Read in తెలుగు / ಕನ್ನಡ / தமிழ் / देवनागरी / English (IAST)
ವಂದೇ ಗುರುಪದದ್ವಂದ್ವಮವಾಙ್ಮಾನಸಗೋಚರಮ್ |
ರಕ್ತಶುಕ್ಲಪ್ರಭಾಮಿಶ್ರಮತರ್ಕ್ಯಂ ತ್ರೈಪುರಂ ಮಹಃ ||
ಅಖಂಡಮಂಡಲಾಕಾರಂ ವಿಶ್ವಂ ವ್ಯಾಪ್ಯ ವ್ಯವಸ್ಥಿತಮ್ |
ತತ್ಪದಂ ದರ್ಶಿತಂ ಯೇನ ತಸ್ಮೈ ಶ್ರೀಗುರವೇ ನಮಃ ||
ಶಿವೇ ಸೇವಾಸಕ್ತಾಶ್ರಿತಭರಣಕಾರ್ಯೈಕಚತುರೇ
ಶಿರೋಭಿರ್ವೇದಾನಾಂ ಚಿರವಿನುತಕಳ್ಯಾಣಚರಿತೇ |
ಸ್ಮಿತಜ್ಯೋತ್ಸ್ನಾಲೀಲಾರುಚಿರರುಚಿಮಚ್ಚಂದ್ರವದನೇ
ಜಗನ್ಮಾತರ್ಮಾತರ್ಜಯ ಕನಕದುರ್ಗೇ ಭಗವತಿ || ೧ ||
ನಗಾಧೀಶೇಟ್ಕನ್ಯೇ ನಲಿನದಳಸಂಕಾಶನಯನೇ
ಸುಗೀತೈರ್ಗಂಧರ್ವೈಃ ಸುರಯುವತಿಭಿಶ್ಚಾನುಚರಿತೇ |
ಅಗಣ್ಯೈರಾಮ್ನಾಯೈರಪಿ ಗುಣನಿಕಾಯೈರ್ವಿಲಸಿತೇ
ಜಗನ್ಮಾತರ್ಮಾತರ್ಜಯ ಕನಕದುರ್ಗೇ ಭಗವತಿ || ೨ ||
ನಿಜಶ್ರೇಯಸ್ಕಾಮೈರ್ನಿಟಲಘಟಿತಾಂಚತ್ಕರಪುಟೇ
ಸ್ತುವದ್ಭಿಃ ಸಾನಂದಂ ಶ್ರುತಿಮಧುರವಾಚಾಂ ವಿರಚನೈಃ |
ಅಸಂಖ್ಯೈರ್ಬ್ರಹ್ಮಾದ್ಯೈರಮರಸಮುದಾಯೈಃ ಪರಿವೃತೇ
ದಯಾ ಕರ್ತವ್ಯಾ ತೇ ಮಯಿ ಕನಕದುರ್ಗೇ ಭಗವತಿ || ೩ ||
ಭವತ್ಪಾದನ್ಯಾಸೋಚಿತಕನಕಪೀಠೀಪರಿಸರೇ
ಪತಂತಃ ಸಾಷ್ಟಾಂಗಂ ಮುದಿತಹೃದಯಾ ಬ್ರಹ್ಮಋಷಯಃ |
ನ ವಾಂಛಂತಿ ಸ್ವರ್ಗಂ ನ ಚ ಕಮಲಸಂಭೂತಭವನಂ
ನ ವಾ ಮುಕ್ತೇರ್ಮಾರ್ಗಂ ನನು ಕನಕದುರ್ಗೇ ಭಗವತಿ || ೪ ||
ಶಚೀಸ್ವಾಹಾದೇವೀಪ್ರಮುಖಹರಿದೀಶಾನರಮಣೀ
ಮಣೀಹಸ್ತನ್ಯಸ್ತೈರ್ಮಣಿಖಚಿತಪಾತ್ರೈರನುದಿನಮ್ |
ಸಸಂಗೀತಂ ನೀರಾಜಿತಚರಣಪಂಕೇರುಹಯುಗೇ
ಕೃಪಾಪೂರಂ ಮಹ್ಯಂ ದಿಶ ಕನಕದುರ್ಗೇ ಭಗವತಿ || ೫ ||
ಪ್ರವರ್ಷತ್ಯಶ್ರಾಂತಂ ಬಹುಗುಣಮಭೀಷ್ಟಾರ್ಥನಿಚಯಂ
ಸ್ವರೂಪಧ್ಯಾತೄಣಾಂ ಚಿಕುರ ನಿಕುರುಂಬಂ ತವ ಶಿವೇ |
ಅಪಾಮೇಕಂ ವರ್ಷಂ ವಿತರತಿ ಕದಾಚಿಜ್ಜಲಧರೋ
ದ್ವಯೋಃ ಸಾಮ್ಯಂ ಕಿಂ ಸ್ಯಾನ್ನನು ಕನಕದುರ್ಗೇ ಭಗವತಿ || ೬ ||
ಕೃಶಾಂಗಂ ಸ್ವಾರಾತಿಂ ತುಹಿನಕರಮಾವೃತ್ಯ ತರಸಾ
ಸ್ಥಿತಂ ಮನ್ಯೇ ಧನ್ಯೇ ತಿಮಿರನಿಕರಂ ತೇ ಕಚಭರಮ್ |
ಸಹಾಯಂ ಕೃತ್ವಾಯಂ ಹರಮನಸಿ ಮೋಹಾಂಧತಮಸಂ
ವಿತೇನೇ ಕಾಮಃ ಶ್ರೀಮತಿ ಕನಕದುರ್ಗೇ ಭಗವತಿ || ೭ ||
ತಮೋ ನಾಮ್ನಾ ಸಮ್ಯಗ್ಗಳಿತಪುನರುದ್ವಾಂತರುಚಿರ-
-ಪ್ರಭಾಶೇಷಂ ಭಾನೋರಿವ ತರುಣಿಮಾನಂ ಧೃತವತಃ |
ತ್ವದೀಯೇ ಸೀಮಂತೇ ಕೃತಪದಮಿದಂ ಕುಂಕುಮರಜೋ-
-ವಸೇದಶ್ರಾಂತಂ ಮೇ ಹೃದಿ ಕನಕದುರ್ಗೇ ಭಗವತಿ || ೮ ||
ತ್ರಿಲೋಕೀ ವೈಚಿತ್ರೀಜನಕಘನಸೌಂದರ್ಯಸದನಂ
ವಿರಾಜತ್ಕಸ್ತೂರೀತಿಲಕಮಪಿ ಫಾಲೇ ವಿಜಯತೇ |
ಯದಾಲೋಕವ್ರೀಡಾಕುಪಿತ ಇವ ಜೂಟೇ ಪಶುಪತೇ-
-ರ್ವಿಲೀನೋ ಬಾಲೇಂದುರ್ನನು ಕನಕದುರ್ಗೇ ಭಗವತಿ || ೯ ||
ಪರಾಭೂತಶ್ಚೇಶಾಳಿಕನಯನಕೀಲಾವಿಲಸನಾ-
-ದ್ವಿಸೃಜ್ಯ ಪ್ರಾಚೀನಂ ಭುವನವಿನುತಂ ಕಾರ್ಮುಕವರಮ್ |
ಹರಂ ಜೇತುಂ ತ್ವದ್ಭ್ರೂಚ್ಛಲಮಪರಬಾಣಾಸನಯುಗಂ
ಸ್ಮರೋ ಧತ್ತೇ ಸರ್ವೇಶ್ವರಿ ಕನಕದುರ್ಗೇ ಭಗವತಿ || ೧೦ ||
ತ್ವದೀಯಭ್ರೂವಲ್ಲೀಚ್ಛಲಮದನಕೋದಂಡಯುಗಳೀ
ಸಮೀಪೇ ವಿಭ್ರಾಜತ್ತವ ಸುವಿಪುಲಂ ನೇತ್ರಯುಗಳಮ್ |
ವಿಜೇತುಂ ಸ್ವಾರಾತಿಂ ವಿಕಚನವನೀಲೋತ್ಪಲಶರ-
-ದ್ವಯಂ ತೇನಾನೀತಂ ಖಲು ಕನಕದುರ್ಗೇ ಭಗವತಿ || ೧೧ ||
ದರಿದ್ರಂ ಶ್ರೀಮಂತಂ ಜರಠಮಬಲಾನಾಂ ಪ್ರಿಯತಮಂ
ಜಡಂ ಸಂಖ್ಯಾವಂತಂ ಸಮರಚಲಿತಂ ಶೌರ್ಯಕಲಿತಮ್ |
ಮನುಷ್ಯಂ ಕುರ್ವಂತೋಽಮರಪರಿವೃಢಂ ನಿತ್ಯಸದಯಾಃ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೨ ||
ಪುರಾರಾತೇರ್ಬಾಣಾಃ ಕುಸುಮಶರತೂಣೀರಗಳಿತಾ
ನತಾನಾಂ ಸಂತ್ರಾಣೇ ನಿರವಧಿಸುಧಾವೀಚಿನಿಚಯಾಃ |
ವಿಯದ್ಗಂಗಾಭಂಗಾ ಬಹುದುರಿತಜಾಲಾವೃತಿಮತಾಂ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೩ ||
ದರಿದ್ರಾಣಾಂ ಕಲ್ಪದ್ರುಮಸುಮಮರಂದೋದಕಝರಾ
ಅವಿದ್ಯಾಧ್ವಾಂತಾನಾಮರುಣಕಿರಣಾನಾಂ ವಿಹೃತಯಃ |
ಪುರಾ ಪುಣ್ಯಶ್ರೇಣೀಸುಲಲಿತಲತಾಚೈತ್ರಸಮಯಾಃ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೪ ||
ಗಜಂತೋ ವಾಹಂತಃ ಕನಕಮಣಿನಿರ್ಮಾಣವಿಲಸಾ
ರಥಂತಶ್ಛತ್ರಂತೋ ಬಲಯುತ ಭಟಂತಃ ಪ್ರತಿದಿನಮ್ |
ಸ್ವಭಕ್ತಾನಾಂ ಗೇಹಾಂಗಣಭುವಿ ಚರಂತೋ ನಿರುಪಮಾಃ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೫ ||
ಪುರಾರಾತೇರಂಗಂ ಪುಲಕನಿಕುರುಂಬೈಃ ಪರಿವೃತಂ
ಮುನಿವ್ರಾತೈರ್ಧ್ಯಾತಂ ಮುಕುಳಯುತಕಲ್ಪದ್ರುಮನಿಭಮ್ |
ಶ್ರಯಂತಶ್ಚಾನಂದಂ ವಿಚಲದಳಿಪೋತಾ ಇವ ಚಿರಂ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೬ ||
ಹರಿಬ್ರಹ್ಮೇಂದ್ರಾದ್ಯೈಃ ಶ್ರುತಿವಿದಿತಗೀರ್ವಾಣನಿಚಯೈ-
-ರ್ವಸಿಷ್ಠವ್ಯಾಸಾದ್ಯೈರಪಿ ಚ ಪರಮಬ್ರಹ್ಮಋಷಿಭಿಃ |
ಸಮಸ್ತೈರಾಶಾಸ್ಯಾಃ ಸಕಲಶುಭದಾ ಯದ್ವಿಹೃತಯಃ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೭ ||
ವಿರಿಂಚಿರ್ಯದ್ಯೋಗಾದ್ವಿರಚಯತಿ ಲೋಕಾನ್ ಪ್ರತಿದಿನಂ
ವಿಧತ್ತೇ ಲಕ್ಷ್ಮೀಶೋ ವಿವಿಧಜಗತಾಂ ರಕ್ಷಣವಿಧಿಮ್ |
ಲಲಾಟಾಕ್ಷೋ ದಕ್ಷೋಽಭವದಖಿಲಸಂಹಾರಕರಣೇ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೮ ||
ಉರೋಭಾಗೇ ಶಂಭೋರ್ವಿಕಚನವನೀಲೋತ್ಪಲದಳ-
-ಸ್ರಜಂ ಸಂಗೃಹ್ಣಂತೋ ಮೃಗಮದರಸಂ ಫಾಲಫಲಕೇ |
ಶಿರೋಽಗ್ರೇ ಗಂಗಾಯಾಂ ರವಿದುಹಿತೃಸಂದೇಹಜನಕಾಃ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೧೯ ||
ಮದೀಯಶ್ರೀಲೀಲಾಹರಣಪಟುಪಾಟಚ್ಚರಮಿತಿ
ಕ್ವತಾ ಹಂತಾಗಂತುಂ ಶ್ರುತಿವಿಮಲನೀಲೋತ್ಪಲಮಿವ |
ತದಭ್ಯರ್ಣಂ ಯಾತಾಃ ಸಹಜನಿಜವೈಶಾಲ್ಯಕಲಿತಾಃ
ಕಟಾಕ್ಷಾಸ್ತೇ ಕಾರ್ಯಾ ಮಯಿ ಕನಕದುರ್ಗೇ ಭಗವತಿ || ೨೦ ||
ಕಳಂಕೀ ಮಾಸಾಂತೇ ವಹತಿ ಕೃಶತಾಂ ನಿತ್ಯಜಡ ಇ-
-ತ್ಯಮುಂ ಚಂದ್ರಂ ಹಿತ್ವಾ ತವ ವದನಚಂದ್ರಾಶ್ರಿತಮಿದಮ್ |
ಸ್ಥಿತಂ ಜೀವಂ ಜೀವದ್ವಿತಯಮಿತಿ ಮನ್ಯೇ ನಯನಯೋ-
-ರ್ಯುಗಂ ಕಾಮಾರಾತೇಃ ಸತಿ ಕನಕದುರ್ಗೇ ಭಗವತಿ || ೨೧ ||
ಪ್ರಸಾದೋ ಮಯ್ಯಾಸ್ತೇ ಮಯಿ ಚ ಸಹಜಂ ಸೌರಭಮಿದಂ
ತುಲಾ ಮೇ ಮೈತಸ್ಯೇತ್ಯವಿರತವಿವಾದಾಭಿರತಯೋಃ |
ನಿವೃತ್ತಾ ನೇದಾನೀಮಪಿ ಚ ರಿಪುತಾ ಗ್ಲೌನಳಿನಯೋ-
-ಸ್ತ್ವದಾಸ್ಯಂ ದೃಷ್ಟ್ವಾ ಶ್ರೀಮತಿ ಕನಕದುರ್ಗೇ ಭಗವತಿ || ೨೨ ||
ಮನೋಜಾತಾದರ್ಶಪ್ರತಿಮನಿಜಲೀಲೌ ತವ ಶಿವೇ
ಕಪೋಲೌ ಭೂಯಾಸ್ತಾಂ ಮಮ ಸಕಲಕಳ್ಯಾಣಜನಕೌ |
ಶ್ರಿತಶ್ರೀತಾಟಂಕದ್ವಿತಯರುಚಯೋ ಯತ್ರ ಮಿಳಿತಾಃ
ಸುಧಾರುಕ್ಸೂರ್ಯಾಭಾ ಇವ ಕನಕದುರ್ಗೇ ಭಗವತಿ || ೨೩ ||
ತ್ರಯೀಸ್ತುತ್ಯೇ ನಿತ್ಯೇ ತವ ವದನಪಂಕೇರುಹಭವ-
-ತ್ಸುಗಂಧಾಯಾತಶ್ರೀಪ್ರಚಲದಳಿನೀವಾರಣಧಿಯಾ |
ಲಸನ್ನಾಸಾಕಾರೇ ವಹಸಿ ಸಹಸಾ ಚಂಪಕತುಲಾಂ
ನ ತತ್ಸೌಂದರ್ಯಾರ್ಥಂ ನನು ಕನಕದುರ್ಗೇ ಭಗವತಿ || ೨೪ ||
ವಹನ್ಮೇ ಕಾರುಣ್ಯಂ ವರಕಮಲರಾಗಾಹ್ವಯಮಣಿಃ
ಸುಧಾಪೂರಂ ಸಾರಂ ಸುರುಚಿರಮೃದುತ್ವಂ ಯದಿ ವಹೇತ್ |
ತದಾ ಲಬ್ಧುಂ ಯೋಗ್ಯೋ ಭವತಿ ಭವದೀಯಾಧರತುಲಾಂ
ಜಗದ್ರಕ್ಷಾದೀಕ್ಷಾವತಿ ಕನಕದುರ್ಗೇ ಭಗವತಿ || ೨೫ ||
ಲಸನ್ನಾಸಾಭೂಷಾಗ್ರಗಪೃಥುಲಮುಕ್ತಾಮಣಿಯುತಂ
ನಿತಾಂತಾರುಣ್ಯಂತತ್ತವ ದಶನವಾಸೋ ವಿಜಯತೇ |
ಸುಧಾಸಿಂಧೋರ್ಮಧ್ಯೇ ನಿಪತಿತ ಸುಧಾಬಿಂದುಸಹಿತ-
-ಪ್ರವಾಳಶ್ರೀಚೋರಂ ನನು ಕನಕದುರ್ಗೇ ಭಗವತಿ || ೨೬ ||
ಅಯೋಗ್ಯಾ ಇತ್ಯಾರ್ಯೇ ತವ ದಶನಸಾಮ್ಯಾಯ ಕವಿಭಿ-
-ರ್ವಿಮುಕ್ತಾ ಮುಕ್ತಾ ಇತ್ಯಧಿಕವಿದಿತಾ ಮೌಕ್ತಿಕಗಣಾಃ |
ದಶಾಮಲ್ಪಾಂಗತ್ವಾ ತದನುಮುಖತಾಂಬೂಲಸಹಿತಾ
ಗತಾಸ್ತತ್ಸಾಹಿತ್ಯಂ ಖಲು ಕನಕದುರ್ಗೇ ಭಗವತಿ || ೨೭ ||
ಜಿತೋಽಹಂ ಪಾರ್ವತ್ಯಾ ಮೃದುಲತರವಾಣೀವಿಲಸನೈಃ
ಕಥಂ ದೃಪ್ಯಸ್ಯಂಬಾಧರಸಮತಯಾ ಬಿಂಬ ಕಥಯ |
ಇತಿ ಕ್ರೋಧಾಚ್ಚಂಚ್ವಾದಳಿತವದನೇ ರಕ್ತಿಮಯುತಃ
ಶುಕೋಽಯಂ ವಿಜ್ಞಾನೀ ಖಲು ಕನಕದುರ್ಗೇ ಭಗವತಿ || ೨೮ ||
ಫಲಂ ಬಿಂಬಸ್ಯೇದಂ ಭವತಿ ಭವದೀಯಾಧರತುಳಾ
ಕೃತಾಳಂ ತನ್ಮಾದ್ಯಂ ವಹತಿ ಮತಿರಸ್ಯೇತಿ ವಿದಿತಾ |
ನ ಚೇತ್ತಸ್ಮಿನ್ ಭುಕ್ತೇ ಸುಮತಿ ಕವಿತಾನಾಮಪಿ ಸೃಣಾಂ
ಕಥಂ ಸ್ಯಾತ್ತನ್ಮಾದ್ಯಂ ಭುವಿ ಕನಕದುರ್ಗೇ ಭಗವತಿ || ೨೯ ||
ಅತುಲ್ಯಂ ತೇ ಕಂಠಂ ಹರತರುಣಿ ದೃಷ್ಟ್ವಾ ಸುಕವಯಃ
ಪ್ರಭಾಷಂತೇ ಶಂಖಂ ಪರಿಹಸನಪಾತ್ರಂ ಭವತಿ ತತ್ |
ಸ್ವರೂಪಧ್ಯಾತೄಣಾಂ ಸುಭವತಿ ನಿಧಿಃ ಶಂಖ ಇತಿಚೇ-
-ದಸಂದೇಹಂ ಸ್ಥಾನೇ ಖಲು ಕನಕದುರ್ಗೇ ಭಗವತಿ || ೩೦ ||
ಅಕಂಠಂ ತೇ ಕಂಠಸ್ಥಿತಕನಕಸೂತ್ರಂ ವಿಜಯತೇ
ಹರೋ ಯತ್ಸಾಮರ್ಥ್ಯಾದಮೃತಮಿವ ಪೀತ್ವಾಪಿ ಗರಳಮ್ |
ಸಮಾಖ್ಯಾಂ ವಿಖ್ಯಾತಾಂ ಸಮಲಭತ ಮೃತ್ಯುಂಜಯ ಇತಿ
ತ್ರಯೀವೇದ್ಯಕ್ರೀಡಾವತಿ ಕನಕದುರ್ಗೇ ಭಗವತಿ || ೩೧ ||
ಚಿರಂ ಧ್ಯಾತ್ವಾ ಧ್ಯಾತ್ವಾ ಸಕಲವಿಬುಧಾಭೀಷ್ಟನಿಚಯಂ
ತತಸ್ತ್ವಲ್ಲಾವಣ್ಯಾಮೃತಜಲಧಿಸಂಪ್ರಾಪ್ತಜನನೇ |
ಭುಜಾಕಾರೇಣೈಕೇ ಭುವನವಿನುತೇ ಕಲ್ಪಕಲತೇ
ಶ್ರಿಯೈ ಮೇ ಭೂಯಾಸ್ತಾಂ ನನು ಕನಕದುರ್ಗೇ ಭಗವತಿ || ೩೨ ||
ವಿರಾಜತ್ಕೇಯೂರದ್ವಯಮಣಿವಿಭಾಭಾನುಕಿರಣೈ-
-ರ್ನಿತಾಂತವ್ಯಾಕೋಚೀಕೃತಮದನಜಿನ್ನೇತ್ರಕಮಲೌ |
ವಿಭೋಃ ಕಂಠಾಶ್ಲೇಷಾದ್ವಿಪುಲಪುಲಕಾಂಕೂರಜನಕೌ
ಭುಜೌ ಮೇ ತ್ರಾತಾರೌ ನನು ಕನಕದುರ್ಗೇ ಭಗವತಿ || ೩೩ ||
ಸುಪರ್ವಾರಾಮಾಂತಃಸ್ಫುರಿತಸಹಕಾರದ್ರುಮಲತಾ-
-ಸಮಗ್ರಶ್ರೀಜಾಗ್ರತ್ಕಿಸಲಯಸಗರ್ವೋದ್ಯಮಹರೌ |
ಕರೌ ತೇ ಭೂಯಾಸ್ತಾಂ ಮಮ ಶುಭಕರೌ ಕಾಂತಿನಿಕರಾ
ಕರೌ ನಿಶ್ಶಂಕಂ ಶಾಂಕರಿ ಕನಕದುರ್ಗೇ ಭಗವತಿ || ೩೪ ||
ಪ್ರಶಸ್ತೌ ತ್ರೈಲೋಕ್ಯೇ ಬಹುಳದನುಜತ್ರಾಸವಿಚಲ-
-ನ್ಮರುನ್ಮಸ್ತನ್ಯಸ್ತೌ ಜನನಿ ತವ ಹಸ್ತೌ ಹೃದಿ ಭಜೇ |
ಸ್ಮರೋ ಯತ್ಸಂಕಾಶಾ ಇತಿ ಕಿಸಲಯಾನೇವ ಧೃತವಾನ್
ತ್ರಿಲೋಕೀಜೇತಾಽಽಸೀತ್ಖಲು ಕನಕದುರ್ಗೇ ಭಗವತಿ || ೩೫ ||
ಪುರಾರಾತೇಃ ಪಾಣಿಗ್ರಹಣಸಮಯೇ ಮೌಕ್ತಿಕಚಯಾನ್
ವಿಧಾತುಂ ತಚ್ಛೀರ್ಷೇ ಜನಕವಚನಾದುನ್ನಮಿತಯೋಃ |
ಯಯೋರೂಪಂ ದೃಷ್ಟ್ವಾಽಭವದುದಿತಲಜ್ಜಾ ಸುರನದೀ
ಕದಾರ್ತಿತ್ರಾತಾರೌ ಮಮ ಕನಕದುರ್ಗೇ ಭಗವತಿ || ೩೬ ||
ಸ್ಫುರಂತೋ ನಿಶ್ಶಂಕಂ ಪುರಹರನಿರಾತಂಕವಿಜಯ-
-ಕ್ರಿಯಾಯಾತ್ರೋದ್ಯುಕ್ತಸ್ಮರಬಿರುದಪಾಠಾ ಇವ ಭೃಶಮ್ |
ಝಣತ್ಕಾರಾರಾವಾಃ ಕನಕವಲಯಾನಾಂ ತವ ಶಿವೇ
ವಿತನ್ವಂತು ಶ್ರೇಯೋ ಮಮ ಕನಕದುರ್ಗೇ ಭಗವತಿ || ೩೭ ||
ಕುಚೌ ತೇ ರೂಪಶ್ರೀವಿಜಿತಲಕುಚೌ ಮೇ ಶುಭಕರೌ
ಭವೇತಾಂ ವ್ಯಾಕೀರ್ಣೌ ಪ್ರಕಟತರಮುಕ್ತಾಮಣಿರುಚೌ |
ವಿರಿಂಚಾದ್ಯಾ ದೇವಾ ಯದುದಿತಸುಧಾಪಾತುರನಿಶಂ
ಸುನಮ್ರಾಃ ಸೇನಾನ್ಯೋ ನನು ಕನಕದುರ್ಗೇ ಭಗವತಿ || ೩೮ ||
ಅತುಲ್ಯಂ ತೇ ಮಧ್ಯಂ ವದತಿ ಹರಿಮಧ್ಯೇನ ಸದೃಶಂ
ಜಗತ್ತನ್ನೋ ಯುಕ್ತಂ ಜನನಿ ಖಲು ತದ್ರೂಪಕಲನೇ |
ಕೃತಾಶಃ ಪಂಚಾಸ್ಯೋ ಭವತಿ ತವ ವಾಹಃ ಪ್ರತಿದಿನಂ
ಜಗತ್ಸರ್ಗಕ್ರೀಡಾವತಿ ಕನಕದುರ್ಗೇ ಭಗವತಿ || ೩೯ ||
ಅಸೌ ಪುನ್ನಾಗಸ್ಯ ಪ್ರಸವಮೃದುಶಾಖಾಚಲಗತಂ
ತಪಃಕೃತ್ವಾ ಲೇಭೇ ಜನನಿ ತವ ನಾಭೇಃ ಸದೃಶತಾಮ್ |
ಪ್ರಮತ್ತಃ ಪುನ್ನಾಗಪ್ರಸವ ಇತರಸ್ತಾವಕ ಗತೇ-
-ಸ್ತುಲಾಮಾಪ್ತುಂ ವಾಂಛತ್ಯಪಿ ಕನಕದುರ್ಗೇ ಭಗವತಿ || ೪೦ ||
ತ್ರಿಲೋಕೀವಾಸಾಂಚದ್ಯುವತಿಜನತಾದುರ್ಗಮಭವ-
-ನ್ನಿತಂಬಶ್ರೀಚೌರ್ಯಂ ಕೃತವದಿತಿ ಸಂಚಿಂತ್ಯ ಪುಲಿನಮ್ |
ಸರೋ ಬಾಹ್ಯಂಚಕ್ರೇ ಜನನಿ ಭವದೀಯಸ್ಮರಣತೋ
ಝರೇವಾಧೀರೇಶಾ ಜನನಿ ಕನಕದುರ್ಗೇ ಭಗವತಿ || ೪೧ ||
ಜಿತೋಽಹಂ ಪಾರ್ವತ್ಯಾ ಮೃದುತರಗತೀನಾಂ ವಿಲಸನೈಃ
ತದೂರ್ವೋಃ ಸೌಂದರ್ಯಂ ಸಹಜಮಧಿಗಂತುಂ ಜಡತಯಾ |
ಕೃತಾರಂಭಾ ರಂಭಾ ಇತಿ ವಿದಳಿತಾಽಽಸಾಂ ವನಮಯಂ
ಕರೀ ಸಾಮರ್ಷಃ ಶ್ರೀಕರಿ ಕನಕದುರ್ಗೇ ಭಗವತಿ || ೪೨ ||
ಪ್ರವಿಷ್ಟಾ ತೇ ನಾಭೀಬಿಲಮಸಿತರೋಮಾವಳಿರಿಯಂ
ಕಟೀಚಂಚತ್ಕಾಂಚೀಗುಣವಿಹಿತಸೌತ್ರಾಮಣಮಣೇಃ |
ರುಚಾಂ ರೇಖೇವಾಸ್ತೇ ರುಚಿರತರಮೂರ್ಧ್ವಾಯನಗತಾ
ಶ್ರಿತಶ್ರೇಣೀಸಂಪತ್ಕರಿ ಕನಕದುರ್ಗೇ ಭಗವತಿ || ೪೩ ||
ಅನಿರ್ವಾಚ್ಯಂ ಜಂಘಾರುಚಿರರುಚಿಸೌಂದರ್ಯವಿಭವಂ
ಕಥಂ ಪ್ರಾಪ್ತುಂ ಯೋಗ್ಯಸ್ತವ ಕಲಮಗರ್ಭೋ ಗಿರಿಸುತೇ |
ತದೀಯಂ ಸೌಭಾಗ್ಯಂ ಕಣಿಶಜನನೈಕಾವಧಿ ಸುಧೀ-
-ಜನೈಶ್ಚಿಂತಾಕಾರ್ಯಾ ನನು ಕನಕದುರ್ಗೇ ಭಗವತಿ || ೪೪ ||
ಸದಾ ಮೇ ಭೂಯಾತ್ತೇ ಪ್ರಪದಮಮಿತಾಭೀಷ್ಟಸುಖದಂ
ಸುರಸ್ತ್ರೀವಾಹಾಗ್ರಚ್ಯುತಮೃಗಮದಾನಾಂ ಸಮುದಯಮ್ |
ಅಶೇಷಂ ನಿರ್ಧೌತಃ ಪ್ರಣಯಕಲಹೇ ಯತ್ರ ಪುರಜಿ-
-ಜ್ಜಟಾಗಂಗಾನೀರೈರ್ನನು ಕನಕದುರ್ಗೇ ಭಗವತಿ || ೪೫ ||
ಮನೋಜ್ಞಾಕಾರಂ ತೇ ಮಧುರನಿನದಂ ನೂಪುರಯುಗಂ
ಗ್ರಹೀತುಂ ವಿಖ್ಯಾತಾನ್ ಗತಿವಿಲಸನಾನಾಮತಿರಯಾನ್ |
ಸ್ಥಿತಂ ಮನ್ಯೇ ಹಂಸದ್ವಯಮಿತಿ ನ ಚೇದ್ಧಂಸಕಪದಂ
ಕಥಂ ಧತ್ತೇ ನಾಮ್ನಾ ನನು ಕನಕದುರ್ಗೇ ಭಗವತಿ || ೪೬ ||
ತ್ವದೀಯಂ ಪಾದಾಬ್ಜದ್ವಯಮಚಲಕನ್ಯೇ ವಿಜಯತೇ
ಸುರಸ್ತ್ರೀಕಸ್ತೂರೀತಿಲಕನಿಕರಾತ್ಯಂತಸುರಭಿ |
ಭ್ರಮಂತೋ ಯತ್ರಾರ್ಯಾಪ್ರಕರಹೃದಯೇಂದಿಂದಿರಗಣಾಃ
ಸದಾ ಮಾದ್ಯಂತಿ ಶ್ರೀಮತಿ ಕನಕದುರ್ಗೇ ಭಗವತಿ || ೪೭ ||
ಅಪರ್ಣೇ ತೇ ಪಾದಾವತನುತನುಲಾವಣ್ಯಸರಸೀ
ಸಮುದ್ಭೂತೇ ಪದ್ಮೇ ಇತಿ ಸುಕವಿಭಿರ್ನಿಶ್ಚಿತಮಿದಮ್ |
ನ ಚೇದ್ಗೀರ್ವಾಣಸ್ತ್ರೀಸಮುದಯಲಲಾಟಭ್ರಮರಕಾಃ
ಕಥಂ ತತ್ರಾಸಕ್ತಾ ನನು ಕನಕದುರ್ಗೇ ಭಗವತಿ || ೪೮ ||
ರಮಾವಾಣೀಂದ್ರಾಣೀಮುಖಯುವತಿಸೀಮಂತಪದವೀ-
-ನವೀನಾರ್ಕಚ್ಛಾಯಾಸದೃಶರುಚಿ ಯತ್ಕುಂಕುಮರಜಃ |
ಸ್ವಕಾಂಗಾಕಾರೇಣ ಸ್ಥಿತಮಿತಿ ಭವತ್ಪಾದಕಮಲ-
-ದ್ವಯೇ ಮನ್ಯೇ ಶಂಭೋಃ ಸತಿ ಕನಕದುರ್ಗೇ ಭಗವತಿ || ೪೯ ||
ದವಾಗ್ನಿಂ ನೀಹಾರಂ ಗರಳಮಮೃತಂ ವಾರ್ಧಿಮವನೀ-
-ಸ್ಥಲಂ ಮೃತ್ಯುಂ ಮಿತ್ರಂ ರಿಪುಮಪಿ ಚ ಸೇವಾಕರಜನಮ್ |
ವಿಶಂಕಂ ಕುರ್ವಂತೋ ಜನನಿ ತವ ಪಾದಾಂಬುರುಹಯೋಃ
ಪ್ರಣಾಮಾಃ ಸಂಸ್ತುತ್ಯಾ ಮಮ ಕನಕದುರ್ಗೇ ಭಗವತಿ || ೫೦ ||
ಜಲಪ್ರಾಯಾ ವಿದ್ಯಾ ಹೃದಿ ಸಕಲಕಾಮಾಃ ಕರಗತಾಃ
ಮಹಾಲಕ್ಷ್ಮೀರ್ದಾಸೀ ಮನುಜಪತಿವರ್ಯಾಃ ಸಹಚರಾಃ |
ಭವತ್ಯಶ್ರಾಂತಂ ತೇ ಪದಕಮಲಯೋರ್ಭಕ್ತಿಸಹಿತಾಂ
ನತಿಂಕುರ್ವಾಣಾನಾಂ ನನು ಕನಕದುರ್ಗೇ ಭಗವತಿ || ೫೧ ||
ತವ ಶ್ರೀಮತ್ಪಾದದ್ವಿತಯಗತಮಂಜೀರವಿಲಸ-
-ನ್ಮಣಿಚ್ಛಾಯಾಚ್ಛನ್ನಾಕೃತಿಭವತಿ ಯತ್ಫಾಲಫಲಕಮ್ |
ಸ ತತ್ರೈವಾಶೇಷಾವನಿವಹನದೀಕ್ಷಾ ಸಮುಚಿತಂ
ವಹೇತ್ಪಟ್ಟಂ ಹೈಮಂ ನನು ಕನಕದುರ್ಗೇ ಭಗವತಿ || ೫೨ ||
ತನೋತು ಕ್ಷೇಮಂ ತ್ವಚ್ಚರಣನಖಚಂದ್ರಾವಳಿರಿಯಂ
ಭವತ್ಪ್ರಾಣೇಶಸ್ಯ ಪ್ರಣಯಕಲಹಾರಂಭಸಮಯೇ |
ಯದೀಯಜ್ಯೋತ್ಸ್ನಾಭಿರ್ಭವತಿ ನಿತರಾಂ ಪೂರಿತತನುಃ
ಶಿರೋಽಗ್ರೇ ಬಾಲೇಂದುರ್ನನು ಕನಕದುರ್ಗೇ ಭಗವತಿ || ೫೩ ||
ಸಮಸ್ತಾಶಾಧೀಶ ಪ್ರವರವನಿತಾಹಸ್ತಕಮಲೈಃ
ಸುಮೈಃ ಕಲ್ಪದ್ರೂಣಾಂ ನಿರತಕೃತಪೂಜೌ ನಿರುಪಮೌ |
ನತಾನಾಮಿಷ್ಟಾರ್ಥಪ್ರಕರಘಟನಾಪಾಟವಯುತೌ
ನಮಸ್ಯಾಮಃ ಪಾದೌ ತವ ಕನಕದುರ್ಗೇ ಭಗವತಿ || ೫೪ ||
ಪುರಾ ಬಾಲ್ಯೇ ಶೀತಾಚಲಪರಿಸರಕ್ಷೋಣಿಚರಣೇ
ಯಯೋಃ ಸ್ಪರ್ಶಂ ಲಬ್ಧ್ವಾ ಮುದಿತಮನಸಃ ಕೀಟನಿಚಯಾನ್ |
ವಿಲೋಕ್ಯ ಶ್ಲಾಘಂತೇ ವಿಬುಧಸಮುದಾಯಾಃ ಪ್ರತಿದಿನಂ
ನಮಾಮಸ್ತೌ ಪಾದೌ ನನು ಕನಕದುರ್ಗೇ ಭಗವತಿ || ೫೫ ||
ನರಾಣಾಮಜ್ಞಾನಾಂ ಪ್ರಶಮಯಿತುಮಂತಃಸ್ಥತಿಮಿರಾ-
-ಣ್ಯಲಕ್ಷ್ಮೀಸಂತಾಪಂ ಗಮಿತಮನುಜಾನ್ ಶೀತಲಯಿತುಮ್ |
ಸಮರ್ಥಾನ್ನಿರ್ದೋಷಾಂಶ್ಚರಣನಖಚಂದ್ರಾನಭಿನವಾನ್
ನಮಾಮಃ ಸದ್ಭಕ್ತ್ಯಾ ತವ ಕನಕದುರ್ಗೇ ಭಗವತಿ || ೫೬ ||
ಮುಕುಂದ ಬ್ರಹ್ಮೇಂದ್ರ ಪ್ರಮುಖ ಬಹುಬರ್ಹಿರ್ಮುಖಶಿಖಾ-
-ವಿಭೂಷಾವಿಭ್ರಾಜನ್ಮಘವಮಣಿ ಸಂದರ್ಭರುಚಿಭಿಃ |
ವಿಶಂಕಂ ಸಾಕಂ ತ್ವಚ್ಚರಣನಖಚಂದ್ರೇಷುಘಟಿತಂ
ಕವೀಂದ್ರೈಃ ಸ್ತೋತವ್ಯಂ ತವ ಕನಕದುರ್ಗೇ ಭಗವತಿ || ೫೭ ||
ನಖಾನಾಂ ಧಾವಳ್ಯಂ ನಿಜಮರುಣಿಮಾನಂಚ ಸಹಜಂ
ನಮದ್ಗೀರ್ವಾಣಸ್ತ್ರೀತಿಲಕಮೃಗನಾಭಿಶ್ರಿಯಮಪಿ |
ವಹಂತೌ ಸತ್ತ್ವಾದಿತ್ರಿಗುಣರುಚಿಸಾರಾನಿವ ಸದಾ
ನಮಸ್ಯಾಮಃ ಪಾದೌ ತವ ಕನಕದುರ್ಗೇ ಭಗವತಿ || ೫೮ ||
ಮಣಿಶ್ರೇಣೀಭಾಸ್ವತ್ಕನಕಮಯಮಂಜೀರಯುಗಳೀ-
-ಝಣತ್ಕಾರಾರಾವಚ್ಛಲಮಧುರವಾಚಾಂ ವಿಲಸನೈಃ |
ಅಭೀಷ್ಟಾರ್ಥಾನ್ ದಾತುಂ ವಿನತಜನತಾಹ್ವಾನಚತುರಾ-
-ವಿಪ ಖ್ಯಾತೌ ಪಾದೌ ತವ ಕನಕದುರ್ಗೇ ಭಗವತಿ || ೫೯ ||
ನಮದ್ಗೀರ್ವಾಣಸ್ತ್ರೀತಿಲಕಮೃಗನಾಭೀದ್ರವಯುತಂ
ನಖಚ್ಛಾಯಾಯುಕ್ತಂ ಜನನಿ ತವ ಪಾದಾಂಬು ಜಯತಿ |
ಸಮಂಚತ್ಕಾಳಿಂದೀಝರಸಲಿಲಸಮ್ಮಿಶ್ರಿತವಿಯ-
-ನ್ನದೀವಾರೀವ ಶ್ರೀಕರಿ ಕನಕದುರ್ಗೇ ಭಗವತಿ || ೬೦ ||
ಸುರಶ್ರೇಣೀಪಾಣಿದ್ವಿತಯಗತಮಾಣಿಕ್ಯಕಲಶೈ-
-ರ್ಧೃತಂ ಹೇಮಾಂಭೋಜಪ್ರಕರಮಕರಂದೇನ ಮಿಳಿತಮ್ |
ಸತಾಂ ಬೃಂದೈರ್ವಂದ್ಯಂ ಚರಣಯುಗಸಂಕ್ಷಾಳನಜಲಂ
ಪುನಾತ್ವಸ್ಮಾನ್ನಿತ್ಯಂ ತವ ಕನಕದುರ್ಗೇ ಭಗವತಿ || ೬೧ ||
ವಿರಾವನ್ಮಂಜೀರದ್ವಯನಿಹಿತಹೀರೋಪಲರುಚಿ-
-ಪ್ರಸಾದೇ ನಿರ್ಭೇದಂ ಪ್ರಥಿತಪರಮಬ್ರಹ್ಮಋಷಿಭಿಃ |
ಶಿರೋಭಾಗೈರ್ಧಾರ್ಯಂ ಪದಕಮಲನಿರ್ಣೇಜನಜಲಂ
ವಸನ್ಮೇ ಶೀರ್ಷಾಗ್ರೇ ತವ ಕನಕದುರ್ಗೇ ಭಗವತಿ || ೬೨ ||
ಸಮೀಪೇ ಮಾಣಿಕ್ಯಸ್ಥಗಿತಪದಪೀಠಸ್ಯ ನಮತಾಂ
ಶಿರಃ ಸು ತ್ವತ್ಪಾದಸ್ನಪನಸಲಿಲಂ ಯನ್ನಿವತತಿ |
ತದೇವೋಚ್ಚಸ್ಥಾನಸ್ಥಿತಿಕೃದಭಿಷೇಕಾಂಬು ಭವತಿ
ಪ್ರಭಾವೋಽಯಂ ವರ್ಣ್ಯಸ್ತವ ಕನಕದುರ್ಗೇ ಭಗವತಿ || ೬೩ ||
ನೃಣಾಂದೀನಾನಾಂ ತ್ವಚ್ಚರಣಕಮಲೈಕಾಶ್ರಯವತಾಂ
ಮಹಾಲಕ್ಷ್ಮೀಪ್ರಾಪ್ತಿರ್ಭವತಿ ನ ಹಿ ಚಿತ್ರಾಸ್ಪದಮಿದಮ್ |
ಸಮಾಶ್ರಿತ್ಯಾಂಭೋಜಂ ಜಡಮಪಿ ಚ ರೇಖಾಕೃತಿಧರಂ
ಶ್ರಿಯೋ ನಿತ್ಯಂ ಧಾಮಾಜನಿ ಕನಕದುರ್ಗೇ ಭಗವತಿ || ೬೪ ||
ಖಗೋತ್ತಂಸಾ ಹಂಸಾಸ್ತವ ಗತಿವಿಲಾಸೇನ ವಿಜಿತಾಃ
ಸಲಜ್ಜಾಸ್ತತ್ತುಲ್ಯಂ ಗಮನಮಧಿಗಂತುಂ ಸಕುತುಕಾಃ |
ಭಜಂತೇ ಸ್ರಷ್ಟಾರಂ ರಥವಹನ ಏವೈಕನಿರತಾ
ಮನೋಜಾತಾರಾತೇಃ ಸತಿ ಕನಕದುರ್ಗೇ ಭಗವತಿ || ೬೫ ||
ಜಗನ್ಮಾತರ್ಭವ್ಯಾಂಗುಳಿವಿವರಮಾರ್ಗೇಷು ಗಳಿತಂ
ಚತುರ್ಧಾ ತೇ ಪಾದಾಂಬುಜಸಲಿಲಮೇತದ್ವಿಜಯತೇ |
ಪ್ರದಾತುಂ ಧರ್ಮಾರ್ಥಪ್ರಮುಖಪುರುಷಾರ್ಥದ್ವಯಯುಗಂ
ಚತುರ್ಮೂರ್ತ್ಯಾ ವಿದ್ಧಾವಿವ ಕನಕದುರ್ಗೇ ಭಗವತಿ || ೬೬ ||
ಅಜೋಽಯಂ ಶ್ರೀಶೋಽಯಂ ಸುರಪರಿವೃಢೋಽಯಂ ರವಿರಯಂ
ಶಶಾಂಕೋಽಯಂ ಕೋಽಯಂ ಸಕಲಜಲಧೀನಾಂ ಪತಿರಯಮ್ |
ಇತಿ ತ್ವಾಂ ಸಂದ್ರಷ್ಟುಂ ಸಮುಪಗತದೇವಾಃ ಪರಿಚರೈ-
-ರ್ಜನೈರ್ವಿಜ್ಞಾಪ್ಯಂತೇ ಖಲು ಕನಕದುರ್ಗೇ ಭಗವತಿ || ೬೭ ||
ಮಹಾಪೀಠಾಸೀನಾಂ ಮಘವಮುಖಬರ್ಹಿರ್ಮುಖಸಖೀ-
-ನಿಕಾಯೈಃ ಸಂಸೇವ್ಯಾಂ ಕರತಲಚಲಚ್ಚಾಮರಯುತೈಃ |
ಪ್ರದೋಷೇ ಪಶ್ಯಂತೀಂ ಪಶುಪತಿಮಹಾತಾಂಡವಕಳಾಂ
ಭಜೇ ತ್ವಾಂ ಶ್ರೀಕಾಂತಾಸಖಿ ಕನಕದುರ್ಗೇ ಭಗವತಿ || ೬೮ || [ಮಾಹೇಶ್ವರಿ]
ಪರಂಜ್ಯೋತಿಸ್ತದ್ಜ್ಞಾಃ ಸುರತರುಲತಾಂ ದುರ್ಗತಜನಾ
ಮಹಾಜ್ವಾಲಾಮಗ್ನೇರ್ಭುವನಭಯದಾ ರಾಕ್ಷಸಗಣಾಃ |
ಲಲಾಟಾಕ್ಷಃ ಸಾಕ್ಷಾದತನುಜಯಲಕ್ಷ್ಮೀಮವಿರತಂ
ಹೃದಿ ಧ್ಯಾಯಂತಿ ತ್ವಾಂ ಕನಕದುರ್ಗೇ ಭಗವತಿ || ೬೯ ||
ಸಮುದ್ಯದ್ಬಾಲಾರ್ಕಾಯುತಶತಸಮಾನದ್ಯುತಿಮತೀಂ
ಶರದ್ರಾಕಾಚಂದ್ರಪ್ರತಿಮದರಹಾಸಾಂಚಿತಮುಖೀಮ್ |
ಸಖೀಂ ಕಾಮಾರಾತೇಶ್ಚಕಿತಹರಿಣೀಶಾಬನಯನಾಂ
ಸದಾಹಂ ಸೇವೇ ತ್ವಾಂ ಹೃದಿ ಕನಕದುರ್ಗೇ ಭಗವತಿ || ೭೦ ||
ತಪಃಕೃತ್ವಾ ಲೇಭೇ ತ್ರಿಪುರಮಥನಸ್ತ್ವಾಂ ಪ್ರಿಯಸಖೀಂ
ತಪಸ್ಯಂತೀ ಪ್ರಾಪ್ತಾ ತ್ವಮಪಿ ಗಿರಿಶಂ ಪ್ರಾಣದಯಿತಮ್ |
ತದೇವಂ ದಾಂಪತ್ಯಂ ಜಯತಿ ಯುವಯೋರ್ಭೀತಧವಯೋಃ
ಕವಿಸ್ತುತ್ಯಂ ನಿತ್ಯಂ ನನು ಕನಕದುರ್ಗೇ ಭಗವತಿ || ೭೧ ||
ವಿಭೋರ್ಜಾನಾಸಿ ತ್ವಂ ವಿಪುಲಮಹಿಮಾನಂ ಪಶುಪತೇಃ
ಸ ಏವ ಜ್ಞಾತಾ ತೇ ಚರಿತಜಲರಾಶೇರನವಧೇಃ |
ನ ಹಿ ಜ್ಞಾತುಂ ದಕ್ಷೋ ಭವತಿ ಭವತೋಸ್ತತ್ವಮಿತರ-
-ಸ್ತ್ರೀಲೋಕೀಸಂಧಾನೇಷ್ವಪಿ ಕನಕದುರ್ಗೇ ಭಗವತಿ || ೭೨ ||
ನ ವಿಷ್ಣುರ್ನಬ್ರಹ್ಮಾ ನ ಚ ಸುರಪತಿರ್ನಾಪಿ ಸವಿತಾ
ನ ಚಂದ್ರೋ ನೋವಾಯುರ್ವಿಲಸತಿ ಹಿ ಕಲ್ಪಾಂತಸಮಯೇ |
ತದಾ ನಾಟ್ಯಂ ಕುರ್ವಂಸ್ತವ ರಮಣ ಏಕೋ ವಿಜಯತೇ
ತ್ವಯಾ ಸಾಕಂ ಲೋಕೇಶ್ವರಿ ಕನಕದುರ್ಗೇ ಭಗವತಿ || ೭೩ ||
ಧನುಶ್ಚಕ್ರೇ ಮೇರುಂ ಗುಣಮುರಗರಾಜಂ ಶಿತಶರಂ
ರಮಾಧೀಶಂ ಚಾಪಿ ತ್ರಿಪುರಮಥನೇನ ತ್ರಿನಯನಃ |
ತದೇತತ್ಸಾಮರ್ಥ್ಯಂ ಸಹಜನಿಜಶಕ್ತೇಸ್ತವ ಶಿವೇ
ಜಗದ್ರಕ್ಷಾದೀಕ್ಷಾವತಿ ಕನಕದುರ್ಗೇ ಭಗವತಿ || ೭೪ ||
ತ್ರಿಕೋಣಾಂತರ್ಬಿಂದೂಪರಿವಿಲಸನಾತ್ಯಂತರಸಿಕಾಂ
ತ್ರಿಭಿರ್ವೇದೈಃ ಸ್ತುತ್ಯಾಂ ತ್ರಿಗುಣಮಯಮೂರ್ತಿತ್ರಯಯುತಾಮ್ |
ತ್ರಿಲೋಕೈರಾರಾಧ್ಯಾಂ ತ್ರಿನಯನಮನಃ ಪ್ರೇಮಜನನೀಂ
ತ್ರಿಕಾಲಂ ಸೇವೇ ತ್ವಾಂ ಹೃದಿ ಕನಕದುರ್ಗೇ ಭಗವತಿ || ೭೫ ||
ಮನೋ ಧ್ಯಾತುಂ ನಾಲಂ ಜನನಿ ತವ ಮೂರ್ತಿಂ ನಿರುಪಮಾಂ
ವಚೋ ವಕ್ತುಂ ಶಕ್ಯಂ ನ ಭವತಿ ಹಿ ತೇ ಚಿತ್ರಚರಿತಮ್ |
ತನುಸ್ತ್ವತ್ಸೇವಾಯಾಂ ಭವತಿ ವಿವಶಾ ದೀನಸಮಯೇ
ಕಥಂ ವಾಹಂ ರಕ್ಷ್ಯಸ್ತವ ಕನಕದುರ್ಗೇ ಭಗವತಿ || ೭೬ ||
ವಿಯೋಗಂ ತೇ ನೂನಂ ಕ್ಷಣಮಸಹಮಾನಃ ಪಶುಪತಿ-
-ರ್ದದೌ ತೇ ದೇಹಾರ್ಧಂ ತರುಣಸುಮಬಾಣಾಯುತಸಮಮ್ |
ಅನೇನ ಜ್ಞಾತವ್ಯಸ್ತವ ಜನನಿ ಸೌಂದರ್ಯಮಹಿಮಾ
ತ್ರಿಲೋಕೀ ಸ್ತೋತವ್ಯಃ ಖಲು ಕನಕದುರ್ಗೇ ಭಗವತಿ || ೭೭ ||
ಕೃತಾ ಯಾಗಾ ಯೇನ ಶ್ರುತಿಷು ವಿದಿತಾಃ ಪೂರ್ವಜನನೇ
ಧನಂ ದತ್ತಂ ಯೇನ ದ್ವಿಜಕುಲವರೇಭ್ಯೋ ಬಹುವಿಧಮ್ |
ತಪಸ್ತಪ್ತಂ ಯೇನಾಸ್ಖಲಿತಮತಿನಾ ತಸ್ಯ ಘಟಿತೇ
ಭವದ್ಭಕ್ತಿಃ ಶಂಭೋಃ ಸತಿ ಕನಕದುರ್ಗೇ ಭಗವತಿ || ೭೮ ||
ಭವನ್ಮೂರ್ತಿಧ್ಯಾನಪ್ರವಣಮಮಲಂಚಾಪಿ ಹೃದಯಂ
ಭವನ್ನಾಮಶ್ರೇಣೀಪಠನನಿಪುಣಾಂ ಚಾಪಿ ರಸನಾಮ್ |
ಭವತ್ಸೇವಾದಾರ್ಢ್ಯಪ್ರಥಿತಮಪಿ ಕಾಯಂ ವಿತರ ಮೇ
ಭವಾನಂದಶ್ರೇಯಸ್ಕರಿ ಕನಕದುರ್ಗೇ ಭಗವತಿ || ೭೯ ||
ಪ್ರಭಾಷಂತೇ ವೇದಾಶ್ಚಕಿತಚಕಿತಂ ತಾವಕಗುಣಾನ್
ನ ಪಾರಸ್ಯ ದ್ರಷ್ಟಾ ತವ ಮಹಿಮವಾರ್ಧೇರ್ವಿಧಿರಪಿ |
ಭವತ್ತತ್ತ್ವಂ ಜ್ಞಾತುಂ ಪ್ರಕೃತಿಚಪಲಾನಾಮಪಿ ನೃಣಾಂ
ಕಥಂ ವಾ ಶಕ್ತಿಃ ಸ್ಯಾನ್ನನು ಕನಕದುರ್ಗೇ ಭಗವತಿ || ೮೦ ||
ನೃಪಾ ಏಕಚ್ಛತ್ರಂ ಸಕಲಧರಣೀಪಾಲನಪರಾಃ
ಸುಧಾಮಾಧುರ್ಯಶ್ರೀಲಲಿತಕವಿತಾಕಲ್ಪನಚಣಾಃ |
ನಿರಾತಂಕಂ ಶಾಸ್ತ್ರಾಧ್ಯಯನಮನಸಾಂ ನಿತ್ಯಕವಿತಾ
ತ್ವದೀಯಾ ಜ್ಞೇಯಾ ಶ್ರೀಮತಿ ಕನಕದುರ್ಗೇ ಭಗವತಿ || ೮೧ ||
ಕದಂಬಾನಾಂ ನಾಗಾಧಿಕಚತುರಸಂಚಾರಿಭಸರೀ
ಕದಂಬಾನಾಂ ಮಧ್ಯೇ ಖಚರತರುಣೀಕೋಟಿಕಲಿತೇ |
ಸ್ಥಿತಾಂ ವೀಣಾಹಸ್ತಾಂ ತ್ರಿಪುರಮಥನಾನಂದಜನನೀಂ
ಸದಾಹಂ ಸೇವೇ ತ್ವಾಂ ಹೃದಿ ಕನಕದುರ್ಗೇ ಭಗವತಿ || ೮೨ ||
ಗಿರಾಂ ದೇವೀ ಭೂತ್ವಾ ವಿಹರಸಿ ಚತುರ್ವಕ್ತ್ರವದನೇ
ಮಹಾಲಕ್ಷ್ಮೀರೂಪಾ ಮಧುಮಥನವಕ್ಷಃಸ್ಥಲಗತಾ |
ಶಿವಾಕಾರೇಣ ತ್ವಂ ಶಿವತನುನಿವಾಸಂ ಕೃತವತೀ
ಕಥಂ ಜ್ಞೇಯಾ ಮಾಯಾ ತವ ಕನಕದುರ್ಗೇ ಭಗವತಿ || ೮೩ ||
ಮಹಾರಾಜ್ಯಪ್ರಾಪ್ತಾವತಿಶಯಿತಕೌತೂಹಲವತಾಂ
ಸುಧಾಮಾಧುರ್ಯೋದ್ಯತ್ಸರಸಕವಿತಾ ಕೌತುಕಯುಜಾಮ್ |
ಕೃತಾಶಾನಾಂ ಶಶ್ವತ್ಸುಖಜನಕಗೀರ್ವಾಣಭಜನೇ
ತ್ವಮೇವೈಕಾ ಸೇವ್ಯಾ ನನು ಕನಕದುರ್ಗೇ ಭಗವತಿ || ೮೪ ||
ಫಣೀ ಮುಕ್ತಾಹಾರೋ ಭವತಿ ಭಸಿತಂ ಚಂದನರಜೋ
ಗಿರೀಂದ್ರಃ ಪ್ರಾಸಾದೋ ಗರಳಮಮೃತಂ ಚರ್ಮ ಸುಪಟಃ |
ಶಿವೇ ಶಂಭೋರ್ಯದ್ಯದ್ವಿಕೃತಚರಿತಂ ತತ್ತದಖಿಲಂ
ಶುಭಂ ಜಾತಂ ಯೋಗಾತ್ತವ ಕನಕದುರ್ಗೇ ಭಗವತಿ || ೮೫ ||
ದರಿದ್ರೇ ವಾ ಕ್ಷುದ್ರೇ ಗಿರಿವರಸುತೇ ಯತ್ರ ಮನುಜೇ
ಸುಧಾಪೂರಾಧಾರಸ್ತವ ಶುಭಕಟಾಕ್ಷೋ ನಿಪತತಿ |
ಬಹಿರ್ದ್ವಾರಪ್ರಾಂತದ್ವಿರದಮದಗಂಧಃ ಸ ಭವತಿ
ಪ್ರಿಯೇ ಕಾಮಾರಾತೇರ್ನನು ಕನಕದುರ್ಗೇ ಭಗವತಿ || ೮೬ ||
ಪ್ರಭಾಷಂತೇ ವೇದಾಃ ಪ್ರಕಟಯತಿ ಪೌರಾಣಿಕವಚಃ
ಪ್ರಶಸ್ತಂ ಕುರ್ವಂತಿ ಪ್ರಥಿತಬಹುಶಾಸ್ತ್ರಾಣ್ಯವಿರತಮ್ |
ಸ್ತುವಂತಃ ಪ್ರತ್ಯಗ್ರಂ ಸುಕವಿನಿಚಯಾಃ ಕಾವ್ಯರಚನೈ-
-ರನಂತಾಂ ತೇ ಕೀರ್ತಿಂ ನನು ಕನಕದುರ್ಗೇ ಭಗವತಿ || ೮೭ ||
ಅಸೂಯೇರ್ಷ್ಯಾದಂಭಾದ್ಯವಗುಣಪರಿತ್ಯಾಗಚತುರಾಃ
ಸದಾಚಾರಾಸಕ್ತಾಃ ಸದಯಹೃದಯಾಃ ಸತ್ಯವಚನಾಃ |
ಜಿತಸ್ವಾಂತಾಃ ಶಾಂತಾ ವಿಮಲಚರಿತಾ ದಾನನಿರತಾಃ
ಕೃಪಾಪಾತ್ರೀಭೂತಾಸ್ತವ ಕನಕದುರ್ಗೇ ಭಗವತಿ || ೮೮ ||
ಯದೀಯಾಂಭಸ್ನಾನಾದ್ದುರಿತಚರಿತಾನಾಂ ಸಮುದಯಾ
ಮಹಾಪುಣ್ಯಾಯಂತೇ ಮಹಿಮವತಿ ತಸ್ಯಾಃ ಶುಭಕರೇ |
ತಟೇ ಕೃಷ್ಣಾನದ್ಯಾ ವಿಹಿತಮಹಿತಾನಂದವಸತೇ
ಕೃಪಾ ಕರ್ತವ್ಯಾ ತೇ ಮಯಿ ಕನಕದುರ್ಗೇ ಭಗವತಿ || ೮೯ ||
ಯಥಾ ಪುಷ್ಪಶ್ರೇಣೀವಿಲಸಿತಕದಂಬದ್ರುಮವನೇ
ತನೋರ್ಭಾಗೇ ನಾಗೇಶ್ವರವಲಯಿನಃ ಶ್ರೀಮತಿ ಯಥಾ |
ತಥಾ ಭಕ್ತೌಘಾನಾಂ ಹೃದಿ ಕೃತವಿಹಾರೇ ಗಿರಿಸುತೇ
ದಯಾ ಕರ್ತವ್ಯಾ ತೇ ಮಯಿ ಕನಕದುರ್ಗೇ ಭಗವತಿ || ೯೦ ||
ಸಮಾರುಹ್ಯಾಭಂಗಂ ಮೃಗಪತಿತುರಂಗಂ ಜನಯುತಂ
ಗಳಾಗ್ರೇ ಧೂಮ್ರಾಕ್ಷಪ್ರಮುಖಬಲಬರ್ಹಿರ್ಮುಖರಿಪೂನ್ |
ನಿಹತ್ಯ ಪ್ರತ್ಯಕ್ಷಂ ಜಗದವನಲೀಲಾಂ ಕೃತವತೀ
ಪ್ರಸನ್ನಾ ಭೂಯಾಸ್ತ್ವಂ ಮಯಿ ಕನಕದುರ್ಗೇ ಭಗವತಿ || ೯೧ ||
ಪರಾಭೂಯ ತ್ರ್ಯಕ್ಷಂ ಸವನಕರಣೇ ಯತ್ರಸಹಿತಂ
ದುರಾತ್ಮಾನಂ ದಕ್ಷಂ ಪಿತರಮಪಿ ಸಂತ್ಯಜ್ಯ ತರಸಾ |
ಗೃಹೇ ನೀಹಾರಾದ್ರೇರ್ನಿಜಜನಸಮಂಗೀಕೃತವತೀ
ಪ್ರಸನ್ನಾ ಭೂಯಾಸ್ತ್ವಂ ಮಯಿ ಕನಕದುರ್ಗೇ ಭಗವತಿ || ೯೨ ||
ತಪಃ ಕೃತ್ವಾ ಯಸ್ಮಿನ್ ಸುರಪತಿಸುತೋಽನನ್ಯಸುಲಭಂ
ಭವಾದಸ್ತ್ರಂ ಲೇಭೇ ಪ್ರಬಲರಿಪುಸಂಹಾರಕರಣಮ್ |
ಕಿರಾತೇಽಸ್ಮಿನ್ ಪ್ರೀತ್ಯಾ ಸಹವಿಹರಣೇ ಕೌತುಕವತೀ
ಪ್ರಸನ್ನಾ ಭೂಯಾಸ್ತ್ವಂ ಮಯಿ ಕನಕದುರ್ಗೇ ಭಗವತಿ || ೯೩ ||
ಶರಚ್ಚಂದ್ರಾಲೋಕಪ್ರತಿಮರುಚಿಮಂದಸ್ಮಿತಯುತೇ
ಸುರಶ್ರೀಸಂಗೀತಶ್ರವಣಕುತುಕಾಲಂಕೃತಮತೇ |
ಕೃಪಾಪಾತ್ರೀಭೂತಪ್ರಣಮದಮರಾಭ್ಯರ್ಚಿತಪದೇ
ಪ್ರಸನ್ನಾ ಭೂಯಾಸ್ತ್ವಂ ಮಯಿ ಕನಕದುರ್ಗೇ ಭಗವತಿ || ೯೪ ||
ಕಪಾಲಸ್ರಗ್ಧಾರೀ ಕಠಿನಗಜಚರ್ಮಾಂಬರಧರಃ
ಸ್ಮರದ್ವೇಷೀ ಶಂಭುರ್ಬಹುಭುವನಭಿಕ್ಷಾಟನಪರಃ |
ಅವಿಜ್ಞಾತೋತ್ಪತ್ತಿರ್ಜನನಿ ತವ ಪಾಣಿಗ್ರಹಣತೋ
ಜಗತ್ಸೇವ್ಯೋ ಜಾತಃ ಖಲು ಕನಕದುರ್ಗೇ ಭಗವತಿ || ೯೫ ||
ಪದಾಭ್ಯಾಂ ಪ್ರತ್ಯೂಷಸ್ಫುಟವಿಕಚಶೋಣಾಬ್ಜವಿಲಸತ್
ಪ್ರಭಾಭ್ಯಾಂ ಭಕ್ತಾನಾಮಭಯವರದಾಭ್ಯಾಂ ತವ ಶಿವೇ |
ಚರದ್ಭ್ಯಾಂ ನೀಹಾರಾಚಲಪದಶಿಲಾಭಂಗಸರಣೌ
ನಮಃ ಕುರ್ಮಃ ಕಾಮೇಶ್ವರಿ ಕನಕದುರ್ಗೇ ಭಗವತಿ || ೯೬ ||
ಮದೀಯೇ ಹೃತ್ಪದ್ಮೇ ನಿವಸತು ಪದಾಂಭೋಜಯುಗಳಂ
ಜಗದ್ವಂದ್ಯಂ ರೇಖಾಧ್ವಜಕುಲಿಶವಜ್ರಾಂಕಿತಮಿದಮ್ |
ಸ್ಫುರತ್ಕಾಂತಿಜ್ಯೋತ್ಸ್ನಾ ವಿತತಮಣಿಮಂಜೀರಮಹಿತಂ
ದಯಾಽಽಧೇಯಾಽಮೇಯಾ ಮಯಿ ಕನಕದುರ್ಗೇ ಭಗವತಿ || ೯೭ ||
ಸದಾಽಹಂ ಸೇವೇ ತ್ವತ್ಪದಕಮಲಪೀಠೀಪರಿಸರೇ
ಸ್ತುವನ್ ಭಕ್ತಿಶ್ರದ್ಧಾಪರಿಚಯಪವಿತ್ರೀಕೃತಧಿಯಾ |
ಭವಂತೀಂ ಕಳ್ಯಾಣೀಂ ಪ್ರಚುರತರಕಳ್ಯಾಣಚರಿತಾಂ
ದಯಾಽಽಧೇಯಾಽಮೇಯಾ ಮಯಿ ಕನಕದುರ್ಗೇ ಭಗವತಿ || ೯೮ ||
ಹರಃ ಶೂಲೀ ಚೈಕಃ ಪಿತೃವನನಿವಾಸೀ ಪಶುಪತಿ-
-ರ್ದಿಶಾವಾಸೋ ಹಾಲಾಹಲಕಬಳನವ್ಯಗ್ರಧೃತಿಮಾನ್ |
ಗಿರೀಶೋಽಭೂದೇವಂವಿಧಗುಣಚರಿತ್ರೋಽಪಿ ಹಿ ಭವತ್
ಸುಸಾಂಗತ್ಯಾತ್ ಶ್ಲಾಘ್ಯೋ ನನು ಕನಕದುರ್ಗೇ ಭಗವತಿ || ೯೯ ||
ಸಮಸ್ತಾಶಾಧೀಶ ಪ್ರಮುಖ ಸುರವರ್ಯೈಃ ಪ್ರಣಮಿತಾ-
-ಮಹರ್ನಾಥಜ್ವಾಲಾಪತಿಹರಣಪಾಳೀ ತ್ರಿನಯನಾಮ್ |
ಸದಾ ಧ್ಯಾಯೇಽಹಂ ತ್ವಾಂ ಸಕಲವಿಬುಧಾಭೀಷ್ಟಕಲನೇ
ರತಾಂ ತಾಂ ಕಳ್ಯಾಣೀಂ ಹೃದಿ ಕನಕದುರ್ಗೇ ಭಗವತಿ || ೧೦೦ ||
ಸುಸಂತೋಷಂ ಯೋ ವಾ ಜಪತಿ ನಿಯಮಾದೂಹಿತಶತ-
-ಜ್ವಲದ್ವೃತ್ತೈಃ ಶ್ರಾವ್ಯಾಂ ನಿಶಿ ಕನಕದುರ್ಗಾಸ್ತುತಿಮಿಮಾಮ್ |
ಮಹಾಲಕ್ಷ್ಮೀಪಾತ್ರಂ ಭವತಿ ಸದನಂ ತಸ್ಯ ವದನಂ
ಗಿರಾಂ ದೇವೀಪಾತ್ರಂ ಕುಲಮಪಿ ವಿಧೇಃ ಕಲ್ಪಶತಕಮ್ || ೧೦೧ ||
ಸ್ತುತಿಂ ದುರ್ಗಾದೇವ್ಯಾಃ ಸತತಮಘಸಂಹಾರಕರಣೇ
ಸುಶಕ್ತಾಂ ವಾ ಲೋಕೇ ಪಠತಿ ಸುಧಿಯಾ ಬುದ್ಧಿಕುಶಲಃ |
ಶ್ರಿಯಂ ದೇವೀ ತಸ್ಮೈ ವಿತರತಿ ಸುತಾನಾಂ ಚ ಜಗತಾಂ
ಪತಿತ್ವಂ ವಾಗ್ಮಿತ್ವಂ ಬಹು ಕನಕದುರ್ಗೇ ಭಗವತಿ || ೧೦೨ ||
ಶತಶ್ಲೋಕೀಬದ್ಧಂ ನನು ಕನಕದುರ್ಗಾಂಕಿತಪದಂ
ಗುರೂಪನ್ಯಸ್ತಂ ತದ್ಭುವಿ ಕನಕದುರ್ಗಾಸ್ತವಮಿದಮ್ |
ನಿಬದ್ಧಂ ಮಾಣಿಕ್ಯೈಃ ಕನಕಶತಮಾನಂ ಭವತಿ ತೇ
ಯಥಾ ಹೃದ್ಯಂ ದೇವಿ ಸ್ಫುಟಪದವಿಭಕ್ತಂ ವಿಜಯತಾಮ್ || ೧೦೩ ||
ಇತಿ ಶ್ರೀಮತ್ಪರಮಹಂಸ ಪರಿವ್ರಾಜಕಾಚಾರ್ಯವರ್ಯ ಶ್ರೀವಿದ್ಯಾಶಂಕರಾಚಾರ್ಯ ವಿರಚಿತಂ ಶ್ರೀಮತ್ಕನಕದುರ್ಗಾನಂದಲಹರೀ ಸ್ತೋತ್ರಮ್ |
గమనిక : రాబోయే మహాశివరాత్రి సందర్భంగా "శ్రీ శివ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
