Read in తెలుగు / ಕನ್ನಡ / தமிழ் / देवनागरी / English (IAST)
ರುದ್ರ ಉವಾಚ |
ಸಂಸಾರಸಾಗರಾದ್ಘೋರಾನ್ಮುಚ್ಯತೇ ಕಿಂ ಜಪನ್ ಪ್ರಭೋ |
ನರಸ್ತನ್ಮೇ ಪರಂ ಜಪ್ಯಂ ಕಥಯ ತ್ವಂ ಜನಾರ್ದನ || ೧ ||
ಹರಿರುವಾಚ |
ಪರೇಶ್ವರಂ ಪರಂ ಬ್ರಹ್ಮ ಪರಮಾತ್ಮಾನಮವ್ಯಯಮ್ |
ವಿಷ್ಣುಂ ನಾಮಸಹಸ್ರೇಣ ಸ್ತುವನ್ಮುಕ್ತೋ ಭವೇನ್ನರಃ || ೨ ||
ಯತ್ಪವಿತ್ರಂ ಪರಂ ಜಪ್ಯಂ ಕಥಯಾಮಿ ವೃಷಧ್ವಜ |
ಶೃಣುಷ್ವಾವಹಿತೋ ಭೂತ್ವಾ ಸರ್ವಪಾಪವಿನಾಶನಮ್ || ೩ ||
ಓಂ || ವಾಸುದೇವೋ ಮಹಾವಿಷ್ಣುರ್ವಾಮನೋ ವಾಸವೋ ವಸುಃ |
ಬಾಲಚಂದ್ರನಿಭೋ ಬಾಲೋ ಬಲಭದ್ರೋ ಬಲಾಧಿಪಃ || ೪ ||
ಬಲಿಬಂಧನಕೃದ್ವೇಧಾ ವರೇಣ್ಯೋ ವೇದವಿತ್ ಕವಿಃ |
ವೇದಕರ್ತಾ ವೇದರೂಪೋ ವೇದ್ಯೋ ವೇದಪರಿಪ್ಲುತಃ || ೫ ||
ವೇದಾಂಗವೇತ್ತಾ ವೇದೇಶೋ ಬಲಾಧಾರೋ ಬಲಾರ್ದನಃ |
ಅವಿಕಾರೋ ವರೇಶಶ್ಚ ವರುಣೋ ವರುಣಾಧಿಪಃ || ೬ ||
ವೀರಹಾ ಚ ಬೃಹದ್ವೀರೋ ವಂದಿತಃ ಪರಮೇಶ್ವರಃ |
ಆತ್ಮಾ ಚ ಪರಮಾತ್ಮಾ ಚ ಪ್ರತ್ಯಗಾತ್ಮಾ ವಿಯತ್ಪರಃ || ೭ ||
ಪದ್ಮನಾಭಃ ಪದ್ಮನಿಧಿಃ ಪದ್ಮಹಸ್ತೋ ಗದಾಧರಃ |
ಪರಮಃ ಪರಭೂತಶ್ಚ ಪುರುಷೋತ್ತಮ ಈಶ್ವರಃ || ೮ ||
ಪದ್ಮಜಂಘಃ ಪುಂಡರೀಕಃ ಪದ್ಮಮಾಲಾಧರಃ ಪ್ರಿಯಃ |
ಪದ್ಮಾಕ್ಷಃ ಪದ್ಮಗರ್ಭಶ್ಚ ಪರ್ಜನ್ಯಃ ಪದ್ಮಸಂಸ್ಥಿತಃ || ೯ ||
ಅಪಾರಃ ಪರಮಾರ್ಥಶ್ಚ ಪರಾಣಾಂ ಚ ಪರಃ ಪ್ರಭುಃ |
ಪಂಡಿತಃ ಪಂಡಿತೇಡ್ಯಶ್ಚ ಪವಿತ್ರಃ ಪಾಪಮರ್ದಕಃ || ೧೦ ||
ಶುದ್ಧಃ ಪ್ರಕಾಶರೂಪಶ್ಚ ಪವಿತ್ರಃ ಪರಿರಕ್ಷಕಃ |
ಪಿಪಾಸಾವರ್ಜಿತಃ ಪಾದ್ಯಃ ಪುರುಷಃ ಪ್ರಕೃತಿಸ್ತಥಾ || ೧೧ ||
ಪ್ರಧಾನಂ ಪೃಥಿವೀಪದ್ಮಂ ಪದ್ಮನಾಭಃ ಪ್ರಿಯಪ್ರದಃ |
ಸರ್ವೇಶಃ ಸರ್ವಗಃ ಸರ್ವಃ ಸರ್ವವಿತ್ ಸರ್ವದಃ ಸುರಃ || ೧೨ ||
ಸರ್ವಸ್ಯ ಜಗತೋ ಧಾಮ ಸರ್ವದರ್ಶೀ ಚ ಸರ್ವಭೃತ್ |
ಸರ್ವಾನುಗ್ರಹಕೃದ್ದೇವಃ ಸರ್ವಭೂತಹೃದಿಸ್ಥಿತಃ || ೧೩ ||
ಸರ್ವಪೂಜ್ಯಶ್ಚ ಸರ್ವಾದ್ಯಃ ಸರ್ವದೇವನಮಸ್ಕೃತಃ |
ಸರ್ವಸ್ಯ ಜಗತೋ ಮೂಲಂ ಸಕಲೋ ನಿಷ್ಕಲೋಽನಲಃ || ೧೪ ||
ಸರ್ವಗೋಪ್ತಾ ಸರ್ವನಿಷ್ಠಃ ಸರ್ವಕಾರಣಕಾರಣಮ್ |
ಸರ್ವಧ್ಯೇಯಃ ಸರ್ವಮಿತ್ರಃ ಸರ್ವದೇವಸ್ವರೂಪಧೃಕ್ || ೧೫ ||
ಸರ್ವಾಧ್ಯಕ್ಷಃ ಸುರಾಧ್ಯಕ್ಷಃ ಸುರಾಸುರನಮಸ್ಕೃತಃ |
ದುಷ್ಟಾನಾಂ ಚಾಸುರಾಣಾಂ ಚ ಸರ್ವದಾ ಘಾತಕೋಽಂತಕಃ || ೧೬ ||
ಸತ್ಯಪಾಲಶ್ಚ ಸನ್ನಾಭಃ ಸಿದ್ಧೇಶಃ ಸಿದ್ಧವಂದಿತಃ |
ಸಿದ್ಧಸಾಧ್ಯಃ ಸಿದ್ಧಸಿದ್ಧಃ ಸಾಧ್ಯಸಿದ್ಧೋ ಹೃದೀಶ್ವರಃ || ೧೭ ||
ಶರಣಂ ಜಗತಶ್ಚೈವ ಶ್ರೇಯಃ ಕ್ಷೇಮಸ್ತಥೈವ ಚ |
ಶುಭಕೃಚ್ಛೋಭನಃ ಸೌಮ್ಯಃ ಸತ್ಯಃ ಸತ್ಯಪರಾಕ್ರಮಃ || ೧೮ ||
ಸತ್ಯಸ್ಥಃ ಸತ್ಯಸಂಕಲ್ಪಃ ಸತ್ಯವಿತ್ ಸತ್ಯದಸ್ತಥಾ |
ಧರ್ಮೋ ಧರ್ಮೀ ಚ ಕರ್ಮೀ ಚ ಸರ್ವಕರ್ಮವಿವರ್ಜಿತಃ || ೧೯ ||
ಕರ್ಮಕರ್ತಾ ಚ ಕರ್ಮೈವ ಕ್ರಿಯಾ ಕಾರ್ಯಂ ತಥೈವ ಚ |
ಶ್ರೀಪತಿರ್ನೃಪತಿಃ ಶ್ರೀಮಾನ್ ಸರ್ವಸ್ಯ ಪತಿರೂರ್ಜಿತಃ || ೨೦ ||
ಸದೇವಾನಾಂ ಪತಿಶ್ಚೈವ ವೃಷ್ಣೀನಾಂ ಪತಿರೀಡಿತಃ |
ಪತಿರ್ಹಿರಣ್ಯಗರ್ಭಸ್ಯ ತ್ರಿಪುರಾಂತಪತಿಸ್ತಥಾ || ೨೧ ||
ಪಶೂನಾಂ ಚ ಪತಿಃ ಪ್ರಾಯೋ ವಸೂನಾಂ ಪತಿರೇವ ಚ |
ಪತಿರಾಖಂಡಲಸ್ಯೈವ ವರುಣಸ್ಯ ಪತಿಸ್ತಥಾ || ೨೨ ||
ವನಸ್ಪತೀನಾಂ ಚ ಪತಿರನಿಲಸ್ಯ ಪತಿಸ್ತಥಾ |
ಅನಲಸ್ಯ ಪತಿಶ್ಚೈವ ಯಮಸ್ಯ ಪತಿರೇವ ಚ || ೨೩ ||
ಕುಬೇರಸ್ಯ ಪತಿಶ್ಚೈವ ನಕ್ಷತ್ರಾಣಾಂ ಪತಿಸ್ತಥಾ |
ಓಷಧೀನಾಂ ಪತಿಶ್ಚೈವ ವೃಕ್ಷಾಣಾಂ ಚ ಪತಿಸ್ತಥಾ || ೨೪ ||
ನಾಗಾನಾಂ ಪತಿರರ್ಕಸ್ಯ ದಕ್ಷಸ್ಯ ಪತಿರೇವ ಚ |
ಸುಹೃದಾಂ ಚ ಪತಿಶ್ಚೈವ ನೃಪಾಣಾಂ ಚ ಪತಿಸ್ತಥಾ || ೨೫ ||
ಗಂಧರ್ವಾಣಾಂ ಪತಿಶ್ಚೈವ ಅಸೂನಾಂ ಪತಿರುತ್ತಮಃ |
ಪರ್ವತಾನಾಂ ಪತಿಶ್ಚೈವ ನಿಮ್ನಗಾನಾಂ ಪತಿಸ್ತಥಾ || ೨೬ ||
ಸುರಾಣಾಂ ಚ ಪತಿಃ ಶ್ರೇಷ್ಠಃ ಕಪಿಲಸ್ಯ ಪತಿಸ್ತಥಾ |
ಲತಾನಾಂ ಚ ಪತಿಶ್ಚೈವ ವೀರುಧಾಂ ಚ ಪತಿಸ್ತಥಾ || ೨೭ ||
ಮುನೀನಾಂ ಚ ಪತಿಶ್ಚೈವ ಸೂರ್ಯಸ್ಯ ಪತಿರುತ್ತಮಃ |
ಪತಿಶ್ಚಂದ್ರಮಸಃ ಶ್ರೇಷ್ಠಃ ಶುಕ್ರಸ್ಯ ಪತಿರೇವ ಚ || ೨೮ ||
ಗ್ರಹಾಣಾಂ ಚ ಪತಿಶ್ಚೈವ ರಾಕ್ಷಸಾನಾಂ ಪತಿಸ್ತಥಾ |
ಕಿನ್ನರಾಣಾಂ ಪತಿಶ್ಚೈವ ದ್ವಿಜಾನಾಂ ಪತಿರುತ್ತಮಃ || ೨೯ ||
ಸರಿತಾಂ ಚ ಪತಿಶ್ಚೈವ ಸಮುದ್ರಾಣಾಂ ಪತಿಸ್ತಥಾ |
ಸರಸಾಂ ಚ ಪತಿಶ್ಚೈವ ಭೂತಾನಾಂ ಚ ಪತಿಸ್ತಥಾ || ೩೦ ||
ವೇತಾಲಾನಾಂ ಪತಿಶ್ಚೈವ ಕೂಷ್ಮಾಂಡಾನಾಂ ಪತಿಸ್ತಥಾ |
ಪಕ್ಷಿಣಾಂ ಚ ಪತಿಃ ಶ್ರೇಷ್ಠಃ ಪಶೂನಾಂ ಪತಿರೇವ ಚ || ೩೧ ||
ಮಹಾತ್ಮಾ ಮಂಗಳೋ ಮೇಯೋ ಮಂದರೋ ಮಂದರೇಶ್ವರಃ |
ಮೇರುರ್ಮಾತಾ ಪ್ರಮಾಣಂ ಚ ಮಾಧವೋ ಮಲವರ್ಜಿತಃ || ೩೨ ||
ಮಾಲಾಧರೋ ಮಹಾದೇವೋ ಮಹಾದೇವೇನ ಪೂಜಿತಃ |
ಮಹಾಶಾಂತೋ ಮಹಾಭಾಗೋ ಮಧುಸೂದನ ಏವ ಚ || ೩೩ ||
ಮಹಾವೀರ್ಯೋ ಮಹಾಪ್ರಾಣೋ ಮಾರ್ಕಂಡೇಯರ್ಷಿವಂದಿತಃ |
ಮಾಯಾತ್ಮಾ ಮಾಯಯಾ ಬದ್ಧೋ ಮಾಯಯಾ ತು ವಿವರ್ಜಿತಃ || ೩೪ ||
ಮುನಿಸ್ತುತೋ ಮುನಿರ್ಮೈತ್ರೋ ಮಹಾನಾಸೋ ಮಹಾಹನುಃ |
ಮಹಾಬಾಹುರ್ಮಹಾದಾಂತೋ ಮರಣೇನ ವಿವರ್ಜಿತಃ || ೩೫ ||
ಮಹಾವಕ್ತ್ರೋ ಮಹಾತ್ಮಾ ಚ ಮಹಾಕಾಯೋ ಮಹೋದರಃ |
ಮಹಾಪಾದೋ ಮಹಾಗ್ರೀವೋ ಮಹಾಮಾನೀ ಮಹಾಮನಾಃ || ೩೬ ||
ಮಹಾಗತಿರ್ಮಹಾಕೀರ್ತಿರ್ಮಹಾರೂಪೋ ಮಹಾಸುರಃ |
ಮಧುಶ್ಚ ಮಾಧವಶ್ಚೈವ ಮಹಾದೇವೋ ಮಹೇಶ್ವರಃ || ೩೭ ||
ಮಖೇಜ್ಯೋ ಮಖರೂಪೀ ಚ ಮಾನನೀಯೋ ಮಖೇಶ್ವರಃ |
ಮಹಾವಾತೋ ಮಹಾಭಾಗೋ ಮಹೇಶೋಽತೀತಮಾನುಷಃ || ೩೮ ||
ಮಾನವಶ್ಚ ಮನುಶ್ಚೈವ ಮಾನವಾನಾಂ ಪ್ರಿಯಂಕರಃ |
ಮೃಗಶ್ಚ ಮೃಗಪೂಜ್ಯಶ್ಚ ಮೃಗಾಣಾಂ ಚ ಪತಿಸ್ತಥಾ || ೩೯ ||
ಬುಧಸ್ಯ ಚ ಪತಿಶ್ಚೈವ ಪತಿಶ್ಚೈವ ಬೃಹಸ್ಪತೇಃ |
ಪತಿಃ ಶನೈಶ್ಚರಸ್ಯೈವ ರಾಹೋಃ ಕೇತೋಃ ಪತಿಸ್ತಥಾ || ೪೦ ||
ಲಕ್ಷ್ಮಣೋ ಲಕ್ಷಣಶ್ಚೈವ ಲಂಬೋಷ್ಠೋ ಲಲಿತಸ್ತಥಾ |
ನಾನಾಲಂಕಾರಸಂಯುಕ್ತೋ ನಾನಾಚಂದನಚರ್ಚಿತಃ || ೪೧ ||
ನಾನಾರಸೋಜ್ಜ್ವಲದ್ವಕ್ತ್ರೋ ನಾನಾಪುಷ್ಪೋಪಶೋಭಿತಃ |
ರಾಮೋ ರಮಾಪತಿಶ್ಚೈವ ಸಭಾರ್ಯಃ ಪರಮೇಶ್ವರಃ || ೪೨ ||
ರತ್ನದೋ ರತ್ನಹರ್ತಾ ಚ ರೂಪೀ ರೂಪವಿವರ್ಜಿತಃ |
ಮಹಾರೂಪೋಗ್ರರೂಪಶ್ಚ ಸೌಮ್ಯರೂಪಸ್ತಥೈವ ಚ || ೪೩ ||
ನೀಲಮೇಘನಿಭಃ ಶುದ್ಧಃ ಕಾಲಮೇಘನಿಭಸ್ತಥಾ |
ಧೂಮವರ್ಣಃ ಪೀತವರ್ಣೋ ನಾನಾರೂಪೋ ಹ್ಯವರ್ಣಕಃ || ೪೪ ||
ವಿರೂಪೋ ರೂಪದಶ್ಚೈವ ಶುಕ್ಲವರ್ಣಸ್ತಥೈವ ಚ |
ಸರ್ವವರ್ಣೋ ಮಹಾಯೋಗೀ ಯಜ್ಞೋ ಯಜ್ಞಕೃದೇವ ಚ || ೪೫ ||
ಸುವರ್ಣವರ್ಣವಾಂಶ್ಚೈವ ಸುವರ್ಣಾಖ್ಯಸ್ತಥೈವ ಚ |
ಸುವರ್ಣಾವಯವಶ್ಚೈವ ಸುವರ್ಣಃ ಸ್ವರ್ಣಮೇಖಲಃ || ೪೬ ||
ಸುವರ್ಣಸ್ಯ ಪ್ರದಾತಾ ಚ ಸುವರ್ಣೇಶಸ್ತಥೈವ ಚ |
ಸುವರ್ಣಸ್ಯ ಪ್ರಿಯಶ್ಚೈವ ಸುವರ್ಣಾಢ್ಯಸ್ತಥೈವ ಚ || ೪೭ ||
ಸುಪರ್ಣೀ ಚ ಮಹಾಪರ್ಣೀ ಸುಪರ್ಣಸ್ಯ ಚ ಕಾರಣಮ್ |
ವೈನತೇಯಸ್ತಥಾದಿತ್ಯ ಆದಿರಾದಿಕರಃ ಶಿವಃ || ೪೮ ||
ಕಾರಣಂ ಮಹತಶ್ಚೈವ ಪ್ರಧಾನಸ್ಯ ಚ ಕಾರಣಮ್ |
ಬುದ್ಧೀನಾಂ ಕಾರಣಂ ಚೈವ ಕಾರಣಂ ಮನಸಸ್ತಥಾ || ೪೯ ||
ಕಾರಣಂ ಚೇತಸಶ್ಚೈವ ಅಹಂಕಾರಸ್ಯ ಕಾರಣಮ್ |
ಭೂತಾನಾಂ ಕಾರಣಂ ತದ್ವತ್ಕಾರಣಂ ಚ ವಿಭಾವಸೋಃ || ೫೦ ||
ಆಕಾಶಕಾರಣಂ ತದ್ವತ್ಪೃಥಿವ್ಯಾಃ ಕಾರಣಂ ಪರಮ್ |
ಅಂಡಸ್ಯ ಕಾರಣಂ ಚೈವ ಪ್ರಕೃತೇಃ ಕಾರಣಂ ತಥಾ || ೫೧ ||
ದೇಹಸ್ಯ ಕಾರಣಂ ಚೈವ ಚಕ್ಷುಷಶ್ಚೈವ ಕಾರಣಮ್ |
ಶ್ರೋತ್ರಸ್ಯ ಕಾರಣಂ ತದ್ವತ್ಕಾರಣಂ ಚ ತ್ವಚಸ್ತಥಾ || ೫೨ ||
ಜಿಹ್ವಾಯಾಃ ಕಾರಣಂ ಚೈವ ಪ್ರಾಣಸ್ಯೈವ ಚ ಕಾರಣಮ್ |
ಹಸ್ತಯೋಃ ಕಾರಣಂ ತದ್ವತ್ಪಾದಯೋಃ ಕಾರಣಂ ತಥಾ || ೫೩ ||
ವಾಚಶ್ಚ ಕಾರಣಂ ತದ್ವತ್ಪಾಯೋಶ್ಚೈವ ತು ಕಾರಣಮ್ |
ಇಂದ್ರಸ್ಯ ಕಾರಣಂ ಚೈವ ಕುಬೇರಸ್ಯ ಚ ಕಾರಣಮ್ || ೫೪ ||
ಯಮಸ್ಯ ಕಾರಣಂ ಚೈವ ಈಶಾನಸ್ಯ ಚ ಕಾರಣಮ್ |
ಯಕ್ಷಾಣಾಂ ಕಾರಣಂ ಚೈವ ರಕ್ಷಸಾಂ ಕಾರಣಂ ಪರಮ್ || ೫೫ ||
ನೃಪಾಣಾಂ ಕಾರಣಂ ಶ್ರೇಷ್ಠಂ ಧರ್ಮಸ್ಯೈವ ತು ಕಾರಣಮ್ |
ಜಂತೂನಾಂ ಕಾರಣಂ ಚೈವ ವಸೂನಾಂ ಕಾರಣಂ ಪರಮ್ || ೫೬ ||
ಮನೂನಾಂ ಕಾರಣಂ ಚೈವ ಪಕ್ಷಿಣಾಂ ಕಾರಣಂ ಪರಮ್ |
ಮುನೀನಾಂ ಕಾರಣಂ ಶ್ರೇಷ್ಠ ಯೋಗಿನಾಂ ಕಾರಣಂ ಪರಮ್ || ೫೭ ||
ಸಿದ್ಧಾನಾಂ ಕಾರಣಂ ಚೈವ ಯಕ್ಷಾಣಾಂ ಕಾರಣಂ ಪರಮ್ |
ಕಾರಣಂ ಕಿನ್ನರಾಣಾಂ ಚ ಗಂಧರ್ವಾಣಾಂ ಚ ಕಾರಣಮ್ || ೫೮ ||
ನದಾನಾಂ ಕಾರಣಂ ಚೈವ ನದೀನಾಂ ಕಾರಣಂ ಪರಮ್ |
ಕಾರಣಂ ಚ ಸಮುದ್ರಾಣಾಂ ವೃಕ್ಷಾಣಾಂ ಕಾರಣಂ ತಥಾ || ೫೯ ||
ಕಾರಣಂ ವೀರುಧಾಂ ಚೈವ ಲೋಕಾನಾಂ ಕಾರಣಂ ತಥಾ |
ಪಾತಾಲ ಕಾರಣಂ ಚೈವ ದೇವಾನಾಂ ಕಾರಣಂ ತಥಾ || ೬೦ ||
ಸರ್ಪಾಣಾಂ ಕಾರಣಂ ಚೈವ ಶ್ರೇಯಸಾಂ ಕಾರಣಂ ತಥಾ |
ಪಶೂನಾಂ ಕಾರಣಂ ಚೈವ ಸರ್ವೇಷಾಂ ಕಾರಣಂ ತಥಾ || ೬೧ ||
ದೇಹಾತ್ಮಾ ಚೇಂದ್ರಿಯಾತ್ಮಾ ಚ ಆತ್ಮಾ ಬುದ್ಧೇಸ್ತಥೈವ ಚ |
ಮನಸಶ್ಚ ತಥೈವಾತ್ಮಾ ಚಾತ್ಮಾಹಂಕಾರಚೇತಸಃ || ೬೨ ||
ಜಾಗ್ರತಃ ಸ್ವಪತಶ್ಚಾತ್ಮಾ ಮಹದಾತ್ಮಾ ಪರಸ್ತಥಾ |
ಪ್ರಧಾನಸ್ಯ ಪರಾತ್ಮಾ ಚ ಆಕಾಶಾತ್ಮಾ ಹ್ಯಪಾಂ ತಥಾ || ೬೩ ||
ಪೃಥಿವ್ಯಾಃ ಪರಮಾತ್ಮಾ ಚ ರಸಸ್ಯಾತ್ಮಾ ತಥೈವ ಚ |
ಗಂಧಸ್ಯ ಪರಮಾತ್ಮಾ ಚ ರೂಪಸ್ಯಾತ್ಮಾ ಪರಸ್ತಥಾ || ೬೪ ||
ಶಬ್ದಾತ್ಮಾ ಚೈವ ವಾಗಾತ್ಮಾ ಸ್ಪರ್ಶಾತ್ಮಾ ಪುರುಷಸ್ತಥಾ |
ಶ್ರೋತ್ರಾತ್ಮಾ ಚ ತ್ವಗಾತ್ಮಾ ಚ ಜಿಹ್ವಾತ್ಮಾ ಪರಮಸ್ತಥಾ || ೬೫ ||
ಘ್ರಾಣಾತ್ಮಾ ಚೈವ ಹಸ್ತಾತ್ಮಾ ಪಾದಾತ್ಮಾ ಪರಮಸ್ತಥಾ |
ಉಪಸ್ಥಸ್ಯ ತಥೈವಾತ್ಮಾ ಪಾಯ್ವಾತ್ಮಾ ಪರಮಸ್ತಥಾ || ೬೬ ||
ಇಂದ್ರಾತ್ಮಾ ಚೈವ ಬ್ರಹ್ಮಾತ್ಮಾ ರುದ್ರಾತ್ಮಾ ಚ ಮನೋಸ್ತಥಾ |
ದಕ್ಷಪ್ರಜಾಪತೇರಾತ್ಮಾ ಸತ್ಯಾತ್ಮಾ ಪರಮಸ್ತಥಾ || ೬೭ ||
ಈಶಾತ್ಮಾ ಪರಮಾತ್ಮಾ ಚ ರೌದ್ರಾತ್ಮಾ ಮೋಕ್ಷವಿದ್ಯತಿಃ |
ಯತ್ನವಾಂಶ್ಚ ತಥಾ ಯತ್ನಶ್ಚರ್ಮೀ ಖಡ್ಗೀ ಮುರಾಂತಕಃ || ೬೮ ||
ಹ್ರೀಪ್ರವರ್ತನಶೀಲಶ್ಚ ಯತೀನಾಂ ಚ ಹಿತೇ ರತಃ |
ಯತಿರೂಪೀ ಚ ಯೋಗೀ ಚ ಯೋಗಿಧ್ಯೇಯೋ ಹರಿಃ ಶಿತಿಃ || ೬೯ ||
ಸಂವಿನ್ಮೇಧಾ ಚ ಕಾಲಶ್ಚ ಊಷ್ಮಾ ವರ್ಷಾ ಮತಿಸ್ತಥಾ |
ಸಂವತ್ಸರೋ ಮೋಕ್ಷಕರೋ ಮೋಹಪ್ರಧ್ವಂಸಕಸ್ತಥಾ || ೭೦ ||
ಮೋಹಕರ್ತಾ ಚ ದುಷ್ಟಾನಾಂ ಮಾಂಡವ್ಯೋ ವಡವಾಮುಖಃ |
ಸಂವರ್ತಃ ಕಾಲಕರ್ತಾ ಚ ಗೌತಮೋ ಭೃಗುರಂಗಿರಾಃ || ೭೧ ||
ಅತ್ರಿರ್ವಸಿಷ್ಠಃ ಪುಲಹಃ ಪುಲಸ್ತ್ಯಃ ಕುತ್ಸ ಏವ ಚ |
ಯಾಜ್ಞವಲ್ಕ್ಯೋ ದೇವಲಶ್ಚ ವ್ಯಾಸಶ್ಚೈವ ಪರಾಶರಃ || ೭೨ ||
ಶರ್ಮದಶ್ಚೈವ ಗಾಂಗೇಯೋ ಹೃಷೀಕೇಶೋ ಬೃಹಚ್ಛ್ರವಾಃ |
ಕೇಶವಃ ಕ್ಲೇಶಹಂತಾ ಚ ಸುಕರ್ಣಃ ಕರ್ಣವರ್ಜಿತಃ || ೭೩ ||
ನಾರಾಯಣೋ ಮಹಾಭಾಗಃ ಪ್ರಾಣಸ್ಯ ಪತಿರೇವ ಚ |
ಅಪಾನಸ್ಯ ಪತಿಶ್ಚೈವ ವ್ಯಾನಸ್ಯ ಪತಿರೇವ ಚ || ೭೪ ||
ಉದಾನಸ್ಯ ಪತಿಃ ಶ್ರೇಷ್ಠಃ ಸಮಾನಸ್ಯ ಪತಿಸ್ತಥಾ |
ಶಬ್ದಸ್ಯ ಚ ಪತಿಃ ಶ್ರೇಷ್ಠಃ ಸ್ಪರ್ಶಸ್ಯ ಪತಿರೇವ ಚ || ೭೫ ||
ರೂಪಾಣಾಂ ಚ ಪತಿಶ್ಚಾದ್ಯಃ ಖಡ್ಗಪಾಣಿರ್ಹಲಾಯುಧಃ |
ಚಕ್ರಪಾಣಿಃ ಕುಂಡಲೀ ಚ ಶ್ರೀವತ್ಸಾಂಕಸ್ತಥೈವ ಚ || ೭೬ ||
ಪ್ರಕೃತಿಃ ಕೌಸ್ತುಭಗ್ರೀವಃ ಪೀತಾಂಬರಧರಸ್ತಥಾ |
ಸುಮುಖೋ ದುರ್ಮುಖಶ್ಚೈವ ಮುಖೇನ ತು ವಿವರ್ಜಿತಃ || ೭೭ ||
ಅನಂತೋಽನಂತರೂಪಶ್ಚ ಸುನಖಃ ಸುರಮಂದರಃ |
ಸುಕಪೋಲೋ ವಿಭುರ್ಜಿಷ್ಣುರ್ಭ್ರಾಜಿಷ್ಣುಶ್ಚೇಷುಧೀಸ್ತಥಾ || ೭೮ ||
ಹಿರಣ್ಯಕಶಿಪೋರ್ಹಂತಾ ಹಿರಣ್ಯಾಕ್ಷವಿಮರ್ದಕಃ |
ನಿಹಂತಾ ಪೂತನಾಯಾಶ್ಚ ಭಾಸ್ಕರಾಂತವಿನಾಶನಃ || ೭೯ ||
ಕೇಶಿನೋ ದಲನಶ್ಚೈವ ಮುಷ್ಟಿಕಸ್ಯ ವಿಮರ್ದಕಃ |
ಕಂಸದಾನವಭೇತ್ತಾ ಚ ಚಾಣೂರಸ್ಯ ಪ್ರಮರ್ದಕಃ || ೮೦ ||
ಅರಿಷ್ಟಸ್ಯ ನಿಹಂತಾ ಚ ಅಕ್ರೂರಪ್ರಿಯ ಏವ ಚ |
ಅಕ್ರೂರಃ ಕ್ರೂರರೂಪಶ್ಚ ಅಕ್ರೂರಪ್ರಿಯವಂದಿತಃ || ೮೧ ||
ಭಗಹಾ ಭಗವಾನ್ ಭಾನುಸ್ತಥಾ ಭಾಗವತಃ ಸ್ವಯಮ್ |
ಉದ್ಧವಶ್ಚೋದ್ಧವಸ್ಯೇಶೋ ಹ್ಯುದ್ಧವೇನ ವಿಚಿಂತಿತಃ || ೮೨ ||
ಚಕ್ರಧೃಕ್ ಚಂಚಲಶ್ಚೈವ ಚಲಾಚಲವಿವರ್ಜಿತಃ |
ಅಹಂಕಾರೋಪಮಶ್ಚಿತ್ತಂ ಗಗನಂ ಪೃಥಿವೀ ಜಲಮ್ || ೮೩ ||
ವಾಯುಶ್ಚಕ್ಷುಸ್ತಥಾ ಶ್ರೋತ್ರಂ ಜಿಹ್ವಾ ಚ ಘ್ರಾಣಮೇವ ಚ |
ವಾಕ್ಪಾಣಿಪಾದಜವನಃ ಪಾಯೂಪಸ್ಥಸ್ತಥೈವ ಚ || ೮೪ ||
ಶಂಕರಶ್ಚೈವ ಸರ್ವಶ್ಚ ಕ್ಷಾಂತಿದಃ ಕ್ಷಾಂತಿಕೃನ್ನರಃ |
ಭಕ್ತಪ್ರಿಯಸ್ತಥಾ ಭರ್ತಾ ಭಕ್ತಿಮಾನ್ ಭಕ್ತಿವರ್ಧನಃ || ೮೫ ||
ಭಕ್ತಸ್ತುತೋ ಭಕ್ತಪರಃ ಕೀರ್ತಿದಃ ಕೀರ್ತಿವರ್ಧನಃ |
ಕೀರ್ತಿರ್ದೀಪ್ತಿಃ ಕ್ಷಮಾಕಾಂತಿರ್ಭಕ್ತಶ್ಚೈವ ದಯಾ ಪರಾ || ೮೬ ||
ದಾನಂ ದಾತಾ ಚ ಕರ್ತಾ ಚ ದೇವದೇವಪ್ರಿಯಃ ಶುಚಿಃ |
ಶುಚಿಮಾನ್ ಸುಖದೋ ಮೋಕ್ಷಃ ಕಾಮಶ್ಚಾರ್ಥಃ ಸಹಸ್ರಪಾತ್ || ೮೭ ||
ಸಹಸ್ರಶೀರ್ಷಾ ವೈದ್ಯಶ್ಚ ಮೋಕ್ಷದ್ವಾರಂ ತಥೈವ ಚ |
ಪ್ರಜಾದ್ವಾರಂ ಸಹಸ್ರಾಕ್ಷಃ ಸಹಸ್ರಕರ ಏವ ಚ || ೮೮ ||
ಶುಕ್ರಶ್ಚ ಸುಕಿರೀಟೀ ಚ ಸುಗ್ರೀವಃ ಕೌಸ್ತುಭಸ್ತಥಾ |
ಪ್ರದ್ಯುಮ್ನಶ್ಚಾನಿರುದ್ಧಶ್ಚ ಹಯಗ್ರೀವಶ್ಚ ಸೂಕರಃ || ೮೯ ||
ಮತ್ಸ್ಯಃ ಪರಶುರಾಮಶ್ಚ ಪ್ರಹ್ಲಾದೋ ಬಲಿರೇವ ಚ |
ಶರಣ್ಯಶ್ಚೈವ ನಿತ್ಯಶ್ಚ ಬುದ್ಧೋ ಮುಕ್ತಃ ಶರೀರಭೃತ್ || ೯೦ ||
ಖರದೂಷಣಹಂತಾ ಚ ರಾವಣಸ್ಯ ಪ್ರಮರ್ದನಃ |
ಸೀತಾಪತಿಶ್ಚ ವರ್ಧಿಷ್ಣುರ್ಭರತಶ್ಚ ತಥೈವ ಚ || ೯೧ ||
ಕುಂಭೇಂದ್ರಜಿನ್ನಿಹಂತಾ ಚ ಕುಂಭಕರ್ಣಪ್ರಮರ್ದನಃ |
ನರಾಂತಕಾಂತಕಶ್ಚೈವ ದೇವಾಂತಕವಿನಾಶನಃ || ೯೨ ||
ದುಷ್ಟಾಸುರನಿಹಂತಾ ಚ ಶಂಬರಾರಿಸ್ತಥೈವ ಚ |
ನರಕಸ್ಯ ನಿಹಂತಾ ಚ ತ್ರಿಶೀರ್ಷಸ್ಯ ವಿನಾಶನಃ || ೯೩ ||
ಯಮಲಾರ್ಜುನಭೇತ್ತಾ ಚ ತಪೋಹಿತಕರಸ್ತಥಾ |
ವಾದಿತ್ರಂ ಚೈವ ವಾದ್ಯಂ ಚ ಬುದ್ಧಶ್ಚೈವ ವರಪ್ರದಃ || ೯೪ ||
ಸಾರಃ ಸಾರಪ್ರಿಯಃ ಸೌರಃ ಕಾಲಹಂತೃನಿಕೃಂತನಃ |
ಅಗಸ್ತ್ಯೋ ದೇವಲಶ್ಚೈವ ನಾರದೋ ನಾರದಪ್ರಿಯಃ || ೯೫ ||
ಪ್ರಾಣೋಽಪಾನಸ್ತಥಾ ವ್ಯಾನೋ ರಜಃ ಸತ್ತ್ವಂ ತಮಃ ಶರತ್ |
ಉದಾನಶ್ಚ ಸಮಾನಶ್ಚ ಭೇಷಜಂ ಚ ಭಿಷಕ್ ತಥಾ || ೯೬ ||
ಕೂಟಸ್ಥಃ ಸ್ವಚ್ಛರೂಪಶ್ಚ ಸರ್ವದೇಹವಿವರ್ಜಿತಃ |
ಚಕ್ಷುರಿಂದ್ರಿಯಹೀನಶ್ಚ ವಾಗಿಂದ್ರಿಯವಿವರ್ಜಿತಃ || ೯೭ ||
ಹಸ್ತೇಂದ್ರಿಯವಿಹೀನಶ್ಚ ಪಾದಾಭ್ಯಾಂ ಚ ವಿವರ್ಜಿತಃ |
ಪಾಯೂಪಸ್ಥವಿಹೀನಶ್ಚ ಮರುತಾಪವಿವರ್ಜಿತಃ || ೯೮ || [ಮಹಾತಾಪ]
ಪ್ರಬೋಧೇನ ವಿಹೀನಶ್ಚ ಬುದ್ಧ್ಯಾ ಚೈವ ವಿವರ್ಜಿತಃ |
ಚೇತಸಾ ವಿಗತಶ್ಚೈವ ಪ್ರಾಣೇನ ಚ ವಿವರ್ಜಿತಃ || ೯೯ ||
ಅಪಾನೇನ ವಿಹೀನಶ್ಚ ವ್ಯಾನೇನ ಚ ವಿವರ್ಜಿತಃ |
ಉದಾನೇನ ವಿಹೀನಶ್ಚ ಸಮಾನೇನ ವಿವರ್ಜಿತಃ || ೧೦೦ ||
ಆಕಾಶೇನ ವಿಹೀನಶ್ಚ ವಾಯುನಾ ಪರಿವರ್ಜಿತಃ |
ಅಗ್ನಿನಾ ಚ ವಿಹೀನಶ್ಚ ಉದಕೇನ ವಿವರ್ಜಿತಃ || ೧೦೧ ||
ಪೃಥಿವ್ಯಾ ಚ ವಿಹೀನಶ್ಚ ಶಬ್ದೇನ ಚ ವಿವರ್ಜಿತಃ |
ಸ್ಪರ್ಶೇನ ಚ ವಿಹೀನಶ್ಚ ಸರ್ವರೂಪವಿವರ್ಜಿತಃ || ೧೦೨ ||
ರಾಗೇಣ ವಿಗತಶ್ಚೈವ ಅಘೇನ ಪರಿವರ್ಜಿತಃ |
ಶೋಕೇನ ರಹಿತಶ್ಚೈವ ವಚಸಾ ಪರಿವರ್ಜಿತಃ || ೧೦೩ ||
ರಜೋವಿವರ್ಜಿತಶ್ಚೈವ ವಿಕಾರೈಃ ಷಡ್ಭಿರೇವ ಚ |
ಕಾಮೇನ ವರ್ಜಿತಶ್ಚೈವ ಕ್ರೋಧೇನ ಪರಿವರ್ಜಿತಃ || ೧೦೪ ||
ಲೋಭೇನ ವಿಗತಶ್ಚೈವ ದಂಭೇನ ಚ ವಿವರ್ಜಿತಃ |
ಸೂಕ್ಷ್ಮಶ್ಚೈವ ಸುಸೂಕ್ಷ್ಮಶ್ಚ ಸ್ಥೂಲಾತ್ಸ್ಥೂಲತರಸ್ತಥಾ || ೧೦೫ ||
ವಿಶಾರದೋ ಬಲಾಧ್ಯಕ್ಷಃ ಸರ್ವಸ್ಯ ಕ್ಷೋಭಕಸ್ತಥಾ |
ಪ್ರಕೃತೇಃ ಕ್ಷೋಭಕಶ್ಚೈವ ಮಹತಃ ಕ್ಷೋಭಕಸ್ತಥಾ || ೧೦೬ ||
ಭೂತಾನಾಂ ಕ್ಷೋಭಕಶ್ಚೈವ ಬುದ್ಧೇಶ್ಚ ಕ್ಷೋಭಕಸ್ತಥಾ |
ಇಂದ್ರಿಯಾಣಾಂ ಕ್ಷೋಭಕಶ್ಚ ವಿಷಯಕ್ಷೋಭಕಸ್ತಥಾ || ೧೦೭ ||
ಬ್ರಹ್ಮಣಃ ಕ್ಷೋಭಕಶ್ಚೈವ ರುದ್ರಸ್ಯ ಕ್ಷೋಭಕಸ್ತಥಾ |
ಅಗಮ್ಯಶ್ಚಕ್ಷುರಾದೇಶ್ಚ ಶ್ರೋತ್ರಾಗಮ್ಯಸ್ತಥೈವ ಚ || ೧೦೮ ||
ತ್ವಚಾ ನ ಗಮ್ಯಃ ಕೂರ್ಮಶ್ಚ ಜಿಹ್ವಾಽಗ್ರಾಹ್ಯಸ್ತಥೈವ ಚ |
ಘ್ರಾಣೇಂದ್ರಿಯಾಗಮ್ಯ ಏವ ವಾಚಾಽಗ್ರಾಹ್ಯಸ್ತಥೈವ ಚ || ೧೦೯ ||
ಅಗಮ್ಯಶ್ಚೈವ ಪಾಣಿಭ್ಯಾಂ ಪದಾಗಮ್ಯಸ್ತಥೈವ ಚ |
ಅಗ್ರಾಹ್ಯೋ ಮನಸಶ್ಚೈವ ಬುದ್ಧ್ಯಾಽಗ್ರಾಹ್ಯೋ ಹರಿಸ್ತಥಾ || ೧೧೦ ||
ಅಹಂ ಬುದ್ಧ್ಯಾ ತಥಾಽಗ್ರಾಹ್ಯಶ್ಚೇತಸಾಽಗ್ರಾಹ್ಯ ಏವ ಚ |
ಶಂಖಪಾಣಿಶ್ಚಾವ್ಯಯಶ್ಚ ಗದಾಪಾಣಿಸ್ತಥೈವ ಚ || ೧೧೧ ||
ಶಾರ್ಙ್ಗಪಾಣಿಶ್ಚ ಕೃಷ್ಣಶ್ಚ ಜ್ಞಾನಮೂರ್ತಿಃ ಪರಂತಪಃ |
ತಪಸ್ವೀ ಜ್ಞಾನಗಮ್ಯೋ ಹಿ ಜ್ಞಾನೀ ಜ್ಞಾನವಿದೇವ ಚ || ೧೧೨ ||
ಜ್ಞೇಯಶ್ಚ ಜ್ಞೇಯಹೀನಶ್ಚ ಜ್ಞಪ್ತಿಶ್ಚೈತನ್ಯರೂಪಕಃ |
ಭಾವೋ ಭಾವ್ಯೋ ಭವಕರೋ ಭಾವನೋ ಭವನಾಶನಃ || ೧೧೩ ||
ಗೋವಿಂದೋ ಗೋಪತಿರ್ಗೋಪಃ ಸರ್ವಗೋಪೀಸುಖಪ್ರದಃ |
ಗೋಪಾಲೋ ಗೋಗತಿಶ್ಚೈವ ಗೋಮತಿರ್ಗೋಧರಸ್ತಥಾ || ೧೧೪ ||
ಉಪೇಂದ್ರಶ್ಚ ನೃಸಿಂಹಶ್ಚ ಶೌರಿಶ್ಚೈವ ಜನಾರ್ದನಃ |
ಆರಣೇಯೋ ಬೃಹದ್ಭಾನುರ್ಬೃಹದ್ದೀಪ್ತಿಸ್ತಥೈವ ಚ || ೧೧೫ ||
ದಾಮೋದರಸ್ತ್ರಿಕಾಲಶ್ಚ ಕಾಲಜ್ಞಃ ಕಾಲವರ್ಜಿತಃ |
ತ್ರಿಸಂಧ್ಯೋ ದ್ವಾಪರಂ ತ್ರೇತಾ ಪ್ರಜಾದ್ವಾರಂ ತ್ರಿವಿಕ್ರಮಃ || ೧೧೬ ||
ವಿಕ್ರಮೋ ದಂಡಹಸ್ತಶ್ಚ ಹ್ಯೇಕದಂಡೀ ತ್ರಿದಂಡಧೃಕ್ |
ಸಾಮಭೇದಸ್ತಥೋಪಾಯಃ ಸಾಮರೂಪೀ ಚ ಸಾಮಗಃ || ೧೧೭ ||
ಸಾಮವೇದೋ ಹ್ಯಥರ್ವಶ್ಚ ಸುಕೃತಃ ಸುತರೂಪಣಃ |
ಅಥರ್ವವೇದವಿಚ್ಚೈವ ಹ್ಯಥರ್ವಾಚಾರ್ಯ ಏವ ಚ || ೧೧೮ ||
ಋಗ್ರೂಪೀ ಚೈವ ಋಗ್ವೇದ ಋಗ್ವೇದೇಷು ಪ್ರತಿಷ್ಠಿತಃ |
ಯಜುರ್ವೇತ್ತಾ ಯಜುರ್ವೇದೋ ಯಜುರ್ವೇದವಿದೇಕಪಾತ್ || ೧೧೯ ||
ಬಹುಪಾಚ್ಚ ಸುಪಾಚ್ಚೈವ ತಥೈವ ಚ ಸಹಸ್ರಪಾತ್ |
ಚತುಷ್ಪಾಚ್ಚ ದ್ವಿಪಾಚ್ಚೈವ ಸ್ಮೃತಿರ್ನ್ಯಾಯೋ ಯಮೋ ಬಲೀ || ೧೨೦ ||
ಸನ್ನ್ಯಾಸೀ ಚೈವ ಸನ್ನ್ಯಾಸಶ್ಚತುರಾಶ್ರಮ ಏವ ಚ |
ಬ್ರಹ್ಮಚಾರೀ ಗೃಹಸ್ಥಶ್ಚ ವಾನಪ್ರಸ್ಥಶ್ಚ ಭಿಕ್ಷುಕಃ || ೧೨೧ ||
ಬ್ರಾಹ್ಮಣಃ ಕ್ಷತ್ರಿಯೋ ವೈಶ್ಯಃ ಶೂದ್ರೋ ವರ್ಣಸ್ತಥೈವ ಚ |
ಶೀಲದಃ ಶೀಲಸಂಪನ್ನೋ ದುಃಶೀಲಪರಿವರ್ಜಿತಃ || ೧೨೨ ||
ಮೋಕ್ಷೋಽಧ್ಯಾತ್ಮಸಮಾವಿಷ್ಟಃ ಸ್ತುತಿಃ ಸ್ತೋತಾ ಚ ಪೂಜಕಃ |
ಪೂಜ್ಯೋ ವಾಕ್ಕರಣಂ ಚೈವ ವಾಚ್ಯಂ ಚೈವ ತು ವಾಚಕಃ || ೧೨೩ ||
ವೇತ್ತಾ ವ್ಯಾಕರಣಂ ಚೈವ ವಾಕ್ಯಂ ಚೈವ ಚ ವಾಕ್ಯವಿತ್ |
ವಾಕ್ಯಗಮ್ಯಸ್ತೀರ್ಥವಾಸೀ ತೀರ್ಥಸ್ತೀರ್ಥೀ ಚ ತೀರ್ಥವಿತ್ || ೧೨೪ ||
ತೀರ್ಥಾದಿಭೂತಃ ಸಾಂಖ್ಯಶ್ಚ ನಿರುಕ್ತಂ ತ್ವಧಿದೈವತಮ್ |
ಪ್ರಣವಃ ಪ್ರಣವೇಶಶ್ಚ ಪ್ರಣವೇನ ಪ್ರವಂದಿತಃ || ೧೨೫ ||
ಪ್ರಣವೇನ ಚ ಲಕ್ಷ್ಯೋ ವೈ ಗಾಯತ್ರೀ ಚ ಗದಾಧರಃ |
ಶಾಲಗ್ರಾಮನಿವಾಸೀ ಚ ಶಾಲಗ್ರಾಮಸ್ತಥೈವ ಚ || ೧೨೬ ||
ಜಲಶಾಯೀ ಯೋಗಶಾಯೀ ಶೇಷಶಾಯೀ ಕುಶೇಶಯಃ |
ಮಹೀಭರ್ತಾ ಚ ಕಾರ್ಯಂ ಚ ಕಾರಣಂ ಪೃಥಿವೀಧರಃ || ೧೨೭ ||
ಪ್ರಜಾಪತಿಃ ಶಾಶ್ವತಶ್ಚ ಕಾಮ್ಯಃ ಕಾಮಯಿತಾ ವಿರಾಟ್ |
ಸಮ್ರಾಟ್ ಪೂಷಾ ತಥಾ ಸ್ವರ್ಗೋ ರಥಸ್ಥಃ ಸಾರಥಿರ್ಬಲಮ್ || ೧೨೮ ||
ಧನೀ ಧನಪ್ರದೋ ಧನ್ಯೋ ಯಾದವಾನಾಂ ಹಿತೇ ರತಃ |
ಅರ್ಜುನಸ್ಯ ಪ್ರಿಯಶ್ಚೈವ ಹ್ಯರ್ಜುನೋ ಭೀಮ ಏವ ಚ || ೧೨೯ ||
ಪರಾಕ್ರಮೋ ದುರ್ವಿಷಹಃ ಸರ್ವಶಾಸ್ತ್ರವಿಶಾರದಃ |
ಸಾರಸ್ವತೋ ಮಹಾಭೀಷ್ಮಃ ಪಾರಿಜಾತಹರಸ್ತಥಾ || ೧೩೦ ||
ಅಮೃತಸ್ಯ ಪ್ರದಾತಾ ಚ ಕ್ಷೀರೋದಃ ಕ್ಷೀರಮೇವ ಚ |
ಇಂದ್ರಾತ್ಮಜಸ್ತಸ್ಯ ಗೋಪ್ತಾ ಗೋವರ್ಧನಧರಸ್ತಥಾ || ೧೩೧ ||
ಕಂಸಸ್ಯ ನಾಶನಸ್ತದ್ವದ್ಧಸ್ತಿಪೋ ಹಸ್ತಿನಾಶನಃ |
ಶಿಪಿವಿಷ್ಟಃ ಪ್ರಸನ್ನಶ್ಚ ಸರ್ವಲೋಕಾರ್ತಿನಾಶನಃ || ೧೩೨ ||
ಮುದ್ರೋ ಮುದ್ರಾಕರಶ್ಚೈವ ಸರ್ವಮುದ್ರಾವಿವರ್ಜಿತಃ |
ದೇಹೀ ದೇಹಸ್ಥಿತಶ್ಚೈವ ದೇಹಸ್ಯ ಚ ನಿಯಾಮಕಃ || ೧೩೩ ||
ಶ್ರೋತಾ ಶ್ರೋತ್ರನಿಯಂತಾ ಚ ಶ್ರೋತವ್ಯಃ ಶ್ರವಣಂ ತಥಾ |
ತ್ವಕ್-ಸ್ಥಿತಶ್ಚ ಸ್ಪರ್ಶಯಿತ್ವಾ ಸ್ಪೃಶ್ಯಂ ಚ ಸ್ಪರ್ಶನಂ ತಥಾ || ೧೩೪ ||
ರೂಪದ್ರಷ್ಟಾ ಚ ಚಕ್ಷುಃಸ್ಥೋ ನಿಯಂತಾ ಚಕ್ಷುಷಸ್ತಥಾ |
ದೃಶ್ಯಂ ಚೈವ ತು ಜಿಹ್ವಾಸ್ಥೋ ರಸಜ್ಞಶ್ಚ ನಿಯಾಮಕಃ || ೧೩೫ ||
ಘ್ರಾಣಸ್ಥೋ ಘ್ರಾಣಕೃದ್ಘ್ರಾತಾ ಘ್ರಾಣೇಂದ್ರಿಯನಿಯಾಮಕಃ |
ವಾಕ್-ಸ್ಥೋ ವಕ್ತಾ ಚ ವಕ್ತವ್ಯೋ ವಚನಂ ವಾಙ್ನಿಯಾಮಕಃ || ೧೩೬ ||
ಪ್ರಾಣಿಸ್ಥಃ ಶಿಲ್ಪಕೃಚ್ಛಿಲ್ಪೋ ಹಸ್ತಯೋಶ್ಚ ನಿಯಾಮಕಃ |
ಪದವ್ಯಶ್ಚೈವ ಗಂತಾ ಚ ಗಂತವ್ಯಂ ಗಮನಂ ತಥಾ || ೧೩೭ ||
ನಿಯಂತಾ ಪಾದಯೋಶ್ಚೈವ ಪಾದ್ಯಭಾಕ್ ಚ ವಿಸರ್ಗಕೃತ್ |
ವಿಸರ್ಗಸ್ಯ ನಿಯಂತಾ ಚ ಹ್ಯುಪಸ್ಥಸ್ಥಃ ಸುಖಂ ತಥಾ || ೧೩೮ ||
ಉಪಸ್ಥಸ್ಯ ನಿಯಂತಾ ಚ ತದಾನಂದಕರಶ್ಚ ಹ |
ಶತ್ರುಘ್ನಃ ಕಾರ್ತವೀರ್ಯಶ್ಚ ದತ್ತಾತ್ರೇಯಸ್ತಥೈವ ಚ || ೧೩೯ ||
ಅಲರ್ಕಸ್ಯ ಹಿತಶ್ಚೈವ ಕಾರ್ತವೀರ್ಯನಿಕೃಂತನಃ |
ಕಾಲನೇಮಿರ್ಮಹಾನೇಮಿರ್ಮೇಘೋ ಮೇಘಪತಿಸ್ತಥಾ || ೧೪೦ ||
ಅನ್ನಪ್ರದೋಽನ್ನರೂಪೀ ಚ ಹ್ಯನ್ನಾದೋಽನ್ನಪ್ರವರ್ತಕಃ |
ಧೂಮಕೃದ್ಧೂಮರೂಪಶ್ಚ ದೇವಕೀಪುತ್ರ ಉತ್ತಮಃ || ೧೪೧ ||
ದೇವಕ್ಯಾನಂದನೋ ನಂದೋ ರೋಹಿಣ್ಯಾಃ ಪ್ರಿಯ ಏವ ಚ |
ವಸುದೇವಪ್ರಿಯಶ್ಚೈವ ವಸುದೇವಸುತಸ್ತಥಾ || ೧೪೨ ||
ದುಂದುಭಿರ್ಹಾಸರೂಪಶ್ಚ ಪುಷ್ಪಹಾಸಸ್ತಥೈವ ಚ |
ಅಟ್ಟಹಾಸಪ್ರಿಯಶ್ಚೈವ ಸರ್ವಾಧ್ಯಕ್ಷಃ ಕ್ಷರೋಽಕ್ಷರಃ || ೧೪೩ ||
ಅಚ್ಯುತಶ್ಚೈವ ಸತ್ಯೇಶಃ ಸತ್ಯಾಯಾಶ್ಚ ಪ್ರಿಯೋ ವರಃ |
ರುಕ್ಮಿಣ್ಯಾಶ್ಚ ಪತಿಶ್ಚೈವ ರುಕ್ಮಿಣ್ಯಾವಲ್ಲಭಸ್ತಥಾ || ೧೪೪ ||
ಗೋಪೀನಾಂ ವಲ್ಲಭಶ್ಚೈವ ಪುಣ್ಯಶ್ಲೋಕಶ್ಚ ವಿಶ್ರುತಃ |
ವೃಷಾಕಪಿರ್ಯಮೋ ಗುಹ್ಯೋ ಮುಕುಲಶ್ಚ ಬುಧಸ್ತಥಾ || ೧೪೫ ||
ರಾಹುಃ ಕೇತುರ್ಗ್ರಹೋ ಗ್ರಾಹೋ ಗಜೇಂದ್ರಮುಖಮೇಲಕಃ |
ಗ್ರಾಹಸ್ಯ ವಿನಿಹಂತಾ ಚ ಗ್ರಾಮಣೀ ರಕ್ಷಕಸ್ತಥಾ || ೧೪೬ ||
ಕಿನ್ನರಶ್ಚೈವ ಸಿದ್ಧಶ್ಚ ಛಂದಃ ಸ್ವಚ್ಛಂದ ಏವ ಚ |
ವಿಶ್ವರೂಪೋ ವಿಶಾಲಾಕ್ಷೋ ದೈತ್ಯಸೂದನ ಏವ ಚ || ೧೪೭ ||
ಅನಂತರೂಪೋ ಭೂತಸ್ಥೋ ದೇವದಾನವಸಂಸ್ಥಿತಃ |
ಸುಷುಪ್ತಿಸ್ಥಃ ಸುಷುಪ್ತಿಶ್ಚ ಸ್ಥಾನಂ ಸ್ಥಾನಾಂತ ಏವ ಚ || ೧೪೮ ||
ಜಗತ್ಸ್ಥಶ್ಚೈವ ಜಾಗರ್ತಾ ಸ್ಥಾನಂ ಜಾಗರಿತಂ ತಥಾ |
ಸ್ವಪ್ನಸ್ಥಃ ಸ್ವಪ್ನವಿತ್ಸ್ವಪ್ನಸ್ಥಾನಂ ಸ್ವಪ್ನಸ್ತಥೈವ ಚ || ೧೪೯ ||
ಜಾಗ್ರತ್ಸ್ವಪ್ನಸುಷುಪ್ತೇಶ್ಚ ವಿಹೀನೋ ವೈ ಚತುರ್ಥಕಃ |
ವಿಜ್ಞಾನಂ ವೇದ್ಯರೂಪಂ ಚ ಜೀವೋ ಜೀವಯಿತಾ ತಥಾ || ೧೫೦ ||
ಭುವನಾಧಿಪತಿಶ್ಚೈವ ಭುವನಾನಾಂ ನಿಯಾಮಕಃ |
ಪಾತಾಲವಾಸೀ ಪಾತಾಲಂ ಸರ್ವಜ್ವರವಿನಾಶನಃ || ೧೫೧ ||
ಪರಮಾನಂದರೂಪೀ ಚ ಧರ್ಮಾಣಾಂ ಚ ಪ್ರವರ್ತಕಃ |
ಸುಲಭೋ ದುರ್ಲಭಶ್ಚೈವ ಪ್ರಾಣಾಯಾಮಪರಸ್ತಥಾ || ೧೫೨ ||
ಪ್ರತ್ಯಾಹಾರೋ ಧಾರಕಶ್ಚ ಪ್ರತ್ಯಾಹಾರಕರಸ್ತಥಾ |
ಪ್ರಭಾ ಕಾಂತಿಸ್ತಥಾ ಹ್ಯರ್ಚಿಃ ಶುದ್ಧಸ್ಫಟಿಕಸನ್ನಿಭಃ || ೧೫೩ ||
ಅಗ್ರಾಹಶ್ಚೈವ ಗೌರಶ್ಚ ಸರ್ವಃ ಶುಚಿರಭಿಷ್ಟುತಃ |
ವಷಟ್ಕಾರೋ ವಷಡ್ವೌಷಟ್ ಸ್ವಧಾ ಸ್ವಾಹಾ ರತಿಸ್ತಥಾ || ೧೫೪ ||
ಪಕ್ತಾ ನಂದಯಿತಾ ಭೋಕ್ತಾ ಬೋದ್ಧಾ ಭಾವಯಿತಾ ತಥಾ |
ಜ್ಞಾನಾತ್ಮಾ ಚೈವ ದೇಹಾತ್ಮಾ ಭೂಮಾ ಸರ್ವೇಶ್ವರೇಶ್ವರಃ || ೧೫೫ ||
ನದೀ ನಂದೀ ಚ ನಂದೀಶೋ ಭಾರತಸ್ತರುನಾಶನಃ |
ಚಕ್ರಪಃ ಶ್ರೀಪತಿಶ್ಚೈವ ನೃಪಾಣಾಂ ಚಕ್ರವರ್ತಿನಾಮ್ || ೧೫೬ ||
ಈಶಶ್ಚ ಸರ್ವದೇವಾನಾಂ ದ್ವಾರಕಾಸಂಸ್ಥಿತಸ್ತಥಾ |
ಪುಷ್ಕರಃ ಪುಷ್ಕರಾಧ್ಯಕ್ಷಃ ಪುಷ್ಕರದ್ವೀಪ ಏವ ಚ || ೧೫೭ ||
ಭರತೋ ಜನಕೋ ಜನ್ಯಃ ಸರ್ವಾಕಾರವಿವರ್ಜಿತಃ |
ನಿರಾಕಾರೋ ನಿರ್ನಿಮಿತ್ತೋ ನಿರಾತಂಕೋ ನಿರಾಶ್ರಯಃ || ೧೫೮ ||
ಇತಿ ನಾಮಸಹಸ್ರಂ ತೇ ವೃಷಭಧ್ವಜ ಕೀರ್ತಿತಮ್ |
ದೇವಸ್ಯ ವಿಷ್ಣೋರೀಶಸ್ಯ ಸರ್ವಪಾಪವಿನಾಶನಮ್ || ೧೫೯ ||
ಪಠನ್ ದ್ವಿಜಶ್ಚ ವಿಷ್ಣುತ್ವಂ ಕ್ಷತ್ರಿಯೋ ಜಯಮಾಪ್ನುಯಾತ್ |
ವೈಶ್ಯೋ ಧನಂ ಸುಖಂ ಶೂದ್ರೋ ವಿಷ್ಣುಭಕ್ತಿಸಮನ್ವಿತಃ || ೧೬೦ ||
ಇತಿ ಶ್ರೀಗಾರುಡೇ ಮಹಾಪುರಾಣೇ ಆಚಾರಕಾಂಡೇ ಶ್ರೀ ವಿಷ್ಣು ಸಹಸ್ರನಾಮ ಸ್ತೋತ್ರಂ ನಾಮ ಪಂಚದಶೋಽಧ್ಯಾಯಃ ||
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
