರಿಪೂರ್ಣ ಭವಾರೇ |
ಜ್ಞಾನಗಮ್ಯ ಗುಣಸಾಗರ ಬ್ರಹ್ಮನ್
ಶ್ರೀಪತೇ ಶಮಯ ದುಃಖಮಶೇಷಮ್ || ೭ ||

ದುಷ್ಟನಿರ್ದಳನ ದೇವ ದಯಾಳೋ
ಪದ್ಮನಾಭ ಧರಣೀಧರ ಧರ್ಮಿನ್ |
ರಾವಣಾಂತಕ ರಮೇಶ ಮುರಾರೇ
ಶ್ರೀಪತೇ ಶಮಯ ದುಃಖಮಶೇಷಮ್ || ೮ ||

ಅಚ್ಯುತಾಷ್ಟಕಮಿದಂ ರಮಣೀಯಂ
ನಿರ್ಮಿತಂ ಭವಭಯಂ ವಿನಿಹಂತುಮ್ |
ಯಃ ಪಠೇದ್ವಿಷಯವೃತ್ತಿನಿವೃತ್ತಿ-
-ರ್ಜನ್ಮದುಃಖಮಖಿಲಂ ಸ ಜಹಾತಿ || ೯ ||

ಇತಿ ಶ್ರೀಮಚ್ಛಂಕರಾಚಾರ್ಯ ವಿರಚಿತಂ ಶ್ರೀ ಅಚ್ಯುತಾಷ್ಟಕಮ್ |

---

ಇನ್ನಷ್ಟು ಶ್ರೀ ಕೃಷ್ಣ ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.